Ke Mālohi Takotou ‘Falala Ki Te Fakamaʼuli’!
“Teu . . . te puloga o te falala o te fakamauli.”—1 Tesalonika 5:8.
1. E feafeaʼi te tokoni mai ʼo “te falala o te fakamauli” ke tou faʼa kātaki?
KA FALALA he tahi ʼe hāofaki anai, pea ʼe feala ke ina kātakiʼi te ʼu ʼaluʼaga ʼaē ʼe kovi ʼaupito. Ko ia ʼaē neʼe moū tona vaka, ʼe lava kātaki fualoa age ʼi tona kiʼi vakapā, mo kapau ʼe ina ʼiloʼi kua vave aʼu mai tona hāofaki. ʼO toe feiā pe, lolotoga te ʼu taʼu ʼe lauʼi afe, ko te falala ki “te fakamaʼuli ʼa Sehova” neʼe ina fakaloto mālohiʼi te hahaʼi tui, tagata mo fafine, ʼi te ʼu temi faigataʼaʼia, pea neʼe mole he temi neʼe nātou fakahemala ai ʼi tanatou falala ʼaia. (Ekesote 14:13; Pesalemo 3:8; Loma 5:5; 9:33) Neʼe fakatatau e te ʼapositolo ko Paulo “te falala o te fakamauli” ki “te puloga” ʼo te teu tau fakalaumālie ʼa te kau Kilisitiano. (1 Tesalonika 5:8; Efeso 6:17) Ei, ko tatatou falala ʼaē ʼe hāofaki anai tatou e te ʼAtua, ʼe ina puipui tatatou ʼu fealagia fakakaukau, pea mo tokoni mai ke tou fakapotopoto logola te ʼu ʼahiʼahi, mo te ʼu fakafeagai pea mo te ʼu fakahala.
2. Koteā te ʼu pikipikiga ʼo “te falala o te fakamauli” mo te tauhi moʼoni?
2 ʼE ʼui e te tikisionalio The International Standard Bible Encyclopedia, “ko te falala ki te ka haʼu neʼe mole ko he agaaga ʼa te hahaʼi pagani” ʼaē neʼe fetafaiʼaki mo te kau ʼuluaki Kilisitiano. (Efeso 2:12; 1 Tesalonika 4:13) Kae ko “te falala o te fakamauli” ʼe ko he agaaga tāfito ʼa te tauhi moʼoni. ʼO feafeaʼi? ʼUluaki, ko te hāofaki ʼo te kau kaugana ʼa Sehova ʼe pipiki ki tona huafa. Neʼe faikole fēnei te tagata fai pesalemo ko Asafe: “Tokoni mai kia mātou, Ê ʼAtua ʼo tomatou fakamaʼuli, ʼuhi ko te kolōlia ʼo tou huafa; pea hāofaki mātou.” (Pesalemo 79:9; Esekiele 20:9) Tahi ʼaē meʼa, ke feala hatatou felogoi lelei mo Sehova, ʼe maʼuhiga tāfito ke tou falala ki te ʼu tapuakina ʼaē neʼe ina fakapapauʼi mai. Neʼe fakamahino fēnei e Paulo: “E mole feala ki he tahi ke lelei ki te Atua, kapau e mole ina mau te tui, he ko ae e laka ki te Atua, e maua ke tui, e mauli pea e ina fakapale natou e natou kumi iaʼia.” (Hepeleo 11:6) Pea neʼe toe fakamahino foki e Paulo, ko te hāofaki ʼo nātou ʼaē ʼe fakahemala neʼe ko te tupuʼaga maʼuhiga ʼaia ʼaē neʼe haʼu ai Sesu ki te kele. Neʼe ina ʼui fēnei: “E mooni te folafola aeni pea e tuha ke tali e te tagata fuape: nee haele mai Kilisito Sesu ki te malama-nei ʼo fakamauli te hahai agahala.” (1 Timoteo 1:15) Pea neʼe ʼui e te ʼapositolo ko Petelo, ko te hāofaki ʼe ko ‘te ikuʼaga [pe ko te fua] ʼo [tatatou] tui.’ (1 Petelo 1:9) ʼE hā lelei mai, ʼe tau mo feʼauga ke tou falala ʼe hāofaki anai tatou. Kae koteā te ʼuhiga moʼoni ʼo te fakamaʼuli? Pea koteā te ʼu meʼa ʼaē ʼe fakamaʼua mai ke tou maʼu ai te fakamaʼuli?
Koteā Te Fakamaʼuli?
3. Neʼe fakamaʼuli feafeaʼi e Sehova tana ʼu kaugana ʼo te temi ʼāfea?
3 ʼI te ʼu Tohi Faka Hepeleo, ʼi tona agamāhani ko te “fakamaʼuli” ʼe faka ʼuhiga ki te hāofaki pe ko te hāo ʼi te ʼu fakataga, peʼe ko tokita hāofaki naʼa matehi kita e he ʼu hahaʼi agamālohi, peʼe kita mate tautonu. Ohage la, neʼe fakahigoaʼi e Tavite ia Sehova ko “Ia ʼaē ka ina faka fealagia ke . . . hāo,” pea neʼe ina ʼui fēnei: “Toku ʼAtua ʼe ko toku maka. . . . Te potu ʼaē ʼe ʼau lava hola kiai, toku Hāofakiʼaga, ʼe ke hāofaki ʼau mai te agamālohi. ʼE ʼau pāui anai kia Sehova, ia Ia ʼaē ʼe tonu ke vikiʼi, pea ʼe hāofaki anai ʼau mai toku ʼu fili.” (2 Samuele 22:2-4) Neʼe ʼiloʼi e Tavite ʼe fagono ia Sehova ki te ʼu kole mamahi ʼaē ʼe fai age e Tana kau kaugana agatonu ke tokoni age kia nātou.—Pesalemo 31:22, 23; 145:19.
4. ʼI muʼa ʼo te temi ʼo Kilisito, neʼe koteā te ʼamanaki ʼaē neʼe maʼu e te ʼu kaugana ʼa Sehova ʼo ʼuhiga mo te tahi maʼuli?
4 ʼI muʼa ʼo te temi ʼo Kilisito, ko te ʼu kaugana ʼa Sehova neʼe ʼi ai mo tanatou ʼamanaki ki te tahi maʼuli. (Sopo 14:13-15; Isaia 25:8; Taniela 12:13) ʼI tona fakahagatonu, ʼe lahi te ʼu fakapapau ʼa te ʼu Tohi Faka Hepeleo ʼo ʼuhiga mo te fakamaʼuli, ʼe nātou fakakikite te fakamaʼuli ʼe lahi age—ʼe ina taki ki te maʼuli heʼegata. (Isaia 49:6, 8; Gaue 13:47; 2 Kolonito 6:2) ʼI te temi ʼo Sesu, ko te tokolahi ʼo te kau Sutea neʼe nātou falala ki te maʼuli heʼegata, kae neʼe mole nātou tali ki te ʼui ʼaē ʼe ko Sesu te puleʼaki ʼaē moʼo fakahoko ʼo tanatou ʼamanaki. Neʼe ʼui e Sesu ki te kau takitaki lotu ʼo tona temi: “E koutou huke te Tohi-tapu koteuhi e koutou manatu e koutou mau te mauli heegata, ko te Tohi-tapu ae e fakamooni mai kia te au.”—Soane 5:39.
5. Koteā te faka ʼuhiga tāfito ʼo te fakamaʼuli?
5 ʼAki ia Sesu, neʼe fakahā e te ʼAtua te faka ʼuhiga katoa ʼo te fakamaʼuli. ʼE faka ʼuhiga ki te ʼāteaina mai te pule ʼo te agahala, mai te popūla ki te lotu hala, mai te mālama ʼo Satana, mai te mataku ki te tagata pea mo te mate. (Soane 17:16; Loma 8:2; Kolose 1:13; Apokalipesi 18:2, 4) Ko te meʼa ʼaē ʼe maʼuhiga tāfito ki te kau kaugana agatonu ʼa te ʼAtua, he ko tonatou hāofaki e te ʼAtua ʼe mole faka ʼuhiga pe ki tonatou faka ʼāteaina mai te pule aga fefeka pea mo te lotomamahi, kae ʼe toe faka ʼuhiga foki ki tanatou maʼu te maʼuli heʼegata. (Soane 6:40; 17:3) Neʼe ʼui e Sesu, ki te “kiʼi fagaovi” ko te fakamaʼuli ʼe faka ʼuhiga ki tonatou toe fakatuʼuake ki te maʼuli ʼi selo, ke nātou kaugā hau mo Kilisito ʼi te Puleʼaga. (Luka 12:32) Kae ki te toe ʼo te malamanei, ko te fakamaʼuli ʼe faka ʼuhiga ki tanatou toe maʼu te maʼuli haohaoa pea mo tanatou felogoi mo te ʼAtua, ohage ko Atama pea mo Eva ʼi te ʼōloto ʼo Eteni ʼi muʼa ʼo tanā agahala. (Gaue 3:21; Efeso 1:10) Ko te maʼuli heʼegata ʼi he palatiso feiā, neʼe ko te ʼuluaki fakatuʼutuʼu ʼaia ʼa te ʼAtua ki te malamanei. (Senesi 1:28; Maleko 10:30) Kae ʼe lava feafeaʼi te toe fakahoko ʼo te ʼu ʼaluʼaga ʼaia?
Te Tafitoʼaga ʼo Te Fakamaʼuli—Te Sakilifisio Faitotogi
6, 7. Koteā te meʼa ʼaē neʼe fai e Sesu moʼo fakamaʼuli ʼo tatou?
6 ʼE feala te maʼuli heʼegata ʼaki pe te sakilifisio faitotogi ʼa Kilisito. Koteā tona tupuʼaga? ʼE fakamahino mai e te Tohi-Tapu ʼi te temi ʼaē neʼe agahala ai ia Atama, neʼe ina “fakatau” ki te agahala ia ia totonu pea mo tona hākoga fuli, ʼo kau kiai mo tatou—koia ʼaē neʼe ʼaoga ai he totogi ke maʼu e te hahaʼi honatou ʼamanaki lelei. (Loma 5:14, 15; 7:14) Ko te ʼu sakilifisio manu ʼaē neʼe fai ʼo mulimuli ki te Lao Faka Moisese, neʼe nātou fakakikite te foaki e te ʼAtua te totogi maʼa te malamanei katoa. (Hepeleo 10:1-10; 1 Soane 2:2) Neʼe ko te sakilifisio ʼa Sesu ʼaē neʼe ina fakahoko te ʼu lea faka polofeta ʼaia. Neʼe ʼui fēnei e te ʼaselo ʼa Sehova ʼi muʼa ʼo te tupu ʼa Sesu: “[ʼE] ina fakamauli anai tana hahai mai anatou agahala.”—Mateo 1:21; Hepeleo 2:10.
7 Neʼe fānauʼi faka milakulo ia Sesu e te taupoʼou ko Malia, pea ʼi tona ʼuhiga ʼAlo ʼo te ʼAtua neʼe mole ina maʼu te mate mai ia Atama. Ko te faʼahi ʼaia pea mo tana agatonu tuʼumaʼu, neʼe feala ʼaki tona maʼuli ke ina totogi te malamanei mai te agahala pea mo te mate. (Soane 8:36; 1 Kolonito 15:22) ʼO mole hage ko te tahi ʼu hahaʼi, neʼe mole fakatūʼa Sesu ki te mate ʼuhi ko te agahala. Neʼe haʼu ki te kele ke ina “foaki tona mauli moʼo totogi aki o te tokolahi.” (Mateo 20:28) ʼI tana ʼosi fai te faʼahi ʼaia, ko Sesu ʼaē kua fakatuʼuake pea mo fakanofo hau ʼi te temi nei, ʼe feala ke ina fakamaʼuli ia nātou fuli ʼaē ʼe mulimuli ki te ʼu meʼa ʼaē ʼe fakamaʼua mai e te ʼAtua.—Apokalipesi 12:10.
Koteā ʼAē ʼe Fakamaʼua Mai Moʼo Hāofaki ʼo Tatou?
8, 9. (a) Neʼe tali feafeaʼi e Sesu ki te fehuʼi ʼa te pule tūpulaga ʼo ʼuhiga mo te fakamaʼuli? (b) Neʼe fakaʼaogaʼi feafeaʼi e Sesu te faʼahi ʼaia moʼo akoʼi tana kau tisipulo?
8 ʼI te tahi ʼaho, ko te pule Iselaele tūpulaga neʼe maʼu koloā, neʼe ina fehuʼi fēnei age kia Sesu: “Kotea anai te mea ke au fai pea e au mau ai te mauli heegata?” (Maleko 10:17) Neʼe hā ʼi tana fehuʼi te manatu ʼa te kau Sutea ʼo tona temi, he neʼe nātou manatu ʼe fakamaʼua e te ʼAtua he ʼu gāue lelei, pea kapau neʼe feʼauga te ʼu gāue ʼaia pea neʼe feala ke nātou maʼu ai tonatou fakamaʼuli. Kae ko te faʼahiga tauhi ʼaia neʼe feala ke tupu ʼi tanatou manatu pe kia nātou totonu. Ko te ʼu gāue ʼaia neʼe mole nātou lava foaki he falala mālohi ki te fakamaʼuli, mai tona ʼuhiga ʼaē ko te tagata agahala neʼe mole feala ke mulimuli tuʼumaʼu ki te ʼu lekula ʼa te ʼAtua.
9 Moʼo tali ki te fehuʼi ʼa te tagata, neʼe fakamanatuʼi age pe e Sesu, neʼe tonu ke fakalogo ki te ʼu fakatotonu ʼa te ʼAtua. Neʼe foimo tali age e te pule tūpulaga ʼaia, ʼe kua mulimuli kiai talu mai tona temi tūpulaga. ʼAki tana tali ʼaia, neʼe ʼofa Sesu ki ai pea mo ina ʼui fēnei age: “Ko te mea e tahi kei toe kia koe: alu-la, ko mea ae e ke mau, fakatau ia, pea ke foaki ki te hahai masiva, pea e ke mau anai he koloa i Selo, pea ke haù o mulimuli mai ia te au.” Kae neʼe ʼalu te tūpulaga ʼaia ʼaki he lotomamahi “koteuhi nee maukoloa aupito.” Ki muli age, neʼe fakamahino lelei age e Sesu ki tana kau tisipulo, ko te manako fau ki te ʼu koloā fakamālama ʼe ina tāʼofi nātou ke nātou maʼu te fakamaʼuli. Neʼe ina toe ʼui ʼe mole feala ki he tahi ke ina hāofaki ia ia totonu ʼaki pe tana ʼu faiga. Kae neʼe fakafimālieʼi fēnei e Sesu tana kau tisipulo: “Ki te tagata, e mole fealagia, kae, ki te Atua, kailoa: koteuhi e feala te meafuape ki te Atua.” (Maleko 10:18-27; Luka 18:18-23) ʼE feala feafeaʼi te fakamaʼuli?
10. Koteā te ʼu meʼa ʼaē ʼe tonu ke tou fai moʼo maʼu te fakamaʼuli?
10 Ko te fakamaʼuli ʼe ko te meʼa ʼofa mai te ʼAtua, kae ʼe mole kita maʼu feiā pe. (Loma 6:23) ʼE ʼi ai te ʼu meʼa ʼaē ʼe tonu ke tou fai takitokotahi moʼo maʼu te meʼa ʼofa ʼaia. Neʼe ʼui fēnei e Sesu: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” Pea neʼe toe ʼui e te ʼapositolo ko Soane: “Kia ia e tui ki te Alo e ina maù te mauli heegata; pea kia ia e mole fakalogo ki te Alo e mole mamata anai ki te mauli, kae e malumalu ia te ia te hauhau o te Atua.” (Soane 3:16, 36) ʼE hā lelei ai, ʼe fakamaʼua mai e te ʼAtua kia tatou takitokotahi ke tou tui pea mo tou fakalogo, mo kapau ʼe tou fia maʼu te fakamaʼuli heʼegata. ʼE maʼua kia tatou takitokotahi ke tou fai te tonu ʼaē ke tou tali te sakilifisio, pea mo tou mulimuli ki te ʼu tapugā vaʼe ʼo Sesu.
11. ʼE feala feafeaʼi ke tali e Sehova he tagata heʼe haohaoa?
11 Mai tona ʼuhiga ʼaē ʼe tou heʼe haohaoa, ʼe mole tou māhani ʼi te fakalogo pea ʼe mole feala ke haohaoa tatatou fakalogo. Ko te tupuʼaga la ʼaia ʼo te foaki e Sehova he totogi moʼo ʼuʼufi ʼo tatatou ʼu agahala. Kae ʼe tonu ke tou faiga tuʼumaʼu ke tou mulimuli ki te ʼu ala ʼa te ʼAtua. Ohage ko tona ʼui e Sesu ki te pule tūpulaga, ʼe tonu ke tou taupau te ʼu fakatotonu ʼa te ʼAtua. Kapau ʼe tou fai feiā pea ʼe tou maʼu anai te ʼofa ʼo te ʼAtua pea mo he fiafia lahi, “[heʼe] mole mamafa tana u fekau”; ʼe nātou hage ko “he meʼa moʼo fakamokomoko.” (1 Soane 5:3; Tāʼaga Lea 3:1, 8) Kae ʼe mole faigafua takita puke maʼu te falala ki te fakamaʼuli.
“Koutou Tau Mālohi ʼo ʼUhiga Mo Te Tui”
12. ʼE feala feafeaʼi ki te falala ki te fakamaʼuli ke tokoni ki he Kilisitiano ke ina tauʼi te ʼu fakahala?
12 Ko te tisipulo ko Suta neʼe fia faitohi ki te kau ʼuluaki Kilisitiano ʼo ʼuhiga mo tanatou “fakamaʼuli fakatahi.” Kae ʼuhi ko te ʼu meʼa heʼeʼaoga ʼaē neʼe hoko ʼi te kokelekasio, neʼe tonu ke ina tokoniʼi tona ʼu tēhina ke nātou “tau mālohi ʼo ʼuhiga mo te tui.” Ei, ke tou maʼu te fakamaʼuli, ʼe mole feʼauga pe ke tou tui, mo tou pipiki ki te tui faka Kilisitiano moʼoni, pea ke tou fakalogo mokā maui mālie totatou maʼuli. Ko tatatou ʼofa kia Sehova ʼe tonu ke mālohi moʼo tokoni mai kia tatou ke tou tauʼi te ʼu fakahala pea mo te ʼu aga heʼeʼaoga. Kae neʼe fakatupu kovi ki te kokelekasio ʼo te ʼuluaki sēkulō te lahi fau ʼo te ʼu aga fakavale ʼi te ʼu felāveʼi fakasino, mo te mole fakaʼapaʼapa ki te ʼu tēhina takitaki, mo te ʼu maveuveu, pea mo te ʼu lotolotolua. Moʼo tokoni kia nātou ke nātou tauʼi te ʼu aga ʼaia, neʼe uga e Suta tona ʼu tēhina ke nātou manatuʼi lelei tanatou fakatuʼutuʼu: “Kia koutou, ʼu ʼofaina, ʼi takotou laga ʼo koutou ki takotou tui maʼoniʼoni ʼaupito, pea ʼi takotou faikole ʼaki te laumālie maʼoniʼoni, koutou nofo ʼi te ʼofa ʼo te ʼAtua, ʼi takotou talitali ki te manavaʼofa ʼo totatou ʼAliki ko Sesu Kilisito ki te maʼuli heʼegata.” (Suta 3, 4, 8, 19-21, MN) Ko tanatou falala ki te fakamaʼuli, neʼe ina fakaloto mālohiʼi nātou ʼi tanatou tau ke nātou nofo maʼa.
13. ʼE tou lava fakahā feafeaʼi ʼe mole tou meʼa noaʼi te fakatuʼutuʼu ʼo te ʼofa makehe ʼo te ʼAtua?
13 ʼE fakamaʼua e Sehova ʼAtua ke maʼa te hahaʼi ʼaē ka ina foaki ki ai te fakamaʼuli. (1 Kolonito 6:9, 10) Kae kapau ʼe tou pipiki maʼu ki te ʼu lekula ʼa te ʼAtua ʼo ʼuhiga mo te aga ʼaē ʼe tonu ke fai, pea ʼe mole faka ʼuhiga leva ke tou fakamāuʼi te hahaʼi. ʼE mole ʼa tatou te vakaʼi pe ko ai ʼaē ka ina maʼu te maʼuli heʼegata. Kae ko te ʼAtua ʼaē ka ina fai te faʼahi ʼaia, ohage ko tona ʼui e Paulo ki te kau Keleka ʼi Ateni: “Kua ina fakatuu he aho e ina fakamauʼi ai i te faitotonu te malama-nei, aki he tagata kua ina hinoi,” ko Sesu Kilisito. (Gaue 17:31; Soane 5:22) Kapau ʼe tou maʼuʼuli ʼo tou tui ki te sakilifisio faitotogi ʼa Sesu, pea ʼe mole tonu ke tou matataku ki te ʼaho ʼo te fakamāu ʼaē ka hoko mai. (Hepeleo 10:38, 39) Ko te meʼa ʼaē ʼe maʼuhiga, ʼe mole tonu ʼi he temi ke tou “meʼa noaʼi te ʼofa makehe ʼo te ʼAtua [tatatou fakalelei kia te ia ʼaki te totogi]” ʼo tou tuku ke fakahalaʼi tatou ke tou tali te ʼu manatu hala pea mo he ʼu aga kovi. (2 Kolonito 6:1, MN) Tahi ʼaē meʼa, kapau ʼe tou tokoni ki te hahaʼi ke nātou maʼu te fakamaʼuli, pea ʼe tou fakahā ai ʼe mole tou meʼa noaʼi te fakatuʼutuʼu ʼo te manavaʼofa ʼo te ʼAtua. ʼE tou lava tokoni feafeaʼi kia nātou?
Tou Fakahā Te ʼAmanaki ʼo Te Fakamaʼuli
14, 15. Ko ai ʼaē neʼe hinoʼi e Sesu ke nātou fakahā te logo lelei ʼo te fakamaʼuli?
14 ʼI tana fakaʼaogaʼi te ʼu palalau ʼa Soele, neʼe tohi fēnei e Paulo: “Ko he tahipe e paui anai ki te huafa o te Aliki, e mauli anai.” Pea neʼe ina toe ʼui fēnei: “Pe feafeai leva tanatou paui kia ia ae nee mole natou tui ki ai? Pe feafeai tanatou tui kia ia ae nee heeki natou logo ki ai? Pe feafeai tanatou logo kapau e mole he tahi e ina fagonogono?” ʼI te ʼu vaega ʼaē ʼe hoa kiai, ʼe fakahā lelei ai e Paulo, ʼe mole tupu feiā pe te tui, kae “e tupu . . . mai te fagono” ki “te folafola a Kilisito.”—Loma 10:13, 14, 17; Soele 2:32.
15 Ko ai ʼaē ka ina ʼave “te folafola a Kilisito” ki te ʼu puleʼaga? Neʼe tuku e Sesu te gāue ʼaia ki tana kau tisipulo—ia nātou ʼaē kua akoʼi age ki ai te “folafola” ʼaia. (Mateo 24:14; 28:19, 20; Soane 17:20) Ka tou kau ki te gāue fai faka mafola pea mo te fai ʼo ni ʼu tisipulo, ʼe tou fai te meʼa ʼaē neʼe palalau kiai te ʼapositolo ko Paulo ʼi tana fakaʼaogaʼi te ʼu palalau ʼa Isaia: “E taulekaleka te u vae o natou ae e natou fagonogono te u logolelei.” Tatau aipe peʼe tokolahi ia nātou ʼaē ʼe mole nātou tali te logo lelei ʼaē ʼe tou tala age kia nātou, kae ko totatou ʼu vaʼe ʼe “taulekaleka” kia Sehova.—Loma 10:15; Isaia 52:7.
16, 17. Koteā te ʼu fakatuʼutuʼu e lua ʼo te gāue fai faka mafola?
16 ʼAki te gāue ʼaia ʼe tou fakahoko ia fakatuʼutuʼu maʼuhiga e lua. ʼUluaki, ʼe tonu ke faka mafola te logo lelei ke feala he faka kolōliaʼi ʼo te huafa ʼo te ʼAtua, pea ko te hahaʼi ʼaē ʼe nātou loto ke fakamaʼuli nātou, ʼe nātou ʼiloʼi anai pe kofea ʼaē ʼe tonu ke nātou ʼolo kiai. Neʼe mahino kia Paulo te agaaga ʼaia ʼo tana gāue. Neʼe ina ʼui fēnei: “Koteuhi nee folafola fenei mai te Aliki kia maua: Kuʼau fakanofo koe ko he malama o te atu puleaga, ke ke ave te gaue-fakamauli ki te gataʼaga o te kelekele.” Koia ʼi totatou ʼuhiga tisipulo ʼa Kilisito, ʼe tonu ke tou gāue fuli moʼo ʼave ki te hahaʼi te logo ʼo te fakamaʼuli.—Gaue 13:47; Isaia 49:6.
17 Lua, ko te faka mafola ʼo te logo lelei ʼe ko te tafitoʼaga ʼo te fakamāu faitotonu ʼa te ʼAtua. ʼO ʼuhiga mo te fakamāu ʼaia, neʼe ʼui fēnei e Sesu: “Ka haele mai te Foha o te tagata i tona kololia, e fakatahi mo ia te kau aselo fuape, pea e afio ifo anai i tona afioʼaga fakakololia. E maopoopoʼage anai ki ona mua te atu puleaga pea e ina vahe anai natou o hage he tauhimanu e ina vaheʼi kehe te u ovi mai te u tao.” Logola ʼe hoko anai te fakamāu pea mo te vaevae ʼo te hahaʼi ʼi te temi ʼaē “ka haele mai te Foha o te tagata i tona kololia,” kae ko te gāue fai faka mafola ʼe ina tuku ki te hahaʼi ia ʼaho nei, te fealagia ʼaē ke nātou ʼiloʼi te ʼu tēhina fakalaumālie ʼo Kilisito pea ke nātou lagolago kia nātou ke feala ai hanatou maʼu tonatou fakamaʼuli heʼegata.—Mateo 25:31-46.
Tou ‘Tāʼofi Te Katoa ʼo Te Falala’
18. Koteā ʼaē ʼe tou lava fai ke mālohi tatatou ‘falala ki te fakamaʼuli’?
18 Ko tatatou kau mālohi ki te gāue fai faka mafola ʼe tokoni mai ke mālohi tatatou falala. Neʼe tohi fēnei e Paulo: “E matou fakaʼamuʼage ke feia tatou fakatatau mo te loto hoha e koutou tahi fakaha, o uhiga mo te taofi o te katoa o te falala o kaku ki te gataʼaga.” (Hepeleo 6:11) Koia ʼe tonu kia tatou takitokotahi ke tou pulogaʼi “te puloga o te falala o te fakamauli,” ʼo tou manatuʼi “nee mole hinoi tatou e te Atua ki te tali o tona hauhau, kae ki tatatou mau te mauli aki totatou Aliki ko Sesu Kilisito.” (1 Tesalonika 5:8, 9) Tou tokagaʼi te ʼekenaki ʼaenī ʼa Petelo: “Koutou fakamaùmaù i outou atamai, koutou ateaina mai te konahia, koutou fakahuʼu tautou falala katoa ki te [“ ʼofa makehe,” MN] e aumai kia koutou.” (1 Petelo 1:13) Ko nātou fuli ʼaē ʼe nātou fai te faʼahi ʼaia, ʼe nātou sio anai ki te fakahoko ʼo tanatou ‘falala ki te fakamaʼuli’!
19. Koteā ʼaē ka tou vakaʼi ʼi te lua alatike?
19 ʼI te temi ʼaenī, ʼe tonu ke tou fakaʼaogaʼi feafeaʼi te temi ʼaē ʼe kei toe ki te mālama ʼaenī? ʼE tou lava fakaʼaogaʼi feafeaʼi te temi ʼaia ke tou hāofaki ai tatou pea mo he tahi ʼu hahaʼi? ʼE tou tali anai ki te ʼu fehuʼi ʼaia ʼi te lua alatike.
ʼE Koutou Lava Fakamahino Koa?
• He koʼe ʼe tonu ke tuʼu mālohi tatatou ‘falala ki te fakamaʼuli’?
• Koteā ʼaē ʼe faka ʼuhiga kiai te fakamaʼuli?
• Koteā ʼaē ʼe tonu ke tou fai moʼo maʼu te meʼa ʼofa ʼo te fakamaʼuli?
• Koteā te pikipikiga ʼo tatatou gāue fai faka mafola pea mo te fakatuʼutuʼu ʼa te ʼAtua?
[Paki ʼo te pasina 10]
Ko te fakamaʼuli ʼe mole faka ʼuhiga pe ki tokita hāo ʼi te fakaʼauha