He ʼu Fakafiafia ʼe Leleiʼia e Sehova

Ko Sehova ʼe ko te “ʼAtua fiafia.” (1 Timoteo 1:11) ʼE ina loto ke tou toe maʼuli fiafia mo tatou. ʼE fiafia moka sio mai ʼe tou toʼo he temi ke tou malolo ai pea mo fakafiafia. ʼI te kapite ʼaeni, ʼe tou vakaʼi anai pe feafeaʼi hatatou fakaʼaogaʼi ʼotatou kiʼi temi malolo ke fua lelei kia tatou pea ke fiafia ai Sehova.

1. Kotea ʼae ʼe tonu ke tou manatuʼi moka tou fakatuʼutuʼu ke tou malolo muʼa?

Kotea ʼae ʼe ke fia fai? Ko ʼihi ʼe natou fia nonofo feia pe ʼi fale, lautohi, fakalogo musika, sioʼi he ʼata mo olo ki te Neti. Pea ko ʼihi ʼe natou fia haʼele lalo mo ʼonatou kaumeʼa mo kauga pea mo faigaoʼi fakatahi. Kotea pe te meʼa ʼae ʼe tou leleiʼia, kae ʼe tonu ke tou tokakaga ‘ke leleiʼia e te ʼAliki.’ (Efeso 5:10) ʼE maʼuhiga te faʼahi ʼaia, he ʼe lahi te ʼu meʼa ʼe tou leleiʼia mo fia fai ki ai, ʼe maʼu ai he meʼa ʼe fehiʼa ki ai Sehova. Ohage ko te agamalohi, te ʼu aga heʼe ʼaoga peʼe ko te gaohi meʼa faifakalauʼakau. (Lau ia Pesalemo 11:5.) Kotea ʼae ʼe tokoni mai ke tou filifili lelei te ʼu meʼa ʼae ʼe tou leleiʼia mo fia fai?

Kapau ʼe ʼoʼofa ʼotatou kaumeʼa ia Sehova, ʼe natou tokoni lelei mai anai pea mo uga tatou ke tou filifili te ʼu meʼa ʼae ʼe leleiʼia e Sehova. Ohage ko tatatou vakaʼi ʼi te kapite 48 “ko ia ʼae ʼe haʼele mo te kau popoto ʼe liliu anai ʼo poto.” Kae ko ʼae ʼe fakatahi mo te ʼu hahaʼi ʼae ʼe mole ʼoʼofa ʼi te ʼu lao ʼa te ʼAtua, ʼe tau anai mo ni “faigataʼaʼia.”—Taʼaga Lea 13:20.

2. He koʼe ʼe tonu ke tou tokakaga ki te temi ʼae ʼe tou malolo ai?

Ka tou filifili ia he meʼa ʼe tou leleiʼia ke tou fai, ʼe tonu ke tou tokakaga naʼa lahi fau te temi ʼae ʼe tou tuku ki ai. Kapau ʼe mole tou tokakaga pea ʼe mole kei maʼu anai he temi ki te ʼu gaue maʼuhiga. ʼE ui mai ʼi te Tohi-Tapu ke tou “fakaʼaogaʼi lelei [totatou] temi.”—Lau ia Efeso 5:15, 16.

TA FAKALOLOTO

Ta vakaʼi pe feafeaʼi te filifili leleiʼi ʼo te ʼu meʼa ʼae ʼe tou leleiʼia mo fia fai.

3. Tou liʼaki te ʼu meʼa ʼae ʼe fehiʼa ki ai te ʼAtua

He koʼe ʼe tonu ke tou filifili lelei te ʼu meʼa ʼae ʼe tou leleiʼia mo fia fai? Vakaʼi te ʼATA VITEO, pea fai te ʼu fehuʼi ʼae ʼe hoa mai.

ʼATA VITEO: Ko Te ʼu Fakafiafia Fea ʼAe ʼe Tonu Ke Au Filifili? (4:39)

• Kotea ʼae ʼe tatau ai te ʼu gaoʼi ʼo te kau Loma ʼi te temi muʼa mo ʼihi fakafiafia ia ʼaho nei?

• Kotea te ako neʼe maʼu e Danny ʼo ʼuhiga mo te ʼu fakafiafia?

Lau ia Loma 12:9, pea fai te fehuʼi ʼaeni:

• ʼE tokoni feafeaʼi atu anai te vaega ʼaeni ki te filifili ʼo tau ʼu fakafiafia?

Kotea te ʼu aluʼaga ʼe fehiʼa ki ai Sehova? Lau ia Taʼaga Lea 6:16, 17 mo Kalate 5:19-21. Hili te lau ʼo te ʼu vaega takitahi, pea fai te fehuʼi ʼaeni:

• Kotea te ʼu aluʼaga ʼe talanoa ki ai te ʼu vaega ʼaeni ʼe ke sio ki ai ʼi te ʼu fakafiafia ia ʼaho nei?

ʼI muʼa ʼo hau filifili he fakafiafia

Fai te ʼu fehuʼi ʼaeni:

• Kotea ʼae ʼe tonu ke au fai? ʼE maʼu ai koa he ʼu meʼa ʼe fehiʼa ki ai Sehova?

• Ko te temi fea ʼae ʼe au fai ai? ʼE lahi fau koa te temi ʼae ʼe au tuku ki ai kae tuku te ʼu gaue ʼae ʼe maʼuhiga?

• Ko ai ʼae ʼe tonu ke au fakafiafia mo ia? ʼE au fakatahi tuʼumaʼu anai koa mo ni hahaʼi ʼe mole ʼoʼofa ia Sehova?

Ka kita fia puipui kita ʼe tonu ke kita fakamamaʼo mai te tuʼutamaki. Koia ʼe tonu ke tou fakamamaʼo mai te ʼu fakafiafia kovi fuli

4. Tou fakaʼaogaʼi lelei totatou temi

ʼATA VITEO: ʼE Ko Koe Koa ʼAe ʼe Pule Ki Tou Temi? (2:45)

• Neʼe mole sioʼi e te tehina he meʼa ʼe kovi, kae kotea tona fihifihia?

Lau ia Filipe 1:10, pea fai te fehuʼi ʼaeni:

• ʼE tokoni feafeaʼi mai te vaega ʼaeni ke tou fakafuafua te temi ʼae ʼe tou fakafiafia ai?

5. Tou filifili he ʼu fakafiafia lelei

ʼE ʼi ai ʼihi fakafiafia ʼe mole leleiʼia e Sehova kae ʼe lahi ʼihi fakafiafia ʼe lelei. Lau ia Ekelesiasi 8:15 mo Filipe 4:8, pea fai te fehuʼi ʼaeni:

• Kotea te ʼu fakafiafia ʼe lelei ʼe ke fia fai ai?

MANATU TAFITO

ʼE loto e Sehova ke tou filifili he ʼu fakafiafia ʼe fua lelei kia tatou pea mo maʼa.

Fehuʼi Fakamanatu

• Ko te ʼu faʼahiga fakafiafia fea ʼe tonu ke liʼaki e he Kilisitiano?

• He koʼe ʼe tonu ke tou tokakaga ki te temi ʼae ʼe tou fakafiafia ai?

• He koʼe ʼe ke fia filifili he ʼu fakafiafia ʼe leleiʼia e Sehova?

TE TAHI ʼU MANATU

Ko ai ʼae ʼe tonu ke tukugakoviʼi moka tou filifili ʼatatou fakafiafia?

“ʼE Kotou Tapuʼi Koa ʼIhi ʼu ʼAta, Peʼe Ko He ʼu Tohi, Peʼe Ko He ʼu Hiva?” (Alatike ʼi te jw.org)

He ʼu manatu ʼaoga ke tou filifili lelei ʼatatou fakafiafia.

“ʼE Fua Lelei Koa Kiā Koutou Takotou ʼu Fakafiafia?” (Ko Te Tule Leʼo ʼaho 1 ʼo Oketopeli 2011)

Vakaʼi te biographie “J’ai même surmonté mes préjugés” ko he hisitolia ʼa he tagata neʼe ina fetogi tana faʼahiga fakafiafia.

“La Bible transforme des vies” (Ko Te Tule Leʼo [Fakafalani] ʼaho 1 ʼo Fepualio 2010)

Kotea te meʼa neʼe fai e he faʼe ʼi tana sioʼi he ʼata neʼe ʼi ai he ʼu meʼa faifakalauʼakau.

Liʼaki Te ʼu Fakafiafia ʼe Maʼu Ai Ni Meʼa Faifakalauʼakau (2:02)