ʼE Haofaki Feafeaʼi Tātou ʼAki Te Totogi?
“Ko ʼaē ʼe tui ki te ʼAlo, ʼe ina maʼu te maʼuli heʼegata; ko ʼaē ʼe talagataʼa ki te ʼAlo, ʼe mole mamata anai ia ki te maʼuli, kae nofo te hauhau ʼo te ʼAtua iā te ia.”—SOA. 3:36.
1, 2. Koteā te tupuʼaga ʼi te ʼu tupuʼaga ʼaē neʼe ʼuluaki tā ai ia te nusipepa ʼo Zion’s Watch Tower?
“KO HE tahi ʼe ina ako fakalelei ia te Tohi-Tapu, ʼe mahino kiā ia te maʼuhiga ʼo te mate ʼo Kilisito.” ʼE ko te ʼu palalau ʼaia neʼe tuʼu ʼi te fā nusipepa ʼo Te Tule Leʼo ʼo ʼOketopeli 1879. Neʼe fakaʼosi ia te ʼalatike ʼaia ʼaki ia te ʼu manatu maʼuhiga ʼaenī: “Tou tōkakaga kiā manatu fuli pē ʼaē ʼe feala ke tupu ai hatatou mole kei fakamaʼuhigaʼi peʼe tou tuku keheʼi ia te mate ʼo Kilisito, ʼaē neʼe ko he mōlaga pea mo he fakamolemole ʼo te ʼu agahala.”—Lau ia 1 Soane 2:1, 2.
2 Ko te tupuʼaga ʼi te ʼu tupuʼaga ʼaē neʼe ʼuluaki tā ai ia te nusipepa Zion’s Watch Tower ʼi Sūlio 1879 ko te lagolago ki te akonaki ʼa te Tohi-tapu ʼo ʼuhiga mo te totogi. Neʼe maʼu ʼi tona ʼu pāsina ia te “meʼa kai ʼi tona temi totonu,” heʼe ʼi te fakaʼosi ʼo te ʼu taʼu 1800, neʼe kaugamālie te hahaʼi neʼe natou lau ko he ʼu Kilisitiano, ʼaē neʼe natou kamata lotolotolua ʼo ʼuhiga mo te fealagia ki te mate ʼa Sesu ke ina totogi tatatou ʼu agahala. (Mat. 24:45) ʼI te temi ʼaia, tokolahi neʼe natou faihala ʼo natou tui ki te evolisio, ko he manatu ʼe fakafeagai ki te akonaki ʼaē ʼe ina ʼui ʼe mole kei maʼu e te tagata ia te maʼuli haohaoa. Ko te hahaʼi ʼaē ʼe natou tui ki te evolisio, ʼe natou akoʼi ʼe feala pē, ʼaki te temi, ke liliu te tagata ʼo lelei ʼi te ʼu faʼahi fuli ʼo tona maʼuli pea ʼe mole ʼaoga kiā ia he totogi. Koia ʼe tō lelei ai te tokoni ʼaē neʼe fai e te ʼapositolo ko Paulo kiā Timoteo, ʼi tana ʼui fēnei: “Taupau te koloa ʼaē neʼe tuku atu kiā te koe, ʼo ke lītuʼa ki te ʼu akonaki noa ʼaē ʼe natou moamoagaʼi te meʼa ʼaē ʼe māʼoniʼoni, pea mo te ʼu fakafeagai ʼo te meʼa ʼaē ʼe higoaʼi hala ‘ko te ʼatamai mālama.’ Ko ʼihi ʼi tanatou fia hā ʼaki te taʼi mālama ʼaia neʼe natou hehē mai te tui.”—1 Tim. 6:20, 21.
3. Koteā te ʼu fehuʼi ʼaē kā tou vakaʼi ʼi te temi nei?
3 ʼE mahino ia, kua kotou fakatotonu ke ʼaua naʼa kotou “hehē mai te tui.” Ke feala ia te faʼahi ʼaia, ʼe lelei anai ke kotou vakaʼi ia te ʼu fehuʼi ʼaenī: He koʼē ʼe ʼaoga kiā au ia te totogi? Koteā te ʼu mamahi ʼaē neʼe kātakiʼi e te ʼAtua mo tona ʼAlo moʼo foaki ia te totogi? ʼE lava feafeaʼi haku maʼu ia te ʼu lelei mai te fakatuʼutuʼu maʼuhiga ʼaia ʼaē ʼe feala ke fakahao au mai te hauhau ʼo te ʼAtua?
ʼE Haofaki Tātou Mai Te Hauhau ʼo Te ʼAtua
4, 5. Koteā ʼaē ʼe fakamoʼoni ai ko te hauhau ʼo te ʼAtua ʼe nofo ʼi te tuʼu agakovi ʼaenī?
4 Ko te Tohi-Tapu pea mo te hisitolia ʼo te mālamanei ʼe fakahā ai, talu mai ia te agahala ʼa Atama, ʼe ‘nofo ia te hauhau ʼo te ʼAtua ʼi’ te hahaʼi fuli pē. (Soa. 3:36) ʼE hā lelei ia te faʼahi ʼaia heʼe mole he tahi ʼi te mālamanei neʼe feala ke hao mai te mate. Ko te pule faʼitaliha pea mo fakafeagai ʼa Satana neʼe mole feala tuʼa tahi ke ina puipui ia te mālamanei mai te ʼu malaʼia ʼaē ʼe kei hoko nei, pea ʼe mole he puleʼaga fakatagata ʼe feala ke ina foaki ia te ʼu meʼa ʼaē ʼe ʼaoga tāfito ki tanatou hahaʼi fuli. (1 Soa. 5:19) Koia ʼe hoko atu ʼi te mālamanei ia te tau, mo te fai fakapō, pea mo te masiva.
5 ʼO mahino mai ʼe mole tapuakina e Sehova ia te tuʼu agakovi ʼaenī. Neʼe ʼui e Paulo ʼe “haʼu te hauhau ʼo te ʼAtua mai te lagi ki te hahaʼi aga heʼe lotu.” (Loma 1:18-20) Koia, ko nātou ʼaē ʼe mole natou fia fetogi tonatou faʼahiga maʼuli ʼaē ʼe fakafeagai ki te ʼAtua, ʼe mole natou hao anai mai te ʼu fua ʼo tanatou aga. Iā ʼaho nei, ko te hauhau ʼo te ʼAtua ʼe fakaʼiloʼilo ki te hahaʼi ʼi te ʼu logo faifakamāu ʼaē ʼe tala ohagē ko he ʼu malaʼia ki te mālama ʼo Satana, pea ko te logo ʼaia ʼe tā ʼi tatatou ʼu tohi kehekehe ʼaē ʼe fakatafito ki te Tohi-Tapu.—Fakh. 16:1.
6, 7. Koteā te gāue ʼaē ʼe takitaki e te kau Kilisitiano fakanofo, pea koteā te faigamālie ʼaē ʼe kei foaki ki te hahaʼi ʼaē ʼe natou kau ki te mālama ʼo Satana?
6 Ko tona fakaʼuhiga koa kua tauhala maʼa te hahaʼi ke natou liʼaki ia te pule ʼa Satana pea ke natou maʼu ia te ʼofa ʼo te ʼAtua? Kailoa ia, ʼe kei feala pē tanatou fakatokatoka mo Sehova. Ko te kau Kilisitiano fakanofo, ʼaē ʼe ko “he ʼu tagata fakafofoga moʼo fetogi ʼo Kilisito,” ʼe natou takitaki ia te gāue fai fakamafola ʼaē ʼe fakaafe ai te hahaʼi ʼo te ʼu puleʼaga fuli pē, ʼo natou ʼui fēnei: “Kotou fakatokatoka mo te ʼAtua.”—2 Ko. 5:20, 21.
7 Neʼe ʼui e te ʼapositolo ko Paulo, ko Sesu “ ʼe ina fakaʼāteaina tātou mai te hauhau ʼaē ʼe hoko mai.” (1 Tes. 1:10) Ko te fakahā fakamuli ʼaia ʼo te ʼita ʼo Sehova ʼe hoko anai ʼaki te fakaʼauha ʼo talu ai ʼo te kau agahala ʼaē ʼe mole fakahemala. (2 Tes. 1:6-9) Ko ai ʼaē kā hao anai? ʼE ʼui fēnei ʼi te Tohi-Tapu: “Ko ʼaē ʼe tui ki te ʼAlo, ʼe ina maʼu te maʼuli heʼegata; ko ʼaē ʼe talagataʼa ki te ʼAlo, ʼe mole mamata anai ia ki te maʼuli, kae nofo te hauhau ʼo te ʼAtua iā te ia.” (Soa. 3:36) ʼEī, ko nātou fuli ʼaē ʼe kei māʼuʼuli pea mo tui kiā Sesu pea mo te totogi, ʼi te fakaʼosi ʼo te tuʼu ʼaenī, ʼe natou hao anai mai te ʼaho fakamuli ʼo te hauhau ʼo te ʼAtua.
Te ʼAoga ʼo Te Totogi
8. (a) Koteā te ʼamanaki lahi ʼaē neʼe feala ke maʼu e Atama mo Eva? (b) Neʼe fakahā feafeaʼi e Sehova ko ia ʼe ko he ʼAtua ʼe kātoa tana faitotonu?
8 Ko Atama mo Eva neʼe fakatupu haohaoa. Kanapau lā neʼe nā haga fakalogo ki te ʼAtua, kanaʼaua lā kua fonu nei te kele ʼaki tonā hōloga fiafia ʼe natou māʼuʼuli fakatahi mo nāua ʼi te Palatiso. Kae, meʼa fakaʼofaʼofa, neʼe mole fakalogo tatatou ʼu ʼuluaki mātuʼa ki te fakatotonu ʼa te ʼAtua. Koia, neʼe fakatūʼā ai nāua ki te mate heʼegata pea neʼe kapu nāua mai te Palatiso. ʼAki te temi, ʼi te maʼu fānau ʼa Atama mo Eva, neʼe mafola ia te agahala ki te mālamanei, pea ko te ʼuluaki tagata pea mo te ʼuluaki fafine neʼe nā mātutuʼa pea mo mamate ki ʼamuli. ʼE ko he fakamoʼoni ʼaia ko Sehova ʼe ina fakahoko tana ʼu fakapapau. Tahi ʼaē meʼa, ʼe ko he ʼAtua ʼe kātoa tana faitotonu. Neʼe fai e Sehova te fakatokaga kiā Atama, kapau ʼe ina kai ki te fuaʼi ʼakau ʼaē neʼe tapuʼi, pea ʼe mate anai, pea neʼe hoko te meʼa ʼaia.
9, 10. (a) He koʼē ʼe mamate ia te hōloga ʼo Atama? (b) ʼE feafeaʼi hatatou hao mai te mate heʼegata?
9 ʼI totatou ʼuhiga hōloga ʼo Atama, ʼe tou maʼu ai ia he sino ʼe heʼe haohaoa, ʼe fia fai tuʼumaʼu ki te agahala pea ʼe mate ki ʼamuli. ʼE feala ke tou ʼui ʼe tou pipiki ki te tūʼā ki te mate, koteʼuhi neʼe tou tutupu mai iā Atama. Kanapaulā neʼe molehi e Sehova ia te mate ʼo mole ina foaki ia he totogi, kanaʼaualā neʼe mole ina fakahoko ia tana folafola. ʼE moʼoni, neʼe palalau ia Paulo maʼa tātou fuli ʼi tana ʼui fēnei: “ ʼE tou ʼiloʼi ko te Lao ʼe laumālie; kae ko au ʼe au kakano, neʼe fakatau au ki te agahala. Tagata fakaʼofaʼofa ʼaē ko au! Ko ai kā ina haofaki anai au mai te sino ʼaē kua tuku ki te mate ʼaia?”—Loma 7:14, 24.
10 Neʼe gata pē kiā Sehova ʼAtua ia te fealagia ʼaē ke ina foaki ia te tafitoʼaga totonu moʼo fakamolemole ʼo tatatou ʼu agahala pea mo fakaʼāteaina ʼo tātou mai te fakatūʼā ki te mate heʼegata. Neʼe ina fai ia te faʼahi ʼaia ʼo ina fekauʼi ifo ia tona ʼAlo ʼofaina mai selō ke tupu ʼe ko he tagata haohaoa, ke feala ai hana foaki tona maʼuli ko he totogi maʼa tātou. ʼO mole hagē ko Atama, neʼe nofo haohaoa Sesu, he “neʼe mole agahala.” (1 Pet. 2:22) Neʼe feala pē kiā Sesu ke liliu ko he tamai ʼo ina fakatupu hana fānau haohaoa. Kae neʼe ina tuku ia te ʼu fili ʼa te ʼAtua ke natou matehi ia ia ke feala ai hana taupau ia te ʼu fānau agahala ʼa Atama ohagē ko hana fānau, pea mo fakafealagia kiā nātou ʼaē kā tui kiā te ia ke natou maʼu ia te maʼuli heʼegata. ʼE fakamahino fēnei ʼi te Tohi-Tapu: “Ko te ʼAtua pē e tahi, pea mo te tagata fakafelōgoi e tahi ʼi te ʼAtua pea mo te tagata, ko he tagata, ko Kilisito Sesu, ʼaē neʼe ina foaki ia ia totonu ko he totogi ʼe tatau maʼa te hahaʼi fuli.”—1 Tim. 2:5, 6.
11. (a) Koteā te faʼifaʼitaki ʼe feala ke tou toʼo moʼo fakahā ia te ʼu lelei ʼo te totogi? (b) Ko ai ʼaē ʼe natou toe maʼu mo te ʼu lelei ʼo te totogi?
11 Ke tou mahino ki te ʼaoga ʼo te totogi, ʼe feala ke tou toʼo ia te faʼifaʼitaki ʼo he hahaʼi neʼe puli fuli tanatou paʼaga ʼuhi ko he kaihaʼa neʼe fai e te fale paʼaga pea lahi ai tanatou tuʼu maʼua. Ko te hahaʼi pule ʼo te fale paʼaga neʼe fakatūʼā nātou ke pilisoniʼi lolotoga ni ʼu taʼu. Kae ʼe feafeaʼi kiā nātou ʼaē neʼe natou tuku tanatou paʼaga ʼi te fale ʼaia? ʼI te mole kei ʼi ai ʼo hanatou paʼaga, ʼe mole he tahi puleʼaki ki tonatou ʼaluʼaga, gata pē mo kapau ʼe ʼi ai he tagata agalelei pea mo maʼu paʼaga ke ina toe toʼo ia te fale paʼaga pea mo toe foaki ki te hahaʼi tanatou paʼaga kātoa, ʼo molehi ai tonatou ʼu maʼua. ʼO toe fēia, ko Sehova ʼAtua pea mo tona ʼAlo ʼofaina neʼe nā totogi ia te hōloga ʼo Atama pea mo molehi tanatou agahala ʼo fakatafito ki te taʼataʼa ʼaē neʼe liligi e Sesu. Ko tona tupuʼaga lā ʼaia ʼo te ʼui fēnei e Soane Patita ʼo ʼuhiga mo Sesu: “Koʼenī te ʼAkeno ʼa te ʼAtua ʼaē ʼe ina toʼo te agahala ʼa te mālamanei!” (Soa. 1:29) Ko te hahaʼi ʼaē neʼe toʼo tanatou ʼu agahala ʼe kau ki ai ia te hahaʼi māʼuʼuli pea mo te kau mate.
Te ʼu Mamahi ʼAē Neʼe Tonu Ke Kātakiʼi e Te ʼAtua Mo Tona ʼAlo Moʼo Foaki Ia Te Totogi
12, 13. Koteā ʼaē ʼe feala ke tou mahino kiai ʼaki te lotolelei ʼa Apalahamo ke ina momoli ia Isaake?
12 ʼE mole feala ke tou mahino kātoa ki te ʼu mamahi ʼaē neʼe tonu ke kātakiʼi e tatatou Tamai ʼaē ʼi selō pea mo tona ʼAlo ʼofaina moʼo foaki ia te totogi. Kae ʼe fakamatala ʼi te Tohi-Tapu te ʼu meʼa ʼaē neʼe hoko ke feala ai hatatou metitāsioʼi ia te faʼahi ʼaia. Ohagē lā, kotou fakakaukauʼi age muʼa ia te loto ʼo Apalahamo ʼi tana fagona iā ʼaho e tolu ki Molia moʼo fakalogo ki te fakatotonu ʼaenī ʼa te ʼAtua: “Fakalelei age muʼa, kae ke toʼo tou foha, tou foha ʼulu tokotahi ʼaē ʼe ke ʼofa mamahi ai, ia Isaake, ʼo ʼalu ki te fenua ʼo Molia pea ʼi ai momoli ia ia ko he holokosetā ʼi he moʼuga ʼi te ʼu moʼuga ʼaē kā au hinoʼi atu anai kiā koe.”—Sen. 22:2-4.
13 Neʼe kaku leva ia Apalahamo ki te koga meʼa ʼaē neʼe hinoʼi age e Sehova. Kotou fakakaukauʼi age muʼa pe neʼe feafeaʼi tona loto ʼi te temi ʼaē neʼe ina haʼi ai ia te ʼu nima pea mo te ʼu vaʼe ʼo Isaake, ʼo fakatakoto ki te ʼaletale ʼaē neʼe faʼu e ia totonu. Neʼe lagi loto mamahi ʼaupitō ia Apalahamo ʼi tana hiki ia te hele ʼaē kā ina matehi ʼaki tona foha! Kotou fakakaukauʼi age muʼa ia te loto ʼo Isaake ʼi tana takoto ʼi te ʼaletale, ʼo ina fakatalitali ki tona mamahi ʼaupitō ʼaē kā iku ki tona mate. Neʼe tāʼofi tautonu e te ʼāselo ʼa Sehova ia Apalahamo. Ko te meʼa ʼaē neʼe fai e Apalahamo pea mo Isaake ʼi te lakaga ʼaia, ʼe tokoni mai ke tou mahino ki te ʼu mamahi ʼaē neʼe kātakiʼi e Sehova ʼi tana tuku ia te kau hahaʼi gāue ʼa Satana ke natou matehi ia Tona ʼAlo. Ko te lagolago ʼa Isaake kiā Apalahamo ʼe ina fakatā lelei ia te lotolelei ʼa Sesu ke mamahi pea mo mate maʼa tātou.—Hep. 11:17-19.
14. Koteā te meʼa ʼaē neʼe hoko ʼi te maʼuli ʼo Sakopo ʼe tokoni mai ke tou mahino ki te ʼu mamahi ʼaē neʼe kātakiʼi e te ʼAtua mo tona ʼAlo moʼo foaki ia te totogi?
14 Ko te ʼu mamahi ʼaē neʼe kātakiʼi e te ʼAtua mo tona ʼAlo moʼo foaki ia te totogi, ʼe feala ke toe fakatātā ʼaki te meʼa neʼe hoko ʼi te maʼuli ʼo Sakopo. ʼI tona ʼu foha fuli, ko tona ʼofaʼaga neʼe ko Sosefo. Kae neʼe maheka te ʼu tehina ʼo Sosefo pea mo fehiʼa kiā ia. Kae neʼe lotolelei ia Sosefo ke fekauʼi ia ia e tana tamai ke ʼalu ʼo vakaʼi peʼe natou lelei pē. ʼI te temi ʼaia, neʼe natou taupau te faga ovi ʼa Sakopo iā teitei kilometa e 100 ʼi te potu noleto ʼo tonatou ʼapi ʼi Hepelone. Kotou fakakaukauʼi age muʼa ia te loto ʼo Sakopo ʼi te toe liliu mai ʼo tona ʼu foha mo te kofu ʼo Sosefo kua pulepule toto! Neʼe ina ʼui fēnei: “ ʼE ko te kofu loloa ʼo toku foha! Neʼe lagi kai ia ia e he manu fekai! ʼE mahino ia neʼe hae liki ia Sosefo!” Ko te ʼu meʼa fuli ʼaia neʼe malave ʼaupitō kiā Sakopo, ʼaē neʼe putu maʼa Sosefo lolotoga ni ʼu ʼaho. (Sen. 37:33, 34) ʼE ʼi ai pē te ʼu kiʼi kehekehe ʼo te ʼu meʼa ʼaē ʼe logoʼi e Sehova pea mo te ʼu meʼa ʼaē ʼe logoʼi e te tagata. Kae ko te metitāsio ki te ʼaluʼaga ʼaia neʼe hoko ʼi te maʼuli ʼo Sakopo, ʼe lava tokoni mai ke tou mahino, ʼi hona ʼaluʼaga ʼe veliveli, peʼe koteā ʼaē neʼe logoʼi e te ʼAtua ʼi te temi ʼaē neʼe gaohi koviʼi ai tona ʼAlo, pea mo tona fakapōgi fakamataku ʼi tana kei maʼuli ʼi te kele.
Te ʼu Lelei ʼe Tou Maʼu ʼAki Te Totogi
15, 16. (a) Neʼe fakahā feafeaʼi e Sehova tana tali ia te totogi? (b) Neʼe feafeaʼi takotou maʼu ia te ʼu lelei mai te totogi?
15 Ko Sehova ʼAtua neʼe ina fakatuʼuake ia tona ʼAlo agatonu ʼaki ia he sino fakalaumālie ʼe fonu ʼi te kolōlia. (1 Pet. 3:18) Iā ʼaho e 40, ko Sesu ʼaē neʼe kua fakatuʼuake, neʼe hā ki tana ʼu tisipulo, mo fakalotomālohiʼi tanatou tui pea mo teuteuʼi nātou ki he toe gāue fai fakamafola lahi. Pea neʼe hake leva ki selō. Neʼe ina momoli ai ki te ʼAtua ia te maʼuhiga ʼo tona taʼataʼa ʼaē neʼe ina liligi, ke fakaʼaogaʼi maʼa tana ʼu tisipulo moʼoni, ʼaē ʼe natou tui ki tana sākilifisio faitotogi. Neʼe fakahā e Sehova ʼAtua tana tali ia te totogi ʼo Kilisito he neʼe ina hinoʼi ia Sesu ke ina folahi ia te laumālie māʼoniʼoni ki tana ʼu tisipulo ʼaē neʼe fakatahitahi ʼi Selusalemi ʼi te ʼaho ʼo te Penikositē ʼo te taʼu 33 ʼo totatou temi.—Gāue 2:33.
16 Ko te kau tisipulo fakanofo ʼaia ʼo Kilisito neʼe natou kamata atu aipē tanatou gāue ʼo uga ia te hahaʼi ke natou hao mai te hauhau ʼo te ʼAtua, ʼo natou papitema ʼi te huafa ʼo Sesu Kilisito ke feala he fakamolemole ai ʼo tanatou ʼu agahala. (Lau ia Gāue 2:38-40.) Talu mai ia te ʼaho maʼuhiga ʼaia ʼo aʼu mai kiā ʼaho nei, ko te ʼu lauʼi miliona hahaʼi mai te ʼu fenua fuli pē, neʼe taki mai nātou pea mo natou felōgoi ai mo te ʼAtua ʼo fakatafito ki te tui ki te sākilifisio faitotogi ʼa Sesu. (Soa. 6:44) ʼO kaku mai ki te lakaga ʼaenī, ʼe tonu ke tou fakakaukauʼi ia te tahi age ʼu fehuʼi ʼaenī e lua: ʼE kita maʼu koa ia te ʼamanaki ki te maʼuli heʼegata ʼuhi ko te ʼu gāue lelei ʼaē neʼe fai e kita totonu? ʼI tatatou kua ʼosi maʼu ia te ʼamanaki taulekaleka ʼaia, ʼe feala koa ʼi he temi ke tou pulihi?
17. ʼE tonu ke feafeaʼi tatatou manatu ʼo ʼuhiga mo te tapuakina taulekaleka ʼaē ke tou kaumeʼa mo te ʼAtua?
17 Ko te totogi ʼe ko he fakatuʼutuʼu makehe. Kae ʼi tanatou tui kiai, ko te ʼu lauʼi miliona hahaʼi iā ʼaho nei kua natou kaumeʼa mo te ʼAtua, ʼaki te ʼamanaki ʼaē ke natou māʼuʼuli ʼo heʼegata ʼi te palatiso ʼi te kele. Kae ko tatatou liliu ko he ʼu kaumeʼa ʼo Sehova, ʼe mole ʼui ai leva ʼe tou taupau anai ʼo talu ai ia te ʼu felōgoi ʼaia mo ia. Ke tou hao mai te ʼaho ʼo te hauhau ʼo te ʼAtua ʼaē kā hoko mai, ʼe tonu ke tou haga fakahā tatatou fakafetaʼi ki “te totogi ʼaē neʼe foaki e Kilisito Sesu.”—Loma 3:24; lau ia Filipe 2:12.
Tou Haga Tui Ki Te Totogi
18. Koteā ʼaē ʼe toe fakaʼuhiga kiai ia te tui ki te totogi?
18 Ko te vaega Tohi-Tapu tāfito ʼo te ʼalatike ʼaenī, ia Soane 3:36, ʼe ina fakahā mai ko te tui ki te ʼAliki ko Sesu Kilisito ʼe toe kau kiai ia te fakalogo kiā te ia. Ko te fakafetaʼi ki te totogi ʼe tonu ke ina uga tātou ke tou mulimuli ʼi totatou maʼuli ki te ʼu akonaki ʼa Sesu, ʼo kau kiai tana ʼu akonaki ʼo ʼuhiga mo te aga ʼaē ʼe tonu ke fai. (Mko. 7:21-23) “Ko te hauhau ʼo te ʼAtua ʼe hoko mai” kiā nātou fuli ʼaē ʼe mole fakahemala mai tanatou ʼu aga ohagē ko te folonikāsio, te ʼu fakahuahua heʼeʼaoga, pea mo “te heʼemaʼa ʼi tona ʼu faʼahiga agaaga fuli pē,” ʼaē ʼe kau kiai ia te sioʼi tuʼumaʼu ʼo te ʼu pāki pea mo te ʼu ʼata ʼaē ʼe fakahā ai te ʼu felāveʼi fakasino.—Efe. 5:3-6.
19. Koteā te ʼu gāue lelei ʼaē ʼe feala ke tou fakahā ai tatatou tui ki te totogi?
19 ʼI tatatou fakafetaʼi ki te totogi, ʼe tou haga nonofo maʼumaʼua anai ʼi “te ʼu gāue ʼaē ʼe fakaʼiloga ʼaki [tatatou] pipiki ki te ʼAtua.” (2 Pet. 3:11) Tou toʼo he temi feʼauga ke tou faikole tuʼumaʼu pea mo fakamālotoloto, ke tou ako takitokotahi ia te Tohi-Tapu, ke tou kau ki te ʼu fono, ki te tauhi fakafāmili, pea mo tou faʼafai ʼi te gāue ʼaē ko te fakamafola ʼo te Puleʼaga. Pea ʼofa pē ke “ ʼaua naʼa galo ke [tou] fai te meʼa ʼaē ʼe lelei pea mo vaevae mo niʼihi, koteʼuhi ko te ʼu taʼi ʼu sākilifisio ʼaia ʼaē ʼe leleiʼia e te ʼAtua.”—Hep. 13:15, 16.
20. Koteā ʼaē ʼe feala ke ʼamanaki kiai ʼi te kā haʼu ia nātou fuli ʼaē ʼe natou tui ki te totogi?
20 ʼI te temi ʼaē kā hoko ai ia te hauhau ʼo Sehova ki te tuʼu agakovi ʼaenī, ʼe tou fiafia lahi anai ʼuhi ko tatatou tui ki te totogi pea mo tatatou fakahā tuʼumaʼu ia he loto fakafetaʼi ki te fakatuʼutuʼu ʼaia! Pea ʼi te mālama foʼou ʼaē ʼe fakapapau e te ʼAtua, ʼe tou loto fakafetaʼi anai ʼo talu ai, ki te fakatuʼutuʼu fakaofoofo ʼaia ʼaē neʼe ina fakahao ai tātou mai te hauhau ʼo te ʼAtua.—Lau ia Soane 3:16; Fakahā 7:9, 10, 13, 14.
ʼE Kotou Tali Feafeaʼi Anai?
• He koʼē ʼe ʼaoga kiā tātou ia te totogi?
• Koteā te ʼu mamahi ʼaē neʼe kātakiʼi e te ʼAtua mo tona ʼAlo moʼo foaki ia te totogi?
• Koteā te ʼu lelei ʼaē ʼe tou maʼu mai te totogi?
• ʼE tonu ke feafeaʼi tatatou tui ki te sākilifisio faitotogi ʼa Sesu?
[Paki ʼo te pasina 15]
ʼE kei feala pē ki te hahaʼi ke natou fakatokatoka mo Sehova
[Paki ʼo te pasina 17]
Ko te metitāsio ki te ʼu meʼa ʼaenī neʼe hoko kiā Apalahamo, Isaake, pea mo Sakopo, ʼe lava tokoni mai ke tou mahino ki te ʼu mamahi ʼaē neʼe kātakiʼi e te ʼAtua mo tona ʼAlo moʼo foaki ia te totogi