ʼE Lava Tokoni Atu Te Tohi-Tapu Ke Koutou Maʼu Te Fiafia

LOGOLA ko te Tohi-Tapu ʼe mole ko he tohi ʼe maʼu ai he ʼu faitoʼo, kae ʼe ina fakamahino mai ko he tahi ʼe ina maʼu he ʼu manatu ʼe lelei peʼe kovi, ʼe feala ke malave ki tana fakakaukau pea mo tona sino. ʼE ʼui fēnei ʼi te Tohi-Tapu: “Ko he loto ʼe fiafia ko he meʼa lelei ia ohage ko he faitoʼo, kae ko he laumālie kua vaivai ʼe ina fakamoamoa te ʼu hui.” ʼE tou toe lau fēnei: “Neʼe kua ke lotovaivai koa ʼi te ʼaho ʼo te mamahi? Ko tou mālohi ʼe siʼisiʼi anai.” (Tāʼaga Lea 17:22; 24:10) Ka tou lotovaivai pea ʼe feala ke puli ai totatou mālohi, mo tou logo gaʼegaʼe ai pea mo tou mahaki gafua, pea ʼe mole tou fia fetogi peʼe tou kumi tokoni.

Ko te lotovaivai ʼe feala ke toe malave ki te maʼuli fakalaumālie ʼo he tahi. Ko te hahaʼi ʼaē ʼe nātou manatu ʼe mole nātou maʼuhiga, ʼi te agamāhani ʼe nātou manatu ʼe mole feala ʼi he temi ke nātou felogoi mo te ʼAtua pea mo tapuakina nātou. Ko Simone, ʼaē neʼe tou talanoa kiai ʼi te ʼuluaki alatike, neʼe mole tui ia ʼe kau ki te “faʼahiga hahaʼi ʼaē ʼe ʼofa ki ai te ʼAtua.” Kae ka tou vakaʼi te Folafola ʼa te ʼAtua, te Tohi-Tapu, pea ʼe tou mahino ai ko te ʼAtua ʼe ina leleiʼia ia nātou ʼaē ʼe nātou faiga ke nātou fakafiafia tona loto.

ʼE Tokaga Moʼoni Te ʼAtua

ʼE ʼui ʼi te Tohi-Tapu “ko Sehova ʼe ōvi kiā nātou ʼaē ʼe lavea tonatou loto pea ʼe ina hāofaki ia nātou ʼe mamahi tonatou ʼatamai.” ʼE mole fehiʼa te ʼAtua ki “he loto lavea mo taʼomia” kae ʼe ina fakapapau “ ʼe ina toe fakamaʼuli te ʼatamai ʼo te kau agavaivai, moʼo fakamaʼuli te loto ʼo nātou ʼaē ʼe taʼomia.”​—Pesalemo 34:18; 51:17; Isaia 57:⁠15.

ʼI te tahi lakaga, ko te ʼAlo ʼo te ʼAtua, ia Sesu, neʼe manatu ia ʼe maʼuhiga ke ina fakamahino age ki tana ʼu tisipulo ko te ʼAtua ʼe sio ki te meʼa ʼaē ʼe lelei ʼi Tana ʼu kaugana. ʼAki he lea fakatātā, neʼe ina ʼui ai ko te ʼAtua ʼe ina tokagaʼi te kiʼi misi ʼaē ʼe tō ifo ki te kele​—kae ʼi te agamāhani, ʼe mole ko he meʼa ʼe tokagaʼi e te tokolahi. Neʼe ina toe fakahā lelei ʼe ʼiloʼi e te ʼAtua te ʼu meʼa liliki ʼo ʼuhiga mo te tagata, māʼiape la peʼe ko ʼonatou fuluʼi ʼulu e fia. Neʼe fakaʼosi e Sesu tana lea fakatātā, ʼo ina ʼui fēnei: “Koia, aua tautou tuania; e koutou mauhigaʼage i te atu misi fuape.” (Mateo 10:​29-31)a Neʼe fakahā e Sesu tatau aipe peʼe koteā te manatu ʼaē ʼe feala ke maʼu e te hahaʼi ʼo ʼuhiga mo nātou, kae kiā mata ʼo te ʼAtua ʼe maʼuhiga te hahaʼi ʼaē ʼe nātou maʼu te tui. ʼI tona ʼuhiga moʼoni, ʼe fakamanatuʼi mai e te ʼapositolo ko Petelo “ko te ʼAtua ʼe mole fakapalatahi; kae ʼi te puleʼaga fuli pe ko te tagata ʼaē ʼe manavasiʼi kiā te ia pea mo ina maʼuliʼi te faitotonu ʼe ina tali leleiʼi ia ia.”​—Gaue 10:​34, 35, MN.

Koutou Taupau He Manatu Fakapotopoto

ʼE fakaloto mālohiʼi tatou ʼi te Folafola ʼa te ʼAtua ke tou maʼu he manatu fakapotopoto ʼo ʼuhiga mo tatou. Neʼe tohi fēnei e te ʼapositolo ko Paulo: “Koteuhi, aki te [“ ʼofa makehe,” MN ] nee foaki mai kia te au, e au tala atu kia koutou fuli taki tokotahi, aua naa fakalaka te tala poto i te mea e tonu ke koutou manatu fakapotopoto ki ai, kae koutou fakakaukau fakapotopoto ke koutou nofo galipoto, o fai ki te fuafua o te tui nee vahevahe e te Atua ki te tagata taki tokotahi.”​—Loma 12:⁠3.

ʼE mahino ia ʼe mole tou fia manatu lahi fau leva ʼo ʼuhiga mo tatou naʼa tou liliu ʼo fia maʼuhiga fau; kae ʼi te tahi age faʼahi ʼe mole tonu ke tou manatu ʼe mole hotatou ʼaoga. Kae ʼe tonu ke tou faiga ke tou maʼu he manatu fakapotopoto ʼo ʼuhiga mo tatou, ke tou ʼiloʼi totatou ʼu fealagia pea mo totatou ʼu tuʼakoi. ʼE manatu fēnei te fafine: “Maʼaku ʼe mole au kovi ʼosi, pea ʼe mole au lelei age ʼosi ʼi te hahaʼi. ʼE ʼi ai toku ʼu kalitātē pea mo toku ʼu vaivaiʼaga, pea ʼe toe feiā mo te hahaʼi fuli pe.”

ʼE moʼoni, ʼe mole faigafua hatatou maʼu he manatu fakapotopoto ʼo ʼuhiga mo tatou. ʼE lagi tonu anai ke tou faiga fakamalotoloto ke tou pulihi te ʼu manatu ʼaē ʼe kovi, ʼaē kua tou maʼu talu mai ni ʼu taʼu. Kae ʼaki te tokoni ʼa te ʼAtua, ʼe feala ke tou fetogi totatou ʼulugaaga pea mo tatatou manatu ʼo ʼuhiga mo te maʼuli. ʼE uga tatou e te Tohi-Tapu ke tou fai te faʼahi ʼaia. ʼE tou lau fēnei: “Koutou līaki tokotou ʼulugaaga ʼāfea ʼaē ʼe ʼalutahi mo takotou aga ʼāfea pea ʼe fakahehema ʼo fai pe ki tona ʼu holi kākā; kae ʼe tonu ke koutou fakafoʼou ia koutou ʼi te mālohi ʼaē ʼe ina uga tokotou ʼatamai pea mo koutou kofuʼi te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.”​—Efeso 4:​22-24, MN.

ʼI tatatou faiga ʼaē ke tou fetogi ‘te mālohi ʼaē ʼe ina uga totatou ʼatamai,’ ʼe feala ai ke tou fetogi tatatou ʼu manatu ʼaē ʼe mole lelei kae ke tou maʼu he ʼu manatu ʼe lelei. Ko Lena, ʼaē neʼe tou talanoa ki ai ʼi te ʼuluaki alatike, neʼe mahino leva kiā ia ʼe feala anai ke ina fetogi tana ʼu manatu ʼo ʼuhiga mo ia, mo kapau ʼe ina līaki tana manatu ʼaē ʼe mole ʼofainaʼi ia ia peʼe mole fia tokoni he tahi kiā ia. Ko te ʼu tokoni faka Tohi-Tapu fea ʼaē neʼe ʼaoga kiā Lena, mo Simone, pea mo ʼihi atu hahaʼi ke feala hanatou fai he ʼu fetogi?

Te ʼu Pelesepeto Faka Tohi-Tapu ʼAē ʼe Ina Foaki Te Fiafia

“Tuku tau kavega kiā Sehova totonu, pea ko ia totonu ʼe lagolago anai kiā te koe.” (Pesalemo 55:22) Ko te ʼuluaki faʼahi maʼuhiga, ʼe ko te faikole ʼaē ʼe feala ai ke tou maʼu te fiafia moʼoni. ʼE ʼui fēnei e Simone: “ ʼI te temi fuli pe ʼaē neʼe au lotovaivai ai, neʼe au faikole kiā Sehova ke tokoni mai. Neʼe au logo tuʼumaʼu pe tona mālohi pea mo tona takitaki.” ʼE fakaloto mālohiʼi tatou e te tagata fai pesalemo ke tou tuku tatatou kavega kiā Sehova, ko tona faka ʼuhiga ʼe ina fakamanatuʼi mai ko Sehova ʼe mole gata ʼaki pe tana tokaga kiā tatou, kae ʼe tou toe maʼuhiga kiā te ia pea ʼe fia tokoni mai. ʼI te po ʼo te Pāsikate ʼo te taʼu 33 ʼo totatou temi, neʼe lotomamahi te kau tisipulo ʼa Sesu ʼuhi ko te fakahā age e Sesu tana ʼamanaki mavae iā nātou. Neʼe fakaloto mālohiʼi nātou e Sesu ke nātou faikole ki te Tāmai, pea neʼe ina toe ʼui fēnei: “Koutou kole pea e koutou mau anai, ke katoa toutou fiafia.”​—Soane 16:​23, 24.

“ ʼE lahi age te fiafia ʼi takita foaki, ʼi takita tali.” (Gaue 20:​35, MN ) Ohage ko tona akoʼi e Sesu, ko te foaki ʼe ko he faʼahi ʼe tou maʼu ai te fiafia moʼoni ʼi totatou maʼuli. Ko te maʼuliʼi ʼo te moʼoni faka Tohi-Tapu ʼaenī, ʼe feala ai ke tou tōkakaga tafito ki te ʼu meʼa ʼaē ʼe ʼaoga ki ʼihi kae mole tou tōkakaga pe ki te ʼu meʼa ʼaē ʼe mole tou lavaʼi. ʼE tou logo fiafia ʼaupito, mokā tou tokoni ki te hahaʼi pea mo tou sio ʼe nātou fiafia. ʼE tui papau e Lena ko tana faka mafola tuʼumaʼu ki te hahaʼi ia te logo lelei ʼaē ʼe tuʼu ʼi te Tohi-Tapu, ʼe tokoni ai kiā ia ia faʼahi e lua. ʼE ina ʼui fēnei: “ ʼUluaki, ʼe au maʼu te fiafia ʼaē neʼe talanoa kiai Sesu. Lua, ʼe tali lelei e te hahaʼi, pea ʼe au logo fiafia ai.” Kapau ʼe tou loto fia foaki lahi, ʼe tou ʼiloʼi anai te moʼoni ʼo te Tāʼaga Lea 11:25: “Ko ʼaē ʼe lahi tana fakavai niʼihi, ʼe lahi anai mo tona fakavai.”

“Ko te ʼu ʼaho fuli ʼo ia ʼaē ʼe lotomamahi ʼe kovi ia; kae ko ia ʼaē ʼe fiafia tona loto ʼe kai tuʼumaʼu ki he kātoaga.” (Tāʼaga Lea 15:15) Ko tatou fuli ʼe feala ke tou filifili tatatou manatu ʼo ʼuhiga mo tatou pea mo totatou ʼu ʼaluʼaga. ʼE lagi tou hage ko ia ʼaē ʼe ina faka ʼuhiga kovi ia meʼa fuli pea mo tou lotomamahi ai, peʼe feala ke tou maʼu he ʼu manatu ʼe lelei, mo ‘fiafia ai totatou loto,’ pea mo tou fiafia ai ohage ʼe tou kai ʼi he kātoaga. ʼE ʼui fēnei e Simone: “ ʼE au faiga ke au maʼu he ʼu manatu lelei. ʼE au fai taku ako takitokotahi pea mo lahi taku gāue ʼi te minisitelio, pea mo au kātaki ʼo faikole. ʼE au toe faiga foki ke au fakatahi mo he ʼu hahaʼi ʼe nātou maʼu he ʼu manatu lelei, pea ʼe au faiga ke au tokoni ki te hahaʼi ʼaia.” Kapau ʼe maʼu e he tahi he loto feiā, pea ʼe ina maʼu mo te fiafia moʼoni, ohage ko tona fakaloto mālohiʼi fēnei tatou ʼi te Tohi-Tapu: “Ke koutou fakafiafia iā Sehova, pea ke koutou fiafia, kau faitotonu! Pea ke koutou fai he ʼu kalaga fiafia, ia koutou fuli ʼaē ʼe totonu ʼokotou loto!”​—Pesalemo 32:⁠11.

“Ko he kaumeʼa moʼoni ʼe ʼofa ia ʼi te temi fuli pe, pea ʼe ko he tēhina neʼe tupu ki te ʼu ʼaho mamahi.” (Tāʼaga Lea 17:17) Kapau ʼe tou fakahā te meʼa ʼaē ʼi totatou loto ki he tahi ʼe tou ʼofa ai peʼe ko he tahi ʼe fai tokoni ʼe tou falala ki ai, pea ʼe feala ai ke tou tauʼi te ʼu manatu ʼaē ʼe mole lelei pea mo pulihiʼi muʼa ʼo tanatou liliu ʼo lahi fau. Ka tou palalau mo he tahi ʼu hahaʼi, ʼe feala ke tou maʼu ai he manatu fakapotopoto. ʼE ʼui fēnei e Simone: “ ʼE ko he meʼa lelei ʼaupito mokā tou palalau ʼo ʼuhiga mo te ʼu meʼa ʼi totatou loto. ʼE koutou fia fakahā ki he tahi te ʼu meʼa ʼaē ʼe koutou logoʼi. ʼI te agamāhani, ʼe tonu pe ke tou fakahā tatatou ʼu manatu.” ʼE koutou ʼiloʼi anai te moʼoni ʼo te tāʼaga lea ʼaenī: “Ko te tuʼania ʼi te loto ʼo he tagata, ʼe ina fakamamahiʼi tona loto, kae ko he palalau lelei, ʼe ina fakafiafia [te loto].”​—Tāʼaga Lea 12:⁠25.

Te Meʼa ʼAē ʼe Feala Ke Koutou Fai

Neʼe tou vakaʼi ʼi te Tohi-Tapu, he ʼu pelesepeto ʼe lelei pea mo ʼaoga, ʼe lava tokoni mai ke tou tauʼi ia te ʼu manatu ʼaē ʼe mole lelei pea mo tou maʼu ia te fiafia moʼoni. Kapau ʼe koutou manatu ʼe mole koutou popoto ʼi te fai ʼo he ʼu meʼa lelei, ʼe mātou fakaloto mālohiʼi koutou ke koutou vakavakaʼi fakalelei ia te Folafola ʼa te ʼAtua, te Tohi-Tapu. Koutou ako ke koutou maʼu he manatu ʼe fakapotopoto pea mo lelei ʼo ʼuhiga mo koutou, pea ʼo ʼuhiga mo takotou ʼu felogoi mo te ʼAtua. ʼE mātou fakaʼamu ke koutou maʼu, ʼaki te takitaki ʼa te Folafola ʼo te ʼAtua, ia te fiafia moʼoni ʼi te ʼu meʼa fuli ʼaē ʼe koutou fai.

[Kiʼi nota]

[Paki ʼo te pasina 7]

ʼE feala ke tou maʼu te fiafia mo kapau ʼe tou maʼuliʼi te ʼu pelesepeto ʼa te Tohi-Tapu