‘Tou Fakaʼaogaʼi Lelei Te Folafola ʼo Te Moʼoni’
“Faiga fakamalotoloto ke ke tuʼu ia muʼa ʼo te ʼAtua ohage ko he tagata ʼe ina tali lelei, ko he tagata gāue ʼe mole ufiufi ʼi he meʼa, ʼe ina fakaʼaogaʼi lelei te folafola ʼo te moʼoni.”—2 Timoteo 2:15, MN.
1, 2. (a) He koʼe ʼe ʼaoga ki te kau gāue he ʼu meʼa gāue? (b) Koteā te gāue ʼaē ʼe fai e te kau Kilisitiano, pea ʼe nātou fakahā feafeaʼi ʼe nātou ʼuluaki kumi muʼa te Puleʼaga?
ʼE ʼAOGA ki te kau tagata gāue he ʼu meʼa gāue moʼo fai ʼaki tanatou gāue. Kae ʼe mole feʼauga pe hakita maʼu te ʼu meʼa gāue fuli. Ko he tagata gāue ʼe tonu ke ina fakaʼaogaʼi te meʼa gāue ʼaē ʼe lelei, pea ke poto ʼi tona fakaʼaogaʼi. Ohage la, ka koutou laga he kiʼi fale ke tānaki ai te ʼu meʼa gāue, kapau ʼe koutou fia fakapipiki he ʼu moʼi papa e lua, ʼe mole tonu pe ke ʼi ai hakotou hāmale pea mo he ʼu faʼo. ʼE toe tonu foki ke koutou popoto ʼi te tutuki ʼo he faʼo ki te moʼi papa ke mole piko te faʼo. Kapau ʼe koutou faiga ke koutou tutuki te faʼo ki te moʼi papa kae mole koutou popoto ʼi te fakaʼaogaʼi ʼo he hāmale, ʼe koutou kinakina anai pea mo lotovaivai. Kae kapau ʼe tou popoto ʼi te fakaʼaogaʼi ʼo te ʼu meʼa gāue pea ʼe tou maʼu anai he ʼu fua lelei.
2 ʼI totatou ʼuhiga Kilisitiano, ʼe ʼi ai te gāue ʼe tonu ke tou fai. Ko he gāue maʼuhiga ʼaupito. Neʼe uga e Sesu Kilisito tana kau tisipulo ke nātou ‘ ʼuluaki kumi muʼa te puleʼaga.’ (Mateo 6:33) ʼE tou lava fakahoko feafeaʼi te faʼahi ʼaia? ʼE tonu ke tou faʼafai ʼi te gāue ʼaē ko te faka mafola ʼo te Puleʼaga pea mo te fai ʼo he ʼu tisipulo. ʼE toe maʼua ke fakatafito tatatou gāue ki te Folafola ʼa te ʼAtua. Pea tolu, ʼe tonu ke lelei tatatou aga. (Mateo 24:14; 28:19, 20; Gaue 8:25; 1 Petelo 2:12) Ke fua lelei pea mo tou fiafia ʼi te gāue faka Kilisitiano ʼaia, ʼe tonu ke tou maʼu te ʼu meʼa gāue ʼaē ʼe lelei pea mo tou ʼiloʼi peʼe feafeaʼi tonatou fakaʼaogaʼi lelei. ʼO ʼuhiga mo te faʼahi ʼaia, neʼe tuku e te ʼapositolo ko Paulo te faʼifaʼitaki lelei ʼi tona ʼuhiga tagata gāue faka Kilisitiano, pea neʼe ina fakaloto mālohiʼi te ʼu tēhina ke nātou faʼifaʼitaki kia te ia. (1 Kolonito 11:1; 15:10) Koia koteā ʼaē ʼe feala ke tou ako mai totatou kaugā gāue ko Paulo?
Ko Paulo Neʼe Ko He Fai Faka Mafola Faʼafai ʼo Te Puleʼaga
3. He koʼe ʼe feala ke tou ʼui ko Paulo neʼe ko he tagata gāue faʼafai ʼo te Puleʼaga?
3 Neʼe feafeaʼi ia Paulo ʼi tona ʼuhiga tagata gāue? ʼE mahino ia neʼe ko he tagata neʼe faʼafai. Neʼe ina maʼu te mālohi ke ina faka mafola te logo lelei ʼi te ʼu koga meʼa ʼo te ʼu tafaʼaki ʼo te tai Metitelanea. Neʼe fakahā e te ʼapositolo ʼaia ʼaē neʼe mole gaʼegaʼe ʼi he temi, te tupuʼaga ʼo tana tala fakafiafia ia te Puleʼaga, ʼo ina ʼui fēnei: “Koteuhi, kapau e au fagonogono te Evaselio, e mole ko he mea ke au fialahi ai, he ko te maua kua hilifaki mai kia te au: malaia kia te au [mo] kapau e mole au fagonogono te Evaselio!” (1 Kolonito 9:16) Neʼe tokaga pe koa e Paulo ke hāofaki tona maʼuli? Kailoa. Neʼe mole manatu pe kia ia. Kae neʼe loto ke toe maʼu e te hahaʼi te ʼu fua lelei ʼo te logo lelei. Neʼe ina tohi fēnei: “Heʼe ʼau fai ia meʼa fuli ʼuhi ko te logo lelei, ke ʼau maʼu mo niʼihi.”—1 Kolonito 9:23, MN.
4. Koteā te meʼa gāue ʼaē ʼe fakaʼaogaʼi tāfito e te kau gāue Kilisitiano?
4 Ko te ʼapositolo ko Paulo neʼe ko he tagata gāue aga fia mālalo, neʼe ina ʼiloʼi neʼe mole feala ke falala ki tona poto ʼo ʼoʼona. Ohage pe ko te ʼaoga ʼaē ʼo he hāmale ki he tagata tufuga ʼakau, ʼo toe feiā pe neʼe ʼaoga kia Paulo te meʼa gāue totonu ke feala hana akoʼi te moʼoni ʼa te ʼAtua ki te loto ʼo te hahaʼi ʼaē neʼe fakalogo kia ia. Koteā te meʼa gāue ʼaē neʼe ina fakaʼaogaʼi tāfito? Neʼe ko te Folafola ʼa te ʼAtua, te Tohi-Tapu. ʼO toe feiā, ʼe tou fakaʼaogaʼi tāfito te Tohi-Tapu heʼe tokoni mai ke tou fai he ʼu tisipulo.
5. Ke fua lelei totatou minisitelio, koteā te meʼa ʼaē ʼe tonu ke tou hilifaki ki tatatou lau te ʼu vaega?
5 Neʼe ʼiloʼi e Paulo ko te fakaʼaogaʼi lelei ʼo te Folafola ʼa te ʼAtua neʼe mole gata ʼaki pe te fakahā ʼo te ʼu manatu ʼe tuʼu ai. Neʼe ina “faigai . . . ke natou tui.” (Gaue 28:23) ʼO feafeaʼi? Neʼe fua lelei te fakaʼaogaʼi e Paulo ia te Folafola ʼa te ʼAtua moʼo fakalotoʼi te hahaʼi tokolahi ke nātou tali te moʼoni ʼo te Puleʼaga. Neʼe ina fai he ʼu palalau ke feala hanatou fakakaukau. Lolotoga māhina e tolu ʼi te sinakoka ʼo Efeso, neʼe fai e Paulo “te ʼu akonaki pea mo ina faiga ke nātou tui ki te puleʼaga ʼa te ʼAtua.” Logola ko “ ʼihi neʼe fefeka pea neʼe mole nātou tui,” kae ko ʼihi neʼe nātou fakalogo. ʼAki te minisitelio ʼo Paulo ʼi Efeso, “neʼe haga tuputupu pea mo mālohi ʼaupito te folafola ʼa Sehova.”—Gaue 19:8, 9, 20, MN.
6, 7. Neʼe faka kolōliaʼi feafeaʼi e Paulo tona minisitelio, pea ʼe lava feafeaʼi hatatou fai feiā?
6 ʼI tona ʼuhiga tagata fai faka mafola faʼafai ʼo te Puleʼaga, ko Paulo neʼe ina ‘faka kolōlia tona minisitelio.’ (Loma 11:13) ʼO feafeaʼi? Neʼe mole ina fia faka maʼuhigaʼi ia ia; kae neʼe mole ufiufi ʼi tana fakahā ki te hahaʼi ʼe ko ia ko he tagata gāue ʼa te ʼAtua. Maʼa ia, neʼe maʼuhiga ʼaupito tona minisitelio. Neʼe poto ia Paulo pea mo ina fakaʼaogaʼi lelei te Folafola ʼa te ʼAtua. Ko tana gāue ʼaē neʼe fua lelei, neʼe ina foaki ai he fakaloto mālohi ki ʼihi, pea mo ina uga nātou ke toe lahi age tonatou minisitelio. ʼI te ʼu ʼaluʼaga ʼaia, neʼe toe faka kolōliaʼi ai tona minisitelio.
7 Ohage ko Paulo, ʼe feala ke tou faka kolōlia tatatou gāue faka minisitelio, mo kapau ʼe tou fakaʼaogaʼi tuʼumaʼu pea mo lelei te Folafola ʼa te ʼAtua. ʼI te ʼu faʼahi fuli ʼo totatou minisitelio, ʼe tonu ke tou fakatuʼutuʼu ke tou vaevae he manatu mai te Tohi-Tapu mo te hahaʼi tokolahi. ʼE tou lava fakahoko feafeaʼi te faʼahi ʼaia, pea mo tou faigaʼi ke tui te hahaʼi? Koutou tokagaʼi te ʼu ʼaluʼaga maʼuhiga ʼaenī e tolu: (1) Koutou fakahā age te Folafola ʼa te ʼAtua ke fakaʼapaʼapa ai te hahaʼi kiai. (2) ʼAki he aga fakaʼeteʼete, koutou fakamahino age te manatu ʼa te Tohi-Tapu pea mo fakahā age te ʼaoga ʼo te manatu ʼaia. (3) Koutou fakaʼaogaʼi te Tohi-Tapu ʼi he ʼaluʼaga ʼe feala ai ki te hahaʼi ke nātou fakakaukauʼi pea mo tui kiai.
8. Koteā te ʼu meʼa gāue ʼe tou fakaʼaogaʼi ia ʼaho nei ʼi te faka mafola ʼo te Puleʼaga, pea neʼe koutou fakaʼaogaʼi feafeaʼi te ʼu meʼa ʼaia?
8 Ko te kau fai faka mafola ʼo te Puleʼaga ia ʼaho nei ʼe nātou maʼu te ʼu meʼa gāue neʼe mole maʼu e Paulo lolotoga tona minisitelio. Ohage ko te ʼu tohi, te ʼu nusipepa, te ʼu kaupepa lalahi, te ʼu pepa lotu pea mo te ʼu fime viteo pea mo te ʼu kaseti. ʼI te ʼu taʼu 1900, neʼe toe fakaʼaogaʼi mo te ʼu kate neʼe tohi ai te logo ʼo te Puleʼaga, mo te ʼu fakatagi, mo te ʼu motokā neʼe fakapipiki kiai te ʼu fakatagi, pea mo te ʼu polokalama lātio. ʼE mahino ia ko tatatou meʼa gāue ʼaē ʼe lelei ʼaupito ʼe ko te Tohi-Tapu, pea ʼe tonu ke tou fakaʼaogaʼi lelei.
ʼE Tonu Ke Fakatafito Totatou Minisitelio Ki Te Folafola ʼa Te ʼAtua
9, 10. ʼO ʼuhiga mo te fakaʼaogaʼi ʼo te Folafola ʼa te ʼAtua, koteā te ako ʼe tou lava tāʼofi mai te tokoni ʼa Paulo kia Timoteo?
9 ʼE lava feafeaʼi hatatou fakaʼaogaʼi fakalelei te Folafola ʼa te ʼAtua? Tou manatuʼi te ʼu palalau ʼaenī neʼe fai e Paulo ki tona kaugā gāue ko Timoteo: “Faiga fakamalotoloto ke ke tuʼu ia muʼa ʼo te ʼAtua ohage ko he tagata ʼe leleiʼia, ko he tagata gāue ʼe mole ufiufi ʼi he meʼa, ʼe ina fakaʼaogaʼi lelei te folafola ʼo te moʼoni.” (2 Timoteo 2:15, MN ) Koteā te faka ʼuhiga ʼo te “fakaʼaogaʼi lelei [ʼo] te folafola ʼo te moʼoni”?
10 Ko te faka ʼuhiga moʼoni ʼo te kupuʼi palalau faka Keleka ʼaē neʼe fakaliliu ʼaki te kupuʼi palalau “fakaʼaogaʼi lelei,” ʼe ko “te tuʼusi totonu” peʼe “kita tofa he ala ʼe ʼalu fakahagatonu.” ʼI te ʼu Koga Tohi Faka Keleka, ʼe gata pe ki te tokoni ʼa Paulo kia Timoteo ʼe fakaʼaogaʼi ai te palalau ʼaia. ʼE feala ke fakaʼaogaʼi te kupuʼi palalau ʼaia ʼo ʼuhiga mo te fuli kele ʼe fai ʼi he gāueʼaga. ʼE mahino ia kapau la neʼe hipa te fuli kele ʼaia, pea ʼe ko he meʼa fakaufiufi anai ki te tagata gāue kele. Ke liliu ko “he tagata gāue ʼe mole ufiufi,” neʼe faka manatuʼi kia Timoteo ke ʼaua naʼa fakamamaʼo mai te akonaki moʼoni ʼo te Folafola ʼa te ʼAtua. Neʼe mole tonu ke faiakonaki ia Timoteo ʼaki tana ʼu manatu ʼa ia totonu. Neʼe tonu ke ina fakatafito pe tana fai faka mafola pea mo tana faiako ki te Tohi-Tapu. (2 Timoteo 4:2-4) Kapau ʼe ina fai feiā, pea ko te hahaʼi loto moʼoni ʼe nātou ʼiloʼi anai te manatu ʼa Sehova, kae mole nātou mulimuli ki he ʼu filosofia ʼo te mālama. (Kolose 2:4, 8) ʼE toe moʼoni te faʼahi ʼaia ia ʼaho nei.
ʼE Tonu Ke Lelei Tatatou Aga
11, 12. Koteā tona fua ki tatatou ʼu aga mokā tou fakaʼaogaʼi lelei te Folafola ʼa te ʼAtua?
11 ʼE mole tonu pe ke tou fakaʼaogaʼi lelei te Folafola ʼa te ʼAtua moʼo faka mafola tana ʼu moʼoni, kae ʼe toe tonu foki ke mulimuli kiai tatatou ʼu aga. Ko tatou “ko te u kauga gaue a te Atua,” koia ʼe tonu ai ke tou liliu ko he ʼu hahaʼi gāue ʼe aga fakahagatonu. (1 Kolonito 3:9) ʼE ʼui fēnei e te Folafola ʼa te ʼAtua: “E ke fakaʼako te tahi kaiga, kae e mole ke akoʼi ia koe totonu! Ko koe ae e ke ako ke aua te kaihaa, kae e ke kaihaa! E ke lau ke aua te tono, kae e ke tono! Ko koe ae e ke fehia ki te u taulaʼatua, kae e ke kaihaa te u falelotu!” (Loma 2:21, 22) Koia, ʼi totatou ʼuhiga kau gāue ʼa te ʼAtua ʼo te temi ʼaenī, ʼe tou fakaʼaogaʼi lelei te Folafola ʼa te ʼAtua mokā tou mulimuli ki te fakatokaga ʼaenī: “Falala kia Sehova ʼaki tou loto katoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia ʼe ina fakatonutonuʼi anai tou ʼu ala foufou.”—Tāʼaga Lea 3:5, 6.
12 Koteā te ʼu fua ka tou maʼu mokā tou fakaʼaogaʼi lelei te Folafola ʼa te ʼAtua? Tou vakaʼi te malave mālohi ʼo te Folafola ʼa te ʼAtua ki te maʼuli ʼo te hahaʼi fakamalotoloto.
ʼE Maʼu e Te Folafola ʼa Te ʼAtua Te Mālohi Ke Ina Fetogi
13. Koteā ʼaē ʼe feala ke hoko ki he tahi mokā ina maʼuliʼi te Folafola ʼa te ʼAtua?
13 Kapau ʼe falala te hahaʼi ki te logo ʼo te Folafola ʼa te ʼAtua, pea ʼe malave mālohi ai kia nātou ʼo nātou fai he ʼu fetogi lahi ʼi tonatou maʼuli. Neʼe kua sio ia Paulo ki te gāue ʼo te Folafola ʼa te ʼAtua, pea mo mamata ki tona ʼu fua lelei kia nātou ʼaē neʼe liliu ko he kau Kilisitiano ʼi Tesalonika. Neʼe ina ʼui fēnei ai kia nātou: “Mo mātou pe foki ʼe mātou fakafetaʼi tuʼumaʼu ki te ʼAtua, koteʼuhi ʼi takotou maʼu te folafola ʼa te ʼAtua ʼaē neʼe koutou logoʼi ia mātou, neʼe koutou tali ʼo mole hage ko he folafola ʼa te tagata, kae neʼe koutou tali ʼaki tona ʼuhiga totonu, ʼaē ko te folafola ʼa te ʼAtua, ʼaē ʼe toe gāue ia koutou, ko te hahaʼi tui.” (1 Tesalonika 2:13, MN ) Ki te kau Kilisitiano ʼaia—pea mo te kau tisipulo moʼoni fuli ʼa Kilisito—ko te kiʼi poto veliveli ʼo te tagata ʼe mole feala hona fakatatau mo te poto lahi ʼo te ʼAtua. (Isaia 55:9) Ko te kau Tesalonika neʼe nātou “tali te folafola ʼi te lotolotoiga ʼo te ʼu fakataga ʼe mālohi ʼaupito, ʼaki te fiafia ʼo te laumālie maʼoniʼoni” pea neʼe nātou liliu ko he ʼu faʼifaʼitaki maʼa te tahi hahaʼi tui.—1 Tesalonika 1:5-7, MN.
14, 15. ʼE mālohi feafeaʼi te logo ʼo te Folafola ʼa te ʼAtua, pea koteā tona tupuʼaga?
14 Ko te Folafola ʼa te ʼAtua ʼe mālohi, ohage pe ko Sehova ʼaē neʼe ina foaki mai te tohi ʼaia. ʼE haʼu mai “te Atua mauli,” ʼaē ‘neʼe ina fakatuʼu te ʼu lagi’ ʼaki tana folafola, pea ko te folafola ʼaia ‘ ʼe ina fakahoko tuʼumaʼu te meʼa ʼaē neʼe fekauʼi kiai.’ (Hepeleo 3:12; Pesalemo 33:6; Isaia 55:11) Neʼe ʼui fēnei e te tagata sivi Tohi-Tapu: “Ko te ʼAtua ʼe mole mavae kehe mai tana Folafola. ʼE mole fakafisi kiai ohage ko he meʼa ʼe mole ina ʼiloʼi. . . . Koia ko te folafola ʼaia ʼe mole feala ke mate ʼi he temi, ʼe malave tuʼumaʼu ki he tahi mokā ʼosi fakaʼaogaʼi ki ai, koteʼuhi ʼe ko he tohi ʼe nonoʼo tahi mo te ʼAtua moʼoni.”
15 ʼE mālohi feafeaʼi te logo ʼaē ʼe haʼu mai te Folafola ʼa te ʼAtua? ʼE ko he toe mālohi lahi. Koia neʼe tohi fēnei ai e Paulo: “E mauli te folafola a te Atua, pea e gaue, e masilaʼage i te heleta mata lua fuape, e ulu o kaku ki te vaha o te loto mo te laumalie, ki te u hokoga-hui mo te u gakoi-hui, pea e ina fakamau te u fakakaukau mo te u manatu o te loto.”—Hepeleo 4:12.
16. ʼE lava koa ki te Folafola ʼa te ʼAtua ke ina fetogi he tahi?
16 Ko te logo ʼaē ʼe tuʼu ʼi te Folafola ʼa te ʼAtua ʼe “masilaʼage i te heleta mata lua fuape.” Koia ʼe ina maʼu he mālohi ʼe hū loloto age ʼi te ʼu meʼa gāue fuli pe ʼaē ʼe maʼu e te tagata. Ko te Folafola ʼa te ʼAtua ʼe hū ki te ʼu koga loloto ʼo he tahi, pea ʼe feala ke ina fetogi ia ia ʼi tona loto, ʼo malave ki tana faʼahiga fakakaukau pea mo te ʼu meʼa ʼe ina leleiʼia, ʼo ina fakaliliu ia ia ʼaia ko he tagata ʼe gāue lelei pea mo ina maʼu te ʼu kalitate ʼaē ʼe leleiʼia e te ʼAtua. ʼI meʼa gāue mālohi leva!
17. Fakamahino te mālohi ʼaē ʼe maʼu e te Folafola ʼa te ʼAtua moʼo fetogi te hahaʼi.
17 Ko te Folafola ʼa te ʼAtua ʼe ina fakahā te ʼuhiga moʼoni ʼo he tahi, mokā fakatatau mo tana manatu ʼo ʼuhiga mo ia peʼe ko te manatu ʼa te hahaʼi ʼo ʼuhiga mo ia. (1 Samuele 16:7) Māʼiape la mo he tahi ʼe agakovi ʼe feala ʼi ʼihi temi ke ina fufū tona ʼuhiga moʼoni, ʼo ina fakahā ki tuʼa ʼe agalelei peʼe pipiki ki te ʼAtua. Ko te hahaʼi agakovi ʼe nātou malualoi heʼe ʼi ai tona ʼu tupuʼaga kehekehe ʼe kovi. Ko te hahaʼi fialahi ʼe nātou fakahā anai ʼe nātou agavaivai, ke laupisiʼi nātou e te hahaʼi. Kae ʼi tana fakahā te ʼuhiga moʼoni ʼo tona loto, ʼe feala ki te Folafola ʼa te ʼAtua ke ina uga he tahi ʼe agavaivai ke ina toʼo tona ʼulugaaga ʼāfea pea ke ina “kofuʼi te ʼulugaaga foʼou ʼaē neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni.” (Efeso 4:22-24, MN ) Pea ko te ʼu akonaki ʼaē ʼe haʼu mai te Folafola ʼa te ʼAtua ʼe toe feala foki ke nātou fetogi he ʼu hahaʼi ʼe umiuminoa ke nātou liliu ko he kau Fakamoʼoni ʼa Sehova ʼe lototoʼa pea mo liliu ko he kau fai faka mafola ʼe faʼafai.—Selemia 1:6-9.
18, 19. ʼAki te faʼifaʼitaki ʼi te ʼu palakalafe ʼaenī peʼe ko he meʼa neʼe hoko ʼi tokotou telituale, koutou fakahā peʼe lava feafeaʼi ki te moʼoni ʼo te Tohi-Tapu ke ina fetogi he tahi?
18 Ko te mālohi ʼo te Folafola ʼa te ʼAtua moʼo fetogi te hahaʼi, ʼe ʼi ai tona ʼu fua lelei ki te hahaʼi ʼi te potu fuli pe. Ohage la, ko te kau fai faka mafola ʼo Phnom Penh, ʼi Kamopotia, neʼe nātou faka mafola ʼi te kolo ko Kompong Cham tuʼa lua ʼi te māhina. ʼI tana fakalogo ki te palalau kovi ʼa te tahi kau pasitea ʼo ʼuhiga mo te kau Fakamoʼoni ʼa Sehova, neʼe fakatuʼutuʼu e te fafine pasitea ʼo te kolo ke felāveʼi mo te kau Fakamoʼoni mokā nātou liliu age anai ʼo faka mafola ʼi te kolo. Neʼe lahi ʼaupito te ʼu fehuʼi ʼaē neʼe ina fai kia nātou ʼo ʼuhiga mo te ʼu ʼaho ʼo te kau sagato pea neʼe fakalogo lelei ki te ʼu vaega faka Tohi-Tapu ʼaē neʼe lau age ke ina fakakaukauʼi. Pea neʼe ina ʼui fēnei: “Kua ʼau ʼiloʼi ʼe mole moʼoni te ʼu meʼa ʼaē neʼe lau e toku ʼu tēhina pasitea. Neʼe nātou ʼui ʼe mole koutou fakaʼaogaʼi te Tohi-Tapu, kae ʼi te uhu ʼaenī neʼe ko te meʼa pe ʼaia ʼaē neʼe koutou fakaʼaogaʼi!”
19 Neʼe hoko atu te fai palalau ʼa te fafine ʼaia ki te Tohi-Tapu mo te kau Fakamoʼoni ʼa Sehova pea logola tona fakamatakuʼi ʼaē ʼe fakahifo anai ʼi tona tuʼulaga pasitea, kae neʼe mole ina tuku te ʼu fai palalau ʼaia. Neʼe ina fakamatala tana ʼu fai palalau faka Tohi-Tapu ʼaia ki tona kaumeʼa fafine, ʼo ina kamata ako te Tohi-Tapu mo te kau Fakamoʼoni. Neʼe leleiʼia ʼaupito e tona kaumeʼa te ʼu meʼa ʼaē neʼe ina ako, pea ʼi te tahi misa neʼe ʼalu kiai, neʼe ina ʼui fēnei: “Koutou ʼōmai ʼo ako te Tohi-Tapu mo te kau Fakamoʼoni ʼa Sehova!” Mole tuai, ko te fafine ʼaia ʼaē neʼe pasitea pea mo te tahi ʼatu ʼu hahaʼi, neʼe nātou kamata ako te Tohi-Tapu mo te kau Fakamoʼoni ʼa Sehova.
20. Koteā te meʼa neʼe hoko ki te fafine ʼi Kana ʼe ina fakahā lelei ai te mālohi ʼo te Folafola ʼa te ʼAtua?
20 ʼE toe hā te mālohi ʼo te Folafola ʼa te ʼAtua ʼi te meʼa ʼaē neʼe hoko ki te fafine ʼi Kana, ʼe higoa ko Paulina. Neʼe ina ako te Tohi-Tapu mo te tuagaʼane pionie katoa ʼi te tohi Te ʼAtamai Mālama ʼAē ʼe Ina Taki Ki Te Maʼuli Heʼegata.a Ko Paulina neʼe ʼohoana mo te tagata neʼe lahi tona ʼu ʼohoana, pea neʼe mahino kia ia ʼe tonu ke ina fai he ʼu fetogi, kae neʼe fakafeagai mālohi tona ʼohoana pea mo tona ʼu kāiga kia ia. Ko tana kui tagata, neʼe ko te tuʼi fakamāu pea mo pasitea ʼi te ʼēkelesia, pea moʼo tāʼofi ia Paulina ke ina fai te faʼahi ʼaia, neʼe ina fakamatala age te fakamahino hala ia Mateo 19:4-6. Neʼe hage neʼe moʼoni te ʼu palalau ʼa te tuʼi fakamāu ʼaia, kae neʼe mahino vave kia Paulina ko te fakamahino ʼaia neʼe tatau mo te fakaʼaogaʼi kovi e Satana ia te ʼu vaega ʼi tana fakahalaʼi ia Sesu Kilisito. (Mateo 4:5-7) Neʼe ina manatuʼi te ʼu palalau ʼaē neʼe fai e Sesu ʼo ʼuhiga mo te ʼohoana, ʼi tana ʼui ko te ʼAtua neʼe ina fakatupu te tagata mo te fafine, kae mole ko te tagata mo te ʼu fafine, pea ko nāua tokolua, kae mole ko nātou toko tolu, ʼaē neʼe liliu ko he kakano e tahi. Neʼe mole ina fetogi te tonu ʼaē neʼe ina fai, pea neʼe fakagafua age leva ke mavete ʼo mulimuli ki te agaʼi fenua. Mole tuai, pea neʼe liliu ko he kaugā fai faka mafola fiafia ʼo te Puleʼaga kua papitema.
Tou Haga Fakaʼaogaʼi Lelei Te Folafola ʼa Te ʼAtua
21, 22. (a) ʼI totatou ʼuhiga hahaʼi fai faka mafola ʼo te Puleʼaga, ʼe tonu ke tou lotomālohi ʼo fai teā? (b) Koteā ʼaē ka tou vakaʼi ʼi te alatike ka hoa mai?
21 Ko te Folafola ʼa te ʼAtua ʼe ko he meʼa gāue mālohi ʼe tonu ke tou fakaʼaogaʼi moʼo tokoni ki te hahaʼi ke nātou fetogi tonatou maʼuli ke feala hanatou fakaōvi kia Sehova. (Sakopo 4:8) Ohage pe ko te fakaʼaogaʼi e te kau gāue popoto te ʼu meʼa gāue moʼo faʼu he ʼu meʼa lelei, tou lotomālohi ʼo fakaʼaogaʼi fakapotopoto te Folafola ʼa te ʼAtua, te Tohi-Tapu, ʼi te gāue ʼaē neʼe foaki mai e totatou ʼAtua, te faka mafola ʼo te Puleʼaga.
22 ʼE tou lava fakatuputupu feafeaʼi te fakaʼaogaʼi lelei ʼo te Tohi-Tapu ʼi tatatou gāue ʼaē ko te fai ʼo he ʼu tisipulo? ʼE feala mo kapau ʼe tou hikihiki totatou poto moʼo fakalotoʼi ia te hahaʼi mokā tou akoʼi ia nātou. Koutou vakaʼi te alatike ʼaē ka hoa mai, heʼe hā ai te ʼu tokoni moʼo akoʼi pea mo tokoni ki te hahaʼi ke nātou tali te logo ʼo te Puleʼaga.
[Kiʼi nota]
a Neʼe tā e te kau Fakamoʼoni ʼa Sehova.
ʼE Kei Koutou Manatuʼi Koa?
• Koteā te ʼu meʼa gāue ʼe feala ke maʼu e te kau fai faka mafola ʼo te Puleʼaga?
• Koteā te ʼu faʼahi ʼaē neʼe tuku ai e Paulo he faʼifaʼitaki ʼi tana gāue maʼa te Puleʼaga?
• Koteā ʼaē e tonu ke tou fai moʼo fakaʼaogaʼi lelei te Folafola ʼa te ʼAtua?
• ʼE mālohi feafeaʼi te Folafola ʼa Sehova?
[Paki ʼo te pasina 10]
Ko ʼihi meʼa gāue ʼaē ʼe fakaʼaogaʼi e te kau Kilisitiano ʼi te gāue ʼaē ko te tala ʼo te Puleʼaga