‘Koutou Kofuʼi Te Kātaki Fualoa’

“Koutou kofuʼi foki te ʼu ʼofa mamahi ʼo te manavaʼofa . . . pea mo te kātaki fualoa.”—Kolose 3:12, MN.

1. Koutou fakamatala he faʼifaʼitaki lelei ʼo ʼuhiga mo te kātaki fualoa.

KO RÉGIS ʼaē ʼe nofo ʼi te potu saute-uesite ʼo Falani, neʼe liliu ko te Fakamoʼoni ʼa Sehova ʼi te 1952. Lolotoga ni ʼu taʼu neʼe faiga tona ʼohoana ke ina fakavaivaiʼi tana tauhi ʼaē kia Sehova. Neʼe ina faiga ke ina puhi te ʼu foʼi teka ʼo tana moto ke ʼaua naʼa ʼalu ki tana ʼu fono, pea ʼi te tahi ʼaho neʼe ina muliʼi ia Régis ʼi tana fai faka mafola, ʼo ina fakalainoaʼi ia ia ʼi tana fai palalau mo te hahaʼi ki te logo lelei ʼo te Puleʼaga. Logola tana ʼu fakafeagai mālohi ʼaia, kae neʼe kātakiʼi aipe e Régis tana ʼu aga ʼaia. Koia, ʼe ko he faʼifaʼitaki lelei maʼa te kau Kilisitiano fuli, koteʼuhi ʼe fakamaʼua e Sehova ki tana kau atolasio fuli ke nātou kātakiʼi fualoa ʼi tanatou ʼu felogoi mo te hahaʼi.

2. Koteā te faka ʼuhiga totonu ʼi te faka Keleka ʼo te kupu “kātaki fualoa,” pea ʼe faka ʼuhiga feafeaʼi te kupu ʼaia?

² Ko te kupu faka Keleka “kātaki fualoa” ko tona faka ʼuhiga totonu ko te “lolomi ʼo tokita laumālie.” ʼE tuʼa hogofulu te fakaʼaogaʼi e te Traduction du monde nouveau ia te kupu “kātaki fualoa,” pea ʼe ina fakaʼaogaʼi tuʼa tahi te “haga kātaki.” Ko te ʼu kupusiga palalau faka Hepeleo pea mo faka Keleka ʼaē neʼe fakaliliu ʼaki te kupu “kātaki fualoa,” ʼe faka ʼuhiga ki te faʼa kātaki pea mo te tuai ʼi te ʼita.

3. Neʼe koteā te manatu kehekehe ʼa te kau Kilisitiano pea mo te kau Keleka ʼo te ʼuluaki sēkulō ki te kātaki fualoa?

³ Ko te kau Keleka ʼo te ʼuluaki sēkulō neʼe mole nātou faka ʼuhigaʼi te kātaki fualoa ohage ko he vilitute. Neʼe mole fakaʼaogaʼi te kupu ʼaia e te kau filosofia stoïciens. ʼI te manatu ʼa te tagata sivi Tohi-Tapu ko William Barclay, ko te kātaki fualoa “ ʼe fakafeagai ia ki te vilitute ʼa te kau Keleka,” koteʼuhi neʼe nātou laupisi ʼe “mole nātou tali ke tauveleʼi nātou peʼe fai age he meʼa ʼe kovi.” ʼE ina ʼui fēnei: “Maʼa te kau Keleka, ko te tagata ʼaē ʼe mālohi, ʼe ko he tahi ʼe ina fakahoko anai te lagavaka, kae ki te kau Kilisitiano, ko te tagata ʼaē ʼe mālohi, ʼe ko he tahi māʼiape la peʼe ina lavaʼi kae ʼe mole ina fai te meʼa ʼaia.” ʼE lagi neʼe faka ʼuhiga e te kau Keleka te kātaki fualoa ohage ko he vaivaiʼaga, kae ʼi tona fakahagatonu, “ko he meʼa fakavale ʼa te ʼAtua ʼe poto age ia ʼi te tagata, pea ko he meʼa vaivai ʼa te ʼAtua ʼe mālohi age ia ʼi te tagata.”—1 Kolonito 1:25, MN.

Te Faʼifaʼitaki ʼo Te Kātaki Fualoa ʼa Kilisito

4, 5. Koteā te faʼifaʼitaki fakatalakitupua neʼe tuku e Sesu ʼo ʼuhiga mo te kātaki fualoa?

⁴ ʼO hoa mai kia Sehova, neʼe tuku e Kilisito Sesu te faʼifaʼitaki lelei ʼaupito ʼo ʼuhiga mo te kātaki fualoa. Neʼe fakahā e Sesu te loto lolomi lahi ʼi te ʼu temi faigataʼa ʼaupito, pea neʼe fakakikite fēnei ʼo ʼuhiga mo ia: “Neʼe gaohi koviʼi ʼaupito, kae neʼe ina tuku ke fakamamahiʼi ia ia; ʼo mole ina avahi pe la tona gutu. Ohage ko he akeno neʼe taki ki te tāmateʼiʼaga manu; pea ohage ko he ōvi kua gutu mate ʼi muʼa ʼo nātou ʼaē ʼe nātou tele tona ʼu fulu, ʼo toe feiā mo ia neʼe mole ina avahi pe la tona gutu.”—Isaia 53:7.

⁵ Lolotoga tona minisitelio ʼi te kele, neʼe fakahā e Sesu te kātaki fualoa makehe! Neʼe ina ʼutaki te ʼu fehuʼi kākā ʼo tona ʼu fili pea mo te ʼu laukovi ʼo nātou ʼaē neʼe fakafeagai kia te ia. (Mateo 22:15-46; 1 Petelo 2:23) Neʼe ina kātakiʼi tana ʼu tisipulo, logola tanatou fihi tuʼumaʼu pe ko ai ʼaē neʼe lahi age ia nātou. (Maleko 9:33-37; 10:35-45; Luka 22:24-27) Pea neʼe loto lolomi ʼaupito ia Sesu ʼi te po ʼaē neʼe lavakiʼi ai, he neʼe māʼumoea ia Petelo pea mo Soane logola tana ʼosi ʼui age ʼaē ke nā nonofo “alaala”!—Mateo 26:36-41.

6. Neʼe fua lelei feafeaʼi kia Paulo te kātaki fualoa ʼa Sesu, pea koteā te ako ʼe tou maʼu mai ai?

⁶ ʼI te ʼosi ʼo tona mate pea mo tona fakatuʼuake, neʼe kātaki fualoa aipe ia Sesu. Neʼe mahino lelei te faʼahi ʼaia ki te ʼapositolo ko Paulo, heʼe ʼi muʼa atu neʼe kau mo ia ki te fakatagaʼi ʼo te kau Kilisitiano. Neʼe ina tohi fēnei: “E mooni te folafola aeni pea e tuha ke tali e te tagata fuape: nee haele mai Kilisito Sesu ki te malama-nei o fakamauli te hahai agahala, pea ia natou alâ, e ko au te uluaki. Pea uhi ko te mea aia, nee au tali te manavaofa, koteuhi ke uluaki fakaha e Sesu Kilisito ia te au te katoa o tana kataki, pea mo ina too au ko he faifaitakiʼaga kia natou e tui anai kia te ia o uhiga mo te mauli heegata.” (1 Timoteo 1:15, 16) Logola te ʼu meʼa ʼaē neʼe tou fai ʼi muʼa atu, kae kapau ʼe tou fakatafito tatatou tui kia Sesu, pea ʼe ina kātakiʼi fualoa anai tatou—heʼe falala ʼe tou fakatupu anai “[te] u gaue e tuha mo te fakahemala.” (Gaue 26:20; Loma 2:4) ʼE hā mai ʼi te ʼu logo ʼaē neʼe tala e Sesu ki te ʼu kokelekasio e fitu ʼi Asie Mineure, ʼe kātaki fualoa heʼe falala ʼe tou fetogi anai.—Apokalipesi, kapite 2 pea mo te kapite 3.

Ko Te Fua ʼo Te Laumālie

7. Koteā te pikipikiga ʼo te kātaki fualoa pea mo te laumālie maʼoniʼoni?

⁷ ʼI te kapite 5 ʼo tana tohi ki te kau Kalate, ʼe fakakeheʼi e Paulo te ʼu gāue ʼo te kakano pea mo te ʼu fua ʼo te laumālie. (Kalate 5:19-23) Ko te kātaki fualoa ʼe kau ki te ʼu kalitate ʼo Sehova, koia ko te kalitate ʼaia ʼe haʼu mai ia te ia pea ʼe ko te fua ʼo tona laumālie. (Ekesote 34:6, 7) ʼIo, ʼe tuʼulaga fā te kalitate ʼaia ʼi te ʼu fakamatalatala ʼa Paulo ʼo te ʼu fua ʼo te laumālie maʼoniʼoni, ʼaē “ko te ofa, te fiafia, te tokalelei, . . . te agalelei, te agaofa, te agatonu, te agamalu, te agalolomi.” (Kalate 5:22, 23) Koia, ka maʼu e te ʼu kaugana ʼa te ʼAtua ia te kātaki fualoa fakaʼatua, pea ʼe nātou mulimuli ki te laumālie maʼoniʼoni.

8. Koteā ʼaē ka feala ai ke tou fakatuputupu te fua ʼo te laumālie maʼoniʼoni, ohage la ko te kātaki fualoa?

⁸ Kae ʼe mole faka ʼuhiga leva, ʼe fakaʼaogaʼi fakamālohi e Sehova tona laumālie ki he tahi. ʼE tonu ke tou tali lelei tana takitaki. (2 Kolonito 3:17; Efeso 4:30) ʼE tou faka fealagia ai ke gāue te laumālie ia tatou mokā ʼe tou maʼuliʼi tona ʼu fua ʼi te ʼu meʼa fuli ʼaē ʼe tou fai. ʼI tana fakamatalatala te ʼu gāue ʼo te kakano pea mo te ʼu fua ʼo te laumālie, neʼe ʼui fēnei e Paulo: “Kapau e tou mauli i te Laumalie, pea tou fagona i te Laumalie. Naa koutou faihala, e mole nukinukiʼi te Atua. He ko te mea ae e to e te tagata pea e ina utu anai. Ko ia ae e ina to i tona kakano, mai te kakano e ina utu anai te aga maveuveu. Kae kia ia ae e ina to i te Laumalie, mai te Laumalie e ina utu anai te mauli heegata.” (Kalate 5:25; 6:7, 8) Kapau ʼe tou fia fakatuputupu lelei te kātaki fualoa, pea ʼe tonu foki ke tou maʼu mo te ʼu fua ʼaē ʼe fakatupu e te laumālie maʼoniʼoni ʼi te kau Kilisitiano.

“Ko Te ʼOfa ʼe Kātaki Fualoa”

9. He koʼe neʼe ʼui e Paulo ki te kau Kolonito “ko te ʼofa ʼe kātaki fualoa”?

⁹ Neʼe fakahā e Paulo ʼe ʼi ai te pikipikiga makehe ʼo te ʼofa pea mo te kātaki fualoa, ʼi tana ʼui ʼaenī: “Ko te ʼofa ʼe kātaki fualoa.” (1 Kolonito 13:4, MN ) Ko te tagata sivi Tohi-Tapu ko Albert Barnes, ʼe ina ʼui ko Paulo neʼe ina faka maʼuhigaʼi te faʼahi ʼaia ʼuhi ko te fakataupiepie pea mo te ʼu fihi ʼaē neʼe hoko ʼi te kokelekasio ʼo Kolonito. (1 Kolonito 1:11, 12) Neʼe toe ʼui fēnei e Barnes: “Ko te kupu ʼaē neʼe fakaʼaogaʼi ʼi henī [ki te kātaki fualoa] ʼe fakafeagai ki te hoko ʼita: mokā fai mai he ʼu palalau pea mo he ʼu manatu kovi pea mokā ʼita mai he tahi. ʼE hā ʼaki ai ko he tahi ʼe ina KĀTAKIʼI FUALOA mokā fakamamahiʼi, peʼe ka fai age he ʼu meʼa ke ʼita ai.” ʼE lagolago tuʼumaʼu te ʼofa pea mo te kātaki fualoa ki te tokalelei ʼo te kokelekasio faka Kilisitiano.

10. (a) E feafeaʼi te tokoni mai ʼo te ʼofa ke tou kātaki fualoa, pea koteā te tokoni neʼe fai e Paulo ki te faʼahi ʼaia? (b) Koteā te fakamatala neʼe fai e te tagata sivi Tohi-Tapu ʼo ʼuhiga mo te kātaki fualoa pea mo te agalelei ʼa te ʼAtua? (Vakaʼi te kiʼi nota ʼi te lalo pasina.)

¹⁰ “Ko te ʼofa ʼe kātaki fualoa pea mo agalelei. Ko te ʼofa . . . ʼe mole ina kumi pe te meʼa ʼaē ʼe ʼaoga kia te ia, ʼe mole ʼita ia.” Koia, ʼe lahi te ʼu ʼaluʼaga ʼe tokoni mai ai te ʼofa ke tou kātaki fualoa.a (1 Kolonito 13:4, 5, MN ) Ko te ʼofa ʼe ina faka fealagia ke tou fekātakiʼaki pea ke tou manatuʼi ʼe tou agahala fuli. ʼE tokoni kia tatou ke tou nofo tokaga pea mo tou loto fakamolemole. ʼE fakaloto mālohiʼi tatou e Paulo ke tou haʼele “aki te agavaivai fuape mo te agamalu, fakatahi mo te kataki, koutou fe’katakiʼaki i te ofa; i tautou faiga o taofi te faifaitahi o te Laumalie aki te noo o te tokalelei.”—Efeso 4:1-3.

11. He koʼe ʼe maʼuhiga tāfito ke tou kātaki fualoa ki te kau Kilisitiano?

¹¹ Ko te kātaki fualoa ʼo tana hahaʼi ʼe lagolago ki te tokalelei pea mo te fīmālie ʼa te kau Kilisitiano, ʼi te ʼu kokelekasio, ʼi te ʼu Petele, ʼi te ʼu nofoʼaga misionea, ʼi te ʼu laga fale, peʼe ko te ʼu faleako Kilisitiano. ʼI ʼihi temi ʼe lava hoko te ʼu fihifihia heʼe mole tatau tonatou ʼu ʼulugaaga, te ʼu meʼa ʼaē ʼe nātou loto kiai, tonatou faʼahiga ako, te ʼu lekula ki te aga fakaʼapaʼapa, ʼo feiā mo te aga fakamaʼa. ʼE toe hoko te ʼu fihifihia feiā ʼi te ʼu maʼuli faka famili. ʼE maʼuhiga ke kita tuai ʼi te ʼita. (Tāʼaga Lea 14:29; 15:18; 19:11) ʼE ʼaoga kia tatou fuli ke tou kātaki fualoa heʼe tou falala ʼe lelei age anai.—Loma 15:1-6.

ʼE Tokoni Mai Te Kātaki Fualoa Ke Tou Lotoʼutaki

12. He koʼe ʼe ʼaoga te kātaki fualoa ʼi te ʼu temi faigataʼa?

¹² ʼE tokoni mai te kātaki fualoa ke tou ʼutakiʼi he ʼu ʼaluʼaga faigataʼa ʼe hoko fualoa, peʼe mole maʼu kiai he puleʼaki fakavilivili. Neʼe hoko te meʼa ʼaia kia Régis, ʼaē neʼe tou talanoa ki ai ʼi te kamataʼaga. Neʼe fualoa te fakafeagai ʼo tona ʼohoana ki tana tauhi kia Sehova. Kae ʼi te tahi ʼaho neʼe haʼu tagi kia ia ʼo ʼui age: “ ʼE ʼau ʼiloʼi ko te moʼoni. Tokoni mai. Kua ʼau fia ako te Tohi-Tapu.” Pea neʼe papitema ʼo liliu ai ko te Fakamoʼoni. ʼE ʼui fēnei e Régis: “ ʼE ko te fakamoʼoni ʼaia neʼe tapuakiʼi e Sehova te ʼu taʼu ʼaē neʼe ʼau kātakiʼi ai te ʼu aga ʼo toku ʼohoana.” Neʼe fakapale tana kātaki fualoa.

13. Koteā ʼaē neʼe tokoni kia Paulo ke lotoʼutaki, pea ʼe lava ʼaoga feafeaʼi kia tatou tana faʼifaʼitaki ke tou lotoʼutaki?

¹³ ʼI te ʼuluaki sēkulō, ko te ʼapositolo ko Paulo neʼe ko te faʼifaʼitaki lelei ʼo ʼuhiga mo te kātaki fualoa. (2 Kolonito 6:3-10; 1 Timoteo 1:16) ʼI te ʼu lakaga fakaʼosi ʼo tona maʼuli, ʼi tana tokoniʼi tona kaugā fagona tūpulaga ko Timoteo, neʼe ʼui age e Paulo ʼe tau anai te kau Kilisitiano fuli mo te ʼu faigataʼaʼia. Neʼe talanoa Paulo ʼo ʼuhiga mo ia totonu pea mo fakahā lelei ʼe ʼaoga ki te faʼa kātaki te ʼu kalitate faka Kilisitiano. Neʼe ina tohi fēnei: “Kae kia koe, nee ke muliʼi mo te agatonu taku akonaki, taku aga, taku tuutuuni, taku tui, taku kataki, toku ofa, taku faafai, te u fakataga, mo te u mamahi nee tau mo au i Atioke, i Ikoniume mo Lisitala. Ko te u fakataga aia nee au tali. Pea nee haofaki au e te Aliki mai te u fakataga fuape alâ. Pea ko natou katoa e fia mauli faka lotu ia Kilisito Sesu, e fakatagai anai.” (2 Timoteo 3:10-12; Gaue 13:49-51; 14:19-22) Ke feala hatatou lotoʼutaki, ʼe ʼaoga kia tatou fuli te tui, te ʼofa, pea mo te kātaki fualoa.

Tou Kofuʼi Te Kātaki Fualoa

14. Koteā ʼaē neʼe fakatatau kiai e Paulo te ʼu kalitate fakaʼatua ohage ko te kātaki fualoa, pea koteā te tokoni ʼaē neʼe ina foaki ki te kau Kilisitiano ʼo Kolose?

¹⁴ Ko te ʼapositolo ko Paulo neʼe ina fakatatau te kātaki fualoa pea mo te tahi ʼu kalitate fakaʼatua ki he ʼu mutuʼi meʼa ʼe tonu ke kofuʼi e he Kilisitiano mokā kua ina līaki te ʼu agaaga ʼo te “ ʼuhigaʼi tagata ʼāfea.” (Kolose 3:5-10, MN ) Neʼe ina tohi fēnei: “Ohage ko he ʼu hahaʼi neʼe fili e te ʼAtua, [ko he ʼu hahaʼi] maʼoniʼoni pea mo ʼofainaʼi, koutou kofuʼi foki te ʼu ʼofa mamahi ʼo te manavaʼofa, te agalelei, te manatu agavaivai, te agamālū pea mo te kātaki fualoa. Koutou haga fekātakiʼaki pea mo fefakamolemoleʼaki ʼaki he lotolelei, mo kapau ʼe ʼi ai he tahi ʼe ina koviʼia he meʼa ʼa he tahi age. Ohage ko te lotolelei ʼa Sehova ke ina fakamolemole kia koutou, ke koutou toe fai feiā pe mo koutou. Kae ʼo hilifaki ki te ʼu meʼa fuli ʼaia, koutou kofuʼi ia te ʼofa, he ko he noʼo haohaoa ia ki te logo tahi.”—Kolose 3:12-14, MN.

15. Koteā te ʼu fua mo kapau ‘ ʼe kofuʼi’ e te kau Kilisitiano te kātaki fualoa pea mo te tahi ʼu kalitate?

¹⁵ ʼE lava fakatokatoka e te hahaʼi ʼo te kokelekasio te ʼu fihifihia pea mo te logo tahi ʼi te tauhi kia Sehova, mo kapau ʼe nātou ‘kofuʼi’ te manavaʼofa, te agalelei, te agavaivai, te agamālū, te kātaki fualoa pea mo te ʼofa. ʼE ʼaoga tāfito ke kātaki fualoa te ʼu tagata taupau, ʼi te ʼu temi ʼaē ʼe tonu ai ke nātou fakatonutonuʼi he tahi Kilisitiano, pea ʼe lahi tona faʼahiga fai. Neʼe fakahā e Paulo te aga ʼaē ʼe tonu ke fai ʼi tana faitohi ʼaenī kia Timoteo: “Akonakiʼi, fakatonutonuʼi, fakaloto mālohiʼi ʼaki he faʼa kātaki fualoa, pea ʼaki he fakapotopoto ʼi te faiakonaki.” (2 Timoteo 4:2, MN ) Ei, ko te ʼu ōvi ʼa Sehova ʼe tonu ke gaohi tuʼumaʼu ʼaki te kātaki fualoa, mo te aga fakaʼapaʼapa pea mo te agamālū.—Mateo 7:12; 11:28; Gaue 20:28, 29; Loma 12:10.

“Koutou Kātaki Fualoa Ki Te Tagata Fuape”

16. Koteā te fua ʼe tou lava maʼu mo kapau ʼe tou “kātaki fualoa ki te tagata fuape”?

¹⁶ ʼUhi heʼe kātakiʼi fualoa e Sehova ia te malamanei, koia ʼaē ʼe tonu ai ke tou “kātaki fualoa . . . te tagata fuape.” (1 Tesalonika 5:14, MN ) Ko tona faka ʼuhiga ke kita kātakiʼi totatou ʼu famili ʼaē ʼe mole tui kia Sehova, totatou ʼu vāhaʼa fale, totatou ʼu kaugā gāue, pea mo totatou ʼu kaugā ako. Kua lahi te ʼu manukinuki neʼe tekeʼi e te kau Fakamoʼoni, pea ʼi ʼihi temi neʼe nātou tauʼi te ʼu fasituʼu peʼe ko te ʼu fakafeagai mālohi mai tonatou ʼu kaugā gāue peʼe ko tonatou ʼu kaugā ako. (Kolose 4:5, 6) Neʼe tohi fēnei e te ʼapositolo ko Petelo: “Ke ia koutou he aga matamatalelei ʼi te lotolotoiga ʼo te ʼu puleʼaga, ke feala ʼi te temi ʼaē ʼe nātou laukovi ai kia koutou ohage ko he kau agakovi, ke nātou faka kolōliaʼi te ʼAtua ʼi te ʼaho ʼo tana ʼaʼahi, ʼuhi ko tanatou sio mata ki takotou ʼu gāue lelei.”—1 Petelo 2:12, MN.

17. ʼE tou lava faʼifaʼitakiʼi feafeaʼi te ʼofa pea mo te kātaki fualoa ʼa Sehova, pea he koʼe ʼe tonu ke tou fai feiā?

¹⁷ Ko te kātaki fualoa ʼa Sehova ʼe ina lava hāofaki anai te toko miliona hahaʼi. (2 Petelo 3:9, 15) Kapau ʼe tou faʼifaʼitakiʼi te ʼofa pea mo te kātaki fualoa ʼa Sehova, ʼe tou haga kātaki anai ʼo faka mafola te logo lelei ʼo te Puleʼaga ʼo te ʼAtua pea mo akoʼi te hahaʼi ke nātou fakalogo ki te takitaki ʼa te Puleʼaga ʼo Kilisito. (Mateo 28:18-20; Maleko 13:10) Kapau ʼe tou tuku tatatou faka mafola, ʼe faka ʼuhiga anai ʼe tou fia tuʼakoi te kātaki fualoa ʼa Sehova pea ʼe mole tou fakamoʼoni ki tana fakatuʼutuʼu, ʼaē ko te taki ʼo te hahaʼi ki te fakahemala.—Loma 2:4.

18. Neʼe koteā te faikole ʼa Paulo maʼa te kau Kolose?

¹⁸ ʼI tana faitohi ki te kau Kilisitiano ʼo Kolose, ʼi Asie Mineure, neʼe tohi fēnei e Paulo: “Ko te tupuʼaga foki la ʼaia, talu mai te ʼaho ʼaē neʼe mātou logo kiai, neʼe mole tuku tamatou faikole maʼa koutou pea mo kole ke koutou fonu ʼi te ʼatamai mālama totonu ki tona finegalo, ʼaki te poto pea mo te mahino fakalaumālie, ke feala hakotou haʼele ʼi he ʼaluʼaga ʼe tau mo feʼauga mo Sehova, ke koutou lelei katoa kia te ia, ʼi takotou haga fakatupu he fua ʼi te gāue lelei fuli pea mo tuputupu ʼi te ʼatamai mālama totonu ʼa te ʼAtua, ʼo faka mālohiʼi ʼaki te mālohi katoa ʼi te fakafuafua ʼo te mālohi ʼaē tau mo te kolōlia ke feala ai ke katoa tanatou ʼutaki pea ke nātou kātaki fualoa aipe ʼaki he loto fiafia.”—Kolose 1:9-11, MN.

19, 20. (a) ʼE tou lava tekeʼi feafeaʼi te manatu ʼaē ko te kātaki fualoa ʼa Sehova ʼe ko he ʼahiʼahi? (b) Koteā te ʼu lelei ʼe tou maʼu anai mokā ʼe tou kātaki fualoa?

¹⁹ ʼE mole faigataʼa anai kia tatou te kātaki fualoa ʼa Sehova mo kapau ʼe tou “fonu ʼi te ʼatamai mālama totonu ki tona finegalo,” heʼe ina loto “ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.” (1 Timoteo 2:4, MN ) ʼE tou “haga fakatupu [anai] he ʼu fua ʼi te gāue lelei fuli,” tāfito ʼi te faka mafola ʼo te “Logolelei . . . o te Puleaga.” (Mateo 24:14) Kapau ʼe tou agatonu ʼo fai te meʼa ʼaia, pea ʼe haga anai ia Sehova “ ʼo faka mālohiʼi [tatou] ʼaki te mālohi katoa,” ʼo ina faka fealagia ke tou “ ʼutaki pea ke [tou] kātaki fualoa aipe ʼaki he loto fiafia.” Kapau ʼe tou fai te faʼahi ʼaia, ʼe tou “haʼele [anai] ʼi he ʼaluʼaga ʼe tau mo feʼauga mo Sehova,” pea ʼe tou maʼu anai te tokalelei heʼe tou ʼiloʼi ʼe tou “lelei katoa kia te ia.”

²⁰ ʼOfa pe ke tou tui papau ki te fakapotopoto ʼo te kātaki fualoa ʼa Sehova. ʼE gāue ki totatou hāofaki pea mo te hāofaki ʼo nātou ʼaē ʼe nātou fakalogo ki tatatou faka mafola pea mo tatatou faiakonaki. (1 Timoteo 4:16) Ka tou maʼuliʼi te fua ʼo te laumālie—te ʼofa, te agalelei, te agamālū, te agavaivai, pea mo te loto lolomi—ʼe nātou faka fealagia anai ke tou kātaki fualoa ʼaki he loto fiafia. ʼE feala anai ke tou maʼuli tokalelei mo totatou famili, pea mo totatou ʼu tēhina mo tuagaʼane ʼi te kokelekasio. ʼE toe tokoni anai te kātaki fualoa ke tou kātakiʼi totatou ʼu kaugā gāue peʼe ko totatou ʼu kaugā ako. Pea ʼe ʼi ai anai te fakatuʼutuʼu ʼo tatatou kātaki fualoa, ʼaē ko te hāofaki ʼo te kau agakovi pea mo faka kolōliaʼi ʼo Sehova, te ʼAtua ʼo te kātaki fualoa.

[Kiʼi nota]

ʼE Feala Koa Hakotou Fakamahino?

• Ko te ʼu ʼaluʼaga fea ʼaē neʼe tuku ai e Kilisito he faʼifaʼitaki fakatalakitupua ʼo ʼuhiga mo te kātaki fualoa?

• Koteā ʼaē ka tokoni anai kia tatou ke tou gāueʼi te kātaki fualoa?

• ʼE tokoni feafeaʼi te kātaki fualoa ki te ʼu famili, mo te kau Kilisitiano pea mo te ʼu tagata ʼāfea?

• ʼE fua lelei feafeaʼi anai kia tatou pea mo niʼihi age ia tatatou kātaki fualoa?

[Paki ʼo te pasina 15]

Māʼiape la mo te ʼu temi faigataʼa ʼaupito, neʼe kātakiʼi e Sesu tana kau tisipulo

[Paki ʼo te pasina 16]

ʼE fakaloto mālohiʼi te ʼu tēhina taupau ke nātou tuku he faʼifaʼitaki lelei ʼo ʼuhiga mo te kātakiʼi fualoa ʼo tonatou ʼu tēhina

[Paki ʼo te pasina 17]

ʼE tou haga faka mafola anai te logo lelei mo kapau ʼe tou faʼifaʼitakiʼi te ʼofa pea mo te kātaki fualoa ʼa Sehova

[Paki ʼo te pasina 18]

Neʼe faikole ia Paulo maʼa te kau Kilisitiano ke nātou “kātaki fualoa aipe ʼaki he loto fiafia”