6. Kolua tauʼi te ʼu fihifihia ʼo te nofo ʼohoana

ʼATA VITEO: Tou Fakamalohi Te Nofo ʼOhoana (5:44)

• ʼE ha feafeaʼi neʼe mole kei fakatahi tuʼumaʼu te taumatuʼa?

• Kotea neʼe nā fai moʼo fakamalohiʼi tonā maʼuli fakataumatuʼa?

Lau ia 1 Kolonito 10:24 mo Kolose 3:13. Hili te lau ʼo te ʼu vaega takitahi, fai te fehuʼi ʼaeni:

• Kotea anai te ʼu fua ka maʼu e he taumatuʼa moka nā maʼuliʼi te tokoni ʼaeni?

ʼE ui mai ʼi te Tohi-Tapu ke tou fefakamaʼuhigaʼiʼaki. Ka tou fakamaʼuhigaʼi he tahi, ko tona fakaʼuhiga ʼe tou fakaʼapaʼapa mo agalelei ki ai. Lau ia Loma 12:10, pea fai te ʼu fehuʼi ʼaeni:

• ʼE tonu koa ke atali te tagata peʼe ko te fafine ke ʼuluaki fakamaʼuhigaʼi ia ia? Kotea tona tupuʼaga?

ʼE tou tahi leleiʼia pe te ʼu faʼahiga mutuʼi meʼa ʼe tou ʼai mo te ʼu faʼahiga faʼu ʼo ʼotatou ʼulu. Ka tou fakalogo ki ʼihi pelesepeto, ʼe tou fakaha ai te ʼu meʼa ʼae ʼe tou leleiʼia pea mo tou fakafiafiaʼi ai ia Sehova. Tou vakaʼi muʼa ʼihi pelesepeto.

1. Kotea te ʼu pelesepeto ʼe tokoni mai ki te filifili ʼo ʼotatou teu?

ʼE tonu ke tou filifili “he teu ʼe lelei, mo fakapoipoi pea mo fakapotopoto” pea mo ha tuʼumaʼu ʼi ʼotatou agaaga, ʼe tou maʼa pea mo “pipiki ki te ʼAtua.” (1 Timoteo 2:9, 10) Tou vakaʼi he ʼu manatu ʼe tou maʼu ʼi te ʼu vaega ʼaia: (1) ʼE tonu ke tou ‘teu lelei.’ Kua lagi ke tokagaʼi pe ʼi te hahaʼi ʼa Sehova ʼe tahi alu pe te meʼa ʼae ʼe natou leleiʼia. Kae ki ʼonatou mutuʼi meʼa mo te ʼu faʼahiga faʼu ʼo ʼonatou ʼulu, ʼe natou fakakololiaʼi aipe te ʼAtua ʼae ʼe natou tauhi ki ai. (2) Ka tou “fakapoipoi” ʼi totatou faʼahiga teuteu, ʼe mole tou tui anai he ʼu mutuʼi meʼa ʼe fakatupu ai ʼi ʼihi he ʼu manatu ʼe kovi peʼe sioʼi ai tatou. (3) Ka tou “fakapotopoto” ʼe mole tou muliʼi anai ia te faʼahiga teuteu ʼo te malama. (4) ʼE tonu ke ha tuʼumaʼu ʼi totatou agaaga ʼe tou “pipiki ki te ʼAtua.” Ko tona fakaʼuhiga ʼe tou tauhi ki te ʼAtua moʼoni.—1 Kolonito 10:31.

2. ʼE malave feafeaʼi totatou agaaga ki ʼotatou tehina mo tuagaʼane?

ʼE tou tahi filifili te meʼa ʼae ʼe tou tui kae ʼe tonu ke tou manatuʼi pe ʼe malave feafeaʼi ki ʼihi. ʼE tou faiga ke mole tukia he tahi pea ke tou fai te meʼa ʼae ʼe ‘leleiʼia e [totatou] tatau ke fua lelei kia ia, pea ke fakalotomalohiʼi ai ia ia.’—Lau ia Loma 15:1, 2.

3. ʼE lava tokoni feafeaʼi tatatou faʼahiga teuteu ki te hahaʼi ke natou kumi ia Sehova?

ʼE tou tokakaga tuʼumaʼu anai ke tou teu fakaʼapaʼapa kae tafito moka tou kau ki te ʼu fono peʼe ko te faifakamafola. ʼE mole tonu ke tokagaʼi fau tatou ʼi tatatou faʼahiga teu ʼi te logo ʼae ʼe tou ʼave. ʼE tou loto ke malave te moʼoni kia natou pea ke “vikiʼi ai te akonaki ʼa te ʼAtua.”—Tito 2:10.

TA FAKALOLOTO

4. Ka lelei tatatou faʼahiga teu, ʼe tou fakaʼapaʼapa ai kia Sehova

Kotea ʼe ina uga tafito tatou ke tou tokaga ki tatatou faʼahiga teu? Lau ia Pesalemo 47:2, pea fai te ʼu fehuʼi ʼaeni:

• ʼE tou fakafofoga ia Sehova, pea ʼe tonu anai ke ha feafeaʼi ʼi tatatou faʼahiga teuteu?

• ʼI tau manatu la, ʼe maʼuhiga koa ke kita tokaga ki takita faʼahiga teu moka kita kau ki te ʼu fono peʼe ko te faifakamafola? Kotea tona tupuʼaga?

5. Te ʼu pelesepeto ʼe tokoni mai ki te toʼo ʼo he ʼu tonu ʼe lelei

Vakaʼi te ʼATA VITEO.

ʼATA VITEO: “Kotou Fai Ia Meʼa Fuli Moʼo Fakakololiaʼi Te ʼAtua” (10:18)

Tatau aipe pe ʼe fia ʼotatou mutuʼi meʼa kae ko te maʼuhiga ke maʼa mo alu tahi mo te gaue ʼae ʼe tou fai. Lau ia 1 Kolonito 10:24 mo 1 Timoteo 2:9, 10. Pea vakaʼi pe koʼe ʼe tou fia liʼaki te ʼu mutuʼi meʼa ʼae . . .

• ʼe mole mata fakaʼapaʼapa.

• ʼe fakatupu ai ʼi ʼihi he ʼu manatu ʼe kovi, ohage la ʼe pipiki fau.

Logo la ʼe mole kei fakalogo te kau Kilisitiano ki te Lao ʼa Moisese, kae ʼe fakaha ai te manatu ʼa Sehova. Lau ia Tetelonome 22:5, pea fai te fehuʼi ʼaeni:

• He koʼe ʼe tonu ke tou liʼaki te ʼu mutuʼi meʼa peʼe ko te ʼu faʼahiga faʼu ʼo te ʼu ʼulu ʼae ʼe hage ai te hahaʼi tagata ko ni fafine peʼe ko te hahaʼi fafine ko ni tagata?

Lau ia 1 Kolonito 10:32, 33 mo 1 Soane 2:15, 16, pea fai te ʼu fehuʼi ʼaeni:

• He koʼe ʼe tonu ke tou tokakaga ki tatatou faʼahiga teu ke mole tukia ai ʼotatou vahaʼa fale peʼe ko te ʼu tehina mo tuagaʼane?

• Kotea te ʼu faʼahiga teu mo faʼahiga faʼu ʼo tou ʼulu ʼe ke sio ki ai ʼi te faʼahi ʼae ʼe ke maʼuli ai?

• ʼI tau manatu la, ʼe ʼi ai koa he ʼu faʼahiga teu ʼe mole tuha mo he Kilisitiano. Kotea tona tupuʼaga?

MANATU TAFITO

Ka tou tokaga ki tatatou faʼahiga teuteu, ʼe tou fakakololiaʼi ai ia Sehova mo fakaʼapaʼapa ki ʼihi.

Fehuʼi Fakamanatu

• He koʼe ʼe maʼuhiga kia Sehova tatatou faʼahiga teu pea mo agaaga?

• Fakaha he ʼu pelesepeto ʼe tokoni mai ki te ʼu tonu ʼae ʼe tou fai ʼo ʼuhiga mo tatatou faʼahiga teu?

• ʼE malave feafeaʼi tatatou faʼahiga teu ki te manatu ʼa ʼihi ʼo ʼuhiga mo te tauhi moʼoni?

TE TAHI ʼU MANATU

Kotea anai te manatu ʼa ʼihi ʼo ʼuhiga mo koe moka natou sisio ki ʼou mutuʼi meʼa.

“Kotea ʼAe ʼe Ha ʼi Taku Faʼahiga Teuteu?” (Alatike ʼi te jw.org)

He koʼe ʼe tonu ke kita fakakaukau lelei ʼi muʼa ʼo hakita fai he foʼi ta.

“Kotea ʼAe ʼe Ui ʼi Te Tohi-Tapu ʼo ʼUhiga Mo Te ʼu Ta?” (Alatike ʼi te jw.org)

He ʼu pelesepeteo ʼe tokoni mai ke tou toʼo ni tonu ʼe lelei.

“ ʼE Fakakololiaʼi Koa Ia Te ʼAtua ʼi Takotou Faʼahiga Faiteuteu?” (Ko Te Tule Leʼo ʼo Sepetepeli 2016)

Ko te hisitolia ʼo he fafine neʼe ina tali leva te manatu ʼae ʼe feala ke fai e ʼihi he ʼu tonu ʼe kehekehe.

“Je croyais que la coquetterie était condamnable” (Réveillez-vous !, 22 décembre 2003)