Te ʼu Fehuʼi ʼa Te Kau Lautohi
He koʼe neʼe tohi e Paulo ʼo ʼuhiga mo te fafine Kilisitiano: “E fakamauli anai ia aki tana fanaunau”?—1 Timoteo 2:15.
ʼAki te ʼu vaega ʼaē ʼe pipiki mai ki te vaega ʼaenī, e feafeaʼi hatatou mahino ki te faka ʼuhiga ʼo te ʼu palalau ʼa Paulo? ʼAki te takitaki ʼo te laumālie, neʼe ina fai te tokoni ʼo ʼuhiga mo te tuʼulaga ʼo te fafine Kilisitiano ʼi te kokelekasio. Neʼe ina tohi fēnei: “Mo te hahai fafine, ke natou tui he u kofu e feauga, mo teuteu fakapotopoto pea mo maʼa, aua naa natou fiʼulu, mo ai aulo, pe ai lopa, pe ko he u teu totogi mamafa. Kae ke natou teuteu aki te u gaue lelei, ia mea e tuha mo te u fafine e lotu.” (1 Timoteo 2:9, 10) Neʼe uga e Paulo tona ʼu tuagaʼane Kilisitiano ke nātou teuteu fakapoipoi, ke feʼauga lelei tanatou faiteuteu, pea ke nātou ‘teuteu’ ʼaki he ʼu gāue lelei.
Hili ʼaia pea neʼe fakamahino e Paulo ia te fakatuʼutuʼu ʼo te takitaki ʼi te kokelekasio, ʼo ina ʼui fēnei: “E mole au tali ke akonaki he fafine, pe ko tana pule ki te tagata, kae ke nofo fakalogologo.” (1 Timoteo 2:12; 1 Kolonito 11:3) Neʼe ina fakamahino te fakatafito ʼo te fakatuʼutuʼu ʼaia, ʼo ina fakahā neʼe mole ko Atama ʼaē neʼe kākāʼi, kae ko Eva “i tona kakaʼi, nee hokosia mai te hala.” Kae ʼe lava hāo feafeaʼi he fafine Kilisitiano mai te agahala ʼa Eva? Neʼe tali fēnei e Paulo: “Pea e fakamauli anai ia aki tana fanaunau, kapau e mauli i te tui, mo te ofa pea mo te maonioni fakatahi mo te agavaivai.” (1 Timoteo 2:14, 15) Neʼe koteā te faka ʼuhiga ʼo te ʼu palalau ʼaia ʼa Paulo?
Maʼa ʼihi kau fakaliliu, ʼe hage ko te fakamaʼuli ʼo te fafine ʼe fakalogo pe ki tana maʼu fānau. Ohage la, ʼe tou lau fēnei ʼi te Tohi-Tapu Today’s English Version: “ ʼE hāofaki anai he fafine ʼaki tana maʼu fānau.” Kae ʼe ko he fakamahino hala ʼo te ʼu palalau ʼa Paulo. ʼE lahi te ʼu koga tohi ʼe fakahā ai ke maʼu e he tahi ia te hāofaki, ʼe tonu muʼa ke ina ʼiloʼi ia Sehova, mo tui kiā Sesu, pea mo fakahā tana tui ʼaia ʼaki te ʼu gāue. (Soane 17:3; Gaue 16:30, 31; Loma 10:10; Sakopo 2:26) Pea tahi ʼaē meʼa, neʼe mole ʼui e Paulo ʼe hāofaki anai ia te hahaʼi fafine ʼaē ʼe tui mokā nātou fanaunau. Ko te hahaʼi fafine neʼe nātou fananau haohaoa, peʼe ko he ʼu fafine tui peʼe kailoa. Pea ʼi te taʼahi faʼahi, ko ʼihi fafine neʼe nātou mamate ai, peʼe ko he ʼu fafine tui peʼe kailoa.—Senesi 35:16-18.
Ko te tahi tokoni neʼe fai e Paulo ki muli age ʼi te tohi pe ʼaia ʼe feala ai hatatou mahino ki te faka ʼuhiga ʼo tana ʼu ʼuluaki palalau. Neʼe ina fai te fakatokaga ki te ʼu fafine vītua kei finemui ʼaē neʼe “[pipiko], o feʼoloʼaki i te u api, e mole gata mo te piko pea mo te gutu palalau, mo te gutu vale, o natou lau te u mea e mole tonu ke lau.” Neʼe koteā te tokoni ʼa Paulo? Neʼe ina toe ʼui fēnei: “Koia, e au loto ke ohoana ia natou kei finemui, ke mau fanau mo taupau onatou lotofale, pea e mole natou tuku ai he faigamalie ki te fili ke valoki natou.”—1 Timoteo 5:13, 14.
Neʼe faka maʼuhigaʼi e Paulo ia te ʼu gāue ʼaoga ʼa te hahaʼi fafine ʼi te fakatuʼutuʼu ʼo te famili. ʼI tana maʼumaʼua ki te ʼu taʼi gāue ʼaia, ʼaē ‘ko te maʼu fānau mo te taupau ʼo te lotofale,’ ko te fafine ʼaē neʼe ina hoko atu tona maʼuli “i te tui, mo te ofa pea mo te maonioni fakatahi mo te agavaivai” neʼe mole holi ia ke ina fai he aga ʼe heʼeʼaoga. ʼE hāofaki anai tona maʼuli fakalaumālie peʼe “fakamauli anai ia.” (1 Timoteo 2:15) Ko te fai ʼo te ʼu gāue ʼaia neʼe tokoni ia ki te hahaʼi fafine tokolahi ʼe kei finemui ke ʼaua naʼa nātou tō ki te ʼu hele ʼa Satana.
Ko te ʼu palalau ʼaē neʼe fai e Paulo kiā Timoteo, ʼe ina fakamanatuʼi mai kiā tatou fuli, tagata mo fafine, ke tou maʼumaʼua ʼi te ʼu gāue ʼaoga. ʼE maʼu ʼi te Folafola ʼa te ʼAtua, ia te tokoni ʼaenī ki te kau Kilisitiano fuli: “Koutou vakai fakapotopoto, pe feafeai te agaaga fai o toutou mauli: aua naʼa hage ko te hahai galivale, kae hage ko te hahai galipoto.”—Efeso 5:15.