“Koutou Haga Haʼele Ohage Ko He Fānau ʼo Te Mālama”
“Koutou kofuʼi te ʼuhigaʼi tagata foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” — Efesi 4:24.
1. Koteā te tapuakina ʼaē ʼe maʼu e te kau atolasio ʼa Sehova? Koteā tona tupuʼaga?
KO SEHOVA ʼATUA ko “te Tāmai ʼo te ʼu mālama ʼo selo”, pea “ ʼe mole maʼu he faʼahi fakapōʼuli ʼi te fakatahi mo ia”. (Sake 1:17; 1 Soane 1:5.) Ko tona ʼAlo neʼe ina ʼui ʼo ʼuhiga mo ia totonu: “Ko ʼau ko te mālama ʼo te malamanei. Ko ʼaē ʼe muli mai ia te ʼau ʼe mole haʼele anai ia ʼi te fakapōʼuli, kae ʼe ina maʼu anai te mālama ʼo te maʼuli.” (Soane 8:12). Ko te kau atolasio moʼoni ʼa Sehova, te kau tisipulo ʼo tona ʼAlo, ʼe tapuakina nātou ʼaki te fakamālamaʼi — ʼo tonatou ʼatamai, mo tonatou ʼu agaaga, pea mo tonatou faʼahi fakalaumālie — pea ʼe nātou “gigila ohage ko he ʼu nofoʼaga mālama ʼi te malamanei”. — Filipe 2:15.
2. Koteā te ʼaluʼaga kehekehe neʼe fakakikite ʼo ʼuhiga mo te hahaʼi ʼa te ʼAtua pea mo te malamanei?
2 Kua fualoa atu, ko te polofeta ko Isaia neʼe ina fakakikite te ʼaluʼaga kehekehe ʼaenī: “Koʼeni ko te ʼu fakapōʼuli ʼe nātou ʼaofi anai te kele, pea mo te fakapōʼuli mātotolu, te ʼu puleʼaga: kae kia te koe ʼe kamata gigila anai ia Sehova, pea kia te koe ʼe ʼiloga anai tona kolōlia.” Ko tona ʼuhiga, ko te malamanei ʼaē ʼe mamaʼo ʼi te ʼAtua, ʼe ʼui fēnei ʼe nātou ʼi te mālohi pea mo te pule ʼo “te ʼu pule ʼo te mālama fakapōʼuli ʼaia”. — Isaia 60:2; Efesi 6:12.
3. Koteā te ʼu tupuʼaga ʼaē ʼo tatatou leleiʼia te ʼu tokoni ʼa Paulo?
3 Ko te ʼapositolo ko Paulo neʼe hoha mamahi ki tana ʼu kaugā fagona kilisitiano ke nātou ʼāteaina mai te ʼu faʼahiga fakapōʼuli ʼaia. Neʼe ina uga ia nātou ke “tuku tanatou haga haʼele ohage ko te haʼele ʼa te ʼu puleʼaga” kae ke nātou “haga haʼele ohage ko he fānau ʼo te mālama”. (Efesi 4:17; 5:8.) Neʼe ina toe fakamahino foki ʼe feafeaʼi te fealagia ʼaē ke maui mālie tanatou faiga. ʼI te temi nei, ko te ʼu fakapōʼuli feiā mo te fakapōʼuli mātotolu kua fakaʼauʼau ʼo mātolu. Ko te mālama neʼe to ki te faʼahi pelapelaʼia ʼi te ʼaluʼaga ʼo tonatou faʼahiga maʼuli ʼo feiā mo te faʼahi fakalaumālie. Ko te tau ʼa te kau atolasio ʼa Sehova ʼe kinakina ʼaupito. Koia, ʼe ʼaoga kia tatou ia te meʼa ʼaē neʼe ʼui e Paulo.
Koutou ako ke koutou ʼiloʼi ia Kilisito
4. Neʼe koteā te manatu ʼa Paulo ʼi tana ʼui ʼaē: “Neʼe mole feiā takotou ako ke koutou ʼiloʼi ia Kilisito”?
4 ʼI tana ʼosi fakamatalatala te ʼu faiga noa pea mo te ʼu meʼa ʼuli ʼo te mālama, neʼe toe liliu te ʼapositolo ko Paulo ki tona ʼu kaugā fagona kilisitiano (Lau ia Efesi 4:20, 21). Neʼe taʼu tolu te fai faka mafola pea mo te faiako ʼa Paulo ʼi te kolo ʼaia, pea neʼe feʼiloʼiʼaki lelei mo te tokolahi ʼo te kokelekasio (Gāue 20:31-35). ʼI tana ʼui ʼaē, “neʼe mole feiā takotou ako ke koutou ʼiloʼi ia Kilisito”, ʼo ina fakahā te meʼa ʼaē ʼe ina ʼiloʼi totonu ko te kau kilisitiano ʼo Efese neʼe mole akoʼi nātou ʼaki he ʼu akonaki loi ʼe fefeoʼaki ia te moʼoni mo ni ʼu faʼahiga aga fakalialia ʼe fakamatala ʼi te vahe 17 ki te vahe 19. Neʼe mahino ia ki ai ko te ako ʼaē neʼe fai kia nātou, ko te ala moʼoni ia ʼo te maʼuli faka kilisitiano ohage ko te faʼifaʼitaki ʼa Sesu Kilisito. Ko te tupuʼaga ʼaia ʼo tanatou mole kei haʼele ʼi te fakapōʼuli ohage ko tona fai e te ʼu puleʼaga, kae nātou hage ko he fānau ʼo te mālama.
5. Koteā te kehekehe ʼo te nofo fakaauga noa pe ʼi te moʼoni pea mo te maʼu ʼo te moʼoni ia tatou?
5 Koia, ʼe maʼuhiga te “ako ʼo te ʼiloʼi ʼo Kilisito” ʼi tona faʼahiga fai ʼaē ʼe lelei! ʼE ʼi ai koa he ʼu faʼahiga ako ʼo te ʼiloʼi ʼo Kilisito ʼe kovi? ʼE moʼoni. ʼI muʼa atu, ia Efesi 4:14, ʼe fakatokaga e Paulo ki te ʼu tēhina: “Ke ʼaua naʼa tou hage ko he ʼu tamaliki ʼe fetafeaʼaki ʼi te ʼu fugavai pea mo feʼāveʼaki e te matagi ʼo he ʼu akonaki, ʼaki te kākā ʼa te tagata, ʼi tanatou poto ʼi te fefakaʼuluʼuluʼaki ʼaē ʼo te kākā.” ʼE ʼiloga ia neʼe ʼi ai ʼihi neʼe nātou ako ke nātou ʼiloʼi ia Kilisito kae nātou haga haʼele ʼi te ʼu ala ʼo te malamanei pea mo nātou faiga ke muliʼi nātou e niʼihi age. ʼE fakahā ʼaki mai koa te kovi ʼo te nofo fakaauga noa pe ʼi te moʼoni, ohage ko tona lau e ʼihi? ʼI te temi ʼo Paulo ko nātou ʼaē neʼe mole faʼa mahino neʼe faigafua pe te fakahalaʼi fakavilivili ʼo nātou mai te ala moʼoni e ʼihi, pea ʼe toe feiā ia ʼaho nei. Moʼo fakagata te faʼahi ʼaia, neʼe toe ʼui e Paulo ki te kau Efese ʼe ʼaoga kia nātou ke nātou ‘logoʼi ia Kilisito pea mo akoʼi nātou ʼaki ia Sesu’. — Efesi 4:21.
6. ʼE feafeaʼi hatatou ako, pea mo hatatou fagono, ʼo feiā mo he akonakiʼi tatou e Kilisito ia ʼaho nei?
6 Ko te ʼu kupu “ako”, “fagono”, pea mo “akonakiʼi” ʼaē ʼe fakaʼaogaʼi e Paulo ʼe faka ʼuhiga ki te faʼahiga ako, ohage ʼi te fale ako. ʼIo, ʼe mole feala ke tou fagono, pea mo akoʼi fakahagatonu tatou e Sesu ia ʼaho nei. Kae ʼe ina taki te ako faka tohi-tapu ʼi te malamanei ʼaki “te tagata kaugana agatonu mo poto”. (Mateo 24:45-47; 28:19, 20.) ʼE feala ke tou ‘ako ke tou ʼiloʼi fakalelei ia Kilisito’ pea ʼi tona ʼuhiga tonu, mo kapau ʼe tou fakaʼaogaʼi tuʼumaʼu ʼi tona temi tonu ia te meʼa kai fakalaumālie ʼaē ʼe foaki e te kalasi ʼo te kaugana, pea mo akoʼi fakalelei takitokotahi peʼe ʼi te kokelekasio, pea mo metitasioʼi, pea mo maʼuliʼi te meʼa ʼe tou akoʼi. Tou vakavakaʼi fakalelei pe ʼe tou fakaʼaogaʼi katoa te meʼa kai fuli ke feala hatatou ʼui moʼoni ai neʼe tou ‘fagono kia ia pea neʼe akonakiʼi tatou ʼaki ia ia’.
7. ʼE ʼi ai koa he ʼuhiga makehe ʼo te palalau ʼaenī ʼa Paulo “ko te moʼoni ʼe ia Sesu”?
7 Ko te meʼa lelei ia Efesi 4:21, ʼi tana ʼosi fakahāhā te faʼahiga ako, neʼe hoko atu e Paulo: “Ohage ko te moʼoni ʼe ia Sesu”. Ko ʼihi hahaʼi fai fakamatala ʼo te Tohi-Tapu ʼe nātou fakatokagaʼi ko Paulo ʼe tahitahiga tana fakaʼaogaʼi te higoa ʼo Sesu ʼi tana ʼu tohi. ʼE moʼoni, ko te vahe pe ʼaia e tahi ʼe fakaʼaogaʼi ai te higoa ʼo Sesu ʼi te tohi ki te kau Efese. ʼE ʼi ai koa he ʼuhiga makehe ʼo te meʼa ʼaia? ʼE mahalo ko Paulo neʼe ina fia fakatokagaʼi te faʼifaʼitaki ʼaē neʼe tuku e Sesu ʼi tona ʼuhiga tagata. Koutou manatuʼi neʼe ʼui tonu e Sesu ʼo ʼuhiga mo ia: “Ko ʼau ko te ala, pea mo te moʼoni, pea mo te maʼuli.” (Soane 14:6; Kolose 2:3). Neʼe ʼui fēnei e Sesu: “Ko ʼau (...) te moʼoni” koteʼuhi neʼe mole gata ʼaki pe tana palalau pea mo tana akonaki te moʼoni kae neʼe ina maʼuliʼi pea mo ina faka ʼuhigaʼi. ʼIo, ko te maʼuli faka kilisitiano moʼoni ʼe mole ko he fakakaukau pe kae ko he faʼahiga agaʼi maʼuli. Ko te “ako ʼo te ʼiloʼi ʼo Kilisito” ʼe pikipiki ki te ako ʼo te faʼifaʼitakiʼi ʼo ia ʼi te maʼuliʼi ʼo te moʼoni. ʼE koutou faʼifaʼitaki koa tokotou maʼuli ki ʼaē ʼa Sesu? ʼE koutou mulimuli lelei koa ʼi tona ala ʼi te ʼaho fuli pe? ʼI hakotou fai feiā, ʼe feala ai hakotou haga haʼele ohage ko he fānau ʼo te mālama.
“Koutou talaʼi tokotou ʼuhigaʼi tagata ʼāfea”
8. Ko te fakatā fea ʼaē neʼe fakaʼaogaʼi e Paulo ia Efesi 4:22, 24, pea he koʼe koa ko he fakatā ʼe tau?
8 Moʼo fakahā ʼe feafeaʼi tatatou “ako ʼo te ʼiloʼi ʼo Kilisito” pea mo haʼele ohage ko he ʼu fānau ʼo te mālama, neʼe toe ʼui e Paulo ia Efesi 4:22-24, ʼe ʼi ai te ʼu meʼa kehekehe e tolu ʼe tonu ke tou muliʼi. Ko te ʼuluaki ko ia ʼaenī: “ ʼE tonu ke koutou talaʼi tokotou ʼuhigaʼi tagata ʼāfea ʼaē ʼe ina fakatā takotou aga ʼāfea pea mo fakahehema tona ʼu holi fakakākā.” (Efesi 4:22). Ko te ʼu kupuʼi palalau ʼaē ko te “talaʼi” (“toʼo kehe”, Kingdom Interlinear) pea mo te “kofuʼi” (vahe 24) ʼe faka ʼuhiga ki he toʼo kehe kae hilifaki ki ai he kofu. Ko te faʼahiga palalau ʼaia neʼe tautau fakaʼaogaʼi e Paulo, pea ʼe ko he faʼahiga palalau lelei ia (Loma 13:12, 14; Efesi 6:11-17; Kolose 3:8-12; 1 Tesalonika 5:8). Ka ʼuli totatou kofu, ohage la lolotoga he kai, ʼe tou fetogi ʼi te temi ʼaē ʼe maʼu ai he fealagia. ʼE mole tonu koa la ke tou fai feiā mokā ʼuli totatou ʼuhiga fakalaumālie?
9. ʼE feafeaʼi hatatou līaki te ʼuhigaʼi tagata ʼāfea?
9 Koia, ʼe feafeaʼi hatatou talaʼi te ʼuhigaʼi tagata ʼāfea? ʼI te ʼuluaki lea, ko te kupu ʼaē ko te “talaʼi” neʼe fakaʼaogaʼi ʼi te faʼahiga palalau faka keleka. ʼE fakahā ʼaki mai he meʼa ʼe fai tuʼa tahi ʼo talu ai. Ko te meʼa ʼaia ʼe faka ʼuhiga kia tatou ko “te ʼuhigaʼi tagata ʼāfea” (“ko te tagata ʼāfea”, Kingdom Interlinear), mo tatatou “aga ʼāfea”, ʼe tonu ke līaki fakahagatonu pea mo talu ai, pea ke tuʼa tahi ʼi totatou maʼuli katoa. ʼE mole ko he meʼa ʼe feala anai hatatou fai he tonu ʼo maui mālie ai peʼe tou lotolotolua. He koʼe koa ʼe feiā?
10. He koʼe koa ʼe tonu ke tou līaki fakalelei ʼaki he loto katoa ia te ʼuhigaʼi tagata ʼāfea?
10 Ko te fasiga palalau ʼaē ko te “fakahehema” ʼe ina fakahā ko te aga ʼa te “tagata ʼāfea” ʼe pulipuli mamalie tana mahino ki te aga ʼaē ʼe tonu ke fai, ko tona ʼaluʼaga kua fakakovikovi ʼosi. Ki tona fakahagatonu, ʼuhi ko tana tekeʼi te mālama fakalaumālie, ko te malamanei ʼe pikisia ʼi te faʼahi ʼaia. Ko te fua ʼaia ʼo “te ʼu holi fakakākā”, ʼaē neʼe ʼui e Paulo. Ko te ʼu holi ʼo te kakano ʼe nātou kākā koteʼuhi ʼe hage mai ia ʼe mole nātou faka tuʼutāmaki, kae ʼe nātou fakatupu tuʼutāmaki ʼaupito (Hepeleo 3:13). Kapau ʼe mole fakagata, ʼe iku anai ia ki te meʼa ʼuli pea mo te mate (Loma 6:21; 8:13). Ko te tupuʼaga ʼaia ʼo te maʼua ʼaē ke talaʼi te ʼuhigaʼi tagata ʼāfea, ke toʼo fakalelei ʼaki he loto katoa ke pulihi te kofu ʼāfea pea mo ʼuli.
Fakafoʼou ʼi ‘te mālohi ʼo totatou fakakaukau’
11. Kofea ʼaē ʼe tonu ke kamata ai te fakafoʼou fakalaumālie?
11 Ko he tahi ʼe toka ki he moʼi pela ʼe mole tonu pe ke ina huʼi tona ʼu mutuʼi meʼa ʼuli kae ʼe tonu foki ke maʼanu ʼi muʼa ʼo hana tui he tahi ʼu mutuʼi meʼa maʼa. Ko te lua puleʼaki ke kita mālama fakalaumālie koia tonu ʼe talanoa ki ai ia Paulo ʼi tana ʼui ʼaenī: “ ʼE tonu ke fakafoʼou ia koutou ʼi te mālohi ʼaē ʼe ina lavaʼi tokotou ʼatamai.” (Efesi 4:23). Ohage ko tana fakahā ʼi muʼa atu, ʼi te vahe 17 pea mo te vahe 18, ko te ʼu puleʼaga ʼe nātou haʼele “ ʼi te noa ʼo tonatou ʼatamai” pea ʼe “fakapōʼuli tonatou ʼatamai”. Koia, ko te ʼatamai, ʼaē ko te uho ʼo te fakasiosio pea mo te mālama, ʼe tonu ke kamata ai te fakafoʼou. ʼE feafeaʼi he fealagia ke fakahoko te potu ʼaia? ʼE fakamahino e Paulo ko te faʼahi ʼaia ʼe tonu ke fakafoʼou te mālohi ʼaē ʼe ina lavaʼi totatou ʼatamai. Koteā te mālohi ʼaia?
12. Koteā te mālohi ʼaē ʼe ina lavaʼi te ʼatamai?
12 ʼE mole koa la ko te laumālie maʼoniʼoni ʼaē ʼe palalau ki ai ia Paulo ʼi tana talanoa ʼaē ki te mālohi ʼaē ʼe ina lavaʼi totatou ʼatamai? Kailoa. Ko te palalau ʼaē “ko te mālohi ʼaē ʼe ina lavaʼi tokotou ʼatamai” ʼe faka ʼuhiga ʼuluaki “te laumālie ʼo tokotou ʼatamai”. ʼE mole he koga ʼi te Tohi-Tapu ʼe ʼui ai ko te laumālie maʼoniʼoni ʼo te ʼAtua ʼe ʼa he tagata peʼe ko ʼa he koga ʼo he tagata. Ko te kupu “laumālie” ʼe faka ʼuhiga ʼuluaki ki te “mānava”, kae ʼe toe fakaʼaogaʼi foki ʼi te Tohi-Tapu “moʼo hinoʼi te mālohi ʼe ina uga he tahi ke ina fai he faʼahiga aga, he tonu, peʼe ke ina logoʼi he faʼahiga meʼa, ke ina fai he gāue peʼe ke ina muliʼi he faʼahiga ala”. (Auxiliaire pour une meilleure intelligence de la Bible, ʼi te pasina 491.) Koia ko “te laumālie ʼo te ʼatamai” ko te mālohi ʼaē ʼe ina lavaʼi peʼe ina uga totatou ʼatamai, te meʼa ʼe loto ki ai totatou fakakaukau.
13. He koʼe koa ʼe tonu ke fakafoʼou totatou holi māhani ʼo totatou ʼatamai?
13 Ko te holi māhani ʼa te ʼatamai heʼe haohaoa, ko te ʼu meʼa fakasino, te ʼu meʼa ʼo te kakano, pea mo te ʼu meʼa fakakoloa (Tagata Tānaki 7:20; 1 Kolonito 2:14; Kolose 1:21; 2:18). Māʼia pe la peʼe ko he tahi neʼe ina talaʼi tona ʼuhigaʼi tagata ʼāfea mo tana ʼu gāue kovi, ko te holi māhani ʼo te ʼatamai agahala kapau ʼe mole fetogi, pea ʼe ina toho anai ia ia ʼi he temi ki te meʼa ʼaē neʼe kua ina līaki. ʼE mole koa la ko te meʼa ʼaia neʼe hoko ki te tokolahi neʼe nātou lavaʼi te talaʼi ia nātou te ʼu meʼa, ohage la, ko te līaki te suluka, te konahia, pea mo ʼihi aga ʼe kovi? Kapau neʼe mole nātou fai he meʼa ke fakafoʼou te mālohi ʼaē ʼe ina lavaʼi tonatou ʼatamai, ko te toe tūkia neʼe ko he meʼa ia neʼe mole feala ke nātou hāo mai ai. Ko he fetogi moʼoni ʼe maʼua ke fakafoʼou katoa te ʼatamai. — Loma 12:2.
14. ʼE feafeaʼi te fakafoʼou ʼo te mālohi ʼaē ʼe ina lavaʼi te ʼatamai?
14 Koia, ʼe feafeaʼi ʼo fakafoʼou te mālohi ke ina lavaʼi totatou ʼatamai ke haga ki te ala ʼaē ʼe tonu? Ko te kupuʼi palalau ʼaē “fakafoʼou” ʼi te tohi faka keleka ʼe tohi ʼo ʼuhiga mo he gāue ʼe fai ʼi te temi tonu pe ʼaia, koia ʼe ko he meʼa ʼe fai hoholo. Koia, ko te haga ako ʼo te Folafola ʼo te moʼoni ʼa te ʼAtua pea mo te metitasio ki tona ʼuhiga ʼaē ʼe feala ai ke fakafoʼou te mālohi ʼaē ʼe ina lavaʼi te ʼatamai. ʼE ʼui fēnei mai e te kau popoto, ʼi totatou ʼuto ko te logo ʼaē ʼe hā ko te ʼu fakaʼiloga hila pea mo “chimique” ʼe fefakalakaʼaki mai te tahi “neurone” ki te tahi “neurone” ʼi te ʼatu ʼu ala ʼe higoa ko te ʼu “synapses”. ʼE ʼui fēnei e te tohi Te ʼuto (fakapilitānia), ka fakalaka he fakaʼiloga ʼi te “synapse” ʼe tāʼofi e te “synapse” te logo, pea hoko leva ki te temi ʼaē ʼe toe fakalaka mai ʼi te potu pe ʼaia, ko te ʼu “cellules nerveuses” ʼe nātou mahino kiai, pea nātou fakahoko fakavilivili. ʼI te temi leva ʼaia ʼe fakatupu ʼi te tagata te fakatuʼutuʼu foʼou ʼi tana manatu. Kapau ʼe tou fakamāhani te kai ʼo te ʼu logo maʼa fakalaumālie, ʼe tupu ia tatou te fakatuʼutuʼu foʼou ʼi te ʼu manatu pea ko te mālohi ʼaē ʼe ina lavaʼi totatou ʼatamai ʼe fakafoʼou tuʼumaʼu. — Filipe 4:8.
“Koutou kofuʼi te ʼuhigaʼi tagata foʼou”
15. ʼE mahino feafeaʼi kia tatou te ʼuhigaʼi tagata “foʼou”?
15 Koia, ʼe ʼui ai e Paulo: “ ʼE tonu ke koutou kofuʼi te ʼuhigaʼi tagata foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efesi 4:24). ʼIo, ko he kilisitiano ʼe ina haga kofuʼi te ʼuhigaʼi tagata foʼou. Ko te kupu “foʼou” ʼi henī ʼe talanoa ʼo ʼuhiga mo te kalitate kae mole foʼou heʼe ko te ʼaluʼaga fakamuli ʼaia. Ko he ʼuhigaʼi tagata foʼou “neʼe fakatupu ʼo mulimuli ki te finegalo ʼo te ʼAtua”. Ia Kolose 3:10, neʼe fakaʼaogaʼi e Paulo te faʼahiga palalau ʼe tatau ʼi tana ʼui ke “fakafoʼou ki te paki ʼo Ia ʼaē neʼe ina fakatupu”. ʼE feafeaʼi he maʼu ʼo te ʼuhigaʼi tagata foʼou ʼaia?
16. He koʼe koa ʼe feala ke tou ʼui ko te ʼuhigaʼi tagata foʼou “neʼe fakatupu ʼo mulimuli ki te finegalo ʼo te ʼAtua”?
16 Ko Sehova ʼAtua neʼe ina fakatupu te ʼuluaki taumatuʼa, ia Atama mo Eva, ki Tona paki pea ke nā hoko ki ai. Neʼe nā maʼu te ʼu kalitate fakalaumālie pea mo te ʼu kalitate ʼi tanā aga ʼaē ʼe makehe ai nāua ʼo kehe mo te ʼu manu (Senesi 1:26, 27). Logope ko tanā talagataʼa neʼe ina taki ai te malamanei ki te agahala pea mo te heʼe haohaoa, ko tatou, te hōloga ʼo Atama, ʼe tou maʼu te fealagia ʼaē ko te fakahā ʼo te ʼu kalitate fakalaumālie pea mo te ʼu kalitate ʼo te aga ʼaē ʼe tonu ke fai. Ko te finegalo ʼo te ʼAtua ʼe ko nātou ʼaē ʼe haga tui ki te sakilifisio faitotogi ʼe tonu ke nātou molehi te ʼuhigaʼi tagata ʼāfea pea mo ke nātou fakafiafia ki “te ʼāteaina faka kolōlia ʼo te fānau ʼa te ʼAtua”. — Loma 6:6; 8:19-21; Kalate 5:1, 24.
17. He koʼe koa ʼe feala ke tou ʼui ko te faitotonu mo te agatonu ʼe ko he ʼu fakaʼiloga maʼuhiga ʼo te ʼuhigaʼi tagata foʼou?
17 Ko te faitotonu pea mo te agatonu moʼoni ʼe ko te ʼu kalitate ʼaia e lua ʼe fakatokagaʼi e Paulo ko te ʼu fakaʼiloga ʼo te ʼuhigaʼi tagata foʼou. Ko te meʼa ʼaia ʼe ina fakahā ki muli age ko te ʼuhigaʼi tagata foʼou neʼe fakafoʼou ʼo mulimuli ki te paki ʼo Ia ʼaē neʼe ina fakatupu. ʼE tou lau ia Pesalemo 145:17: “Ko Sehova ʼe faitotonu ʼi tona ʼu ala fuli pea ʼe agatonu ʼi tana ʼu gāue fuli.” Pea ʼe fēnei te talanoa ia Fakahā 16:5 ʼo ʼuhiga mo Sehova: “ ʼE ke faitotonu, ia koe, ʼaē ʼe ʼi ai pea neʼe ke ʼi ai, Ia Koe ʼaē ʼe agatonu.” ʼIo, ko te faitotonu mo te agatonu ʼe ko he ʼu kalitate maʼuhiga mo kapau ʼe tou fakamoʼoni neʼe fakatupu tatou ki te paki ʼo te ʼAtua, ʼo tou fakaʼata tona kolōlia. ʼOfa pe ke tou hage ko Sakalia, te tāmai ʼa Soane Patita, ʼaē neʼe taki e te laumālie maʼoniʼoni ke ina fakavikiviki ki te ʼAtua ʼi tana faka fealagia ki Tana hahaʼi “te pilivilesio ʼaē ko te tauhi heʼetuʼania kia te ia ʼaki he tauhi taputapu ʼaki te agatonu mo te faitotonu”. — Luka 1:74, 75.
“Koutou haga haʼele ohage ko he fānau ʼo te mālama”
18. Neʼe feafeaʼi te tokoniʼi ʼo tatou e Paulo ke tou sio ki te ʼu ala ʼo te malamanei ʼi tona ʼuhiga totonu?
18 ʼI tatatou fakatokagaʼi te ʼu faʼahi fuli ʼo te ʼu palalau ʼa Paulo ia Efesi 4:17-24, ʼe lahi te ʼu meʼa ʼe feala ke tou fakakaukauʼi. Mai te vahe 17 ki te vahe 19, ʼe tokoni mai ia Paulo kia tatou ke tou sio ki te ʼu ala ʼo te mālama ʼi tona ʼuhiga totonu. ʼI tanatou līaki te mālama ʼo te ʼAtua pea mo nātou fakafefeka tonatou loto kia ia, ko nātou ʼaia ʼe kei ʼi te mālama neʼe nātou fakamavae ia nātou totonu mai te matapuna moʼoni ʼo te maʼuli. Koia, ʼi tanatou mole maʼu he ikuʼaga moʼoni peʼe ko he takitaki, ko tanatou ʼu faiga ʼe iku ki he meʼa fakavale pea mole hona fua. ʼE nātou hē loloto ʼi te higa fakalaumālie pea mo te puli ia nātou te aga ʼaē ʼe tonu ke fai. ʼE ko he ʼaluʼaga fakaʼofaʼofa! Pea ʼe ko he tupuʼaga maʼuhiga kia tatou ke tou faʼa fai ʼo haga haʼele ohage ko he fānau ʼo te mālama!
19. Koteā te tokoni fakaʼosi ʼe tou maʼu mai ia Paulo ʼo ʼuhiga mo te haga haʼele ohage ko he fānau ʼo te mālama?
19 Koia, ʼi te vahe 20 pea mo te vahe 21, ko Paulo ʼe ina fakahā te maʼuhiga ʼo te ako fakalelei ʼo te moʼoni ʼo mole gata ʼaki tatatou fakatahi mo te moʼoni kae ke tou maʼuliʼi ohage ko tona fai e Sesu. ʼI te fakaʼosi, mai te vahe 22 ki te vahe 24, ʼe ina fakaloto mālohiʼi tatou ke tou līaki te ʼuhigaʼi tagata ʼāfea kae tou kofuʼi te ʼuhigaʼi tagata foʼou, ʼi tona fai fakalelei pea mo fakamalotoloto. ʼI te temi ʼaia, ʼe tonu ke tou taupau maʼu te fakahaga ʼo totatou ʼu holi faka ʼatamai ʼi he ʼaluʼaga haohaoa fakalaumālie. Ia meʼa fuli, ʼe tonu ke tou haga kia Sehova ke tokoni mai ki tatatou haga haʼele ohage ko he fānau ʼo te mālama. “ ʼE moʼoni, neʼe ko te ʼAtua ʼaē neʼe ina ʼui: ‘Ke gigila te mālama mai te lotolotoiga ʼo te fakapōʼuli’, pea neʼe ina fakamālamaʼi totatou ʼu loto ke gigila ia nātou te mālama faka kolōlia ʼo te ʼAtua, ʼaki te fofoga ʼo Kilisito.” — 2 Kolonito 4:6.
ʼE kei koutou manatuʼi koa?
◻ ʼE feafeaʼi hatatou “ako ke tou ʼiloʼi ia Kilisito” ia ʼaho nei?
◻ He koe koa ʼe tonu ke talaʼi fakalelei te ʼuhigaʼi tagata ʼāfea?
◻ Koteā te mālohi ʼaē ʼe ina lavaʼi te ʼatamai, pea ʼe feafeaʼi tana liliu ʼo foʼou tuʼumaʼu?
◻ Koteā te ʼu kalitate ʼaē ʼe nātou fakaʼiloga te ʼuhigaʼi tagata foʼou?
[Paki ʼo te pasina 15]
Neʼe ʼui fēnei e Sesu: “Ko ʼau ko te ala pea mo te moʼoni, pea mo te maʼuli.”
[Paki ʼo te pasina 16]
‘Koutou toʼo kehe ia koutou te ʼuhigaʼi tagata ʼāfea mo tana ʼu gāue: ko te hāūhāū, mo te ʼita, mo te agakovi, mo te aga fakakākā, mo te ʼu lea fakalialia.’ — Kolose 3:8, 9.
[Paki ʼo te pasina 17]
“Koutou kofuʼi te ʼuhigaʼi tagata foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” — Efesi 4:24.