Ko Ai Ia Sehova?

Kia koe ʼe feafeaʼi te ʼAtua? Ko he tahi koa ʼe ke fakaʼapaʼapa lahi ki ai? ʼE mamaʼo koa mai ia koe ohage ko te tuʼu mamaʼo ʼo te ʼu fetuʼu? Peʼe ke manatu ʼe mole ko he kilisitiano kae ko he toe malohi ia, ohage he afa? Ko ai moʼoni ia Sehova? ʼI te Tohi-Tapu, ʼe fakaha ai e Sehova ʼona kalitate pea mo tana tokaga kia koe.

1. He koʼe ʼe mole feala ke ke sio ki te ʼAtua?

“Ko te ʼAtua ʼe laumalie.” (Soane 4:24) ʼE mole ʼi ai he sinoʼi tagata ʼo Sehova. ʼE ko he laumalie ʼe maʼuli ʼi selo, ko he koga meʼa ʼe mole feala ke ke sio ki ai.

2. Kotea ʼihi kalitate ʼo Sehova?

ʼE fakapulipuli ia Sehova. Kae ka ke iloʼi ia ia, ʼe ke ʼofa anai ia ia. Kotea tona tupuʼaga? He ʼe ko he tahi ʼe maʼuli moʼoni pea ʼe ina maʼu he ʼu kalitate taulekaleka. ʼE ui fenei ʼi te Tohi-Tapu: “ʼE ʼofa Sehova ki te faitotonu, pea ʼe mole ina liʼaki anai tana kau agatonu.” (Pesalemo 37:28) Pea ʼe toe “ʼofa mamahi pea mo manavaoʼofa,” tafito kia natou ʼae ʼe mamahi. (Sakopo 5:11) “ʼE ovi Sehova kia natou ʼae ʼe lotomamahi. ʼE ina haofaki ia natou ʼae ʼe lotovaivai.” (Pesalemo 34:18) Pea ʼe ke iloʼi koa ʼe malave kia te ia te ʼu meʼa ʼae ʼe ke fai? Ka ke fai ni meʼa ʼe kovi, pea ʼe lotomamahi ia. (Pesalemo 78:40, 41) Kae ka ke fai ni meʼa ʼe lelei, pea ʼe fiafia ia.—Lau ia Taʼaga Lea 27:11.

3. ʼE fakaha feafeaʼi e Sehova tona ʼofa kia koe?

Ko te kalitate tafito ʼo Sehova ʼe ko te ʼofa. ʼE ui ʼi te Tohi-Tapu “ko te ʼAtua ʼe ko te ʼofa.” (1 Soane 4:8) Pea ʼe fakaha mai e Sehova tona ʼofa ʼi te Tohi-Tapu ʼo feia mo te ʼu meʼa ʼae neʼe ina fakatupu. (Lau ia Gaue 14:17.) ʼE ina loto ke ke leleiʼia te maʼuli. Pea ʼe ha te faʼahi ʼaia ʼi tana faʼahiga faʼu ia tatou. Nee ina fakatupu tatou mo te fealagia ʼae ke tou sio ki ni lanu matalelei, mo fakalogo ni musika malie pea mo kai ki ni meʼa kai kano lelei.

TA FAKALOLOTO

4. Te laumalie maʼoniʼoni

ʼE tou fakaʼaogaʼi ʼotatou nima moʼo fai ni gaue. Kae ʼe fakaʼaogaʼi ia e Sehova tona laumalie maʼoniʼoni. ʼE ui ʼi te Tohi-Tapu ko te laumalie maʼoniʼoni ʼe mole ko he tahi, kae ʼe ko te malohi ʼae ʼe fakaʼaogaʼi e te ʼAtua moʼo fai tona finegalo. Lau ia Luka 11:13 mo Gaue 2:17, pea fai te ʼu fehuʼi ʼaeni:

• ʼE foaki mai e Sehova tona laumalie maʼoniʼoni mo kapau ʼe tou kole age. Koia ko te laumalie maʼoniʼoni ʼe ko he tahi koa? Kotea tona tupuʼaga?

ʼE fakaʼaogaʼi e Sehova tona laumalie maʼoniʼoni moʼo fakahoko ni gaue fakaofoofo. Lau ia Pesalemo 33:6 mo 2 Petelo 1:20, 21, pea fai te fehuʼi ʼaeni:

• Kotea neʼe fai e Sehova ʼaki tona laumalie maʼoniʼoni?

5. ʼE agalelei ia Sehova

Logo la neʼe tauhi fualoa ia Moisese kia Sehova, kae neʼe kei lahi age pe tana fia iloʼi lelei tona Tupuʼaga. Koia neʼe ina kole fenei ai ki te ʼAtua: “Fakalelei siʼou loto, kapau ʼe ke ʼofa ia au, fakaha mai kia au ʼou ala ke au iloʼi ai ia koe.” (Ekesote 33:13) Neʼe fakaha ai e Sehova kia Moisese ʼona ʼihi kalitate. Lau ia Ekesote 34:4-6, pea fai te ʼu fehuʼi ʼaeni:

• Kotea te ʼu kalitate neʼe fakaha e Sehova kia Moisese?

• ʼE ʼi ai koa he ʼu kalitate ʼo Sehova ʼe ke leleiʼia ʼi heni?

6. ʼE lototokaga ia Sehova

Ko te hahaʼi ʼa te ʼAtua ʼi te temi muʼa neʼe ko te kau Hepeleo. Pea neʼe natou popula ʼi Esipito pea mo maʼuli mamahi. Kotea ʼae neʼe logoʼi e Sehova ʼi te temi ʼaia? Toʼo ia Ekesote 3:1-10 pea fakalogo te FAKAMATALA NEʼE PUKE peʼe lau te ʼu vaega ʼaia. Hili ia, fai te ʼu fehuʼi ʼae ʼe hoa mai.

FAKAMATALA NEʼE PUKE: Neʼe Tokagaʼi e Sehova ʼOnatou Mamahi (2:45)

• ʼI te fakamatala ʼaeni, kotea la ʼe ui ʼo ʼuhiga mo Sehova?—Vakaʼi te vaega 7 mo te 8.

• ʼI tau manatu la, ʼe fia tokoni moʼoni koa ia Sehova ki te tagata? Pea ʼe ina lava fakahoko koa te faʼahi ʼaia? Kotea tona tupuʼaga?

7. Te ʼu kalitate ʼo Sehova

ʼE ha te ʼu kalitate ʼo Sehova ʼi tana fakatupu. Vakaʼi te ʼATA VITEO. Pea lau ia Loma 1:20, pea fai te fehuʼi ʼae ʼe hoa mai.

ʼATA VITEO: Sehova ʼi Tana Fakatupu—Te Sino ʼo Te Tagata (1:57)

• Ka ke sio ki te fakatupu ʼa Sehova, kotea ʼe feala ke ke ui ʼo ʼuhiga mo ia?

MANATU TAFITO

Ko Sehova ʼe ko he laumalie fakapulipuli. ʼE lahi ʼona kalitate, kae tafito tona ʼofa.

Fehuʼi Fakamanatu

• He koʼe ʼe mole feala ke ke sio kia Sehova?

• Kotea ia te laumalie maʼoniʼoni?

• Kotea ʼihi kalitate ʼo Sehova?

TE TAHI ʼU MANATU

Vakaʼi kalitate ʼe fa ʼo Sehova ke ke iloʼi lelei ai ia ia.

“Tona ʼUluagaaga?” (Ko Te Tule Leʼo N° 1 2019)

Vakaʼi pe ʼe fakaha feafeaʼi ʼi te Tohi-Tapu ʼe mole nofo Sehova ʼi te ʼu faʼahi fuli.

“ʼE ʼAfio Koa Te ʼAtua ʼi Te ʼu Potu Fuli Pe?” (Alatike ʼi te jw.org)

Vakaʼi pe koʼe ʼe fakatatau ʼi te Tohi-Tapu te laumalie maʼoniʼoni ki te ʼu nima ʼo te ʼAtua.

“Kotea Ia Te Laumalie Maʼoniʼoni?” (Alatike ʼi te jw.org)

Neʼe faigataʼa ki he tagata kivi hana tui ʼe tokaga te ʼAtua kia ia, kae neʼe fetogi leva tana manatu.

“J’ai maintenant le sentiment de pouvoir aider les autres” (Ko Te Tule Leʼo (Fakafalani) ʼaho 1 ʼo Oketopeli 2015)