ʼE Leleiʼia e Sehova Takotou Gāue ʼAki Tokotou Nefesi Katoa

“Ko he meʼa pe ʼe koutou fai, koutou gāue ʼaki tokotou nefesi katoa, ohage ʼe koutou gāue maʼa Sehova, kae mole maʼa te tagata.”​—Kolose 3:​23.

1, 2. (a) Koteā te pilivilesio lahi ʼaē ʼe tou maʼu? (b) He koʼe ʼi ʼihi temi ʼe mole feala ke tou fai ia meʼa fuli ʼaē ʼe tou fia fai moʼo tauhi ki te ʼAtua?

ʼE TOU maʼu te pilivilesio lahi ʼaē ko te tauhi kia Sehova. Koia, talu mai fualoa neʼe fakaloto mālohiʼi e te nusipepa ʼaenī te kau Kilisitiano ke nātou kau ki te minisitelio, ʼo nātou gāue ke “toe laka age,” mo kapau ʼe feala. (1 Tesalonika 4:1) Kae ʼe mole feala tuʼumaʼu ke tou fai ia meʼa fuli ʼaē ʼe holi kiai totatou loto ʼi te tauhi ʼaē ki te ʼAtua. ʼE fakamatala fēnei e te tuagaʼane selipatea neʼe papitema kua hili nei kiai taʼu e 40: “Ko te ʼu ʼaluʼaga ʼaē ʼe tau mo ʼau ʼe nātou fakamaʼua ʼau ke ʼau gāue ʼi te temi katoa. ʼE mole ʼau gāue ke feala ai haku totogi hoku ʼu mutuʼi meʼa ʼe totogi kovi, peʼe ke feala ai haku folau ʼo mālōlō, kae ʼe ʼau gāue ʼi te temi katoa moʼo totogi ʼo te ʼu meʼa ʼaē ʼe ʼaoga tāfito ki toku maʼuli, ʼo kau kiai mo te totogi ʼo te tōketā mokā ʼe ʼau mahaki pea mo te tōketā toʼo nifo. ʼE hage kia ʼau ʼe mole lahi te temi ʼaē ʼe ʼau gāue ai kia Sehova.”

² Ko te ʼofa ki te ʼAtua ʼe ina uga tatou ke tou fai ia meʼa fuli ʼaē ʼe feala ke tou fai ʼi te gāue fai faka mafola. Kae ʼi te agamāhani, ko te ʼu ʼaluʼaga ʼo te maʼuli ʼe nātou faka tuʼakoi te ʼu meʼa ʼaē ʼe feala ke tou fai. ʼE lagi lahi te temi pea mo te mālohi ʼaē ʼe tou fakaʼaogaʼi moʼo fakahoko ʼo te tahi ʼu maʼua faka Tohi-Tapu, ʼo kau kiai mo te ʼu maʼua faka famili. (1 Timoteo 5:​4, 8) ʼI te ʼu “temi maʼuhiga ʼaupito mo faigataʼa” ʼaenī, ʼe lahi ʼaupito te ʼu fihifihia ʼaē ʼe hoko ʼi totatou maʼuli. (2 Timoteo 3:1) Kapau ʼe mole feala ke tou fai ia meʼa fuli ʼaē ʼe tou loto ke tou fai ʼi te minisitelio, ʼe lagi tou lotohoha ai. ʼE lagi tou feʼekeʼaki peʼe leleiʼia e te ʼAtua tatatou tauhi.

ʼE Matalelei Tatatou Gāue ʼAki Totatou Nefesi Katoa

3. Koteā te meʼa ʼaē ʼe fakaʼamu e Sehova ʼo ʼuhiga mo tatou fuli?

³ Ia Pesalemo 103:​14, ʼe ʼui fakalelei mai e te Tohi-Tapu kia tatou, ko Sehova ʼe “ina ʼiloʼi lelei pe te meʼa ʼaē neʼe gaohi ʼaki ia tatou, ʼe ina manatuʼi ko tatou ʼe tou efu.” Ko ia tokotahi pe ʼe ina ʼiloʼi totatou ʼu tuʼakoi. ʼE mole ina fakamaʼua mai kia tatou he meʼa ʼe mole feala ke tou fai. Koteā te meʼa ʼaē ʼe fakaʼamu ki ai ia Sehova? ʼE ina fakaʼamu ki te meʼa ʼaē ʼe feala ke foaki e he tahi, tatau aipe pe koteā tona ʼu ʼaluʼaga ʼi tona maʼuli: “Ko he meʼa pe ʼe koutou fai, koutou gāue ʼaki tokotou nefesi katoa, ohage ʼe koutou gāue maʼa Sehova, kae mole maʼa te tagata.” (Kolose 3:​23) ʼIo, ʼe fakaʼamu ia Sehova​—ke tou tauhi fuli kia te ia—​ʼaki totatou nefesi katoa.

4. Koteā te faka ʼuhiga ʼo te ʼui ʼaē ke tou tauhi kia Sehova ʼaki totatou nefesi katoa?

⁴ Koteā te faka ʼuhiga ʼo tatatou tauhi kia Sehova ʼaki totatou nefesi katoa? Ko te kupu faka Keleka ʼaē neʼe fakaliliu ʼaki te kupu “nefesi katoa” ko tona faka ʼuhiga “ ʼe haʼu mai te nefesi.” Ko te “nefesi” ʼe faka ʼuhiga ki te tagata katoa, mo tona ʼu fealagia ʼi te faʼahi fakasino pea mo te fakakaukau. Koia ko te tauhi ʼaki te nefesi katoa, ko tona faka ʼuhiga ko te foaki ʼo tatou totonu, ʼo tou fakaʼaogaʼi totatou ʼu fealagia fuli pea mo totatou mālohi katoa ke feala ai hatatou fai katoa te gāue ʼa te ʼAtua. Ko tona faka ʼuhiga, ke tou fai ia meʼa fuli ʼaē ʼe feala ke fai e totatou nefesi.​—Maleko 12:29, 30.

5. ʼE fakahā feafeaʼi e te faʼifaʼitaki ʼa te kau ʼapositolo ʼe mole feala ke tatau fuli te meʼa ʼaē ʼe tou fai ʼi te minisitelio?

⁵ Ko te tauhi ʼaki te nefesi katoa ko tona faka ʼuhiga koa ʼe tonu ke tatau te lahi ʼo tatatou minisitelio? ʼE faigataʼa te faʼahi ʼaia, koteʼuhi ʼe kehekehe te ʼu ʼaluʼaga pea mo te ʼu fealagia ʼo te ʼu nefesi takitokotahi. Koutou toʼo te faʼifaʼitaki ʼa te ʼu ʼapositolo agatonu ʼa Sesu. Neʼe mole feala ke tatau fuli te lahi ʼo tanatou minisitelio. Ohage la, ʼe mole lahi te ʼu meʼa ʼaē ʼe tou ʼiloʼi ʼo ʼuhiga mo te tahi ʼu ʼapositolo, ohage ko Simone te Kanaane pea mo Sake te foha ʼo Alefeo. Lagi ko tanā ʼu gāue ʼi tonā ʼuhiga ʼapositolo neʼe faka tuʼakoi. (Mateo 10:​2-4) Kae neʼe fakahoko e Petelo te ʼu gāue maʼuhiga​—ei neʼe foaki age e Sesu kia ia “te ʼu kalavi ʼo te puleʼaga”! (Mateo 16:19) Kae neʼe mole māʼoluga age ia Petelo ʼi te tahi ʼu ʼapositolo. ʼI te Fakahā, neʼe sio ia Soane ki te Selusalemi Foʼou (ʼi te taʼu 96 ʼo totatou temi), pea neʼe sio ia ki te ʼu maka fakatafito e 12 pea neʼe tohi ai “te ʼu higoa e hogofulu-ma-lua ʼo te toko hogofulu-ma-lua ʼapositolo.”a (Fakahā 21:14) Neʼe leleiʼia e Sehova te gāue ʼa te ʼu ʼapositolo fuli, tatau aipe pe neʼe lahi age te gāue ʼa ʼihi ʼapositolo kae veliveli te gāue ʼa ʼihi.

6. ʼI te lea fakatātā ʼa Sesu ʼo ʼuhiga mo te tagata tūtū pulapula, koteā ʼaē ʼe hoko ki te pulapula ʼaē ʼe tūtū ki “te kele lelei,” pea koteā te ʼu fehuʼi ʼaē ʼe lagaʼi ai?

⁶ ʼO toe feiā aipe, ʼe mole fakamaʼua mai e Sehova kia tatou ke tatau te lahi ʼo tatatou gāue ʼi te fai faka mafola. Neʼe fakahā e Sesu ia te faʼahi ʼaia ʼi te lea fakatātā ʼo te tagata tūtū pulapula, ʼi tana fakatatau ia te gāue fai faka mafola ki te tūtū pulapula. Ko te pulapula ʼaē neʼe tūtū ʼi te ʼu faʼahiga kele kehekehe, ʼe ina fakatātā te ʼu faʼahiga ʼaluʼaga kehekehe ʼo te loto ʼo te hahaʼi ʼaē ʼe nātou fagono ki te logo ʼo te Puleʼaga. Neʼe fakamahino fēnei e Sesu: “Ko ia ʼaē neʼe tūtū ki te kele lelei, ʼe ko ia ia ʼaē ʼe logo ki te folafola pea ʼe mahino ki tona ʼuhiga, pea ʼe fua mai e teau, ki he tahi e onogofulu, pea ki he tahi age e tolugofulu.” (Mateo 13:​3-8, 18-​23) Koteā koa te fua ʼaia, pea he koʼe ʼe mole tatau te lahi ʼo te ʼu fua ʼaia?

7. Koteā te ʼu fua ʼo te pulapula ʼaē neʼe tūtū, pea he koʼe neʼe kehekehe tona ʼu fua?

⁷ Mai tona ʼaluʼaga ʼaē ko te pulapula ʼaē neʼe tūtū ʼe ko “te folafola ʼo te puleʼaga,” koia ko te maʼu ʼo te fua ʼe faka ʼuhiga ki te faka mafola ʼo te folafola ʼaia, ke tou palalau ki te folafola ʼaia ki te hahaʼi. (Mateo 13:19) ʼE kehekehe te ʼu fua ʼaē neʼe maʼu​—e tolugofulu ʼo aʼu ki te teau—​koteʼuhi ʼe kehekehe te ʼu fealagia pea mo te ʼu ʼaluʼaga ʼo tatou takitokotahi. Ko he tahi ʼe mole mahaki pea ʼe mālohi, ʼe feala ke lahi te temi ʼaē ʼe ina fakaʼaogaʼi ʼi te fai faka mafola, ʼi he tahi ʼe mahamahaki peʼe kua matuʼa. Ko te tūpulaga selipatea ʼaē ʼe ʼāteaina mai te ʼu maʼua faka famili, ʼe feala ke lahi age te ʼu meʼa ʼaē ʼe ina fai, ʼi he tahi ʼe gāue ʼaho katoa ke feala hana totogi te ʼu meʼa ʼaē ʼe ʼaoga ki tona famili.​—Vakaʼi ia Tāʼaga Lea 20:29.

8. Koteā te manatu ʼa Sehova ʼo ʼuhiga mo nātou ʼaē ʼe nātou foaki te ʼu meʼa ʼaē ʼe lavaʼi e tonatou nefesi?

⁸ ʼI te manatu ʼa te ʼAtua, ko he tahi ʼe gāue ʼaki tona nefesi katoa ʼo ina maʼu te ʼu fua e tolugofulu, ʼe ina faka ʼuhiga koa ʼe veliveli age tana gāue ia ia ʼaē ʼe ina maʼu te ʼu fua e teau? Kailoa ia! Ko te lahi ʼo te ʼu fua ʼe kehekehe, kae ʼe leleiʼia e Sehova te gāue ʼaē ʼe tou fai ʼaki totatou nefesi katoa. Tou manatuʼi, ko te kehekehe ʼo te lahi ʼo te ʼu fua ʼe haʼu mai te ʼu loto ʼaē ʼe fakatātā e te “kele lelei.” Ko te kupu faka Keleka (ka·losʹ) ʼaē neʼe fakaliliu ʼaki te kupu “lelei,” ʼe faka ʼuhiga ki he meʼa ʼe “matalelei” pea ʼe “fakafiafia ki te loto, pea ʼe ko he meʼa ʼe matalelei ki te ʼu mata.” ʼE ko he meʼa fakaloto mālohi te ʼiloʼi ʼaē, kapau ʼe tou fai te ʼu meʼa fuli ʼaē ʼe feala ke tou fai, pea ʼe matalelei totatou loto kia mata ʼo te ʼAtua!

ʼAua Naʼa Tou Fakatatau Tatatou Gāue Mo Te Gāue ʼa He Tahi Kehe

9, 10. (a) Koteā te manatu kovi ʼaē ʼe feala ke tupu ʼi totatou loto? (b) ʼE fakahā feafeaʼi e te lea fakatātā ʼaē ia 1 Kolonito 12:14-​26, ʼe mole fakatatau e Sehova te meʼa ʼaē ʼe tou fai mo te gāue ʼa ʼihi?

⁹ Kae ʼe feala ke mole tatau te fakafuafua e totatou loto heʼe haohaoa ia te ʼu meʼa ʼaē ʼe tou fai. ʼE feala ke ina fakatatau tatatou gāue mo te gāue ʼa he tahi kehe. ʼE feala ke ina ʼui fēnei, ‘ ʼE lahi age te gāue ʼa ʼihi ʼi te minisitelio. ʼE lava feafeaʼi koa ke leleiʼia e Sehova taku gāue?’​—Vakaʼi ia 1 Soane 3:​19, 20.

¹⁰ Ko te ʼu manatu pea mo te ʼu ala ʼo Sehova ʼe māʼoluga age ia ʼi tatatou ʼu manatu pea mo totatou ʼu ala. (Isaia 55:9) ʼE feala ke tou mahino ki te faʼahiga sio ʼaia ʼa Sehova ki tatatou ʼu faiga takitokotahi ia 1 Kolonito 12:14-​26, ʼaē ʼe fakatatau ai te kokelekasio ki he sino mo tona ʼu koga kehekehe​—te ʼu mata, te ʼu nima, te ʼu vaʼe, te ʼu taliga, pea mo te tahi age ʼu koga. Koutou vakaʼi muʼa tokotou sino. ʼE mole fakapotopoto anai te fakatatau ʼo tokotou ʼu mata mo tokotou ʼu nima, peʼe ko tokotou ʼu vaʼe mo tokotou ʼu taliga! Ko te ʼu koga fuli ʼo te sino ʼe ʼi ai tonatou ʼaoga kehekehe, kae ʼe ʼaoga pea mo maʼuhiga te ʼu koga fuli ʼaia. ʼO toe feiā aipe, ʼe leleiʼia e Sehova te gāue ʼaē ʼe koutou fai ʼaki tokotou nefesi katoa, tatau aipe peʼe lahi age te gāue ʼa ʼihi peʼe veliveli age.​—Kalate 6:4.

11, 12. (a) He koʼe ʼe feala ke manatu ʼihi ʼe nātou “vaivai” peʼe “mole [nātou] faʼa maʼuhiga”? (b) Koteā te manatu ʼa Sehova ʼo ʼuhiga mo tatatou gāue?

¹¹ Mai tona ʼaluʼaga ʼaē ʼe feala ke faka tuʼakoi tatatou gāue ʼuhi ko tatatou mahamahaki, pe kua tou matuʼa, pe ko he tahi age ʼu ʼaluʼaga, ʼi ʼihi temi ko ʼihi ia tatou ʼe feala ke tou manatu ʼe tou “vaivai” pea ʼe “mole [tou] faʼa maʼuhiga.” Kae ʼe mole manatu feiā ia Sehova. ʼE ʼui mai e te Tohi-Tapu kia tatou: “Ko te ʼu koga ʼo te sino ʼaē ʼe hage ʼe vaivai ʼe ʼaoga, pea ko te ʼu koga . . . ʼaē ʼe tou ʼui ʼe mole faʼa maʼuhiga, ko te ʼu koga ʼaia ʼe lahi age tatatou faka maʼuhigaʼi . . . Kae, neʼe faʼu e te ʼAtua te sino, ʼo ina faka maʼuhigaʼi lahi age te koga ʼaē ʼe puli.” (1 Kolonito 12:22-​24) Koia ʼe feala ke leleiʼia e Sehova ia te hahaʼi fuli. ʼE ina leleiʼia tatatou gāue ʼaē ʼe tou fai ʼo mulimuli ki totatou ʼu tuʼakoi. ʼE mole uga koa la koutou e tokotou loto, ʼo mulimuli ki takotou ʼu fealagia, ke koutou fai ia meʼa fuli ke koutou tauhi ki te ʼAtua lotomahino pea mo agaʼofa?

¹² Pea kia Sehova, ko te meʼa ʼaē ʼe maʼuhiga, ʼe mole ko te lahi ʼo te meʼa ʼaē ʼe koutou fai peʼe ko te meʼa ʼaē ʼe fai e he tahi age, kae ʼe ko te meʼa ʼaē ʼe feala ke fai e tokotou nefesi, ʼaē ko koutou totonu. ʼE hā te leleiʼia e Sehova tatatou ʼu faiga takitokotahi, ʼi te meʼa ʼaē neʼe fai e Sesu mo te ʼu fafine e lua, ʼi te ʼu ʼaho fakaʼosi ʼo tona maʼuli ʼi te kele.

Neʼe Leleiʼia Te Meʼa ʼOfa ʼa Te Fafine “Neʼe Totogi Kovi”

13. (a) Neʼe koteā te ʼu ʼaluʼaga ʼaē neʼe tupu ai te liligi e Malia te lolo magoni ki te ʼulu pea mo te ʼu vaʼe ʼo Sesu? (b) Neʼe fia te totogi ʼo te lolo ʼaē neʼe liligi e Malia?

¹³ ʼI te Feliaono afiafi ʼo te ʼaho 8 ʼo Nisani, neʼe tau atu ia Sesu ki Petania, ko te kiʼi kolo veliveli ʼo te potu hahake ʼo te Moʼuga ʼo Oliveto, ko tona mamaʼo mo Selusalemi ko kilometa e 3. ʼI te kolo ʼaia neʼe ʼi ai te ʼu kaumeʼa ʼo Sesu neʼe ʼofa mamahi ki ai​—ko Malia, mo Maleta, pea mo tonā tokolua ko Lasalo. Neʼe lagi fakaafe tuʼumaʼu ia Sesu ki tonatou ʼapi. Kae ʼi te Moeaki afiafi, neʼe kakai ia Sesu mo tona ʼu kaumeʼa ʼi te ʼapi ʼo Simone, ʼaē ki muʼa atu neʼe ko he tagata kilia pea neʼe fakamālōlō e Sesu. ʼI te lolotoga kai ʼa Sesu ʼi te laupapa, neʼe fai e Malia he meʼa lelei ʼe hā ʼaki ai te loloto ʼo tona ʼofa ki te tagata ʼaē neʼe ina fakatuʼuake tona tokolua. Neʼe ina fakaʼaogaʼi te kiʼi foʼi hina ʼe fonu ai ko te lolo magoni, pea neʼe “totogi kovi.” ʼE moʼoni neʼe totogi kovi ʼaupito! Ko tona totogi ko tenalio e 300, ko te totogi ʼaia ʼo he tahi neʼe gāue ʼi te taʼu katoa. Neʼe ina liligi te lolo ʼaia ki te ʼulu ʼo Sesu pea mo tona ʼu vaʼe. Pea neʼe ina holo tona ʼu vaʼe ʼaki tona lauʼulu.​—Maleko 14:3; Luka 10:38-​42; Soane 11:38-​44; 12:​1-3.

14. (a) Neʼe koteā te ʼui ʼa te ʼu tisipulo ki te meʼa ʼaē neʼe fai e Malia? (b) Neʼe lagolago feafeaʼi ia Sesu kia Malia?

¹⁴ Neʼe mole leleiʼia e te ʼu tisipulo te meʼa ʼaē neʼe ina fai, pea nātou fehuʼi age ki ai: ‘He koʼe ʼe ke maumauʼi te lolo ʼaia?’ Ko Sutasi, ʼaē neʼe ina fakaū tana fia kaihaʼa, neʼe ina ʼui pe koʼe ʼe mole fakaʼaogaʼi moʼo fakatau maʼa te hahaʼi māsisiva, ʼo ʼui maʼana: “He koʼe neʼe mole fakatau te lolo magoni ʼaenā ki te tenalio e tolugeau pea foaki ki te kau māsisiva?” Neʼe nofo fakalogologo ia Malia. Kae neʼe ʼui age e Sesu ki tana ʼu tisipulo: “Koutou haganoa ki ai. He koʼe ʼe koutou fakakinakinaʼi ia ia? Neʼe ina fai he gāue lelei [ʼe haʼu mai te kupu ka·losʹ] kia te ʼau. . . . Neʼe ina fai te meʼa ʼaē ʼe ina lavaʼi; neʼe ina ʼai fakatomuʼa te lolo magoni ki toku sino ʼo ʼuhiga mo toku ʼavaifo. ʼE ʼau tala moʼoni atu kia koutou, ʼi te potu fuli pe ʼe faka mafola ai anai te logo lelei ʼi te malamanei katoa, ʼe toe fakamatala ai anai, moʼo fakamanatu kia te ia, te meʼa ʼaē neʼe fai e te fafine nei.” Neʼe fīmālie ai te loto ʼo Malia, ʼi te ʼu palalau fakaloto māfana ʼaē neʼe fai e Sesu!​—Maleko 14:​4-9; Soane 12:​4-8.

15. He koʼe neʼe malave kia Sesu te meʼa ʼaē neʼe fai e Malia, pea koteā te ako ʼaē ʼe tou maʼu mai ai ʼo ʼuhiga mo tatatou tauhi ʼaki totatou nefesi katoa?

¹⁵ Neʼe malave mālohi kia Sesu te meʼa ʼaē neʼe fai e Malia. ʼI tana fakafuafua, neʼe ina fai te gāue ʼe tau mo feʼauga ke vikiʼi. ʼE mole ko te maʼuhiga ʼo te meʼa ʼofa ʼaē neʼe leleiʼia e Sesu, kae ko te meʼa ʼaē ʼe maʼuhiga he “neʼe ina fai te meʼa ʼaē ʼe ina lavaʼi.” Neʼe ina fakaʼaogaʼi te fealagia ʼaia pea neʼe ina foaki te meʼa ʼaē neʼe feala ke ina foaki. ʼE fakaliliu fēnei te ʼu palalau ʼaia ʼi te tahi ʼu Tohi-Tapu, “Neʼe ina fai ia meʼa fuli ʼaē neʼe feala ke ina fai,” peʼe, “neʼe ina fai te meʼa ʼaē neʼe feala ke ina fai ʼaki tona mālohi.” (An American Translation; The Jerusalem Bible) Ko te meʼa ʼofa ʼa Malia neʼe ina fai ʼaki tona nefesi katoa, koteʼuhi neʼe ina foaki te meʼa ʼaē neʼe ina lavaʼi. ʼE ko te faka ʼuhiga ʼaia ʼo te gāue ʼaē ʼe fai ʼaki te nefesi katoa.

Ko “Te ʼu Kiʼi Foʼi Piesi” ʼa Te Fafine Vitua

16. (a) Neʼe tokagaʼi feafeaʼi e Sesu te meʼa ʼofa ʼaē neʼe foaki e te fafine vitua masiva? (b) Neʼe ko te fia te meʼa ʼofa ʼaē neʼe foaki e te fafine vitua?

¹⁶ Hili ʼaho e lua, ʼi te ʼaho 11 ʼo Nisani, neʼe nofo fualoa ia Sesu ʼi te fale lotu, pea neʼe fakafehuʼi ai ia ia ʼo ʼuhiga mo tana pule pea mo ina tali ki te ʼu fehuʼi fakakākā ʼaē neʼe fai age ʼo ʼuhiga mo te ʼu tukuhau, mo te fakatuʼuake, pea mo te tahi age ʼu meʼa. Neʼe ina fakahā ai ko te kau sekelipa pea mo te kau Faliseo, ʼe nātou “kai te ʼu ʼapi ʼo te kau vitua.” (Maleko 12:40) Pea neʼe heka ia Sesu, ʼi te Malaʼe ʼo te hahaʼi Fafine, ʼaē ʼe ʼui e te talatisio faka Sutea, neʼe tuʼu ai te ʼu puha tānaki paʼaga e 13. Neʼe heka ai ʼo ina sioʼi fakaleleiʼi te hahaʼi ʼaē neʼe nātou ʼai meʼa ʼofa ki te puha tānaki paʼaga. Neʼe lahi te kau maʼu koloā ʼaē neʼe ʼōmai, pea ko ʼihi neʼe nātou fia fakahā ʼe nātou faitotonu, pea neʼe nātou fia hā. (Vakaʼi ia Mateo 6:2.) Pea neʼe sioʼi tāfito e Sesu te fafine. Neʼe mole lagi tokagaʼi e te hahaʼi he meʼa makehe ʼi te fafine ʼaia peʼe ko tana meʼa ʼofa. Kae ko Sesu, ʼaē ʼe ina ʼiloʼi te ʼu loto ʼo te hahaʼi, neʼe ina ʼiloʼi neʼe ko “he fafine vitua masiva.” Neʼe ina toe ʼiloʼi foki mo te lahi ʼo tana meʼa ʼofa​—ko “te ʼu kiʼi foʼi piesi e lua, ʼe mole faʼa maʼuhiga.”b​—Maleko 12:41, 42.

17. Neʼe koteā te ʼui ʼa Sesu ʼo ʼuhiga mo te meʼa ʼofa ʼa te fafine vitua, pea koteā te meʼa ʼaē ʼe tou ako ai ʼo ʼuhiga mo te foaki meʼa ʼofa ʼaē ki te ʼAtua?

¹⁷ Neʼe pāuiʼi e Sesu tana ʼu tisipulo, he neʼe ina loto ke nātou sio tonu ki te meʼa ʼaē ka ina ako age kia nātou. Neʼe ʼui age e Sesu: “Neʼe lahi age te meʼa ʼofa ʼaē neʼe ina foaki, ia nātou fuli ʼaē neʼe nātou tuku paʼaga ki te puha tānaki paʼaga.” ʼI tana fakafuafua neʼe ina ʼai te falā ʼe lahi age ia ʼi te hahaʼi fuli ʼaē neʼe nātou ʼai falā kiai. Ko te fafine ʼaia neʼe ina foaki “te meʼa katoa ʼaē neʼe ina maʼu”​—tana ʼu kiʼi foi piesi fakaʼosi. ʼI tana fai te meʼa ʼaia, neʼe ina tuku tana falala kia Sehova. Neʼe ina tuku mai he faʼifaʼitaki ʼo ʼuhiga mo te meʼa ʼe foaki ki te ʼAtua, koteʼuhi neʼe mole faʼa lahi tana meʼa ʼofa ʼi te faʼahi fakakoloa. Kae ia mata ʼo te ʼAtua, neʼe maʼuhiga ʼaupito!​—Maleko 12:43, 44; Sake 1:​27.

Tou Ako Te Manatu ʼa Sehova ʼo ʼUhiga Mo Te Gāue ʼAē ʼe Tou Fai ʼAki Totatou Nefesi Katoa

18. Koteā te meʼa ʼaē ʼe tou ako ʼi te ʼu felogoi ʼa Sesu mo te ʼu fafine ʼaia e toko lua?

¹⁸ ʼI te manatu ʼaē neʼe maʼu e Sesu ʼo ʼuhiga mo te ʼu fafine ʼaia e toko lua, ʼe mahino ai kia tatou pe koteā te manatu ʼa Sehova ki te gāue ʼaē ʼe tou fai ʼaki totatou nefesi katoa. (Soane 5:​19) Neʼe mole fakatatau e Sesu te fafine vitua pea mo Malia. Neʼe ina faka maʼuhigaʼi te ʼu kiʼi foʼi piesi e lua ʼa te fafine vitua, ʼo toe feiā aipe ki te lolo magoni “totogi kovi” ʼa Malia. Mai tona ʼaluʼaga ʼaē neʼe foaki e te ʼu fafine ʼaia te ʼu meʼa ʼaē neʼe nā lavaʼi, koia kia mata ʼo te ʼAtua neʼe maʼuhiga tanā ʼu meʼa ʼofa. Koia ʼaua naʼa koutou lotovaivai mo kapau ʼe koutou manatu ʼe veliveli fau te ʼu meʼa ʼaē ʼe koutou fai, ʼuhi ko te mole feala ʼaē ke koutou fai te ʼu meʼa fuli ʼaē ʼe koutou fia fai ʼi takotou tauhi ki te ʼAtua. ʼE leleiʼia e Sehova te ʼu meʼa ʼaē ʼe koutou lava foaki age kia te ia. Tou manatuʼi, ko Sehova ʼe “sio ki te meʼa ʼaē ʼe ʼi te loto,” koia ʼe ina ʼiloʼi lelei te ʼu meʼa ʼaē ʼe holi kiai tokotou loto.​—1 Samuele 16:7.

19. He koʼe ʼe mole tonu ke tou fakamāuʼi te meʼa ʼaē ʼe fai e ʼihi ʼi tanatou tauhi ki te ʼAtua?

¹⁹ Ko te faʼahiga manatu ʼa Sehova ʼo ʼuhiga mo te gāue ʼaē ʼe tou fai ʼaki totatou nefesi katoa, ʼe tonu anai ke ina fetogi tatatou faʼahiga manatu pea mo tatatou aga ʼaē ʼe tou fai ki ʼihi. ʼE mole ko he agaʼofa anai tatatou fatufatuʼi te ʼu faiga ʼa ʼihi, peʼe tou fakatatau te gāue ʼa he tahi mo he tahi kehe! Meʼa fakaʼofaʼofa foki, he neʼe tohi fēnei e te fafine Kilisitiano: “ ʼI ʼihi temi ʼe ʼui e ʼihi, kapau ʼe mole koutou pionie pea ʼe mole hokotou ʼuhiga. Ko nātou ʼaē ʼe nātou faiga mālohi ke nātou haga ‘gāue’ ʼi tonatou ʼuhiga kaugā fai faka mafola ʼo te Puleʼaga ʼe tonu ke nātou logoʼi ʼe toe leleiʼia foki mo nātou.” Tou manatuʼi ʼe mole tonu ke tou fakamāuʼi te gāue ʼo totatou ʼu kaugā fagona Kilisitiano, ʼaē ʼe nātou fai ʼaki tonatou nefesi katoa. (Loma 14:10-​12) ʼE leleiʼia e Sehova te gāue ʼaē ʼe fai ʼaki te nefesi katoa e te lauʼi miliona kaugā fai faka mafola ʼo te Puleʼaga, pea ʼe tonu ke toe feiā mo tatou.

20. ʼI te agamāhani, koteā te manatu ʼaē ʼe lelei age ke tou maʼu ʼo ʼuhiga mo totatou ʼu tēhina mo tuagaʼane?

²⁰ Kae ʼe feafeaʼi anai mo kapau ʼe veliveli te gāue ʼa ʼihi ʼi te minisitelio, logope la ʼe feala tanatou fai ke lahi age? Kapau kua veliveli te gāue ʼa he kaugā fagona ʼi te minisitelio, pea ʼe tonu ke fakatokagaʼi e te ʼu tagata ʼāfea, ʼe ʼaoga he tokoni ki ai pea mo he fakaloto mālohi. Tahi ʼaē meʼa, ʼe mole tonu ke galo ia tatou, ko te gāue ʼa ʼihi ʼaki tonatou nefesi katoa, ʼe lagi tatau tāfito mo te ʼu kiʼi foʼi piesi ʼa te fafine vitua kae mole hage ko te lolo totogi kovi ʼa Malia. ʼI te agamāhani, ʼe lelei age hatatou tui papau ʼe ʼoʼofa totatou ʼu tēhina mo tuagaʼane kia Sehova, pea ko te taʼi ʼofa ʼaia ʼe ina uga anai nātou ke nātou fakalahi, kae mole nātou fakaveliveli tanatou gāue, ʼo mulimuli pe ki tonatou ʼu fealagia. ʼE moʼoni ʼe mole he kaugana ʼa Sehova ʼe ina fili anai ke veliveli tana gāue ʼi tana tauhi ki te ʼAtua!​—1 Kolonito 13:​4, 7.

21. Koteā te gāue lelei ʼaē ʼe haga fai e te tokolahi, pea koteā te ʼu fehuʼi ʼaē ʼe lagaʼi ai?

²¹ Kae ki te tokolahi ʼo te hahaʼi ʼa te ʼAtua, ko te gāue ʼaki tonatou nefesi katoa, ko tona faka ʼuhiga ko tanatou hoko atu ia te gāue​—ʼaē ko te selevisi pionie. Koteā koa te ʼu tapuakina ʼaē ʼe nātou maʼu? Pea e feafeaʼi kia nātou ʼaē ʼe mole heʼeki feala tanatou pionie​—ʼe lava feafeaʼi hatatou maʼu te manatu ʼaia? Ko te ʼu tali ki te ʼu fehuʼi ʼaia ʼe tou maʼu anai ʼi te alatike ʼaē ka hoa mai.

[Nota ʼi te lalo pasina]

ʼE Koutou Tali Feafeaʼi Anai?

◻ Koteā te faka ʼuhiga ʼo te tauhi kia Sehova ʼaki te nefesi katoa?

◻ ʼE fakahā feafeaʼi e te lea fakatātā ʼaē ia 1 Kolonito 12:​14-​26, ʼe mole fakatatau e Sehova tatatou gāue mo te gāue ʼa ʼihi?

◻ Koteā te meʼa ʼaē kua tou mahino kiai ʼaki te ʼu palalau ʼaē neʼe fai e Sesu, ʼo ʼuhiga mo te lolo totogi kovi ʼaē neʼe foaki e Malia, pea mo te ʼu kiʼi foʼi piesi e lua ʼa te fafine vitua?

◻ Ko te manatu ʼa Sehova ʼo ʼuhiga mo te tauhi ʼaē ʼe fai ʼaki te nefesi katoa, ʼe tonu ke ina uga ai tatou ke tou manatu feafeaʼi ʼo ʼuhiga mo te gāue ʼa ʼihi?

[Paki ʼo te pasina 15]

Neʼe foaki e Malia te meʼa ʼaē neʼe ina lavaʼi, ʼo ina fakamagoni te sino ʼo Sesu ʼaki te lolo ʼe “totogi kovi”

[Paki ʼo te pasina 16]

Ko te ʼu kiʼi foʼi piesi ʼa te fafine vitua​—neʼe mole faʼa lahi kae neʼe maʼuhiga kia mata ʼo Sehova