ʼE Foaki e Sehova Te Mālohi ʼAē ʼe Laka Age ʼi Te Mālohi Māhani
1 ʼE ko he pilivilesio maʼuhiga te tauhi taputapu: te minisitelio faka Kilisitiano ʼaē neʼe tuku ki te ʼu tisipulo fuli ʼa Sesu. (Mateo 24:14; 28:19, 20) Kae ʼi ʼihi temi, ʼuhi ko totatou ʼuhiga agahala pea mo te ʼu fihifihia ʼo te tuʼu ʼo te ʼu faʼahiga meʼa ʼaenī, ʼe lagi tupu ai hatatou manatu ʼe mole tou lavaʼi te faʼahi ʼaia.
2 Ka hoko te faʼahi ʼaia, ʼe feala ke tou maʼu he fakaloto fīmālie mai te tohi ʼaē neʼe fai e te ʼapositolo ko Paulo ki te kau Kilisitiano fakanofo ʼo Kolonito. Neʼe ina tohi fēnei: “Ko te koloā ʼaia, ʼe tou maʼu ʼi te ʼu ipu kele.” (2 Ko. 4:7) Neʼe falala ia Paulo, ʼi tana ʼui fēnei: “ ʼI tamatou maʼu te minisitelio ʼaenī . . . , ʼe mole mātou līaki.” (2 Ko. 4:1) ʼE moʼoni, ʼe ko he meʼa faigataʼa kia tatou takitokotahi, peʼe tou kau ki te kau fakanofo peʼe ki te “tahi ʼu ōvi,” hatatou hoko atu te tala ʼo te logo lelei pea ke ʼaua naʼa tou “līaki.” ʼE ʼaoga kia tatou te mālohi ʼaē ʼe haʼu mai te ʼAtua, ʼaē ʼe ina foaki “te mālohi ʼaē ʼe laka age ʼi te mālohi māhani.”—Soane 10:16; 2 Ko. 4:7b.
3 ʼAki he lotomālohi, ko te tokolahi ʼi te kau Fakamoʼoni ʼe nātou fai faka mafola fakamalotoloto logope la peʼe nātou tau mo he ʼu fakataga mālohi, peʼe nātou mahahaki, peʼe mole feʼauga tanatou paʼaga. ʼE tonu ke tou mahino fuli ʼe lagolago ia Sehova kia tatou ʼi tana fakatotonu ʼaē ke tou fai faka mafola. ʼE mole tonu ke tou lotovaivai peʼe ke liliu ʼo vaivai tatatou fakatotonu ʼaē ke tou fai faka mafola ʼuhi ko tatatou mataku, kae ke tou “haga maʼu te mālohi ʼi te ʼAliki pea mo te mālohi ʼo tona māfimāfi.”—Efesi 6:10; Taag. 24:10.
4 E Feafeaʼi Tatatou Maʼu Te Mālohi ʼa Te ʼAtua: ʼE tonu ke tou haga faikole tuʼumaʼu, ke tou kole ki te ʼAtua ke tokoni mai kia tatou pea ke ina foaki mai tona mālohi. (Loma 12:12; Filp. 4:6, 7) Tahi ʼaē meʼa, tou falala ʼaki totatou loto katoa ʼe foaki mai anai e Sehova te mālohi ʼaē ʼe laka age ʼi te mālohi māhani. (Taag. 3:5) Tou lau ʼi tatatou ʼu nusipepa te ʼu fakamatala ʼo te ʼu meʼa ʼaē neʼe hoko ʼi te maʼuli ʼo totatou ʼu tēhina mo tuagaʼane ʼo totatou temi, heʼe ko he ʼu fakamoʼoni ʼaia, ko Sehova ʼe tokoni ki tana ʼu kaugana ʼi te temi ʼaenī, ke nātou kātakiʼi te ʼu ʼahiʼahi. Tou felogoi lelei mo tatatou ʼu tēhina ʼi te kokelekasio, pea ʼaua naʼa tou līaki te ʼu fono.—Loma 1:11, 12; Hep. 10:24, 25.
5 Ke tou fai ia meʼa fuli ke feala hatatou maʼu te mālohi ʼa Sehova—te mālohi ʼaē ʼe laka age ʼi te mālohi māhani, pea ʼe tokoni anai kia tatou ke ʼaua naʼa tou līaki te gāue maʼuhiga ʼaupito, ʼaē ko te faka mafola ʼo te Puleʼaga.