Ke Fakamālamaʼi Tokotou Ala e Te Folafola ʼa Te ʼAtua
“Ko tau folafola . . . ʼe ko he mālama ki toku ala.”—Pesalemo 119:105.
1, 2. ʼE lava fakamālamaʼi feafeaʼi totatou ala e te folafola ʼa Sehova?
KO TE folafola ʼa Sehova ʼe ina fakamālamaʼi anai totatou ala mo kapau ʼe tou mulimuli kiai. Ke tou maʼu te mālama fakalaumālie ʼaia, ʼe tonu ke tou ako fakalelei te Folafola ʼa te ʼAtua pea mo maʼuliʼi tana ʼu tokoni. ʼE tou lava manatu anai ohage ko te tagata fai pesalemo, ʼaē neʼe ina ʼui fēnei: “Ko tau folafola ʼe ko he mālama taki ki toku vaʼe, pea ʼe ko he mālama ki toku ala.”—Pesalemo 119:105.
2 Tou vakaʼi ʼi te temi nei ia te Pesalemo 119:89-176. ʼE lahi te ʼu manatu ʼe tou maʼu ʼi te ʼu vaega ʼaia, ʼaē ko ʼona fasi e 11. ʼE tokoni mai anai te ʼu vaega ʼaia ke tou nonofo ʼi te ala ʼo te maʼuli heʼegata.—Mateo 7:13, 14.
He Koʼe ʼe Tonu Ke Tou ʼOfa Ki Te Folafola ʼa Te ʼAtua?
3. ʼE fakahā feafeaʼi iā Pesalemo 119:89, 90 ʼe feala ke tou falala ki te folafola ʼa te ʼAtua?
3 ʼE tou mālohi anai ʼi te faʼahi fakalaumālie mo kapau ʼe tou ʼofa ki te folafola ʼa Sehova. (Pesalemo 119:89-96) Neʼe hiva fēnei te tagata fai pesalemo: “Ê Sehova, ʼe tuʼu tau folafola ʼo heʼegata ʼi te lagi. . . . Neʼe ke fakatuʼu mālohi te kele, ke tuʼu maʼu.” (Pesalemo 119:89, 90) ʼAki te folafola ʼa te ʼAtua, ia tana ‘ ʼu lao ʼi te lagi,’ ko te laʼā, mo te māhina pea mo te ʼu fetuʼu, ʼe nātou feʼoloʼaki ʼo mulimuli ki te ala kua fakatuʼutuʼu kiā nātou pea ko te kele ʼe tuʼu maʼu ʼo talu ai. (Sopo 38:31-33; Pesalemo 104:5) ʼE feala ke tou falala ki te ʼu folafola fuli ʼaē ʼe haʼu mai te gutu ʼo Sehova; ko te meʼa ʼaē ʼe ʼui e te ʼAtua ʼe “lava lelei” anai ʼi te fakahoko ʼo tana fakatuʼutuʼu.—Isaia 55:8-11.
4. Ko te ʼofa ki te folafola ʼa te ʼAtua ʼe tokoni feafeaʼi ki tana kau kaugana ʼaē ʼe lotomamahi?
4 Neʼe feala ki te tagata fai pesalemo ‘ke mate ʼi tana lotomamahi mo kanapaula neʼe mole ʼofa ki te lao ʼa te ʼAtua.’ (Pesalemo 119:92) Neʼe mole gaohi koviʼi ia ia e he kau matāpule, heʼe ko nātou ʼaē neʼe fēhihiʼa kiā ia neʼe ko te kau Iselaele ʼaē neʼe nātou talagataʼa ki te lao. (Levitike 19:17) Kae neʼe mole ina tokagaʼi tāfito te faʼahi ʼaia, he neʼe ʼofa ki te lao ʼa te ʼAtua ʼaē neʼe lagolago kiā ia. ʼI Kolonito, ko te ʼapositolo ko Paulo neʼe “tuʼutāmaki ʼi te ʼu tehina kākā,” lagi neʼe kau ai “te kau ʼapositolo lelei ʼaupito” ʼaē neʼe nātou fia tukugakoviʼi ia ia. (2 Kolonito 11:5, 12-14, 26, MN ) Kae neʼe mālohi pe Paulo ʼi te faʼahi fakalaumālie he neʼe ʼofa ki te folafola ʼa te ʼAtua. ʼE tou ʼoʼofa ki totatou ʼu tēhina, heʼe tou ʼofa ki te Folafola ʼa Sehova pea mo tou maʼuliʼi. (1 Soane 3:15) Logope la te fehiʼaʼinaʼi ʼo tatou e te malamanei, kae ʼe mole tou galoʼi anai te ʼu fakatotonu ʼa te ʼAtua. ʼE tou haga fakahoko anai tona finegalo ʼo tou logo tahi ʼi te ʼofa mo totatou ʼu tēhina, pea mo tou ʼatalitali ki te ʼaho ʼaē ka tou tauhi fakafiafia ai kiā Sehova ʼo talu ai.—Pesalemo 119:93.
5. Neʼe kumi feafeaʼi ia Sehova e te Hau ko Asa?
5 ʼI tatatou fakahā tatatou tauhi kātoa kiā Sehova, ʼe feala ke tou faikole fēnei: “Ko au ʼe ʼa koe. Hāofaki au, he neʼe au kumi tau ʼu fakatotonu.” (Pesalemo 119:94) Neʼe kumi e te Hau ko Asa ia te ʼAtua pea neʼe ina molehi ʼi Suta te apositasia. ʼI te fakatahi lahi ʼi te 15 taʼu ʼo te pule ʼa Asa (ʼi te taʼu 963 ʼi muʼa ʼo totatou temi), ko te hahaʼi ʼo Suta neʼe nātou “fai te fuakava ke nātou kumi ia Sehova.” Neʼe tuku e te ʼAtua “ke nātou maʼu ia ia” pea mo ina “haga foaki kiā nātou te mālōlō ʼi te potu fuli.” (2 Fakamatala 15:10-15) Ko te faʼifaʼitaki ʼaia ʼe tonu ke ina fakaloto mālohiʼi ia nātou ʼaē neʼe fakamamaʼo mai te kokelekasio ke nātou toe kumi ia te ʼAtua. ʼE ina tapuakina pea mo puipui ia nātou ʼaē ʼe nātou toe fakatahi mo tana hahaʼi.
6. Koteā te meʼa ʼaē ʼe tonu ke tou fai ke puipui ai tatou mai he tuʼutāmaki fakalaumālie?
6 ʼAki te folafola ʼa Sehova ʼe tou maʼu ai te poto ʼaē ʼe feala ke ina puipui tatou mai he tuʼutāmaki fakalaumālie. (Pesalemo 119:97-104) ʼAki te ʼu fakatotonu ʼa te ʼAtua, ʼe tou popoto age ʼi totatou ʼu fili. Ko tatatou manatuʼi tana ʼu fakamanatu ʼe tou maʼu ai te fakasiosio poto, pea ko tatatou ‘mulimuli ki tana ʼu fakatotonu ʼe tou liliu ai ʼo popoto age ia nātou ʼaē kua mātutuʼa.’ (Pesalemo 119:98-100) Kapau ko te ʼu folafola ʼa Sehova ʼe nātou ‘malie age ki totatou ʼaoʼaoʼi gutu ʼi te meli ki totatou gutu,’ pea ʼe tou fehiʼa anai pea mo tekeʼi “te u ala kovi fuli pe.” (Pesalemo 119:103, 104) ʼE ko he puipui anai ʼaia mai he tuʼutāmaki fakalaumālie mokā tou felāveʼi ʼi te ʼu ʼaho fakamuli ʼaenī mo he ʼu hahaʼi fialahi, ʼitaʼita, pea mole nātou pipiki ki te ʼAtua.—2 Timoteo 3:1-5.
Ko He Mālama Taki Ki Totatou Vaʼe
7, 8. ʼO mulimuli kiā Pesalemo 119:105, koteā ʼaē ʼe ʼaoga ke tou fai?
7 ʼE foaki tuʼumaʼu pe e te folafola ʼa te ʼAtua te mālama fakalaumālie. (Pesalemo 119:105-112) Peʼe tou kau ʼi te kau Kilisitiano fakanofo peʼe ʼi tonatou ʼu kaumeʼa ʼo te “tahi ʼu ōvi,” ʼe tou tala fēnei: “Ko tau folafola ʼe ko he mālama taki ki toku vaʼe, pea ʼe ko he mālama ki toku ala.” (Soane 10:16, MN; Pesalemo 119:105) Ko te folafola ʼa te ʼAtua ʼe hage he mālama ʼe ina faka mālamagia totatou ala, ke mole tou tūkia pea mo tō ʼi te faʼahi fakalaumālie. (Tāʼaga Lea 6:23) Kae ʼe tonu kiā tatou takitokotahi ke tou tuku ke fakamālamaʼi totatou haʼele e te folafola ʼa Sehova.
8 ʼE tonu ke tou fai he fakatotonu ohage ko te tagata pesalemo ʼaē neʼe ina tohi te kapite 119. Neʼe ina fakatotonu ke mole mavae mai te ʼu fakatotonu ʼa te ʼAtua. Neʼe ina ʼui fēnei: “Neʼe au fai he fakapapau pea ʼe au fakahoko anai, ke au taupau te ʼu tonu faifakamāu [ʼa Sehova].” (Pesalemo 119:106) ʼAua naʼa tou meʼa noaʼi ʼi he temi te maʼuhiga ʼo te ako tuʼumaʼu ia te Tohi-Tapu pea mo te kau ki te ʼu fono faka Kilisitiano.
9, 10. ʼE tou ʼiloʼi feafeaʼi ʼe feala ki te ʼu hahaʼi ʼaē kua foaki tonatou maʼuli kiā Sehova, ke nātou ‘mavae mai tana ʼu fakatotonu,’ kae ʼe lava tekeʼi feafeaʼi te faʼahi ʼaia?
9 Ko te tagata fai pesalemo neʼe mole ‘mavae ia mai te ʼu fakatotonu ʼa te ʼAtua,’ kae ʼe feala ke hoko te faʼahi ʼaia ki he tahi kua ina foaki tona maʼuli kiā Sehova. (Pesalemo 119:110) Neʼe mavae te Hau ko Salomone mai iā Sehova, logola neʼe kau ki he puleʼaga neʼe kua foaki kiā Sehova, pea ʼi te kamata neʼe mulimuli ki te poto ʼaē neʼe foaki age e te ʼAtua. “Māʼiape la mo ia neʼe agahala ʼuhi ko tana ʼu ʼohoana matāpule,” he neʼe nātou fakaneke ia ia ke tauhi ki te ʼu ʼatua loi.—Nehemia 13:26; 1 Hau 11:1-6.
10 Ko Satana, “te tagata puke manulele,” ʼe ina fakatuʼu te ʼu tuʼuga hele. (Pesalemo 91:3) Ohage la, ko he tahi neʼe fakamavae ʼe feala ke ina fakaneke tatou ke tou mavae mai te mālama fakalaumālie kae tou ʼolo ki te fakapōʼuli ʼo te ʼapositasia. ʼI te kau Kilisitiano ʼi Tiatile, neʼe ʼi ai “te fafine . . . ko Sesapele,” neʼe lagi ko te kūtuga fafine neʼe nātou akoʼi ki te hahaʼi ke nātou tauhi tamapua pea mo fai folonikasio. Neʼe mole tali e Sesu te ʼu aga kovi ʼaia, pea mo tatou ʼe mole tonu ke tou tali. (Apokalipesi 2:18-22, MN; Suta 3, 4) Koia, tou kole ke tokoni mai ia Sehova ke mole tou mavae mai tana ʼu fakatotonu, kae ke tou nonofo ʼi tana mālama.—Pesalemo 119:111, 112.
ʼE Lagolago Te Folafola ʼa Te ʼAtua Kiā Tatou
11. ʼO mulimuli kiā Pesalemo 119:119, e feafeaʼi te tagata agakovi kiā mata ʼo te ʼAtua?
11 Kapau ʼe mole tou mavae mai te ʼu lao ʼa te ʼAtua, pea ʼe lagolago mai anai kiā tatou. (Pesalemo 119:113-120) ʼE mole tou tali “te ʼu hahaʼi ʼaē ʼe lotolotolua,” ohage pe ko te mole tali ia ʼaho nei e Sesu ia nātou ʼaē ʼe nātou lau ko ni kau Kilisitiano kae nātou māfana. (Pesalemo 119:113; Apokalipesi 3:16) ʼUhi ʼaē ʼe tou tauhi kiā Sehova ʼaki te loto kātoa, ko ia ‘totatou nonoʼaga’ pea ʼe lagolago mai anai kiā tatou. ʼE ina ‘teteke anai ia nātou fuli ʼaē ʼe nātou hēʼia mai tana ʼu lēkula’ heʼe nātou aga fakakākā pea mo loi. (Pesalemo 119:114, 117, 118; Tāʼaga Lea 3:32) Kiā ia ko te hahaʼi agakovi ʼe nātou hage ko “he ʼu sikoli”—te ʼu ʼotaʼota ʼaē ʼe toʼo kehe mai te ʼu maka maʼuhiga ohage ko te siliva pea mo te aulo. (Pesalemo 119:119; Tāʼaga Lea 17:3) ʼOfa pe ke tou fakahā tuʼumaʼu totatou ʼofa ki te ʼu fakamanatu ʼa te ʼAtua, heʼe mahino ia ʼe mole tou fia kau mo te hahaʼi agakovi, te sikoli ʼaē ka fakaʼauha!
12. He koʼe ʼe maʼuhiga ke tou manavasiʼi kiā Sehova?
12 Neʼe ʼui fēnei e te tagata fai pesalemo: “Neʼe tetetete toku kakano he neʼe manavasiʼi kiā te koe [Sehova].” (Pesalemo 119:120) Ko tatatou manavasiʼi ki te ʼAtua, ʼaē ʼe hā ʼi tatatou mole fai te meʼa ʼaē ʼe mole ina leleiʼia, ʼe ko he faʼahi maʼuhiga ke feala hana lagolago kiā tatou ʼaē ko tana ʼu kaugana. Neʼe maʼuli agatonu ia Sopo he neʼe manavasiʼi kiā Sehova. (Sopo 1:1; 23:15) ʼE feala, ʼaki tatatou manavasiʼi ki te ʼAtua, ke tou kātaki ʼi te ala ʼaē ʼe leleiʼia e te ʼAtua, tatau aipe peʼe koteā te ʼu faigataʼa ʼaia. Kae ke feala hatatou faʼa kātaki ʼe tonu ke tou faikole fakamalotoloto ʼaki te tui.—Sakopo 5:15.
Tou Faikole ʼAki Te Tui
13-15. (a) He koʼe ʼe feala ke tou tui ʼe maʼu anai he ʼu tali ki tatatou ʼu faikole? (b) Koteā ʼaē ʼe feala ke hoko mo kapau ʼe mole tou ʼiloʼi peʼe koteā ʼaē ʼe tonu ke tou ʼui ʼi tatatou faikole? (c) Koutou tuku mai he faʼifaʼitaki ʼe fakahā ai te lava ʼalutahi ʼo te Pesalemo 119:121-128 mo tatatou ʼu ‘goʼegoʼe ʼaē ʼe mole tou tala’ ʼi tatatou ʼu faikole.
13 ʼE feala ke tou faikole ʼo tou tui ʼe fai tuʼumaʼu anai e te ʼAtua te meʼa ʼaē ʼe lelei maʼa tatou. (Pesalemo 119:121-128) Ohage ko te tagata fai pesalemo, ʼe tou tui papau ʼe tali anai ki tatatou ʼu faikole. Koteā tona tupuʼaga? Heʼe tou ʼofa ki te ʼu fakatotonu ʼa te ʼAtua “ ʼo laka age ʼi te aulo, ei ʼi he aulo neʼe fakamaʼa.” Tahi ʼaē meʼa, ‘ ʼe tou faka ʼuhiga ʼe faitotonu ia te ʼu fakatotonu fuli ʼa te ʼAtua ʼo ʼuhiga mo meʼa fuli.’—Pesalemo 119:127, 128.
14 ʼE fakalogo Sehova ki tatatou ʼu kolekole heʼe tou faikole ʼaki te tui, pea ʼe tou toe mulimuli fakalelei ki tana ʼu fakatotonu. (Pesalemo 65:2) Kae e feafeaʼi mo kapau ʼi ʼihi temi ʼe tou tau mo he ʼu fihifihia faigataʼa, ʼe mole tou ʼiloʼi te ʼu meʼa ʼaē ka tou palalau kiai ʼi tatatou faikole? Ko “te laumālie totonu ʼe ina kole maʼa tatou ʼaki he ʼu goʼegoʼe neʼe mole tala.” (Loma 8:26, 27, MN ) ʼI te ʼu lakaga ʼaia, ʼe tali e te ʼAtua tatatou fakaʼaogaʼi ʼi tatatou faikole he ʼu kupu ʼe tuʼu ʼi tana Folafola ʼe ʼalutahi mo te ʼu meʼa ʼaē ʼe ʼaoga kiā tatou.
15 ʼE maʼu ʼi te Tohi-Tapu te ʼu tuʼuga faikole pea mo te ʼu manatu ʼe lagi ʼalutahi mo tatatou ‘goʼegoʼe ʼaē neʼe mole tala.’ Ohage la, tou vakaʼi ia te Pesalemo 119:121-128. Ko te ʼu palalau ʼaē ʼe tuʼu ai ʼe lagi ʼalutahi mo tatatou ʼaluʼaga. Ohage la, kapau ʼe tou mātataku naʼa kaihaʼa tatou, ʼe feala ke tou fai ohage ko te tagata fai pesalemo, ʼaē neʼe ina kole ki te ʼAtua ke tokoni age kiā ia. (Vaega 121 ki te 123) Kapau la ʼe tonu ke tou fai he tonu maʼuhiga ʼaupito. ʼE feala ke tou faikole ke tokoni mai te laumālie ʼa Sehova ke tou manatuʼi tana ʼu fakamanatu pea mo tou maʼuliʼi. (Vaega 124, 125) Logola tatatou ‘fehiʼa ki te ʼu ala fuli ʼo te loi,’ ʼe lagi ʼaoga ke tou kole ki te ʼAtua ke tokoni mai ke ʼaua naʼa tou tō ki te fakahala ʼaē ke tou maumauʼi tana lao. (Vaega 126-128) Kapau ʼe tou lau te Tohi-Tapu ʼi te ʼaho fuli, ʼe feala ke tou manatuʼi te ʼu faʼahiga vaega ʼaenī mokā tou faikole mamahi kiā Sehova.
ʼE Tokoni Mai Te ʼu Fakamanatu ʼa Sehova
16, 17. (a) He koʼe ʼe ʼaoga kiā tatou te ʼu fakamanatu ʼa te ʼAtua, pea ʼe tonu ke tou faka ʼuhiga feafeaʼi te ʼu fakamanatu ʼaia? (b) ʼE lagi feafeaʼi anai te manatu ʼa ʼihi ʼo ʼuhiga mo tatou, kae koteā ʼaē ʼe maʼuhiga moʼoni age?
16 Kapau ʼe tou loto ke logoʼi e te ʼAtua tatatou ʼu faikole pea mo ina tapuakina tatou, ʼe tonu ke tou tokagaʼi tana ʼu fakamanatu. (Pesalemo 119:129-136) ʼUhi ʼaē ʼe tou loto galogalo, ʼe ʼaoga kiā tatou te ʼu fakamanatu taulekaleka ʼa Sehova, ʼaē ʼe fakamanatuʼi mai e tana faiako pea mo tana ʼu fakatotonu. ʼE moʼoni, ʼe tou fakafetaʼi ki te mālama fakalaumālie ʼaē ʼe tou maʼu ʼi te ʼu mahino foʼou fuli ʼo te ʼu folafola ʼa te ʼAtua. (Pesalemo 119:129, 130) ʼE tou toe fakafetaʼi ki te haga ʼa Sehova ʼo ‘fakagigila tona fofoga kiā tatou’ moʼo tapuakina tatou, logola ‘te hali ʼo totatou ʼu loʼimata’ ʼuhi ko te mole fakalogo ʼa ʼihi ki tana lao.—Pesalemo 119:135, 136; Faka au 6:25.
17 ʼE tou ʼiloʼi papau ʼe haga ʼofa pe te ʼAtua kiā tatou mo kapau ʼe tou mulimuli ki tana ʼu fakamanatu faitotonu. (Pesalemo 119:137-144) ʼI totatou ʼuhiga kaugana ʼa Sehova, ʼe tou fakamoʼoni ʼe tonu ke ina fakatokagaʼi mai kiā tatou tana ʼu fakamanatu faitotonu pea mo ina tuku mai ohage ko he ʼu fakatotonu ʼe tonu ke tou mulimuli kiai. (Pesalemo 119:138) Mai tona ʼaluʼaga ʼaē neʼe fakalogo te tagata fai pesalemo ki te ʼu fakatotonu ʼa te ʼAtua, he koʼe neʼe ina ʼui fēnei: “Ko au ko he tagata noa pea mo fehiʼaʼinaʼi”? (Pesalemo 119:141) ʼE hā mai neʼe talanoa ia ki tona fehiʼaʼinaʼi e tona ʼu fili. Kapau ʼe tou taupau tatatou agatonu, pea ʼe lagi fehiʼaʼinaʼi anai tatou. Kae ko te meʼa ʼaē ʼe maʼuhiga ko te ʼofaʼinaʼi ʼo tatou e Sehova heʼe tou mulimuli ki tana ʼu fakamanatu faitotonu.
Te Fīmālie Pea Mo Te Tokalelei
18, 19. Koteā tona ʼu fua ʼo tatatou mulimuli ki te ʼu fakamanatu ʼa te ʼAtua?
18 ʼI tatatou mulimuli ki te ʼu fakamanatu ʼa te ʼAtua ʼe tou fakaōvi ai kiā te ia. (Pesalemo 119:145-152) ʼUhi ʼaē heʼe tou tokagaʼi te ʼu fakamanatu ʼa Sehova, ʼe tou ʼiloʼi ʼe tou lava pāui kiā te ia ʼaki totatou loto kātoa, pea ʼe tou faka tui ʼe ina logoʼi anai. ʼE lagi tou ʼala “uhuuhu ʼi te māfoatā” pea tou kole ke tokoni mai. ʼE ko he lakaga lelei ʼaia moʼo faikole! (Pesalemo 119:145-147) ʼE toe ōvi mai te ʼAtua kiā tatou heʼe tou tekeʼi te aga heʼeʼaoga pea tou tui ko tana folafola ʼe moʼoni, ohage ko Sesu. (Pesalemo 119:150, 151; Soane 17:17) Ko tatatou ʼu felogoi mo Sehova ʼe lagolago mai kiā tatou ʼi te malamanei maveuveu ʼaenī ʼo aʼu ki Halamaketone, tana tau lahi.—Apokalipesi 7:9, 14; 16:13-16.
19 ʼUhi ko tatatou fakaʼapaʼapa lahi ki te folafola ʼa te ʼAtua, ʼe tou māʼuʼuli fīmālie moʼoni. (Pesalemo 119:153-160) ʼO mole hage ko te tagata agakovi, ʼe ‘mole tou mavae kehe mai te ʼu fakamanatu ʼa Sehova.’ ʼE tou ʼofa ki te ʼu fakatotonu ʼa te ʼAtua pea ʼe tou nonofo fīmālie ai ʼi tona loto manavaʼofa. (Pesalemo 119:157-159) Ko te ʼu fakamanatu ʼa Sehova ʼe nātou uga totatou fakakaukau ke tou manatuʼi ai te ʼu meʼa ʼaē ʼe ina fakamaʼua mai mokā hoko ni ʼu faʼahiga ʼaluʼaga. ʼI te tahi faʼahi, ko te ʼu fakatotonu ʼa te ʼAtua ʼe nātou takitaki tatou, pea ʼe tou tali ke takitaki tatou e tatatou Tupuʼaga. ʼI tatatou ʼiloʼi ʼaē ‘ko te fakatafito ʼo te folafola ʼa te ʼAtua ʼe moʼoni’ pea ʼe mole feala ke tou takitaki e tatou totonu totatou ala, koia ʼaē ʼe tou tali ai ʼaki he loto fiafia ke takitaki tatou e te ʼAtua.—Pesalemo 119:160; Selemia 10:23.
20. He koʼe ʼe ‘mahu tatatou tokalelei’?
20 ʼE mahu tatatou tokalelei ʼuhi ko tatatou ʼofa ki te lao ʼa Sehova. (Pesalemo 119:161-168) ʼE mole pulihi e te fakataga “te tokalelei o te Atua” ʼaē ʼe tou maʼu. (Filipe 4:6, 7) ʼE tou leleiʼia ʼaupito te ʼu tonu faifakamāu ʼa Sehova, koia ʼe tou tau vikiʼi ai kiā te ia—“tuʼa fitu ʼi te ʼaho.” (Pesalemo 119:161-164) Neʼe hiva fēnei te tagata fai pesalemo: “ ʼE mahu te tokalelei ʼa nātou ʼaē ʼe ʼofa ki tau lao, pea kiā nātou ʼe mole he maka fakatupu tūkia.” (Pesalemo 119:165) Kapau ʼe tou ʼoʼofa pea mo taupau takitokotahi te lao ʼa Sehova, pea ʼe mole tou tūkia anai ʼi te faʼahi fakalaumālie ʼuhi ko te aga ʼa he tahi peʼe ko he tahi age faʼahi.
21. Koteā te ʼu faʼifaʼitaki ʼi te Tohi-Tapu ʼe hā ai ʼe mole tonu ke tou tūkia mo kapau ʼe hoko he ʼu fihifihia ʼi te kokelekasio?
21 Neʼe tokolahi te hahaʼi ʼe talanoa ki ai te Tohi-Tapu, neʼe mole nātou fakagafua ki he ʼaluʼaga ke ina faka tūkia nātou ʼo talu ai. Ohage ko te tagata Kilisitiano ko Kaiusi, neʼe mole tūkia ia kae neʼe ‘haga haʼele ʼi te moʼoni’ logola te aga ʼa Tiotefeso, ʼaē neʼe mole pipiki ki te ʼAtua. (3 Soane 1-3, 9, 10) Neʼe fakaloto mālohiʼi e Paulo te ʼu fafine Kilisitiano ko Eutia pea mo Sunitika “ke na lototahi i te Aliki,” heʼe ʼiloga mai neʼe hoko te ʼu fihifihia ia nāua. Neʼe lagi tokoni kiā nāua ke nā fakatokatoka tanā fihifihia pea mo haga tauhi agatonu kiā Sehova. (Filipe 4:2, 3) Koia ʼe mole tonu ke tou tūkia mo kapau ʼe hoko he ʼu fihifihia ʼi te kokelekasio. Tou tokaga tāfito ʼo taupau te ʼu fakatotonu ʼa Sehova, ʼo tou manatuʼi ko ‘tatatou ʼu ala fuli ʼe ʼi ʼona muʼa.’ (Pesalemo 119:168; Tāʼaga Lea 15:3) Pea ʼe mole he meʼa ʼe ina pulihi anai ʼo talu ai tatatou ‘mahu ʼi te tokalelei.’
22. (a) Kapau ʼe tou fakalogo ki te ʼAtua, koteā te pilivilesio ʼaē ʼe feala ke tou maʼu? (b) ʼE tonu ke feafeaʼi tatatou manatu ʼo ʼuhiga mo nātou ʼaē neʼe mavae ʼi te kokelekasio?
22 Kapau ʼe tou fakalogo tuʼumaʼu kiā Sehova, pea ʼe tou maʼu anai te pilivilesio ʼaē ke tou haga fakavikiviki kiā te ia. (Pesalemo 119:169-176) Kapau ʼe tou māʼuʼuli ʼo mulimuli ki te ʼu lēkula ʼa te ʼAtua, pea ʼe tou maʼu ai te fīmālie fakalaumālie, pea ‘ ʼe hoko atu te fakavikiviki e totatou laugutu ia Sehova.’ (Pesalemo 119:169-171, 174) ʼE ko te pilivilesio lahi ʼaia ʼaē ʼe feala ke tou maʼu ʼi te ʼu ʼaho fakamuli ʼaenī. Neʼe loto e te tagata fai pesalemo ke hoko atu tona maʼuli pea mo fakavikiviki kiā Sehova, kae ʼi he ʼaluʼaga ʼe mole fakahā mai, neʼe ‘hēʼia ohage ko he ōvi kua hēhē.’ (Pesalemo 119:175, 176) Ko ʼihi ʼaē neʼe mavae ʼi te kokelekasio ʼe lagi kei nātou ʼoʼofa ki te ʼAtua, pea lagi kei nātou fia fakavikiviki kiā te ia. Koia, tou faiga lahi ke tou tokoni kiā nātou ke feala hanatou toe maʼu te fīmālie fakalaumālie, pea mo nātou fiafia ʼi te fakavikiviki kiā Sehova mo tana hahaʼi.—Hepeleo 13:15; 1 Petelo 5:6, 7.
Ko He Mālama ʼe Ina Fakamālamaʼi Tuʼumaʼu Totatou Ala
23, 24. Koteā te ʼu lelei neʼe koutou maʼu ʼi te Pesalemo 119?
23 ʼE lahi te ʼu ʼaluʼaga ʼe fua lelei ai kiā tatou ia te Pesalemo 119. Ohage la, ʼaki te pesalemo ʼaia kua toe lahi age tatatou falala ki te ʼAtua, heʼe fakahā ʼi te Pesalemo ʼaia ʼe tou fiafia moʼoni heʼe tou “haʼele ʼi te lao ʼa Sehova.” (Pesalemo 119:1) ʼE fakamanatuʼi mai e te tagata fai pesalemo ko ‘te tāfito ʼo te folafola ʼa te ʼAtua ʼe moʼoni.’ (Pesalemo 119:160) ʼE fakatuputupu ai tatatou fakafetaʼi ki te Folafola kātoa ʼa te ʼAtua. Ko tatatou metitāsio ki te Pesalemo 119, ʼe tonu ke ina uga tatou ke tou ako fakalelei te Tohi-Tapu. Neʼe kole tuʼa lahi fēnei e te tagata fai pesalemo: “Akoʼi mai tau ʼu lēkula.” (Pesalemo 119:12, 68, 135) Neʼe ina toe kole fēnei: “Akoʼi mai te lotoʼofa, te aga fakapotopoto pea mo te ʼatamai mālama, he neʼe au tui ki tau ʼu fakatotonu.” (Pesalemo 119:66) ʼE tonu ke tou faikole feiā mo tatou.
24 Ko te akonaki ʼa te ʼAtua ʼe ina faka fealagia he ʼu felogoi lelei mo Sehova. ʼE tuʼa lahi te ʼui ʼa te tagata fai pesalemo ko ia ko te kaugana ʼa te ʼAtua. ʼE ina ʼui fēnei kiā Sehova ʼaki te ʼu palalau faka malave loto ʼaenī: “Ko au ʼe ʼa koe.” (Pesalemo 119:17, 65, 94, 122, 125; Loma 14:8) ʼE ko he pilivilesio hatatou tauhi pea mo fakavikiviki kiā Sehova heʼe ko tatou ko tana kau Fakamoʼoni! (Pesalemo 119:7) ʼE koutou tauhi fakafiafia koa ki te ʼAtua ʼi tokotou ʼuhiga kaugā fai faka mafola ʼo te Puleʼaga? Kapau koia, pea koutou ʼiloʼi papau ko Sehova ʼe haga tokoni atu anai pea mo ina tapuakina anai koutou ʼi te gāue ʼaia, mo kapau ʼe koutou falala tuʼumaʼu ki tana folafola pea mo koutou tuku ke ina fakamālamaʼi tokotou ala.
ʼE Koutou Tali Feafeaʼi Anai?
• He koʼe ʼe tou ʼofa ki te folafola ʼa te ʼAtua?
• ʼE lagolago feafeaʼi mai kiā tatou ia te folafola ʼa te ʼAtua?
• Ko te ʼu faʼahi fea ʼaē ʼe ʼaoga ai kiā tatou ia te ʼu fakamanatu ʼa Sehova?
• He koʼe ʼe nonofo te hahaʼi ʼa Sehova ʼi te fīmālie pea mo te tokalelei?
[Paki ʼo te pasina 16]
Ko te folafola ʼa te ʼAtua ʼe ko te matapuna ʼo te mālama fakalaumālie
[Paki ʼo te pasina 17]
Kapau ʼe tou ʼofa ki te ʼu fakamanatu ʼa Sehova, ʼe mole ina faka ʼuhiga anai tatou ko “he ʼu sikoli”
[Paki ʼo te pasina 18]
Kapau ʼe tou lau te Tohi-Tapu ʼi te ʼaho fuli, ʼe feala anai hatatou manatuʼi he ʼu vaega ʼe ʼaoga kiā tatou mokā tou faikole