Koutou Akoʼi Nātou ʼi Tanatou Kei Veliveli
ʼE FAKAHĀ e te ʼu kumi neʼe fai ʼi totatou temi ko “te ʼu kihiʼi tamaliki ʼaē ʼe kei māhina tolu ʼi te falega fānau ʼo tanatou ʼu faʼe, ʼe nātou gaūgaūe ʼi tanatou logo ki te ʼu leʼo.” ʼE ʼui e te sulunale Winnipeg Free Press, ko te ʼu hahaʼi kumi ʼo te Univelesitē ʼo te Potu Tokelau ʼo Caroline, neʼe nātou “fakatokagaʼi, ka lautohi te ʼu faʼe ki tanatou ʼu tamaliki ʼaē ʼe kei nātou fuafatuʼi, ʼi tanatou kua fānauʼi, ʼe kei manatuʼi e te ʼu tamasiʼi mokā toe lau age kia nātou.” Ka lautohi leʼolahi te ʼu fafine ʼi te temi ʼaē ʼe kei nātou faitama ai, ʼe feala ke tokoni lelei ia te faʼahi ʼaia ki te fakapipiki ʼo he ʼu manatu maʼuhiga ki te aga ʼaē ʼe tonu ke fai e te tamasiʼi. ʼE ʼui e te Tohi-Tapu, ko Timoteo ‘talu mai tana kei veliveli neʼe kua ina ʼiloʼi te ʼu tohi taputapu.’ (2 Timoteo 3:14, 15) ʼE mahino papau ia, neʼe mahino tana faʼe pea mo tana kui fafine ki te maʼuhiga ʼo tona akoʼi talu mai tana kei veliveli, pea neʼe lagi kau ki te ako ʼaia te lautohi leʼolahi.
ʼE ʼui fēnei e te tagata faitohi ko Jim Trelease, ko te lautohi ʼe “ko te fealagia mālohi tokotahi ʼaia ʼo te maʼuli ʼaē ʼe tou maʼu ʼi totatou sosiete ia ʼaho nei.” Ko totatou poto ʼi te palalau pea mo te faʼufaʼu ʼo tatatou ʼu palalau, ʼe tuputupu ʼaki te lautohi leʼolahi.
ʼI te temi ʼaē kua koutou kamata palalau ai mo takotou tamasiʼi, ʼe lelei takotou kamata lautohi leʼolahi kia ia. Logope la ʼe mole mahino anai kiai takotou tamasiʼi ʼaē ʼe kei fuafatuʼi pe ko takotou tamasiʼi ʼaē neʼe hoki fānauʼi, kae ʼe ina maʼu anai hona fua lelei ki ʼamuli. ʼE ʼui fēnei ia Tāʼaga Lea 22:6: “Akoʼi te tama ki te ala ʼaē ʼe ʼaoga ki ai; koteʼuhi ka matuʼa anai, ʼe mole fakamamaʼo anai ia mai ai.”
Koteā te tohi ʼaē ʼe feala ke koutou lau, ʼe ʼaoga pea mo fua lelei anai kia ia? Koutou lau leʼolahi te Tohi-Tapu ki takotou tamasiʼi ʼi te ʼaho fuli. Koutou lau foki mo ʼihi ʼu tohi ʼe ʼaoga anai kia ia, ohage ko te ʼu tohi Écoutez le grand Enseignant, Recueil d’histoires bibliques, Te tagata ʼaē ʼe lahi tokotahi ʼo te ʼu temi fuli, pea mo te ʼu alatike ʼo te ʼu nusipepa ʼo Te Tule Leʼo pea mo te Réveillez-vous!
ʼE moʼoni, ʼe tonu ke koutou fakaʼaogaʼi he temi moʼo fakahoko te faʼahi ʼaia, kae ʼe ko he temi ʼe fakaʼaogaʼi lelei. ʼE ko he faʼahiga fai lelei ʼaia moʼo fakahā takotou tokaga pea mo tokotou ʼofa ki takotou fānau.