3. (1) Neʼe liliu feafeaʼi ia Timoteo ko he Kilisitiano, pea kotea ʼae neʼe ina fai ki te ʼu meʼa ʼae neʼe ina ako? (2) Kotea te ʼu faʼahi ʼe tolu neʼe fakamaʼuhigaʼi e Paulo kia Timoteo?

³ Neʼe ʼuluaki ʼaʼahi e te apositolo ko Paulo ia te kolo ko Lisitia ʼi te taʼu 47 H.T.S.a (Vakaʼi te kiʼi nota.) Neʼe lagi ko te temi ʼaia neʼe ako ai e Timoteo ia te ʼu akonaki ʼa Sesu, kae neʼe kei tupulaga. Neʼe ina maʼuliʼi te ʼu meʼa ʼae neʼe ina ako pea hili ki ai taʼu ʼe lua neʼe kamata faifolau leva mo Paulo. Hili ki ai teitei taʼu ʼe 16, neʼe faitohi fenei ia Paulo kia Timoteo: “Ke ke haga mulimuli ki te ʼu meʼa ʼae neʼe ke ako pea neʼe fakalotoʼi koe ke ke tui ki ai, he ʼe ke iloʼi te hahaʼi ʼae neʼe natou akoʼi atu te ʼu meʼa ʼaia, pea talu mai tau kei meamea, ʼe ke iloʼi te ʼu Tohi Taputapu [te ʼu Koga Tohi-Tapu Fakahepeleo] ʼae ʼe feala ai ke ke liliu ʼo poto. ʼE haofaki ai anai koe ʼuhi ko tau tui kia Kilisito Sesu.” (2 Timoteo 3:14, 15) Tou fakatokagaʼi neʼe ui e Paulo, ko Timoteo (1) ʼe kua ina iloʼi te ʼu Tohi Taputapu, (2) neʼe fakalotoʼi ke tui ki te ʼu meʼa ʼae neʼe ina ako, pea (3) neʼe liliu ʼo poto ke haofaki ai ʼaki tana tui kia Kilisito Sesu.

‘NEʼE FAKALOTOʼI KE TUI’

5. (1) Kotea te fakaʼuhiga ʼo te ‘fakalotoʼi ke tui’? (2) ʼE tou iloʼi feafeaʼi neʼe tui papau ia Timoteo ki te logo lelei ʼo ʼuhiga mo Sesu?

⁵ ʼE mole feʼauga pe tatatou akoʼi ki te ʼu fanau pe ko ai te hahaʼi mo te ʼu aluʼaga ʼae ʼe talanoa ki ai te Tohi-Tapu. Tou manatuʼi, ko Timoteo neʼe ‘fakalotoʼi ke tui.’ ʼI te Fakakeleka, neʼe fakaʼaogaʼi e Paulo ia he kupusiga palalau ko tona fakaʼuhiga, “ ʼe kita tui papau ki te moʼoni ʼo he meʼa.” Pea neʼe iloʼi e Timoteo te ʼu Koga Tohi-Tapu Fakahepeleo “talu mai [tana] kei meamea.” Ki muli age, neʼe tui papau ai ko Sesu neʼe ko te Mesia. Neʼe malohi te tui ʼa Timoteo, koia ʼae neʼe papitema ai mo gaue fakamisionea fakatahi mo Paulo.

6. ʼE feafeaʼi hakotou tokoni ki ʼakotou fanau ke natou fakatuputupu tanatou tui ki te Folafola ʼa te ʼAtua?

⁶ ʼE feafeaʼi hakotou tokoni ki ʼakotou fanau ke natou fakatuputupu tanatou tui ohage ko Timoteo, ke fakalotoʼi ai mo natou ke natou tui? ʼE tonu muʼa ke kotou maʼu te kataki fualoa. ʼE ʼaoga he temi moʼo fakatuputupu takita tui. Pea ka kotou tui ki he faʼahi, ʼe mole fakaʼuhiga leva ʼe toe tui anai ki ai mo te ʼu fanau. ʼE tonu ki te ʼu fanau takitokotahi, ke natou fakaʼaogaʼi ʼonatou “fealagia fakakaukau” moʼo fakatuputupu tanatou tui ki te Tohi-Tapu. (Lau ia Loma 12:1.) ʼU matuʼā, ʼe lahi te ʼu faʼahi ʼe feala ke kotou fai moʼo tokoni ki ʼakotou fanau ke natou fakatuputupu tanatou tui, tafito la moka natou fai he ʼu fehuʼi. Koia tou vakaʼi pe kotea ʼe feala ke tou ako mai te faʼifaʼitaki ʼa he tamai.

7, 8. (1) ʼE fakaha feafeaʼi e he tamai te kataki fualoa moka ina akoʼi tona ʼofafine? (2) Ko te temi fea ʼae ʼe ʼaoga ke kotou kataki fualoa ai ki takotou fanau?

⁷ Ko Thomas ʼe ʼi ai tona ʼofafine ʼe taʼu 11. Pea ʼe ui e Thomas, ʼi ʼihi temi ʼe fai age e tona ʼofafine te ʼu fehuʼi ʼaeni: “Neʼe feala koa ke fakaʼaogaʼi e Sehova te evolisio moʼo fakatupu te maʼuli ʼi te kele?” peʼe “He koʼe ʼe mole tou kau ki te maʼuli fakakolo, ohage la ko te vote ke tou faiga ke lakalaka ki muʼa te maʼuli?” ʼI ʼihi temi, ʼe fia fakalotoʼi e Thomas ki tona ʼofafine pe kotea ʼae ʼe tonu ke tui ki ai, kae ʼe mole ina fai te faʼahi ʼaia. ʼE ina iloʼi ke tui he tahi ki te moʼoni, ʼe ʼaoga ki ai he ʼu kiʼi fakamoʼoni.

⁸ ʼE toe iloʼi foki e Thomas ʼe ʼaoga ke ina maʼu te kataki fualoa moʼo akoʼi tona ʼofafine. Pea ko he kalitate ʼe tonu ke maʼu e te kau Kilisitiano fuli. (Kolose 3:12) ʼE mahino kia Thomas, ʼe ʼaoga he temi pea ʼe tonu ke faipalalau tuʼumaʼu mo tona ʼofafine ke ina fakatuputupu ia tana tui. ʼE ʼaoga ke tokoni ki tona ʼofafine ke ina fakakaukauʼi te ʼu faʼahi ʼae ʼe ina ako ʼi te Tohi-Tapu. ʼE ui fenei e Thomas: “ ʼE ma fia iloʼi mo toku ʼohoana pe ʼe fakamaʼuhigaʼi e toma ʼofafine pea mo tui moʼoni ki te ʼu manatu tafito ʼae ʼe ina ako. Kapau ʼe ʼi ai hana fehuʼi, ko he meʼa ʼe lelei. He ʼe au tuʼania anai mo kapau ʼe ina hoko tali fakafuanoa pe he meʼa.”

9. ʼE feafeaʼi hakotou tokoni ki ʼakotou fanau ke natou tui ki te Folafola ʼa te ʼAtua?

⁹ Ka kataki fualoa te ʼu matuʼā ʼo akoʼi ʼanatou fanau, ʼaki te temi ʼe natou mahino anai ki “te laulahi, mo te loa, mo te maʼoluga pea mo te loloto,” ʼo te tui. (Efeso 3:18) ʼE ʼaoga ke tou akoʼi ʼatatou fanau ʼo mulimuli ki ʼonatou taʼu pea mo tanatou mahino. Pea ka malohi tanatou tui ki te ʼu faʼahi ʼae ʼe natou ako, ʼe faigafua age leva tanatou fakaha te ʼu akonaki ʼae ʼe natou tui ki ai ki ʼihi ʼo kau ai mo ʼonatou kaugā ako. (1 Petelo 3:15) Ohage la, ʼe lava fakaʼaogaʼi koa e takotou fanau te Tohi-Tapu moʼo fakamahino pe ʼe kotea ʼae ʼe hoko moka mate he tahi? ʼE ʼi ai koa he ʼuhiga ʼo te fakamahino ʼaia mai te Tohi-Tapu kia natou?b (Vakaʼi te kiʼi nota.) Kotou manatuʼi, ʼe ʼaoga ke kotou maʼu te kataki fualoa. He ʼe feala ai ke kotou tokoni ki ʼakotou fanau ke natou fakamalohiʼi tanatou tui ki te Folafola ʼa te ʼAtua, pea ʼe fua lelei anai ʼakotou faiga.—Tetelonome 6:6, 7.

10. Kotea ʼae ʼe tonu ke maʼuhiga moka kotou akoʼi ʼakotou fanau?

¹⁰ ʼAki takotou faʼifaʼitaki, ʼe toe feala foki ke kotou tokoni ki ʼakotou fanau ke tuputupu ai tanatou tui. Ko Stephanie ʼe ʼi ai ʼana taʼahine ʼe toko tolu, ʼe ina ui fenei: “Talu mai te kei liliki ʼo ʼaku fanau, neʼe au fai te ʼu fehuʼi ʼaeni kia au, ‘ ʼE au fakaha koa ki ʼaku fanau ʼe au tui papau ki te ʼofa ʼo Sehova, mo te faitotonu ʼo ʼona ala pea ʼe maʼuli moʼoni? ʼE mahino koa ʼaku fanau ʼe au ʼofa moʼoni ia Sehova?’ ʼE mole au faiga au ke natou tui kae ʼe heʼeki au tui au.”