ʼE Tupu Koa Te ʼu Fihifihia ʼo Te Malamanei ʼUhi Ko Te Lotu?
“ ʼE UGA e te lotu ke tau te hahaʼi, pea ʼi te tahi age faʼahi, ʼe malave mālohi kia nātou ohage ko he toloke, ʼe ina matehi tonatou leʼo ʼo loto pea mo fakafonu tonatou ʼatamai ʼaki he ʼu manatu ʼe mole moʼoni. . . . ʼE liliu te hahaʼi ʼo vavale, mo matataku, mo fonu ʼi te fehiʼa pea mo te tuʼania.” Neʼe tohi te ʼu palalau ʼaia e te tagata neʼe misionea polotesita ki muʼa atu, pea neʼe ina toe ʼui fēnei: “ ʼE moʼoni te ʼu tukugakoviʼi ʼaia. ʼE ʼi ai te lotu ʼe kovi pea mo te lotu ʼe lelei.”—Start Your Own Religion.
ʼE ʼui anai e ʼihi ‘ ʼe mole moʼoni te fatufatu ʼaia.’ Kae ʼe feala koa ke kita fakafisi ki te ʼu meʼa ʼaē neʼe hoko ʼi te hisitolia? ʼI te hisitolia, ʼe lahi te ʼu ʼaluʼaga neʼe fai ai e te lotu—ʼaē ʼe ʼui ko “te tauhi pea mo te atolasio ki te ʼAtua peʼe ki he mālohi makehe”—te ʼu meʼa fakaufiufi. ʼE tonu ke ina faka mālamaʼi pea mo takitaki tatou. Kae ʼi te agamāhani ʼe ina haga fakatupu te tau, mo te fakapalatahi, pea mo te fehiʼa. Koteā tona tupuʼaga?
Ko “He Aselo o Te Malama” ʼe Ina Fakahēʼi
ʼE maʼu ʼi te Tohi-Tapu te tali faigafua kiai. Ko Satana te Tevolo ohage ko “he aselo o te malama,” ʼe ina fakahēʼi te ʼu lauʼi miliona hahaʼi ke nātou muliʼi tana ʼu akonaki kae mole ko te ʼu akonaki ʼa te ʼAtua. (2 Kolonito 11:14) Neʼe fakahā e te ʼapositolo ko Soane ʼe lahi ʼaupito te fakaneke ʼa Satana, heʼe ina ʼui “e mauli te malama-nei katoa i te Kovi.” (1 Soane 5:19) Neʼe ʼiloʼi e Soane ko Satana neʼe ina “fakahēʼi te kele katoa.”—Apokalipesi 12:9, MN.
Koteā te ʼu fua ʼo te ʼaluʼaga ʼaia? Neʼe fakatupu e Satana te ʼu lotu ʼe hage mai ki tuʼa ʼe nātou maʼoniʼoni. ʼE nātou “hage mai ki tuʼa ʼe ko he ‘lotu’ ” kae ʼe hā tonatou ʼuhiga moʼoni ʼaki te ʼu fua kovi ʼaē ʼe nātou fakatupu. (2 Timoteo 3:5, J. B. Phillips; Mateo 7:15-20) ʼE mole tokoni te lotu ke fakatokatoka te ʼu fihifihia ʼo te malamanei, kae ʼe liliu moʼoni ia ko he fihifihia.
ʼAua naʼa koutou foimo fakafisi ki te manatu ʼaia, ʼo koutou ʼui ʼe ko he loi peʼe mole fakapotopoto. Koutou manatuʼi, ko he tahi ʼe kākāʼi, ʼe ko he tahi ʼe mole ina ʼiloʼi tona kākāʼi. Neʼe foaki e te ʼapositolo ko Paulo te faʼifaʼitaki ʼo ʼuhiga mo te faʼahi ʼaia, ʼi tana tohi fēnei: “Ko te u mea e natou sakilifisioʼi [e te ʼu puleʼaga], e natou momoli ki te u temonio, e mole natou momoli ki te Atua.” (1 Kolonito 10:20) Neʼe lagi punamaʼuli te hahaʼi ʼaia ʼi tanatou manatu ʼaē neʼe nātou tauhi ki te ʼu temonio. Neʼe nātou manatu neʼe nātou tauhi ki he ʼatua peʼe ki he ʼu ʼatua agalelei. Kae ʼi tona ʼuhiga moʼoni, neʼe kākāʼi nātou e “te u laumalie o te kovi e mauli i te u lagi,” ʼe nātou lagolago kia Satana ʼi tana faiga ʼaē ke ina fakahēʼia te malamanei.—Efeso 6:12.
Ohage la, tou vakaʼi peʼe koteā ʼaē neʼe fai e Satana moʼo kākāʼi pea mo fakahēʼi te hahaʼi tokolahi ʼaē ʼe nātou lau ko he kau Kilisitiano, ʼaē neʼe nātou fili ke nātou meʼa noaʼi te fakatokaga ʼa te ʼapositolo ko Soane ʼo ʼuhiga mo te mālohi kovi.—1 Kolonito 10:12.
Ko Te Meʼa ʼAē Neʼe Akoʼi e Sesu Neʼe Haʼu Mai Te ʼAtua
Neʼe ʼui fēnei e Sesu Kilisito: “Ko taku akonaki e mole a aku kae a ia ae nee ina fekaui mai au.” (Soane 7:16) Koia ko te ʼu meʼa ʼaē neʼe ina akoʼi ki te hahaʼi neʼe haʼu ia mai te ʼAtua Māfimāfi. Ko te ʼu akonaki ʼa Sesu neʼe malave mālohi pea mo ina faka mālamaʼi nātou ʼaē neʼe fakalogo kia te ia. Neʼe mole ina ‘matehi te leʼo ʼo loto ʼo te hahaʼi peʼe fakafonu tonatou ʼatamai ʼaki he ʼu manatu ʼe mole moʼoni.’ Kailoa ia, kae ko te ʼu akonaki ʼa Sesu neʼe ina faka ʼāteaina te hahaʼi mai te ʼu hala ʼo te ʼu lotu pea mo te ʼu filosofia faka tagata, ʼaē neʼe faʼu e te mālama ʼe “fakapouli onatou atamai” ʼuhi he neʼe kākāʼi nātou e te Tevolo.—Efeso 4:18; Mateo 15:14; Soane 8:31, 32.
Neʼe ʼiloʼi te kau Kilisitiano moʼoni, ʼe hā te ʼu kalitate matalelei ʼo te laumālie maʼoniʼoni ia nātou, mole ʼuhi ko tanatou lau ʼaē tanatou pipiki ki te ʼAtua, kae ʼuhi ko tanatou tui. (Kalate 5:22, 23; Sakopo 1:22; 2:26) ʼI te ʼu kalitate ʼaia, ʼe maʼuhiga ʼaupito ia te kalitate ʼaē ko te ʼofa—pea ʼe ko te fakaʼiloga ʼaia ʼo te Lotu Faka Kilisitiano moʼoni.—Soane 13:34, 35.
Kae koutou tokagaʼi te puani maʼuhiga ʼaenī: Neʼe mole ʼamanaki e Sesu pea mo tana kau ʼapositolo ʼe tatau tuʼumaʼu pe anai te kokelekasio faka Kilisitiano ohage ko tona kamata. Neʼe nātou ʼiloʼi ʼe tuputupu anai te ʼapositasia pea ʼe ū anai te lotu moʼoni lolotoga he temi.
Neʼe ū Te Lotu Moʼoni Lolotoga He Temi
ʼI te lea fakatātā ʼo ʼuhiga mo te fulumeto pea mo te vao kovi, neʼe fakakikite e Sesu ko te lotu moʼoni ʼe ū anai lolotoga he temi. Koutou lau ia Mateo 13:24-30, 36-43 (MN). Neʼe tūtū e Sesu ʼi he gāueʼaga te fulumeto, “te pulapula lelei,” ʼaē ʼe ina fakatātā tana kau tisipulo agatonu ʼaē neʼe nātou faʼufaʼu te ʼuluaki kokelekasio faka Kilisitiano. Neʼe ina fakatokagaʼi ko “te fili,” ia Satana te Tevolo, ʼe ina toe tūtū ki te fulumeto te “vao kovi”—ʼaē ʼe ina fakatātā te hahaʼi ʼe nātou lau ʼe nātou mulimuli kia Sesu Kilisito kae ʼi tona ʼuhiga moʼoni, ʼe nātou fakafisi ki tana ʼu akonaki.
ʼI te ʼosi mate pe ʼo te kau ʼapositolo ʼa Sesu, ko te ʼu hahaʼi ʼaē neʼe fakatatau ki te ʼu “vao kovi,” neʼe nātou fakalogo ki te ʼu akonaki fakapikopiko ʼa te tagata kae nātou fakafisi ki “te folafola ʼa Sehova.” (Selemia 8:8, 9; Gaue 20:29, 30) Pea neʼe tupu ai ʼi te malamanei te Lotu Faka Kilisitiano kua fetogi pea ʼe mole moʼoni. Neʼe puleʼi e te kūtuga ʼaē ʼe fakahigoaʼi e te Tohi-Tapu ko “ia ʼaē ʼe manukinuki ki te lao”—ko te kalasi ʼo te kau takitaki lotu aga kākā pea mo fonu ʼi “te kākā fuli ʼo te heʼe faitotonu.” (2 Tesalonika 2:6-10, MN ) Neʼe fakakikite e Sesu ʼe fetogi anai te ʼaluʼaga ʼaia ʼi “te fakaʼosi ʼo te tuʼu ʼo he ʼu faʼahiga meʼa ʼaenī.” Ko te kau Kilisitiano ʼaē ʼe fakatātā e te pulapula ʼe fakatahitahi anai ʼi te logo tahi pea ko “te vao kovi” ʼe fakaʼauha anai ki muli age.
ʼAki te Lotu Faka Kilisitiano kākā ʼaia, lolotoga ni “sēkulō neʼe hoko ai te ʼu fai fakapō” pea mo te fakapōʼuli fakalaumālie ʼaē neʼe ina ʼaofi te Keletiate ʼi te ʼu sēkulō ʼaē neʼe hoa kiai. ʼI tana tala fakatomuʼa te faʼahi ʼaia pea mo te tahi ʼu agakovi pea mo agamālohi ʼaē neʼe fai talu mai te temi ʼaia ʼi te higoa ʼo te lotu, neʼe totonu te fai fakakikite ʼa te ʼapositolo ko Petelo ʼi tana ʼui ʼaē: “ ʼUhi ko nātou [ʼaē ʼe nātou lau ko he kau Kilisitiano] ʼe laukoviʼi anai te ala ʼo te moʼoni.”—2 Petelo 2:1, 2, MN.
ʼE “Akonaki Te ʼIta Pea Mo Te Fehiʼa”
ʼE mahino ia ʼe mole gata pe ki te Keletiate ʼaē neʼe tupu ai te talanoa kovi ki te lotu. Ohage la, koutou fakakaukauʼi te ʼui ʼaē e Karen Armstrong, neʼe tupu te faʼahiga “aga faka lotu agamālohi” ʼa te hahaʼi ʼaē ʼe nātou mulimuli fakalelei ki tanatou lotu, ʼuhi ko “te ʼu talatisio lahi katoa ʼa te lotu.” Ohage ko tona ʼui e Armstrong, ko te faʼahi maʼuhiga ʼaē ʼe tonu ke fai e te ʼu lotu fuli ʼe ko te “maʼuliʼi ʼo te ʼofa.” Kae ʼe feafeaʼi ki te ʼu lotu ʼaē ʼe nātou pipiki fakalelei ki tanatou ʼu pelesepeto faka lotu? ʼE ina tohi fēnei: “Ko te lotu ʼaē ʼe pipiki fakalelei ki tanatou ʼu pelesepeto, peʼe Sutea, peʼe Kilisitiano peʼe Mahometa, ʼe mole nātou fakahoko te faʼahi ʼaia mo kapau ʼe nātou liliu ʼo akonaki te ʼita pea mo te fehiʼa.” (The Battle for God—Fundamentalism in Judaism, Christianity and Islam) Kae ʼe gata pe koa ki te ʼu lotu ʼaia ʼaē neʼe mole nātou fai te faʼahi ʼaia pea mo nātou “akonaki te ʼita pea mo te fehiʼa”? ʼE fakahā e te hisitolia ʼe mole gata pe mo nātou ʼaia.
ʼI tona ʼuhiga moʼoni, ko Satana neʼe ina fakatuʼu he puleʼaga faka malamanei ʼo te lotu hala, ʼe fakaʼiloga ʼaki te ʼita, mo te fehiʼa, pea mo te ligi toto tuʼumaʼu. ʼE fakahigoa e te Tohi-Tapu te puleʼaga ʼaia ko “Papiloni Lahi, te faʼe ʼo . . . te ʼu meʼa fakalialia ʼo te kele,” pea ʼe fakatātā ki he fafine paomutu ʼe heka ʼi te tuʼa ʼo te manu ʼaē ʼe ina fakatātā te tuʼu faka politike. ʼE lelei ke tou tokagaʼi, neʼe ina liligi “te toto ʼo . . . nātou fuli ʼaē neʼe tāmateʼi ʼi te kele.”—Apokalipesi 17:4-6; 18:24, MN.
Neʼe Mole Kākāʼi Te Hahaʼi Fuli
Kae ʼe fakamoʼoni e te hisitolia neʼe mole kākāʼi te hahaʼi fuli. ʼE ʼui e Melvyn Bragg, māʼiape la ʼi te temi fakapōʼuli ʼo te hisitolia ʼo te tagata, kae “neʼe tokolahi te hahaʼi agalelei neʼe nātou fai te meʼa ʼaē ʼe lelei logola te agakovi ʼa te hahaʼi tokolahi.” Ko te kau Kilisitiano moʼoni neʼe nātou haga “atolasio [ki te ʼAtua] i te mooni mo te laumalie.” (Soane 4:21-24) Neʼe mole nātou kau ki te tuʼu faka lotu ʼi te malamanei ʼaē neʼe fai folonikasio ʼi tana “lagolago ki te mālohi faka solia.” Neʼe mole nātou tali ke gāue tahi te Lotu pea mo te Puleʼaga, ʼaē ʼe fakahā e te hisitolia ʼe ko “he fakatahi neʼe fai e Satana kae mole ko Sesu ʼo Nasaleti.”—Two Thousand Years—The Second Millennium: From Medieval Christendom to Global Christianity.
Mole heʼeki faʼa fualoa, neʼe ʼiloa te kau Fakamoʼoni ʼa Sehova ʼuhi ko tanatou fakaloto mālohi te fai ʼo te meʼa ʼaē ʼe lelei. Ke mole nātou pikisia ʼi te lotu hala, neʼe nātou fakatafito tanatou ʼu akonaki pea mo tanatou aga ki te Folafola ʼa te ʼAtua, te Tohi-Tapu. (2 Timoteo 3:16, 17) Pea ohage ko te kau Kilisitiano ʼo te ʼuluaki sēkulō, neʼe nātou mulimuli ki te fakatotonu ʼa Sesu ke “mole [nātou] kau ʼi te malamanei.” (Soane 15:17-19; 17:14-16, MN ) Ohage la ʼi Siamani Nasi, neʼe nātou fakafisi ke nātou maumauʼi te ʼu pelesepeto faka Kilisitiano pea neʼe mole leleiʼia nātou e te kau Nasi. Neʼe fehiʼa Itilele kia nātou ʼuhi ko te faʼahi ʼaia. ʼE ʼui fēnei ʼi te tohi ʼo te faleako: “Ko te kau Fakamoʼoni ʼa Sehova . . . neʼe nātou mulimuli ki te akonaki ʼo te Tohi-Tapu ʼaē ke mole nātou toʼo he mahafu. Koia neʼe nātou fakafisi ai ke nātou solia peʼe ke nātou fai he meʼa maʼa te kau Nasi. ʼUhi ko tanatou aga ʼaia, ko te kau solia Nasi neʼe nātou pilisoniʼi te ʼu famili katoa Fakamoʼoni ʼa Sehova. Ko te teitei vaega tolu ʼo te kau Fakamoʼoni ʼa Sehova fuli [ʼi Siamani] neʼe matehi ʼi te ʼu lotoʼā fakamamahi.”—Germany—1918-45.
ʼE moʼoni, ko te tahi ʼu hahaʼi lototoʼa ʼi te ʼu lotu kehekehe neʼe nātou maʼuli mamahi ʼuhi ko tanatou tui. Kae neʼe fai e te kau Fakamoʼoni ʼa Sehova te faʼahi ʼaia he neʼe ko te lotu ʼe logo tahi. ʼE mahino ia ko te tokolahi ia nātou neʼe nātou nofo agatonu ki te pelesepeto faka Tohi-Tapu ʼaenī: “[Koutou] fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.”—Gaue 5:29, MN; Maleko 12:17.
Te Tupuʼaga ʼo Te Fihifihia
Koia ʼe ʼi ai te koga ʼe moʼoni ʼi te ʼui ʼaē ʼe tupu te ʼu fihifihia fuli ʼo te malamanei ʼuhi ko te lotu: te lotu hala. Kae kua vave hoko mai te temi ʼaē ka pulihi ai anai e te ʼAtua te ʼu lotu hala fuli. (Apokalipesi 17:16, 17; 18:21) ʼE ina fakatotonu ki te hahaʼi fuli ʼaē ʼe nātou manako ki te faitotonu: “Koutou mavae maia te ia [Papiloni Lahi, te puleʼaga faka malamanei ʼo te lotu hala], taku hahai! Naa koutou kau ki tana u agahala, naa koutou vaevae mo ia ona tautea. Koteuhi kua fakatuuga ana agahala o kaku ki te lagi, pea nee manatui e te Atua ana hala.” (Apokalipesi 18:4, 5) Ei, ʼe fakalialia ʼaupito te ʼAtua ki te lotu ʼaē ʼe ina ‘uga ki te tau, mo matehi ʼo te leʼo ʼo loto ʼo te tagata, mo fakafonu te ʼatamai ʼo te hahaʼi ʼaki he ʼu manatu ʼe mole moʼoni, pea mo fakaliliu te hahaʼi ke nātou vavale, mo matataku, mo fonu ʼi te fehiʼa pea mo te mataku’!
Pea ʼe fakatahiʼi mai e te ʼAtua ki te lotu maʼa, ia nātou ʼaē ʼe nātou manako ki te moʼoni. Ko te lotu ʼaia ʼe ina maʼuliʼi te ʼu pelesepeto pea mo te ʼu akonaki ʼa te Tupuʼaga ʼofa, mo faitotonu pea mo manavaʼofa. (Mikea 4:1, 2; Sofonia 3:8, 9; Mateo 13:30) ʼE feala ke koutou kau kiai. Kapau ʼe koutou fia maʼu he tahi ʼu manatu ke koutou ʼiloʼi ai te lotu maʼa, koutou faitohi kia nātou ʼaē ʼe nātou tohi te nusipepa ʼaenī, peʼe koutou kumi tokoni ki te kau Fakamoʼoni ʼa Sehova.
[Paki ʼo te pasina 7]
Ko te hahaʼi mai te ʼu fenua fuli pe neʼe nātou maʼu te fiafia ʼi te lotu maʼa