ʼE Koutou “Totogi Koa Te Temi Faigamālie”?
NEʼE tokoniʼi fēnei e te ʼapositolo ko Paulo te kau Kilisitiano ʼo Efeso ʼo te ʼuluaki sēkulō: “Koutou tokakaga fakalelei ki takotou faʼahiga haʼele: ke ʼaua naʼa hage ko he kau vavale, kae ke hage ko ni kau popoto, ʼo koutou totogi maʼa koutou te temi faigamālie, koteʼuhi kua kovi te ʼu ʼaho.” (Efeso 5:15, 16, MN ) He koʼe koa neʼe maʼuhiga te tokoni ʼaia? Moʼo tali ki te fehuʼi ʼaia, ʼe tonu muʼa ke tou mahino ki te ʼu ʼaluʼaga ʼaē neʼe tau mo te kau Kilisitiano ʼi te kolo ʼāfea ʼaia.
Neʼe ʼiloa te kolo ʼo Efeso ʼuhi ko tona ʼu koloā maʼuhiga, mo te ʼu felāveʼi fakasino fakavalevale, mo te maumauʼi ʼo te lao, pea mo te ʼu meʼa fakatemonio. Pea tahi ʼaē meʼa, neʼe tonu ki te kau Kilisitiano ke nātou tauʼi te faʼahiga manatu faka filosofia ʼo ʼuhiga mo te temi. Neʼe mole tui te kau Keleka ʼaē mole ko he kau Kilisitiano, ko te temi ʼe ʼalu tuʼumaʼu ki muʼa. Neʼe akoʼi e te filosofia Keleka ko te temi ʼe femafulifuliʼaki ʼo talu ai. Ko ia ʼaē neʼe pulinoa tona temi ʼi he faʼahiga maʼuli, neʼe feala pe hana toe liliu mai ʼo fetogi atu ʼi te tahi temi. Ko te faʼahiga manatu ʼaia neʼe feala pe hana taki te kau Kilisitiano ʼo Efeso ke nātou fakaʼaoʼaoganoa ʼo ʼuhiga mo te ʼu meʼa ʼaē neʼe fakatuʼutuʼu ʼi te kaletalio ʼa Sehova, ʼo kau kiai mo te fakamāu fakaʼatua ʼaē kua fakakatofa. Koia neʼe ʼaoga ai te tokoni ʼa Paulo ʼo ʼuhiga mo te ‘totogi ʼo te temi faigamālie.’
Neʼe mole palalau ia Paulo ki te temi ʼi tona ʼaluʼaga māhani. Ko te kupu faka Keleka ʼaē neʼe ina fakaʼaogaʼi, ʼe faka ʼuhiga ki he temi kua fakakatofa, moʼo fakahoko ai he fakatuʼutuʼu. Neʼe tokoni ia Paulo ki te kau Kilisitiano ʼo te ʼuluaki sēkulō ke nātou fakaʼaogaʼi fakapotopoto tonatou temi faigamālie, peʼe ko te temi ʼaē ʼe kei nātou fīmālie ai, ʼi muʼa ʼo te hoko mai ʼo te fakaʼosi pea mo te fakagata ʼo te manavaʼofa fakaʼatua, pea mo te toʼo ʼo te faigamālie ʼo ʼuhiga mo te hāofaki.—Loma 13:11-13; 1 Tesalonika 5:6-11.
ʼE tou maʼuʼuli ʼi te faʼahiga temi ʼe tatau mo ia ʼaia. ʼE mole maumauʼi anai e te kau Kilisitiano te temi faigamālie ʼaenī ʼe mole toe maʼu anai, ʼo nātou faiga ki te ʼu fakafiafia ʼo te mālama, kae ʼe nātou fakapotopoto anai ʼo fakaʼaogaʼi te temi faigamālie ʼaia moʼo fakahoko he ʼu “gāue ʼe fakaʼiloga ʼaki [tanatou] pipiki ki te ʼAtua,” pea mo fakamālohiʼi tanatou ʼu felogoi mo te Tupuʼaga, ia Sehova ʼAtua.—2 Petelo 3:11, MN; Pesalemo 73:28; Filipe 1:10.