ʼE Maʼuli Te Folafola ʼa Sehova
Ko He ʼu Puani ʼAoga ʼo Te ʼu Tohi Ki Te Kau Kalate, Mo Te Kau Efesi, Mo Te Kau Filipe, Pea Mo Te Kau Kolose
ʼI TANA logo ʼaē neʼe fakahēʼi ʼihi kau Kilisitiano mai te tauhi maʼa ʼuhi ko te ʼu akonaki hala ʼa te kau Sutea, neʼe fai e te ʼapositolo ko Paulo ia he tohi mālohi “ki te ʼu kōkelekāsio ʼo Kalate.” (Kal. 1:2) Neʼe ina tohi ʼi te lolotoga ʼo te taʼu 50 ki te taʼu 52 ʼo totatou temi, ʼe maʼu ʼi te tohi ʼaia ia he ʼu tokoni fakahagatonu pea mo he ʼu fakalotomālohi.
Hili kiai taʼu e hogofulu, ʼi te temi ʼaē neʼe nofo ʼi Loma ohagē “ko he tagata pilisoni ʼa Kilisito Sesu,” neʼe faitohi ia Paulo ki te ʼu kōkelekāsio ʼi Efesi, mo Filipe pea mo Kolose, ʼo foaki kiā nātou he ʼu tokoni ʼe fakapotopoto pea mo he ʼu fakalotomālohi. (Efe. 3:1) Iā ʼaho nei, ʼe feala ke tou maʼu he ʼu fua lelei ʼi tatatou tokagaʼi ia te logo ʼo te ʼu tohi Fakatohi-tapu ʼo Kalate, mo Efeso, mo Filipe pea mo Kolose.—Hep. 4:12.
‘ ʼE ʼUI E FAITOTONU’—ʼO FEAFEAʼI?
ʼUhi ko te ʼu faiga fakakākā ʼa te hahaʼi lotu Sutea ke natou laukoviʼi ia Paulo, neʼe ina puipui ia tona ʼuhiga ʼapositolo ʼo ina fakahā ʼihi ʼaluʼaga makehe neʼe hoko ʼi tona maʼuli. (Kal. 1:11–2:14) ʼI tana fakafeagai ki tanatou ʼu akonaki hala, neʼe fakamaʼuhigaʼi e Paulo ia te manatu ʼaenī: “Ko he tagata ʼe ʼui ʼe [faitotonu], mole ʼuhi ko tana ʼu gāue ki te lao, kae ʼaki pē tana tui kiā Kilisito Sesu.”—Kal. 2:16.
Ko Sesu neʼe ‘ina fakaʼāteaina ʼaki ia te totogi ia nātou ʼaē neʼe nonofo ʼi te lao’ pea mo ina fakafealagia ke natou fiafia ʼi te ʼāteaina Fakakilisitiano, ko te ʼui ʼaia ʼa Paulo. Neʼe ina foaki ia te fakatotonu mālohi ʼaenī ki te kau Kalate: “Kotou tāʼofi maʼu, pea ʼaua naʼa kotou tuku ke toe haʼisia koutou ʼi te ʼāmoga ʼo te maʼuli pōpula.”—Kal. 4:4, 5; 5:1.
Te ʼu Tali Ki Te ʼu Fehuʼi Fakatohi-tapu:
3:16-18, 28, 29—ʼE kei ʼaoga koa ia te fuakava mo Apalahamo? ʼEī, ʼe kei ʼaoga ia te faʼahi ʼaia. Ko te fuakava ʼo te Lao ʼe ina fakakātoa ia te fuakava mo Apalahamo kae ʼe mole ina fetogi. Koia lā ʼaē neʼe kei ʼaoga ai ia te fuakava mo Apalahamo ʼi te hili ʼo te “fakagata” ʼo te Lao. (Efe. 2:15) Ko te ʼu fakapapau ʼaia ʼe fakahoko ki te “hako” moʼoni ʼo Apalahamo —ʼaē ko Kilisito Sesu tona koga tāfito, pea mo nātou ʼaē “ ʼe ʼa Kilisito.”
6:2—Koteā ia “te lao ʼa Kilisito”? ʼI te lao ʼaia ʼe maʼu ai ia te ʼu akonaki pea mo te ʼu fakatotonu fuli ʼa Sesu. ʼE maʼu ai te fakatotonu tāfito ʼaē ke tou “feʼofaʼofani.”—Soa. 13:34.
6:8—ʼE feafeaʼi hatatou ‘tō ʼuhi ko te laumālie’? ʼE tou fakahoko anai te faʼahi ʼaia ʼo tou tali ke gāue faʼifaʼitaliha ia te laumālie ʼa te ʼAtua ʼi totatou maʼuli. Ko tatatou tō ʼuhi ko te laumālie ʼe toe fakaʼuhiga ki tatatou lagolago fakamālotoloto ki te ʼu gāue ʼaē ʼe hā ai te ʼu fua ʼo te laumālie.
Te ʼu Puani ʼe Tou Lava Tāʼofi:
1:6-9. ʼE tonu ki te kau tagata ʼāfea ke natou gāue fakavilivili mokā malaga he ʼu fihifihia ʼi te kōkelekāsio. ʼAki tanatou fai he ʼu palalau fakapotopoto ʼo fakatafito ki te Tohi-Tapu, ʼe feala anai ke natou foimo fakafihiʼi ia te ʼu manatu hala.
2:20. Ko te totogi, ʼe ko hotatou meʼa ʼofa takitokotahi mai iā Sehova. ʼE tonu ke tou ako ke tou fakaʼuhiga fēia ia te fakatuʼutuʼu ʼaia.—Soa. 3:16.
5:7-9. Ko te ʼu fakakauga kovi ʼe feala ke ‘ina tāʼofi tatatou haga fakalogo ki te moʼoni.’ ʼE tou fakapotopoto anai ʼo tou hola mai iā nātou ʼaia.
6:1, 2, 5. Ko nātou ʼaē ʼe natou maʼu ia “te ʼu kalitātē fakalaumālie” ʼe lagi natou tokoni mai anai ke tou ʼamo ʼo tatatou ʼu ʼāmoga, ohagē ko te fakatokatoka ʼo he fihifihia ʼe tou tau mo ia he neʼe tou lakahala kae mole tou ʼiloʼi. Kae ʼo ʼuhiga leva mo te fakahoko ʼo totatou ʼu maʼua fakalaumālie, ʼe tonu ke tou tahi ʼamo tana ʼāmoga.
‘KO TE FAKATAHIʼI ʼO TE ʼU MEʼA FUAPĒ IĀ KILISITO’
ʼI tana fakamaʼuhigaʼi ia te logotahi Fakakilisitiano ʼi tana tohi ki te kau Efesi, neʼe talanoa ia Paulo “ki he fakatuʼutuʼu, ʼi te fakaʼosi ʼo te ʼu temi ʼaē kua fakakatofa . . . ko te toe fakatahiʼi ia meʼa fuapē iā Kilisito, te ʼu meʼa ʼaē ʼi te lagi pea mo te ʼu meʼa ʼaē ʼi te kele.” Neʼe foaki e Sesu ia “he ʼu meʼa ʼofa ko he ʼu tagata” ke natou tokoni mai ke “tou aʼu [fuli] ki te logotahi ʼi te tui.”—Efe. 1:10; 4:8, 13.
Moʼo fakaʼapaʼapa ki te ʼAtua pea mo fakatuputupu ʼo te logotahi, ʼe tonu ki te kau Kilisitiano ke natou “kofuʼi ia te ʼulugaaga foʼou” pea mo “fefakalogoʼaki pē ʼi te manavasiʼi kiā Kilisito.”—Efe. 4:24; 5:21; 6:11.
Te ʼu Tali Ki Te ʼu Fehuʼi Fakatohi-tapu:
1:4-7—He koʼē neʼe hinoʼi fakatomuʼa ia te kau Kilisitiano fakanofo ʼi muʼa ʼo tanatou tutupu? Neʼe hinoʼi fakatomuʼa nātou ʼi tonatou ʼuhiga kūtuga, peʼe ko he kalasi, kae mole fakaʼuhiga kiā nātou takitokotahi. Neʼe fakatuʼutuʼu te faʼahi ʼaia ʼi muʼa ʼo te kamata tuputupu ʼo te mālama agahala. ʼI te lea fakapolofetā ʼo Senesi 3:15, ʼaē neʼe fai ʼi muʼa ʼo te tupu ʼo te tagata agahala, ʼe fakahā ai ia te fakatuʼutuʼu ʼa te ʼAtua ke ʼi ai ʼihi kau tisipulo ʼa Kilisito ʼe natou pule fakatahi anai mo ia ʼi te lagi.—Kal. 3:16, 19.
2:2—He koʼē ʼe fakatatau ia te manatu ʼo te mālamanei ki te ʼaele, pea ʼe pule feafeaʼi ki te mālamanei? Ko “te manatu ʼo te mālamanei”—te manatu fia faʼitaliha pea mo te talagataʼa—ʼe mafola ohagē ko te ʼaele ʼaē ʼe tou mānava kiai. (1 Ko. 2:12) Ko tana pule, pea mo tona mālohi, ʼe tupu ko tana fakamafola tuʼumaʼu ia he manatu hala ʼi te potu fuli pē pea mo te temi fuli pē.
2:6—ʼE lava feafeaʼi ki te kau Kilisitiano fakanofo hanatou maʼu ia “te ʼu potu ʼi te lagi” kae kei natou nonofo ʼi te kele? Ko te kupuʼi palalau “te ʼu potu ʼi te lagi” ʼe mole fakaʼuhiga ʼi henī ki tanatou fakapapau ʼaē ko te maʼu tofiʼa ʼi te lagi. Kae, ʼe fakaʼuhiga ki tanatou ʼu tuʼulaga fakalaumālie maʼuhiga koteʼuhi kua “fakaʼiloga [nātou] ʼaki te laumālie māʼoniʼoni ʼaē neʼe fakapapauʼi mai.”—Efe. 1:13, 14.
Te ʼu Puani ʼe Tou Lava Tāʼofi:
4:8, 11-15. ‘Neʼe ʼave te kau pōpula’ e Sesu Kilisito, ko tona fakaʼuhiga neʼe ina toʼo mai ia te ʼu tagata ʼaia mai te pule ʼa Satana ʼo ina fakaʼaogaʼi nātou ohagē he ʼu meʼa ʼofa ki te lagalaga ʼo te kōkelekāsio Fakakilisitiano. ʼE feala “ ʼaki te ʼofa, ke tou tuputupu iā meʼa fuli . . . iā Kilisito” ʼaki tatatou fakalogo pea mo talagafua kiā nātou ʼaē ʼe takitaki kiā tātou pea mo lagolago ki te ʼu fakatuʼutuʼu ʼo te kōkelekāsio.—Hep. 13:7, 17.
5:22-24, 33. ʼO hilifaki atu ki tana fakalogo ki tona ʼohoana, ʼe tonu ki te fafine ʼohoana ke fakaʼapaʼapa ki ai. ʼE ina fai ia te faʼahi ʼaia ʼaki tana fakahā ia he “loto tokalelei mo malū” pea ʼaki tana faiga fakamālotoloto ke fakaʼapaʼapa ki ai mokā ina fai he ʼu palalau ʼe lelei ʼo ʼuhiga mo ia pea mo lagolago ki te lava lelei ʼo te ʼu tonu ʼaē ʼe ina fai.—1 Pet. 3:3, 4; Tito 2:3-5.
5:25, 28, 29. Ohagē pē ko tana “fafaga” ia ia totonu, ʼe tonu ki te tagata ʼohoana ke tokaga ki te ʼu meʼa ʼaē ʼe ʼaoga ki tona ʼohoana ʼi te faʼahi fakasino, mo ina tokagaʼi ia te ʼu meʼa ʼaē ʼe ina logoʼi pea mo toe tokoni ki ai ʼi te faʼahi fakalaumālie. ʼE toe maʼua foki ke ina fakapelepeleʼi ʼo ina fakaʼaogaʼi he temi feʼauga ki ai pea mo gaohi fakalelei ia ia ʼi tana ʼu palalau pea mo tana ʼu gāue.
6:10-13. Moʼo tauʼi ʼo te ʼu mālohi fakatemonio, ʼe ʼaoga ke tou lotomālohi ʼo tou kofuʼi te teu tau fakalaumālie ʼa te ʼAtua.
“TOU HAGA HAʼELE FAKALELEI”
Neʼe talanoa tāfito ia Paulo ki te ʼofa ʼi tana tohi ki te kau Filipe. ʼE ina ʼui fēnei: “ ʼE au haga faikole ʼo ʼuhiga mo te potu ʼaenī ʼi ʼaku ʼu faikole: ke ʼāsili tuputupu aipē tokotou ʼofa ʼi he ʼatamai mālama totonu pea mo he fakasiosio totonu ʼe kātoa.” ʼI tana tokoni kiā nātou ke natou tekeʼi ia te falala fau ʼaē kiā kita totonu, ʼe ina fakalotomālohi fēnei: “Kotou haga gāue ki tokotou maʼuli ʼaki te manavasiʼi pea mo te tuʼania.”—Filp. 1:9; 2:12.
Neʼe fakalotomālohiʼi e Paulo ia nātou ʼaē kua fakapotopoto ke natou haga “lele ki te fakatuʼutuʼu ʼo te totogi ʼo te pāui ʼa te ʼAtua.” ʼE ina tala fēnei: “Logopē he faʼahi kua tou aʼu kiai ʼi ʼatatou ʼu faiga, tou haga haʼele fakalelei ʼi te fai pē ʼaia.”—Filp. 3:14-16.
Te ʼu Tali Ki Te ʼu Fehuʼi Fakatohi-tapu:
1:23—Koteā “te ʼu meʼa e lua” ʼaē neʼe lākilua kiai ia Paulo, pea koteā “te fakaʼāteaina” ʼaē neʼe loto kiai? ʼUhi ko te ʼu ʼaluʼaga ʼaē neʼe hoko ki ai, neʼe lākilua ia Paulo kiā fealagia e lua neʼe ina maʼu: Ko te maʼuli peʼe ko te mate. (Filp. 1:21) Logopē lā ʼe mole ina tohi peʼe koteā ʼaē neʼe ina filifili, kae neʼe ina fakahā peʼe koteā ʼaē neʼe fakaʼamu kiai—“ko te fakaʼāteaina pea mo te fakatahi mo Kilisito.” (Filp. 3:20, 21; 1 Tes. 4:16) Ko “te fakaʼāteaina” ʼaia ʼi te ʼi henī ʼa Kilisito, ʼe fakaʼuhiga ki te tali e Paulo ia te fakapale ʼaē neʼe teuteuʼi e Sehova maʼa ia.—Mat. 24:3.
2:12, 13—ʼE uga feafeaʼi tātou e te ʼAtua ke tou ‘fia fai pea mo gāue ai’? ʼE feala ki te laumālie māʼoniʼoni ʼo Sehova ke gāue ki totatou loto pea mo totatou ʼatamai ʼo ina fakatuputupu ia tatatou loto ʼaē ke tou faiva ʼi tana gāue. Koia, ʼe ʼi ai totatou tokoni heʼe tou ‘haga gāue ki totatou haofaki.’
Te ʼu Puani ʼe Tou Lava Tāʼofi:
1:3-5. Logolā neʼe natou māsisiva ʼi te faʼahi fakasino, kae neʼe tuku mai e te kau Filipe ia he faʼifaʼitaki lelei kiā tātou ʼo ʼuhiga mo te fakahā ʼo te loto foaki.—2 Ko. 8:1-6.
2:5-11. Ohagē ko tona fakahā mai e te faʼifaʼitaki ʼo Sesu, ko te agavaivai ʼe mole ko he vaivaiʼaga kae ʼe ko he mālohi moʼo fai ia te aga ʼaē ʼe lelei. Pea tahi ʼaē, ʼe vikiʼi e Sehova ia nātou ʼaē ʼe agavaivai.—Taag. 22:4.
3:13. Ko “te ʼu meʼa ʼaē ʼe ʼi muli” ʼe feala ke fakaʼuhiga ki he gāue ʼe totogi lelei, peʼe ko te fīmālie ʼaē ʼe kita maʼu mokā kita kau ki he fāmili ʼe maʼu koloa, peʼe ko he ʼu agahala mamafa neʼe tou fai ki muʼa atu pea kua tou fakahemala kiai pea ‘kua fakamaʼa tātou.’ (1 Ko. 6:11) ʼE tonu ke tou galoʼi ia te ʼu meʼa ʼaia, ko tona fakaʼuhiga, ke tou fakagata ia tatatou tuʼania ʼo ʼuhiga mo te ʼu meʼa ʼaia, pea mo ‘tou haga ki te ʼu meʼa ʼaē ʼi muʼa.’
“KOTOU LILIU ʼO MĀLOHI ʼI TE TUI”
ʼI tana tohi ki te kau Kolose, neʼe fakahā lelei e Paulo ia te ʼu manatu kovi ʼa te kau faiakonaki hala. Neʼe ina fakamahino, ʼe mole fakalogo tonatou haofaki ki te ʼu fakamaʼua ʼo te Lao, kae ki tanatou “nonofo ʼi te tui.” Neʼe fakalotomālohiʼi e Paulo ia te kau Kolose ke natou ‘haga haʼele fakatahi mo Kilisito, ʼo natou tauaka pea mo lagaʼi ake nātou iā te ia, pea kua mālolohi ʼi te tui.’ He koʼē neʼe ʼaoga ke natou mālolohi?—Kol. 1:23; 2:6, 7.
Neʼe tohi fēnei e Paulo: “ ʼO hilifaki ki te ʼu meʼa fuli ʼaia, kotou kofuʼi ia te ʼofa, he ko he noʼo haohaoa ia ki te logo tahi. Pea ke pule te tokalelei ʼo Kilisito ʼi ʼokotou loto.” Neʼe ʼui fēnei age e te ʼapositolo kiā nātou: “Ko he meʼa pē ʼe kotou fai, kotou gāue ʼaki tokotou nefesi kātoa, ohagē ʼe kotou gāue maʼa Sehova, kae mole maʼa te tagata.” ʼO ʼuhiga mo nātou ʼi tuʼa atu ʼo te kōkelekāsio, ʼe ina ʼui fēnei: “Kotou haga haʼele ʼi te fakapotopoto ʼo ʼuhiga” mo nātou.—Kol. 3:14, 15, 23; 4:5.
Te ʼu Tali Ki Te ʼu Fehuʼi Fakatohi-tapu:
2:8—Koteā ia “te ʼu meʼa tāfito ʼo te mālamanei” ʼaē ʼe kole mai e Paulo ke tou nofo tokaga kiai? Ko te ʼu meʼa ʼaia, ʼe ko te ʼu tafitoʼaga ʼo te mālama ʼa Satana—te ʼu manatu peʼe ko te ʼu pelesepeto tāfito ʼaē ʼe faʼufaʼu ʼaki te mālamanei, ʼo fakaʼaogaʼi moʼona takitaki, peʼe ko te faʼahiga manatu ʼaē ʼe ina uga te mālamanei. (1 Soa. 2:16) ʼE kau ki te ʼu faʼahi ʼaia ia te filosofia, te mānumānu koloa pea mo te ʼu lotu hala ʼo te mālamanei.
4:16—He koʼē ʼe mole kau ia te tohi ʼaē ki te kau Laotisea ki te Tohi-Tapu? Heʼe lagi neʼe mole maʼu ʼi te tohi ʼaia ia he ʼu manatu ʼe ʼaoga ki totatou temi, peʼe lagi toe talanoa pē ia ki he ʼu puani neʼe kua talanoa kiai ia te ʼu tohi ʼaē ki muʼa atu.
Te ʼu Puani ʼe Tou Lava Tāʼofi:
1:2, 20. Ko te totogi, ʼaē neʼe foaki e te ʼAtua ʼuhi ko tona finegaloʼofa makehe, ʼe feala ke ina fakamaʼa totatou leʼo ʼo loto pea mo ina foaki mai kiā tātou ia te tokalelei ʼo te loto.
2:18, 23. Ko “te agavaivai loi”—ko he faʼahiga agavaivai ke tokagaʼi kita e niʼihi, ʼo lagi fakafisi ki te ʼu meʼa ʼi te faʼahi fakasino peʼe gaohi koviʼi tokita sino—ʼe ko te agaaga ʼo he tahi ‘ ʼe fia lahi ʼi tana manatu fakatagata.’