ʼE Fakahā Totonu Mai e Te ʼAtua Tona ʼOfa Kiā Tātou

“Ko te ʼofa makehe ʼe pule [anai] ʼaki te faitotonu ʼo aʼu ki te maʼuli heʼegata.”—LOMA 5:21.

1, 2. Koteā te ʼu meʼa ʼofa kehekehe e lua ʼe feala ke tou talanoa kiai, pea ko te meʼa ʼofa fea ʼaē ʼe maʼuhiga ʼaupitō age?

KO TE polofesea ʼo te Univelesitē ʼo Melbourne ʼi Ositalalia, neʼe ina ʼui ko te ʼu lao ʼaē neʼe fai e te Puleʼaga Loma neʼe ko he meʼa ʼofa ia ʼe feala ʼi te ʼalu ʼo te temi ke ʼaoga tuʼumaʼu pē ia ki te maʼuli ʼo te hahaʼi. Kae ʼe akoʼi mai ʼi te Tohi-Tapu, neʼe foaki mai e te ʼAtua kiā tātou ia te meʼa ʼofa ʼe maʼuhiga ʼaupitō age. ʼE ko te fakatuʼutuʼu neʼe fai e te ʼAtua ke leleiʼia ai ia tātou e te ʼAtua pea ke tou faitotonu ai, pea ke tou maʼu te ʼamanaki ʼaē ke haofaki tātou pea mo maʼu te maʼuli heʼegata.

² ʼE feala ke kita ʼui, neʼe ʼi ai te ʼu faʼahi ʼo te lao neʼe mulimuli kiai te ʼAtua ke feala ai hatatou maʼu ia te meʼa ʼofa ʼaia. Iā Loma kāpite 5, ʼe mole talanoa te ʼapositolo ko Paulo ki te ʼu faʼahi ʼaia ʼaki he ʼu tuʼuga lao fefeka. Kailoa ia, he neʼe ina kamata tana tohi ʼaia, ʼaki te fakapapau fakafiafia ʼaenī: “ ʼI te kua tala ʼaē ko tātou ko te kau faitotonu ʼuhi ko te tui, [koia] ke tou fakafiafia ʼi te tokalelei mo te ʼAtua ʼaki totatou ʼAliki ko Sesu Kilisito.” Koia, ko nātou ʼaē ʼe natou maʼu ia te meʼa ʼofa ʼo te ʼAtua, ʼe uga ai ia nātou ke natou ʼoʼofa ki te ʼAtua. Neʼe kau Paulo iā nātou ʼaia ʼaē neʼe natou toe ʼoʼofa mo nātou ki te ʼAtua. Neʼe ina ʼui fēnei ʼi tana tohi: “Ko te ʼofa ʼo te ʼAtua kua mafola ʼi totatou loto ʼaki te laumālie māʼoniʼoni.”—Loma 5:1, 5.

3. Ko te ʼu fehuʼi fea ʼaē ʼe lagaʼi ʼo ʼuhiga mo te meʼa ʼofa ʼaia?

³ Kae he koʼē neʼe tonu ke fai te meʼa ʼofa ʼaia? Koteā ʼaē neʼe fai e te ʼAtua moʼo foaki te meʼa ʼofa ʼaia ʼi hona ʼaluʼaga ʼe faitotonu? Pea koteā ʼaē ʼe tonu ke fai e nātou ʼaē ʼe natou fia maʼu te meʼa ʼofa ʼaia? Tou vakaʼi age muʼa te ʼu tali ki te ʼu fehuʼi ʼaia pea mo te ʼaoga ʼo tona ʼu tali ki te fakamaʼuhigaʼi ʼo te ʼofa ʼo te ʼAtua.

ʼE Fakafeagai Te ʼOfa ʼo Te ʼAtua Ki Te Agahala

4, 5. (a) Koteā te fakamoʼoni lahi neʼe foaki e Sehova moʼo fakahā ia tona ʼofa ʼaē ki te mālamanei? (b) Koteā te meʼa neʼe hoko ʼi te kamataʼaga ʼe tokoni mai anai kiā tātou ke tou mahino ki te koga tohi ʼo Loma 5:12?

⁴ Neʼe fakahā e Sehova ia tona ʼofa lahi ʼaē ki te mālamanei, ʼi tana fekauʼi mai ia tona ʼAlo ʼulu tokotahi ke haʼu ʼo tokoni mai kiā tātou. Neʼe talanoa fēnei ia Paulo ʼo ʼuhiga mo te faʼahi ʼaia: “ ʼO ʼuhiga mo te faʼahi ʼaia, ʼe fakahā totonu mai e te ʼAtua ia tona ʼofa kiā tātou, logolā tatatou kei agahala, neʼe mate ia Kilisito maʼa tātou.” (Loma 5:8) Kotou fakakaukauʼi age muʼa tana ʼui ʼaē: “Logolā tatatou kei agahala.” ʼE ʼaoga ki te hahaʼi fuli ke natou mahino peʼe koteā ʼaē ʼe ʼui ai ʼe ko tātou ko te hahaʼi agahala.

⁵ ʼE fakamahino e Paulo ia te faʼahi ʼaia, ʼo ina kamata ʼaki te manatu ʼaenī: “ ʼAki pē te tagata e tahi neʼe hū te agahala ki te mālamanei, pea ʼaki te agahala te mate, pea koia kua mafola ai te mate ki te tagata fuli pē koteʼuhi kua natou agahala fuli.” (Loma 5:12) ʼE tou lava mahino ki te ʼu palalau ʼaia, he neʼe tohi e te ʼAtua te fakamatala pe neʼe feafeaʼi te kamataʼaga ʼo te maʼuli ʼo te tagata. Neʼe fakatupu e Sehova ia te tagata pea mo te fafine, ko Atama pea mo Eva. Ko Sehova te Tupuʼaga ʼe haohaoa, pea neʼe toe haohaoa pē foki mo te ʼuluaki taumātuʼa ʼaia ʼaē neʼe ina fakatupu, totatou ʼu tupuʼaga. Neʼe ko te meʼa pē e tahi ʼaē neʼe tapuʼi age e te ʼAtua kiā nāua, pea mo ina fakahā age kiā nāua, kapau ʼe nā talagataʼa ki te lao ʼaia, pea ko tona tūʼā ʼe nā mamate anai. (Sen. 2:17) Kae neʼe nā filifili nāua ke nā fai te aga ʼe fua kovi anai kiā nāua, ʼi tanā talagataʼa ʼaē ki te fakatotonu ʼofa ʼa te ʼAtua, ʼo nā sītuʼa ai ki te ʼu lao ʼa te ʼAtua pea mo tona ʼuhiga Tuʼi ʼAliki.—Teu. 32:4, 5.

6. (a) He koʼē neʼe mamate te hōloga ʼo Atama, pea neʼe haga koa te Lao ʼaē neʼe foaki e te ʼAtua kiā Moisese ʼo pulihi tonatou ʼaluʼaga ʼaia? (b) Koteā ʼaē ʼe feala ke fakatatau kiai te ʼu mahaki ʼaē ʼe maʼu e te ʼu fānau mai tanatou ʼu mātuʼa?

⁶ Neʼe hoki hili te agahala ʼaē neʼe fai e Atama pea hoki tutupu ake tana fānau, koia neʼe ina tuku holo ai leva ia te agahala pea mo tona ʼu fua kovi kiā tātou fuli. ʼE moʼoni, neʼe mole natou maumauʼi fakahagatonu te lao ʼa te ʼAtua ohagē ko tona fai ʼaē e Atama, koia ʼaē neʼe mole fakaʼuhiga tatau ai kiā nātou te agahala ʼaē neʼe fai e te ʼuluaki taumātuʼa; pea neʼe mole heʼeki he ʼu lao neʼe kua foaki e te ʼAtua ʼi te lakaga ʼaia. (Sen. 2:17) Kae neʼe tuku holo te agahala ki te hōloga ʼo Atama. Koia, neʼe mafola ai leva te agahala pea mo te mate ʼo aʼu ki te temi ʼaē neʼe foaki ai e te ʼAtua ki te kau Iselaele te ʼu lao. (Lau ia Loma 5:13, 14.) Ko te fua ʼo te agahala ʼaē neʼe tuku holo mai, ʼe lava fakatatau ki te ʼu mahaki ʼaē ʼe tou maʼu mai tatatou ʼu mātuʼa. ʼE moʼoni, ʼe lagi ko ʼihi pē ʼi te fānau ʼo te fāmili kā natou maʼu te ʼu mahaki ʼaia, kae mole ko te fānau fuli ʼaē kā mahaki. Kae ki te agahala ia, ʼe mole fēia heʼe tou maʼu fuli te agahala ʼaē mai ia Atama, koia ʼaē ʼe tou mamate fuli ai. ʼE feala koa ke haofaki tātou mai te ʼaluʼaga fakaʼofaʼofa ʼaia?

Te Fakatuʼutuʼu Neʼe Fai e Sehova ʼAki Ia Sesu Kilisito

7, 8. Koteā ʼaē neʼe kehekehe ai ia te ikuʼaga ʼo te ʼu aga ʼaē neʼe fai e te ʼu tagata haohaoa ʼe lua?

⁷ ʼI tona ʼofa, neʼe fai e Sehova te fakatuʼutuʼu moʼo haofaki te mālamanei mai te agahala ʼaē neʼe natou maʼu mai ia Atama. Neʼe fakamahino e Paulo neʼe fakafealagia te faʼahi ʼaia e te tahi age tagata, ʼe ko te tagata ki muli age ʼe haohaoa, ʼaē neʼe ko te lua Atama ʼaia. (1 Ko. 15:45) Kae neʼe kehekehe te ʼu ikuʼaga ʼo te ʼu aga ʼaia ʼa te ʼu tagata e lua. Koteā ʼaē neʼe nā kehekehe ai?—Lau ia Loma 5:15, 16.

⁸ Neʼe tohi fēnei e Paulo: “Ko te meʼa ʼofa ʼe mole hagē ia ko te hala.” Neʼe agahala ia Atama, koia ʼaē neʼe matatonu ai ke fakatūʼā ia ia ʼaki te mate. Kae neʼe mole ko ia tokotahi pē ʼaē neʼe mate. ʼE tou lau fēnei: “ ʼAki te hala ʼa te tagata [ʼaia] e tahi, tokolahi neʼe natou mamate.” Ko te fakatūʼā faitotonu ʼaē neʼe fai kiā Atama neʼe tonu foki ke toe fai ki tana fānau heʼe haohaoa fuli, ʼo kau ai mo tātou. Kae logolā te ʼaluʼaga ʼaia, ʼe tou fiafia heʼe tou ʼiloʼi ko te lua tagata haohaoa, ia Sesu, neʼe ina lava fai te meʼa ke ʼaua naʼa fakatūʼā tātou ki te mate. Koteā te meʼa ʼaia? ʼE kua feala ke tala kua tou faitotonu logolā “te ʼu tuʼuga hala” ae neʼe fai lolotoga te ʼu sēkulō. Neʼe koteā tona fua ki muli age? ʼE tou maʼu tona tali ʼi te talanoa ʼaē ʼa Paulo, kua “tala kua faitotonu te ʼu faʼahiga hahaʼi kehekehe ki te maʼuli.”—Loma 5:18.

9. Koteā ʼaē neʼe fai e te ʼAtua ʼi tana tala kua faitotonu te hahaʼi, ohagē ko tona ʼui iā Loma 5:16, 18?

⁹ Koteā ʼaē ʼe feala ke tou mahino kiai ʼaki te kupuʼi palalau ʼaenī: “ ʼE tala kua [nātou] faitotonu”? Neʼe tohi fēnei e te tagata fai fakaliliu Tohi-Tapu: “ ʼE ko he ʼu palalau fakatā ʼe pipiki ki te lao pea ʼe fakaʼuhiga mokā fai he fakamāu. ʼE talanoa ʼo ʼuhiga mo te fetogi ʼa te ʼu felōgoi ʼa he tahi mo te ʼAtua, kae mole fakaʼuhiga ki te fetogi ʼo te loto ʼo he tahi . . . ʼE fakatā te ʼAtua ki he tuʼi fakamāu neʼe ina fai te tonu ʼe lelei maʼa te hahaʼi neʼe fakalakahalaʼi, neʼe fakamāuʼi ʼi te telepinale ʼa te ʼAtua, he neʼe natou heʼe faitotonu. Kae neʼe fakamolemole e te ʼAtua te hahaʼi ʼaia.”

10. Koteā ʼaē neʼe fai e Sesu ke lava maʼu ai he fakatafito moʼo tala kua faitotonu te hahaʼi?

¹⁰ Koteā ʼaē ʼe fakatafito kiai e te “Tuʼi Fakamāu [faitotonu] ʼo te kele” ia tana fakamolemole ʼaē ki he aga ʼa he tahi ʼe heʼe faitotonu? (Sen. 18:25) ʼI tona ʼofa, neʼe fakatuʼu e te ʼAtua ia te fakatafito, ʼaki tana fekauʼi mai ia tona ʼAlo ʼulu tokotahi ki te kele. Neʼe fakahoko kātoa e Sesu te finegalo ʼo tana Tamai, logolā tona fakahalaʼi ʼaē e ʼihi, mo te lahi ʼaē ʼo tona fakalainoaʼi, pea mo tona gaohi koviʼi. Neʼe ina taupau tana agatonu ʼo ina tali ke matehi ia ia ʼi te pou fakamamahi. (Hep. 2:10) ʼAki te sākilifisioʼi ʼaē e Sesu ia tona maʼuli haohaoa, neʼe ina foaki te totogi ʼe feala ai anai ke fakaʼāteaina te hōloga ʼo Atama mai te agahala pea mo te mate.—Mat. 20:28; Loma 5:6-8.

11. Koteā te meʼa neʼe tatau mo te totogi?

¹¹ ʼI te tahi age vaega Tohi-Tapu, neʼe ʼui fēnei e Paulo ʼo ʼuhiga mo Sesu: ‘Neʼe ina foaki tona maʼuli ʼaē neʼe tatau mo ʼaē neʼe pulihi maʼa te hahaʼi fuli.’ (1 Tim. 2:6) Koteā te fakaʼuhiga ʼo te ʼui ʼaē e Paulo ‘neʼe tatau mo ʼaē neʼe pulihi? ʼI tatatou ʼu tohi ʼaē neʼe tā ki muʼa atu, neʼe fakamatalatala ai ko Atama neʼe ina tuku holo te agahala pea mo te mate ki te ʼu toko lauʼi miliale hahaʼi, tona hōloga kātoa. Pea ko Sesu, ʼi tona ʼuhiga tagata haohaoa, neʼe feala ke ina fakatupu hana fānau haohaoa e toko lauʼi miliale. Koia, neʼe tou mahino ai leva, ko te maʼuli ʼo Sesu pea mo te maʼuli ʼo te hōloga haohaoa ʼaē neʼe feala ke ina maʼu, neʼe natou faʼufaʼu ia he sākilifisio ʼe tatau mo te maʼuli ʼo Atama pea mo tona hōloga heʼe haohaoa.a Kae ʼe mole ʼui ʼi te Tohi-Tapu ko te hōloga ʼaē neʼe feala ke maʼu e Sesu, neʼe ko he tahi ʼaia koga ʼo te sākilifisio faitotogi. Iā Loma 5:15-19, ʼe ʼui ko te mate ʼa te “tagata pē e tahi” neʼe ina foaki te ʼāteaina. ʼEī, ko te maʼuli haohaoa ʼo Sesu neʼe tatau mo te maʼuli ʼo Atama. Koia ʼe ko Sesu Kilisito tokotahi pē ʼaē ʼe tonu ke fakamaʼuhigaʼi. Kua feala ki te hahaʼi kehekehe ke natou maʼu te meʼa ʼofa ʼe mole totogi pea mo te maʼuli, ʼuhi ko “te gāue faitotonu e tahi” ʼaē neʼe fai e Sesu, ia tana maʼuli fakalogo pea mo tana nofo agatonu ʼo aʼu ki te mate. (2 Ko. 5:14, 15; 1 Pet. 3:18) Neʼe hoko feafeaʼi ia te faʼahi ʼaia?

Neʼe Fakamolemole Ia Nātou ʼo Fakatafito Ki Te Totogi

12, 13. He koʼē ʼe ʼaoga ia te manavaʼofa ʼo te ʼAtua pea mo tona ʼofa kiā nātou ʼaē kua tala kua faitotonu?

¹² Neʼe tali e Sehova ʼAtua ia te sākilifisio faitotogi ʼaē neʼe foaki age e tona ʼAlo. (Hep. 9:24; 10:10, 12) Kae neʼe kei heʼe haohaoa pē te ʼu tisipulo ʼaē ʼa Sesu ʼi te kele, ʼo kau kiai mo tana kau ʼapositolo agatonu. Logolā tanatou tokaga ʼaē ke mole natou agahala, kae neʼe natou agahala pē ʼi ʼihi temi. Koteā tona tupuʼaga? Koteʼuhi neʼe natou tutupu ake mo te agahala ʼi tonatou sino. (Loma 7:18-20) Kae neʼe feala ki te ʼAtua ke ina fai he puleʼaki moʼo fakatokatoka ia te faʼahi ʼaia, pea neʼe ina fai te puleʼaki ʼaia. Neʼe ina tali ia te “totogi ʼe tatau” mo te meʼa ʼaē neʼe pulihi e Atama pea neʼe lotolelei ke ina fakaʼaogaʼi ia te totogi ʼaia moʼo fakamolemole te ʼu hala ʼo tana ʼu kaugana ʼaē ʼi te kele.

¹³ Neʼe mole maʼua ke fakaʼaogaʼi e te ʼAtua ia te totogi ʼaia ki te kau ʼapositolo pea mo ʼihi atu ʼuhi ko tanatou fai te ʼu gāue lelei. Kailoa ia, neʼe fakaʼaogaʼi e te ʼAtua te totogi ʼuhi ko tona manavaʼofa pea mo tona ʼofa lahi ʼaē kiā nātou. Neʼe lotolelei ke ina fakamolemole ki te kau ʼapositolo pea mo ʼihi atu, ke mole fakamāuʼi nātou, heʼe kiā ia neʼe mole ko hanatou hala he neʼe natou maʼu te agahala ʼaē mai iā Atama. Neʼe fakahā lelei e Paulo ia te faʼahi ʼaia, ʼo ina ʼui fēnei: “Koia, neʼe haofaki koutou ʼaki te tui ʼuhi ko te ʼofa makehe ʼaia; pea ʼe mole haʼu te faʼahi ʼaia mai iā koutou, ʼe ko te meʼa ʼofa ʼo te ʼAtua.”—Efe. 2:8.

14, 15. Koteā te fakapale ʼe fakaʼamu kiai ia nātou ʼaē kua tala e te ʼAtua kua natou faitotonu, kae koteā ʼaē kei ʼaoga ke natou fai?

¹⁴ Kotou fakakaukauʼi age muʼa, ʼe ko he meʼa ʼofa ʼo te Māfimāfi ia tana fakamolemole ia te ʼuhiga agahala ʼaē neʼe tupu ake mo he tahi pea mo tana fakamolemole te ʼu hala ʼaē neʼe ina fai! ʼE mole feala hakotou lau peʼe ko agahala ʼe fia neʼe fai e te hahaʼi ʼi muʼa ʼo tanatou tafoki mai kiā Sehova, kae ʼaki te totogi neʼe feala ai ki te ʼAtua ke ina fakamolemole te ʼu agahala ʼaia. Neʼe tohi fēnei e Paulo: “Ko te meʼa ʼofa ʼaē neʼe foaki ʼuhi ko te ʼu tuʼuga hala, neʼe iku ia ki te tala ʼo te faitotonu.” (Loma 5:16) Ko te kau ʼapositolo pea mo ʼihi ʼaē neʼe natou maʼu ia te meʼa ʼofa ʼaia (kua tala kua natou faitotonu), neʼe tonu ke hoko atu ia tanatou tui ki te tauhi ʼo te ʼAtua moʼoni. Koteā anai te fakapale ʼaē kā natou maʼu ʼi te kā haʼu? “[Ko] nātou ʼaē ʼe lahi ia tanatou maʼu te ʼofa makehe pea mo te meʼa ʼofa ʼaē ʼe mole totogi ʼo te faitotonu, ʼe natou hau anai ʼi te maʼuli ʼaki te tokotahi pē ʼaenī, ia Sesu Kilisito.” Koia, ʼe kehekehe ʼosi te meʼa ʼofa ʼaia ʼo te faitotonu, heʼe iku ia ki te maʼuli, kae ko te talagataʼa ʼa Atama neʼe iku ia ki te mate.—Loma 5:17; lau ia Luka 22:28-30.

¹⁵ Ko nātou ʼaē ʼe natou maʼu ia te meʼa ʼofa ʼaia, ʼaē kua tala kua natou faitotonu, ʼe natou liliu ko te ʼu foha fakalaumālie ʼo te ʼAtua. ʼE natou kaugā hau anai mo Kilisito, koia ʼe natou maʼu te ʼamanaki ʼaē ke fakatuʼuake nātou ʼi selō, ʼo natou liliu ai ko te ʼu foha fakalaumālie ʼo natou pule fakatahi mo te Hau ko Sesu Kilisito.—Lau ia Loma 8:15-17, 23.

ʼE Hā Te ʼOfa ʼo Te ʼAtua Ki ʼIhi Atu Hahaʼi

16. Koteā te meʼa ʼofa ʼaē kua feala ʼi te temi nei ke maʼu e nātou ʼaē ʼe natou ʼamanaki ki te maʼuli ʼi te kele?

¹⁶ ʼE mole maʼu fuli leva e te kau Kilisitiano agatonu ʼaē ʼe tui ki te ʼAtua pea mo tauhi ki ai ia te ʼamanaki ʼaē ke natou ‘kaugā hau’ mo Kilisito ʼi selō. Tokolahi ʼe natou maʼu ia te ʼamanaki Fakatohi-tapu ʼaē neʼe maʼu e te ʼu kaugana ʼa te ʼAtua ʼi muʼa ʼo te tupu ʼa Sesu. ʼE natou maʼu ia te ʼamanaki ʼaē ke natou māʼuʼuli ʼo heʼegata ʼi te palatiso ʼi te kele. ʼE feala ʼapē koa mo nātou ʼaia ke natou maʼu ʼi te temi nei ia te meʼa ʼofa ʼaē mai te ʼAtua, ke tala ʼe natou faitotonu pea ke natou māʼuʼuli ʼi te kele? Ohagē pē ko tona ʼui ʼaē e Paulo ʼi tana tohi ki te kau Loma, kua lava foaki age kiā nātou ʼi te temi nei ia te meʼa ʼofa ʼaia.

17, 18. (a) Koteā ʼaē neʼe hoko kiā Apalahamo ʼuhi ko tana tui? (b) Koteā ʼaē neʼe feala ai kiā Sehova ke ina tala ʼe faitotonu ia Apalahamo?

¹⁷ Neʼe talanoa ia Paulo ki te faʼifaʼitaki lelei ʼaē neʼe tuku mai e te tagata tui ko Apalahamo, pea neʼe maʼuli ʼi te temi ʼaē neʼe mole heʼeki foaki age e Sehova ki te kau Iselaele te ʼu lao pea neʼe mole heʼeki ʼavahi e Kilisito ia te ʼamanaki ʼaē ke māʼuʼuli ni hahaʼi ʼi selō. (Hep. 10:19, 20) ʼE tou lau fēnei: “Neʼe mole ko te lao ʼaē neʼe maʼu ai e Apalahamo peʼe ko tona hako te fakapapau ʼaē ʼe ina maʼu tofiʼa anai ia te mālamanei, kae ʼaki te faitotonu mai te tui.” (Loma 4:13; Sake 2:23, 24) Koia ʼaē neʼe tala ai e te ʼAtua ko te tagata agatonu ko Apalahamo, ʼe faitotonu.—Lau ia Loma 4:20-22.

¹⁸ ʼE mole tonu leva ke tou ʼui, neʼe mole agahala ia Apalahamo ʼi te ʼu taʼu ʼaē neʼe tauhi ai kiā Sehova. Kailoa ia, ko te faitotonu ʼaenī ʼe tou lolotoga talanoa kiai, ʼe mole fakaʼuhiga fēia. (Loma 3:10, 23) Ko Sehova ʼaki tona toe poto lahi, neʼe ina tokagaʼi ia te tui mālohi ʼaē neʼe maʼu e Apalahamo pea mo tana ʼu gāue, ʼaē neʼe ko te fua ʼaia ʼo tana tui. Neʼe tui tāfito ia Apalahamo ko te “hako” ʼaē neʼe fakapapauʼi mai, ʼe hifo anai mai tona hōloga. Ko te hako ʼaia neʼe ko te Mēsia, peʼe ko Kilisito. (Sen. 15:6; 22:15-18) Pea ʼaki “te totogi ʼaē neʼe foaki e Kilisito Sesu,” kua feala ai ki te ʼAtua, te Tuʼi Fakamāu ke ina fakamolemole ia te ʼu agahala ʼaē neʼe fai e ʼihi ʼi muʼa atu ʼo tanatou ʼiloʼi ia ia. Koia, ʼe fakatuʼuake anai ia Apalahamo pea mo ʼihi tagata tui neʼe mamate ʼi muʼa atu ʼo te temi ʼo te kau Kilisitiano.—Lau ia Loma 3:24, 25; Pes. 32:1, 2.

ʼE Tala Kua Tou Faitotonu ʼi Te Temi Nei

19. He koʼē ʼe tonu ke malave ki te loto ʼo te tokolahi iā ʼaho nei ia te tala ʼaē e te ʼAtua kua faitotonu ia Apalahamo?

¹⁹ ʼE tonu ke malave ki te loto ʼo te kau Kilisitiano iā ʼaho nei ia te haga ʼaē ʼa te ʼAtua ʼofa ʼo lau ko Apalahamo ʼe faitotonu. Ko te tala ʼaē e Sehova kua faitotonu ia Apalahamo, ʼe mole tatau leva mo tona fai ʼaē kiā nātou neʼe ina fakanofo ʼaki tona laumālie, ke natou “kaugā maʼu tofiʼa mo Kilisito.” Ko te kiʼi kūtuga tokosiʼi ʼaia, ʼe “tonu ke natou māʼoniʼoni” pea ʼe tali ia nātou ko “te ʼu foha ʼo te ʼAtua.” (Loma 1:7; 8:14, 17, 33) Kae ko Apalahamo neʼe liliu ia ko “te kaumeʼa ʼo Sehova,” pea neʼe hoko te faʼahi ʼaia ʼi muʼa ʼo te foaki ia te sākilifisio faitotogi. (Sake 2:23; Isa. 41:8) Pea ʼe feafeaʼi leva ki te kau Kilisitiano moʼoni ʼaē ʼe natou maʼu te ʼamanaki ke natou māʼuʼuli ʼi he kele kua liliu ko he Palatiso?

20. Koteā ʼaē ʼe loto e te ʼAtua ke fai e nātou ʼaē ʼe ina tala iā ʼaho nei ʼe natou faitotonu ohagē ko Apalahamo?

²⁰ Neʼe mole foaki age kiā nātou ʼaia “te meʼa ʼofa ʼe mole totogi ʼo te faitotonu” ʼaē ko te ʼamanaki ʼo ʼuhiga mo te maʼuli ʼi selō, “ ʼuhi ko te fakaʼāteaina ʼaē neʼe totogi e Kilisito Sesu.” (Loma 3:24; 5:15, 17) Kae ʼe natou tui mālohi ki te ʼAtua pea mo tana ʼu fakatuʼutuʼu, pea ʼe natou fakahā tanatou tui ʼaki te ʼu gāue lelei ʼaē ʼe natou fakahoko. ʼI te ʼu gāue lelei ʼaia, ʼe kau ai tanatou “fakamafola . . . te puleʼaga ʼo te ʼAtua pea mo [tanatou] akoʼi [ki te hahaʼi] te ʼu meʼa ʼo ʼuhiga mo te ʼAliki ko Sesu Kilisito.” (Gāue 28:31) Koia ʼe feala kiā Sehova ke ina tala ʼe natou faitotonu ohagē ko tana fai ʼaē kiā Apalahamo. Ko te meʼa ʼofa ʼaē ʼe natou maʼu, ʼaē ko te fealagia ke natou kaumeʼa mo te ʼAtua, ʼe kehe ia mo “te meʼa ʼofa ʼaē ʼe mole totogi” ʼaē ʼe maʼu e te kau fakanofo. ʼE mahino papau ia, ʼe natou tali ʼaki he loto fakafetaʼi lahi ia te meʼa ʼofa ʼaia.

21. Koteā te ʼu lelei ʼe feala ke tou maʼu ʼuhi ko te ʼofa pea mo te faitotonu ʼa Sehova?

²¹ Kapau ʼe kotou fakaʼamu ke kotou maʼuli heʼegata ʼi te kele, ʼe lelei ke kotou ʼiloʼi ko te faigamālie ʼaia, ʼe mole ko he tagata ʼaē neʼe ina fakapapau atu, kae ʼe ko te fakatuʼutuʼu fakapotopoto ia ʼa te Tuʼi ʼAliki ʼo Te ʼAtulaulau. Neʼe fai māmālie pē e Sehova te ʼu puleʼaki moʼo fakahoko tana fakatuʼutuʼu. ʼE ʼalutahi te ʼu puleʼaki ʼaia mo te faitotonu moʼoni. ʼO mole gata pē ʼi tana faitotonu, kae ʼaki te ʼu puleʼaki ʼaia ʼe hā ʼaki ai ia te toe ʼofa lahi ʼaē ʼo te ʼAtua kiā tātou. Koia neʼe feala ai ke ʼui fēnei e Paulo: “Ko te ʼAtua ʼe ina fakahā totonu mai kiā tātou tona ʼofa ʼi te faʼahi ʼaia, ʼi te temi ʼaē neʼe kei tou agahala ai, neʼe mate ia Kilisito maʼa tātou.”—Loma 5:8.

[Nota]

ʼE Kei Kotou Manatuʼi Koa?

• Koteā te tōfiga ʼaē neʼe maʼu e te hōloga ʼo Atama, pea neʼe iku kiteā?

• Neʼe foaki feafeaʼi ia he totogi ʼe tatau mo ʼaē neʼe pulihi e Atama, pea ko te ʼu faʼahi fea ʼaē neʼe nā tatau ai?

• Koteā te ʼamanaki kua kotou maʼu ʼaki te meʼa ʼofa ʼaē ʼe tala kua kotou faitotonu?

[Paki ʼo te pāsina 17]

Neʼe agahala ia te tagata haohaoa ko Atama. Ko te tagata haohaoa ko Sesu neʼe ina foaki “he totogi ʼe tatau” mo ʼaē neʼe pulihi e Atama

[Paki ʼo te pāsina 19]

ʼE ko he logo lelei te kua feala ʼaē ke tala ʼe tou faitotonu ʼaki ia Sesu!