ʼE Nātou Maʼu Tonatou Mālohi Maifea?
KAPAU ʼe koutou vakaʼi lelei te pepe ʼi te paki ʼaenī, ʼe koutou sio ai anai ki tona ʼu kapakau e fā, ʼe ʼi ai tona kapakau kua maumau. Kae, ko te pepe ʼaia ʼe haga kai pea mo lele. ʼE mole ko te pepe pe ʼaia e tahi ʼe feala ke ina fai te faʼahi ʼaia. Neʼe kua fakatokagaʼi ʼe ʼi ai te ʼu pepe ʼe nātou lele ka kua maumau te 70 ki te teau ʼo tonatou ʼu kapakau.
ʼO toe feiā aipe, ko te tokolahi ʼe nātou lotomālohi feiā. Logope la ʼe nātou mamahi ʼuhi ko te ʼu fihifihia kovi ʼi te faʼahi fakasino pea ʼi tonatou loto, kae ʼe mole nātou fiu.—Vakaʼi ia 2 Kolonito 4:16.
Ko te ʼapositolo ko Paulo neʼe ina kātakiʼi te ʼu mamahi lolotoga tana ʼu folau faka misionea. Neʼe haha ia ia ʼaki te ʼu kauʼi maea, neʼe tā ia ia, neʼe taumakaʼi ia ia, pea neʼe pilisoniʼi ia ia. Pea tahi ʼaē meʼa, neʼe tau mo ia te faʼahiga mahaki, ʼe lagi ko he mahaki ʼi tona ʼu mata, ʼaē neʼe hage tuʼumaʼu kia ia ʼe ko he “tala ʼi [tona] kakano.”—2 Kolonito 12:7-9; Kalate 4:15.
Ko te Kilisitiano matuʼa ko Tavite, neʼe tau mo ia lolotoga ni ʼu taʼu, te mahaki neʼe fakatupu vaivai ki tona sino, pea ʼe tui papau ʼe ko Sehova ʼaē neʼe tokoni kia ia ke toe lelei mai te mahaki ʼaia. ʼE ina fakamatala fēnei: “Ko te ʼu faiga fakamalotoloto ʼaē neʼe ʼau fai liuliuga, neʼe hage neʼe mole hona ʼaoga. ʼI taku tau mo te meʼa fakaloto vaivai ʼaia, neʼe ʼau falala katoa kia Sehova, pea neʼe lagolago moʼoni ia kia ʼau. ʼI ʼihi temi, neʼe ʼau faikole lolotoga ni ʼu hola. ʼI te temi ʼaē neʼe ʼau palalau ai kia Sehova, neʼe puli ai taku manatu ʼaē ʼe ʼau tokotahi pea mo taku manatu ʼaē ʼe mole hoku ʼaoga. Neʼe ʼau tau mo te ʼu temi neʼe lahi ai toku lotovaivai, kae ʼaki te tokoni ʼa Sehova, neʼe ʼau liliu ʼo mālohi ʼaki te mahaki ʼaia—pea neʼe feʼauga toku mālohi moʼo tokoni ki niʼihi.”
Ko Sehova ʼAtua neʼe ina fakaloto mālohiʼi ia Paulo. Koia, neʼe feala ke ina ʼui fēnei: “ ʼI te temi ʼaē ʼe ʼau vaivai ai, ko te temi ʼaia ʼaē ʼe ʼau mālohi ai.” (2 Kolonito 12:10) ʼIo, ʼaki te ʼu vaivaiʼaga ʼaē neʼe tau mo Paulo, neʼe mahino ai kia ia ʼe tonu ke falala ki te mālohi ʼaē ʼe foaki e te ʼAtua. Neʼe ʼui fēnei e te ʼapositolo: “ ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.” (Filipe 4:13) Ko Sehova ʼe ina foaki moʼoni te mālohi ki tana ʼu kaugana.