‘Koutou Haga Fefakamolemoleʼaki ʼAki He Lotolelei’

“Koutou haga fekātakiʼaki pea mo fefakamolemoleʼaki ʼaki he lotolelei.”​—Kolose 3:​13.

1. (a) He koʼe neʼe lagi manatu e Petelo, neʼe agalelei ʼi tana ʼui ʼaē ʼe tonu ke fakamolemole ki ʼihi “ ʼo aʼu ki te tuʼa fitu”? (b) Koteā te faka ʼuhiga ʼo te ʼui ʼaē ʼa Sesu, ʼe tonu ke tou fakamolemole “ ʼo aʼu ki te tuʼa fitugofulu-ma-fitu”?

“ ʼALIKI, ʼe tuʼa fia anai te feala ʼo toku tēhina ke agahala mai kia te ʼau, pea mo tonu ke ʼau fakamolemole kia te ia? ʼE kaku anai koa ki te tuʼa fitu?” (Mateo 18:21) Neʼe lagi manatu e Petelo, neʼe agalelei ʼi tana ʼui ʼaē ʼe ina fakamolemole anai ʼo tuʼa fitu. ʼI te temi ʼaia, neʼe ʼui e te talatisio ʼa te kau Lapi, neʼe mole tonu ke kita fakamolemole ʼo fakalaka ʼi te tuʼa tolu, mo kapau neʼe agahala liuliuga he tahi kia kita.a Neʼe lagi punamaʼuli ʼaupito ia Petelo ʼi te tali ʼaenī ʼa Sesu kia te ia: “ ʼE ʼau tala atu kia te koe, ʼe mole kaku ki te tuʼa fitu, kaʼe ki te tuʼa fitugofulu-ma-fitu”! (Mateo 18:22) Ko te fakaʼaogaʼi liuliuga ʼaia ʼo te numelo fitu ʼe faka ʼuhiga ki he fakamolemole “ ʼe mole hona gataʼaga.” ʼI te manatu ʼa Sesu, ʼe mole faka tuʼakoi te ʼu lakaga ʼaē ʼe feala ke fakamolemole ai e he Kilisitiano ki ʼihi.

2, 3. (a) Koteā te ʼu faʼahiga ʼaluʼaga, ʼe hage ʼe faigataʼa ai te fakamolemole ki ʼihi? (b) He koʼe ʼe feala hatatou tui papau, ko te fakamolemole ki ʼihi ʼe fua lelei anai kia tatou?

² Kae ʼe faigataʼa te maʼuliʼi ʼo te tokoni ʼaia. Ko ai ia tatou, neʼe mole logo mamahi ʼuhi ko he laukovi loi neʼe fai ki ai? Ko he tahi neʼe koutou falala ki ai, neʼe lagi ina fakahā ki ʼihi he meʼa neʼe koutou fakahā age ki ai ka mole koutou loto ke ʼiloʼi e he tahi. (Tāʼaga Lea 11:13) Ko te ʼu palalau fakavale ʼo hokotou kaumeʼa lelei, neʼe lagi hage kia koutou ko “he tāʼi [ʼo koutou] ʼaki he heletā.” (Tāʼaga Lea 12:18) Ko te gaohi koviʼi ʼo koutou e he tahi neʼe koutou ʼofa ki ai peʼe falala ki ai, neʼe lagi fakatupu lotomamahi ʼaupito kia koutou. Ka hoko he ʼu meʼa feiā, ʼe tou ʼiʼita ai. ʼE mole kei tou fia palalau kia ia ʼaē neʼe fakatupu mamahi mai kia tatou, pea ʼe mole kei tou fia felogoi mo ia. Pea ʼe tou manatu, kapau ʼe tou fakamolemole kia ia, pea ʼe hage leva ia ʼe hāo ʼi te fakatūʼa ʼaē ʼe tonu ke hoko kia ia. Kae kapau ʼe tou taupau he loto ʼita, pea ʼe tou fakatupu mamahi anai kia tatou totonu pe.

³ Koia, ʼe fakaloto mālohiʼi tatou e Sesu ke tou fakamolemole​—ʼo aʼu “ki te tuʼa fitugofulu-ma-fitu.” ʼE mahino papau ia, ko tana ʼu akonaki ʼe mole feala ke fua kovi kia tatou. Ko te ʼu meʼa fuli ʼaē neʼe ina akoʼi mai, neʼe haʼu mai ia Sehova, ‘Ia Ia ʼaē ʼe ina akoʼi tatou ke ʼaoga kia tatou.’ (Isaia 48:17; Soane 7:​16, 17) Koia, ʼe fua lelei anai kia tatou mo kapau ʼe tou fakamolemole ki ʼihi. ʼI muʼa ʼo tatatou vakaʼi pe koʼe ʼe tonu ke tou fakamolemole pea mo lava feafeaʼi hatatou fai te faʼahi ʼaia, ʼe lagi ʼaoga anai kia tatou ke tou fakamahino pe koteā te fakamolemole. Ko tatatou ʼiloʼi lelei pe koteā te fakamolemole, ʼe tokoni anai kia tatou ke tou fakamolemole mokā agahala mai ʼihi kia tatou.

4. Koteā te ʼu meʼa ʼaē ʼe mole faka ʼuhiga kiai te fakamolemole, pea koteā tona faka ʼuhiga moʼoni?

⁴ Kapau ʼe tou fakamolemole ki ʼihi te ʼu hala ʼaē neʼe nātou fai mai kia tatou, ʼe mole faka ʼuhiga leva ʼe tou tali peʼe mole tou koviʼia te ʼu meʼa ʼaē neʼe nātou fai; pea ʼe mole faka ʼuhiga ʼe tou tuku ke nātou kākāʼi tatou. ʼE moʼoni, ka fakamolemole mai ia Sehova kia tatou, pea ʼe mole faka ʼuhiga leva ʼe mole ina koviʼia te ʼu agahala ʼaē neʼe tou fai, pea tahi ʼaē meʼa, ʼe mole ina fakagafua anai ki te hahaʼi agahala ke nātou meʼa noaʼi tona manavaʼofa. (Hepeleo 10:29) Ohage ko tona fakamahino ʼi te tohi Auxiliaire pour une meilleure intelligence de la Bible, ko te fakamolemole ʼe ko tatatou “fakamolemole ki he tahi neʼe agahala mai kia tatou; ʼo mole kei tou lotokovi kia ia ʼuhi ko te hala ʼaē neʼe ina fai mai, pea mo ʼaua naʼa tou faiga mālohi ke totogi te kovi ʼaē neʼe fai mai kia tatou.” (Pasina 1135)b ʼE fakahā mai e te Tohi-Tapu te ʼu tupuʼaga lelei ʼaē ʼe tonu ai ke tou fakamolemole ki ʼihi.

He Koʼe Koa ʼe Tonu Ke Tou Fakamolemole Ki ʼIhi?

5. ʼI te koga tohi ʼo Efesi 5:​1, koteā te tupuʼaga maʼuhiga ʼaē ʼe tonu ai ke tou fakamolemole ki ʼihi?

⁵ ʼE fakahā te tupuʼaga maʼuhiga ke tou fakamolemole ki ʼihi ia Efesi 5:1: “Koia, koutou liliu ko he kau faʼifaʼitaki ʼo te ʼAtua, ohage ko he fānau ʼofaina.” Koteā te faʼahiga ʼaluʼaga ʼaē ʼe tonu ke tou “liliu [ai] ko he kau faʼifaʼitaki ʼo te ʼAtua”? Ko te kupu “koia” ʼe ina fakapipiki te ʼu palalau ʼaia ki te vaega ʼaē ʼe tuʼu ʼi muʼa atu, ʼaē ʼe ʼui fēnei ai: “Koutou liliu ʼo feagaleleiʼaki, fonu ʼi te manavaʼofa, ʼo koutou fefakamolemoleʼaki, ohage ko te fakamolemole ʼa te ʼAtua kia koutou ʼaki ia Kilisito.” (Efesi 4:​32) Ei, kapau ʼe tonu ke tou fakamolemole, pea ʼe tonu ke tou faʼifaʼitaki ki te ʼAtua. Ohage ko te kiʼi tamasiʼi tagata ʼaē ʼe fia tatau mo tana tāmai, ʼe tonu ke toe feiā mo tatou, ʼu fānau ʼofaina ʼa Sehova, ke tou hage ko tatatou Tāmai loto fakamolemole ʼaē ʼe ʼi selo. ʼE fiafia moʼoni te loto ʼo Sehova ʼi tana sio ifo ki tana ʼu fānau ʼi te kele, ʼe nātou faiga ke nātou faʼifaʼitakiʼi ia ia ʼo nātou fefakamolemoleʼaki!​—Luka 6:​35, 36; vakaʼi ia Mateo 5:​44-​48.

6. Koteā te kehekehe lahi ʼo te fakamolemole ʼa Sehova pea mo tatatou fakamolemole?

⁶ ʼE moʼoni, ʼe mole feala ke katoa tatatou fakamolemole ohage ko tona fai e Sehova. Kae ʼe ko te tupuʼaga tāfito la ʼaia ʼaē ʼe tonu ai ke tou fefakamolemoleʼaki. Koutou vakaʼi te faʼahi ʼaenī: ʼE lahi ʼaupito te kehekehe ʼo te fakamolemole ʼa Sehova pea mo tatatou fai fakamolemole. (Isaia 55:​7-9) Ka tou fakamolemole kia nātou ʼaē neʼe nātou agahala mai kia tatou, ʼe tou fai ʼi tatatou kua ʼiloʼi ʼaē, ʼe lagi ʼaoga anai kia tatou tanatou fakamolemole ki muli age. Ko te tagata agahala, ʼe fakamolemole tuʼumaʼu ki ai te tahi tagata agahala. Kae ko Sehova, ʼe ko ia tokotahi pe ʼaē ʼe mole hona ʼaoga ke fakamolemole age ki ai he tahi. ʼE ina fakamolemole mai kia tatou, kae ʼe mole ʼaoga anai ʼi he temi ke tou fai fakamolemole age kia te ia. Koia kapau ko Sehova, ʼaē ʼe mole agahala, ʼe feala tana fakamolemole katoa kia tatou ʼaki te ʼofa, pea ʼe mole tonu koa la kia tatou kau agahala ke tou fefakamolemoleʼaki?​—Mateo 6:​12.

7. Kapau ʼe mole tou fia fakamolemole ki ʼihi mokā ʼe feala, pea koteā anai tona ʼu fua kovi ki tatatou ʼu felogoi mo Sehova?

⁷ Tahi ʼaē meʼa ʼe maʼuhiga tāfito, kapau ʼe tou fakafisi ke tou fakamolemole ki ʼihi kae ko he meʼa ʼe feala, pea ʼe feala ke fakatupu kovi ki tatatou ʼu felogoi mo te ʼAtua. ʼE mole kolekole mai e Sehova ke tou fefakamolemoleʼaki, kae ʼe ina fakamaʼua mai ke tou fai te faʼahi ʼaia. Ohage ko tona ʼui ʼi te Tohi-Tapu, ʼe tou fakamolemole ki ʼihi koteʼuhi neʼe kua fakamolemole mai te ʼAtua kia tatou, peʼe tou fakaʼamu ke fakamolemole mai kia tatou. (Mateo 6:​14; Maleko 11:25; Efesi 4:​32; 1 Soane 4:​11) Koia, kapau ʼe mole tou fia fakamolemole ki ʼihi logope la ʼe ko he meʼa ʼe feala ke tou fai, pea ʼe feala koa la hatatou ʼamanaki ke fakamolemole mai te ʼAtua kia tatou?​—Mateo 18:21-​35.

8. He koʼe ʼe fua lelei kia tatou hatatou loto fakamolemole?

⁸ ʼE akoʼi e Sehova ki tana hahaʼi “te ala lelei ʼaē ʼe tonu ke nātou haʼele ai.” (1 Hau 8:​36) Kapau ʼe ina fakatotonu mai ke tou fefakamolemoleʼaki, pea ʼe feala hatatou tui papau ʼe ina fakatotonu mai te faʼahi ʼaia heʼe loto moʼoni ke fua lelei kia tatou. ʼE tonu te fakaloto mālohi ʼaenī ʼa te Tohi-Tapu, “koutou tuku he temi ki te ʼita.” (Loma 12:19) Ko he lotokovi ʼe ko he kavega ʼe faigataʼa tona kātakiʼi ʼi tokita maʼuli. Kapau ʼe tou taupau he lotokovi feiā, mo tou manatu tuʼumaʼu kiai, pea ʼe mole tokalelei anai totatou ʼatamai, pea ʼe puli anai totatou fiafia. Ko te ʼita ʼaē ʼe kita taupau fualoa, ohage ko te maheka, ʼe feala ke fakatupu kovi ki totatou sino. (Tāʼaga Lea 14:30) Pea ʼi tatatou logoʼi te ʼu meʼa fuli ʼaia, ko ia ʼaē neʼe lākahala mai kia tatou, ʼe mole lagi mahino ia kia ia tatatou lotomamahi! ʼE ʼiloʼi lelei e totatou Tupuʼaga, ʼe ʼaoga ke tou fakamolemole ki ʼihi ʼaki he lotolelei ʼo mole tou fai pe te faʼahi ʼaia ke fua lelei kia nātou, kae ke toe fua lelei foki kia tatou. ʼE mahino mai kia tatou, ko te tokoni faka Tohi-Tapu ʼaē ke tou fakamolemole, ʼe ‘ko te ala ʼaē ʼe lelei ke tou haʼele ai.’

“Koutou Haga Fekātakiʼaki”

9, 10. (a) Koteā te ʼu faʼahiga ʼaluʼaga ʼaē ʼe mole ʼaoga ai ke tou ʼamanaki ke faifakalelei mai ʼihi? (b) Koteā te faka ʼuhiga ʼo te kupuʼi palalau ʼaē “koutou haga fekātakiʼaki”?

⁹ Ko te ʼu lavea, ʼe feala ke veliveli peʼe loloto, pea ʼe mole tatau fuli tatatou faʼahiga faitoʼo ʼo te ʼu lavea ʼaia. ʼE toe feiā pe mo te ʼu lavea ʼo totatou loto​—ʼe ʼi ai te ʼu lavea ʼe mole faʼa maʼuhiga pea mo te ʼu lavea loloto. ʼE tonu koa ke tou faka maʼuhigaʼi fau he kiʼi fihifihia ʼi tatatou ʼu felogoi mo ʼihi? Ko te ʼu kiʼi meʼa veliveli ʼaē ʼe feala ke kita ʼita ai, mo te ʼu fakafifihi, pea mo he ʼu aga ʼe mole tou leleiʼia, ʼe mole ʼaoga tuʼumaʼu ke tou kole ki ʼihi ke nātou faifakalelei mai ʼuhi ko te ʼu meʼa ʼaia. Kapau ʼe ʼiloʼi e te hahaʼi, ʼe tou hoko ʼita ʼi he ʼu kiʼi meʼa noa pe pea ʼe tou fakamaʼua tuʼumaʼu ki ʼihi ke nātou faifakalelei mai ke feala hatatou toe felogoi lelei mo nātou, pea ʼe tonu anai ke nātou aga fakaʼeteʼete mokā nātou felogoi mo tatou​—peʼe ke ʼaua naʼa nātou fakakaugā mo tatou!

¹⁰ Kae ʼe lelei age hatatou “taupau he matagafua ʼo he tahi ʼe aga fakapotopoto.” (Filipe 4:5, Phillips) ʼE tou ʼiloʼi ʼi totatou ʼuhiga kau agahala ʼaē ʼe tauhi fakatahi, ʼi ʼihi temi ko he ʼu tēhina ʼe nātou fakatupu ʼita anai kia tatou, pea ʼe toe feala foki ke toe feiā mo tatou kia nātou. ʼE tou maʼu te tokoni ʼaenī ia Kolose 3:​13: “Koutou haga fekātakiʼaki.” Ko tona faka ʼuhiga, ʼe tonu ke tou aga faʼa kātaki ki te hahaʼi, ʼo tou tali tanatou ʼu faʼahiga aga ʼaē ʼe mole tou leleiʼia peʼe ko te ʼu meʼa ʼaē ʼe fakatupu ʼita kia tatou. Ko te faʼahiga kātaki pea mo loto lolomi ʼaia, ʼe ko he ʼu tokoni ke tou fakatokatoka te ʼu kiʼi hala ʼaē ʼe hoko ʼi tatatou ʼu felogoi mo ʼihi​—pea ʼe tou taupau anai te tokalelei ʼo te kokelekasio.​—1 Kolonito 16:14.

Ka Loloto Te ʼu Lavea

11. Ka agahala ʼihi kia tatou, koteā te meʼa ʼaē ʼe feala ke tokoni kia tatou ke tou fakamolemole kia nātou?

¹¹ Kae e feafeaʼi mo kapau ʼe agahala ʼihi kia tatou, ʼo fakatupu ai he lavea loloto? Kapau ʼe mole mamafa fau te agahala, pea ʼe mole faigataʼa anai hatatou maʼuliʼi te tokoni faka Tohi-Tapu ʼaē ʼe ina ʼui ‘ke tou fefakamolemoleʼaki.’ (Efesi 4:​32) Ko te faʼahiga fakamolemole gafua ʼaia ʼe ʼalutahi mo te ʼu palalau ʼaē neʼe fai e Petelo ʼaki te laumālie maʼoniʼoni: “Kae ko te meʼa ʼaē ʼe maʼuhiga tāfito, ke mālohi takotou feʼofaʼofani, heʼe ko te ʼofa ʼe ina ʼuʼufi te tuʼuga agahala.” (1 Petelo 4:8) Kapau ʼe tou manatuʼi ko tatou ko te kau agahala, pea ʼe feala anai hatatou ʼuʼufi te ʼu agahala ʼa ʼihi. Koia, ka tou fakamolemole pea ʼe tou līaki totatou lotokovi, ka mole tou taupau. Ko te meʼa ʼaē ʼe hoko ʼaki, ʼe mole fakatupu kovi anai ki tatatou ʼu felogoi mo ia ʼaē neʼe faihala, pea ʼe tou taupau anai te tokalelei ʼaē ʼe maʼuhiga ki te kokelekasio. (Loma 14:19) ʼAki te temi, ʼe mole lagi tou manatuʼi anai te kovi ʼaē neʼe fai mai kia tatou.

12. (a) Koteā te fakatuʼutuʼu ʼaē ʼe lagi tonu anai ke tou fai moʼo fakamolemole ki he tahi neʼe tupu ai hatatou lotomamahi? (b) ʼE hā feafeaʼi mai ia Efesi 4:​26, ʼe tonu ke tou foimo fakatokatoka te ʼu fihifihia?

¹² Kae ʼe feafeaʼi anai mo kapau ʼe agahala mamafa mai he tahi kia tatou, ʼo fakatupu mamahi ʼaupito kia tatou? Ohage la, ko he kaumeʼa neʼe koutou falala ki ai neʼe lagi ina fakahā ki ʼihi he ʼu meʼa neʼe koutou fakahā age ki ai ka mole koutou loto ke ʼiloʼi e he tahi kehe. Koia, ʼe koutou mamahi ʼaupito, mo lotohoha, pea ʼe hage neʼe kākāʼi koutou. Neʼe koutou faigaʼi ke koutou galoʼi te faʼahi ʼaia, kae ʼe koutou manatuʼi tuʼumaʼu te kovi ʼaē neʼe fai kia koutou. Kapau ʼe feiā, pea ʼe lagi tonu anai ke koutou fai he ʼu fakatuʼutuʼu ke koutou fakatokatoka te fihifihia ʼaia, ʼo lagi tonu anai ke koutou palalau mo ia ʼaē neʼe ina fakatupu te kovi ʼaia. ʼE ko he aga fakapotopoto anai mo kapau ʼe koutou fai te faʼahi ʼaia ʼi te kei maʼamaʼa ʼo te fihifihia ʼaia. Neʼe fakaloto mālohiʼi tatou e Paulo ʼo ina ʼui fēnei: “Koutou ʼiʼita, kae ʼaua naʼa koutou agahala [ko tona faka ʼuhiga, ke ʼaua naʼa tou taupau he lotokovi peʼe tou fai he meʼa kovi ʼuhi ko tatatou ʼita]; ke ʼaua naʼa tō te laʼā ki tokotou ʼita.” (Efesi 4⁠:26) ʼE mahino mai kia tatou te mālohi ʼo te tokoni ʼaia ʼa Paulo ʼi tatatou ʼiloʼi ʼaē, ki te kau Sutea, ko te tō ʼo te laʼā neʼe faka ʼuhiga ki te fakaʼosi ʼo te ʼaho pea mo te kamata ʼo te tahi ʼaho. Koia, ʼe tonu ke tou tokagaʼi te tokoni ʼaenī: Tou foimo fakatokatoka te fihifihia ʼaia!​—Mateo 5:​23, 24.

13. Koteā tatatou fakatuʼutuʼu mokā tou fai palalau anai mo he tahi neʼe agahala mai kia tatou, pea koteā te meʼa ʼaē ka tokoni anai kia tatou ke tou fai te faʼahi ʼaia?

¹³ ʼE tonu ke feafeaʼi tatatou felogoi mo ia ʼaē ʼe tupu ai tatatou lotomamahi? ʼE ʼui fēnei ia 1 Petelo 3:​11, “[koutou] kumi te tokalelei pea [mo koutou] haga muliʼi.” ʼAki te faʼahiga manatu ʼaia, ʼe koutou faiga anai ke koutou tokalelei mo tokotou tēhina ka mole koutou fakahā ʼe koutou ʼita. Moʼo fakahoko ʼo te faʼahi ʼaia, ʼe lelei anai ke ʼaua naʼa koutou fai he ʼu palalau peʼe ko he ʼu aga fefeka; heʼe toe fefeka anai mo te tali ʼa te tēhina pe ko te tuagaʼane. (Tāʼaga Lea 15:18; 29:11) Tahi ʼaē meʼa, ʼaua naʼa koutou fai he ʼu palalau ohage la ko te ʼu palalau ʼaenī, “ ʼE ke fai tuʼumaʼu te meʼa ʼaē . . . !” peʼe tou ʼui “ ʼE mole ke fai te meʼa ʼaē . . . !” Ko te taʼi faʼahiga palalau ʼaia ʼe lagi ina uga anai ia ia ke ina fai he ʼu palalau fefeka moʼo hāofaki ʼoʼona. Kae ʼaki he ʼu palalau mālū pea mo agalelei, koutou fakahā ʼe koutou fia fakatokatoka te fihifihia ʼaē neʼe tupu ai takotou lotomamahi. Koutou fakamahino fakalelei peʼe lave feafeaʼi te faʼahi ʼaia kia koutou. Koutou tuku ke fakahā atu e tokotou tēhina pe ko tokotou tuagaʼane pe koʼe neʼe ina fai te aga ʼaia. Koutou fakalogo ki te ʼu meʼa ʼaē ʼe ina fia tala atu kia koutou. (Sake 1:​19) Koteā anai tona fua lelei? ʼE fakamahino fēnei ia Tāʼaga Lea 19:11: “Ko te fakasiosio poto ʼa he tagata, ʼe mahino ia ʼe ina fakatuai tona ʼita, pea ʼe ko he meʼa matalelei kia ia hana fakamolemole te agahala.” Kapau ʼe tou faiga ke tou mahino ki te ʼu meʼa ʼaē ʼe logoʼi e ʼihi ʼi tonatou loto pea mo te ʼu meʼa ʼaē neʼe tupu ai tanatou fai ʼo te ʼu aga ʼaia, pea ʼe tou tekeʼi anai te ʼu manatu kovi pea mo te lotokovi ʼaē neʼe tou maʼu ʼo ʼuhiga mo nātou. Kapau ʼe tou palalau mo totatou tēhina ʼaki te fakatuʼutuʼu ʼaē ke tou taupau tuʼumaʼu te tokalelei, pea ʼe lagi feala anai ke tou mahino ai ki te ʼu meʼa ʼaē neʼe mole lagi tou mahino kiai, ʼo tou faifakalelei, pea mo tou fakamolemole ki ai.

14. Ka tou fakamolemole ki ʼihi, koteā te faka ʼuhiga ʼo te ʼui ʼaē ʼe tonu ke tou galoʼi?

¹⁴ Ko te fakamolemole ki ʼihi, ʼe ina faka ʼuhiga koa ʼe tonu ke tou galoʼi moʼoni te ʼu meʼa ʼaē neʼe hoko? Koutou manatuʼi te faʼifaʼitaki ʼa Sehova ʼaē neʼe tou talanoa kiai ʼi te ʼuluaki alatike. Ka ʼui e te Tohi-Tapu ʼe galoʼi e Sehova tatatou ʼu agahala, ʼe mole faka ʼuhiga leva, ʼe mole feala hana toe manatuʼi te ʼu hala ʼaia. (Isaia 43:25) Kae ko tona faka ʼuhiga, kapau ʼe ina fakamolemole he agahala, pea ʼe mole ina taupau te agahala ʼaia ke feala hana fakamāuʼi ʼaki tatou ki muli age. (Esekiele 33:14-​16) ʼE toe feiā pe mo tatou kau agahala, kapau ʼe tou fakamolemole ki ʼihi, ʼe mole faka ʼuhiga leva, ʼe mole feala anai hatatou toe manatuʼi te ʼu meʼa ʼaē neʼe nātou fai mai. Kae ʼe feala hatatou galoʼi, ko tona faka ʼuhiga, ʼe mole tou toe taupau te hala ʼaē neʼe fai mai kia kita ke tou fakafihiʼi, peʼe tou toe lagaʼi mokā hoko he fihi ki muli age. Koia, kapau kua fakatokatoka te fihifihia ʼaia, pea ʼe mole ko he agalelei hatatou muhumuhu ʼo ʼuhiga mo te faʼahi ʼaia; pea ʼe mole ko he agaʼofa mo kapau ʼe tou fakafisi ke tou fakakaugā mo te Kilisitiano ʼaia, ʼo tou faka ʼuhiga ia ia ohage ko he tēhina pe ko he tuagaʼane ʼe kua fakamavae. (Tāʼaga Lea 17:9) ʼE moʼoni, ʼe lagi tonu anai ke fakalaka he temi loaloaga ke tou toe vāhaʼa lelei ai mo ia; pea ʼe mole lagi toe lelei anai ohage ko te temi muʼa. Kae ʼe kei tou ʼofa ki ai, heʼe ko totatou tēhina faka Kilisitiano, pea ʼe tou faigaʼi anai ke tou vāhaʼa lelei mo ia.​—Vakaʼi ia Luka 17:3.

Ka Mata Faigataʼa He Fakamolemole

15, 16. (a) ʼE fakamaʼua koa ki te kau Kilisitiano ke nātou fakamolemole ki he tahi neʼe agahala kae ʼe mole fia fakahemala? (b) ʼE lava feafeaʼi hatatou maʼuliʼi te pelesepeto ʼo te Pesalemo 37:8?

¹⁵ Kae e feafeaʼi mo kapau ʼe agahala mai he tahi kia kita ʼo tupu ai hakita lotomamahi ʼaupito, pea ʼe mole ina fakamoʼoni ki tana agahala mai kia kita, mo fakahemala, pea ʼe mole faifakalelei? (Tāʼaga Lea 28:13) ʼE fakahā lelei mai e te Tohi-Tapu, ʼe mole fakamolemole ia Sehova ki te kau agahala ʼaē ʼe mole nātou fakahemala pea mo nātou loto fefeka. (Hepeleo 6:​4-6; 10:26, 27) E feafeaʼi ʼo ʼuhiga mo tatou? Ko te tohi Auxiliaire pour une meilleure intelligence de la Bible ʼe ina ʼui fēnei: “ ʼE mole fakamaʼua ki te kau Kilisitiano ke nātou fakamolemole kia nātou ʼaē ʼe nātou agahala ʼi tonatou loto faʼifaʼitaliha ʼaki he aga kākā pea ʼe mole nātou fia fakahemala. Ko te taʼi hahaʼi ʼaia ʼe nātou liliu ko he ʼu fili ʼa te ʼAtua.” (Pasina 1135) ʼE mole fakamaʼua ki he Kilisitiano neʼe fai ki ai he aga heʼe faitotonu, peʼe kovi ʼaupito, ke ina fakamolemole kia ia ʼaē neʼe agahala ki ai pea ʼe mole fia fakahemala.​—Pesalemo 139:21, 22.

¹⁶ ʼE mahino ia, ko nātou ʼaē neʼe gaohi koviʼi, ʼe lagi nātou lotomamahi pea mo ʼiʼita. Kae koutou manatuʼi, kapau ʼe koutou taupau tokotou ʼita pea mo tokotou lotokovi, pea ʼe feala ke fakatupu mamahi ʼaupito kia koutou. Kapau ʼe tou haga ʼamanaki ke faifakalelei mai he tahi kia tatou ka mole ina fai, pea ʼe ʼāsili anai totatou lotomamahi. Kapau ʼe tou manatuʼi tuʼumaʼu te kovi ʼaē neʼe fai mai kia tatou, pea ʼe tou ʼāsili ʼita ai anai, pea ʼe fakatupu kovi anai kia tatou ʼi te faʼahi fakalaumālie mo te faʼahi fakasino, pea mo fakatupu kovi ki totatou loto. ʼI tona fakahagatonu, ʼe tou tuku ia ia ʼaē neʼe agahala mai kia tatou, ke hoko atu tana fakatupu mamahi kia tatou. ʼE fai e te Tohi-Tapu te tokoni fakapotopoto ʼaenī kia tatou: “Situʼa ki te ʼita pea mo līaki te fakafutafuta.” (Pesalemo 37:8) Kae ʼaki te temi, neʼe feala ki ʼihi Kilisitiano ke nātou fakamolemole, ko tona faka ʼuhiga, neʼe mole kei nātou lotokovi​—neʼe mole nātou faka ʼuhigaʼi te meʼa kovi ʼaē neʼe hoko kia nātou ko he kiʼi meʼa noa pe, kae neʼe mole kei nātou fia mamahi ʼuhi ko he loto ʼita. ʼI tanatou tuku katoa te fihifihia ʼaia ki te ʼAtua ʼo te faitotonu, neʼe fakafimālieʼi nātou pea nātou hoko atu tonatou maʼuli, ohage neʼe mole hoko kia nātou he meʼa kovi.​—Pesalemo 37:28.

17. Koteā te meʼa fakaloto fīmālie ʼaē ʼe tou maʼu ʼi tatatou lau te fakapapau ʼa Sehova ia Fakahā 21:4?

¹⁷ ʼI te tuʼu ʼo te ʼu faʼahiga meʼa ʼaenī, ʼe mole lagi feala anai hatatou galoʼi katoa he meʼa kovi ʼaupito neʼe fai mai kia tatou. Kae ʼe fakapapau mai e te ʼAtua he tuʼu foʼou “ ʼe ina holoholoʼi [ai] anai te ʼu loʼimata fuli pe ʼi [ʼotatou] mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.” (Fakahā 21:4) Tatau aipe pe koteā te ʼu meʼa ʼaē ʼe tou manatuʼi anai ʼi te temi ʼaia, ʼe mole fakatupu mamahi anai ki totatou loto, ohage ko tona hoko ʼi te temi ʼaenī.​—Isaia 65:17, 18.

18. (a) He koʼe ʼe ʼaoga ke tou loto fakamolemole ʼi totatou ʼu vāhaʼa mo totatou ʼu tēhina mo tuagaʼane? (b) Mokā agahala ʼihi kia tatou, ʼe lava feafeaʼi hatatou fakamolemole kia nātou pea mo tou galoʼi? (c) Koteā tona ʼu fua lelei kia tatou mo kapau ʼe tou fai te faʼahi ʼaia?

¹⁸ Kae ʼi tatatou talitali ki te fakahoko ʼo te ʼu meʼa ʼaia, ʼe tonu ke tou maʼuʼuli pea mo gāue fakatahi fuli, ohage ko he ʼu tēhina mo tuagaʼane ʼe heʼe haohaoa, ko he kau agahala. Ko tatou fuli, ʼe feala ke tou lākahala. ʼI ʼihi temi, ʼe tou fefakatupu mamahi ʼaki pea mo tou fefakaloto mamahi ʼaki. Neʼe kua mahino lelei kia Sesu, ʼe tonu anai ke tou fakamolemole ki ʼihi, “[ʼo] mole kaku ki te tuʼa fitu, kaʼe ki te tuʼa fitugofulu-ma-fitu”! (Mateo 18:22) ʼE moʼoni, ʼe mole feala hatatou fakamolemole katoa, ohage ko tona fai e Sehova. Kae kapau ʼe agahala mai totatou ʼu tēhina kia tatou, pea ʼe feala ke tou fakamolemole kia nātou, ʼi tona faka ʼuhiga ʼaē ke tou tauʼi te lotokovi, pea ʼe feala ke tou galoʼi ʼo mole tou taupau te agakovi ʼaia ke tou toe lagaʼi liuliuga ki muli age mokā hoko he tahi fihifihia. Kapau ʼe tou fakamolemole pea mo tou galoʼi, pea ʼe mole gata ʼaki pe anai tatatou taupau ia te tokalelei ʼo te kokelekasio, kae ʼe tou toe taupau foki anai mo te tokalelei ʼo totatou ʼatamai pea mo totatou loto. Kae ko te meʼa ʼaē ʼe maʼuhiga tāfito, ʼe tou maʼu anai te tokalelei ʼaē ʼe feala ke foaki ʼāteaina mai e Sehova, totatou ʼAtua ʼofa.​—Filipe 4⁠:⁠7.

[Nota ʼi te lalo pasina]

Te ʼu Fehuʼi Fakamanatu

◻ He koʼe ʼe tonu ke tou loto fakamolemole?

◻ Koteā te ʼu faʼahiga ʼaluʼaga ʼaē ʼe tonu ai ke tou “haga fekātakiʼaki”?

◻ Kapau neʼe tou lotomamahi ʼaupito ʼuhi ko te ʼu agahala ʼa ʼihi, koteā te meʼa ʼaē ʼe feala ke tou fai moʼo fakatokatoka ʼo te fihifihia ʼaia ʼi te tokalelei?

◻ Ka tou fakamolemole ki ʼihi, koteā te faka ʼuhiga ʼo te ʼui ʼaē ʼe tonu ke tou galoʼi?

[Paki ʼo te pasina 16]

Kapau ʼe tou lotokovi, ko ia ʼaē neʼe fakatupu mamahi mai kia tatou, ʼe mole ina ʼiloʼi totatou mamahi

[Paki ʼo te pasina 17]

Kapau ʼe koutou palalau mo he tahi moʼo taupau te tokalelei, pea ʼe faigafua anai te fakatokatoka ʼo te femahinohalaʼaki