Ke Tou Leleiʼia Te Agatonu Mo Te Loto Fakamolemole ʼa Sehova

1, 2. (1) He ko ʼe ʼe tou leleiʼia te ʼu kaumeʼa ʼae ʼe agatonu mo loto fakamolemole? (2) Kotea te ʼu fehuʼi ʼae ka tou tali anai ki ai ʼi te alatike ʼaeni?

ʼE FEAFEAʼI kia koutou ia he kaumeʼa moʼoni? Ko te tuagaʼane ʼe higoa ko Ashley ʼe ina ui ko he kaumeʼa moʼoni, ʼe ko he tahi ʼe tokoni tuʼumaʼu atu pea mo loto fakamolemole moka ʼe kotou fai ni hala. ʼE tou leleiʼia fuli te ʼu kaumeʼa ʼaia heʼe natou tokoni mai ke tou logo fimalie pea mo tou logoʼi ʼe ʼofainaʼi tatou.—Taag. 17:17.

² Ko Sehova ʼe ko te Kaumeʼa agatonu mo loto fakamolemole tokotahi ʼae ʼe feala ke tou maʼu. ʼE ui fenei e te tagata faipesalemo ʼo ʼuhiga mo Sehova: “Koteuhi e ke agalelei, e ke fakamolemole, pea e ke fonu i te ofa kia natou fuli ae e fetagihi kia koe.” (Pes. 86:5) Kotea te fakaʼuhiga ʼo he tahi ʼe agatonu mo loto fakamolemole? ʼE fakaha feafeaʼi e Sehova te ʼu kalitate fakatalakitupua ʼaia? ʼE feafeaʼi hatatou faʼifaʼitakiʼi ia ia? Moka tou iloʼi te tali ki te ʼu fehuʼi ʼaia, pea ʼe malohi age anai totatou ʼofa ʼae kia Sehova, totatou Kaumeʼa lelei tokotahi. ʼE toe feala ai foki ke lelei age tatatou fakakaumeʼa ʼae mo ʼotatou tehina mo tuagaʼane.—1 Soa. 4:7, 8.

KO SEHOVA ʼE AGATONU

3. Kotea te fakaʼuhiga ʼo he tahi ʼe agatonu?

³ Ko he tahi ʼe agatonu, ʼe agatonu ia kia ia ʼae ʼe ʼofa ai. ʼE ina fakaha tona ʼofa ʼaki tana haga tokoni mo lagolago ki he tahi age. ʼE mole ina fai pe te faʼahi ʼaia ʼi te ʼu temi faigamalie kaʼe maʼia mo te ʼu temi faigataʼa. ʼE ui ʼi te Tohi-Tapu ko Sehova ʼe “agatonu.” ʼE mole he tahi ʼe agatonu age ia te ia.—Apk. 16:5, MN.

4, 5. (1) ʼE fakaha feafeaʼi e Sehova tana agatonu? (2) He ko ʼe ʼe tou lotomalohi moka tou fakakaukau ki te agatonu ʼa Sehova?

⁴ ʼE fakaha feafeaʼi e Sehova tana agatonu? ʼE lagolago tuʼumaʼu ki ʼana kaugana agatonu. Ko te Hau ko Tavite, te tahi ʼo ʼana kaugana ʼaia, neʼe ina vikiʼi te agatonu ʼa Sehova kia ia. Neʼe ina ui fenei: “ ʼAki ia ia ʼae ʼe agatonu ʼe ke agatonu anai kia ia.” (2 Sam. 22:26, MN) Lolotoga te ʼu ʼahiʼahi ʼa Tavite, neʼe agatonu ia Sehova ʼo ina takitaki, mo puipui pea mo haofaki ia ia. (2 Sam. 22:1) ʼAki te ʼu faʼahi ʼaia, neʼe mahino Tavite ʼe mole gata pe te agatonu ʼa Sehova ʼi ʼana palalau, kaʼe ʼe toe tokoni ki ʼana kaugana. He ko ʼe neʼe agatonu ia Sehova kia Tavite? Koteʼuhi he neʼe agatonu Tavite kia te ia. ʼE ʼofa Sehova ki ʼana kaugana ʼuhi ko tanatou agatonu, pea ʼe agatonu kia natou ʼae ʼe agatonu kia te ia.—Taag. 2:6-8.

⁵ ʼE tou lotomalohi moka ʼe tou fakakaukau ki te agatonu ʼa Sehova ki ʼana kaugana. Ko te tehina agatonu ʼe higoa ko Reed neʼe ina ui, ʼe ina leleiʼia tana lau ʼae pe neʼe tokoni feafeaʼi ia Sehova kia Tavite ʼi te ʼu aluʼaga faigataʼa. Neʼe ina fakamahino fenei: “Maʼia ʼi te feholaʼaki ʼa Tavite, ʼo nofo ʼi te ʼu loto ʼana peʼe ʼi tuʼa, neʼe lagolago aipe Sehova kia ia. Kia au ʼe ko he aluʼaga fakalotomalohi ʼaupito! ʼE au manatuʼi ai tatau aipe pe kotea te aluʼaga ʼe feala ke hoko peʼe hage ʼe mole he puleʼaki ki ai, kaʼe ko Sehova ʼe tokoni mai anai mo kapau ʼe au nofo agatonu kia te ia.” ʼE mahino papau ia ʼe kotou toe manatu feia.—Loma 8:38, 39.

6. ʼE toe fakaha feafeaʼi e Sehova tana agatonu? Pea kotea tona fua lelei ki ʼana kaugana?

⁶ ʼE toe fakaha feafeaʼi e Sehova tana agatonu? ʼI tana mulimuli tuʼumaʼu ki ʼana lekula. (Esa. 46:4) Ko te ʼu tonu fuli ʼae ʼe ina fai ʼe fakatafito ki ʼana lekula, pea ko ʼana lekula ʼe mole fetogi ʼi he temi. (Mala. 3:6) ʼE toe fakaha e Sehova tana agatonu ʼi tana fakahoko tuʼumaʼu te meʼa ʼae ʼe ina fakapapau. (Esa. 55:11) Pea ʼe fua lelei te agatonu ʼa Sehova ki ʼana kaugana fuli. ʼO feafeaʼi? Moka tou faiga malohi ʼo tou mulimuli ki te ʼu lao ʼa Sehova, pea ʼe feala ke tou tui papau ʼe ina fakahoko anai tana fakapapau ʼae ke ina tapuakina tatou.—Esa. 48:17, 18.

KE TOU AGATONU OHAGE KO SEHOVA

7. Kotea te faʼahi ʼe feala ai ke kotou agatonu ohage ko Sehova?

⁷ ʼE feafeaʼi hatatou agatonu ohage ko Sehova? ʼAki tatatou tokoni lelei kia natou ʼae ʼe tau mo he faigataʼaia. (Taag. 3:27) Ohage la, ʼe kotou iloʼi koa he tehina peʼe ko he tuagaʼane ʼe lotovaivai lagi heʼe mahaki, peʼe fakafeagai ki ai tona famili, peʼe ʼuhi ko ʼona vaivaiʼaga? ʼE feala ke kotou fakalotomalohiʼi te tehina peʼe ko te tuagaʼane ʼaia ʼaki “ni kupu lelei pea mo ni kupu fakafimalie.” (Sakl. 1:13)a ʼI takotou fai te faʼahi ʼaia, ʼe kotou fakaha ai ʼe kotou agatonu pea ko koutou ko he kaumeʼa moʼoni, “e ofa age i te tehina.”—Taag. 18:24.

8. ʼE feafeaʼi hatatou nofo agatonu, ohage la moka kua tou ʼohoana?

⁸ ʼE ʼi ai ʼihi age faʼahi ʼe feala ai ke tou agatonu kia natou ʼae ʼe tou ʼoʼofa ai. Ohage la, moka kua tou ʼohoana, ʼe tou iloʼi ʼe tonu ke tou nofo agatonu ki totatou ʼohoana. (Taag. 5:15-18) ʼE mole gata ʼaki pe tatatou tekeʼi te tono, kaʼe ʼe toe tonu foki ke mole tou fai he meʼa ke tou to ai ki te tono. (Mat. 5:28) ʼE tou toe fakaha ʼe tou agatonu ki ʼotatou tehina mo tuagaʼane ʼo mole tou fatufatuʼi natou peʼe fakamafola ni loi ʼo ʼuhiga mo natou. Pea ʼe mole tou fia fagono foki ki te ʼu palalau ʼaia.—Taag. 12:18.

9, 10. (1) Ko ai tafitō ʼae ʼe tou fia nofo agatonu ki ai? (2) ʼE faigafua tuʼumaʼu anai koa hatatou fakalogo kia Sehova? Kotou tuku mai he faʼifaʼitaki.

⁹ Kaʼe ʼe tou fia nofo agatonu tafitō kia Sehova. ʼO feafeaʼi? ʼAki tatatou ʼofa ki te meʼa ʼae ʼe ʼofa ki ai Sehova pea mo fehiʼa ki te meʼa ʼae ʼe fehiʼa ki ai. Pea ʼe tonu leva ke ha ʼi totatou maʼuli, ke fiafia ai Sehova. (Lau ia Pesalemo 97:10.) Kapau ʼe lahi age tatatou ako ʼae ke alu tahi ʼatatou manatu mo ʼae ʼa Sehova, pea ʼe faigafua age anai hatatou fakalogo kia te ia.—Pes. 119:104.

¹⁰ ʼE moʼoni ʼe mole faigafua tuʼumaʼu anai hatatou fakalogo kia Sehova. ʼE lagi tonu ke tou faiga malohi ke tou nofo agatonu kia te ia. Ohage la, ko he tuagaʼane selipatea ʼe lagi fia ʼohoana, kaʼe heʼeki ina maʼu he tehina ke liliu anai ko hona ʼohoana lelei. (1 Ko. 7:39) ʼI te fale gaue, ʼe lagi faiga ʼe ʼona kauga gaue ʼae ʼe mole fakamoʼoni kia Sehova ke natou maʼu he tahi ke nā fakatahi. Pea ʼe lagi ina logoʼi tana nofo tokotahi. Kaʼe ʼe ina fakatotonu ke mole fakatahi peʼe ʼohoana mo he tahi ʼe mole tauhi ki te ʼAtua heʼe fia nofo agatonu ia kia Sehova. Ko te kau Kilisitiano ʼae ʼe natou hage ko te tuagaʼane ʼaia, ʼe ko he ʼu faʼifaʼitaki lelei ia ʼi te agatonu. ʼE tapuakina anai e Sehova ia natou fuli ʼae ʼe haga tauhi agatonu kia te ia ʼi te ʼu aluʼaga faigataʼa.—Hep. 11:6.

KO SEHOVA ʼE LOTO FAKAMOLEMOLE

11. Kotea te fakaʼuhiga ʼo he tahi ʼe loto fakamolemole?

¹¹ Kotea te fakaʼuhiga ʼo he tahi ʼe loto fakamolemole? Ko he tahi ʼe loto fakamolemole ʼe mole nofo ita ia ki ʼihi ʼuhi he neʼe natou fai he meʼa ʼe kovi kia ia. ʼE mole fakaʼuhiga leva ʼe ina tali te meʼa ʼae neʼe natou fai age peʼe ina ui neʼe mole hoko. Kaʼe ʼe ina fai te tonu ʼae ke mole ita. Ko te tahi kalitate fakaofoofo ʼo Sehova ʼe ko tana loto fakamolemole. ʼE ui ʼi te Tohi-Tapu ko Sehova ʼe “fakamolemole” kia natou ʼae ʼe fakahemala moʼoni.—Pes. 86:5.

12. (1) ʼE loto fakamolemole feafeaʼi ia Sehova? (2) Kotea te fakaʼuhiga ʼo te ui ʼae e Petelo ʼe feala ke fakamolemole te ʼu agahala ʼa he tahi?

¹² ʼE loto fakamolemole feafeaʼi ia Sehova? ʼE ui ʼi te Tohi-Tapu ʼe fakamolemole “lahi” ia Sehova. Ko tona fakaʼuhiga ʼe fakamolemole katoa pea mo talu ai. (Esa. 55:7, MN) ʼE feafeaʼi hatatou iloʼi ʼe fakamolemole katoa ia Sehova? Kotou fakakaukauʼi te fakapapau ʼae ia Gaue 3:19. (Lau.) Neʼe ui e te apositolo ko Petelo ko te tagata agahala ʼae ʼe fakahemala moʼoni, ʼe loto mamahi ia ʼuhi ko te meʼa kovi ʼae neʼe ina fai. ʼE lava feafeaʼi ki he tahi neʼe agahala ke fakamolemole e Sehova? Neʼe ui e Petelo ʼe tonu ke “fakahemala” pea mo “tafoki.” Ko he tahi ʼe fakahemala moʼoni ʼe ina fakatotonu ke mole toe agahala. (2 Ko. 7:10, 11) ʼE tafoki, ko tona fakaʼuhiga, ʼe ina fakagata te fai ʼo te meʼa ʼae ʼe kovi, kaʼe ʼe ina fai ia meʼa fuli ʼae ʼe fiafia ai te ʼAtua. Pea ʼe hoki feala ai ke fakamolemole ʼana agahala. ʼI te lea Fakakeleka ko te kupu “fakamolemole” ʼe fakaʼuhiga ki te molehi katoa peʼe pulihi katoa. Koia moka fakamolemole ia Sehova, pea ʼe hage pe ia ʼe ina pulihi katoa ʼatatou agahala. Pea ʼe fakamolemole katoa anai ia Sehova kia ia ʼae neʼe agahala.—Hep. 10:22; 1 Soa. 1:7.

13. Kotea ʼae ʼe tou ako ʼo ʼuhiga mo Sehova ʼaki te ʼu palalau ʼaeni: “E mole au toe manatui anai tanatou agahala”?

¹³ ʼE feafeaʼi hatatou iloʼi ko Sehova ʼe ina fakamolemole ʼo talu ai ʼatatou agahala? Tou ako pe fakamolemole feafeaʼi ia Sehova mai te meʼa ʼae neʼe ina ui kia Selemia ʼi te lea fakapolofeta ʼo ʼuhiga mo te kau Kilisitiano fakanofo. (Lau ia Selemia 31:34.) Neʼe ui fenei e Sehova: “E au fakamolemole anai tanatou agakovi, pea e mole au toe manatui anai tanatou agahala.” Moka kua fakamolemole ia Sehova, pea ʼe mole toe manatu ia ki ʼatatou agahala ke tupu ai hana tukugakoviʼi peʼe tauteaʼi liuliuga tatou. ʼE ina fakamolemole ʼatatou agahala ʼo talu ai.—Loma 4:7, 8.

14. He ko ʼe ʼe feala ke tou loto fimalie moka ʼe tou metitasio ki te loto fakamolemole ʼa Sehova? Kotou tuku mai he faʼifaʼitaki.

¹⁴ ʼE feala ke tou loto fimalie moka ʼe tou metitasio ki te loto fakamolemole ʼa Sehova. Tou vakaʼi te faʼifaʼitaki ʼo he tuagaʼane ʼe tou fakahigoaʼi anai ko Elaine. ʼI ni taʼu ki muʼa atu neʼe fakamavae. Pea hili ni taʼu ki ai, neʼe toe fakahu ki te kokelekasio. Logola tona toe fakahu, kaʼe ʼe fakaha e Elaine neʼe mole tui moʼoni ia neʼe kua fakamolemole ia ia e Sehova. Neʼe manatu ia neʼe ʼofa lahi age pe Sehova ʼi ʼihi ia ia. Kaʼe neʼe loto fimalie ʼi tana metitasio ʼae ki te fakamatalatala ʼo te loto fakamolemole ʼa Sehova ʼi te Tohi-Tapu. Ohage la, neʼe ina lau moka fakamolemole ia Sehova, ʼe hage pe ia ʼe ina fufulu tatou ke tou maʼa mai ʼatatou agahala. ʼE mole ʼaoga ke tou tukugakoviʼi tatou ʼi totatou maʼuli katoa.b ʼE hoko atu fenei e Elaine: “Neʼe au mahino ai neʼe mole au tui ko Sehova ʼe feala ke ina fakamolemole katoa ia au, pea neʼe au manatu ʼe au ʼamo anai te kavega ʼaia ʼi toku maʼuli katoa. ʼE au iloʼi ʼe ʼaoga anai ki ai he temi, kaʼe ʼe au kamata logoʼi kua feala taku fakaovi moʼoni kia Sehova, pea mo hage ia kua toʼo ia au he kavega mamafa.” Ko Sehova ʼe ko he ʼAtua ʼofa mo loto fakamolemole moʼoni ia!—Pes. 103:9.

TOU FAʼIFAʼITAKIʼI TE LOTO FAKAMOLEMOLE ʼA SEHOVA

15. ʼE feafeaʼi hatatou faʼifaʼitakiʼi te loto fakamolemole ʼa Sehova?

¹⁵ ʼE feala hatatou faʼifaʼitakiʼi ia Sehova ʼo tou filifili ke tou fakamolemole ki ʼihi. (Lau ia Luka 17:3, 4.) Tou manatuʼi moka fakamolemole ia Sehova, pea ʼe mole ina toe manatuʼi te meʼa ʼae neʼe tou fai. Moka tou fakamolemole ki ʼihi, ʼe toe tonu foki mo tatou ke ʼaua naʼa tou manatuʼi te meʼa kovi ʼae neʼe natou fai mai pea ke mole tou palalau ki te faʼahi ʼaia ʼi te ka haʼu.

16. (1) Kotea te fakaʼuhiga ʼo te fakamolemole ʼo te ʼu meʼa kovi ʼae ʼe fai mai e ʼihi? Kaʼe ʼe mole fakaʼuhiga kitea? (2) Kotea ʼae ʼe tonu ke tou fai mo kapau ʼe tou loto ke fakamolemole tatou e Sehova?

¹⁶ Ko tatatou fakamolemole te ʼu meʼa kovi ʼae ʼe fai mai e ʼihi, ʼe mole fakaʼuhiga leva ʼe tou tali te meʼa ʼae neʼe natou fai peʼe tou leleiʼia ke gaohi koviʼi tatou. Kailoa ia. Ko tona fakaʼuhiga ʼe tou filifili ke mole tou nofo ita kia natou. Pea ʼe maʼuhiga ke tou manatuʼi, kapau ʼe tou loto ke fakamolemole tatou e Sehova, pea ʼe tonu ke tou fakamolemole ki ʼihi. (Mat. 6:14, 15) Ko Sehova ʼe ina manatuʼi “ko tatou ko te efu.” ʼE mahino kia te ia ʼe tou heʼe haohaoa. (Pes. 103:14) Koia moka ui peʼe fai mai e ʼihi he meʼa ʼe kovi kia tatou, ʼe tonu ke tou manatuʼi ʼe natou heʼe haohaoa pe ohage ko tatou, pea ʼe tonu ke tou fakamolemole fakamalotoloto kia natou.—Efe. 4:32.

17. Kotea ʼae ʼe lava tokoni atu ke kotou fakamolemole ki he tahi neʼe ina fakalotomamahiʼi koutou?

¹⁷ ʼE moʼoni, ʼi ʼihi temi ʼe faigataʼa hatatou fakamolemole ki ʼihi. Maʼia mo ʼihi kau Kilisitiano fakanofo ʼi te temi ʼo Paulo neʼe ʼaoga kia natou he tokoni moʼo fakatokatoka te ʼu fihifihia ʼae neʼe hoko ia natou. (Filp. 4:2) Kapau neʼe fai atu e he tehina peʼe ko he tuagaʼane he meʼa fakatupu lavea, pea kotea ʼae ʼe feala ke tokoni atu ke kotou loto fakamolemole? Kotou fakakaukauʼi te aluʼaga ʼae neʼe hoko kia Sopo. Ko Elifasi, mo Pilitate, pea mo Tesofa, ʼae neʼe lau ko he ʼu kaumeʼa ʼo Sopo, neʼe natou laukoviʼi mo tukugakoviʼi ia Sopo ʼo ʼuhiga mo he ʼu meʼa ʼe kovi neʼe mole ina fai. Neʼe lotomamahi ʼaupito ai ia Sopo. (Sopo 10:1; 19:2) Pea neʼe ui leva e Sehova ki te ʼu tagata ʼe toko tolu ʼaia, neʼe kovi te meʼa ʼae neʼe natou fai pea neʼe tonu ke natou olo kia Sopo ʼo momoli he sakilifisio ʼo ʼuhiga mo ʼanatou agahala. (Sopo 42:7-9) Kaʼe neʼe toe ui e Sehova kia Sopo ke ina fakahoko te faʼahi. Kotea te faʼahi ʼaia? Neʼe ina ui kia Sopo ke ina hufakiʼi te ʼu tagata ʼe toko tolu ʼaia. Neʼe fai e Sopo te faʼahi ʼaia, pea neʼe tapuakina ai e Sehova ia Sopo ʼuhi ko tana loto fakamolemole. (Lau ia Sopo 42:10, 12, 16, 17.) Kotea te ako ʼe feala ke kotou taʼofi mai ai? Moka kotou faikole fakamalotoloto ʼo ʼuhiga mo he tahi neʼe ina fakalotomamahiʼi koutou, pea ʼe lava tokoni atu ke kotou lolomi ai tokotou ita ki ai.

KE TOU HAGA AKO MO FAʼIFAʼITAKIʼI TE ʼU KALITATE ʼO SEHOVA

18, 19. Kotea ʼae ʼe tou loto ke tou haga fai?

¹⁸ Neʼe tou fiafia ʼi tatatou ako lahi ʼae ʼo ʼuhiga mo te ʼu kalitate ʼo Sehova. Neʼe tou ako ʼe ko he tahi ʼe faigafua te fakaovi kia te ia, ʼe mole fakapalatahi, ʼe loto foaki, ʼe fakapotopoto, ʼe agatonu pea mo loto fakamolemole. ʼE moʼoni ʼe kei toe lahi age te ʼu faʼahi ke tou ako ʼo ʼuhiga mo Sehova. Pea ʼe tou fiafia anai ʼi te ako lahi age ʼo ʼuhiga mo ia ʼo talu ai. (Ekl. 3:11) ʼE tou manatu tahi mo te apositolo ko Paulo ʼae neʼe ina tohi fenei: “Oiau! Te loloto o te u koloa, mo te poto, pea mo te malama o te Atua!” ʼE feala hatatou fai te ʼu palalau ʼaia ʼo ʼuhiga mo te ʼofa ʼo te ʼAtua pea mo ʼona kalitate ʼe ono ʼae neʼe tou talanoa ki ai ʼi te ʼu alatike ʼaeni.—Loma 11:33.

¹⁹ Koia tou haga ako ke lahi age ʼo ʼuhiga mo te ʼu kalitate ʼo Sehova, mo metitasio ki ai, pea mo faʼifaʼitakiʼi leva ʼi totatou maʼuli. (Efe. 5:1) Pea ko totatou ʼofa kia Sehova ʼe malohi age anai pea ʼe tou logoʼi anai kua tou ovi age kia te ia. ʼE toe lahi age anai tatatou manatu tahi ʼae mo te tagata faipesalemo ʼae neʼe hiva fenei: “Kia au, ko taku fakaovi ki te Atua, koena toku koloa.”—Pes. 73:28.