He Koʼe ʼe Tonu Ke Tou Maʼuli Faka Sakilifisio?
Ko Bill ʼe ko he tāmai kua taʼu 50 pea ʼe ko he tagata ʼe ina akoʼi ki te hahaʼi te faʼahiga laga fale foʼou. ʼI te taʼu fuli ia māhina e ono, ʼe ina totogi e ia totonu tana ʼu feʼaluʼaki, heʼe ʼalu ʼi te ʼu vāhaʼa katoa ʼo tokoni ki te laga ʼo te ʼu Fale ʼo Te Puleʼaga maʼa te ʼu kokelekasio ʼa te kau Fakamoʼoni ʼa Sehova. Ko Emma ʼe ko te tuagaʼane ʼatamai pea mo faiva ʼe kei taʼu 22 pea kei ʼeva. Neʼe mole holi ia ki he ʼu meʼa fakamālama pea mo te ʼu fakafiafia ʼo te mālama, kae ʼi te ʼu māhina fuli neʼe ina fai ia hola e 70 moʼo tokoni ki te hahaʼi ke nātou mahino ki te Tohi-Tapu. Ko Maurice pea mo Betty kua nā letelete. ʼI te temi ʼaenī, ʼe mole nā maʼuli fakafīfīmālie, kae ʼe nā ʼolo ki te tahi fenua ʼo tokoni ki te hahaʼi ke nātou ako te ʼu fakatuʼutuʼu ʼa te ʼAtua ʼo ʼuhiga mo te kele.
KO NĀTOU ʼaia, ʼe mole nātou ʼui ʼe nātou makehe peʼe nātou laka age ʼi niʼihi. ʼE nātou hage pe ko te hahaʼi fuli, ʼe nātou fai te meʼa ʼaē ʼi tanatou manatu ʼe ko he meʼa ʼe tonu ke fai. He koʼe ʼe nātou fakaʼaogaʼi tonatou temi, tonatou mālohi, tonatou ʼu fealagia, pea mo tonatou ʼu koloā moʼo tokoni ki niʼihi? Ko te meʼa ʼaē ʼe ina uga nātou, ʼe ko tonatou ʼofa lahi ki te ʼAtua pea mo tonatou kāiga. Ko te ʼofa ʼaia neʼe ina fakatuputupu he loto faka sakilifisio moʼoni ʼi ʼonatou loto takitokotahi.
Koteā tona faka ʼuhiga kia tatou, hakita maʼu he maʼuli faka sakilifisio? ʼE mole fakamaʼua mai e te maʼuli faka sakilifisio ke tou maʼuli ohage ko te kau monike. ʼE mole faka ʼuhiga leva ke tou fakamamaʼo mai ia meʼa fuli ʼaē ʼe feala ke kita fiafia ai. Ohage ko tona ʼui e te tikisionalio The Shorter Oxford English Dictionary, ʼe faka ʼuhiga te maʼuli faka sakilifisio “ki tatatou fakafisi ki te ʼu meʼa ʼaē ʼe tou leleiʼia, ki totatou maʼuli fakafiafia, pea mo tatatou ʼu holi, kae ke tou fakamuʼamuʼa te maʼuli fiafia ʼo te hahaʼi.”
Ko Sesu Kilisito—Te Faʼifaʼitaki Tāfito
Ko Sesu Kilisito, te Foha ʼo te ʼAtua, ʼe ko te faʼifaʼitaki tāfito ʼaia ʼo he tagata neʼe maʼuli faka sakilifisio. ʼI tona maʼuli ʼi selo, neʼe lelei ʼaupito tona maʼuli pea mo fakafiafia. Neʼe felogoi lelei mo tana Tāmai pea mo te ʼu laumālie fakapulipuli. Tahi ʼaē meʼa, ʼi tona ʼuhiga “tufuga faiva” neʼe fakaʼaogaʼi e te ʼAlo ʼo te ʼAtua tona ʼu fealagia ʼi te ʼu gāue fakaofoofo. (Tāʼaga Lea 8:30, 31) ʼE mahino papau ia, neʼe maʼuli ʼi te ʼu ʼaluʼaga ʼe lelei age ia meʼa fuli ʼaē ʼe lava maʼu e he tahi ʼe maʼu koloā. Ia tafa ʼo Sehova ʼAtua, neʼe ina maʼu te tuʼulaga ʼe fakavikiviki pea mo māʼoluga ʼi te lagi.
Kae ko te ʼAlo ʼo te ʼAtua “nee ina noai ia i tana too te uhiga o te kaugana, o liliu ko te tatau o te tagata, pea i tona ulugaʼaga nee iloi ko he tagata.” (Filipe 2:7) Neʼe ina tali lelei ke ina līaki tona ʼu lelei fuli ke haʼu ʼo tupu tagata, pea mo ina foaki tona maʼuli ko he totogi moʼo pulihi te ʼu mamahi ʼaē neʼe fai e Satana. (Senesi 3:1-7; Maleko 10:45) Ko tona faka ʼuhiga, neʼe tonu ke haʼu ʼo maʼuli ʼi te mālama agahala, ʼi te mālama ʼe puleʼi e Satana te Tevolo. (1 Soane 5:19) Neʼe toe faka ʼuhiga foki ke ina ʼutakiʼi te maʼuli masiva pea mo te ʼu fihifihia. Kae māʼiape la mo te ʼu meʼa ʼaē neʼe hoko kia te ia, neʼe tali katoa e Sesu Kilisito ke ina fai te finegalo ʼo tana Tāmai. (Mateo 26:39; Soane 5:30; 6:38) Neʼe ko he ʼahiʼahiʼi ʼaia ʼo te ʼofa ʼa Sesu pea mo tana agatonu. Neʼe feala ke aʼu kifea tana tali lelei ʼo te ʼu mamahi ʼaia? Neʼe ʼui fēnei e te ʼapositolo ko Paulo: “Neʼe ina fakamālaloʼi ia ia totonu, pea neʼe talagafua ʼo aʼu ki te mate, ʼio, ki te mate ʼi te pou fakamamahi.”—Filipe 2:8, MN.
“Koutou Taupau Te Loto ʼAia”
ʼE fakaloto mālohiʼi tatou ke tou muliʼi te faʼifaʼitaki ʼa Sesu. ʼE fēnei te fakaloto mālohi ʼa Paulo: “Koutou taupau te loto ʼaia neʼe ia Kilisito Sesu.” (Filipe 2:5, MN ) ʼE tou lava fai feafeaʼi te faʼahi ʼaia? ʼE feala ke “mole koutou tokakaga pe ki te ʼu meʼa ʼa koutou totonu, kae ke koutou toe tokakaga pe foki ki te ʼu meʼa ʼa ʼihi.” (Filipe 2:4, MN ) Ko te ʼofa moʼoni “ ʼe mole ina kumi pe te meʼa ʼaē ʼe ʼaoga kia te ia.”—1 Kolonito 13:5, MN.
ʼI te agamāhani ko te hahaʼi lotoʼofa, ʼe nātou gāue katoa moʼo tokoni ki ʼihi. Kae ia ʼaho nei, ʼe faiga e te hahaʼi tokolahi ke nātou tokaga pe kia nātou totonu. ʼE maʼu ʼi te malamanei te manatu ʼaē ke kita tokaga muʼa kia kita totonu. ʼE tonu ke tou puipui ia tatou mai te manatu ʼa te malamanei, koteʼuhi kapau ʼe lava hū ki tatatou ʼu manatu pea mo totatou loto, pea ʼe tou fakamuʼamuʼa tāfito anai te ʼu meʼa ʼaē ʼe tou holi kiai. Heʼe kapau ʼe mole tou fai feiā, pea ʼe tou fai anai ia meʼa fuli—te fakaʼaogaʼi ʼo totatou temi, totatou mālohi, totatou ʼu fealagia—ʼo mulimuli ki te ʼu meʼa ʼaē ʼe tou loto kiai. Koia, ʼe tonu ai ke tou tauʼi mālohi te ʼu meʼa kovi ʼaia.
Māʼiape la mo he tokoni lelei, ʼe feala ʼi ʼihi temi ke ina maumauʼi totatou loto faka sakilifisio. ʼI tana mahino ʼaē peʼe iku feafeaʼi anai te maʼuli faka sakilifisio ʼa Sesu, neʼe ʼui fēnei e te ʼapositolo ko Petelo: “Agalelei kia te koe, ʼAliki.” (Mateo 16:22, MN ) Neʼe hage ʼe mata faigataʼa kia ia te tali lelei e Sesu ke matehi ia ia moʼo lagolago ki te pule faʼitaliha ʼo tana Tāmai pea mo hāofaki te malamanei. Koia ʼaē neʼe ina uga ai ia Sesu ke situʼa mai te taʼi maʼuli faka sakilifisio ʼaia.
‘Koutou Fakafisi Kia Koutou Totonu’
Neʼe koteā te tali ʼa Sesu? ʼE ʼui fēnei e te fakamatala: “Neʼe mafuli age ia ia, ʼo ina sioʼi ʼana tisipulo pea ina fakatonutonuʼi ia Petelo, ʼo ʼui maʼana: ‘Haʼu ʼi ʼoku tuʼa, Satana, heʼe mole ke manatu ʼaki te ʼu manatu ʼo te ʼAtua, kaʼe ʼaki te ʼu manatu ʼa te tagata.’ ” Pea neʼe pāuiʼi e Sesu ke ʼolo age kia te ia te hahaʼi pea mo ʼana tisipulo pea mo ʼui maʼana: “Kapau ʼe fia muli mai he tahi ia te ʼau, ke fakafisi ia kia ia totonu pea ke ina toʼo tona pou fakamamahi pea ke muli tuʼumaʼu ia te ʼau.”—Maleko 8:33, 34, MN.
Hili taʼu e 30 ki te tokoni ʼaē neʼe ina fai kia Sesu, neʼe fakahā leva e Petelo tana kua mahino ki te faka ʼuhiga ʼo te maʼuli faka sakilifisio. Neʼe mole ina fakaloto vaivaiʼi tona ʼu kaugā fagona ʼo ʼuhiga mo tanatou ʼu faiga, pea mo nātou agalelei kia nātou totonu. Kailoa, kae neʼe ina fakaloto mālohiʼi nātou ke nātou tuku katoa tonatou ʼatamai ki te gāue, pea ke nātou līaki katoa tonatou ʼu holi ʼāfea ʼo te mālama. Logola te ʼu ʼahiʼahi, kae neʼe nātou fakamuʼamuʼa ʼi tonatou maʼuli te fai ʼo te finegalo ʼo te ʼAtua.—1 Petelo 1:6, 13, 14; 4:1, 2.
Ko te meʼa lelei ʼaupito ʼe feala ke tou fai, ko te foaki ʼo tatou totonu maʼa Sehova, ʼo tou muliʼi katoa ia Sesu Kilisito pea mo tuku ke takitaki tatatou ʼu gāue e te ʼAtua. Ki te faʼahi ʼaia, neʼe tuku mai e Paulo te faʼifaʼitaki lelei. ʼI tana mahino kua nounou te temi pea mo tana loto fakafetaʼi kia Sehova, neʼe ina līaki te ʼu holi ʼo te mālama, peʼe ko te ʼu fakatuʼutuʼu ʼaē neʼe nātou lava fakahēʼi ia ia mai tana fai te finegalo ʼo te ʼAtua. Neʼe ina ʼui fēnei: “Kia te au, e lelei ke au puli anai pea e katoa anai toku puli o uhiga mo outou laumalie” moʼo kaugana ki niʼihi. (2 Kolonito 12:15) Neʼe fakaʼaogaʼi e Paulo tona ʼu fealagia moʼo fakahaʼele ki muʼa te ʼu fakatuʼutuʼu fakaʼatua, kae mole ko te ʼu fakatuʼutuʼu ʼaʼana.—Gaue 20:24; Filipe 3:8.
ʼE lava feafeaʼi hatatou sivi ia tatou totonu ke tou ʼiloʼi peʼe tou maʼu te manatu ʼaē neʼe maʼu e te ʼapositolo ko Paulo? ʼE feala ke tou fai te ʼu fehuʼi ʼaenī kia tatou totonu pe: ʼE ʼau fakaʼaogaʼi feafeaʼi toku temi, toku mālohi, toku ʼu fealagia, pea mo toku ʼu koloā? ʼE ʼau fakaʼaogaʼi koa te ʼu meʼa ʼaia pea mo te tahi age ʼu meʼa ʼofa moʼo fakatuputupu te ʼu meʼa ʼaē ʼe ʼau loto kiai, peʼe ʼau fakaʼaogaʼi moʼo tokoniʼi niʼihi? Kua ʼau fakatuʼutuʼu koa ke ʼau kau mālohi ki te gāue ʼo te hāofaki, ʼaē ko te tala ʼo te logo lelei, lagi ke ʼau liliu ko he tahi ʼe ina faka mafola te Puleʼaga ʼi te temi katoa? ʼE lava koa ke lahi age taku kau ki te ʼu gāue ohage ko te laga fale pea mo te tokaga ki te ʼu Fale ʼo Te Puleʼaga? ʼE ʼau fakaʼaogaʼi koa he ʼu temi faigamālie moʼo tokoni kia nātou ʼaē kua vaivavai? ʼE ʼau foaki katoa koa maʼa Sehova te ʼu meʼa lelei ʼaē ʼe ʼau maʼu?—Tāʼaga Lea 3:9.
“ ʼE Lahi Age Te Fiafia ʼi Takita Foaki”
Kae ʼe ko he aga fakapotopoto koa takita maʼuli faka sakilifisio? Ei! Neʼe ʼiloʼi e Paulo ʼaki te ʼu meʼa ʼaē neʼe hoko kia te ia, ko te taʼi maʼuli ʼaia ʼe ina foaki he ʼu fakapale lahi. Neʼe ina maʼu ai te fiafia lahi pea mo te maʼuli fakafeauga. Neʼe ina fakamahino te faʼahi ʼaia ki te ʼu tagata ʼāfea ʼo Efeso ʼi tana felāveʼi mo nātou ʼi Mile. Neʼe ʼui fēnei age e Paulo: “Neʼe ʼau fakahāhā atu kia koutou ʼi te meʼa fuli pe, ʼe tonu ke koutou gāue feiā [ke koutou maʼuli faka sakilifisio] moʼo tokoni kia nātou ʼaē ʼe vaivai, pea mo koutou manatuʼi te ʼu folafola ʼa te ʼAliki ko Sesu ʼaē neʼe ina ʼui tonu: ‘ ʼE lahi age te fiafia ʼi takita foaki, ʼi takita tali.’ ” (Gāue 20:35, MN ) Kua mahino ki te lauʼi miliona hahaʼi, ko te maʼu ʼo te faʼahiga manatu ʼaia, ʼe ina foaki mai te fiafia lahi ʼi te temi nei. ʼE toe foaki mai anai mo te fiafia ʼi te ka haʼu, mokā fakapale anai e Sehova te hahaʼi ʼaē neʼe nātou fakamuʼamuʼa tana ʼu fakatuʼutuʼu, pea mo te ʼu fakatuʼutuʼu ʼa ʼihi.—1 Timoteo 4:8-10.
ʼI te fehuʼi age kia Bill, he koʼe ʼe tokoni ki te laga ʼo te ʼu Fale ʼo Te Puleʼaga, neʼe ina ʼui fēnei: “ ʼI taku tokoni feiā ki te ʼu kiʼi kokelekasio veliveli, ʼe ʼau maʼu ai he toe fiafia lahi. ʼE ʼau fiafia ʼi taku fakaʼaogaʼi toku ʼu faiva pea mo toku poto ke ʼaoga ki niʼihi.” He koʼe neʼe fili e Emma ke ina foaki katoa tona mālohi pea mo tona ʼu fealagia moʼo tokoni ki niʼihi ke nātou ako te moʼoni ʼo te Tohi-Tapu? “ ʼI taku manatu ʼe mole feala ke ʼau fai he tahi age meʼa. ʼE kei ʼau finemui pea ʼe ʼau lava fai te faʼahi ʼaia, koia ʼe ʼau fia fai haku ʼu gāue ʼo mulimuli ki taku ʼu fealagia moʼo fakafiafia ia Sehova pea mo ʼau tokoni ki te hahaʼi. ʼE ko he meʼa noa kia ʼau, te sakilifisioʼi ʼo ʼihi lelei fakamālama. Neʼe ʼau fai pe te meʼa ʼaē neʼe tonu ke ʼau fai ʼo mulimuli pe ki te meʼa ʼaē neʼe fai e Sehova maʼaku.”
Neʼe mole fakahemala ia Maurice pea mo Betty ʼi tana mole faiga ʼaē ke nā maʼuli fakafīfīmālie, ʼi te hili ʼo te ʼu taʼu ʼaē neʼe nā gāue kinakina ai moʼo taupau pea mo pusiaki tanā fānau. ʼI te temi nei kua nā letelete, pea ʼe nā fia fai he ʼu meʼa ʼe ʼaoga ʼaupito pea mo maʼuhiga ʼi tonā maʼuli. ʼE nā ʼui fēnei: “ ʼE mole ma fia maʼuʼuli fakafīfīmālie ʼi te temi nei. Ko tamā ʼolo ki te tahi fenua moʼo tokoni ki niʼihi ke nātou ʼiloʼi ia Sehova, ʼe ko he fealagia ʼaia ke ma haga fai he ʼu meʼa ʼe ʼaoga.”
Kua koutou fakatuʼutuʼu koa ke koutou maʼuli faka sakilifisio? ʼE mole faigafua anai. ʼE hoko tuʼumaʼu anai he tau mālohi ʼo te ʼu holi ʼo totatou ʼuhiga heʼe haohaoa, pea mo totatou holi fakamalotoloto ʼaē ke tou fai te meʼa ʼaē ʼe leleiʼia e te ʼAtua. (Loma 7:21-23) Kae ʼe tou lava mālo ʼi te tau ʼaia, mo kapau ʼe tou tuku ia Sehova ke ina takitaki totatou maʼuli. (Kalate 5:16, 17) ʼE ina manatuʼi moʼoni anai tatatou gāue faka sakilifisio ʼi tana tauhi pea mo ina tapuakina lahi anai tatou. ʼIo, ʼe ‘avahi anai e Sehova ʼAtua kia tatou te ʼu matapā ʼo te lagi, pea mo huaʼi moʼoni mai kia tatou he tapuakina ʼo aʼu ki te mole toe ʼi ai ʼo he hoge.’—Malakia 3:10; Hepeleo 6:10.
[Paki ʼo te pasina 23]
Neʼe maʼuli faka sakilifisio ia Sesu. Kaeā koutou?
[Paki ʼo te pasina 24]
Neʼe faiga katoa ia Paulo ki te gāue ʼaē ko te faka mafola ʼo te Puleʼaga