Fakafiafia Ia Sehova!

“Koutou fakafiafia tuʼumaʼu ʼi te ʼAliki. ʼE ʼau toe liuga atu: ke koutou fakafiafia!”—Filipe 4:4.

1. He koʼe koa ʼe feala ke tou feʼekeʼaki pe koteā te faka ʼuhiga ʼo te ʼui ʼa Paulo ki te kau Kilisitiano, ʼe tonu anai ke nātou fakafiafia tuʼumaʼu?

ʼI TE temi nei, ʼe feala ke tahitahiga te ʼu tupuʼaga ʼaē ke tou fakafiafia ai. Ko te tagata ʼaē neʼe fakatupu ʼaki te efu, ʼo māʼiape la mo te kau Kilisitiano moʼoni, ʼe nātou felāveʼi mo te ʼu ʼaluʼaga ʼe fakatupu lotomamahi—te mole ʼi ai ʼo he gāue, te mahaki, te mate ʼo he tahi neʼe tou ʼofa mamahi ai, te ʼu fihifihia ʼaē ʼe tupu mai te kehekehe ʼo te natula ʼo te tagata, peʼe ko te fakafeagai ʼo tokita famili peʼe ko ni ʼu kaumeʼa ʼāfea ʼo tatou. Koia, ʼe tonu koa ke tou mahino feafeaʼi ki te tokoni ʼaē ʼa Paulo, ke tou “Fakafiafia tuʼumaʼu”? ʼI tatatou felāveʼi ʼaē mo te ʼu ʼaluʼaga kovi pea mo faigataʼa, ʼe feala koa ke ʼi ai he fakafiafia? Ko he vakaʼi ʼo te ʼu vaega ʼi muʼa pea ki muli mai ʼo te ʼu palalau ʼaia ʼe tokoni anai kia tatou moʼo fakamahino ʼo te faʼahi ʼaia.

Koutou Fakafiafia—Koteā Tona Tupuʼaga Pea e Feafeaʼi?

2, 3. ʼO mulimuli ki te faʼifaʼitaki ʼa Sesu pea mo te kau Iselaelite ʼo te temi muʼa, he koʼe koa ʼe maʼuhiga te fiafia?

² “Koutou fakafiafia tuʼumaʼu ʼi te ʼAliki. ʼE ʼau toe liuga atu: ke koutou fakafiafia!” Ko te faʼahi ʼaia ʼe feala ke ina fakamanatuʼi mai kia tatou te ʼu palalau ʼaenī neʼe fai ki te kau Iselaelite kua hili nei kiai te ʼu sēkulō e 24: “Ko te fiafia ʼa Sehova ʼe ko hokotou tule mālohi,” pea ko te tahi Tohi-Tapu (Moffatt) ʼe ina ʼui fēnei: “Ko te fakafiafia ia Sehova ʼe ko hokotou mālohi.” (Nehemia 8:10) ʼE foaki e te fiafia te mālohi, pea ʼe hage ia ko he tule mālohi ke tou nono ai moʼo maʼu ʼo he fīmālie pea mo te hāofaki. Neʼe ko te fiafia ʼaē neʼe ina faka fealagia kia Sesu logope la ko te tagata haohaoa, ke ina maʼu te loto faʼa kātaki. “ ʼUhi ko te fiafia ʼaē neʼe fakapapau age kia te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” (Hepeleo 12:2) ʼE ʼiloga lelei, ko te fakafiafia mokā ʼe kita felāveʼi mo te ʼu faigataʼaʼia ʼe ko he meʼa maʼuhiga ia ki te maʼuli.

³ Ia muʼa ʼo te hū ki te Kele ʼo te Fakapapau, neʼe fakatotonu age ki te kau Iselaelite te meʼa ʼaenī: “ ʼE tonu anai ke ke fakafiafia ʼo ʼuhiga mo te ʼu meʼa lelei fuli ʼaē neʼe foaki atu e Sehova, tou ʼAtua, kia koe pea mo tou loto fale, kia koe ʼo feiā ki te Levite pea mo te matāpule ʼaē ʼi te lotolotoiga ʼo koe.” Ko te ʼu ikuʼaga ʼo te mole tauhi kia Sehova ʼaki te loto fiafia ʼe kovi anai ia. “Ko te ʼu malaʼia fuli ʼaia ʼe haʼu anai kia te koe, pea ʼe nātou muliʼi anai koe, pea ʼe nātou maʼu anai koe ʼo aʼu ki te temi ʼaē ʼe fakaʼauha anai ai koe . . . ʼi tau mole kaugana ʼaē kia Sehova, tou ʼAtua, ʼaki te loto fiafia ʼo ʼuhiga mo te mahu ʼo te ʼu meʼa fuli.”—Teutalonome 26:11; 28:45-47.

4. Koteā ʼapē ʼe feala ke mole tou fiafia ai?

⁴ Koia ʼaē, ko te toe ʼo te kau fakanofo ia ʼaho nei pea mo tonatou ʼu kaugā fagona ʼaē “ko te tahi ʼu ōvi,” ʼe tonu ke nātou fiafia! (Soane 10:16) ʼAki te toe ʼui ʼaē ʼa Paulo te tokoni ʼaenī, “ ʼe ʼau toe liuga atu,” neʼe ina fakahā te maʼuhiga ʼo te fakafiafia ʼaē ia meʼa lelei fuli neʼe fai e Sehova maʼa tatou. ʼE tou fakafiafia koa ʼi te ʼu meʼa ʼaia? Peʼe lahi fau koa tatatou tokakaga ki te ʼu gāue ʼaē ʼi te ʼaho fuli pe, ʼo feala aipe ke puli ia tatou ʼi ʼihi temi te ʼu tupuʼaga lahi ʼaē ke tou fakafiafia ai? ʼE lahi fau koa te ʼu fihifihia ke nātou māpunuʼi ai tatatou sio ʼaē ki te Puleʼaga pea mo tana ʼu tapuakina? ʼE tou faka fealagia koa ki he tahi age ʼu meʼa—ohage la ko te talagataʼa ki te ʼu lao ʼa te ʼAtua, ko te lotonoa ki te ʼu pelesepeto fakaʼatua, pea mo te meʼa noaʼi ʼo te ʼu maʼua faka Kilisitiano—ke nātou pulihi tatatou fiafia?

5. He koʼe koa ʼe faigataʼa ki he tahi ʼe mole aga fakapotopoto ke fiafia?

⁵ “Ke ʼiloa takotou aga fakapotopoto e te hahaʼi fuape! Kua ōvi mai te ʼAliki.” (Filipe 4:5) Ko he tahi ʼe mole aga fakapotopoto ʼe mole ia ia te fakasiosio poto. ʼE feala pe ke mole tokaga ki tona maʼuli fakasino, ʼo iku aipe foki ki he lotomamahi peʼe ko he tuʼania. Lagi mole heʼeki na tali lelei tona ʼu tuʼakoi pea ke maʼuli ʼo mulimuli pe kiai. ʼE feala pe ke ina fai hana ʼu fakatuʼutuʼu ke māʼoluga fau pea mo faiga ke ina fakahoko kae mole ina sioʼi tona ʼu ikuʼaga. Peʼe feala pe ke ina fakaʼaogaʼi tona ʼu tuʼakoi moʼo takuʼaki tana fakasiʼisiʼi ʼo tana ʼu gāue. ʼI tana mole aga fakapotopoto pea mo aga fakavalevale ʼe faigataʼa kia ia hana fakafiafia.

6. (a) Koteā anai te meʼa ʼe tonu ke mamata kiai totatou ʼu kaugā fagona Kilisitiano ia tatou, pea ko te temi fea ʼaē ʼe tonu anai ke hoko te faʼahi ʼaia? (b) E feafeaʼi te tokoni ʼo te ʼu palalau ʼa Paulo ʼaē ia 2 Kolonito 1:24 pea mo Loma 14:4 kia tatou ke tou aga fakapotopoto?

⁶ Logope la mo kapau ko te ʼu fili ʼe nātou ʼui ko tatou ko ni hahaʼi ʼe pipiki fakavale ki tatatou lotu, ʼe tonu anai pe ke mamata tuʼumaʼu totatou ʼu kaugā fagona Kilisitiano ki tatatou aga fakapotopoto. Pea ʼe nātou sio anai ki te faʼahi ʼaia, mo kapau ʼe tou aga fakapotopoto ʼo mole tou ʼamanaki leva ke iku lelei pe ia meʼa fuli ʼe tou fai ʼo toe feiā aipe kia nātou ʼaē. Ia meʼa fuli, ʼe tonu ke tou tokakaga ke ʼaua naʼa tou fakamaʼua ki niʼihi he ʼu kavega ʼe mole talanoa kiai te Folafola ʼa te ʼAtua. Neʼe ʼui e te ʼapositolo ko Paulo, ʼo fēnei: “ ʼE mole mātou pule ki takotou tui, kae ʼe mātou kaugāue mo koutou ʼo ʼuhiga mo takotou fiafia.” (2 Kolonito 1:24) ʼUhi ko Paulo neʼe ko te tagata Faliseo ʼi muʼa atu, neʼe ina ʼiloʼi lelei ko te ʼu lekula fefeka ʼaē neʼe fai pea mo fakamaʼua ʼe nātou ʼaē ʼe pule, ko te ʼu meʼa ʼaia ʼe nātou lolomi tatatou fiafia, kae ko te ʼu tokoni ʼaoga ʼaē ʼe fai e te ʼu kaugā fagona ʼe nātou fakatuputupu aipe tatatou fiafia. ʼI te ʼui ʼaē “kua ōvi mai te ʼAliki,” ʼe tonu anai ke fakamanatuʼi kia ia ʼaē ʼe aga fakapotopoto ʼe mole ko tatou ʼaē ʼe tonu ke ‘fakamāu te tagata faifekau ʼa he tahi. ʼI muʼa ʼo tona pule ʼe tuʼu peʼe tō.’—Loma 14:4.

7, 8. He koʼe koa ʼe tonu ke mahino ki te kau Kilisitiano ʼe nātou felāveʼi mo te ʼu fihifihia, kae he koʼe ʼe feala pe ke nātou fiafia?

⁷ “ ʼAua naʼa koutou tuʼania he meʼa, kaʼe ʼi te meʼa fuli pe, ʼaki te faikole pea mo te ʼu kole mamahi ʼaki te fakafetaʼi, koutou fakahā ki te ʼAtua takotou ʼu kole.” (Filipe 4:6) ʼE tou lolotoga maʼuli nei ʼi te ʼu “temi maʼuhiga pea mo faigataʼa ʼaupito” ʼaē neʼe talanoa kiai Paulo. (2 Timoteo 3:1-5) Koia ʼe tonu ke mahino ki te kau Kilisitiano ʼe nātou felāveʼi pe mo te ʼu faigataʼaʼia. ʼAki te ʼui ʼaē ʼa Paulo “fakafiafia tuʼumaʼu,” ʼe mole faka ʼuhiga leva ko he Kilisitiano agatonu ʼe mole feala ke felāveʼi ʼi he tahi temi mo te lotovaivai peʼe ko te lotomamahi. ʼO māʼiape la mo Paulo, neʼe fakamoʼoni ki te faʼahi ʼaia, ʼo fēnei: “ ʼE mātou ʼefihia, kae mole fāveliveli ke mole feala he toe gaūgaūe; ʼe mātou nofo ʼi te tuʼania, kae ʼe ʼi aipe tona hāoʼaga; ʼe fakatagaʼi mātou, kae mole līʼakina mātou; ʼe mātou higa kae neʼe mole fakaʼauha mātou.” (2 Kolonito 4:8, 9) Kae, ko te fiafia ʼa he Kilisitiano, ʼe ina fakamaʼamaʼa he tuʼania peʼe ko he ʼu faigataʼaʼia faka temi pea ʼe ina fakatokatoka. ʼE ina foaki mai kia tatou te mālohi ʼaē ʼe ʼaoga ke tou haʼele ai ki muʼa, pea ke ʼaua naʼa galo ia tatou te ʼu tupuʼaga lahi ʼaē ke tou fakafiafia ai.

⁸ Mokā hoko he ʼu faʼahiga fihifihia kehekehe pe, ko te Kilisitiano ʼaē ʼe fiafia ʼe ina kole aipe kia Sehova ʼaki te agavaivai ke tokoni mai kia te ia. ʼE mole tō ia ki he lotomamahi ʼaupito. ʼI tana kua ʼosi fai ʼaki he aga fakapotopoto ia meʼa fuli moʼo tauʼi tona fihifihia, ʼe ina tuku leva kia Sehova ke ina fakatokatoka, ʼo mulimuli pe ki te fakaafe ʼaenī: “Tuku tau kavega kia Sehova, pea ko ia, ʼe ina lagolago anai koe.” ʼI te temi fuli pe, ʼe hoholo pe te fakafetaʼi ʼa te Kilisitiano kia Sehova ʼo ʼuhiga mo Tana ʼu meʼa lelei fuli.—Pesalemo 55:22; vakaʼi mo Mateo 6:25-34.

9. E feafeaʼi ki te mālama ʼo ʼuhiga mo te moʼoni hana foaki ʼo he ʼatamai tokalelei, pea koteā tona fua lelei ki he Kilisitiano?

⁹ “Ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai tokotou ʼu loto pea mo takotou ʼu fealagia fakakaukau ʼaki ia Kilisito Sesu.” (Filipe 4:7) Ko te mālama ki te moʼoni ʼo te Tohi-Tapu ʼe ina faka ʼāteaina te ʼatamai ʼo te Kilisitiano mai te loi pea ʼe tokoni kia ia ke ina fakatuputupu he faʼahiga fakakaukau ʼe ʼaoga. (2 Timoteo 1:13) Ko he tokoni ʼaia kia te ia ke ʼaua naʼa ina fai he ʼu aga ʼe mole tāu mo he Kilisitiano peʼe mo fakavalevale heʼe feala aipe ke fakatupu kovi ki tana ʼu felogoi mo niʼihi. ʼO mole lotomamahi leva ia ʼuhi ko te heʼe faitotonu pea mo te agakovi, kae ʼe ina tuku tana falala kia Sehova ʼaē ka ina fakatokatoka anai te ʼu fihifihia ʼo te malamanei ʼaki te Puleʼaga. Ko te taʼi ʼatamai tokalelei ʼaia ʼe ina puipui tona loto, taupau te maʼa ʼaē ʼo tana ʼu faiga, pea mo taki tana ʼu manatu ki te ala ʼo te faitotonu. ʼAki te ʼu faiga ʼe maʼa pea mo te ʼu manatu ʼe lelei ʼe ina maʼu leva te ʼu tupuʼaga lahi ke fakafiafia ai, logope la te ʼu fihifihia pea mo te ʼu fakahala ʼaē ʼe fakatupu e te mālama tokakovi ʼaenī.

10. Koteā te palalau pea mo te manatu ʼaē ʼe hoki feala ai ke maʼu te fiafia moʼoni?

¹⁰ “ ʼU tēhina, ko meʼa fuli ʼe moʼoni, ko meʼa fuli ʼe tāu mo he fakaʼapaʼapa, ko meʼa fuli ʼe maʼa, ko meʼa fuli ʼe fakavikiviki, ko meʼa fuli ʼe lelei hona talanoaʼi, kapau ʼe ʼi ai he faʼahiga vilitute pea kapau ʼe ʼi ai he meʼa ke vikiʼi, ke liliu te ʼu meʼa ʼaia ko te fakatuʼutuʼu tuʼumaʼu ʼo ʼakotou ʼu manatu.” (Filipe 4:8) ʼE mole maʼu e he Kilisitiano he meʼa lelei ʼi hana palalau pea mo manatu ki ni ʼu meʼa ʼe kovi. Koia ʼaē ʼe lahi ai te ʼu fakafiafia ʼo te malamanei ʼe tonu ke situʼa kiai. ʼE mole he tahi ʼe feala ke ina taupau te fiafia faka Kilisitiano mo kapau ʼe ina fakafonu tona ʼatamai pea mo tona loto ʼaki ni ʼu loi, ni ʼu fakahuahua vale, ni ʼu meʼa ʼe mole faitotonu, heʼeʼaoga, ʼe mole fakaʼapaʼapa, fehiʼaʼinaʼi, pea mo fakalialia. Meʼa fakaʼofaʼofa, ʼe mole feala ki he tahi ke ina maʼu te fiafia moʼoni ʼaki hana fakafonu ʼo tona ʼatamai pea mo tona loto ʼaki ni ʼu meʼa noa. ʼE ko he meʼa fakaloto mālohi te ʼiloʼi ʼaē ko te kau Kilisitiano ʼe lahi te ʼu meʼa lelei ke nātou manatu pea mo talanoa kiai, ʼi te mālama fakahehema ʼo Satana!

Te ʼu Tupuʼaga Lahi Ke Fakafiafia Ai

11. (a) Koteā te meʼa ʼaē ʼe mole tonu anai ke meʼa noaʼi, pea koteā tona tupuʼaga? (b) Koteā te meʼa neʼe malave ki te tagata pea mo tona ʼohoana ʼi tana kau ki te fakatahi faka malamanei?

¹¹ ʼI te temi ʼaē ʼe tou talanoa ai ʼo ʼuhiga mo te ʼu tupuʼaga ʼaē ke tou fakafiafia ai, ʼaua naʼa galo ia tatou, tatatou felogoi fakatautehina ʼi te malamanei katoa. (1 Petelo 2:17) Logope la ʼaē te fefehiʼaʼaki ʼa te hahaʼi ʼo te ʼu puleʼaga kehekehe pea mo lanu kehekehe ʼo te malamanei, ko te hahaʼi ia ʼa te ʼAtua ʼe nātou fakatahi ʼaki te ʼofa. ʼE ʼiloga la tanatou logo tahi ʼi te ʼu fakatahi lalahi. Ohage ko te fakatahi ʼaē neʼe fai ʼi te taʼu 1993 ʼi Kiev, ʼi Ukraine, ko te tēhina mai Amelika neʼe ina ʼui fēnei: “Ko te ʼu loʼimata fakafiafia, pea mo te ʼu mata ʼe fonu ai te fiafia, ko te ʼu hahaʼi fuli ʼaia neʼe nātou tauʼalofa ohage ko he foʼi famili, pea mo te ʼu kūtuga ʼaki te ʼu fakamalu lanu kehekehe peʼe ko te ʼu musuala neʼe nātou fetaukaloʼaki, ʼo ʼiloga lelei aipe te logo tahi faka teokalatike. Neʼe fiafia tomā ʼu loto ki te milakulo ʼaē neʼe fakahoko e Sehova ʼi te felogoi fakatautehina faka malamanei. Neʼe malave ʼaupito te faʼahi ʼaia ki tomā ʼu loto, pea neʼe fakaloto mālohi aipe ki tamā tui.”

12. E feafeaʼi te fakahoko ʼo Isaia 60:22 ia ʼaho nei?

¹² Ia ʼaho nei ʼe ko he meʼa fakaloto mālohi ki te tui ʼa te kau Kilisitiano hanatou mamata ki te fakahoko ʼo te ʼu lea faka polofeta ʼa te Tohi-Tapu! Ohage la, tou vakaʼi age muʼa te ʼu palalau ʼaē ʼe tuʼu ia Isaia 60:22: “Ko ia ʼaē ʼe veliveli ʼe liliu anai ko te lauʼi afe e tahi, pea ko ia ʼaē ʼe veliveli ʼe liliu ia ko te puleʼaga mālohi. Ko ʼau, Sehova, ʼe ʼau fakahaʼele ki muʼa te faʼahi ʼaia mokā hoko tona temi.” ʼI te tupu ʼaē ʼo te Puleʼaga ʼi te 1914, neʼe ko te toko 5 100 kau fai faka mafola ʼi te temi ʼaia, ʼe veliveli. Kae hili kiai taʼu e nima, neʼe tuputupu te famili fakatautehina faka malamanei ʼo fakafuafua ʼi te vāhaʼa fuli neʼe ko te toko 5 628 neʼe papitemaʼi ko te kau Fakamoʼoni! ʼI te taʼu 1993, ko te toko 4 709 889 minisi ʼaē ʼe gāue fakamalotoloto. Koutou fakakaukauʼi age muʼa! Ko tona faka ʼuhiga ko te meʼa ʼaē neʼe “veliveli” ʼi te taʼu 1914 kua fakaōvi ke “lauʼi afe”!

13. (a) Koteā ʼaē neʼe hoko talu mai te taʼu 1914? (b) ʼE tokaga feafeaʼi te kau Fakamoʼoni ʼa Sehova ki te pelesepeto ʼaē ʼe tou maʼu ʼi te ʼu palalau ʼa Paulo ia 2 Kolonito 9:7?

¹³ Talu mai te 1914 ko te Hau Faka Mesia neʼe ʼalu ʼo pule ʼi te lotolotoiga ʼo tona ʼu fili. Ko tana pule ʼe lagolago e te ʼu hahaʼi ʼe nātou foaki tonatou loto katoa, tonatou temi, tonatou mālohi, pea mo tanatou falā, moʼo fakahoko ʼo te gāue faka mafola ʼi te malamanei feiā ki te laga ʼo te ʼu fale ʼi te malamanei. (Pesalemo 110:2, 3) Ko te kau Fakamoʼoni ʼa Sehova ʼe nātou leleiʼia te ʼu meʼa ʼofa faka paʼaga ʼaē ʼe fai moʼo lagolago ki te ʼu gāue ʼaia, logope la ʼaē ʼe tahitahiga te talanoa ki te falā ʼi tanatou ʼu fono.a (Vakaʼi ia 1 Fakamatala 29:9.) Neʼe mole fakakinauʼi te kau Kilisitiano moʼoni ke nātou foaki te ʼu meʼa ʼofa ʼaia; ʼe ko he pilivilesio kia nātou hanatou lagolago ki tonatou Hau mokā ʼe feala, ʼo “tahi fai pe ki te meʼa kua ina fakatotonu ʼi tona loto, ʼo mole fai ʼaki he fakahemala peʼe ʼaki hona fakamaʼua.”—2 Kolonito 9:7.

14. Koteā te ʼaluʼaga kua ʼiloga lelei ʼi te hahaʼi ʼa te ʼAtua talu mai te taʼu 1919, koutou fakahā he ʼu tupuʼaga ke fakafiafia ai?

¹⁴ Ko te fakakikite ʼo te toe fakatuʼu ʼo te tauhi maʼa ʼi te lotolotoiga ʼo te hahaʼi ʼa te ʼAtua neʼe fakatupu ʼaki ai te fakatuʼu ʼo te palatiso fakalaumālie. Talu mai te 1919 neʼe mafola mamalie pe ia. (Pesalemo 14:7; Isaia 52:9, 10) Koteā tona fua? Ko te kau Kilisitiano moʼoni ʼe nātou ʼiloʼi “te kalaga fakafiafia pea mo te loto fiafia.” (Isaia 51:11) Ko te ʼu fua lelei ʼaē neʼe tuputupu, ʼe ko he fakamoʼoni ʼaia ʼo te gāue ʼa te laumālie maʼoniʼoni ʼa te ʼAtua ki te ʼu tagata haohaoa. Ko tona ʼu fua pea mo te fakaʼapaʼapa ʼe tuku fuli kia Sehova, kae koteā ʼapē he tahi age pilivilesio ʼe lahi age, mo kapau pe ke tou liliu ʼo kaugāue mo te ʼAtua? (1 Kolonito 3:9) ʼI te lahi ʼaupito ʼaē ʼo te mālohi ʼo Sehova neʼe feala pe ke ina uga he ʼu maka, mo kapau ʼe tonu ke hoko, ke nātou kalagaʼi te logo ʼo te moʼoni. Kae, neʼe mole ina fili te puleʼaki ʼaia, neʼe ina uga te ʼu meʼa maʼuli lotolelei ʼaē neʼe faʼu ʼaki te efu ke nātou fai tona finegalo.—Luka 19:40.

15. (a) Koteā te ʼu meʼa ʼe lolotoga hoko ʼe tonu ke tou tokakaga kiai? (b) Koteā te meʼa ka hoko ʼe tou sio kiai ʼaki te loto fiafia?

¹⁵ ʼAki he tokaga fakalelei, ko te ʼu kaugana ʼa Sehova ʼe nātou mulimuli pe ki te ʼu meʼa ʼaē ʼe hoko ʼi te malamanei heʼe nātou fakahoko te ʼu lea faka polofeta ʼa te Tohi-Tapu. Ko te ʼu puleʼaga ʼe nātou faiga mālohi ke nātou fakatuʼu he tokalelei, kae ʼe noa ia. ʼUhi ko te ʼu meʼa ʼaē ʼe hoko ʼe tupu ʼaki ai leva ʼo tanatou kole ki te kautahi ʼo te ʼAtu Puleʼaga Fakatahi ke ina fakatokatoka te ʼu maveuveu ʼaē ʼi te mālama. (Fakahā 13:15-17) Pea ʼi te temi ʼaia, kua kamata fakatalitali aipe te hahaʼi ʼa te ʼAtua ʼaki he toe ʼamanaki ki te meʼa fakafiafia ʼi te ʼu meʼa fakafiafia mole heʼeki hoko, ko te meʼa ʼe kua ōvi mai pe. “Ke tou fakafiafia pea ke tou fonu ʼi te fiafia, pea ke tou faka kolōlia kia te ia, koteʼuhi ko te ʼohoana ʼo te Akeno kua hoko mai pea kua teuteu tona ʼohoana.”—Fakahā 19:7.

Ko Te Fai Faka Mafola—Ko He Kavega Peʼe Ko He Meʼa Fiafia?

16. Fai he fakatātā ʼo ʼuhiga mo te mole maʼuliʼi ʼaē e he tahi te ʼu meʼa ʼaē neʼe ina ako ʼe feala ke ina faʼao te fiafia ʼi he Kilisitiano.

¹⁶ “Ko te ʼu meʼa neʼe koutou akoʼi pea neʼe koutou tali pea mo logo pea mo sio ʼo ʼuhiga mo ʼau, koutou haga maʼuliʼi te ʼu meʼa ʼaia.” (Filipe 4:9) Kapau ʼe nātou maʼuliʼi te ʼu meʼa ʼaē neʼe nātou ako, ko te kau Kilisitiano ʼe feala ke nātou ʼamanaki ʼe tapuakina nātou e te ʼAtua. ʼI te ʼu meʼa tāfito ʼaē neʼe nātou ako, ʼe tonu ke nātou fagonogono te logo lelei ki niʼihi. ʼIo, ko ai ʼapē ʼe feala ke ina maʼu te ʼatamai tokalelei pea mo fiafia mo kapau ʼe mole ina fakamahino ki te hahaʼi ʼaē ʼe nātou kumi moʼoni te ʼAtua te logo ʼaē ʼe fakalogo kiai tonatou maʼuli?—Esekiele 3:17-21; 1 Kolonito 9:16; 1 Timoteo 4:16.

17. He koʼe koa ʼe tonu anai ke liliu te gāue faka mafola ko te matapuna tuʼumaʼu ʼo te fiafia?

¹⁷ ʼE ko he meʼa fakafiafia hakita felāveʼi mo ni hahaʼi ʼe hage ko he kau ōvi ʼe nātou lotolelei ke nātou ako ke nātou ʼiloʼi ia Sehova! ʼIo, ko nātou ʼaē ʼe nātou kaugana ʼaki ni ʼu manatu ʼe lelei, kia nātou ʼaia ko te gāue ʼo te Puleʼaga ʼe ko he matapuna ia ʼo te fiafia. Koteʼuhi ko te faka ʼuhiga tāfito ʼo he tahi kua liliu ko te Fakamoʼoni ʼa Sehova ʼe ko te fakavikiviki ʼo Tona huafa pea mo lagolago ki Tona tuʼulaga Tuʼi Faʼitaliha. (1 Fakamatala 16:31) Ko ʼaē ʼe ina ʼiloʼi te faʼahi ʼaia, ʼe fiafia anai logope la te fakafisi ʼa te hahaʼi ki te logo lelei ʼaē ʼe ina foaki. ʼE ina ʼiloʼi ko te fagonogono ʼaē ki te hahaʼi ʼe mole tui, ʼe fakagata anai ʼi he ʼaho; kae ko te fakavikiviki ʼo te huafa ʼo Sehova ʼe heʼegata anai ia.

18. Koteā ʼaē ʼe ina uga he Kilisitiano ke ina fai te finegalo ʼo Sehova?

¹⁸ Ko te lotu moʼoni ʼe ina uga ia nātou ʼaē ʼe nātou maʼuliʼi te faʼahi ʼaia ke nātou fai te ʼu meʼa ʼaē ʼe loto kiai ia Sehova, ʼo mole nātou fai koteʼuhi ʼe tonu ke nātou fai kae ʼe nātou lotolelei ke nātou fai te faʼahi ʼaia. (Pesalemo 40:8; Soane 4:34) Tokolahi te hahaʼi ʼe mata faigataʼa kia nātou te mahino ki te faʼahi ʼaia. Neʼe ʼui ʼi te tahi ʼaho e te fafine ki te Fakamoʼoni neʼe ʼalu age ʼo ʼaʼahi ia ia: “Sio koe, ʼe ʼau vikiʼi koutou. ʼE mahino ia ʼe mole ʼau ʼalu anai ʼi he ʼaho ki te ʼu ʼapi ʼo faka mafola taku lotu ohage ko takotou fai.” Pea malimali te Fakamoʼoni, ʼo ina tali fēnei age: “ ʼE ʼau mahino ki tou loto. ʼI muʼa ʼo taku liliu ko he Fakamoʼoni ʼa Sehova, neʼe mole feala ki he tahi ke ina uga ia ʼau ke ʼau ʼalu ki niʼihi ʼo palalau ki te lotu. Kae ʼi te temi nei ʼe ʼau loto ke ʼau fai te faʼahi ʼaia.” Neʼe fakakaukau muʼa te fafine pea neʼe ina tali age fēnei: “ ʼE mahino papau ia ko takotou lotu ʼe ina foaki atu he meʼa kae ki taku ia lotu ʼe mole ina foaki mai hina meʼa. Lagi ʼe tonu muʼa ke ʼau kumi.”

19. He koʼe koa ʼe tonu ke ʼāsili age ʼi te temi nei te fakafiafia?

¹⁹ Ko te vaega ʼo te taʼu 1994, ʼaē ʼe ʼasi fakalelei ʼi tatatou ʼu Fale ʼo te Puleʼaga, ʼe ina fakamanatuʼi tuʼumaʼu kia tatou te manatu ʼaenī: “Tuku tau falala kia Sehova mo tou loto katoa.” (Tāʼaga Lea 3:5) ʼE ʼi ai koa he tahi age tupuʼaga ke fakafiafia ai gata pe mo kapau ʼe tou falala kia Sehova, ko te tule mālohi ke tou nono kiai? ʼE fakamatala fēnei e te Pesalemo 64:10: “Ko ia ʼaē ʼe faitotonu ʼe fakafiafia anai ia Sehova pea mo nono ia te ia.” ʼE mole ko he temi ʼaenī ke fakaʼaoʼaoganoa ai peʼe mo pulihiʼi te falala ʼaē kia te ia. Ko he māhina pe ʼe fakalaka ʼe fakaōvi ai tatou ki te meʼa ʼaē neʼe holi kiai te ʼu kaugana ʼa Sehova talu mai te ʼu ʼaho ʼo Apele. Ko te temi ʼaenī ke tou falala kia Sehova ʼaki totatou loto katoa, ʼo mahino kia tatou ko te temi tāfito ʼaenī ke lahi age tatatou fakafiafia!

[Nota ʼi te lalo pasina]

ʼE Feafeaʼi Anai Hakotou Tali?

◻ ʼO mulimuli ki te manatu ʼaē ʼe tuʼu ia Nehemia 8:10, he koʼe koa ʼe tonu ke tou fakafiafia?

◻ E feafeaʼi te fakahā ia Teutalonome 26:11 mo 28:45-47 te maʼuhiga ʼaē ʼo te fakafiafia?

◻ ʼE tokoni feafeaʼi kia tatou te manatu ʼaē ia Filipe 4:4-9 ke tou fiafia tuʼumaʼu?

◻ Koteā te tupuʼaga ke tou fakafiafia ai ʼe tuku mai e te vahe ʼo te taʼu 1994?

[Paki ʼo te pasina 16]

Ko te kau Fakamoʼoni ʼo Lusia pea mo Siamani ʼe nātou fiafia ʼi tanatou kau ki te foʼi famili faka malamanei ʼo te ʼu tēhina pea mo te ʼu tuagaʼane

[Paki ʼo te pasina 17]

Ko te vaevae ʼo te moʼoni ki niʼihi ʼe ko he tupuʼaga ʼaia ʼo he loto fiafia