Tou Kumi Te Tokalelei Moʼoni Pea Mo Tou Mulimuli Kiai!
“Ko ia ʼaē ʼe manako ki te maʼuli pea mo fia sio ki he ʼu ʼaho lelei, . . . ke maliu kehe mai te meʼa ʼaē ʼe kovi pea ke ina fai te meʼa ʼaē ʼe lelei; ke ina kumi te tokalelei pea mo mulimuli kiai.”—1 Petelo 3:10, 11.
1. Koteā te ʼu palalau logona ʼa Isaia ʼaē ka hoko moʼoni anai?
“ ʼE NĀTOU tuki anai tanatou ʼu heletā ko he ʼu huo fuli kele pea mo tanatou ʼu tao ko he ʼu pipi moʼo pakimaga. ʼE mole hiki anai te heletā ʼa he puleʼaga ki he tahi puleʼaga, pea ʼe mole nātou toe ako anai te tau.” (Isaia 2:4) Logope la ko te vaega faka Tohi-Tapu logona ʼaia ʼe tuʼu ōvi atu ki te Nofoʼaga Faka Malamanei ʼo te Kautahi ʼo te ʼAtu Puleʼaga ʼi New York, ʼe mole fakahoko e te kautahi faka malamanei ʼaia te ʼu palalau ʼaia. Kae mai tona ʼuhiga ʼaē ko te vaega ʼaia ʼe kau ki te Folafola ʼa Sehova ʼAtua, koia ʼe hoko moʼoni anai te vaega ʼaia.—Isaia 55:10, 11.
2. ʼO mulimuli kia Isaia 2:2, 3, koteā ʼaē ʼe tonu ke “hoko moʼoni anai ʼi te temi fakaʼosi ʼo te ʼu ʼaho?”
2 Ko te ʼu palalau ʼaē ʼe tou maʼu ia Isaia 2:4, ʼe ko te koga ʼo he lea faka polofeta taulekaleka, ʼe ko he lea faka polofeta ʼo ʼuhiga mo te tokalelei moʼoni—pea ʼe hoko ʼi totatou temi. ʼI muʼa ʼo te talanoa ʼa te lea faka polofeta ki te ʼamanaki fakafiafia ʼaē ʼe mole toe ʼi ai anai he ʼu tau pea mo he ʼu mahafu tau, ʼe ʼui fēnei e te lea faka polofeta: “ ʼE hoko moʼoni anai, ʼi te temi fakaʼosi ʼo te ʼu ʼaho, ko te moʼuga ʼo te fale ʼo Sehova ʼe tuʼu maʼu anai ia ʼi te ʼu fuga moʼuga, pea ʼe māʼoluga age anai ia ʼi te ʼu moʼuga; pea ko te ʼu fenua fuli ʼe nātou ʼōmai anai kiai. Pea ʼe mahino papau ia ko te tokolahi ʼo te hahaʼi ʼe nātou ʼolo anai pea mo ʼui maʼa nātou: ‘Koutou ʼōmai pea ke tou hake ki te moʼuga ʼo Sehova, ki te fale ʼo te ʼAtua ʼo Sakopo; pea ʼe ina akoʼi anai kia tatou tona ʼu ala, pea ʼe tou haʼele anai ʼi tona ʼu ala foufou.’ Heʼe haʼu anai mai Sione te lao, pea mai Selusalemi te folafola ʼa Sehova.”—Isaia 2:2, 3.
ʼE Feala Ke Liliu Te Hahaʼi ʼo Maʼuli Tokalelei
3. ʼE lava feafeaʼi te fetogi ʼa he tahi neʼe agamālohi ke liliu ko he tahi ʼe manako ki te tokalelei?
3 Koutou fakatokagaʼi ke feala te maʼuliʼi e te hahaʼi te tokalelei, ʼe feala ke akoʼi age kia nātou te ʼu ala ʼo Sehova. Ko te fakalogo ki te akonaki ʼa Sehova ʼe feala ke ina fetogi te manatu pea mo te aga ʼa he tahi, ke feala kia ia ʼaē neʼe agamālohi ke liliu ko he tahi ʼe manako ki te tokalelei. ʼE hoko feafeaʼi te fetogi ʼaia? ʼE ʼui fēnei ia Loma 12:2: “Koutou fakagata takotou muliʼi te tuʼu ʼo te ʼu faʼahiga meʼa ʼaenī, kae ke koutou fetogi ia koutou ʼo fakafoʼou tokotou ʼatamai, ke feala ai hakotou ʼiloʼi papau pe koteā te finegalo ʼo te ʼAtua, tona lelei, tona tali lelei, pea mo tona haohaoa.” ʼE tou fakafoʼou totatou ʼatamai, peʼe tou fetogi tona ala, ʼo ina uga tatou ʼi te ʼu faʼahi kehekehe, ʼo tou fakafonu ʼaki te ʼu pelesepeto pea mo te lekula ʼaē ʼe haʼu mai te Folafola ʼa te ʼAtua. Ko te ako tuʼumaʼu ʼo te Tohi-Tapu ʼe tokoni anai kia tatou ke tou fai te fetogi ʼaia, pea ʼe faka fealagia ai kia tatou ke tou ʼiloʼi pe koteā te finegalo ʼo te ʼAtua ʼo ʼuhiga mo tatou, ke feala ai hatatou mahino lelei pe koteā te meʼa ʼaē ʼe tonu ke tou fai.—Pesalemo 119:105.
4. ʼE maʼu feafeaʼi e he tahi te ʼuhigaʼi tagata foʼou?
4 Ko te ʼu moʼoni ʼo te Tohi-Tapu ʼe mole ina fetogi pe tatatou faʼahiga manatu, kae ʼe ina toe fetogi mo tatatou ʼu aga pea mo totatou ʼuhiga takitokotahi. Ko te ʼu moʼoni ʼaia ʼe tokoni kia tatou ke tou fai te meʼa ʼaē neʼe uga e te ʼapositolo ko Paulo: “Koutou līaki tokotou ʼulugaaga ʼāfea ʼaē ʼe mulimuli ki takotou aga ʼāfea, pea ʼe fakahehema ia ʼo mulimuli ki tona ʼu holi fakakākā; kae . . . ke koutou fakafoʼou ia koutou ʼi te mālohi ʼaē ʼe ina uga tokotou ʼatamai, pea . . . mo kofuʼi te ʼuhigaʼi tagata foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efesi 4:22-24) Ko te mālohi ʼaē ʼe ina uga te ʼatamai ʼe ko he mālohi ʼe haʼu mai loto. ʼE fetogi pea mo ʼāsili mālohi ʼi te tuputupu ʼo totatou ʼofa ʼaē kia Sehova pea mo tana ʼu lao, pea ʼe ina fakaliliu tatou ko te ʼu hahaʼi ʼe tou leleiʼia te ʼu meʼa fakalaumālie, pea mo tou manako ki te tokalelei.
5. ʼE tokoni feafeaʼi te “fakatotonu foʼou” ʼaē neʼe foaki e Sesu ki tana kau tisipulo ki tonatou maʼuli tokalelei?
5 ʼE hā te maʼuhiga ʼo te fetogi ʼaia ʼi te ako ʼaē neʼe fai e Sesu ki tana kau tisipulo lolotoga te ʼu hola fakamuli ʼaē neʼe nofo ai mo nātou: “ ʼE ʼau foaki atu kia koutou te fakatotonu foʼou, ke koutou feʼofaʼofani; ohage ko taku ʼofa ʼaē kia koutou, ke toe feiā foki mo koutou, ke koutou feʼofaʼofani. ʼAki te meʼa ʼaia, ʼe ʼiloʼi ai anai e te hahaʼi fuli ko koutou ko taku ʼu tisipulo, mo kapau ʼe koutou femaʼuʼaki te ʼofa.” (Soane 13:34, 35) Ko te ʼofa ʼaia ʼaē ʼe hage ko te ʼofa ʼaē neʼe maʼu e Kilisito, ʼe ina faka logo tahi te kau tisipulo. (Kolose 3:14) ʼE gata pe kia nātou ʼaē ʼe nātou tali lelei pea mo maʼuliʼi te “fakatotonu foʼou” ʼe nātou maʼu anai te tokalelei ʼaē ʼe fakapapau mai e te ʼAtua. ʼE ʼi ai koa he ʼu hahaʼi ʼe nātou fai te faʼahi ʼaia ia ʼaho nei?
6. He koʼe ʼe maʼuli tokalelei te kau Fakamoʼoni ʼa Sehova, kae mole feiā te hahaʼi ʼo te mālama?
6 ʼE faiga te kau Fakamoʼoni ʼa Sehova ke nātou fakahā te ʼofa ki tonatou ʼu tēhina ʼi te malamanei katoa. Logope la tanatou ʼōmai mai te ʼu fenua kehekehe ʼo te malamanei, ʼe mole nātou kau ki te ʼu fakafeagai ʼaē ʼe hoko ʼi te malamanei, tatau aipe peʼe hoko kia nātou he ʼu fihifihia faka politike pea mo he ʼu fihifihia faka lotu. ʼI tonatou ʼuhiga hahaʼi logo tahi, ʼe akoʼi nātou e Sehova, pea ʼe nātou maʼuli tokalelei. (Isaia 54:13) ʼE mole nātou kau ki te ʼu fihi faka politike, pea ʼe mole nātou kau ki te ʼu tau. Ko ʼihi ʼaē neʼe agamālohi ʼi te temi muʼa kua fetogi tonatou maʼuli. Kua nātou liliu ko te kau Kilisitiano ʼe manako ki te tokalelei, ʼo nātou mulimuli ki te faʼifaʼitaki ʼa Sesu Kilisito. Pea ʼe nātou mulimuli mo tonatou loto katoa ki te tokoni ʼa Petelo ʼaē ʼe ina ʼui fēnei: “Ko ia ʼaē ʼe manako ki te maʼuli pea mo fia sio ki he ʼu ʼaho lelei, ke ina taupau tona ʼalelo mai te meʼa ʼaē ʼe kovi pea mo tona ʼu laugutu ke ʼaua naʼa ina fai he ʼu lea fakakākā. kae ke maliu kehe mai te meʼa ʼaē ʼe kovi pea ke ina fai te meʼa ʼaē ʼe lelei; ke ina kumi te tokalelei pea mo mulimuli kiai.”—1 Petelo 3:10, 11; Efesi 4:3.
Ko Nātou ʼAē ʼe Nātou Mulimuli Ki Te Tokalelei
7, 8. Koutou fakamatala he ʼu faʼifaʼitaki ʼa he ʼu hahaʼi neʼe kau ki te ʼu tau pea kua nātou liliu ko te ʼu hahaʼi ʼe nātou kumi te tokalelei moʼoni. (Talanoa ki he tahi ʼu faʼifaʼitaki ʼe koutou ʼiloʼi.)
7 Ohage la, ko Rami Oved, neʼe ko te ofisie neʼe kau ʼi muʼa atu ki te kūtuga fai fakapō. Neʼe ina akoako peʼe feafeaʼi te matehi ʼo tona ʼu fili. Neʼe tui mālohi ki te tauhi ʼaē ki tona fenua ko Iselaele, ʼo aʼu ki te ʼaho ʼaē neʼe ina ʼiloʼi ai neʼe mole loto te kau lapi ke ʼohoana ia ia mo te fafine neʼe manako ai, heʼe ko te fafine Asia, ko he Senitile. Neʼe ina kamata kumi ai te moʼoni ʼi te Tohi-Tapu. Pea neʼe fai palalau mo te kau Fakamoʼoni ʼa Sehova. ʼAki tana ako Tohi-Tapu mo te kau Fakamoʼoni ʼa Sehova neʼe mahino papau ai ki ai, ʼe mole kei tonu ke hoko atu tana tauhi fakavale ki tona fenua. Ko te ʼofa faka Kilisitiano ko tona faka ʼuhiga ko te līaki ʼo te tau pea mo te ʼu mahafu tau, pea mo kita ako ke kita ʼofa ki te hahaʼi fuli. Neʼe punamaʼuli ʼi tana maʼu te tohi ʼe kamata ʼaki te ʼu palalau ʼaenī, “Toku Tēhina ko Rami”! He koʼe neʼe makehe te tohi ʼaia? Ko ia ʼaē neʼe faitohi ki ai ʼe ko te Fakamoʼoni ʼa Sehova Palesitina. ʼE ʼui fēnei e Rami, “Kia ʼau neʼe mole ko he meʼa ʼe feala ke hoko, he neʼe mātou fefakafeagaiʼaki mo te kau Palesitina, pea ʼi te temi nei kua fakahigoaʼi ʼau e te tahi ia nātou ʼaia ko ‘Toku Tēhina.’ ” ʼI te temi nei, ʼe mulimuli ia Rami pea mo tona ʼohoana, ki te tokalelei moʼoni ʼi te ala ʼo te ʼAtua.
8 Ko te tahi faʼifaʼitaki ʼe ko Georg Reuter, ʼaē neʼe kau ki te kau solia ʼo Siamani ʼaē neʼe nātou hūfi ia Lusia ʼi te Lua Tau Faka Malamanei. Mole tuai pea neʼe mole kei fia fai ia ki te fakatuʼutuʼu mālohi ʼa Itilele ʼaē ke ina puleʼi te malamanei. ʼI tana liliu ki tona ʼapi ʼi te ʼosi tau, neʼe kamata ai tana ako Tohi-Tapu mo te kau Fakamoʼoni ʼa Sehova. Neʼe ina tohi fēnei: “Ki muli age, neʼe mahino lelei kia ʼau te ʼu meʼa ʼaē ʼe hoko. Neʼe mahino ai kia ʼau ʼe mole tonu ke tukugakoviʼi te ʼAtua ʼo ʼuhiga mo te ʼu ligi toto kehekehe ʼaē neʼe hoko . . . Neʼe ʼau ako ko tana fakatuʼutuʼu ʼe ko te fakatuʼu ʼo he palatiso ʼi te kele katoa pea mo ina foaki te ʼu tapuakina heʼegata ki te hahaʼi ʼaē ʼe fakalogo kia te ia. . . . Neʼe fia laupisi ia Itilele ʼo ʼuhiga mo tana ‘Pule Ia Taʼu e Afe,’ kae neʼe pule pe ia ia taʼu e 12—pea neʼe hoko ai mo te ikuʼaga fakalialia kia ia! Ko Kilisito kae mole ko Itilele . . . ʼaē ʼe feala anai ke ina fai te faʼahi ʼaia pea mo ina puleʼi te kele lolotoga taʼu e afe.” Kua hili nei kiai taʼu e 50, kua gāue ia Georg ko he minisi ʼo te tokalelei moʼoni ʼi te selevisi pionie.
9. ʼE fakahā feafeaʼi e te meʼa ʼaē neʼe hoko ki te kau Fakamoʼoni ʼa Sehova ʼi Siamani, tanatou lototoʼa pea mo tanatou maʼuli ʼi te tokalelei?
9 Ko te agatonu ʼa te kau Fakamoʼoni ʼa Sehova pea mo tanatou mole kau ki te tau ʼi Siamani lolotoga te puleʼaga Nasi, ʼe hoko atu tana fakamoʼoni ki tanatou ʼofa ʼaē ki te ʼAtua pea mo te tokalelei ʼo aʼu ki te temi ʼaenī, kua hili kiai taʼu e 50 tupu ki muli age. ʼE ʼui fēnei e te kaupepa ʼo te Musée de l’Holocauste ʼo Washington, D.C.: “Neʼe kātakiʼi e te kau Fakamoʼoni ʼa Sehova te ʼu fakataga ʼaē neʼe fai e te puleʼaga Nasi. . . . Neʼe hā te lototoʼa ʼa te tokolahi ʼo te kau Fakamoʼoni ʼa Sehova, he neʼe mole nātou [fakafisi ki tanatou lotu], logope la neʼe fakatagaʼi nātou, mo gaohi koviʼi ʼi te ʼu lotoʼā fakamamahi, pea ʼi ʼihi temi ko te fakapogi ʼo nātou, neʼe tupu ai tonatou fakaʼapaʼapaʼi e te hahaʼi.” Pea ʼe toe ʼui fēnei e te kaupepa ʼaia: “Lolotoga te fakamavae ʼa te hahaʼi mai te ʼu lotoʼā, neʼe hoko atu pe te gāue ʼa te kau Fakamoʼoni ʼa Sehova, ʼo nātou faka mafola ki te hahaʼi ʼaē neʼe mavae mai te ʼu lotoʼā, ʼo maliu ai ʼihi ki tanatou lotu.”
Ko He Fetogi ʼe Lahi Age
10. (a) Koteā te fetogi lahi ʼaē ʼe ʼaoga ke hoko ke maʼu ai te tokalelei moʼoni? (b) Neʼe fakahā feafeaʼi te faʼahi ʼaia ʼi te tohi ʼo Taniela?
10 Ko tona faka ʼuhiga koa ʼe tui te kau Fakamoʼoni ʼa Sehova ʼe feala ke nātou foaki te tokalelei ki te malamanei katoa, ʼi tanatou fakaliliu te hahaʼi ki te Lotu Faka Kilisitiano? Kailoa! Ke feala he fakatuʼu ʼo te tokalelei ʼi te kele, ʼe tonu ke hoko te fetogi lahi. Koteā te fetogi ʼaia? ʼE tonu ki te ʼu puleʼaga fakatagata ʼaē ʼe fakatupu maveuveu, mo aga fefeka pea mo agamālohi, ke fetogi ʼaki te Puleʼaga ʼa te ʼAtua, ʼaē neʼe akoʼi e Sesu ki tana kau tisipulo ke nātou faikole kiai. (Mateo 6:9, 10) Kae ʼe hoko feafeaʼi anai te faʼahi ʼaia? ʼI te misi neʼe haʼu mai te ʼAtua, neʼe fakahā ki te polofeta ko Taniela, ʼi te ʼu ʼaho fakamuli, ko te Puleʼaga ʼo te ʼAtua, ohage ko he foʼi maka lahi ‘neʼe mole haʼu mai he ʼu nima ʼo he tagata,’ ʼe ina maumauʼi anai te foʼi fakatātā lahi ʼaē ʼe ina fakatā te ʼu puleʼaga faka politike ʼo te kele katoa. Pea neʼe ina kalagaʼi fēnei: “ ʼI te ʼu ʼaho ʼo te ʼu hau ʼaia ko te ʼAtua ʼo te lagi ʼe ina fakatuʼu anai he puleʼaga ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia, pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi honatou gataʼaga.”—Taniela 2:31-44.
11. ʼE fakahoko feafeaʼi anai e Sehova te ʼu fetogi ʼaē ʼe ʼaoga ke hoko ai te tokalelei?
11 He koʼe ʼe hoko anai te fetogi ʼaia ʼi te malamanei? Koteʼuhi neʼe fakapapau e Sehova ʼe ina fakamaʼa anai te kele ʼo ina pulihi ia nātou fuli ʼaē ʼe nātou ʼulihi pea mo maumauʼi. (Fakahā 11:18) Ko te fetogi ʼaia ʼe hoko anai ʼi te temi ʼaē ka hoko ai te tau faitotonu ʼa Sehova kia Satana pea mo tana mālama agakovi ʼaenī. ʼE tou lau fēnei ia Fakahā 16:14, 16: “ ʼIo ko [te ʼu palalau heʼemaʼa], ʼe haʼu mai te kau temonio pea ʼe nātou fakahoko te ʼu fakaʼiloga, pea ʼe nātou ʼolo ki te ʼu hau [te ʼu pule faka politike] ʼo te kele katoa ʼaē ʼe nofoʼi, ke nātou tānaki ia nātou ki te tau ʼo te ʼaho lahi ʼo te ʼAtua te Māfimāfi. Pea neʼe nātou tānaki ia nātou ki te potu ʼaē ʼe higoa ʼi te faka Hepeleo ko Hala-Maketone.”
12. ʼE feafeaʼi anai ia Halamaketone?
12 ʼE feafeaʼi anai ia Halamaketone? ʼE mole ko he tau faka nukeleʼea peʼe ko he tuʼutāmaki ʼe fakahoko e te tagata. Kailoa, ʼe ko te tau ʼaē ka fakahoko e te ʼAtua moʼo fakagata te ʼu tau ʼa te tagata, pea mo fakaʼauha ia nātou fuli ʼaē ʼe nātou fakahoko te ʼu tau. ʼE ko te tau ʼaia ʼaē ka fai e te ʼAtua moʼo fakahoko te tokalelei moʼoni kia nātou ʼaē ʼe manako ki te tokalelei. ʼIo, ko Halamaketone ʼe hoko anai ohage ko te meʼa ʼaē kua fakatuʼutuʼu e Sehova. ʼE mole tuai anai. Neʼe tohi fēnei e tana polofeta ko Hapakuke te ʼu palalau fakaʼatua ʼaenī: “Ko te meʼa ʼaē neʼe hā ʼe kei tuku ia ki te temi ʼaē neʼe fakakatofa kiai. Pea ʼe fakatupu lotohoha ia ʼo aʼu ki te fakaʼosi, pea ʼe mole loi anai ia. Tatau aipe peʼe tuai, haga talitali kiai; heʼe hoko moʼoni anai ia. ʼE mole tauhala anai ia.” (Hapakuke 2:3) ʼI tatatou manatu fakatagata, ʼe lagi tuai fau ia Halamaketone, kae ʼe mole fetogi te fakatuʼutuʼu ʼa Sehova. ʼE hoko moʼoni anai ia Halamaketone ʼi te hola ʼaē neʼe fakatuʼutuʼu kiai e Sehova.
13. Koteā anai ʼaē ka fai e te ʼAtua kia Satana te Tevolo, ʼaē ʼe tupu ai te ʼu kovi ʼo te malamanei?
13 Ko te tau ʼaia ʼe ina fakahoko anai te tokalelei moʼoni! Kae ke feala te fakatuʼu mālohi ʼo te tokalelei moʼoni, ʼe tonu ke fai te tahi meʼa—ʼe tonu ke pulihi ia ia ʼaē ʼe ina fakatupu te ʼu maveuveu, mo te fehiʼa, pea mo te tau. Pea ko te meʼa ʼaia ʼe hoko anai ki muli age ohage ko te meʼa ʼaē neʼe fakakikite e te Tohi-Tapu—ʼe lī anai ia Satana ki te vanu, ia ia ʼaē ʼe tupu ai te tau pea mo tāmai ʼo te loi. Neʼe sio te ʼapositolo ko Soane ki te meʼa ʼaia, ohage ko tona fakahā ia Fakahā 20:1-3: “Neʼe ʼau sio ki te ʼaselo ʼe hifo mai te lagi mo te kalavi ʼo te vanu pea mo te seini lahi ʼi tona nima. Pea neʼe ina puke te talakone, te gata olisinale, ʼaē ko te Tevolo pea mo Satana, pea neʼe ina haʼi ia ia ki he ʼu taʼu e afe. Pea neʼe ina lī ia ia ki te vanu, ʼo ina pupunu pea mo ina fakamaʼu kia te ia, ke ʼaua naʼa ina toe fakahēʼi te ʼu puleʼaga, ka heʼeki ʼosi te ʼu taʼu ʼaē e afe.”
14. Koteā te meʼa ʼaē ʼe feala ke tou ʼui ʼo ʼuhiga mo te tauʼi e Sehova ia Satana?
14 Ko te faʼahi ʼaia ʼe mole ko he moemisi; ʼe ko te fakapapau ʼa te ʼAtua—pea ʼe ʼui fēnei e te Tohi-Tapu: “ ʼE mole feala ki te ʼAtua ke loi.” (Hepeleo 6:18) Koia neʼe ʼui ai e Sehova ʼaki tana polofeta ko Selemia: “ ‘Ko ʼau ia Sehova, ia Ia ʼaē ʼe lotoʼofa, mo totonu pea mo faitotonu ki te kele; koteʼuhi ʼe ʼau fiafia ki te ʼu meʼa ʼaia,’ ko te tala ʼaia ʼa Sehova.” (Selemia 9:24) ʼE faitotonu pea mo agatonu ia Sehova, pea ʼe fiafia ʼuhi ko te tokalelei ʼaē ka ina ʼaumai ki te kele.
ʼE Puleʼi e Te ʼAliki ʼo Te Tokalelei
15, 16. (a) Ko ai ʼaē ʼe fili e Sehova ke pule mo Hau? (b) Koteā ʼaē ʼe ʼui ʼo ʼuhiga mo te takitaki ʼa te hau ʼaia, pea ko ai ʼaē ka kau anai ki te faʼahi ʼaia?
15 Ke feala he maʼu ʼe nātou fuli ʼaē ka takitaki e tona Puleʼaga te tokalelei moʼoni, neʼe foaki e Sehova tana pule ki te ʼAliki ʼo te Tokalelei, ia Sesu Kilisito, ohage ko tona fakakikite ia Isaia 9:6, 7: “Kua tupu te tamasiʼi maʼa tatou, kua foaki mai te foha maʼa tatou; pea ko te pule fakaʼaliki ʼe hili anai ki tona fugaʼuma. Pea ʼe fakahigoa anai ko Fai Tokoni Taulekaleka, ʼAtua Mālohi, Tāmai Heʼegata, ʼAliki ʼo te Tokalelei. ʼO ʼuhiga mo te mahu ʼo te pule fakaʼaliki pea mo te tokalelei ʼe mole ʼi ai anai hona gataʼaga . . . Pea ko te faiga totonu ʼo Sehova ʼa te kautau ʼe ina fai anai te meʼa ʼaia.” Tahi ʼaē meʼa neʼe tohi fēnei e te tagata fai pesalemo te lea faka polofeta ʼo ʼuhiga mo te pule ʼa te Mesia ʼi te tokalelei: “ ʼI tona ʼu ʼaho ʼe kamata tupu ai anai te agatonu, pea ko te lahi ʼo te tokalelei ʼe aʼu anai ki te puli ʼo te māhina.”—Pesalemo 72:7.
16 Tahi ʼaē meʼa, ko te ʼu tēhina ʼa Kilisito, te toko 144 000 kau fakanofo, ʼe nātou kaugā hau anai mo ia ʼi te lagi. ʼE nātou kaugā hau mo Kilisito ohage ko te meʼa ʼaē neʼe tohi e Paulo: “ ʼO ʼuhiga mo ia, ko te ʼAtua ʼaē ʼe ina foaki te tokalelei, ʼe mole kei tuai pea ina moloki anai ia Satana ʼi ʼokotou ʼu lalo vaʼe. Ke ia koutou te ʼofa makehe ʼo totatou ʼAliki ko Sesu.” (Loma 16:20) ʼIo, ʼi te lagi ʼe nātou kau anai ki te tau ʼaē ka fakahoko e Kilisito kia ia ʼaē ʼe ina fakatupu te tau, ia Satana te Tevolo!
17. Koteā te meʼa ʼaē ʼe tonu ke tou fai ke tou maʼu ai te tokalelei moʼoni?
17 Koia ʼi te temi nei ʼe lagaʼi ai te fehuʼi ʼaenī, Koteā te meʼa ʼaē ʼe tonu ke koutou fai ke koutou maʼu ai te tokalelei moʼoni? Ko te tokalelei moʼoni ʼe hoki feala ke koutou maʼu mo kapau ʼe koutou mulimuli ki te ala ʼo te ʼAtua, pea ke feala hakotou maʼu te faʼahi ʼaia ʼe tonu ke koutou fai he ʼu fakatuʼutuʼu lelei. ʼE tonu ke koutou tali te ʼAliki ʼo te Tokalelei pea mo koutou mulimuli ki ai. Ko tona faka ʼuhiga ʼe tonu ke koutou tali ia Kilisito ʼi tona tuʼulaga ʼaē neʼe ina Totogi te malamanei mai te agahala. Neʼe ʼui totonu e Sesu te ʼu palalau logona ʼaenī: “He ko te ʼAtua, ʼi tona ʼofa lahi ki te malamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kia te ia, ke ʼaua naʼa fakaʼauha kaʼe ke ina maʼu te maʼuli heʼegata.” (Soane 3:16) ʼE koutou lotolelei koa ʼo koutou tui kia Kilisito Sesu ʼi tona ʼuhiga Tagata Fakafofoga ʼa te ʼAtua, ʼaē ka ina ʼaumai anai te tokalelei moʼoni pea mo te fakamaʼuli? ʼE mole he tahi higoa ʼi te lalo lagi ʼe feala ke ina fakatuʼu te tokalelei pea mo ina fakahoko te faʼahi ʼaia. (Filipe 2:8-11) Koteā koa tona tupuʼaga? Koteʼuhi ko Sesu ʼe ko Ia ʼaē neʼe fili e te ʼAtua. ʼE ko ia te tagata ʼave logo lahi tokotahi ʼo te tokalelei ʼaē neʼe maʼu ʼi te kele. ʼE koutou fakalogo anai koa kia Sesu pea mo koutou mulimuli ki tana faʼifaʼitaki?
18. Koteā ʼaē ʼe tonu ke tou fai moʼo tali ki te ʼu palalau ʼa Sesu ʼaē ʼe tuʼu ia Soane 17:3?
18 Neʼe ʼui fēnei e Sesu: “Ko te faka ʼuhiga ʼaenī ʼo te maʼuli heʼegata, ke nātou ako te ʼiloʼi ʼo koe, te ʼAtua moʼoni pe ʼaē e tahi, pea mo ia ʼaē neʼe ke fekauʼi mai, ia Sesu Kilisito.” (Soane 17:3) ʼI te temi ʼaenī ʼe tonu ke tou maʼu ai te ʼatamai mālama totonu, ʼo tou kau tuʼumaʼu ki te ʼu fono ʼa te kau Fakamoʼoni ʼa Sehova ʼaē ʼe fai ʼi te Fale ʼo te Puleʼaga. Ko te ʼu fono ʼaia ʼe nātou uga anai koutou ke koutou vaevae mo te hahaʼi te meʼa ʼaē kua koutou mālama kiai, pea mo te meʼa ʼaē ʼe koutou ʼamanaki kiai. ʼE toe feala foki mo koutou ke koutou liliu ko he minisi ʼo te tokalelei ʼa te ʼAtua. ʼE feala ke koutou maʼu te tokalelei ʼi te temi nei, ʼo koutou falala kia Sehova ʼAtua, ohage ko tona fakahā ia Isaia 26:3, ʼi te Tohi-Tapu te New International Version: “ ʼE ke taupau anai ʼi te tokalelei haohaoa ia ia ʼaē ʼe mālohi tona ʼatamai, koteʼuhi ʼe falala kia te koe.” Ko ai koa ʼaē ʼe tonu ke koutou falala ki ai? “Koutou falala kia Sehova, ʼi te temi fuli, heʼe ko Sah Sehova ʼe ko te Maka ʼo aʼu ki he ʼu temi ʼe mole ʼiloʼi honatou gataʼaga.”—Isaia 26:4.
19, 20. Koteā te meʼa ʼaē ʼe fakatalitali kia nātou ʼaē ʼe nātou kumi te tokalelei pea mo nātou mulimuli kiai ia ʼaho nei?
19 Koutou faiga ʼi te temi nei ke koutou maʼu te maʼuli heʼegata ʼi te mālama foʼou ʼaē ka maʼu ai te tokalelei ʼa te ʼAtua. Ia Fakahā 21:3, 4, ʼe fakamoʼoni fēnei mai e te ʼAtua kia tatou: “Koʼeni! Ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai ia mo nātou, pea ʼe nātou liliu anai ko tana ʼu hahaʼi. Pea ko te ʼAtua totonu ʼe nofo anai mo nātou. Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.” ʼE mole koa la ko te tokalelei ʼaia ʼaē ʼe koutou fakaʼamu kiai ʼi te temi ka haʼu?
20 Koia koutou manatuʼi te meʼa ʼaē neʼe fakapapau mai e te ʼAtua. “Ko te kau agavaivai ʼe nātou maʼu anai te kele, pea ʼe nātou fiafia anai ʼi te mahu ʼo te tokalelei. Sioʼi te tagata agatonu ʼaē ʼe mole hana hala pea mo sioʼi tuʼumaʼu te tagata ʼaē ʼe faitotonu, heʼe ko te ka haʼu ʼo te tagata ʼaia ʼe tokalelei anai.” (Pesalemo 37:11, 37) Ka hoko mai anai te ʼaho ʼaia, ʼofa pe ke tou ʼui ʼaki he loto fakafetaʼi, “Kua hoko mai te tokalelei moʼoni! ʼE mātou fakamālo atu Sehova ʼAtua, ia te matapuna ʼo te tokalelei moʼoni!”
ʼE Feala Koa Hakotou Fakamahino?
◻ Koteā ʼaē ʼe feala ke tokoni ki he tahi ke ina fetogi tana ʼu manatu pea mo tana aga?
◻ ʼE fakahā feafeaʼi e te kau Fakamoʼoni ʼa Sehova ʼi tonatou ʼuhiga takitokotahi pea mo tonatou ʼuhiga kautahi, tanatou manako ki te tokalelei moʼoni?
◻ Koteā anai ʼaē ka fai e Sehova kia nātou ʼaē ʼe nātou uga te fehiʼa pea mo te tau?
◻ Koteā anai ʼaē ka maʼu e te malamanei ʼi te takitaki ʼa te ʼAliki ʼo te Tokalelei?
[Paki ʼo te pasina 14]
Kua fakahoko te ʼu palalau ʼa Isaia ʼe nātou ʼaē ʼe nātou tali te ʼu akonaki ʼa Sehova, kae mole fakahoko e te Kautahi ʼo te ʼAtu Puleʼaga Fakatahi
[Paki ʼo te pasina 15]
Ko te ʼu tagata e toko lua ʼaenī, neʼe nā fai te ʼu fetogi ke nā mulimuli ki te tokalelei
Ko Rami Oved
Mo Georg Reuter
[Paki ʼo te pasina 16]
ʼE maʼu anai te tokalelei moʼoni ʼi te takitaki ʼo te ʼAliki ʼo te Tokalelei