Ko Koutou Ko Te ʼu Tagata Taupau Koloa Agatonu

“E mole kotou mau ia koutou totonu.”—1 KO. 6:19.

ʼE KOTOU TALI FEAFEAʼI ANAI?

Neʼe koteā te gāue neʼe fai e te ʼu tagata taupau koloa ʼo te temi muʼa?

Koteā ʼaē ʼe fakamaʼua e te ʼAtua ki ʼana tagata taupau koloa fuli?

ʼI totatou ʼuhiga tagata taupau koloa, ʼe tou fakaʼuhiga feafeaʼi tatatou gāue ʼaē ki te ʼAtua?

1. Koteā te manatu ʼa te tokolahi ʼo ʼuhiga mo te kupu “kaugana”?

NEʼE ʼui e te tagata faitohi Keleka kua hili kiai taʼu e 2 500, neʼe mole filifili e he tahi ke liliu ko he tagata kaugana. Tokolahi iā ʼaho nei ʼe natou maʼu te manatu ʼaia. ʼI te manatu ʼa te tokolahi, ko te kupu “kaugana” ʼe fakaʼuhiga ki he tagata peʼe ko he fafine ʼe fakamalohiʼi ke gāue maʼa he tahi pea ʼe gaohi koviʼi. Pea ʼe natou gāue ke fua lelei pē maʼa tonatou pule.

2, 3. (1) Neʼe gaohi feafeaʼi te ʼu kaugana ʼa Kilisito? (2) Ko te ʼu fehuʼi fea ʼaē ka tou talanoa anai kiai?

² Neʼe ʼui e Sesu neʼe tonu ke liliu tana kau tisipulo ko ni tagata faifekau, ko ni tagata kaugana agavaivai. ʼI tonatou ʼuhiga kaugana, ʼe mole fakaʼuhiga leva ʼe fakamalaloʼi pea mo gaohi koviʼi te kau Kilisitiano moʼoni. Kae ʼe fakamaʼuhigaʼi ia nātou pea mo fakaʼapaʼapaʼi. Ohagē lā, tou fakakaukauʼi te ʼu palalau ʼa Sesu ʼo ʼuhiga te “tagata kaugana.” ʼI muʼa ʼo Tona mate, neʼe ʼui e Sesu ʼe ina foaki anai he ʼu gāue ki he “tagata [kaugana] agatonu mo poto.”—Mat. 24:45-47.

³ Kotou fakatokagaʼi ʼi te fakamatala ʼa Luka, ʼe mole ina fakaʼaogaʼi te kupu “tagata kaugana” kae ko te kupu “tagata faikoloa,” ʼaē ko he tagata taupau koloa. (Lau ia Luka 12:42-44.) Ia ʼaho nei, tokolahi ʼi te kau Kilisitiano moʼoni ʼe mole natou kau ki te kalasi ʼo te “tagata taupau koloa agatonu” ʼaē neʼe talanoa ki ai ia Sesu. Kae ʼe fakaha ʼi te Tohi-Tapu, ko te ʼu kaugana fuli ʼa te ʼAtua ʼe ko te tahi ʼu tagata taupau koloa. Koteā ʼaē ʼe fakamaʼua mai kiā tātou ʼi te gāue ʼa te ʼAtua? ʼE tou fakaʼuhiga feafeaʼi te ʼu fakamaʼua ʼaia? Moʼo tali ki te ʼu fehuʼi ʼaia, tou talanoa muʼa ki te gāue ʼa te ʼu tagata taupau koloa ʼo te temi muʼa.

TE ʼU MAʼUA ʼO TE KAU TAGATA TAUPAU KOLOA

4, 5. Neʼe koteā te ʼu fakamaʼua ʼo te kau tagata taupau koloa ʼo te temi muʼa? Koutou tuku mai he ʼu faʼifaʼitaki.

⁴ ʼI te temi muʼa, ko te tagata taupau koloa neʼe ko he tagata kaugana neʼe tuha mo te falala ʼo tona pule pea neʼe tuku age ke ina taupau ke lelei te ʼapi peʼe ko te ʼu koloa ʼo tona pule. Neʼe tokaga ia ki te ʼu kele pea mo te falā ʼo tona pule, pea neʼe toe pule ia ki te tahi ʼu kaugana. ʼE ʼiloga lelei te faʼahi ʼaia ʼi te faʼifaʼitaki ʼo Eliesele. Neʼe hinoʼi ia ia ke tokaga ki te ʼu tuʼuga koloa ʼo Apalahamo. Neʼe toe fekauʼi ia ia e Apalahamo ki Mesopotamia ke ina filifili ai he ʼohoana ʼo tona foha ko Isaake. Neʼe ko he toe gāue maʼuhiga neʼe foaki age ki ai.—Sen. 13:2; 15:2; 24:2-4.

⁵ Ko Sosefo, te mokoliha ʼo Apalahamo, neʼe ko te tagata taupau koloa ʼa Potifale. (Sen. 39:1, 2) ʼE ʼui ʼi te Tohi-Tapu, ki muli age neʼe toe maʼu mo Sosefo tana tagata taupau koloa pea neʼe fakahigoaʼi ia ia ko “te pule o te fale o Sosefo.” Neʼe ko te tagata taupau koloa ʼaia ʼaē neʼe ina tali te ʼu tehina e toko hogofulu ʼo Sosefo pea mo ina foaki age te ʼu meʼa ʼaē neʼe ʼaoga kiā nātou. Neʼe toe kau lahi foki ki te fakatuʼutuʼu ʼa Sosefo ʼaē ke ina ʼahiʼahiʼi ʼona tehina ʼaki te ʼipu siliva. ʼE mahino ia neʼe falala ʼaupitō te kau pule ki ʼanatou tagata taupau koloa.—Sen. 43:19-25; 44:1-12.

6. Koteā te ʼu maʼua ʼo te kau tagata ʼāfea?

⁶ Hili kiai ni taʼu e lauʼi teau, neʼe tohi e te ʼapositolo ko Paulo ko te kau tagata ʼāfea ʼe ko te ʼu tagata taupau koloa ʼa te ʼAtua. (Tito 1:7) ʼI tonatou ʼuhiga tagata tauhi ovi ʼo “te faga ovi a te ʼAtua,” ʼe takitaki e te kau tagata ʼāfea ia te ʼu kōkelekāsio. (1 Pet. 5:1, 2) ʼE mahino ia ʼe mole tatau anai te ʼu gāue ʼaē ʼe fakahoko e te kau tagata ʼāfea ʼi te kautahi ʼa te ʼAtua. Ohagē lā, ia ʼaho nei ko te tokolahi ʼo te kau tagata ʼāfea ʼe natou gāue ʼi he kōkelekāsio. Ko te ʼu tagata taupau feʼoloʼaki ʼe lahi te ʼu kōkelekāsio ʼe natou taupau. Pea ko nātou ʼaē ʼe natou faʼufaʼu te Komitē ʼo te Filiale ʼe natou tokaga ki te ʼu kōkelekāsio fuli ʼo he fenua. Ko te ʼu tagata ʼāfea fuli ʼaia ʼe natou faiga fakamalotoloto ke natou fakahoko lelei ʼonatou maʼua, koteʼuhi ʼe “fakamaaui” anai nātou e te ʼAtua.—Hep. 13:17.

7. ʼE tou ʼiloʼi feafeaʼi ko te kau Kilisitiano fuli ʼe ko te kau tagata taupau koloa?

⁷ ʼE tou ʼiloʼi feafeaʼi ko te kau Kilisitiano fuli ʼaē ʼe mole tagata ʼāfea ʼe ko te ʼu tagata taupau koloa? Neʼe ʼui fēnei e te ʼapositolo ko Petelo ʼi tana tohi ki te kau Kilisitiano fuli: “O hage ko ni tagata taupau koloa lelei o te u kalasia kehekehe o te Atua, ke kotou tahi fakaaoga ia koutou te meaofa ae kua kotou mau.” (1 Pet. 1:1; 4:10) ʼE fakaha mai e te ʼAtua tona finegaloʼofa ʼaki tana foaki mai kiā tātou fuli te ʼu meʼa ʼofa, mo te ʼu lelei, mo te ʼu fealagia, peʼe ko te ʼu faiva ʼe feala ke tou fakaʼaogaʼi moʼo tokoni ki ʼotatou tehina mo tuagaʼane. Koia, ko nātou ʼaē ʼe tauhi ki te ʼAtua ʼe ko te kau tagata taupau koloa. ʼE falala te ʼAtua kiā tātou, mo fakaʼapaʼapa kiā tātou, pea mo ʼamanaki ʼe tou fakaʼaogaʼi lelei te ʼu meʼa ʼofa ʼaē neʼe ina foaki mai kiā tātou.

ʼE ʼA TE ʼATUA IA TĀTOU

8. ʼI totatou ʼuhiga tagata taupau koloa, koteā te ʼuluaki moʼoni ʼaē ʼe tonu ke tou manatuʼi?

⁸ Tou talanoa ki te ʼu moʼoni tāfito e tolu ʼe tonu ke manatuʼi e te kau Kilisitiano fuli ʼi tonatou ʼuhiga tagata taupau koloa. Koʼeni te ʼuluaki: Ko tātou fuli ʼe ʼa te ʼAtua pea ʼe tonu ke tou fakafiafia tona loto. Neʼe tohi fēnei e Paulo: “E mole kotou mau ia koutou totonu. Koteuhi kua totogi koutou aki he totogi lahi aupito.” Ko te totogi ʼaia ʼe ko te sākilifisio ʼo te maʼuli ʼo Kilisito ki ʼatatou agahala. (1 Ko. 6:19, 20) Ko tātou ʼe ʼa Sehova, koia ʼe maʼua ai ke tou fakalogo ki ʼana fakatotonu, ʼaē ʼe mole faigataʼa fau. (Loma 14:8; 1 Soa. 5:3) ʼE tou toe kaugana foki kiā Kilisito. Ohagē ko te ʼu tagata taupau koloa ʼo te temi muʼa, ʼe lahi te ʼu faʼahiga ʼāteaina ʼe tou maʼu. Kae ʼe mole feala ke tou fai pē te ʼu meʼa ʼaē ʼe tou loto kiai. ʼE maʼua ia ke tou mulimuli ki te ʼu fakatotonu. Ko tātou ʼe tou kaugana fuli ki te ʼAtua pea mo Kilisito, tatau aipē pe koteā te ʼu gāue ʼaē ʼe tou fakahoko ʼi te kautahi ʼa te ʼAtua.

9. Neʼe fakamahino feafeaʼi e Sesu te meʼa ʼaē ʼe loto te tagata pule ke fakahoko e tana kaugana?

⁹ ʼE tokoni mai ia Sesu ke tou mahino ki te meʼa ʼaē ʼe loto te tagata pule ke fakahoko e tana kaugana. Neʼe fakamatala e Sesu te hisitolia ʼo ʼuhiga mo te tagata kaugana neʼe liliu ki tona ʼapi ʼi tana ʼosi gāue ʼaho kātoa. Neʼe ʼui age koa e tona pule ki ai: “Hau ki te laupapa o kai”? Kailoa ia. Neʼe ina ʼui age ia ki tana tagata kaugana: “Teuteui mai kia au he meakai, tui ou kofu o takatuu mai kia au, ke au kai mo inu; hoki osi ia, pea hoki ke kai leva mo inu.” Koteā te ako neʼe fia fakamahino e Sesu ki ʼana tisipulo? ʼE ina fakamahino fēnei: “E feia pe mo koutou, ka kua kotou fai leva te u mea fuli ae nee fakatotonu atu kia koutou, kotou ui: Ko matou ko ni tagata faifekau hee aoga, nee matou fai te mea ae nee tonu ke matou fai.”—Luka 17:7-10.

10. Koteā ʼaē ʼe ʼiloga ai ʼe maʼuhiga kiā Sehova te ʼu meʼa fuli ʼaē ʼe tou fai maʼa ia?

¹⁰ ʼE mahino ia, ʼe maʼuhiga kiā Sehova ia te ʼu meʼa fuli ʼaē ʼe tou fai maʼa ia. ʼE fakapapauʼi mai ʼi te Tohi-Tapu: “E mole hee agatonu te Atua ke ina galoi takotou gaue pea mo te ofa nee koutou fakaha ki tona huafa.” (Hep. 6:10) Ko te meʼa ʼaē ʼe kole mai e Sehova ke tou fakahoko ʼe ko he meʼa ʼe feala ke tou fai. Ko te meʼa ʼaē ʼe ina kole mai ke tou fakahoko ʼe fua lelei pē ia kiā tātou pea ʼe mole faigataʼa fau. Pea ohagē ko tona ako mai e Sesu, ʼe mole tonu ke fai e te tagata kaugana te meʼa pē ʼaē ʼe loto kiai. ʼE tonu ke ina ʼuluaki fai muʼa te meʼa ʼaē ʼe loto kiai tona pule. ʼO toe fēia pē, ʼi te temi ʼaē neʼe tou foaki ai totatou maʼuli ki te ʼAtua neʼe tou filifili ke tou ʼuluaki fakahoko tona finegalo ʼi totatou maʼuli. ʼE kotou tonu tahi koa la mo te manatu ʼaia?

TOTATOU MAʼUA ʼAĒ KIĀ SEHOVA

11, 12. ʼI totatou ʼuhiga tagata taupau koloa, ko te kalitātē fea ʼaē ʼe tonu ke tou fakaha, pea koteā ʼaē ʼe tonu ke tou liʼaki?

¹¹ Koʼenī te lua moʼoni ʼaē ʼe tonu ke tou manatuʼi: ʼI totatou ʼuhiga tagata taupau koloa, ʼe tatau ʼotatou maʼua. ʼE moʼoni, ko ʼihi ʼe fakaʼaoga ʼi te kautahi ʼa te ʼAtua kae noa ʼihi. Kae ʼe tatau te ʼu meʼa ʼaē ʼe fakamaʼua e te ʼAtua kiā tātou fuli. Ohagē lā, ʼe maʼua ki te ʼu kaugana fuli ʼa Sehova ke natou feʼofaʼofani. Neʼe ʼui e Sesu ʼe ʼiloʼi anai e te tagata fuli ko koutou ko ʼaku tisipulo mo kapau ʼe kotou maʼu te feʼofaʼaki iā koutou. (Soa. 13:35) Kae ʼe mole tonu leva ke tou ʼoʼofa pē ki ʼotatou tehina. ʼE tou toe faiga foki ke tou ʼoʼofa kiā nātou ʼaē ʼe mole tauhi kiā Sehova. ʼE feala kiā tātou fuli ke tou fai te faʼahi ʼaia pea ʼe tonu ke tou fai.

¹² ʼE toe fakamaʼua mai e te ʼAtua ke tou fai te meʼa ʼaē ʼe totonu pea mo liʼaki te ʼu meʼa ʼaē ʼe tapuʼi ʼi te Tohi-Tapu. Neʼe tohi fēnei e Paulo: “Ko te hahai feauaki, mo te hahai tauhi taulaatua, mo te hahai tono, mo te hahai agaifafine, mo te hahai fai-tagata, mo te hahai kaihaa, mo te hahai manumanu, mo te hahai konahia, mo te hahai fasituu, mo te hahai kaihaa tagata, e mole natou ulu anai ki te puleaga o te Atua.” (1 Ko. 6:9, 10) ʼE maʼua ke tou kātaki ʼo fai te meʼa ʼaē totonu kiā mata ʼo te ʼAtua. Kapau ʼe tou fai te faʼahi ʼaia, pea ʼe tou maʼu ai he ʼu tapuakina kehekehe. Ohagē lā, ʼe feala ke lelei age totatou maʼuli fakasino, mo lelei age ʼatatou felōgoi mo te hahaʼi, pea mo lelei age tatatou felōgoi ʼaē mo te ʼAtua.—Lau ia Esaia 48:17, 18.

13, 14. Koteā te gāue ʼaē neʼe tuku e te ʼAtua ke fakahoko e te kau Kilisitiano fuli? ʼE tonu ke tou fakaʼuhiga feafeaʼi te gāue ʼaia?

¹³ ʼE tonu foki ke tou toe manatuʼi, neʼe ʼi ai te gāue neʼe tonu ke fakahoko e te tagata taupau koloa. Pea ʼe toe fēia mo tātou. Neʼe foaki mai e te ʼAtua te meʼa ʼofa maʼuhiga. Neʼe ina akoʼi mai kiā tātou te moʼoni. Pea ʼe toe loto ia ke tou ako te moʼoni ʼaia ki te hahaʼi. (Mat. 28:19, 20) Neʼe tohi e Paulo ʼe kaugana te kau Kilisitiano kiā Kilisito pea ʼe ko te ʼu “tagata tauhi o te ʼu misitelio o te Atua.” (1 Ko. 4:1) Neʼe ʼiloʼi e Paulo neʼe tonu ke ina tauhi peʼe ina taupau te ʼu “misitelio o te Atua,” ia te ʼu moʼoni ʼo te Tohi-Tapu, pea ke ina akoʼi ki te hahaʼi. ʼE ko te gāue la ʼaia ʼaē neʼe loto e tona Pule, ia Sesu Kilisito, ke ina fakahoko.—1 Ko. 9:16.

¹⁴ Kā tou ako te moʼoni ki te hahaʼi, ʼe tou fakaha ai totatou ʼofa ʼaē kiā nātou. ʼE mahino ia, ʼe mole feala anai ke tou fakahoko tatau te minisitelio koteʼuhi ʼe mole tatau te ʼaluʼaga ʼo ʼotatou maʼuli. ʼE mahino ia Sehova ki te faʼahi ʼaia. Kae ko te meʼa ʼaē ʼe maʼuhiga ʼe ko tatatou fai kātoa te meʼa ʼaē ʼe tou lavaʼi. ʼE ʼiloga ai totatou ʼofa ʼaē ki te ʼAtua pea mo te hahaʼi.

TE MAʼUHIGA ʼAĒ ʼO TE AGATONU

15-17. (1) He koʼē ʼe tonu ke agatonu he tagata taupau koloa? (2) Neʼe fakaha feafeaʼi mai e Sesu ia te meʼa ʼaē ʼe hoko mo kapau ʼe mole tou agatonu?

¹⁵ Koʼeni te tolu moʼoni ʼaē ʼe tonu ke tou manatuʼi: ʼE tonu ke tou agatonu ʼo tou talagafua. ʼE feala ke maʼu e he tagata taupau koloa hona ʼu faiva pea mo hona ʼu fealagia, kae ʼe feala ke ʼalu noa ia mo kapau ʼe mole fakalogo pea mo ina tuku tana fakahoko ʼo ʼona maʼua. ʼE tonu ki he tagata taupau koloa ke agatonu mo kapau ʼe ina loto ke ina fakahoko tana gāue ke lelei pea ke fiafia ai te loto ʼo tona pule. Tou manatuʼi te meʼa ʼaē neʼe tohi e Paulo: “Ko te mea e kumi ki ni tagata tauhi koloa, ke natou tahi agatonu i tana gaue.”—1 Ko. 4:2.

¹⁶ Kapau ʼe tou agatonu pea ʼe tou tui papau ʼe tapuakina anai tātou e te ʼAtua. Kapau ʼe mole tou agatonu, pea ʼe mole tou taupau maʼu anai tana tapuakina. ʼE tou mahino lelei ki te faʼahi ʼaia ʼaki te fakamatala ʼa Sesu ʼo ʼuhiga mo te ʼu foʼi tenalio. Neʼe pauʼi e te pule ʼana kau tagata faifekau ʼaē neʼe natou “gauei ke fua” ʼona koloa pea neʼe ina fakapale lahi iā nātou. Kae neʼe ina ʼui ʼo ʼuhiga mo te tagata faifekau ʼaē neʼe mole fakalogo, ʼe agakovi, mo piko pea ʼe mole hona ʼaoga. Neʼe toʼo leva e te tagata pule te foʼi tenalio pea mo ina fekau ke lī ki tuʼa te tagata faifekau ʼaia.—Lau ia Mateo 25:14-18, 23, 26, 28-30.

¹⁷ Neʼe fakaha mai e Sesu ia te meʼa ʼaē ʼe hoko mo kapau ʼe mole tou agatonu ʼi tana ʼui ʼaē: “Nee mau e he tagata maukoloa hana tagata tauhi koloa, pea nee fakaha age kia ia e ina maumaui ona koloa. Nee paui leva e te pule ki tana tagata tauhi koloa, o ui kia ia: Kotea e au logo ki ai o uhiga mo koe? Fakamatala mai kia au tau tauhi, koteuhi e mole toe feala anai tau tauhi oku koloa.” (Luka 16:1, 2) Mai tona ʼaluʼaga ʼaē neʼe maumauʼi e te tagata taupau koloa ʼaia ʼona koloa, neʼe fakamavae leva e te pule ia te tagata ʼaia. Ko te ʼu vaega ʼaenī ʼe ina tuku mai te ako maʼuhiga. ʼE mole tou loto anai ʼi he temi ke tou heʼe agatonu ʼo ʼuhiga mo ʼotatou maʼua ʼaē ki te ʼAtua.

ʼE KO HE AGA FAKAPOTOPOTO KOA TATATOU FAKATATAU IĀ TĀTOU KI ʼIHI?

18. He koʼē ʼe mole tonu ke tou fakatatau iā tātou ki ʼihi?

¹⁸ ʼE tonu ke tou fai kiā tātou takitokotahi ia te fehuʼi ʼaenī: Ko te faʼahiga tagata taupau koloa feafeaʼi koa iā au? Kae ʼe mole ko he aga fakapotopoto tatatou fakatatau iā tātou ki ʼihi. ʼE ʼui ʼi te Tohi-Tapu: “Kae ke tahi vakai e te tagata ana gaue totonu, pea hoki feala anai ke ina fakakololia ia ia toko tahi, kae e mole i te u gaue a he tahi age.” (Kal. 6:4) ʼE lelei age tatatou fakakaukauʼi ia te meʼa ʼaē ʼe tonu ke tou fai ke hikihiki ai tatatou gāue pea mo faigaʼi ʼaki ʼotatou fealagia ia tona fakahoko, ʼi hatatou nonofo ʼo fakatatau ʼatatou gāue ki te ʼu gāue ʼa ʼihi. ʼE tokoni mai anai te faʼahi ʼaia ke ʼaua naʼa tou laupisi kiā tātou totonu peʼe tou lotovaivai. ʼE toe feala foki ke fetogi te ʼaluʼaga ʼo totatou maʼuli. ʼE lagi kua tou mahamahaki, peʼe kua tou vaivai mātuʼa, peʼe ko ʼihi atu maʼua, ʼo mole kei feala hatatou fakahoko fuli ʼotatou maʼua ʼaē neʼe tou fai māhani. Peʼe lagi feala pē ko te ʼaluʼaga ʼo totatou maʼuli kua ina fakafealagia mai leva ke tou tali he tahi ʼu gāue ke hilifaki ki te ʼu gāue ʼaē ʼe tou lolotoga fai. Kapau koia ʼaia, he koʼē ʼe mole tou tali te ʼu gāue ʼaia?

19. Kapau ʼe mole tuku mai he gāue ʼi te kōkelekāsio, he koʼē ʼe mole tonu ia ke tou lotomamahi fau?

¹⁹ ʼE mole tonu foki ke tou toe fakatatau iā tātou mo nātou ʼaē ʼe natou fai he ʼu gāue neʼe tou loto ke tou fai. Ohagē lā, ʼe feala pē ke loto he tehina ke liliu ʼo tagata ʼāfea ʼi te kōkelekāsio peʼe ke faiakonaki ʼi te ʼu fakatahi lalahi. ʼE lelei anai hana faiga mālohi muʼa ke ina fakahoko ia te ʼu maʼua ʼaē ʼe fakamaʼua ki ʼaē kā foaki anai ki ai te ʼu gāue ʼaia. Kae ʼe mole tonu anai ke tou lotomamahi fau mo kapau ʼe mole tuku mai ke tou fai te gāue ʼaē neʼe tou loto kiai. ʼUhi ko he ʼu tupuʼaga ʼe mole feala ke tou ʼiloʼi nei, ʼe lagi ʼaoga anai ke loaloaga te temi ʼaē ʼe tonu ke tou fakatalitali ai. Tou manatuʼi iā Moisese, neʼe lagi manatu ia kua feala hana taki te kau Iselaele ʼo fakamavae mai Esipito, kae neʼe tonu ia ke ʼatalitali iā taʼu e 40 ʼi muʼa ʼo tana fakahoko te faʼahi ʼaia. ʼI te lolotoga ʼo te temi ʼaia, neʼe feala hana fakatuputupu ia ia te ʼu kalitātē kā tokoni anai kiā ia ki muli age moʼo takitaki ia te hahaʼi talagataʼa pea mo agatuʼu.—Gaue 7:22-25, 30-34.

20. Koteā te ako ʼe tou maʼu mai te faʼifaʼitaki ʼo Sonatane?

²⁰ ʼE feala pē ke mole tuku mai ʼi he ʼaho he gāue kiā tātou. Neʼe hoko te ʼaluʼaga ʼaia kiā Sonatane. Neʼe ko te foha ʼo Saulo pea neʼe tonu ko ia ʼaē kā liliu anai ʼo hau ki Iselaele. Kae neʼe fili ia e te ʼAtua ia Tavite, ʼaē neʼe kei tūpulaga age ia Sonatane, ke liliu ʼo hau. Koteā ʼaē neʼe fai e Sonatane? Neʼe ina tali te tonu ʼaē neʼe fai e te ʼAtua pea mo lagolago mālohi kiā Tavite logolā ʼi ʼihi temi neʼe feala ke tuʼutāmaki ai tona maʼuli. Neʼe ina ʼui fēnei kiā Tavite: “E ke pule anai ki Iselaele, pea ko au, e au nofo anai i te tuulaga lua i ou tafa.” (1 Sam. 23:17) Koteā te ako ʼe tou maʼu mai te faʼifaʼitaki ʼo Sonatane? Neʼe mole lotomamahi ia ʼo ʼuhiga mo te ʼaluʼaga ʼaia, pea neʼe mole fuaʼa ia kiā Tavite ohagē ko Saulo. ʼAua naʼa tou fuaʼa ki ʼihi ʼuhi ko tanatou fai te ʼu gāue ʼe mole tou fai, kae ʼe tonu ke tou faiga fuli ke tou fakahoko lelei ia te ʼu gāue ʼaē kua tuku mai kiā tātou. ʼE feala ke tou tui papau, ko Sehova ʼi te mālama foʼou, ʼe ina fakafimalie anai te loto ʼo ʼana kaugana fuli.

21. ʼE tonu ke tou fakaʼuhiga feafeaʼi tatatou gāue ʼaē ki te ʼAtua?

²¹ ʼAua naʼa galo kiā tātou, ʼi totatou ʼuhiga tagata taupau koloa, ʼe mole fakamalohiʼi tātou ke tou kaugana ki he pule agakovi. Kae ʼi tana falala pea mo tana fakaʼapaʼapa lahi ʼaē kiā tātou, neʼe tuku mai e Sehova he gāue maʼuhiga ke tou fakahoko, ʼaē ko te fakamafola ʼo te logo lelei ʼi te lolotoga ʼo te ʼu ʼaho fakaʼosi ʼaenī, pea ʼe ko he gāue ʼe mole toe fakahoko anai ʼi he temi. ʼE ina fakafealagia mai ke tou filifili te faʼahiga fai ʼaē ʼe tou loto kiai moʼo fakahoko te gāue ʼaē neʼe ina tuku mai. Koia, tou liliu ko ni tagata taupau koloa ʼe agatonu. Pea ʼaua naʼa galo kiā tātou ia te faʼahi maʼuhiga lahi ʼaenī ʼe tou maʼu: tatatou tauhi kiā Sehova, te māʼoluga tokotahi ʼo te ʼatulaulau.

[Paki ʼo te pāsina 20]

Tou agatonu ʼo fakahoko lelei ia te ʼu gāue ʼaē kua tuku mai kiā tātou