ʼE Tokoni Atu Ki Tau Ako

Fakamaʼu Loto ʼAtatou Hiva

“ ʼI te ʼu temi ʼae ʼe au manatu ai ʼe mole hoku ʼaoga, ʼe fakalotomalohiʼi au e Sehova ʼaki ʼatatou hiva ʼi te Televisio JW.”—Ko Lorraine, ʼi Amelika.

Neʼe fakaʼaogaʼi tuʼumaʼu pe e te kau Kilisitiano te ʼu hiva moʼo fakavikiviki ki te ʼAtua. (Kol. 3:16) Kapau ʼe ke fakamaʼu loto te ʼu hiva ʼaia, ʼe lava tokoni atu maʼia moka mole ke maʼu he tohi hiva peʼe ko he kiʼi masini. Koʼeni he ʼu faʼahi ʼe lava tokoni atu ke ke maʼu loto ai ni hiva:

• Lau fakalelei te ʼu kupu ke ke mahino ki tona fakaʼuhiga. Ka ke mahino ki te fakaʼuhiga ʼo he manatu pea ʼe faigafua age ai tau manatuʼi. Ko te ʼu kupu ʼo ʼatatou hiva, ʼo feia mo te ʼu hiva ʼae ʼe maʼu ʼi te Televisio JW pea mo te ʼu hiva maʼa te ʼu tamaliki, ʼe feala hau maʼu ʼi te jw.org ʼi te kupu “Tohi,” pea ke filifili “Musika.”

• Tohi te ʼu kupu. ʼE tokoni atu anai ke mole ke galoʼi ia te ʼu kupu.—Tet. 17:18.

• Hiva leʼo lahi mo liuliuga. Lau mo hiva liuliuga te hiva.

• Vakavakaʼi pe ʼe kotea ʼae neʼe feala ke ke maʼu loto. Faiga ke ke manatuʼi te ʼu kupu ʼo mole ke sioʼi te tohi, pea ke vakavakaʼi leva pe kua ke maʼu loto.