ʼE Feafeaʼi Te ‘Toʼo Moʼo Faka Fetaulaki Mo Te ʼAliki’?

KUA fakaōvi mai te temi fakaʼosi ʼo te ʼu faʼahiga meʼa ʼo te tuʼu agakovi ʼaenī. Ko te hola fuli pe, te minuta, te sekonita, ʼe fakaōvi aipe ia tatou ki te ʼu meʼa fakamataku neʼe fakakikite talu mai fualoa. ʼE kau koa te toʼo ʼo te ʼēkelesia ʼi te ʼu meʼa fakamataku ʼaia? Kapau ʼe kau ai te toʼo ʼo te ʼēkelesia, ko ʼafea pea ʼe feafeaʼi anai tona hoko?

ʼE mole feiā te faka ʼuhigaʼi ʼo te kupu ʼaē ko te “toʼo” ʼi te Tohi-Tapu. Kae ko nātou ʼaē ʼe nātou fakamoʼoni ki te toʼo ʼaē ʼe talanoa ki ai te ʼapositolo ko Paulo ia 1 Tesalonika 4:17 ʼe fakatafito ʼaki tanatou tui. Tou vakaʼi age te koga tohi ʼaia ʼi tona ʼaluʼaga katoa ʼi te kapite ʼaia. Neʼe tohi fēnei e Paulo:

“ ʼU tēhina, ʼe mole mātou loto ke mole koutou ʼiloʼi te meʼa ʼaē ʼo ʼuhiga mo nātou kua momoe ʼi te mate, koteʼuhi ke mole koutou lotomamahi ohage ko nātou ʼaē ʼe mole hanatou falala. ʼIo kapau ʼe tou fakamoʼoni ko Sesu neʼe mate pea neʼe toe fakatuʼuake, ʼo toe feiā aipe mo nātou ʼaē kua momoe ʼi te mate ʼaki ia Sesu, ko te ʼAtua ʼe ina fakatuʼuake anai ia nātou mo ia. Heʼe koʼeni te meʼa ʼe mātou ʼui atu, ʼaki te folafola ʼa Sehova: ko mātou, ko te kau maʼuʼuli, ʼaē ka maʼuʼuli ʼo aʼu ki te temi haʼu ʼo te ʼAliki, ʼe mole tou muʼamuʼa anai leva tatou ia nātou ʼaē kua momoe ʼi te mate; heʼe ko te ʼAliki totonu, ʼaki te pāuʼi faka folafola, ʼaki te lea faka alekaselo pea mo te meʼa puhi fakatagi ʼa te ʼAtua, ʼe hifo anai mai te lagi, pea ko nātou ʼaē neʼe mamate tahi mo Kilisito ʼe ʼuluaki fakatuʼuake anai nātou ʼaia. Ki muli age leva, ko tatou ʼaē kei maʼuʼuli, fakatahiʼi mo nātou ʼaia, ʼe toʼo anai tatou ʼi te ʼu ʼao moʼo fetaulaki mo te ʼAliki ʼi te lagi; pea ʼe tou nonofo tuʼumaʼu ai leva mo te ʼAliki. Koia ke koutou haga fefakafimālieʼaki ia koutou ʼaki te ʼu palalau ʼaenī.” — 1 Tesalonika 4:13-18.

Ko te kokelekasio ʼo Tesalonika neʼe kei foʼofoʼou ʼi te temi ʼaē neʼe fai ai e Paulo tana ʼuluaki tohi ki te kau kilisitiano ʼo te koga meʼa ʼaia ʼi te taʼu 50 ʼo totatou temi. Ko te hahaʼi ʼo te kokelekasio ʼaia neʼe nātou lotomamahi ʼo ʼuhiga mo nātou ʼaē kua “momoe ʼi te mate”. Kae, ko te tohi ʼa Paulo neʼe ina fakafimālie te kau Tesalonika ʼaki te falala ʼo ʼuhiga mo te toe fakatuʼuake.

Ko te temi “haʼu” ʼo Kilisito

ʼI tana tala fakalelei age, ko te kau kilisitiano agatonu ʼaē kua mamate ʼe toe fakatuʼuake anai, neʼe toe ʼui fēnei e Paulo: “Ko te kau maʼuʼuli, ʼaē ka maʼuʼuli ʼo aʼu ki te temi haʼu ʼo te ʼAliki, ʼe mole tou muʼamuʼa anai leva tatou ia nātou ʼaē kua momoe ʼi te mate.” (Vaega 15). Koia ʼaē, ʼe matatonu te palalau ʼa te ʼapositolo ʼo ʼuhiga mo te temi “haʼu” ʼo te ʼAliki. ʼE fakaʼaoga ʼi heni te kupu faka keleka ʼaē ko te parousia, ʼaē ko tona faka ʼuhiga “ ʼi te ʼu tafa”.

Ka ʼaʼahi fenua he pule matāpule ki he puleʼaga, ʼi te agamahani ʼe fakahā te ʼaho ʼaē ʼe haʼu ai. Ohage pe la ko te haʼu ʼa te ʼAliki ko Sesu Kilisito. Neʼe fakahā fakalelei e Te Tule Leʼo ki te kau ako agatonu ʼo te Tohi-Tapu te lea faka polofeta ʼo ʼuhiga mo te ʼafio ʼo te Puleʼaga ʼo Sesu ʼi selo ʼi te taʼu 1914. Talu te taʼu ʼaia ko te ʼu meʼa ʼaē neʼe hoko ʼe fakamoʼoni te ʼafio fakapulipuli ʼa Sesu (Mateo 24:3-14). Ko te ʼui ʼaē ko ʼihi kilisitiano maʼuʼuli ʼi te temi ʼafio ʼo te ʼAliki “ ʼe toʼo anai tatou ʼi te ʼu ʼao moʼo fetaulaki mo te ʼAliki ʼi te lagi”, ʼE fakahā e Paulo ko nātou ʼaē ka maʼuʼuli ʼe nātou fetaulaki anai mo Kilisito, ko te fetaulaki ʼaia ʼe mole hoko ʼi te kele, kae ʼi selo ʼaē ʼe heka ai ia Sesu ʼi te toʼomataʼu ʼo te ʼAtua (Hepeleo 1:1-3). Kae ko ai koa ia nātou ʼaia?

“Ko te Iselaele ʼa te ʼAtua”

ʼE lahi te talanoa ʼa te Tohi-Tapu ʼo ʼuhiga mo te kau Iselaele ʼo te temi muʼa feiā aipe mo te “Iselaele ʼa te ʼAtua”. Ko te kau Sutea pea mo te kau Senetile ʼaē neʼe tui kia Kilisito neʼe nātou faʼufaʼu te kūtuga fakanofo ʼaē e te laumālie maʼoniʼoni ʼo te ʼAtua, peʼe ko te mālohi gāue (Kalate 6:16; Loma 11:25, 26; 1 Soane 2:20, 27). ʼE fakahā e te tohi ʼo te Fakahā ko te toko 144 000 hahaʼi ʼo te Iselaele fakalaumālie, ia nātou ʼaē ʼe tutuʼu mo te akeno ko Sesu Kilisito ʼi te Moʼuga ko Sione ʼi selo. ʼAki tonatou kaugā fagona ko Kilisito, ʼe nātou liliu anai ko te kau hau pea mo te kau pelepitelo ʼi selo (Fakahā 7:1-8; 14:1-4; 20:6). ʼE kau anai kia nātou ʼaia te ʼu hahaʼi neʼe gāue ʼi te ʼu kokelekasio ʼo Tesalonika pea mo ʼihi koga meʼa, logope la te kehekehe ʼo tonatou lanu peʼe ʼonatou ʼu fenua. — Gāue 10:34, 35.

Ko te ʼu hahaʼi agatonu fuli ʼo te Iselaele fakalaumālie ʼi muʼa ʼo hanatou maʼu tonatou fakapale ʼi selo, ʼe tonu muʼa ke ʼahiʼahiʼi nātou. Ohage pe ko te mate ʼa Sesu ʼi te pou pulihia pea mo tona toe fakatuʼuake ki selo, ʼo toe feiā aipe mo te kau kilisitiano ʼaē ʼe nātou maʼu te falala ki selo ʼe tonu muʼa ke nātou mamate ia muʼa ʼo hanatou maʼu tonatou fakapale (1 Kolonito 15:35, 36). ʼE moʼoni anai te meʼa ʼaia ki te hahaʼi ʼo te Iselaele fakalaumālie ʼaē neʼe maʼuʼuli ʼi te ʼuluaki sēkulō ʼo totatou temi pea mo nātou ʼaē ʼe kei maʼuʼuli ʼi totatou temi.

ʼI tana ʼosi talanoa ʼaē ki te “haʼu ʼo te ʼAliki”, ʼe fakahā leva e Paulo te temi ʼaē ka maʼu anai e te kau Iselaele agatonu fakalaumālie kua mamate tonatou fakapale ʼi selo. ʼE ina tohi fēnei: “Ko te ʼAliki totonu, ʼaki te pāuʼi faka folafola, ʼaki te lea faka alekaselo pea mo te meʼa puhi fakatagi ʼa te ʼAtua, ʼe hifo anai mai te lagi, pea ko nātou ʼaē neʼe mamate tahi mo Kilisito ʼe ʼuluaki fakatuʼuake anai nātou ʼaia.” (Vaega 16). Koia ʼaē, ʼi te temi ʼaē kamata ʼafio ai ia Sesu ʼi tona tuʼulaga Hau, ʼe tonu muʼa ke tou fakatalitali ʼo ʼuhiga mo te toe fakatuʼuake, heʼe kamata muʼa ia nātou ʼaē ʼe kau ki te Iselaele fakalaumālie ʼaē neʼe mamate ʼuhi ko tanatou agatonu (1 Kolonito 15:23). ʼE nātou lolotoga gāue nei mo Sesu ʼi selo. Kae koteā te manatu ʼo ʼuhiga mo nātou ʼaē ʼe kau ki te kau kilisitiano fakanofo ʼaē kei maʼuʼuli nei ʼi te kele? ʼE nātou fakatalitali koa ki he toʼo?

“ ʼE feafeaʼi tonatou toʼo?”

ʼI tana palalau ki te kau kilisitiano fakanofo ʼaē kua mamate, ʼe toe ʼui fēnei e Paulo: “Ki muli age leva, ko tatou ʼaē kei maʼuʼuli, fakatahiʼi mo nātou ʼaia, ʼe toʼo anai tatou ʼi te ʼu ʼao moʼo fetaulaki mo te ʼAliki ʼi te lagi; pea ʼe tou nonofo tuʼumaʼu ai leva mo te ʼAliki.” (Vaega 17). Ko te talanoa ʼaē ʼo ʼuhiga mo nātou “kei maʼuʼuli” ko nātou anai ʼaē ka maʼuʼuli ʼi te temi ʼafio ʼo Kilisito. ʼE “toʼo” nātou moʼo fakafetaulaki mo te ʼAliki ko Sesu. Ohage ko te kau ʼuluaki kilisitiano agatonu, ʼe tonu ke nātou mamate ʼi tonatou ʼuhiga fakatagata moʼo fakatahi mo Kilisito ʼi selo. — Loma 8:17, 35-39.

ʼI tana faitohi ki te kau kilisitiano ʼo Kolonito, neʼe fēnei te ʼui ʼa Paulo: “ ʼE ʼau ʼui atu te meʼa ʼaenī, ʼu tēhina: ko te kakano pea mo te toto ʼe mole feala ke nā maʼu te puleʼaga ʼo te ʼAtua, pea ko te meʼa ʼaē ʼe popo ʼe mole maʼu mo ia te heʼepopo. Koʼeni, ʼe ʼau fakamahino atu te meʼa fakalilolilo maʼoniʼoni: ʼe mole tou momoe fuli anai ʼi te mate, ʼaē ko tatou fuli ʼe fetogi anai tatou, ʼi te fakafokifā, ʼi te kemoʼi ʼo te mata, ʼi te lolotoga ʼo te pupuhi fakaʼosi ʼo te fakatagi. Heʼe pupuhi anai te fakatagi, pea fakatuʼuake te ʼu mate ʼo heʼepopo, pea ko tatou ʼaenī, ʼe tou fetogi anai.” (1 Kolonito 15:50-52). ʼI tanatou mamate agatonu lolotoga ʼo te ʼafio ʼa Kilisito, ʼi te temi tonu pe ʼaia ko he tahi ʼi te toe ʼo te Iselaele fakalaumālie ʼe ina maʼu tona fakapale ki selo. “ ʼI te kemoʼi ʼo te mata”, ʼe fakatuʼuake ia ko te laumālie pea ʼe “toʼo” ia ke fetaulaki mo Sesu pea mo kaugā gāue fakatahi mo ia ʼi te Puleʼaga ʼi selo. Kae, koteā te ʼui ʼo ʼuhiga mo te kau ʼatolasio fuli ʼaē ʼa Sehova? ʼI te fakaʼosi ʼo te ʼu faʼahiga meʼa ʼo te tuʼu ʼaenī, ʼe toʼo anai koa mo nātou ki selo?

ʼE mole nātou maʼuʼuli anai ʼaki te toʼo

ʼI te kamata ʼaē ʼo te ʼafio agatonu ʼa Sesu ʼi te taʼu 1914, ʼe tou maʼuʼuli tāfito “ ʼi te temi fakaʼosi” ʼo te mālama ʼaenī (Taniela 12:4). Neʼe fēnei te fakatokaga ʼa Paulo: “ ʼO ʼuhiga mo te ʼu temi pea mo te ʼu fasiga taʼu, ʼu tēhina, ʼe mole kei ʼaoga kia koutou ke mātou tohi atu he ʼu faʼahiga meʼa. Koteʼuhi ʼe koutou ʼiloʼi lelei pe ko te ʼaho ʼo Sehova ʼe haʼu moʼoni ia ohage ko he tagata kaihaʼa ʼi te pōʼuli. Ka nātou ʼui anai: “Tokalelei pea mo fīmālie!”, pea fakafokifā pe te faka ʼauha ʼe tonu ke to ifo kia nātou, ohage ko te ʼu nunuʼa ʼo te tuʼania ʼa te fafine faitama; pea ʼe mole nātou hāo anai.” (1 Tesalonika 5:1-3). Kae ko te kau kilisitiano ʼaē neʼe fakatokagaʼi ʼe nātou hāo anai. ʼE feafeaʼi anai tonatou hāofaki?

Ko te pāuʼi ʼaē “Tokalelei pea mo fīmālie!” ʼe ko he kamata ʼaia ʼo te temi neʼe fakahigoaʼi e Sesu “ko te toe mamahi lahi”. ʼE fakamatalatala e te tohi ʼo te Fakahā “te toe hahaʼi tokolahi” agatonu ʼe nātou maʼu te falala ʼo ʼuhiga mo te maʼuli ʼi te palatiso fakakelekele, ʼo fēnei: “Ko nātou ʼaia ʼe ʼomai mai te toe mamahi lahi, pea neʼe nātou fo tonatou ʼu kofu loloa pea mo fakahihina ʼi te taʼataʼa ʼo te Akeno.” (Fakahā 7:9, 14; Luka 23:43). Ko tonatou fakapale ʼe mole ko he ʼamanaki ia ki he hiki. Kae, ʼe nātou maʼu te falala ʼaē ʼe nātou maʼuʼuli anai ʼi te kele. Ke nātou maʼu te fakapale ʼaia, ʼe tonu ke nātou nonofo ʼaʼala ʼi te faʼahi fakalaumālie. ʼE feafeaʼi hakotou fai te meʼa ʼaia pea ke koutou maʼuʼuli ʼi te fakaʼosi ʼo te tuʼu ʼaenī?

ʼE ʼaoga ke koutou ‘aga fakapoto, ʼi tatatou kofuʼi te kofu tau ʼo te tui pea mo te ʼofa pea mo pulogaʼi te falala ki te maʼuli’. (1 Tesalonika 5:6-8.) ʼI te temi nei ʼe ʼaoga ke fakatokagaʼi te Folafola fakakikite ʼa te ʼAtua, ko te Tohi-Tapu. ʼI te tautuku atu ʼo te temi ʼi muʼa ʼo te fakaʼosi ʼo te tuʼu ʼaenī, koutou tāʼofi maʼu te tokoni ʼaenī ʼa Paulo: “ ʼAua naʼa koutou meʼa noaʼi te ʼu folafola faka polofeta. Koutou vakaʼi pe ʼe moʼoni ia meʼa fuli; koutou haga puke maʼu te meʼa ʼaē ʼe lelei.” (1 Tesalonika 5:20, 21). Koia, ʼe tali fakalelei koutou e te kau Fakamoʼoni ʼa Sehova ʼi tonatou Fale ʼo te Puleʼaga, ke koutou ako mo nātou te ʼu lea faka polofeta ʼo te Tohi-Tapu, pea mo ʼihi ʼu meʼa ʼo te Folafola fakamanava ʼa te ʼAtua.

ʼI takotou tuputupu ʼi te mālama totonu pea mo te tui, ʼe koutou ʼiloʼi ai anai te fakatuʼutuʼu fakaofoofo ʼa te ʼAtua moʼo hāofaki te ʼatulaulau mai tona ʼu fili pea mo toe fakatuʼu te kele ko he palatiso. ʼAki te haga tui, ʼe feala ke koutou kau ia nātou ʼaē ka maʼuʼuli ʼi te toe mamahi lahi, pea mo maʼu te pilivilesio ʼaē ko te tali fagona ʼo ʼuhiga mo te toko miliona hahaʼi ʼaē ka fakatuʼuake anai mai te mate. Pea ʼe ko he meʼa fakafiafia te maʼuli ʼi te taki ʼa te Puleʼaga ʼo te ʼAtua ʼaē e Sesu Kilisito pea mo tana kaugā gāue, ʼaē neʼe ‘toʼo moʼo fetaulaki mo te ʼAliki’ ʼi tonatou fakatuʼuake ki te maʼuli ʼi selo!

Ki muli age ʼo ʼuhiga mo te hahaʼi fakalogo, koteā te falala moʼoni ʼo nātou ʼaia ʼi te Tohi-Tapu? ʼE mole ko he toʼo. Kae, ko te maʼuli heʼegata ʼi te kele ʼi te taki ʼa te Puleʼaga ʼo te ʼAtua.

[Paki ʼo te pasina 7]

Ko nātou neʼe hāofaki ʼi te toe mamahi lahi ʼe nātou tali anai te kau fakatuʼuake mai te mate ʼi te palatiso ʼi te kele ʼaki te taki ʼa Sesu pea mo nātou ʼaē neʼe “toʼo” ki selo.