ʼE Koutou Tali Gafua Koa He ʼu Meʼa?

NEʼE heʼeki koutou ʼiʼita koa ki he tahi neʼe ina fai he aga ʼe mole lelei? ʼE koutou foimo fai koa he puleʼaki mokā ʼe ʼi ai he ʼu meʼa kovi ʼe nātou fakatupu kovi ki tokotou ʼu kaumeʼa?

ʼI ʼihi temi, ʼe maʼua ke foimo maʼu he puleʼaki moʼo tāʼofi tautonu he agahala mamafa. Ohage la, ʼi te 16 sēkulō ʼi muʼa ʼo totatou temi, ʼi te temi ʼaē neʼe fai ai e te kau Iselaele he ʼu aga heʼeʼaoga, ko Finease te mokopuna ʼo Alone, neʼe ina foimo fai he puleʼaki moʼo pulihi te meʼa ʼaē neʼe kovi. Neʼe leleiʼia e Sehova ʼAtua te meʼa ʼaē neʼe ina fai, ʼo ʼui maʼana: “[Ko Finease] neʼe ina fakamaliu kehe toku hāūhāū mai te ʼu foha ʼo Iselaele, ʼi tana mole fakagafua ʼi te lotolotoiga ʼo nātou he aga ʼe fakafeagai kia te ʼau.”—Faka au 25:1-11.

Neʼe lelei te meʼa ʼaē neʼe fai e Finease moʼo tāʼofi te agahala ʼaē neʼe mafola. Kae ʼe feafeaʼi mo kapau ʼe tou ʼiʼita pea mole tou matāʼofi ʼuhi ko he ʼu kiʼi hala ʼa ʼihi? ʼE feala ke ina fakaliliu tatou ko he ʼu hahaʼi ʼe faitotonu fau, ʼe mole tou tali ke tōtō he aga ʼa he tahi—ko he tahi ʼe mole ina fakamolemole gafua te ʼu hala ʼa ʼihi. Koteā ʼaē ʼe lava tokoni kia tatou ke tou tekeʼi te hele ʼaia?

‘ ʼE Fakamolemole Takotou ʼu Agahala Fuli e Sehova’

Ko Sehova ʼe “ko te ʼAtua ʼe maheka (fakamalotoloto); ko te ʼAtua ʼe mole ina tali he fakataupiepie.” (Ekesote 20:5, kiʼi nota ʼi te lalo pasina) Ko ia ko te Tupuʼaga, ʼe tāu mo ia ke ina fakamaʼua mai ke tou foaki age he tauhi ʼāteaina. (Apokalipesi 4:11) Kae ʼe tali gafua e Sehova te ʼu vaivaiʼaga ʼo te tagata. ʼO ʼuhiga mo te ʼAtua, neʼe hiva fēnei te tagata fai pesalemo ko Tavite: “Ko Sehova ʼe loto manavaʼofa pea mo agaʼofa, tuai ʼi te ʼita pea mo mahu ʼi te lotoʼofa. ʼE mole ina fai anai he ʼu valoki ʼo talu ai . . . Neʼe mole ina fai he meʼa kia tatou ʼo mulimuli ki tatatou ʼu agahala; pea neʼe mole ina tuku mai kia tatou te tautea ʼaē ʼe tonu ke hoko kia tatou, ʼo mulimuli ki tatatou ʼu hala.” Ei, ko te ʼAtua ‘ ʼe ina fakamolemole tatatou ʼu agahala fuli’ mo kapau ʼe tou fakahemala.—Pesalemo 103:3, 8-10.

Koteʼuhi ʼe mahino ki te ʼuhiga agahala ʼo te tagata, ʼe mole “valoki” e Sehova he ʼu tagata agakovi neʼe kua fakahemala. (Pesalemo 51:5; Loma 5:12) ʼI tona fakahagatonu, ʼe ina fakatuʼutuʼu ke ina pulihi te agahala pea mo te heʼe haohaoa. Kae ʼi muʼa ʼo tana fakahoko katoa te faʼahi ʼaia, ʼe mole ina fai mai te meʼa ʼaē “ ʼe tonu ke hoko kia tatou,” pea ʼe fakamolemole lahi ia te ʼAtua kia tatou ʼaki te sakilifisio faitotogi ʼo Sesu Kilisito. Kanapaula neʼe mole manavaʼofa ia Sehova ʼi te temi ʼaē ʼe ʼaoga ai, ʼe mole kei maʼuli nei he tahi. (Pesalemo 130:3) ʼE feala ke tou loto fakafetaʼi ki tatatou Tāmai ʼe ʼi selo, ʼaē ʼe matatonu tana fakamaʼua mai he tauhi ʼāteaina, heʼe ko te ʼAtua ʼe fakamolemole gafua!

ʼE ʼAoga Ke Tou Aga Fakapotopoto

Kapau ko te Tuʼi ʼAliki ʼo te ʼatulaulau ʼe ina tali gafua te ʼu agakovi ʼa te tagata heʼe haohaoa, pea ʼe mole tonu koa la ke toe feiā mo tatou? Neʼe faka ʼuhiga te tali gafua ohage “ko he fakatuʼutuʼu ke kita kātakiʼi he ʼu manatu peʼe ko he ʼu aga ʼa ʼihi.” ʼE tou maʼu koa te taʼi faʼahiga manatu ʼaia—ke kita kātakiʼi pea mo tali, mokā palalau ʼihi pea mo nātou fai he ʼu meʼa ʼe lagi mole tou leleiʼia kae mole ko he ʼu agahala mamafa?

Kae ʼe tonu ke tou tokakaga naʼa lahi fau te ʼu meʼa ʼaē ʼe tou tali gafua. Ohage la, ʼe ko he meʼa kovi ʼaupito mokā tali e te kau pule lotu ia te kau patele ʼaē ʼe nātou fakaʼalikiʼi tuʼumaʼu te ʼu tamaliki tagata pea mo te ʼu tamaliki fafine. Neʼe ʼui fēnei e te tagata faitohi ʼi te sulunale ʼi Ilelani: “Ko te ʼu pule lotu ʼe nātou faka ʼuhiga te ʼu meʼa ʼaē neʼe nātou fai ki te ʼu tamaliki ohage ko he ʼu kiʼi agahala, pea neʼe nātou haga pe nātou ʼo ʼave te kau patele ʼaia [ki te tahi koga meʼa].”

ʼE lelei koa te taʼi tali gafua ʼaia, ʼaē ko te fetogi koga meʼa ʼo te taʼi tagata ʼaia? Kailoa! Tou fakakaukauʼi age muʼa mo kanapaula neʼe fakagafua e he kau tōketā ke hoko atu te fai tafa ʼa he tōketā, ʼo nātou ʼave ia ia ki he tahi lopitali logola neʼe kua mamate ʼihi hahaʼi mahahaki pea mo māʼimoa ia ia. Ko te taʼi “tali gafua” ʼaia, ʼe ko he faihala ʼi te agatonu ʼi te gāue. Pea ʼe feafeaʼi kia nātou ʼaē kua mamate peʼe lotomamahi ʼuhi ko te mole gāue tokaga ʼa te ʼu tōketā, peʼe ko tanatou fai fakapō?

ʼE ʼi ai te tahi tuʼutāmaki ʼe lava hoko mokā lahi fau te tali gafua. ʼI te nofo ʼa Sesu ʼi te kele, ko ʼihi Sutea neʼe ko te kau Selote agakovi, pea neʼe nātou fia mulimuli ki te faʼifaʼitaki ʼa Finease moʼo faka lākatonuʼi tanatou ʼu gāue. Ko te tahi agamālohi ʼa ʼihi Selote, ko tanatou “fakatahi ki te hahaʼi ʼo Selusalemi ʼi te ʼu lafeti pea mo te tahi age ʼu ʼaluʼaga feiā, pea ʼaki tanatou ʼu hele neʼe nātou matematehi tonatou ʼu fili.”

ʼI totatou ʼuhiga Kilisitiano, ʼe mole tou faʼifaʼitakiʼi anai ʼi he temi te meʼa ʼaē neʼe fai e te kau Selote, ʼo tou ʼohofiʼi ia nātou ʼaē ʼe tou fehihiʼa kiai. Kae ʼe ʼi ai koa he tahi ʼu faʼahiga fehiʼa ʼe ina taki ai tatou ke tou ʼohofiʼi ia nātou ʼaē ʼe mole tou ʼoʼofa kiai—ʼo lagi tou fatufatuʼi nātou? Kapau ʼe tou tali gafua moʼoni, pea ʼe mole tou fai anai te taʼi ʼu palalau fakaloto mamahi ʼaia.

Ko te kau Faliseo ʼo te ʼuluaki sēkulō neʼe ko te tahi ʼaia kūtuga neʼe loto fefeka. Neʼe nātou fakamāuʼi tuʼumaʼu te hahaʼi pea neʼe mole nātou loto fakamolemole ki te ʼuhiga heʼe haohaoa ʼo te tagata. Ko te kau Faliseo fialahi neʼe nātou meʼa noaʼi te hahaʼi, pea neʼe nātou fasituʼu kia nātou ʼo nātou ʼui ʼe ko he ʼu “hahai malaia.” (Soane 7:49) Koia neʼe tonu ai te tautea ʼaē neʼe fai e Sesu ki te ʼu tagata ʼaia ʼaē neʼe faitotonu fau, ʼi tana ʼui ʼaē: “Malaʼia kia koutou, kau sekelipa mo koutou kau Faliseo, kau malualoi! koteʼuhi ʼe koutou foaki te vahe e tahi ʼi te hogofulu ʼo te menite, pea mo te aneto magoni, pea mo te kumino, kaʼe neʼe koutou lotonoa ki te ʼu meʼa ʼaē ʼe maʼuhiga ake ʼo te Lao, ʼaē ko te faitotonu pea mo te manavaʼofa pea mo te agatonu. Neʼe tonu ke fai te ʼu meʼa ʼaenī, pea mo ʼaua te lotonoa ki te tahi ʼu meʼa.”—Mateo 23:23, MN.

ʼI tana fai te palalau ʼaia, neʼe mole fia fakamālaloʼi e Sesu te maʼuhiga ʼaē ke taupau te Lao Faka Moisese. Neʼe ina fakahā ko te ʼu meʼa ʼaē ʼe “maʼuhiga ake,” ko te maʼuliʼi ʼo te Lao ʼaki te fakapotopoto pea mo te manavaʼofa. Ko Sesu pea mo tana kau tisipulo neʼe mole nātou loto fefeka ohage ko te kau Faliseo pea mo te kau Selote.

Ko Sehova ʼAtua pea mo Sesu Kilisito ʼe nā loto fakamolemole. Kua vave hoko mai te temi ʼaē ‘ ʼe hoko anai te lagavaka kia nātou ʼaē ʼe mole nātou ʼiloʼi ia te ʼAtua, pea mo nātou ʼaē ʼe mole fakalogo ki te logo lelei.’ (2 Tesalonika 1:6-10) Kae ʼi tana fia fai mālohi ki te faitotonu, neʼe fakahā tuʼumaʼu e Sesu te loto faʼa kātaki ʼo tana Tāmai ʼe ʼi selo, tana loto fakamolemole, pea mo tana ʼofa kia nātou fuli ʼaē ʼe nātou fia fai ki te meʼa ʼaē ʼe totonu. (Isaia 42:1-3; Mateo 11:28-30; 12:18-21) ʼI faʼifaʼitaki lelei leva ʼaē neʼe tuku mai e Sesu kia tatou!

Koutou Fekātakiʼaki

Logola ʼe tou loto ʼaupito ke fai te meʼa ʼaē ʼe totonu, kae tou maʼuliʼi te tokoni ʼa te ʼapositolo ko Paulo: “Koutou fe’katakiʼaki mo fe’fakamolemoleʼaki, kapau e mau e he tahi hona mamahi ki he tahiʼage; io, o hage ko te Aliki nee fakamolemole kia koutou, pea mo koutou, koutou fai feia.” (Kolose 3:13; Mateo 6:14, 15) Ko te tali gafua ʼe ina fakamaʼua ke tou kātakiʼi te ʼu kiʼi hala fuli ʼi te mālama heʼe haohaoa ʼaenī. ʼE tonu ke tou fakafuafua lelei te ʼu meʼa ʼaē ʼe tou loto ke fai mai e ʼihi.—Filipe 4:5.

ʼAua naʼa tou faka ʼuhiga te tali gafua ko hakita lagolago ki he meʼa ʼe kovi peʼe tou meʼa noaʼi te ʼu hala. ʼE feala ke mole faʼa ʼalutahi he faʼahiga manatu peʼe ko he aga ʼa he kaugā gāue Kilisitiano mo te ʼu lekula ʼa Sehova. Logola ʼe mole heʼeki kovi fau tana aga pe ko tana manatu ke līaki ia ia e te ʼAtua, kae ʼe tou lava foaki age he fakatokaga moʼo fakahā age ki ai ʼe maʼua ke ina fai he ʼu fetogi ʼi tona maʼuli. (Senesi 4:6, 7) ʼE ko he aga ʼofa ʼaia mokā ʼe faiga ia nātou ʼaē ʼe nātou maʼu ia te ʼu kalitate fakalaumālie ke nātou fakatonutonuʼi te tagata ʼaia ʼaki he agamālū! (Kalate 6:1) Kae ke fua lelei te fakatuʼutuʼu ʼaia, ʼe tonu ke kita fai ʼaki he loto tokaga kae mole kita fai ʼaki he aga valoki.

“ ʼAki He Agamālū Pea Mo He Fakaʼapaʼapa Lahi”

ʼE feafeaʼi hatatou kātakiʼi te hahaʼi ʼaē ʼe mole manatu tahi mo tatou ʼo ʼuhiga mo te lotu? Neʼe tohi fēnei ʼi te pepa “Leçon Générale” neʼe pulusi ʼi te ʼu Faleako fuli ʼi Ilelani ʼi te 1831: “Neʼe mole fai e Sesu Kilisito he ʼu aga mālohi ke tali e te hahaʼi tana lotu. . . . Ko te fihi mo te hahaʼi pea mo te fakamālohiʼi ʼo nātou, ʼe mole ko he ʼu aga ʼe lelei moʼo fakalotoʼi ʼo nātou ʼe tou nofo ʼi te lotu moʼoni pea ʼe nātou nonofo nātou ʼi te lotu hala. Heʼe kapau ʼe tou feiā, pea ʼe hage ia ʼe tou fakahā age ʼe mole tou maʼu he manatu faka Kilisitiano.”

Neʼe tupu te fia logo ʼa te hahaʼi ki te Folafola ʼa te ʼAtua ʼuhi ko te faʼahiga fai ʼa Sesu tana ʼu akonaki pea mo tana ʼu gāue, pea ʼe tonu ke toe feiā mo tatou. (Maleko 6:34; Luka 4:22, 32; 1 Petelo 2:21) Neʼe ina lava ʼiloʼi te ʼu meʼa ʼaē ʼi te loto ʼo te hahaʼi, koteʼuhi neʼe haohaoa pea mo ina maʼu te fakasiosio tonu ʼaē neʼe foaki age e te ʼAtua. Koia kapau neʼe ʼaoga, pea neʼe fai e Sesu he ʼu tautea mālohi ki te ʼu fili ʼo Sehova. (Mateo 23:13-33) Neʼe mole ko he loto fefeka ia tana fai te faʼahi ʼaia.

ʼE mole tou hage ko Sesu, heʼe mole tou lava ʼiloʼi te ʼu meʼa ʼaē ʼi te loto ʼo te hahaʼi. Koia ʼe tonu ai ke tou muliʼi te tokoni ʼa te ʼapositolo ko Petelo: “Koutou tāpuhā ʼi tokotou ʼu loto ia Kilisito ʼaē ko te ʼAliki, koutou nonofo teuteu tuʼumaʼu moʼo tali kia nātou ʼaē ʼe nātou fehuʼi atu te tupuʼaga ʼo takotou falala, kae koutou tali ʼaki he agamālū pea mo he fakaʼapaʼapa lahi.” (1 Petelo 3:15, MN ) ʼI totatou ʼuhiga kaugana ʼa Sehova, ʼe tonu ke tou hāofaki te ʼu meʼa ʼaē ʼe tou tui kiai, heʼe fakatafito mālohi ki te Folafola ʼa te ʼAtua. Kae ʼe tonu ke tou fai te faʼahi ʼaia ʼaki he aga fakaʼapaʼapa ki te hahaʼi ʼo toe feiā aipe ki te ʼu akonaki ʼaē kei nātou tui fakamalotoloto kiai. Neʼe tohi fēnei e Paulo: “Ke lelei tuumau tautou lea, i tona fakakonakona aki te masima, ke koutou iloi te tali e tonu ke koutou fai kia natou takitahi.”—Kolose 4:6.

ʼI tana Akonaki ʼiloa ʼi te Moʼuga, neʼe ʼui fēnei e Sesu: “Ko te meʼa fuli pe ʼe koutou loto ke fai e te hahaʼi maʼa koutou, ʼe maʼua foki mo koutou, ke koutou toe fai feiā maʼa nātou.” (Mateo 7:12, MN ) Koia tou fekātakiʼaki pea mo fakaʼapaʼapa kia nātou ʼaē ʼe tou faka mafola ki ai te logo lelei. ʼE leleiʼia anai tatou e Sehova pea ʼe tou maʼu anai te tali gafua moʼoni, mo kapau ʼe tou fakafuafua lelei tatatou faʼafai maʼa te faitotonu ʼaē ʼe ʼalutahi mo te tali gafua ʼaē ʼe fakatafito ki te Tohi-Tapu.

[Paki ʼo te pasina 23]

ʼAua naʼa koutou loto fefeka ohage ko te kau Faliseo

[Paki ʼo te pasina 23]

Neʼe fakahā e Sesu te tali gafua ʼa tana Tāmai. Kaeā koutou?