Neʼe Nātou Fai Te Finegalo ʼo Te ʼAtua
ʼE Fai Faka Mafola Ia Petelo ʼi Te Penikosite
NEʼE ko te uhu ʼo te fasiga taʼu mātala ʼo te taʼu 33 ʼo totatou temi. Neʼe fiafia te hahaʼi ʼi te meʼa ʼaē ka hoko! Kua fonu te ʼu ala ʼo Selusalemi ko te kau Sutea pea mo te kau poloselite. Neʼe nātou ʼōmai mai te ʼu koga meʼa ohage ko Elam, Mesopotamia, Cappadoce, Esipito, pea mo Loma. Neʼe fakaofoofo te sio kia nātou ʼaia ʼi tonatou ʼu teu fakafenua pea mo te logo ki tanatou ʼu lea kehekehe! Ko ʼihi neʼe nātou folau ʼo fakalaka ia kilometa e lua, ke feala ai hanatou kau ki te ʼaho makehe ʼaia. Koteā koa te ʼaho ʼaia? Ko te Penikosite—ko he ʼaho fakafiafia ʼo te kau Sutea ʼe fakaʼiloga ai te fakaʼosi ʼo te tānaki ʼo te taʼukai.—Levitike 23:15-21.
ʼI te ʼaletale ʼo te fale lotu neʼe kohu ai te ʼu mōlaga ʼaē neʼe fai ai, pea neʼe hiva e te kau Levite te hiva ʼo Hallel (Pesalemo 113 ki te 118). ʼI muʼa ʼo te hola 9 uhu, neʼe hoko te meʼa fakapunamaʼuli. Neʼe hifo ifo mai te lagi, “he logoaʼa ohage ko he tuʼani matagi mālohi.” Neʼe ina fakafonu katoa ai te fale ʼaē neʼe fakatahitahi ai te toko 120 tisipulo ʼa Sesu Kilisito. ʼE fakamatala fēnei e te Tohi-Tapu: “Pea neʼe hā kia nātou te ʼu ʼaleloʼi afi pea neʼe mavaevae, ʼo tahi tuʼu ia nātou takitokotahi, pea neʼe nātou fonu fuli ʼi te laumālie maʼoniʼoni pea neʼe nātou kamata palalau ʼi te ʼu lea kehekehe, ʼo mulimuli pe ki te ʼu meʼa ʼaē neʼe tuku age e te laumālie ke nātou palalau kiai.”—Gāue 2:1-4.
Neʼe Tahi Logo Ki Tana Lea
Kua vave pe te hū ki tuʼa ʼo te tokolahi ʼo te kau tisipulo. Ko he meʼa fakapunamaʼuli, neʼe feala ke nātou palalau ʼi te ʼu lea kehekehe ʼa te hahaʼi! Koutou fakakaukauʼi muʼa te punamaʼuli ʼa he tahi ʼe haʼu mai Pelesia mo he tagata mai Esipito ʼe nā logo ki tanā ʼu lea totonu ʼe palalau kiai te kau Kalilea. ʼE mahino ia, neʼe punamaʼuli mo hoha te tokolahi. Neʼe nātou ʼui fēnei “Koteā te faka ʼuhiga ʼo te meʼa ʼaia?” Ko ʼihi neʼe nātou kamata vāʼi te ʼu tisipulo, ʼo nātou ʼui fēnei: “Kua nātou fonu pe ʼi te vino.”—Gāue 2:12, 13.
Ki muli age neʼe tuʼu ake te ʼapositolo ko Petelo pea neʼe palalau ia ki te kaugamālie. Neʼe ina fakamahino age kia nātou ko te poto ʼi te palalau ʼi te ʼu lea ʼe ko te milakulo ʼaia ʼe ina fakahoko te fakapapau ʼa te ʼAtua ʼaē neʼe fai e te polofeta ko Soele: “ ʼE ʼau folahi anai te koga ʼo toku laumālie ki te ʼu faʼahiga kakano kehekehe.” (Gāue 2:14-21; Soele 2:28-32) ʼIo, neʼe folahi e te ʼAtua tona laumālie maʼoniʼoni ki te kau tisipulo ʼa Sesu. Ko te fakamoʼoni ʼaia ʼe hā lelei mai ai kua fakatuʼuake ia Sesu mai te mate pea kua nofo nei ʼi selo ʼi te toʼomataʼu ʼo te ʼAtua. Neʼe ʼui fēnei e Petelo, “Ke ʼiloʼi papau e te ʼapi katoa ʼo Iselaele neʼe fakanofo ia ia e te ʼAtua ko te ʼAliki pea mo Kilisito, te Sesu ʼaē neʼe koutou tutuki ki te pou.”—Gāue 2:22-36.
Neʼe lave feafeaʼi kia nātou te faʼahi ʼaia? ʼE ʼui e te fakamatala “neʼe mamahi ʼaupito tonatou loto, pea neʼe nātou ʼui age fēnei kia Petelo pea mo te toe ʼo te kau ʼapositolo: ‘ ʼU tagata, ʼu tēhina, koteā ʼaē ʼe tonu ke mātou fai?’ ” Neʼe tali age e Petelo: “Koutou fakahemala, pea ke koutou tahi papitema.” Ko te toko 3 000 neʼe nātou fai te faʼahi ʼaia! Ki muli age, “neʼe nātou haga mulimuli pe ki te akonaki ʼa te kau ʼapositolo.”—Gāue 2:37-42.
ʼI tana palalau maʼuhiga ʼaia, neʼe fakaʼaogaʼi e Petelo te ʼuluaki “kalavi ʼo te puleʼaga ʼo selo” ʼaē neʼe fakapapau age e Sesu kia ia. (Mateo 16:19) Ko te ʼu kalavi ʼaia neʼe nātou faka fealagia te ʼu pilivilesio makehe ki te ʼu kūtuga kehekehe. Ko te ʼuluaki kalavi ʼaia neʼe ina faka fealagia ki te kau Sutea ke nātou liliu ko he kau Kilisitiano neʼe fakanofo ʼaki te laumālie maʼoniʼoni. Ki muli age, ko te lua pea mo te tolu kalavi neʼe nā toe faka fealagia te pilivilesio ʼaia ki te kau Samalitana pea mo te kau Senitile.—Gāue 8:14-17; 10:44-48.
Te ʼu Ako Maʼa Tatou
Logope la ko te hahaʼi tokolahi ʼaia ʼo te kau Sutea pea mo te kau poloselite neʼe nātou vaevae te hala ʼaē ʼo ʼuhiga mo te matehi ʼo te ʼAlo ʼo te ʼAtua, neʼe palalau fakaʼapaʼapa ia Petelo kia nātou, ʼo ina fakahigoa ia nātou “ ʼu tēhina.” (Gāue 2:29) Ko tana fakatuʼutuʼu ʼe ko te uga ʼo nātou ke nātou fakahemala, kae mole ko te tauteaʼi ʼo nātou. Koia, neʼe lelei tana fai palalau. Neʼe ina fakahā te ʼu meʼa moʼoni pea mo lagolago ki te ʼu puani ʼaia ʼaki te ʼu vaega ʼo te Tohi-Tapu.
Ko nātou ʼaē ʼe nātou faka mafola te logo lelei ia ʼaho nei, ʼe tonu ke nātou mulimuli fakalelei ki te faʼifaʼitaki ʼa Petelo. ʼE tonu ke nātou faiga ke nātou fai he felogoi lelei mo te ʼu hahaʼi ʼaē ʼe fagono pea mo nātou fakakaukauʼi ia nātou ʼaki te Tohi-Tapu. Mokā ʼe fakahā fakalelei te moʼoni ʼo te Tohi-Tapu, pea ʼe tali anai e ia ʼaē ʼe faitotonu.—Gāue 13:48.
Ko te faiva pea mo te lotomālohi ʼa Petelo ʼi te ʼaho ʼo te Penikosite neʼe kehe ia mo te temi ʼaē neʼe fakafisi ai kia Sesu ʼi te ʼu vāhaʼa e fitu ki muʼa atu. ʼI te ʼaluʼaga ʼaia neʼe palalisia ia Petelo ʼi tana manavasiʼi ki te tagata. (Mateo 26:69-75) Kae neʼe tagi mamahi ia Sesu ʼo ʼuhiga mo Petelo. (Luka 22:31, 32) ʼE mahino papau ia, ʼi te hā ʼa Sesu kia Petelo ʼi tona fakatuʼuake neʼe ina fakaloto mālohiʼi ai te ʼapositolo. (1 Kolonito 15:5) Ko tona ikuʼaga, neʼe mole puli ai te tui ʼa Petelo. ʼO mole tuai, pea neʼe lototoʼa ia ʼi te fai faka mafola. Koia, neʼe mole gata tana fai faka mafola ʼi te Penikosite kae neʼe hoholo atu ʼi te temi ki muli mai.
E feafeaʼi koa mo kapau ʼe tou tau hēʼia ʼi he faʼahi, ohage ko Petelo? Tou fakahā te loto fakahemala, tou faikole ke fakamolemole tatou pea ke tou faiga ke tou maʼu he tokoni fakalaumālie. (Sake 5:14-16) Pea ʼe feala ke uga tatou ʼaki he loto falala ke tou fakamuʼamuʼa tatatou tauhi taputapu ʼaē ʼe leleiʼia e tatatou Tāmai manavaʼofa ʼaē ʼe ʼi selo, ia Sehova.—Ekesote 34:6.