ʼE Fakafonu Te ʼApi ʼa Sehova e “Te ʼu Meʼa ʼAē ʼe Manakoʼia”

“ ʼE ʼau [ia Sehova] luluʼi anai te ʼu puleʼaga fuli, pea ʼe tonu anai ke hū mai te ʼu meʼa ʼaē ʼe manakoʼia ʼo te ʼu puleʼaga fuli; pea ʼe ʼau fakafonu anai ʼaki te kolōlia te fale ʼaenī.”​—Asea 2⁠:⁠7.

1. Ka hoko he tuʼutāmaki, he koʼe ʼe tou ʼuluaki manatu kia nātou ʼaē ʼe tou ʼoʼofa ai?

KOTEĀ te ʼu meʼa matalelei ʼaē ʼe koutou maʼu ʼi tokotou ʼapi? ʼE ʼi ai koa hakotou ʼu meʼa ʼe totogi kovi, he olotinatea, hakotou motokā foʼou? Tatau aipe peʼe koutou maʼu te ʼu meʼa fuli ʼaia, kae ʼe koutou fakamoʼoni anai, ko te ʼu meʼa ʼaē ʼe maʼuhiga tāfito ʼe ko te ʼu hahaʼi ʼo tokotou loto fale, tokotou famili. Koutou fakakaukauʼi age muʼa, ʼe koutou ʼala ake heʼe manu ʼahu. ʼE vela tokotou ʼapi, pea ʼe tonu ke koutou foimo feholaki! Koteā ʼaē ʼe koutou ʼuluaki tuʼaniaʼi? Ko takotou olotinatea? Takotou motokā? ʼE mole koa la ko nātou ʼaē ʼe koutou ʼoʼofa ai ʼaē ʼe koutou ʼuluaki manatuʼi? ʼE mahino ia heʼe maʼuhiga age takotou famili ʼi te ʼu koloā.

2. Koteā ʼaē neʼe fakatupu e Sehova, pea koteā ʼaē neʼe ʼofa tāfito kiai Sesu?

² E feafeaʼi age la kia Sehova ʼAtua pea mo tona ʼAlo, ia Sesu Kilisito. ʼE ko Sehova “ae nee [ina] fakatupu te lagi, mo te kelekele, mo te tai pea mo naunau fuape e i ai.” (Gaue 4:​24) Neʼe fakaʼaogaʼi e Sehova tona ʼAlo, te “tufuga faiva,” moʼo fakatupu ia meʼa fuli. (Tāʼaga Lea 8:​30, 31; Soane 1⁠:3; Kolose 1:​15-​17) ʼE mahino ia, ʼe maʼuhiga ʼaupito kia Sehova pea mo Sesu te ʼu meʼa fuli ʼaia. (Vakaʼi ia Senesi 1:​31.) Kae ʼi takotou manatu, koteā ʼaē ʼe maʼuhiga tāfito kia nāua​—ko te ʼu koloā pe ko te tagata? ʼE ʼui fēnei e Sesu, ʼaē neʼe ina fakatātā ia ia ki te poto: “Ko te ʼu meʼa ʼaē neʼe ʼau ʼofa kiai neʼe ko te ʼu meʼa ʼaē neʼe nofo mo te ʼu foha ʼo te tagata,” peʼe ohage ko tona fakaliliu e William F. Beck, ko Sesu neʼe “ina leleiʼia te malamanei.”

3. Koteā te ʼu palalau fakakikite ʼaē neʼe fai e Sehova kia Asea?

³ ʼE mahino papau ia ʼe maʼuhiga te hahaʼi kia Sehova. ʼE tou fakatokagaʼi te faʼahi ʼaia ʼi tana ʼu palalau fakakikite ʼaē neʼe ina fai ʼi te taʼu 520 ʼi muʼa ʼo totatou temi, ʼaki tana polofeta ko Asea. Neʼe tala fēnei e Sehova: “ ʼE ʼau luluʼi anai te ʼu puleʼaga fuli, pea ʼe tonu anai ke hū mai te ʼu meʼa ʼaē ʼe manakoʼia ʼo te ʼu puleʼaga fuli; pea ʼe ʼau fakafonu anai ʼaki te kolōlia te fale ʼaenī. . . . Ko te kolōlia ʼo te fale ʼaenī ʼe lahi age anai ia ʼi te kolōlia ʼo te fale ʼāfea.”​—Asea 2:​7, 9.

4, 5. (a) He koʼe ʼe mole feala ke tou ʼui ko “te ʼu meʼa ʼaē ʼe manakoʼia” ʼe faka ʼuhiga ki he ʼu koloā? (b) ʼE feafeaʼi anai takotou fakamahino “te ʼu meʼa ʼaē ʼe manakoʼia,” pea koteā tona tupuʼaga?

⁴ Koteā “te ʼu meʼa ʼaē ʼe manakoʼia” ʼaē ka nātou fakafonu anai te ʼapi ʼa Sehova pea mo ina foaki kiai he kolōlia lahi? ʼE ko he ʼu meʼa matalelei koa? Te aulo, mo te siliva, pea mo te ʼu maka maʼugataʼa? ʼE lagi faigataʼa anai te fakahoko ʼo te faʼahi ʼaia. Koutou manatuʼi, ko te fale lotu ʼāfea, ʼaē neʼe fakatapuʼi kua hili kiai sēkulō e nima, neʼe ko he toe fale neʼe fakaʼaogaʼi kiai te falā ʼe lauʼi miliale moʼona faʼu!a ʼE mahino papau ia, neʼe mole loto e Sehova ke matalelei age te fale lotu ʼaē neʼe toe laga e te kau Sutea tokosiʼi ʼaē neʼe toe liliu ki tonatou fenua, ʼi te fale lotu ʼo Salomone!

⁵ Kapau koia ʼaia, pea koteā “te ʼu meʼa ʼaē ʼe manakoʼia” ʼaē ʼe nātou fakafonu te ʼapi ʼa Sehova? ʼE hā lelei mai ʼe faka ʼuhiga ia ki te hahaʼi. ʼE moʼoni, ko te meʼa ʼaē ʼe fiafia ai te loto ʼa Sehova ʼe mole ko te siliva pea mo te aulo, kae ko te hahaʼi ʼaē ʼe nātou tauhi kia te ia ʼaki te ʼofa. (Tāʼaga Lea 27⁠:11; 1 Kolonito 10⁠:26) Ei, ʼe ʼofa Sehova ki te ʼu tagata, mo te ʼu fafine, pea mo te ʼu tamaliki fuli ʼaē ʼe nātou tauhi fakalelei kia te ia. (Soane 4⁠:​23, 24) ʼE ko nātou ʼaia “te ʼu meʼa ʼaē ʼe manakoʼia,” pea ʼe nātou maʼuhiga age kia Sehova ʼi te ʼu meʼa matalelei ʼaupito ʼaē neʼe teuteuʼi ʼaki te fale lotu ʼo Salomone.

6. Koteā ʼaē neʼe fai ʼi te fale lotu ʼāfea ʼo te ʼAtua?

⁶ Logope la te ʼu fakafeagai lahi ʼaē neʼe fai ki te gāue, kae neʼe fakaʼosi te laga ʼo te fale lotu ʼi te taʼu 515 ʼi muʼa ʼo totatou temi. ʼO aʼu ki te temi ʼaē neʼe sakilifisioʼi ai Sesu, neʼe kei haga fai te tauhi maʼa ʼi te fale lotu ʼo Selusalemi e “te ʼu meʼa manakoʼia,” ʼaē neʼe ko te kau Sutea pea mo te kau Senitile poloselite. Kae neʼe fakatātā e te fale lotu he meʼa ʼe lahi age, ohage ko te meʼa ʼaē ka tou vakaʼi.

Tona Hoko ʼi Te ʼUluaki Sēkulō

7. (a) Koteā ʼaē neʼe fakatātā e te fale lotu ʼāfea ʼo te ʼAtua ʼaē neʼe tuʼu ʼi Selusalemi? (b) Koutou fakamatala te ʼu gāue ʼaē neʼe fai e te pelepitelo lahi ʼi te ʼAho ʼo te ʼu Faifakalelei.

⁷ Neʼe fakatātā e te fale lotu ʼo Selusalemi he fakatuʼutuʼu ʼe lahi age ʼo ʼuhiga mo te tauhi. ʼE ko te fale lotu fakalaumālie ʼa te ʼAtua, ʼaē neʼe fakatuʼu e Sehova ʼi te taʼu 29 ʼo totatou temi, pea ko Sesu te Pelepitelo Lahi. (Hepeleo 5:​4-​10; 9:​11, 12) Koutou fakatokagaʼi te tatau ʼo te ʼu gāue ʼaē neʼe fai e te pelepitelo lahi ʼo Iselaele pea mo te ʼu gāue ʼaē neʼe fai e Sesu. ʼI te taʼu fuli, ʼi te ʼAho ʼo te ʼu Faifakalelei, neʼe fakaōvi te pelepitelo lahi ki te ʼaletale ʼaē neʼe tuʼu ʼi te malaʼe ʼo te fale lotu, pea neʼe ina momoli ai te vitulo moʼo fakamolemole te ʼu agahala ʼa te kau pelepitelo. ʼOsi ʼaia, pea neʼe hū ki te fale lotu ʼaki te toto ʼo te vitulo, ʼo fakalaka ʼi te ʼu matapā ʼaē neʼe nātou vaheʼi te malaʼe mo te Potu Taputapu, pea toe fakalaka ʼi te lito ʼaē neʼe ina vaheʼi te Potu Taputapu pea mo te Potu Taputapu ʼAupito. ʼI tana ʼosi hū ki te Potu Taputapu ʼAupito, neʼe ina afuhi te toto ʼi te muʼa aleka ʼo te fuakava. Pea neʼe ina momoli te tao tagata moʼo fakamolemole te ʼu agahala ʼo te ʼu telepi e 12 ʼo Iselaele ʼaē neʼe mole kau ki te ʼu telepi faka pelepitelo. (Levitike 16:​5-​15) Koteā te pikipikiga ʼo te toʼotoʼoga ʼaia pea mo te fale lotu fakalaumālie ʼa te ʼAtua?

8. (a) He koʼe ʼe feala ke tou ʼui neʼe momoli Sesu ʼi te taʼu 29 ʼo totatou temi? (b) Koteā te ʼu felogoi makehe ʼaē neʼe maʼu e Sesu mo Sehova ʼi tana minisitelio ʼi te kele?

⁸ ʼE moʼoni, ʼi te taʼu 29 ʼo totatou temi, neʼe momoli Sesu ʼi te ʼaletale ʼaē ʼe ina fakatātā te finegalo ʼo te ʼAtua, ʼi tana papitema pea mo tona fakanofo ʼaki te laumālie maʼoniʼoni ʼa te ʼAtua. (Luka 3:​21, 22) Koia, neʼe ko te kamataʼaga ʼaia ʼo he maʼuli faka sakilifisio ʼo Sesu neʼe fai lolotoga taʼu e tolu vaelua. (Hepeleo 10:​5-​10) Lolotoga te ʼu taʼu ʼaia, neʼe maʼu e Sesu te ʼu felogoi fakalaumālie mo te ʼAtua. Ko te ʼu felogoi makehe ʼaia ʼa Sesu mo tana Tāmai ʼi selo, neʼe mole feala ke mahino katoa kiai te hahaʼi. Neʼe hage neʼe ʼi ai he kie neʼe ina ʼuʼufi ʼonatou mata, ohage pe ko te kie ʼaē neʼe ina fakaū te Potu Taputapu ia mata ʼo nātou ʼaē neʼe nonofo ʼi te malaʼe ʼo te tapenakulo.​—Ekesote 40⁠:⁠28.

9. He koʼe neʼe mole feala ke hū Sesu ki selo mo tona sinoʼi tagata, pea koteā ʼaē neʼe hoko ke lava ai hana hū ki selo?

⁹ Logope la ko Sesu neʼe ko te ʼAlo ʼo te ʼAtua ʼaē neʼe fakanofo ʼaki te laumālie, kae neʼe mole lava hake ki selo. Koteā tona tupuʼaga? Koteʼuhi ko te kakano pea mo te toto ʼe mole lava hū ki te Puleʼaga ʼa te ʼAtua ʼi selo. (1 Kolonito 15⁠:​44, 50) Ko te sino kakano ʼa Sesu neʼe ina tāʼofi tana hū ki selo, pea neʼe fakatātā lelei te faʼahi ʼaia e te lito ʼaē neʼe ina vaheʼi te Potu Taputapu pea mo te Potu Taputapu ʼAupito ʼo te fale lotu ʼāfea ʼo te ʼAtua. (Hepeleo 10⁠:20) Kae hili kiai ʼaho e tolu ʼo tana mate, neʼe fakatuʼuake Sesu e te ʼAtua ko he laumālie. (1 Petelo 3:​18) Neʼe feala ai leva tana hū ki te Potu Taputapu ʼAupito ʼo te fale lotu fakalaumālie ʼa te ʼAtua​—ʼi selo. Pea neʼe hoko tonu te meʼa ʼaia. ʼE tohi fēnei e Paulo: “Nee mole hu Kilisito ki he sagatualio nee fai nima [ko tona faka ʼuhiga ki te Potu Taputapu ʼAupito], e ko he fakatata’pe o te sagatualio mooni, kae nee hu ia ki Selo totonu ke ha ia i te lakaga nei ia mua o te Atua o uhiga mo tatou.”​—Hepeleo 9:​24.

10. Koteā ʼaē neʼe fai e Sesu ʼi tana toe liliu ki selo?

¹⁰ ʼI selo, neʼe ‘afuhi e Sesu te taʼataʼa’ ʼo tona sakilifisio ʼi tana momoli kia Sehova te totogi ʼo tona maʼuli. Kae neʼe mole gata ai. ʼI muʼa ʼo tana mate, neʼe ina ʼui fēnei ki tana kau tisipulo: “E au alu pea e au teuteui mai anai he nofoaga kia koutou; pea kapau e au alu pea e au teuteui mai anai he nofoaga kia koutou, e au toe haù pea e au talitali anai koutou kia te au, he ko te faahi e au i ai pea e i ai mo koutou.” (Soane 14:​2, 3) ʼI tana hū ki te Potu Taputapu ʼAupito, peʼe ki selo, neʼe tofa e Sesu te ala ki te hahaʼi ke nātou muliʼi. (Hepeleo 6⁠:​19, 20) Ko nātou ʼaia, te toko 144 000, ʼe nātou gāue anai ohage ko he kau lagolago pelepitelo ʼi te fakatuʼutuʼu ʼo te fale lotu fakalaumālie ʼo te ʼAtua. (Apokalipesi 7⁠:4; 14⁠:1; 20⁠:⁠6) Ko te ʼuluaki hū ʼa te pelepitelo lahi ʼo Iselaele ʼaki te toto ʼo te vitulo ki te Potu Taputapu ʼAupito, neʼe ina fai moʼo fakamolemole te ʼu agahala ʼo te kau pelepitelo, ʼo toe feiā pe ko te maʼuhiga ʼo te taʼataʼa ʼaē neʼe liligi e Sesu neʼe ʼuluaki fakaʼaogaʼi ki te toko 144 000 kau lagolago pelepitelo ʼaia.b

“Te ʼu Meʼa ʼAē ʼe Manakoʼia” ʼi Totatou Temi

11. Ko te pelepitelo lahi ʼo Iselaele neʼe ina momoli te tao tagata maʼa ai, pea koteā ʼaē neʼe fakatātā e te faʼahi ʼaia?

¹¹ ʼE hā mai, ʼi te taʼu 1935, neʼe kua katoa te fakatahitahi ʼa te kau fakanofo.c Kae neʼe mole gata ai te faka kolōliaʼi e Sehova tona ʼapi. Kailoa, neʼe kei tonu ke hū mai “te ʼu meʼa ʼaē ʼe manakoʼia.” Koutou manatuʼi ko te pelepitelo lahi ʼi Iselaele neʼe ina momoli te ʼu manu e lua​—te vitulo maʼa te ʼu agahala ʼo te kau pelepitelo pea mo te tao tagata maʼa te ʼu agahala ʼo te ʼu telepi ʼaē neʼe mole ko he ʼu telepi faka pelepitelo. Neʼe fakatātā e te kau pelepitelo ia te kau fakanofo ʼaē ka nātou fakatahi anai mo Sesu ʼi te Puleʼaga ʼi selo, kae ko ai ʼaē ʼe ina fakatātā te ʼu telepi ʼaē ʼe mole ko he ʼu telepi faka pelepitelo? ʼE tou maʼu te tali ʼi te ʼu palalau ʼaē neʼe fai e Sesu ia Soane 10⁠:16: “E i ai mo ni aku ovi e heeki mo kau ki te fagaovi aeni; e tonu ke au aumai mo natou, pea e natou fakalogo anai toku leo, pea e tahi anai te fagaovi, pea mo te Tauhiovi e tahi.” Koia, ʼe ʼaoga anai te ʼu fua lelei ʼo te taʼataʼa ʼa Sesu kia kūtuga e lua​—ʼuluaki, ki te kau Kilisitiano ʼaē ka nātou kaugā hau mo Sesu ʼi selo pea lua, kia nātou ʼaē ka nātou maʼu te maʼuli heʼegata ʼi te palatiso kelekele. Ei ko te lua kūtuga ʼaia ʼe fakatātā e te ʼu “meʼa ʼaē ʼe manakoʼia,” ʼaē ʼe talanoa kiai te lea faka polofeta ʼa Asea.​—Mikea 4:​1, 2; 1 Soane 2:​1, 2.

12. Ia ʼaho nei, ʼe taki feafeaʼi mai “te ʼu meʼa ʼaē ʼe manakoʼia” ki te ʼapi ʼa te ʼAtua?

¹² Ko “te ʼu meʼa [ʼaia] ʼaē ʼe manakoʼia,” ʼe nātou lolotoga fakafonu nei te ʼapi ʼa Sehova. ʼI te ʼu taʼu pe ʼaenī, neʼe toʼo te ʼu tapu ʼaē neʼe fai ʼi te Eulopa Esite, mo te ʼu fenua ʼo Afelika, pea mo te tahi ʼu fenua, pea neʼe lava ai te faka mafola ʼo te logo lelei ʼo te Puleʼaga ʼa te ʼAtua ʼi te ʼu telituale ʼaē neʼe mole heʼeki gāueʼi. ʼI te fakahū ʼa te hahaʼi manakoʼia ki te ʼu fakatuʼutuʼu ʼa te fale lotu ʼo te ʼAtua, ʼe nātou faiga ke nātou fai he tahi ʼu tisipulo, moʼo fakahoko te fakatotonu ʼaē neʼe fai e Sesu. (Mateo 28⁠:​19, 20) ʼE nātou felāveʼi ai mo te hahaʼi tokolahi, te kau tūpulaga pea mo te kau matuʼa, ʼe feala ke nātou liliu ko “te ʼu meʼa ʼaē ʼe manakoʼia” ʼaē ka nātou faka kolōliaʼi te ʼapi ʼa Sehova. Tou vakavakaʼi he ʼu faʼifaʼitaki ʼe hā ai pe neʼe hoko feafeaʼi te faʼahi ʼaia.

13. Neʼe fakahā feafeaʼi e te kiʼi taʼahine ʼi Polivia tana fia faka mafola te logo ʼo te Puleʼaga?

¹³ ʼI Polivia, ko te kiʼi taʼahine ʼe taʼu nima neʼe taupau e tana ʼu mātuʼa ko he kau Fakamoʼoni, neʼe ina kole age ki tana fafine faiako ke mole ako lolotoga te vāhaʼa ʼaē ʼe ʼaʼahi ai tana kokelekasio e te tagata taupau feʼaluʼaki. Koteā tona tupuʼaga? Neʼe fia kau ki te minisitelio lolotoga te ʼu ʼaho fuli ʼo te vāhaʼa makehe ʼaia. Neʼe punamaʼuli tana ʼu mātuʼa, kae neʼe nā fiafia ʼi tana manatu lelei ʼaia. ʼI te temi nei, ko ako Tohi-Tapu e nima ʼe fai e te kiʼi taʼahine, pea ko ʼihi ia nātou ʼaia kua nātou ʼōmai ki te ʼu fono. Māʼia mo tana fafine faiako, neʼe kua haʼu ki te Fale ʼo te Puleʼaga. Lagi ʼaki te temi, ʼe liliu anai ʼihi ʼo tana kau ako ʼaia ko “te ʼu meʼa ʼaē ʼe manakoʼia” pea mo nātou faka kolōlia anai te ʼapi ʼa Sehova.

14. ʼI Kolea, neʼe fakapale feafeaʼi te kātaki ʼa te tuagaʼane logola te hage ʼaē neʼe mole fia logo te tūpulaga ki tana gāue?

¹⁴ ʼI tana talitali ʼi te fale tali saliote afi, neʼe fakaōvi te tuagaʼane Kolea ki te tūpulaga kei ako, neʼe fakalogo musika. Neʼe ina fehuʼi age: “ ʼE ke lotu?” Neʼe tali age e te tūpulaga: “ ʼE mole ʼau fia logo ki he lotu e tahi.” Neʼe mole gata ai te tuagaʼane. Neʼe ina hoko atu: “ ʼAki te temi, ʼe lagi ʼe ke fia fili anai hau lotu. Kae kapau ʼe mole ke ʼiloʼi peʼe feafeaʼi te lotu, pea ʼe lagi ʼe ke fili anai te lotu ʼaē ʼe kovi.” Neʼe kehe leva te tali ʼa te tūpulaga, pea neʼe fakalogo fakalelei ki te tuagaʼane. Neʼe ina foaki age te tohi Y a-t-il un Créateur qui se soucie de vous ? pea ina ʼui age ʼe tokoni anai te tohi ʼaia kia ia mokā ina filifili anai hana lotu. Neʼe tali e te tūpulaga te tohi. ʼI te vāhaʼa ʼaē neʼe hoa kiai, neʼe ina kamata ako te Tohi-Tapu mo te kau Fakamoʼoni ʼa Sehova, pea ʼi te temi nei, ʼe kau ki te ʼu fono fuli ʼo te kokelekasio.

15. Koteā ʼaē ʼe fai e te finemui Saponia moʼo kamata hana ʼu ako Tohi-Tapu, pea neʼe fakapale feafeaʼi tana ʼu faiga ʼaia?

¹⁵ ʼI Saponia, ko Megumi ʼe taʼu 12, pea kua ina fakaʼaogaʼi tona faleako ʼe ko he telituale lelei ke fai faka mafola ai pea mo fai hana ʼu ako. Kua ina kamata ai tana ʼu ako Tohi-Tapu. ʼE fai feafeaʼi e Megumi te faʼahi ʼaia? ʼE ina lau te Tohi-Tapu pea mo teuteuʼi te ʼu fono ʼi te temi kai, pea ʼe fia ʼiloʼi ai e tona ʼu kaugā ako pe koteā ʼaē ʼe ina fai. ʼE fia ʼiloʼi e ʼihi pe koʼe ʼe mole kau Megumi ki ʼihi meʼa ʼe fai ʼi te faleako. ʼE tali e Megumi ki tanatou ʼu fehuʼi pea ʼe ina ʼui age kia nātou ʼe ʼi ai te huafa ʼo te ʼAtua, pea ʼe tupu ai te fia logo ʼo tona ʼu kaugā ako. Neʼe ina kole age kia nātou peʼe nātou fia ako te Tohi-Tapu, pea ʼi te temi nei ʼe fai e Megumi te ʼu ako e 20​—ko te ʼu ako e 18 ko tona ʼu kaugā ako.

16. ʼI Cameroun, neʼe kamata feafeaʼi e te tēhina he ʼu ako Tohi-Tapu mo ʼihi hahaʼi neʼe nātou vāʼi ia ia?

¹⁶ ʼI Cameroun, ko te kūtuga ʼe toko valu tagata gāue, neʼe nātou pāui te tēhina neʼe ina lolotoga tufa te ʼu tohi faka Tohi-Tapu ki te hahaʼi. ʼI tanatou fia fakalainoaʼi te tēhina, neʼe nātou fehuʼi age kia ia pe koʼe ʼe mole tui ki te Tahitolu, te ʼifeli, peʼe ki te nefesi tuputupua. ʼAki tana Tohi-Tapu, neʼe tali e totatou tēhina ki tanatou ʼu fehuʼi. Pea ko te toko tolu ʼo te ʼu tagata ʼaia neʼe nātou tali ke fai hanatou ako Tohi-Tapu. Ko te tahi ia nātou, ko Daniel, kua kamata kau ki te ʼu fono pea neʼe ina maumauʼi mo tana ʼu meʼa fai fakalauʼakau fuli. (Apokalipesi 21⁠:⁠8) Neʼe mole taʼu katoa, pea neʼe papitema.

17. Neʼe fakaʼaogaʼi feafeaʼi e ʼihi tēhina ʼi El Salvador tanatou poto moʼo faka mafola ki te tagata neʼe fakafeagai ʼi te kamata ki te logo ʼo te Puleʼaga?

¹⁷ ʼI te fenua ʼo El Salvador, neʼe haʼi e te tagata tana kuli ʼi te muʼa matapā mokā sio ki te kau Fakamoʼoni ʼa Sehova ʼe nātou faka mafola ʼi tana kolo. Neʼe talitali te tagata ke mavae te kau Fakamoʼoni, pea ina toe fakahū ki fale tana kuli. Neʼe mole feala ki te ʼu tēhina ke nātou palalau mo te tagata. Pea ʼi te tahi ʼaho, neʼe nātou fai te tahi fakatuʼutuʼu. ʼI tanatou ʼiloʼi ʼaē neʼe feala ke logo mai te tagata ki tanatou palalau, neʼe nātou fakatuʼutuʼu ai ke nātou faka mafola ki te kuli. Neʼe nātou ʼolo ki te ʼapi, pea nātou ʼalofa ki te kuli, pea nātou ʼui age ʼe nātou fiafia heʼe feala ke nātou fai palalau mo ia. Neʼe nātou talanoa ʼo ʼuhiga mo te temi ʼaē ka fakatuʼu ai te palatiso ʼi te kele, pea ʼe mole toe ʼita anai he tahi​—ei, māʼia mo te ʼu manu ʼe nātou agalelei anai. Neʼe nātou tauʼinē leva ki te kuli, pea nātou kamata mavae. Neʼe nātou punamaʼuli ʼaupito ʼi te hū mai ki tuʼa ʼa te tagata pea mo fai fakalelei age kia nātou ʼi tana mole fia palalau mo te kau Fakamoʼoni ʼa Sehova. Neʼe ina tali te ʼu nusipepa, pea neʼe kamata tana ako Tohi-Tapu. ʼI te temi nei, ko te tagata ʼaia ʼe ko totatou tēhina​—ʼe kau ʼi “te ʼu meʼa ʼaē ʼe manakoʼia”!

“ ʼAua Naʼa Ke Mataku”

18. Koteā te ʼu fihifihia ʼaē ʼe hoko ki te tokolahi ʼo te kau Kilisitiano, kae koteā te manatu ʼa Sehova ʼo ʼuhiga mo tana kau atolasio?

¹⁸ ʼE koutou kau koa ki te gāue maʼuhiga ʼaē ko te faka mafola ʼo te Puleʼaga pea mo fai ʼo he ʼu tisipulo? Kapau koia, pea ʼe koutou maʼu he pilivilesio moʼoni. Ei, ʼaki te gāue ʼaia ʼe feala ai kia Sehova ke ina taki mai ki tona ʼapi “te ʼu meʼa ʼaē ʼe manakoʼia.” (Soane 6:​44) ʼE moʼoni, ʼi ʼihi temi ʼe lagi koutou gaʼegaʼe ai peʼe koutou lotovaivai. Ko ʼihi​—māʼia ʼi te kau kaugana agatonu ʼa Sehova—​ʼe nātou manatu ʼe mole honatou ʼaoga. Kae koutou lotomālohi! Kia mata ʼo Sehova, ʼe maʼuhiga ʼaupito tana kau atolasio, pea ʼe ina fia hāofaki koutou.​—2 Petelo 3⁠:⁠9.

19. Koteā te fakaloto mālohi ʼaē ʼe foaki mai e Sehova ʼaki ia Asea, pea ʼe lava feafeaʼi hatatou lotomālohi ʼaki te ʼu palalau ʼaia?

¹⁹ Kapau ʼe tou lotovaivai, ʼuhi ko te fakafeagai peʼe ko he ʼu ʼaluʼaga fakaloto mamahi, pea ʼe feala ke fakaloto mālohiʼi tatou e te ʼu palalau ʼaē neʼe fai e Sehova ki te kau Sutea ʼaē neʼe nātou toe liliu ki tonatou fenua. ʼE tou lau fēnei ia Asea 2:​4-6: “ ‘Kae ʼi te temi nei, ke ke lotomālohi, Ê Solopapele,’ ʼe ko te tala ʼaia ʼa Sehova, ‘pea ke ke lotomālohi, Ê Sosue, foha ʼo Sehosatake te pelepitelo lahi. Pea ke koutou lotomālohi, ia koutou fuli ʼo te fenua,’ ko te tala ʼaia ʼa Sehova, ‘pea ke koutou gāue. Heʼe ʼau nofo mo koutou,’ ʼe ko te tala ʼaia ʼa Sehova ʼo te ʼatu kautau. ‘Koutou manatuʼi te meʼa ʼaē neʼe ʼau fuakava kiai mo koutou ʼi takotou mavae mai Esipito, pea ʼi te tuʼu ʼo toku laumālie ʼi te lotolotoiga ʼo koutou. ʼAua naʼa koutou matataku.’ Heʼe koʼeni te meʼa ʼaē neʼe ʼui e Sehova ʼo te ʼatu kautau: ‘ ʼE ʼau toe tala atu​—ʼi he kiʼi temi siʼipe—​ʼe ʼau toe luluʼi anai te ʼu lagi mo te kele mo te tai pea mo te kele moamoa.’ ” Koutou fakatokagaʼi, ʼe uga tatou e Sehova ke tou lotomālohi pea ʼe ina toe foaki mai mo te ʼu fealagia ke tou mālolohi ai. ʼO feafeaʼi? Koutou fakatokagaʼi te ʼu palalau fakaloto fīmālie ʼaenī: “ ʼE ʼau nofo mo koutou.” ʼE ko he meʼa fakaloto mālohi ki tatatou tui tatatou ʼiloʼi ʼaē, tatau aipe pe koteā te ʼu faigataʼaʼia ʼaē ʼe tou tauʼi, kae ʼe nofo Sehova mo tatou!​—Loma 8:​31.

20. ʼE hoko feafeaʼi ia ʼaho nei te fakafonu ʼo te ʼapi ʼa Sehova ʼaki he kolōlia lahi?

²⁰ Neʼe kua fakamoʼoni e Sehova ʼe nofo mo tana hahaʼi. Ei ʼe hage ko tana ʼui ki te polofeta ko Asea: “Ko te kolōlia ʼo te fale ʼaenī ʼe lahi age anai ia ʼi te kolōlia ʼo te fale ʼāfea . . . Pea ʼe ʼau foaki anai te tokalelei ki te potu ʼaia.” (Asea 2⁠:⁠9) ʼE moʼoni, ko te kolōlia lahi ia ʼaho nei ʼe ko tatatou hū ki te fale lotu fakalaumālie ʼa Sehova. Pea ʼi te taʼu fuli, ʼe ʼōmai te lauʼi teau afe hahaʼi ki te tauhi moʼoni. ʼE fafaga leleiʼi nātou ʼi te faʼahi fakalaumālie, pea logope la tanatou maʼuʼuli ʼi te mālama maveuveu ʼaenī, kae ʼe nātou maʼu te tokalelei, pea ʼe toe lahi age anai te tokalelei ʼaia ʼi te mālama foʼou ʼaē ka fakatuʼu e te ʼAtua.​—Isaia 9:​6, 7; Luka 12⁠:⁠42.

21. Koteā ʼaē ʼe tonu ke tou lotomālohi ʼo fai?

²¹ Kua ōvi mai te ʼaho ʼo Halamaketone ʼaē ka luluʼi ai e Sehova te ʼu puleʼaga. (Apokalipesi 16⁠:​14, 16) Koia, tou fakaʼaogaʼi te temi ʼaē kei toe moʼo hāofaki te tokolahi. Tou lotomālohi pea mo falala katoa kia Sehova. Tou lotomālohi ʼo haga fai tatatou tauhi ʼi tana fale lotu lahi, ʼo tou fakafonu tona ʼapi ʼaki “te ʼu meʼa ʼaē ʼe manakoʼia” ʼo aʼu ki te ʼaho ʼaē ka ina ʼui ai kua ʼosi tatatou gāue.

[Nota ʼi te lalo pasina]

Kei Koutou Manatuʼi Koa?

◻ Koteā ʼaē ʼe maʼuhiga age kia Sehova ʼi te ʼu koloā?

◻ Ko ai te ʼu kūtuga e lua ʼaē ʼe fakaʼaoga kiai te taʼataʼa ʼa Sesu?

◻ Ko ai “te ʼu meʼa ʼaē ʼe manakoʼia” ʼaē ʼe nātou fakafonu ʼaki te kolōlia te ʼapi ʼa Sehova?

◻ ʼE tou lava fakamoʼoni feafeaʼi ʼe lolotoga hoko ia ʼaho nei te lea faka polofeta ʼa Asea?

[Paki ʼo te pasina 16]

ʼE koutou ʼiloʼi koa pe koteā ʼaē ʼe fakatātā e te fale lotu ʼāfea ʼa Sehova?

Lito

Potu Taputapu

ʼAletale

Potu Taputapu ʼAupito

Hūʼaga

Malaʼe

[Paki ʼo te pasina 17]

Neʼe momoli e te pelepitelo lahi te vitulo maʼa te ʼu agahala ʼo te kau pelepitelo pea mo te tao tagata maʼa te ʼu agahala ʼo te ʼu telepi ʼo Iselaele ʼaē neʼe mole ko he ʼu telepi faka pelepitelo

[Paki ʼo te pasina 18]

Ko te gāue fai faka mafola ʼi te malamanei katoa ʼe ina taki mai te lauʼi miliale hahaʼi ki te ʼapi ʼa Sehova