Ko Ai Koa Te ʼu Minisi ʼa Te ʼAtua Ia ʼAho Nei?

“Ko tatatou faʼafai ʼe haʼu mai te ʼAtua, ko ia ʼaē neʼe ina faka fealagia moʼoni kia tatou ke tou liliu ko he ʼu minisi ʼo te fuakava foʼou.”​—⁠2 Kolonito 3:5, 6, MN.

1, 2. Neʼe koteā te maʼua ʼaē neʼe kau kiai te kau Kilisitiano fuli ʼo te ʼuluaki sēkulō, kae koteā te ʼu fetogi ʼaē neʼe hoko?

ʼI TE ʼuluaki sēkulō ʼo totatou temi, neʼe ʼi ai te maʼua ʼo te kau Kilisitiano fuli​—⁠ko te faka mafola ʼo te logo lelei. Ko te kau Kilisitiano fuli ʼaia neʼe ko te kau fakanofo, pea neʼe ko te kau minisi ʼo te fuakava foʼou. Ko ʼihi ia nātou ʼaia neʼe ʼi ai tonatou tahi ʼu maʼua, ohage ko te fai akonaki ʼi te kokelekasio. (1 Kolonito 12:27-29; Efeso 4:11) Neʼe maʼu e te ʼu mātuʼa te ʼu maʼua faka famili mamafa. (Kolose 3:18-21) Kae neʼe nātou kau fuli ki te gāue maʼuhiga ʼaē ʼe ina hāofaki te hahaʼi, ko te fai faka mafola. ʼI te lea faka Keleka ʼo te Tohi-tapu, ko te maʼua ʼaia neʼe ko te di·a·ko·niʹa​—⁠ko te tauhi, peʼe ko te minisitelio.​—⁠Kolose 4:17.

² ʼAki te temi, neʼe fetogi te ʼu fakatuʼutuʼu ʼaia. Neʼe tuputupu leva te kalasi neʼe fakahigoaʼi ko te kau takitaki lotu, pea neʼe fia fakahoko tokotahi e te kalasi ʼaia te pilivilesio ʼaē ko te fai faka mafola. (Gaue 20:30) Ko te kau takitaki lotu neʼe ko he kiʼi kūtuga, neʼe nātou fakatoʼo kia nātou te higoaʼi ʼaē ko te kau Kilisitiano. Ko te hahaʼi neʼe fakahigoaʼi ko te hahaʼi fakalogo. Pea neʼe akoʼi ki te hahaʼi ʼaia, ʼe ʼi ai tonatou ʼu maʼua, ohage la ko te ʼu mōlaga ʼaē ʼe tonu ke nātou fai moʼo taupau te kau takitaki lotu, pea tokolahi neʼe liliu ai ko te ʼu hahaʼi neʼe nātou fagono pe ki te ʼu meʼa ʼaē ʼe faka mafola age.

3, 4. (a) ʼI te Keletiate, ʼe fakanofo feafeaʼi te kau minisi? (b) Ko ai koa ʼaē ʼe faka ʼuhiga ko te minisi ʼi te Keletiate, pea he koʼe ʼe mole tatau mo te kau Fakamoʼoni ʼa Sehova?

³ ʼE ʼui e te kau takitaki lotu, ko nātou ko te kau minisi (ko te kupu minisi, ʼe ko he fakaliliu faka Latina ʼo te kupu di·aʹko·nos, “tagata faifekau”).a Koia ke feala hanatou liliu ko he kau minisi, ʼe nātou maʼu tanatou ʼu pepa ʼi te ʼu univelesitē peʼe ko te ʼu seminalio, ʼosi ʼaia pea fakanofo ai nātou. ʼE ʼui fēnei e te tohi The International Standard Bible Encyclopedia: “ ʼE faka ʼuhiga māhani te kupu ‘Fakanofo’ ki he tuʼulaga makehe, ʼe foaki ki he kau minisi peʼe ki he kau patele mokā fai he ʼu toʼotoʼoga kua ʼosi fakatuʼutuʼu e te lotu, pea ʼe faka maʼuhigaʼi tāfito te tala ʼo te Folafola peʼe ko te fakahoko ʼo te ʼu toʼotoʼoga, peʼe fakahoko lualua.” Ko ai koa ʼaē ʼe ina fakanofo te kau minisi? ʼE ʼui fēnei e te The New Encyclopædia Britannica: “ ʼI te ʼu ʼēkelesia ʼaē neʼe nātou taupau te talatisio ʼa te kau ʼēpikopō, tuʼumaʼu pe neʼe ko he ʼēpikopō ʼaē neʼe fakanofo minisi. ʼI te ʼu ʼēkelesia Presbytériennes, ʼe fai te fakanofo e te kau minisi ʼo te palokia faka pelepitelo.”

⁴ Koia, ʼi te ʼu ʼēkelesia ʼo te Keletiate, ʼe mole hahaʼi ia nātou ʼaē ʼe fakanofo minisi. Kae ʼe mole feiā ʼi te kau Fakamoʼoni ʼa Sehova. Koteā tona tupuʼaga? Koteʼuhi ʼe nātou muliʼi te faʼifaʼitaki ʼa te kokelekasio faka Kilisitiano ʼo te ʼuluaki sēkulō.

Ko Ai Koa Te Kau Minisi Moʼoni ʼa Te ʼAtua?

5. ʼI te Tohi-Tapu ko ai te hahaʼi ʼaē ʼe nātou tauhi ohage ko he ʼu minisi?

⁵ ʼE ʼui e te Tohi-Tapu, ko te kau atolasio fuli ʼa Sehova​—⁠ʼi te lagi pea mo te kele​—⁠ʼe ko te kau minisi. Neʼe tauhi te kau ʼaselo kia Sesu. (Mateo 4:11; 26:53; Luka 22:43) ʼO feiā mo te kau ʼaselo, ʼe nātou ‘tauhi ki te hahaʼi ʼaē ka hāofaki.’ (Hepeleo1:14; Mateo 18:10) Ko Sesu neʼe ko te minisi. Neʼe ina ʼui fēnei: “Ko te Foha ʼo te tagata, neʼe mole haʼu ke tauhi ia ia, kaʼe ke tauhi.” (Mateo 20:28, MN; Loma 15:8) Koia, kapau ʼe tonu ki te kau tisipulo ʼa Sesu ke nātou ‘mulimuli lelei ki tona ʼu tafuga vaʼe,’ pea ʼe toe maʼua foki ke nātou liliu ko he kau minisi.​—⁠1 Petelo 2:21.

6. Neʼe fakahā feafeaʼi e Sesu ko tana kau tisipulo ʼe tonu anai ke nātou gāue ohage ko he ʼu minisi?

⁶ ʼI muʼa ʼo tana hake ki selo, neʼe ʼui fēnei e Sesu ki tana kau tisipulo: “Koutou olo o fakahoko he u tisipulo i te atu puleaga, papitema natou i te Huafa o te Tamai, mo te Alo, mo te Laumalie-Maonioni. Koutou fakaʼako natou ki te taupau o meafuape nee au fakatotonu kia koutou.” (Mateo 28:19, 20) Neʼe tonu ki te kau tisipulo ʼa Sesu ke nātou gāue ohage ko he kau minisi, ko tona faka ʼuhiga ke nātou fai he ʼu tisipulo. Ko te kau tisipulo foʼou ʼaē neʼe nātou akoʼi, neʼe tonu ke nātou akoʼi te muliʼi ʼo meʼa fuape neʼe fakatotonu age e Sesu, ʼo kau kiai mo te fakatotonu ʼaē ke nātou ʼolo ʼo fai he ʼu tisipulo. Peʼe tagata peʼe fafine, peʼe kua lahi peʼe kei tamasiʼi, ko he tisipulo moʼoni ʼa Kilisito neʼe tonu ke liliu ko he minisi.​—⁠Soele 2:28, 29.

7, 8. (a) Ko te ʼu vaega faka Tohi-Tapu fea ʼaē ʼe fakamoʼoni ai ko te kau Kilisitiano moʼoni fuli ʼe ko he kau minisi? (b) Koteā te ʼu fehuʼi ʼe lagaʼi mokā ʼe fakanofo minisi he tahi?

⁷ ʼO mulimuli ki te manatu ʼaia, ʼi te Penikosite ʼo te taʼu 33 ʼo totatou temi, ko te kau tisipulo fuli ʼa Sesu ʼaē neʼe nātou kau ki te ʼaho ʼaia, tagata mo fafine, neʼe nātou tala fakatahi ‘te ʼu meʼa taulekaleka ʼa te ʼAtua.’ (Gaue 2:1-11) Pea tahi ʼaē, neʼe tohi fēnei e te ʼapositolo ko Paulo: “ ʼAki te loto ʼe kita haga tui ki te faitotonu, kae ʼaki te gutu ʼe kita tala te hāofaki ia muʼa ʼo te kaugamālie.” (Loma 10:10, MN ) Neʼe mole fai e Paulo te ʼu palalau ʼaia ki he kalasi ʼo he kau takitaki lotu, kae “kia nātou fuli ʼaē [neʼe] ʼi Loma ohage ko he kau ʼofaina ʼa te ʼAtua.” (Loma 1:1, 7, MN ) ʼO toe feiā mo ‘te kau maʼoniʼoni fuli ʼi Efeso pea mo te kau agatonu ʼaē ʼe logo tahi mo Kilisito Sesu,’ neʼe tonu ke nātou ‘tui ki ʼonatou vaʼe te logo lelei ʼo te tokalelei.’ (Efeso 1:1; 6:15) Pea kia nātou fuli ʼaē neʼe nātou logo ki te tohi ʼaē neʼe fai ki te kau Hepeleo, neʼe nātou “taupau malohi te fakaha o [tanatou] falala.”​—⁠Hepeleo 10:23.

⁸ Koia ko te temi fea ʼaē ʼe liliu ai he tahi ko he minisi? Ko tona faka ʼuhiga, ko te temi fea ʼaē ʼe fakanofo ai? Pea ko ai koa ʼaē ʼe ina fakanofo ia ia?

Te Fakanofo ʼa He Minisi ​—⁠ʼI Te Temi Fea?

9. Ko te temi fea ʼaē neʼe fakanofo minisi ai ia Sesu, pea ko ai ʼaē neʼe ina fakanofo ia ia?

⁹ Moʼo ʼiloʼi pe ko te temi fea pea ko ai ʼaē ʼe ina fakanofo he tahi ke liliu ko he minisi, koutou fakatokagaʼi te faʼifaʼitaki ʼa Sesu Kilisito. Neʼe mole ʼi ai hona pepa moʼo fakamoʼoni kua fakanofo minisi peʼe ko hona tuʼulaga neʼe fakatoʼo age e he seminalio moʼo fakamoʼoni ʼe ko he minisi, pea neʼe mole fakanofo ia e he tagata. He koʼe ʼe tou lava ʼui, neʼe ko he minisi? Koteʼuhi neʼe ina fakahoko te ʼu palalau faka polofeta ʼaenī ʼa Isaia: “Ko te laumālie ʼo Sehova ʼe ia te ʼau, koteʼuhi kua ina fakanofo ʼau ke ʼau fakahā te logo lelei.” (Luka 4:17-19, MN; Isaia 61:1) ʼAki te ʼu palalau ʼaia kua mahino kia tatou neʼe fekauʼi mai Sesu ke ina tala te logo lelei. Pea ko ai ʼaē neʼe ina fekauʼi mai ia ia? Mai tona ʼuhiga ʼaē neʼe fakanofo ia ia e te laumālie ʼo Sehova moʼo fai te gāue, koia ʼe tou mahino lelei ai neʼe fakanofo tonu ia Sesu e Sehova ʼAtua. Neʼe hoko ʼanafea te faʼahi ʼaia? Neʼe hoko ʼi te temi ʼaē neʼe hifo ai te laumālie ʼo Sehova kia Sesu, ʼi tana papitema. (Luka 3:21, 22) Koia, neʼe fakanofo minisi ia Sesu ʼi te temi ʼaē neʼe papitema ai.

10. Ko ai ʼaē ʼe ina fakanofo he minisi Kilisitiano ko he tahi ʼe “faʼafai”?

¹⁰ Ko ai ʼaē neʼe ina fakanofo te kau tisipulo ʼa Sesu ʼi te ʼuluaki sēkulō? Neʼe ko Sehova ʼaē neʼe ina fakanofo minisi nātou. Neʼe ʼui fēnei e Paulo: “Ko tatatou faʼafai ʼe haʼu mai te ʼAtua, ko ia ʼaē neʼe ina faka feala moʼoni kia tatou ke tou liliu ko he ʼu minisi ʼo te fuakava foʼou.” (2 Kolonito 3:5, 6, MN ) ʼE faka fealagia feafeaʼi e Sehova ke liliu tana kau atolasio ko he ʼu minisi? Tou vakaʼi te faʼifaʼitaki ʼa Timoteo, ʼaē neʼe fakahigoaʼi e Paulo “ko te minisi ʼa te ʼAtua ʼi te logo lelei ʼo ʼuhiga mo Kilisito.”​—⁠1 Tesalonika 3:2, MN.

11, 12. Neʼe feafeaʼi te tuputupu ʼa Timoteo ʼo liliu ai ko te minisi?

¹¹ Ko te ʼu palalau ʼaenī kia Timoteo ʼe tokoni anai kia tatou ke tou mahino pe neʼe feafeaʼi tana liliu ko he minisi: “Kae kia te koe, haga nofo ʼi te ʼu meʼa ʼaē neʼe ke ako pea neʼe fakalotoʼi koe ke ke tui kiai, ʼi tau ʼiloʼi ʼaē pe ko ai ʼaē neʼe nātou akoʼi atu kia koe te ʼu meʼa ʼaia, pea talu mai tau kei veliveli ʼe ke ʼiloʼi te ʼu tohi taputapu, ʼaē ʼe feala ke nātou fakaliliu koe ke ke poto ki te hāofaki, ʼaki te tui ʼaē ʼo ʼuhiga mo Kilisito Sesu.” (2 Timoteo 3:14, 15, MN ) Ko te fakatafitoʼaga ʼo te tui ʼa Timoteo, ʼaē neʼe ina uga ia ia ke ina tala te folafola ki te kaugamālie, neʼe ko te ʼatamai mālama ʼo te Tohi-Tapu. Neʼe tonu pe koa ke lautohi Timoteo ke ina maʼu ai te ʼatamai mālama totonu? Kailoa. Neʼe ʼaoga kia Timoteo he tokoni pea mo he mahino fakalaumālie ʼo ʼuhiga mo te ʼu meʼa ʼaē neʼe ina lau. (Kolose 1:9) ʼAki te faʼahi ʼaia, neʼe ‘fakalotoʼi ia Timoteo ke tui kiai.’ Neʼe ina ʼiloʼi te Tohi-Tapu ‘talu mai tana kei veliveli,’ pea ko tana ʼu ʼuluaki faiako neʼe lagi ko tana faʼe pea mo tana kui fafine, koteʼuhi ko tana tāmai neʼe mole tui kia Sehova.​—⁠2 Timoteo 1:5.

¹² Kae neʼe ʼi ai te tahi meʼa neʼe maʼuhiga ke liliu ia Timoteo ko he minisi. ʼUluaki, neʼe mālohi tana tui he neʼe fakatahi mo te kau Kilisitiano ʼo te ʼu kokelekasio ʼaē neʼe ōvi age. He koʼe ʼe tou ʼiloʼi te faʼahi ʼaia? Koteʼuhi ʼi te ʼuluaki felāveʼi ʼa Paulo pea mo Timoteo, neʼe “lau tona lelei e te ʼu tēhina ʼo Lisite pea mo Ikoniome.” (Gāue 16:2, MN ) Pea tahi ʼaē meʼa, ʼi te temi ʼaia ko ʼihi tēhina neʼe nātou faitohi ki te ʼu kokelekasio moʼo fakaloto mālohiʼi nātou. Pea neʼe ʼaʼahi nātou e te ʼu tagata taupau moʼo fakaloto mālohiʼi ʼo nātou. Ko te ʼu fakatuʼutuʼu ʼaia neʼe tokoni ki te kau Kilisitiano ohage ko Timoteo, ke nātou tuputupu ʼi te faʼahi fakalaumālie.​—⁠Gaue 15:22-32; 1 Petelo 1:1.

13. Ko te temi fea ʼaē neʼe fakanofo minisi ai ia Timoteo, pea he koʼe ʼe feala hakotou ʼui, neʼe hoholo aipe tana tuputupu ʼi te faʼahi fakalaumālie?

¹³ ʼO ʼuhiga mo te fakatotonu ʼaē ʼa Sesu ia Mateo 28:19, 20, ʼe tou ʼiloʼi papau ko te tui ʼa Timoteo neʼe ina uga ia ia ke ina faʼifaʼitakiʼi ia Sesu pea mo papitema. (Mateo 3:15-17; Hepeleo 10:5-9) Neʼe ko he fakatā ʼaia kua foaki katoa e Timoteo tona maʼuli ki te ʼAtua. ʼI te temi ʼaē neʼe papitema ai Timoteo, neʼe liliu leva ko te minisi. Koia talu mai tona papitema, ko tona maʼuli, mo tona mālohi pea mo meʼa fuli ʼaē neʼe ina fai, neʼe ina fakaʼaogaʼi maʼa te ʼAtua. Neʼe ko he koga maʼuhiga ʼaia ʼo tana tauhi, “ko he tauhi taputapu.” Kae neʼe mole manatu ia Timoteo kua feʼauga ʼaki pe tona ʼuhiga minisi. Kailoa, neʼe hoholo atu pe tana tuputupu ʼi te faʼahi fakalaumālie, ʼo liliu ai ko he minisi Kilisitiano fakapotopoto. Neʼe hoko te faʼahi ʼaia koteʼuhi neʼe felogoi lelei ia Timoteo mo te kau Kilisitiano ʼaē kua fakapotopoto, ohage ko Paulo, mo fai tana ako takitokotahi, pea mo faʼafai ʼi te gāue fai faka mafola.​—⁠1 Timoteo 4:14; 2 Timoteo 2:⁠2; Hepeleo 6:1.

14. Ia ʼaho nei, ʼe tuputupu feafeaʼi he tahi ʼe ‘lotolelei ki te maʼuli heʼegata’ ke liliu ko he minisi?

¹⁴ Ia ʼaho nei, ʼe toe feiā mokā fakanofo he tahi ki te minisitelio faka Kilisitiano. Ko ia ʼaē ʼe “lotolelei ki te maʼuli heʼegata” ʼe fai tana ako Tohi-Tapu ke feala hana ʼiloʼi ia te ʼAtua pea mo tana ʼu fakatuʼutuʼu. (Gāue 13:48, MN ) ʼE akoʼi ke ina maʼuliʼi te ʼu pelesepeto faka Tohi-Tapu, pea mo faikole fakamalotoloto ki te ʼAtua. (Pesalemo 1:1-3; Tāʼaga Lea 2:1-9; 1 Tesalonika 5:17, 18) ʼE fakatahi mo te tahi ʼu tēhina, pea ʼe ina fakaʼaogaʼi te ʼu fakatuʼutuʼu pea mo te ʼu tonu ʼaē neʼe fai e te “kaugana agatonu mo fakapotopoto.” (Mateo 24:45-47; Tāʼaga Lea 13:20; Hepeleo 10:23-25) Koia ʼe tuputupu ʼi he ako ʼe fakatuʼutuʼu lelei.

15. Koteā te meʼa ʼe hoko mokā papitemaʼi he tahi? (Vakaʼi te nota ʼi te lalo pasina.)

¹⁵ Kae ʼaki te temi, ko ʼaē ʼe ina ako te Tohi-Tapu, ʼe ina fakatuputupu tona ʼofa kia Sehova ʼAtua pea mo tana tui mālohi ki te sakilifisio faitotogi, pea kua holi leva ke ina foaki tona maʼuli katoa ki tana Tāmai ʼe ʼi selo. (Soane 14:1) ʼE ina momoli tona maʼuli ʼi te faikole, ʼosi ʼaia pea papitema, moʼo fakahā ʼi muʼa ʼo te kaugamālie te meʼa ʼaē neʼe ina kole ʼi tona loto. Ko tana papitema ʼe ko te toʼotoʼoga ʼaia ʼo tona fakanofo, koteʼuhi ʼi te temi leva ʼaia ʼe ina fakamoʼoni ai ʼe ko ia ko he kaugana, ko he di·aʹko·nos ʼa te ʼAtua he kua ina foaki ki ai tona maʼuli katoa. ʼE tonu ke fakamamaʼo mai te malamanei. (Soane 17:16; Sakopo 4:4) Neʼe ina momoli tona maʼuli katoa, ko “he sakilifisio maʼuli, mo maʼoniʼoni, pea mo lelei ki te ʼAtua.” (Loma 12:1, MN )b ʼE ko he minisi ʼa te ʼAtua, ʼe ina faʼifaʼitakiʼi ia Kilisito.

Koteā Te Minisitelio Faka Kilisitiano?

16. Neʼe koteā te ʼu faʼahiga maʼua ʼo Timoteo ʼi tona ʼuhiga minisi?

¹⁶ Neʼe koteā te minisitelio ʼa Timoteo? Neʼe ʼi ai tana ʼu gāue makehe ʼi tana kaugā folau mo Paulo. Pea ʼi te temi ʼaē neʼe liliu ai ko te tagata ʼāfea, neʼe gāue kinakina ia Timoteo ʼi te fai akonaki pea mo te fakamālohiʼi ʼo tona ʼu kaumeʼa Kilisitiano. Kae ko te koga tāfito ʼo tona minisitelio, ohage pe ko Sesu pea mo Paulo, neʼe ko te faka mafola ʼo te logo lelei pea mo fai ni ʼu tisipulo. (Mateo 4:23; 1 Kolonito 3:5) Neʼe ʼui fēnei e Paulo kia Timoteo: “Kae ko koe, taupau tou poto ia meʼa fuli, kātakiʼi te mamahi, fai te gāue ʼa te tagata fai evaselio, fai katoa tau minisitelio.”​—⁠2 Timoteo 4:5, MN.

17, 18. (a) Koteā te gāue ʼaē ʼe fai e te kau minisi Kilisitiano? (b) ʼE maʼuhiga feafeaʼi te gāue fai faka mafola ki he minisi Kilisitiano?

¹⁷ ʼE toe tatau pe mo te kau minisi Kilisitiano ʼo te temi nei. ʼE nātou fakahoko te minisitelio ki te hahaʼi, ko te faka mafola ʼo te evaselio, ʼo nātou fakahā ki te hahaʼi, ʼe fakatafito te hāofaki ki te sakilifisio ʼo Sesu pea ʼe nātou akoʼi te hahaʼi agavaivai ke nātou pāui ki te huafa ʼo Sehova. (Gaue 2:21; 4:10-12; Loma 10:13) ʼE nātou fakamoʼoni ʼaki te Tohi-Tapu, ko te Puleʼaga ʼe ko te falalaʼaga pe ʼaia e tahi ʼo te ʼu mamahi ʼo te malamanei, pea ʼe nātou fakahā ʼe feala ʼi te temi nei, ke lelei age totatou maʼuli, mo kapau ʼe tou maʼuliʼi te ʼu pelesepeto ʼa te ʼAtua. (Pesalemo 15:1-5; Maleko 13:10) Kae ko te minisi Kilisitiano ʼe mole ina faka mafola he evaselio faka sosiale. ʼE ina akoʼi ki te hahaʼi, ‘ko te pipiki ʼaē ki te ʼAtua ʼe kita maʼu ai te fakapapau ʼo te maʼuli ʼaenī pea mo te maʼuli ka haʼu.’​—⁠1 Timoteo 4:8.

¹⁸ ʼIo, ko te tokolahi ʼi te kau minisi ʼe lahi tanatou faʼahiga fai moʼo fakahoko tanatou tauhi, pea ʼe mole tatau te faʼahiga tauhi ʼa te kau Kilisitiano fuli. Tokalahi ʼe ʼi ai tonatou ʼu maʼua faka famili. (Efeso 5:21–6:4) ʼE ʼi ai te ʼu maʼua ʼo te kau tagata ʼāfea pea mo te ʼu tagata faifekau faka minisitelio ʼi te kokelekasio. (1 Timoteo 3:1, 12, 13; Tito 1:5; Hepeleo 13:7) ʼE lahi te kau Kilisitiano ʼe nātou tokoni ki te laga ʼo te ʼu Fale ʼo Te Puleʼaga. Ko ʼihi ʼe nātou maʼu te pilivilesio taulekaleka ʼaē ko te ʼolo ʼo gāue ʼi he Petele ʼo te Sosiete Watch Tower. Kae ʼe kau fuli te kau Kilisitiano ki te faka mafola ʼo te logo lelei. ʼE mole fakakeheʼi he tahi. Ko he tahi ʼe kau ki te gāue ʼaia, ʼe ina fakahā ki te kaugamālie ʼe ko he minisi faka Kilisitiano moʼoni.

Te Aga ʼa He Minisi Kilisitiano

19, 20. Koteā te aga ʼaē ʼe tonu ke maʼu e he minisi Kilisitiano?

¹⁹ Ko te tokolahi ʼi te kau minisi ʼo te Keletiate, ʼe nātou loto ke fai age he fakaʼapaʼapa makehe kia nātou, pea ʼe nātou fakaʼaogaʼi te ʼu higoa ohage la ko “patele” pea mo “ ʼēpikopō.” Kae ʼe ʼiloʼi e te minisi Kilisitiano, ʼe ko Sehova tokotahi pe ʼaē ʼe tau mo feʼauga ke fai ki ai he fakaʼapaʼapa makehe. (1 Timoteo 2:9, 10) ʼE mole he minisi Kilisitiano ʼe ina loto ke fai age ki ai he fakaʼapaʼapa lahi peʼe holi ki he ʼu higoa makehe. (Mateo 23:8-12) ʼE nātou tahi ʼiloʼi ko te faka ʼuhiga tāfito ʼo te kupu di·a·ko·niʹa ʼe ko te “tauhi.” Ko te kupu ʼaē ʼe pipiki kiai, ʼe fakaʼaogaʼi ʼi ʼihi temi e te Tohi-Tapu ʼo ʼuhiga mo he ʼu gāue ʼe fai ki he tahi, ohage la ko he tahi ʼe gāue ʼi he falekai. (Luka 4:39; 17:8; Soane 2:5) Logola ko tona fakaʼaogaʼi ki te minisitelio faka Kilisitiano ʼe māʼoluga age, ko te kupu di·aʹko·nos ʼe faka ʼuhiga tuʼumaʼu pe ia ki he tagata faifekau.

²⁰ Koia ʼe mole he minisi Kilisitiano ʼe tonu ke ina ʼui ʼe maʼuhiga age ʼi ʼihi. Ko te kau minisi Kilisitiano moʼoni​—⁠māʼia mo nātou ʼaē ʼe ʼi ai tonatou ʼu maʼua makehe ʼi te kokelekasio​—⁠ʼe ko he ʼu kaugana agavaivai. Neʼe ʼui fēnei e Sesu: “Ko ʼaē ʼe loto ke liliu ʼo lahi ia koutou, ʼe tonu ia ke liliu ko takotou tagata faifekau, pea ko ʼaē ʼe loto ke ʼuluaki ia koutou ʼe tonu ia ke liliu ko takotou kaugana.” (Mateo 20:26, 27, MN ) Moʼo fakahā ki tana kau tisipulo te aga ʼaē ʼe tonu ke nātou maʼu, neʼe fufulu e Sesu tonatou ʼu vaʼe, ʼo ina fai te gāue ʼa te tagata kaugana ʼe mālalo ʼosi. (Soane 13:1-15) ʼI tauhi agavaivai leva! Pea ko te kau minisi Kilisitiano ʼe nātou tauhi ʼaki he agavaivai kia Sehova ʼAtua pea mo Sesu Kilisito. (2 Kolonito 6:4; 11:23) ʼE nātou fia mālalo moʼo tauhi ki te hahaʼi. Pea ka nātou faka mafola te logo lelei, ʼe nātou gāue katoa maʼa te hahaʼi ʼaē ʼe mole heʼeki tui kia Sehova.​—⁠Loma 1:14, 15; Efeso 3:1-7.

Koutou Faʼa Kātaki ʼi Te Minisitelio

21. Neʼe feafeaʼi te fakapale ʼo Paulo ʼi tana faʼa kātaki ʼi te minisitelio?

²¹ Maʼa Paulo, neʼe tonu ke faʼa kātaki ʼi tona ʼuhiga minisi. Neʼe ina ʼui ki te kau Kolose, neʼe lahi ʼaupito te ʼu mamahi ʼaē neʼe hoko kia ia, ke feala hana faka mafola kia nātou te logo lelei. (Kolose 1:24, 25) Pea ʼaki tana faʼa kātaki, tokolahi neʼe nātou tali te logo lelei pea mo liliu ko te kau minisi. Neʼe fakatupu nātou ohage ko he ʼu foha ʼo te ʼAtua pea mo he ʼu tēhina ʼo Sesu Kilisito, ʼaki te ʼamanaki ʼaē ke nātou liliu ko he ʼu laumālie ʼi ʼona tafa ʼi te lagi. ʼI fakapale faka kolōlia leva ʼuhi ko tana faʼa kātaki!

22, 23. (a) He koʼe ʼe ʼaoga ia ʼaho nei te faʼa kātaki ki te kau minisi Kilisitiano? (b) Koteā te ʼu fua taulekaleka ʼaē ʼe kita maʼu mai te faʼa kātaki faka Kilisitiano?

²² Ia ʼaho nei, ʼe maʼuhiga te faʼa kātaki ki te ʼu minisi moʼoni ʼa te ʼAtua. ʼI te ʼaho fuli, ko te tokolahi ʼe nātou tau mo te mahaki peʼe ko te ʼu mamahi ʼo te temi matuʼa. ʼE gāue kinakina te ʼu mātuʼa moʼo taupau tanatou ʼu fānau​—⁠pea ko te tokolahi ia nātou ʼaia ʼe ko he tāmai pe ko he faʼe ʼe ina taupau tokotahi tana fānau. Ko te ʼu tamaliki ako, ʼaki he lototoʼa ʼe nātou tekeʼi te ʼu aga kovi ʼaē ʼe fai ʼi te faleako. Tokolahi te kau Kilisitiano ʼe nātou tau mo te ʼu faigataʼaʼia faka ekonomika. Pea tokolahi ʼe nātou tau mo te ʼu fakataga peʼe ko he ʼu faigataʼaʼia ʼuhi ko “te ʼu temi maʼuhiga ʼaupito mo faigataʼa” ʼo te temi ʼaenī! (2 Timoteo 3:1, MN ) Ei, ko te toko ono miliona minisi ʼa Sehova ia ʼaho nei, ʼe feala ke nātou ʼui ohage ko te ʼapositolo ko Paulo: “Ia meʼa fuli ʼe mātou fakahā ko mātou ko te ʼu minisi ʼa te ʼAtua, ʼaki te faʼa kātaki lahi.” (2 Kolonito 6:4, MN )ʼE mole situʼa te kau minisi Kilisitiano ki tonatou maʼua ʼaia. ʼE feala hatatou vikiʼi moʼoni ia nātou ʼo ʼuhiga mo tanatou faʼa kātaki.

²³ Pea tahi ʼaē, ohage ko Paulo, ʼe kita maʼu te ʼu fua taulekaleka mai te faʼa kātaki. ʼAki te faʼa kātaki, ʼe tou puipui tatatou ʼu felogoi lelei mo Sehova pea ʼe tou fakafiafia tona loto. (Tāʼaga Lea 27:11) ʼE tou fakamālohiʼi tatatou tui pea mo tou fai te ʼu tisipulo, ke nātou ʼōmai ʼo faka hahaʼi te famili fakatautehina ʼa te kau Kilisitiano. (1 Timoteo 4:16) Neʼe lagolago ia Sehova ki tana kau minisi, pea neʼe ina tapuakina tanatou minisitelio ʼi te ʼu ʼaho fakamuli ʼaenī. Pea neʼe tānaki ai te ʼu hahaʼi fakaʼosi ʼo te toko 144 000, pea ko te tahi ʼu miliona hahaʼi ʼe nātou maʼu te ʼamanaki moʼoni ʼaē ko te maʼuli heʼegata ʼi he kele faka palatiso. (Luka 23:43; Fakahā 14:1) ʼE moʼoni, ko te minisitelio faka Kilisitiano ʼe ko he meʼa ʼofa ʼaia ʼo te manavaʼofa ʼa Sehova. (2 Kolonito 4:1) ʼOfa pe ke tou faka maʼuhigaʼi fuli te minisitelio ʼaia, pea mo tou loto fakafetaʼi koteʼuhi ʼe heʼegata anai tona ʼu tapuakina.​—⁠1 Soane 2:17.

[Kiʼi nota]

ʼE Feala Koa Hakotou Fakamahino?

• Neʼe koteā te maʼua ʼaē neʼe kau kiai te kau Kilisitiano fuli ʼo te ʼuluaki sēkulō?

• Ko te temi fea pea ko ai ʼaē neʼe ina fakanofo he minisi Kilisitiano?

• Koteā te aga ʼaē ʼe tonu ke maʼu e he minisi Kilisitiano?

• He koʼe ʼe tonu ke faʼa kātaki he minisi Kilisitiano mokā felāveʼi mo he ʼu fihifihia?

[Paki ʼo te pasina 16, 17]

Neʼe akoʼi kia Timoteo te Folafola ʼa te ʼAtua talu mai tana kei veliveli. ʼI te temi ʼaē neʼe papitema ai, neʼe fakanofo ko te minisi

[Paki ʼo te pasina 18]

ʼE fakatā e te papitema ia te foaki ʼo tokita maʼuli ki te ʼAtua, pea ʼe fakaʼiloga ai kua kita minisi

[Paki ʼo te pasina 20]

Ko te kau minisi Kilisitiano ʼe nātou fia tauhi