Tou Faka Kolōliaʼi Ki Te ʼAtua “ ʼAki He Gutu e Tahi”
“[Tou] faka kolōlia ʼaki he gutu e tahi ia te ʼAtua pea mo Tāmai ʼo totatou ʼAliki ko Sesu Kilisito.”—Loma 15:6, MN.
1. Koteā te ako neʼe foaki e Paulo ki te ʼu tēhina ʼo ʼuhiga mo te ʼu manatu kehekehe ʼaē ʼe feala ke tou maʼu?
ʼE KEHEKEHE te ʼu meʼa ʼaē ʼe filifili e te kau Kilisitiano pea mo te ʼu meʼa ʼaē ʼe nātou leleiʼia. Kae ʼe tonu ki te kau Kilisitiano fuli ke nātou haʼele ʼaki he logo tahi ʼi te ala ki te maʼuli. ʼE feala koa te faʼahi ʼaia? Ei, mo kapau ʼe mole tou fakalalahi fau he ʼu kiʼi fihifihia noa. Ko te ako ʼaia ʼaē neʼe foaki e te ʼapositolo ko Paulo ki te ʼu tēhina ʼo te ʼuluaki sēkulō. Neʼe ina fakamahino feafeaʼi te manatu maʼuhiga ʼaia? Pea ʼe tou lava maʼuliʼi feafeaʼi te tokoni ʼaia ia ʼaho nei?
Te Maʼuhiga ʼo Te Logo Tahi Faka Kilisitiano
2. Neʼe fakahā lelei feafeaʼi e Paulo te maʼuhiga ʼo te logo tahi?
2 Neʼe ʼiloʼi e Paulo ʼe maʼuhiga te logo tahi faka Kilisitiano, pea neʼe ina foaki ai te tokoni lelei ke feala ki te kau Kilisitiano ke nātou fekātakiʼaki ʼi te ʼofa. (Efeso 4:1-3; Kolose 3:12-14) Kae hili te fakatuʼu ʼo te ʼu kokelekasio ʼe tokolahi pea mo tana ʼaʼahi te tahi ʼu kokelekasio lolotoga taʼu e 20 tupu, neʼe ina ʼiloʼi ai ʼe feala ke faigataʼa te taupau ʼo te logo tahi. (1 Kolonito 1:11-13; Kalate 2:11-14) Koia neʼe ina uga fēnei ai te ʼu Kilisitiano ʼo Loma: “ ʼOfa pe ke tuku atu kia koutou e te ʼAtua ʼaē ʼe ina foaki ia te faʼa kātaki pea mo te fakaloto fīmālie . . . ke feala ʼaki he lototahi ke koutou faka kolōlia ʼaki he gutu e tahi ia te ʼAtua pea mo Tāmai ʼo totatou ʼAliki ko Sesu Kilisito.” (Loma 15:5, 6, MN ) Ia ʼaho nei, ʼe tonu mo tatou ʼaē ko te hahaʼi logo tahi ʼa Sehova ʼAtua ke tou faka kolōliaʼi ia ia “ ʼaki he gutu e tahi.” ʼO feafeaʼi?
3, 4. (a) Neʼe ko te ʼu Kilisitiano feafeaʼi ʼaē neʼe nonofo ʼi Loma? (b) Logola te ʼu faʼahi ʼaē neʼe kehekehe ai te kau Kilisitiano Loma, kae neʼe lava feafeaʼi hanatou tauhi kia Sehova “ ʼaki he gutu e tahi”?
3 Tokolahi te kau Kilisitiano ʼi Loma neʼe nātou kaumeʼa lelei mo Paulo. (Loma 16:3-16) Logola neʼe kehekehe tonatou maʼuli, kae maʼa Paulo ko tona ʼu tēhina fuli ʼaia neʼe ko “te kau ʼofaina ʼa te ʼAtua.” Neʼe ina tohi fēnei: “ ʼE ʼau fakafetaʼi ki toku ʼAtua ʼaki ia Sesu Kilisito ʼo ʼuhiga mo koutou fuli, koteʼuhi ʼe talanoaʼi takotou tui ʼi te malamanei katoa.” ʼE hā mai ʼe lahi te ʼu ʼaluʼaga neʼe tuku ai e te kau Loma he faʼifaʼitaki lelei. (Loma 1:7, 8, MN; 15:14, MN ) Kae ko ʼihi Kilisitiano ʼi te kokelekasio neʼe ʼi ai te ʼu faʼahi neʼe mole tatau ai tanatou manatu. Ia ʼaho nei, ʼe ʼōmai te kau Kilisitiano mai he ʼu faʼahiga maʼuli pea mo he ʼu agaʼi fenua kehekehe, pea koia ʼe feala ke tokoni kia nātou ke nātou palalau “ ʼaki he gutu e tahi” mokā nātou vakaʼi te tokoni ʼa Paulo ki te faʼahiga fakatokatoka ʼo te ʼu manatu kehekehe.
4 ʼI Loma, neʼe ʼi ai te kau Kilisitiano Sutea pea mo Senitile. (Loma 4:1; 11:13) ʼE ʼasi mai ko ʼihi kau Kilisitiano Sutea neʼe kei nātou mulimuli pe ki ʼihi agaʼi fenua neʼe fai ʼi te Lao ʼa Moisese, logola neʼe tonu ke nātou mahino ʼe mole hāofaki anai nātou e te ʼu aga ʼaia. ʼI te tahi age faʼahi, ko ʼihi kau Kilisitiano Sutea neʼe nātou tali ke faka ʼāteaina nātou e te sakilifisio ʼo Kilisito mai te ʼu lao ʼaē neʼe nātou mulimuli kiai ʼi muʼa ʼo tanatou liliu ko he kau Kilisitiano. Koia neʼe nātou fetogi ai ʼihi ʼu agamāhani. (Kalate 4:8-11) Kae ohage ko tona fakahā lelei e Paulo, ko nātou fuli ko “te kau ʼofaina ʼa te ʼAtua.” Ko nātou fuli neʼe feala ke nātou vikiʼi te ʼAtua “ ʼaki he gutu e tahi” mo kapau neʼe nātou maʼu ia nātou te manatu ʼaē ʼe lelei. Ia ʼaho nei, ʼe feala ke tou maʼu mo tatou he ʼu manatu kehekehe ʼo ʼuhiga mo he ʼu ʼaluʼaga, koia ʼe lelei ke tou vakaʼi fakalelei pe neʼe fakamahino feafeaʼi e Paulo te pelesepeto maʼuhiga ʼaia.—Loma 15:4.
“Koutou Fe’talitakiʼaki Ia Koutou”
5, 6. He koʼe neʼe ʼi ai te ʼu manatu kehekehe ʼo ʼuhiga mo te meʼa kai ʼi te kokelekasio ʼi Loma?
5 ʼI tana tohi ki te kau Loma, ʼe talanoa Paulo ki te ʼu manatu kehekehe neʼe maʼu e te kau Kilisitiano ʼo ʼuhiga mo te ʼaluʼaga e tahi. ʼE ina tohi fēnei: “Ko he tahi e tui e ina kai te meafuape, kae kai lauakau he tahi e vaivai.” He koʼe neʼe palalau feiā ia Paulo? ʼI te Lao ʼa Moisese, neʼe tapu te kai ki te puaka. (Loma 14:2; Levitike 11:7) Kae ʼi te ʼosi mate ʼo Sesu neʼe mole kei maʼua ki te kau Sutea ke nātou mulimuli ki te Lao ʼaia. (Efeso 2:15) Pea hili taʼu e tolu vaelua ʼi te ʼosi mate ʼo Sesu, neʼe ʼui e te ʼaselo ki te ʼapositolo ko Petelo, kia mata ʼo te ʼAtua neʼe mole he meʼa kai neʼe ʼuli. (Gaue 11:7-12) ʼI tanatou mahino ki te faʼahi ʼaia, neʼe manatu ia te kau Kilisitiano Sutea ʼe feala ke nātou kai te puaka—peʼe ko he tahi age ʼu meʼa kai neʼe tapuʼi e te Lao.
6 Kae maʼa ʼihi Kilisitiano Sutea neʼe mole feala hanatou kai ki he ʼu meʼa kai neʼe faka ʼuhiga ʼi muʼa atu ko he ʼu meʼa kai ʼe heʼemaʼa. Pea ko nātou ʼaia neʼe feala ke nātou punamaʼuli ʼi tanatou sisio ʼaē ʼe fakaʼaogaʼi te ʼu meʼa kai ʼaia e tonatou ʼu tēhina Kilisitiano Sutea. Tahi ʼaē meʼa, ko ʼihi Kilisitiano Senitile, ʼaē neʼe mole lagi tapuʼi age kia nātou he ʼu meʼa ʼi tanatou lotu ʼāfea, neʼe feala ke nātou feʼekeʼaki ki te aga ʼa ʼihi ʼo ʼuhiga mo te meʼa kai. ʼE mahino ia ʼe mole kovi mo kapau ʼe mole kai e he tahi he faʼahiga meʼa kai, kae ʼe mole tonu ke ina ʼui ʼe hāofaki anai ia ia heʼe mole kai ki te ʼu meʼa kai ʼaia. Ko te ʼu manatu kehekehe ʼaia neʼe feala ke tupu ai he mole felogoi ʼi te kokelekasio. Neʼe tonu ke tokakaga te kau Kilisitiano ʼi Loma ke mole nātou fakagata tanatou faka kolōliaʼi te ʼAtua “ ʼaki he gutu e tahi” ʼuhi ko te ʼu manatu kehekehe ʼaia.
7. Koteā te ʼu manatu kehekehe neʼe maʼu ʼo ʼuhiga mo te mulimuli ki he ʼaho makehe ʼo te vāhaʼa?
7 ʼE foaki e Paulo te tahi faʼifaʼitaki: “Ko he tahi e ina vakai he aho e leleiʼage i he tahi aho, kae e vakai e he tahiʼage e tatau ia ʼaho fuli pe.” (Loma 14:5a) ʼI te Lao ʼa Moisese, neʼe mole tonu ke fai he gāue ʼi te ʼaho ʼo te Sapato. Neʼe toe faka tuʼakoi mo te feʼaluʼaki ʼa te hahaʼi ʼi te ʼaho ʼaia. (Ekesote 20:8-10; Mateo 24:20; Gaue 1:12) Kae ʼi te molehi ʼo te Lao, neʼe mole kei maʼua ke mulimuli te kau Sutea ki te ʼu tapu ʼaia. Kae neʼe kei tuʼania pe ʼihi kau Kilisitiano Sutea tanatou fai he ʼu faʼahiga gāue peʼe ko hanatou fai he fagona loaloaga ʼi he ʼaho neʼe taputapu kia nātou ʼi te temi muʼa. Logola neʼe kua nātou liliu ko he ʼu Kilisitiano, kae lagi neʼe nātou tāʼofi te fitu ʼaho moʼo fai tanatou ʼu gāue fakalaumālie, tatau aipe peʼe kia mata ʼo te ʼAtua neʼe mole kei tonu ke nātou mulimuli ki te Sapato. Neʼe hala koa tanatou fai? Kailoa, mo kapau foki neʼe mole kei nātou faka ʼuhiga te Sapato ohage ko he meʼa neʼe fakatotonu e te ʼAtua ke nātou mulimuli kiai. Koia, ʼuhi ko te leʼo ʼo loto ʼo tona ʼu tēhina Kilisitiano, neʼe tohi fēnei e Paulo: “Ke tahi tui pau te tagata fuape i tana manatu.”—Loma 14:5b.
8. Logola neʼe feala hanatou fakaʼapaʼapa ki te leʼo ʼo loto ʼo ʼihi, kae koteā ʼaē neʼe mole tonu ke fai e te kau Kilisitiano ʼi Loma?
8 Logola tana ʼofa ʼo fakaloto mālohi tona ʼu tēhina ke nātou kātakiʼi ia nātou ʼaē neʼe kei fihi ʼo ʼuhiga mo he ʼu faʼahi neʼe fakalogo ki te leʼo ʼo loto, kae neʼe tautea mālohi e Paulo ia nātou ʼaē neʼe nātou fakakinauʼi te ʼu tēhina ke nātou mulimuli ki te ʼu Lao ʼa Moisese ke hāofaki ai nātou. Ohage la ʼi te taʼu 61 ʼo totatou temi, neʼe tohi e Paulo te tohi ʼo Hepeleo, ko te tohi mālohi ki te kau Kilisitiano Sutea pea ʼe ina fakamahino lelei ai neʼe mole kei tonu ke nātou mulimuli ki te Lao ʼa Moisese pea ʼe maʼu e te kau Kilisitiano he ʼamanaki ʼe lahi age ʼe fakatafito ki te sakilifisio faitotogi ʼa Sesu.—Kalate 5:1-12; Tito 1:10, 11; Hepeleo 10:1-17.
9, 10. Koteā ʼaē ʼe mole tonu ke fai e te kau Kilisitiano? Koutou fakamahino.
9 Ohage ko te ʼu meʼa ʼaē neʼe tou vakaʼi, ʼe ʼui e Paulo ko te ʼu meʼa kehekehe ʼaē ʼe tou filifili, ʼe mole fakatupu kovi anai ki te logo tahi, mo kapau foki ʼe mole nātou maumauʼi he pelesepeto faka Kilisitiano. ʼE fehuʼi fēnei e Paulo ki te kau Kilisitiano ʼaē ʼe vaivai tonatou leʼo ʼo loto: “Kotea te tupuaga o tau fakamauʼi tou tehina?” Pea ʼe ina fehuʼi fēnei kia nātou ʼaē ʼe mālolohi (lagi ko nātou ʼaē neʼe mole hoha tonatou leʼo ʼo loto ʼi tanatou kai ki he meʼa kai neʼe tapuʼi e te Lao peʼe nātou fai he gāue ʼi te Sapato): “Kotea te tupuaga o tau valoki tou tehina?” (Loma 14:10) Ohage ko tona ʼui e Paulo, ko te kau Kilisitiano ʼaē ʼe vaivai tonatou leʼo ʼo loto ʼe mole tonu ke nātou fakamāuʼi tonatou ʼu tēhina ʼaē ʼe nātou tali he tahi ʼu meʼa. Pea ko te kau Kilisitiano ʼaē ʼe mālolohi ʼe mole tonu ke nātou fehiʼa kia nātou ʼaē ʼe kei vaivai tonatou ʼu leʼo ʼo loto ʼi ʼihi faʼahi. ʼE tonu ke nātou tahi fakaʼapaʼapa fuli ki tanatou ʼu manatu, pea ke mole ‘tou faka maʼuhigaʼi fau tatatou ʼu manatu.’—Loma 12:3, 18.
10 Neʼe fakamahino fēnei e Paulo te manatu fakapotopoto: “Aua naa valoki iaʼia e mole kai e ia ae e kai, pea e mole fakamauʼi iaʼia e kai, e ia ae e mole kai, he kua tali iaʼia e te Atua.” Pea ʼe ina toe ʼui fēnei: “[Neʼe] fakatalitali [tatou] e Kilisito o uhiga mo te mooni o te Atua.” Mai tona ʼaluʼaga ʼaē ʼe tali e te ʼAtua pea mo Kilisito ia ia ʼaē ʼe mālohi pea mo ia ʼe vaivai, ʼe tonu ke tou maʼu te manatu ʼaia pea mo tou “fe’talitaliʼaki” ia tatou. (Loma 14:3; 15:7) ʼE ʼi ai koa he tahi ʼe feala ke ina fakafihiʼi te faʼahi ʼaia?
ʼE Maʼu Te Logo Tahi Ia ʼAho Nei ʼUhi Ko Te ʼOfa Faka Tautēhina
11. ʼI te temi ʼo Paulo, koteā te ʼaluʼaga ʼaē neʼe mole heʼeki hoko ʼi muʼa atu?
11 ʼI tana tohi ki te kau Loma, neʼe talanoa ia Paulo ʼo ʼuhiga mo he ʼaluʼaga neʼe mole heʼeki hoko ʼi muʼa atu. Neʼe hoki fakagata e Sehova te fuakava pea mo ina fakatuʼu te fuakava foʼou. Neʼe faigataʼa ki ʼihi hanatou mulimuli kiai. Ko te ʼaluʼaga ʼaia ʼe mole hoko ʼi te temi nei, kae ʼi ʼihi temi ʼe feala ke hoko he ʼu fihifihia feiā.
12, 13. Koteā ʼihi ʼu ʼaluʼaga ia ʼaho nei ʼe feala ke fakaʼapaʼapa ai te kau Kilisitiano ki te leʼo ʼo loto ʼo tonatou ʼu tēhina?
12 Ohage la, ko he tuagaʼane neʼe lagi kau ʼi muʼa atu ʼi he lotu neʼe mole faka maʼuhigaʼi te teuteu matalelei ʼa te fafine. ʼI tana tali te moʼoni, ʼe lagi faigataʼa kia ia hana fia teuteu ʼi he ʼu faʼahiga ʼaluʼaga, ke ina kofuʼi he ʼu teu matalelei, ʼe lanu kehekehe, peʼe fia vali kula peʼe ko he tahi atu ʼu meʼa feiā. Mai tona ʼaluʼaga ʼaē ʼe mole pipiki kiai he pelesepeto faka Tohi-Tapu, ʼe mole lelei anai ke faiga e he tahi ke ina fakakinauʼi te tuagaʼane ʼaia ke ina maumauʼi tona leʼo ʼo loto. ʼI te tahi faʼahi, ʼe mahino ki te tuagaʼane ʼe mole tonu ke ina valokiʼi te ʼu tuagaʼane ʼaē ʼe fakagafua e tonatou leʼo ʼo loto ke nātou fakaʼaogaʼi te ʼu meʼa ʼaia.
13 Tou vakaʼi te tahi faʼifaʼitaki. Ko te tēhina neʼe lagi lahilahi ake ʼi he faʼahiga maʼuli neʼe mole tali te ʼinu kava. ʼI tana ʼosi ʼiloʼi te moʼoni, ʼe ina ako te manatu ʼa te Tohi-Tapu ko te vino ʼe ko he meʼa ʼofa mai te ʼAtua pea ʼe feala ke kita ʼinu fakapotopoto. (Pesalemo 104:15) ʼE ina tali te manatu ʼaia. Kae ʼuhi ko tona maʼuli ʼi muʼa atu, ʼe mole fia ʼinu ia ki he moʼi kava. Kae ʼe mole ina valokiʼi ia nātou ʼaē ʼe ʼinu fakapotopoto. ʼE ina maʼuliʼi ai te ʼu palalau ʼaenī neʼe fai e Paulo: “Tou fekumi kia mea o te tokalelei pea mo mea e lagalaga aki tatou taki tokotahi.”—Loma 14:19.
14. Ko te ʼu ʼaluʼaga fea ʼaē ʼe feala ai ki te kau Kilisitiano ke nātou mulimuli ki te manatu ʼaē ʼe hā ʼi te tokoni ʼa Paulo ki te kau Loma?
14 ʼE ʼi ai te tahi ʼu ʼaluʼaga ʼe tonu ai ke tou mulimuli ki te manatu ʼaē ʼe tou maʼu ʼi te tokoni ʼa Paulo ki te kau Loma. ʼE faʼufaʼu te kokelekasio e ni ʼu hahaʼi tokolahi, pea ʼe kehekehe te ʼu meʼa ʼaē ʼe nātou leleiʼia. Koia ʼe feala ke nātou filifili he ʼu meʼa ʼe kehekehe—ohage la, ʼo ʼuhiga mo te ʼu mutuʼi meʼa pea mo te faʼahiga kosi pea mo te helu ʼo tonatou ʼulu. Kae ʼe tuʼu lelei ʼi te Tohi-Tapu te ʼu pelesepeto ʼe mulimuli kiai te kau Kilisitiano loto moʼoni fuli. ʼE mole he tahi ia tatou ʼe tonu ke faikehe tana faʼahiga teuteu peʼe ko te gaohi ʼo tona ʼulu peʼe tou mulimuli ki te ʼu faʼahiga lamote ʼo te malamanei. (1 Soane 2:15-17) Ko te kau Kilisitiano ʼe nātou manatuʼi ʼi te temi fuli pe, māʼiape la ʼi te ʼu temi fakafiafia, ko nātou ko he kau minisi ʼe nātou fakafofoga te Tuʼi ʼAliki ʼo te ʼAtulaulau. (Isaia 43:10; Soane 17:16; 1 Timoteo 2:9, 10) Kae ʼe lahi te ʼu faʼahi ʼe feala ke fai ai e te kau Kilisitiano he ʼu tonu kehekehe ʼe mole kovi.a
ʼAua Naʼa Tou Fakatupu Tūkia
15. Ko te ʼu ʼaluʼaga fea ʼaē ʼe feala ai ki he Kilisitiano ke fakafisi ki he meʼa ʼuhi ko tona ʼu tēhina?
15 ʼE ʼi ai te pelesepeto fakamuli pea mo maʼuhiga ʼe fakatokaga mai kiai e Paulo ʼi tana tokoni ki te kau Kilisitiano ʼo Loma. ʼI ʼihi temi ʼe feala ke filifili e he Kilisitiano ʼaē neʼe akoʼi lelei tona leʼo loto ke fakafisi ki he meʼa logola ʼe mole ko he meʼa ʼe kovi. Koteā tona tupuʼaga? Heʼe mahino kia ia ko te meʼa ʼaē ka ina fai ʼe feala ke mamahi ai ʼihi. Kapau ʼe hoko te faʼahi ʼaia kia tatou, pea koteā ʼaē ʼe tonu ke tou fai? ʼE ʼui fēnei e Paulo: “E lelei te mole kai kanoimanu pea mo te mole inu vino, pe ko he meape e tupu ai te higa o tou tehina.” (Loma 14:14, 20, 21) Pea “kia tatou malohi, e maua ke tou fua te u vaivai o natou e mole malohi, kae mole tou fakafifimaliepe. Tou tahi faiga ke kita lelei mo tokita kaiga o uhiga mo te lelei pea mo te lagaʼi o ona.” (Loma 15:1, 2) ʼUhi ko tatatou ʼofa ki te ʼu tēhina, ʼe tou vakavakaʼi anai te ʼu meʼa ʼaē ʼe tou filifili pea ʼe mole tou fai anai he ʼu meʼa ʼe feala ke fakamamahiʼi ai te leʼo ʼo loto ʼo he Kilisitiano. Ohage la ko te kava. ʼE mole tapuʼi ki he Kilisitiano ke ʼinu, kae ʼe tonu ke ʼinu fakapotopoto. Kae kapau ʼe feala ke tūkia ai tona tēhina, pea ʼe fakafisi anai ki te ʼinu ʼo te kava.
16. ʼE tou lava fakahā feafeaʼi tatatou fakaʼapaʼapa ki te hahaʼi ʼi totatou telituale?
16 ʼE feala ke toe faka ʼuhiga te faʼahi ʼaia ki te hahaʼi ʼaē ʼe mole kau ʼi te kokelekasio. Ohage la ʼe lagi tou nonofo ʼi he koga meʼa ʼe tokolahi ai te hahaʼi ʼe nātou kau ʼi he lotu ʼe ina fakatotonu ke nātou mālōlō ʼi he ʼaho ʼo te vāhaʼa. ʼUhi ko te faʼahi ʼaia, pea ʼuhi ko tatatou mole fia fakatupu tūkia ki totatou ʼu vāhaʼa fale pea mo nātou fakafeagai ai ki te fai faka mafola, ʼe tou faiga anai ke ʼaua naʼa tou fai he meʼa ʼi te ʼaho ʼaia ʼe mamahi ai anai totatou ʼu vāhaʼa fale. Peʼe lagi ko he Kilisitiano ʼe maʼuli lelei ʼe ʼalu ʼo tauhi ʼi he koga meʼa ʼe ʼaoga lahi ai he kau fai faka mafola, pea ko te hahaʼi ʼe māsisiva. ʼE feala ke ina filifili ke fakaʼapaʼapa ki tona ʼu vāhaʼa fale foʼou ʼo teuteu fakaʼeteʼete peʼe ke mole lahi tona ʼu koloā, tatau aipe peʼe feala ke maʼu meʼa.
17. He koʼe ʼe fakapotopoto hatatou tokagaʼi te hahaʼi ʼi te ʼu meʼa ʼaē ʼe tou fia fai?
17 ʼE fakapotopoto koa hatatou ʼamanaki ke fai e nātou ʼaē ʼe “malohi” te ʼu faʼahi ʼaia? Koutou tokagaʼi te faʼifaʼitaki ʼaenī: ʼI tatatou lolotoga ʼolo ʼi tatatou motokā, ʼe tou sio ʼi ʼotatou muʼa ki te ʼu tamaliki ʼe nātou haʼele kae nātou ōvi ʼaupito ki te ala, pea ʼe feala ke hoko ai he tuʼutāmaki. ʼE tou haga gaholo pe anai koa ʼuhi heʼe fakagafua mai e te lao ʼo te ala? Kailoa, kae ʼe tou ʼolo māmālie anai naʼa tou fakaʼī te ʼu tamaliki. ʼI ʼihi temi, ʼe tonu ke tou fai feiā ʼi tatatou ʼu felogoi mo totatou ʼu tēhina peʼe ko ʼihi atu. ʼE ʼi ai te ʼu meʼa ʼe fakagafua mai ke tou fai, pea ʼe mole maumauʼi ai he pelesepeto. Kae kapau ʼe feala ke mamahi ai ʼihi peʼe fakatupu kovi ki te leʼo ʼo loto ʼo ia ʼaē ʼe vaivai, pea ko tatatou ʼofa faka tautēhina ʼe ina uga anai tatou ke tou tokakaga. (Loma 14:13, 15) ʼE maʼuhiga age ke tou taupau te logo tahi pea mo fakamuʼamuʼa te ʼu gāue ʼo te Puleʼaga ʼi hatatou fia faʼitaliha ʼo fai te meʼa ʼaē ʼe tou loto kiai.
18, 19. (a) ʼE tou faʼifaʼitakiʼi feafeaʼi ia Sesu mokā tou fakaʼapaʼapa ki te hahaʼi? (b) Ko te ʼu faʼahi fea ʼaē ʼe tou gāue fuli ai ʼi te logo tahi, pea koteā ʼaē ka tou vakaʼi anai ʼi te alatike ka hoko mai?
18 Kapau ʼe tou fai feiā, pea ʼe tou mulimuli ai ki te faʼifaʼitaki ʼaē ʼe lelei tokotahi. ʼE ʼui fēnei e Paulo: “Nee mole fialelei Kilisito kia te iape, kae hage ko tona kua tohi: ‘Ko te u nukinuki a te hahai ae e natou nukinuki koe kua to kia te au.’ ” Neʼe lotolelei ia Sesu ke ina sakilifisioʼi tona maʼuli maʼa tatou. ʼE mahino ia ʼe tou fia fai ni ʼu sakilifisio ke feala anai kia “natou e mole malohi” ke nātou faka kolōliaʼi te ʼAtua mo tatou ʼi te logo tahi. Ko tatatou maʼu he loto mahino pea mo tatatou agalelei ki te kau Kilisitiano ʼaē ʼe vaivai tonatou leʼo ʼo loto, ʼe tou fakahā ai ʼe tou “fautahi o faipe kia Kilisito Sesu”—ʼo tou tali ke mole tou filifili te ʼu meʼa ʼaē ʼe tou loto kiai pea mo fakafisi ki te ʼu meʼa ʼaē ʼe gafua ke tou fai.—Loma 15:1-5.
19 Logola ʼe feala ke kehekehe tatatou ʼu manatu ʼo ʼuhiga mo he ʼu faʼahi ʼe mole pipiki kiai he ʼu pelesepeto ʼo te Tohi-Tapu, kae ʼe tou logo tahi ʼi tatatou tauhi. (1 Kolonito 1:10) Ohage la ʼe hā lelei te logo tahi ʼaia mokā fakafeagai ʼihi ki te tauhi moʼoni. ʼE fakahigoaʼi e te Folafola ʼa te ʼAtua te kau fakafeagai ʼaia ko he kau matāpule, pea mo ina fakatokagaʼi tatou ki “te leo o te kau matapule.” (Soane 10:5) ʼE tou lava ʼiloʼi feafeaʼi te kau matāpule ʼaia? ʼE tonu ke feafeaʼi tatatou aga kia nātou? ʼE tou vakaʼi anai te ʼu fehuʼi ʼaia ʼi te alatike ʼaē ka hoko mai.
[Kiʼi nota]
a Ko te ʼu mātuʼa ʼaē ʼe nātou filifili te ʼu mutuʼi meʼa maʼa tanatou fānau ʼaē kei liliki.
ʼE Koutou Tali Feafeaʼi Anai?
• He koʼe ko tatatou ʼu manatu kehekehe ʼo ʼuhiga mo ni ʼu ʼaluʼaga ʼe mole fakatupu kovi ki tatatou logo tahi?
• He koʼe ʼe tonu kia tatou kau Kilisitiano ke tou fefakaʼapaʼapaʼaki ʼi te ʼofa?
• Koteā he ʼu faʼahi ʼe feala ia ʼaho nei ke faka ʼuhiga kiai te tokoni ʼa Paulo ʼo ʼuhiga mo te logo tahi, pea koteā ʼaē ka ina uga anai tatou ke tou fai te faʼahi ʼaia?
[Paki ʼo te pasina 9]
Ko te tokoni ʼa Paulo ʼo ʼuhiga mo te logo tahi neʼe maʼuhiga maʼa te kokelekasio
[Paki ʼo te pasina 10]
Ko te kau Kilisitiano ʼe nātou logo tahi logola te kehekehe ʼo tonatou maʼuli
[Paki ʼo te pasina 12]
Koteā ʼaē ʼe tonu ke fai e te fafine ʼaenī ʼi tana motokā