3. He koʼe ʼe mole tonu ke ke mataku?

Ko ʼihi ʼe natou matataku naʼa mole natou lava fakahoko tanatou fakapapau kia Sehova. ʼE moʼoni, ʼi ʼihi temi ʼe feala ai ke ke fai ni hala. Kae ʼe mole ko koe pe. Neʼe toe fai feia pe la mo te ʼu tagata pea mo fafine agatonu ʼae ʼe talanoa ki ai te Tohi-Tapu. ʼE mole kole mai ia e Sehova ke haohaoa ʼana kaugana. (Lau ia Pesalemo 103:13, 14.) Ko te faʼahi ʼae ʼe maʼuhiga kia te ia ke ke fai te meʼa ʼae ʼe ke lavaʼi. Pea ʼe tokoni atu anai. ʼE ui mai e Sehova ʼe mole he meʼa “e feala anai ke ina fakamavae tatou mai [tona] ʼofa.”—Lau ia Loma 8:38, 39.

ʼE ʼi ai pe anai he temi, ʼe fakatagaʼi ai te kau Kilisitiano fuli. ʼE tonu anai koa ke ke mataku?

1. He koʼe ʼe fakatagaʼi anai tatou?

ʼE ui fakalelei mai ʼi te Tohi-Tapu: “Ko natou fuli ʼae ʼe fia pipiki ki te ʼAtua ʼi ʼonatou maʼuli, ʼi tonatou ʼuhiga tisipulo ʼa Kilisito Sesu, ʼe toe fakatagaʼi anai mo natou.” (2 Timoteo 3:12) Neʼe fakatagaʼi ia Sesu he neʼe mole kau ʼi te malama ʼa Satana. ʼE feia pe mo tatou, ʼe mole tou toe kau ʼi tona malama. Koia, ʼe mole tou punamaʼuli ai moka fakatagaʼi tatou e te ʼu puleʼaga pea mo te ʼu kautahi fakalotu ʼo te malama ʼaeni.—Soane 15:18, 19.

2. ʼE feafeaʼi hatatou nofo teuteu moka fakatagaʼi tatou?

ʼE tonu ke tou fakamalohiʼi tatatou falala kia Sehova ʼi te temi nei. Tou toʼo he temi ʼi te ʼaho fuli ke tou faikole pea mo lau te Tohi-Tapu. Tou kau tuʼumaʼu ki te ʼu fono. ʼE mahino ia, ʼe tou maʼu ai anai te malohi mo te lototoʼa moʼo tauʼi ia faʼahiga fakataga fuape, maʼia pe ʼe fakatagaʼi tatou e totatou famili. ʼE tohi fenei e te apositolo ko Paulo, ʼae neʼe tau fakatagaʼi: “Ko Sehova ʼe ko toku tokoni. ʼE mole au mataku anai.”—Hepeleo 13:6.

ʼE tou toe lototoʼa anai moka tou faifakamafola tuʼumaʼu. Ka tou faifakamafola, ʼe tokoni mai ke tou falala kia Sehova pea mo tauʼi te mataku ki te tagata. (Taʼaga Lea 29:25) Kapau ʼe tapuʼi tatatou gaue ʼi he ʼaho e te kau taki, ʼe kua tou tokalelei ki te tauʼi ʼo te aluʼaga ʼaia pea ʼe tou haga faifakamafola anai ʼaki he lototoʼa.—1 Tesalonika 2:2.

3. Kotea te ʼu lelei ka tou maʼu anai?

ʼE mole tou loto ke fakatagaʼi tatou, kae kapau ʼe tou katakiʼi totatou fakatagaʼi, ʼe toe malohi age ai tatatou tui. Pea ʼe tou fakaovi ai kia Sehova mo logoʼi ai tana tokoni moka ʼe mole kei ʼi ai hotatou malohi. (Lau ia Sakopo 1:2-4.) ʼE mamahi ia Sehova moka sio mai ʼe tou mamahi. Kae ʼe fiafia moka sio mai ʼe tou lotomalohi. ʼE ui fenei ʼi te Tohi-Tapu: “Kapau ʼe kotou ʼutakiʼi te mamahi he neʼe kotou fai te meʼa ʼae ʼe lelei, ʼe ko te meʼa ʼaia ʼe leleiʼia e te ʼAtua.” (1 Petelo 2:20) ʼE fakapale anai e Sehova ia natou ʼae ʼe nofo agatonu. ʼE ina foaki anai kia natou te maʼuli heʼe gata. Pea ʼe natou maʼuʼuli anai ʼi he malama ʼe mole toe fakafeagai ai he tahi ki te tauhi moʼoni.—Mateo 24:13.

TA FAKALOLOTO

4. ʼE feala hau katakiʼi te fakafeagai atu ʼa te famili

Neʼe kua fakatokaga mai e Sesu ʼe feala ke mole leleiʼia e totatou famili te tonu ʼae ʼe tou fai ke tou tauhi kia Sehova. Lau ia Mateo 10:34-36, pea fai te fehuʼi ʼaeni:

• Ka fakatuʼutuʼu he tahi ke tauhi kia Sehova, kotea ʼe feala ke fai e tona famili?

ʼATA VITEO: Neʼe Tali Maua e Sehova (5:13)

• Kotea ʼe ke fai anai moka faiga e he tahi ʼo tou famili peʼe ko hou kaumeʼa ke tuku tau tauhi kia Sehova?

Lau ia Pesalemo 27:10 mo Maleko 10:29, 30. Hili te lau ʼo te ʼu vaega takitahi, fai te fehuʼi ʼaeni:

• ʼE tokoni feafeaʼi atu te fakapapau ʼaeni moka fakafeagai atu he tahi ʼo tou famili peʼe ko hou kaumeʼa?

5. Ke ke haga tauhi kia Sehova logo la te fakataga

ʼATA VITEO: Neʼe Natou Lototoʼa Logo La Te Fakataga (6:27)

• Kotea te ʼu fakalotomalohi neʼe ke maʼu ʼi te ʼu faʼifaʼitaki ʼaeni?

Lau ia Gaue 5:27-29 mo Hepeleo 10:24, 25. Hili te lau ʼo te ʼu vaega takitahi, fai te fehuʼi ʼaeni:

• He koʼe ʼe maʼuhiga ke tou haga tauhi kia Sehova maʼia pe ʼe tapuʼi tatatou faifakamafola peʼe ko ʼatatou fono?

6. ʼE tokoni atu anai ia Sehova ke ke faʼa kataki

ʼATA VITEO: ʼE Foaki Mai Anai e Sehova Te Malohi (3:40)

• Kotea ʼae neʼe tokoni ki te kau Fakamoʼoni ʼaia ke natou faʼa kataki?

Lau ia Loma 8:35, 37-39 mo Filipe 4:13. Hili te lau ʼo te ʼu vaega takitahi, fai te fehuʼi ʼaeni:

• He koʼe ʼe ke tui papau ʼe ke lava katakiʼi he faʼahiga ʼahiʼahi pe?

Lau ia Mateo 5:10-12, pea fai te fehuʼi ʼaeni:

• He koʼe ʼe feala ke tou fiafia logo la ʼe fakatagaʼi tatou?

MANATU TAFITO

ʼE maʼuhiga ʼaupito kia Sehova ʼatatou faiga ʼae ke tou nofo agatonu kia te ia. ʼAki tana tokoni, ʼe tou lava katakiʼi ai te fakataga.

Fehuʼi Fakamanatu

• He koʼe ʼe fakatagaʼi anai te kau Kilisitiano?

• Kotea ʼe feala ke ke fai ʼi te temi nei ke ke nofo teuteu moka fakatagaʼi koe?

• He koʼe ʼe ke tui papau ʼe ke nofo agatonu anai kia Sehova logo la te ʼu ʼahiʼahi?

TE TAHI ʼU MANATU

ʼE fakamatala e he tehina tupulaga pe neʼe tokoni feafeaʼi age ia Sehova ʼi tana pilisoni ʼuhi ko tana mole kau ʼi te ʼu fihi ʼo te malama.

Tou Faʼa Kataki Logo La Te Fakataga (2:34)

Te aluʼaga neʼe tokoni ki he taumatuʼa neʼe tauhi agatonu kia Sehova lolotoga ni taʼu logo la te ʼu fakafeagai neʼe fai kia naua.

ʼE Nā Tauhi Kia Sehova ʼi Te ʼu Temi Neʼe Fai Ai Ni Fetogi (7:11)

ʼE feafeaʼi hau lototoʼa moka fakatagaʼi koe?

“Tou Teuteu ʼi Te Temi Nei Ki Te ʼu Fakataga” (Ko Te Tule Leʼo ʼo Sulio 2019)

Kotea te faʼahiga manatu ʼe tonu ke tou maʼu moka fakafeagai mai totatou famili? Pea ʼe feafeaʼi hatatou tauʼi te faʼahi ʼaia?

“ ʼE Mole ʼAumai e Te Moʼoni Ia ‘Te Tokalelei Kaʼe Ko Te Heleta’ ” (Ko Te Tule Leʼo ʼo Oketopeli 2017)