Koutou Tokaga Tuʼumaʼu Ki Takotou Faiakonaki
“Tokaga kia koe pea mo tau faiʼakonaki, kataki i ai. Koteuhi i tau fai aia, e ke haofaki anai ia koe, ia koe pea mo natou e fakalogo kia te koe.”—1 Timoteo 4:16.
1, 2. He koʼe ʼe ʼaoga ʼaupito ke ʼi ai he kau faiako ʼi te temi nei?
“KOUTOU olo o fakahoko he u tisipulo i te atu puleaga, . . . [ʼo] fakaʼako natou ki te taupau o mea fuape nee au fakatotonu kia koutou.” (Mateo 28:19, 20) ʼO mulimuli ki te fakatotonu ʼaia neʼe fai e Sesu Kilisito, ʼe faiga te kau Kilisitiano fuli ke nātou faiakonaki. ʼE ʼaoga ʼaupito ke ʼi ai he kau faiako faiva moʼo tokoni ki te hahaʼi fakamalotoloto ke nātou maʼu te ʼatamai mālama ʼo ʼuhiga mo te ʼAtua ʼi muʼa ʼo te hoko mai ʼo te fakaʼosi.(Loma 13:11) Neʼe fai e te ʼapositolo ko Paulo te fakaloto mālohi ʼaenī: “Kalagai te Folafola, taofi i te faigamalie o te temi, mo te temi e mole faigamalie.”(2 Timoteo 4:2) Ko tona faka ʼuhiga, ke tou faiakonaki ʼi te loto kokelekasio pea mo tuʼa. ʼE mahino ia, ko te gāue fai faka mafola ʼe mole gata pe ki te kalagaʼi ʼo te logo ʼa te ʼAtua. ʼE toe maʼua foki ke tou faiva ʼi tatatou faiakonaki moʼo tokoni ki te hahaʼi ʼaē ʼe fia logo ke nātou liliu ko he ʼu tisipulo.
2 ʼE tou maʼuʼuli nei ʼi “he u temi faigataa.” (2 Timoteo 3:1) Neʼe fakahēʼi te ʼatamai ʼa te hahaʼi ʼuhi ko te ʼu filosofia pea mo te ʼu akonaki hala. Tokolahi te hahaʼi “kua fakapouli onatou atamai,” pea kua nātou “fakaʼaoʼaoganoa.” (Efeso 4:18, 19) Ko ʼihi ʼe nātou lotomamahi ʼaupito ʼi te ʼu meʼa kovi ʼaē neʼe fai age kia nātou. Ei, kua “natou fakaofaofa pea mo ogosia o hage he u ovi e mole honatou tauhiovi.” (Mateo 9:36) Kae kapau ʼe tou faiva ʼi te faiakonaki, pea ʼe feala ke tou tokoni ki te hahaʼi fakamalotoloto ke nātou fetogi tonatou maʼuli.
Ko Te Kau Faiakonaki ʼi Te Kokelekasio
3. (a) Koteā te tahi faka ʼuhiga ʼo te fakatotonu ʼa Sesu ke tou faiakonaki? (b) Ko ai ʼaē ʼe tonu ʼuluaki ke faiakonaki ʼi te kokelekasio?
3 Kua akoʼi te toko lauʼi miliona hahaʼi ʼaki te ako Tohi-Tapu ʼaē ʼe fai kia nātou takitokotahi ʼi tonatou ʼapi. Kae ʼi tanatou ʼosi papitema, ʼe ʼaoga ke tou tokoni kia nātou foʼofoʼou ʼaia ke nātou “tauaka mo fakatafito” ʼi te moʼoni. (Efeso 3:17) ʼI tatatou fakalogo ki te fakatotonu ʼa Sesu ʼaē ʼe tuʼu ia Mateo 28:19, 20, ʼo tou taki te hahaʼi ki te kautahi ʼa Sehova, pea ʼe feala ke akoʼi nātou ʼi te loto kokelekasio. Ohage ko tona ʼui ia Efeso 4:11-13, neʼe hinoʼi he ʼu tagata ke nātou “tauhiovi mo faiʼako, o uhiga mo te teuteu o te kaigalotu ki te fai o te gaue: te laga o te sino o Kilisito.” ʼI ʼihi temi, ʼe maʼua ʼi tanatou gāue faiakonaki ke nātou “valoki, fakatotonu, tokoni i te faafai katoa mo te hoha o fakaʼako.” (2 Timoteo 4:2) Neʼe maʼuhiga te gāue faiako, koteʼuhi ʼi tana faitohi ki te kau Kolonito, neʼe talanoa ia Paulo ki te ʼu faiako ʼi te hili pe ʼo tana talanoa ki te kau ʼapositolo mo te kau polofeta.—1 Kolonito 12:28.
4. Ka tou faiakonaki, ʼe lava feafeaʼi hatatou mulimuli ki te tokoni ʼa Paulo ia Hepeleo 10:24, 25?
4 ʼE moʼoni, ʼe mole ko te ʼu Kilisitiano fuli ʼaē ʼe tagata ʼāfea, peʼe tagata taupau. Kae ʼe fakaloto mālohiʼi ia nātou fuli ke nātou fetokagaʼaki “ki te fai o te ofa pea mo te u gaue lelei.” (Hepeleo 10:24, 25) ʼE feala ke tou fai te faʼahi ʼaia ʼi te ʼu fono, ʼo tou fai he ʼu tali neʼe tou teuteuʼi lelei moʼo fakaloto mālohiʼi niʼihi. Ko te kau fai faka mafola ʼaē kua popoto ʼi te gāue, ʼe feala ke nātou ‘fetokagaʼaki ki te ʼu gāue lelei’ ʼo nātou vaevae mo nātou ʼaē ʼe foʼofoʼou mai tanatou faiva pea mo te ʼu meʼa ʼaē kua nātou ʼiloʼi, mokā nātou fai faka mafola mo nātou. Koia ʼe feala ke fai he ako lelei ʼi te ʼu lakaga ʼaia pea mokā maʼu he faigamālie moʼo fai te faʼahi ʼaia. Ohage la, ʼe fakaloto mālohiʼi te hahaʼi finematuʼa ke nātou “fakaʼako te lelei.”—Tito 2:3.
Tou Fakalotoʼi Te Hahaʼi Ke Nātou Tui
5, 6. (a) Koteā te kehekehe ʼo te Lotu Faka Kilisitiano moʼoni pea mo te ʼu lotu hala? (b) ʼE tokoni feafeaʼi te kau tagata ʼāfea kia nātou ʼaē ʼe foʼofoʼou mai ke nātou fai he ʼu tonu fakapotopoto?
5 Ko te Lotu Faka Kilisitiano moʼoni ʼe kehe ʼaupito ia mo te ʼu lotu hala, ʼaē ʼe nātou faiga ke nātou puleʼi te fakakaukau ʼa te hahaʼi. ʼI te kei nofo ʼa Sesu ʼi te kele, neʼe faiga te kau takitaki lotu ke nātou puleʼi te ʼu agaaga kehekehe ʼo te maʼuli ʼo te hahaʼi ʼo nātou fai he ʼu talatisio fakatagata fefeka. (Luka 11:46) Neʼe lahi te ʼu lakaga neʼe fai feiā te kau takitaki ʼo te Keletiate.
6 Kae ko te tauhi moʼoni ʼe ko he “tauhi taputapu” ʼe tou fai “ ʼaki totatou ʼatamai.” (Loma 12:1, NW) Ko te kau kaugana ʼa Sehova, ʼe “fakalotoʼi [nātou] ke [nātou] tui.” (2 Timoteo 3:14, NW) ʼI ʼihi temi, ʼe lagi tuku ifo e te ʼu tēhina takitaki he ʼu fakatuʼutuʼu ʼo ʼuhiga mo te fakaʼaluʼalu ʼo te kokelekasio. ʼE mole nātou faiga ke nātou fai he ʼu tonu maʼa te ʼu tēhina mo tuagaʼane, kae ʼe nātou faka ako “ki te iloi o te kehekehe o te lelei pea mo te kovi.” (Hepeleo 5:14) Ko te kau tagata ʼāfea ʼe nātou fai tāfito te faʼahi ʼaia mokā nātou fafaga te kokelekasio “aki te u folafola o te tui pea mo te akonaki lelei.”—1 Timoteo 4:6.
Koutou Tokaga Ki Takotou Faiakonaki
7, 8. (a) ʼE lava feafeaʼi ki te hahaʼi māhani ke nātou poto ʼi te faiakonaki? (b) He koʼe ʼe maʼuhiga ʼaupito hakita faiga mālohi ke kita faiva ʼi te faiakonaki?
7 Tou toe vakaʼi totatou maʼua tāfito ʼaē ko te faiakonaki. ʼE maʼua koa ke tou maʼu he ʼu fealagia makehe, peʼe tou popoto pea mo faiva ke feala hatatou kau ki te gāue ʼaia? Kailoa. Ko te gāue faiakonaki ʼaia ʼe fai ʼi te malamanei katoa, pea ʼe fakahoko e te hahaʼi māhani. (1 Kolonito 1:26-29) ʼE fakamahino fēnei e Paulo: “Pea e matou mau te koloa aeni [te minisitelio] i he u hina kele’kula [ko totatou ʼu sino agahala], ke ha e ko te malohi tauʼoluga pau o te Atua, kae e mole haù maia matou.” (2 Kolonito 4:7) Ko te tuputupu ʼo te gāue fai faka mafola, ʼe ko he fakamoʼoni ʼaia ki te mālohi ʼo te laumālie ʼa Sehova!
8 Kae ʼe maʼua ke kita faiga mālohi ke kita liliu “ko he tagata gaue e mole ufiufi, e ina ave fakahagatonu te folafola o te mooni.” (2 Timoteo 2:15) Neʼe fai e Paulo te fakaloto mālohi ʼaenī kia Timoteo: “Tokaga kia koe pea mo tau faiʼakonaki, kataki i ai. Koteuhi i tau fai aia, e ke haofaki anai ia koe, ia koe pea mo natou e fakalogo kia te koe.” (1 Timoteo 4:16) Kae e feafeaʼi hakita tokaga ki takita faiakonaki, peʼe fai ʼi te loto kokelekasio peʼe ʼi tuʼa? ʼE maʼua ai koa ke kita maʼu he ʼu fealagia makehe peʼe kita ako he ʼu faʼahiga fai ʼo te gāue ʼaia?
9. Koteā ʼaē ʼe maʼuhiga age ʼi te poto palalau?
9 Neʼe fakahā e Sesu te lahi ʼo tana poto palalau ʼi tana Akonaki ʼi te Moʼuga. ʼI tana ʼosi palalau, “nee ofolele te hahai ki tana akonaki.” (Mateo 7:28) ʼE mahino papau ia, ʼe mole he tahi ia tatou ʼe feala ke lelei tana faiakonaki ohage ko Sesu. Kae ʼe mole maʼua ke tou poto palalau ke feala ke fua lelei tatatou faiakonaki. Ia Sopo 12:7, māʼia mo te ʼu “manu lalata” pea mo “te ʼu manulele” ʼe feala ke nātou akoʼi he tahi logope la ʼe mole feala hanatou palalau! Tatau aipe pe koteā te ʼu fealagia pe ko te poto ʼaē ʼe tou maʼu, kae ʼe maʼuhiga tāfito ke tou ʼiloʼi pe “ko te faahiga tagata feafeai” ʼaē ʼe tou hoko ki ai—ko tona faka ʼuhiga koteā te ʼu kalitate ʼaē ʼe tou maʼu, pea mo tatatou ʼu agamāhani ʼi te faʼahi fakalaumālie ʼaē ʼe feala ke faʼifaʼitakiʼi e nātou ʼaē ʼe tou akoʼi.—2 Petelo 3:11; Luka 6:40.
Tou Ako Te Folafola ʼa Te ʼAtua
10. Koteā te faʼifaʼitaki lelei ʼaē neʼe tuku mai e Sesu ʼo ʼuhiga mo te ako ʼo te Folafola ʼa te ʼAtua?
10 Ko he faiako faiva ʼo te ʼu moʼoni ʼo te Tohi-Tapu, ʼe maʼua ke ina ako mo ia te Folafola ʼa te ʼAtua. (Loma 2:21) Neʼe tuku mai e Sesu Kilisito he faʼifaʼitaki lelei ʼo ʼuhiga mo te faʼahi ʼaia. Lolotoga tona minisitelio, neʼe fakahā e Sesu pe neʼe fakaʼaogaʼi he ʼu manatu neʼe ina toʼo mai te teitei vaelua ʼo te ʼu Tohi Faka Hepeleo.a Neʼe ʼiloga lelei ʼi tona taʼu 12, neʼe kua māhani ʼi te fakaʼaogaʼi ʼo te Folafola ʼa te ʼAtua, ʼi te temi ʼaē “nee nofo ia i te lotolotoga o te kau faiʼako o fagono kia natou pea mo fakafehufehui natou.” (Luka 2:46) ʼI tana kua tagata, neʼe ko he agamāhani ʼa Sesu tana ʼalu ki te sinakoka, ʼaē neʼe lau ai te Folafola ʼa te ʼAtua.—Luka 4:16.
11. Koteā te ʼu agamāhani ʼi te faʼahi fakalaumālie ʼaē ʼe tonu ke maʼu e he tahi ʼe faiakonaki?
11 ʼE koutou leleiʼia koa te lau ʼo te Folafola ʼa te ʼAtua? Kapau ʼe koutou fai he ʼu kumi fakamalotoloto, pea ʼe feala anai hakotou “mahino ki te manavasiʼi kia Sehova pea ʼe [koutou] maʼu ai anai te ʼatamai mālama ʼo ʼuhiga mo te ʼAtua.” (Tāʼaga Lea 2:4, 5) Koia, koutou maʼu he ʼu agamāhani lelei ʼo ʼuhiga mo te ako. Koutou faiga ke koutou lau ʼi te ʼaho fuli he kiʼi koga ʼo te Folafola ʼa te ʼAtua. (Pesalemo 1:2) Koutou lau tuʼumaʼu Te Tule Leʼo pea mo te Réveillez-vous! mokā koutou maʼu. Koutou fakalogo lelei ki te ʼu fono ʼo te kokelekasio. Koutou ako peʼe feafeaʼi te fai ʼo he ʼu kumi loloto. Kapau ʼe koutou ako ke koutou “fekumikumi leleiʼi ia meafuape,” pea ʼe mole koutou faihala anai peʼe koutou ʼui ʼi takotou faiakonaki he ʼu meʼa ʼe mole moʼoni.—Luka 1:3.
Koutou ʼOfa Pea Mo Fakaʼapaʼapa Kia Nātou ʼAē ʼe Koutou Akoʼi
12. Neʼe feafeaʼi te felogoi ʼa Sesu pea mo tana kau tisipulo?
12 Ko te tahi kalitate maʼuhiga ʼe ko te fakaʼapaʼapa kia nātou ʼaē ʼe koutou akoʼi. Neʼe fakalainoaʼi e te kau Faliseo te hahaʼi ʼaē neʼe fakalogo kia Sesu. Neʼe nātou ʼui fēnei: “Kae ko te hahai aeni e mole natou iloi te lao, ko te hahai malaia!” (Soane 7:49) Kae neʼe ʼofa moʼoni Sesu ki tana kau tisipulo pea neʼe fakaʼapaʼapa kia nātou. Neʼe ina ʼui fēnei: “E mole au toe higoai koutou ko aku kaugana, koteuhi e mole iloi e te kaugana te mea e fai e tona Aliki; kae e au higoai koutou ko oku kaumea, koteuhi ko meafuape nee au fakalogo mai taku Tamai, nee au fakailoilo kia koutou.” (Soane 15:15) Neʼe ko he faʼifaʼitaki ʼaia ki te kau tisipulo ʼa Sesu, pe neʼe tonu ke feafeaʼi tanatou faiakonaki.
13. Neʼe koteā te manatu ʼa Paulo ʼo ʼuhiga mo nātou ʼaē neʼe ina akoʼi?
13 Ohage la, neʼe felogoi lelei Paulo pea mo nātou ʼaē neʼe ina akoʼi, ka neʼe mole hage ko te felogoi ʼa he patolo pea mo tana kau gāue. Neʼe ina ʼui fēnei ki te kau Kolonito: “Logope la ʼe koutou maʼu he ʼu tagata takitaki e hogofulu afe ia Kilisito, kae ʼe mole lahi takotou ʼu tāmai; koteʼuhi ia Kilisito Sesu kua ʼau liliu ko takotou tāmai ʼaki te logo lelei.” (1 Kolonito 4:15, NW) ʼI ʼihi lakaga, neʼe tagi Paulo ʼi te temi ʼaē neʼe ina fai ai te ʼu fakatokaga kia nātou ʼaē neʼe ina akoʼi! (Gāue 20:31) Tahi ʼaē meʼa, neʼe loto faʼa kātaki pea mo agalelei. Koia neʼe feala ai tana ʼui ki te kau Tesalonika: “Nee matou agavaivai i te lotolotoga o koutou, o hage he fae e ina fakapelepele ana fanau e ina fafaga.”—1 Tesalonika 2:7.
14. He koʼe ʼe maʼuhiga ke tou ʼiloʼi lelei ia nātou ʼaē ʼe tou fai tanatou ako Tohi-Tapu? Koutou fakaʼaogaʼi he faʼifaʼitaki.
14 ʼE koutou faʼifaʼitakiʼi koa ia Sesu pea mo Paulo? Ko tatatou ʼofa fakamalotoloto kia nātou ʼaē ʼe tou akoʼi, ʼe feala ke ina ʼaofi te ʼu faʼahi ʼaē ʼe tou tōtō ai. ʼE hā lelei koa kia nātou ʼaē ʼe tou akoʼi, ʼe tou tokaga moʼoni kia nātou takitokotahi? ʼE tou faiga koa ke tou feʼiloʼi leleiʼaki mo nātou? Neʼe faigataʼa ki te tuagaʼane tana tokoni ki he fafine neʼe ako mo ia ke tuputupu ʼi te faʼahi fakalaumālie, pea neʼe ina kole fakalelei age: “ ʼE ʼi ai koa he meʼa ʼe ke mamahi ai?” Neʼe kamata fakahā ai e te fafine te ʼu meʼa ʼaē neʼe ʼi tona loto, ʼo ina fakamatala te ʼu faʼahi ʼaē neʼe fakatupu hoha kia ia. ʼI te fai palalau ʼaia ʼaē neʼe fai ʼaki te ʼofa, neʼe tupu ai te ʼu fetogi lahi ʼi te maʼuli ʼo te fafine ʼaia. ʼI te faʼahiga ʼaluʼaga ʼaia, ʼe tau mo feʼauga ke fai he ʼu tokoni faka Tohi-Tapu pea mo he ʼu palalau fakafimālie pea mo fakaloto mālohi. (Loma 15:4) Kae koʼeni te tahi fakatokaga: ʼE feala ke tuputupu vave ia ia ʼaē ʼe ina ako te Tohi-Tapu, kae ʼe lagi kei maʼua ke ina fetogi te tahi ʼu faʼahiga aga ʼe mole tau mo feʼauga ke fai e he Kilisitiano. Koia ʼe lagi ko he aga fakapotopoto anai mo kapau ʼe mole tou fakamāmāhani fau mo ia. ʼE tonu ke gata ʼaki he ʼu felogoi faka Kilisitiano ʼe lelei.—1 Kolonito 15:33.
15. ʼE lava feafeaʼi hatatou fakaʼapaʼapa kia nātou ʼaē ʼe tou fai tanatou ako Tohi-Tapu?
15 Ko te fakaʼapaʼapa kia nātou ʼaē ʼe tou akoʼi, ko tona faka ʼuhiga ʼe mole tou faiga anai ke tou puleʼi tonatou maʼuli. (1 Tesalonika 4:11) Ohage la, ʼe lagi tou fai te ako ʼo he fafine ʼe nofo mo he tagata ka mole heʼeki nā ʼohoana, pea lagi kua nā maʼu fānau. ʼI te kua lelei ʼo tana ʼatamai mālama ʼo ʼuhiga mo te ʼAtua, ʼe fakatotonu ai e te fafine ke ina fetogi tona maʼuli ke ʼalutahi mo te lao ʼa Sehova. (Hepeleo 13:4) ʼE tonu koa ke ina ʼohoanaʼi te tagata ʼaia peʼe tonu ke nā mavete? ʼE lagi tou manatu anai, kapau ʼe ʼohoana mo he tagata ʼe mole ina fia ʼiloʼi te moʼoni, pea ʼe mole feala anai hana tuputupu ʼi te faʼahi fakalaumālie. ʼI te tahi faʼahi, ʼe lagi tou manatuʼi te fānau pea mo tou fakaʼamu ke ʼohoana te fafine. Tatau aipe pe koteā te ʼaluʼaga, kae ʼe mole ko he aga fakaʼapaʼapa anai pea mo agaʼofa mo kapau ʼe tou fia puleʼi te maʼuli ʼo ia ʼaē ʼe tou fai tana ako, ʼo tou fakakinauʼi ia ia ke ina tali tatatou manatu. ʼI tona fakahagatonu, ʼe ko te fafine ʼaia ʼaē ka tau anai mo te ikuʼaga ʼo te tonu ʼaia. ʼE mole lelei age koa la hatatou akoʼi te fafine ʼaia ke ina fakaʼaogaʼi tana ʼu ‘fealagia fakakaukau’ pea ke ina fai he tonu ʼo ʼuhiga mo te meʼa ʼaē ʼe tonu ke ina fai?—Hepeleo 5:14.
16. ʼE lava fakahā feafeaʼi e te kau tagata ʼāfea te ʼofa pea mo te fakaʼapaʼapa ki te faga ōvi ʼa te ʼAtua?
16 ʼE maʼuhiga ʼaupito ki te kau tagata ʼāfea ʼo te kokelekasio ke nātou gaohi fakaleleiʼi te faga ōvi ʼaki te ʼofa pea ke nātou fakaʼapaʼapa kia nātou. ʼI tana faitohi kia Filemone, neʼe ʼui fēnei e Paulo: “Logope e au mau te faigamalie lahi ia Kilisito ki tou fakatotonu ke ke fai tou maua, kae e leleiʼage, i te ofa, ke au kole atu.” (Filemone 8, 9) ʼI ʼihi temi, ʼe lagi hoko te ʼu ʼaluʼaga fakatupu mamahi ki te kokelekasio. Pea ʼe lagi tonu ai ke fai he fakatonutonu. Neʼe uga e Paulo ia Tito ke ina “fakamamafa [tana] fakatonutonu [te kau agahala], koteuhi ke natou haohaoa i te tui.” (Tito 1:13) Logola te faʼahi ʼaia, ʼe tonu ke tokaga tuʼumaʼu te kau tagata ʼāfea naʼa nātou fai he ʼu palalau fefeka ki te kokelekasio. Neʼe tohi fēnei e Paulo, “ko te faifekau a te Aliki e mole tonu ke lagake, kae e agalelei ki te tagata fuape, e feala tana akonaki pea e kataki.”—2 Timoteo 2:24; Pesalemo 141:3.
17. Koteā te hala ʼaē neʼe fai e Moisese, pea koteā tona ʼaoga ki te kau tagata ʼāfea?
17 ʼE tonu ke manatuʼi tuʼumaʼu e te ʼu tēhina takitaki, ʼe nātou taupau “te fagaʼovi a te Atua.” (1 Petelo 5:2) ʼI te tahi lakaga, neʼe galo te faʼahi ʼaia kia Moisese, logope la neʼe ko he tagata agavaivai. Ko te kau Iselaelite neʼe nātou “fakatupu ʼita ki tona ʼatamai pea neʼe kamata fai e tona ʼu laugutu he ʼu palalau vale.” (Pesalemo 106:33) Neʼe lotomamahi ia Sehova ʼi te gaohi koviʼi ʼaia ʼo Tana faga ōvi, tatau aipe pe neʼe nātou lākahala. (Faka au 20:2-12) Ka hoko ki te ʼu tagata ʼāfea he ʼu fihifihia feiā ʼi te temi nei, pea ʼe tonu ke nātou faiga ke nātou akoʼi te hahaʼi ʼaki he fakasiosio poto pea mo te agalelei. ʼE kita tali lelei age he tokoni mokā gaohi fakaleleiʼi kita, ka mole faka ʼuhigaʼi kita ohage ko he tahi ʼe mole feala ke fetogi. ʼE maʼua ke taupau e te kau tagata ʼāfea te manatu ʼaenī ʼa Paulo: “E matou tui ko te u mea nee matou fakatotonu atu, e ko ia ae e koutou fai pea e koutou fai anai ia.”—2 Tesalonika 3:4.
Koutou Tokaga Ki Te ʼu Meʼa ʼAē ʼe ʼAoga Kia Nātou
18, 19. (a) Koteā ʼaē ʼe tonu ke tou fai mo kapau ʼe mole mahino vave ia ia ʼaē ʼe ina ako te Tohi-Tapu? (b) ʼE tou lava tokoni feafeaʼi ki te kau ako ʼaē ʼe faigataʼa tanatou mahino ki he ʼu faʼahiga akonaki?
18 Ko he faiako ʼe faiva ʼe ina faigaʼi ke ina fetogi tona faʼahiga faiakonaki ʼo fai pe ki te ʼu fealagia pea mo te ʼu tuʼakoi ʼo nātou ʼaē ʼe ina akoʼi. (Vakaʼi ia Soane 16:12.) ʼI te lea fakatātā ʼa Sesu ʼo ʼuhiga mo te ʼu taleta, neʼe foaki e te pule he ʼu pilivilesio ki tana kau gāue “o faipe ki onatou faiva takitahi.” (Mateo 25:15) ʼE feala ke tou fai feiā mo tatou mokā tou takitaki he ʼu ako Tohi-Tapu. ʼE mahino ia, ʼe lelei mo kapau ʼe feala hatatou vakaʼi katoa he tohi ʼi he temi nounou. Kae ʼe tonu ke tou fakamoʼoni, ʼe mole tou popoto fuli ʼi te lautohi pea mo te tāʼofi ʼo he ʼu manatu foʼou. Koia, ʼe maʼua ke tou fakasiosio poto ke tou ʼiloʼi peʼe tonu ke tou hiki ki he manatu foʼou, mo kapau ʼe faigataʼa ki te hahaʼi ʼaē ʼe nātou tali te moʼoni, hanatou mulimuli ki te ako vave ʼaia. ʼE maʼuhiga age hakita tokoni ki te kau ako ke nātou mahino, ʼi hakita fai ke vave te ako.—Mateo 13:51.
19 ʼE toe moʼoni te faʼahi ʼaia ʼo ʼuhiga mo te kau ako ʼaē ʼe mahino gataʼa ki te ʼu akonaki ohage ko te Tahitolu peʼe ko te ʼu lafeti faka lotu. ʼI te agamāhani, ʼe mole maʼua ke tou fai he ʼu kumi loloto ʼi te lolotoga fai ʼo te ako Tohi-Tapu, kae ʼi ʼihi temi, ʼe lagi feala ke tou fai te faʼahi ʼaia mokā tou ʼiloʼi ʼe ʼi ai tona ʼaoga moʼoni. ʼE tonu ai ke tou fakasiosio poto ke ʼaua naʼa tou tāʼofi te tuputupu ʼo ia ʼaē ʼe ako.
Koutou Lotomālohi!
20. Koteā te faʼifaʼitaki ʼaē neʼe tuku mai e Paulo ʼo ʼuhiga mo te faiakonaki fakamalotoloto pea mo te lotomālohi?
20 Neʼe ʼui fēnei e Paulo, “ke ulo te laumālie ia koutou.” (Loma 12:11, NW) Ei, tatau aipe peʼe tou fai he ako Tohi-Tapu peʼe tou faiakonaki ʼi te ʼu fono ʼo te kokelekasio, ʼe tonu ke tou fai fakamalotoloto pea mo tou fai ʼaki he lotomālohi. Neʼe ʼui fēnei e Paulo ki te kau Tesalonika: “Koteuhi nee mole gata’pe mo te lea o te fakaha o tamatou evaselio kia koutou, kae nee fai aki te malohi, mo te Laumalie-Maonioni pea mo te loto pau.” (1 Tesalonika 1:5) Koia, neʼe lotolelei Paulo pea mo tana ʼu kaugā fagona ke nātou tuku ki te hahaʼi “te Evaselio a te Atua, pea mo [onatou] mauli foki.”—1 Tesalonika 2:8.
21. ʼE tou lava taupau feafeaʼi he manatu ʼe lelei ʼo ʼuhiga mo tatatou faiakonaki?
21 ʼE tou gāue fakamalotoloto anai mo kapau ʼe tou tui papau, ko te logo ʼaē ʼe tou tala ʼe ʼaoga ʼaupito kia nātou ʼaē ʼe tou fai hanatou ako Tohi-Tapu. ʼAua naʼa tou fai feiā pe tatatou faiakonaki. Ko te tagata sikalaipe ko Esitalasi neʼe tokaga lelei ki tana faiakonaki. Neʼe ina “teuteuʼi tona loto moʼo vakavakaʼi te lao ʼa Sehova, pea ke ina maʼuliʼi, pea ke ina akoʼi ki Iselaele.” (Esitalasi 7:10) ʼO toe feiā aipe mo tatou, ʼe tonu ke tou teuteuʼi lelei tatatou ʼu ako Tohi-Tapu, ʼo tou fakakaukauʼi te ʼu kapite ʼaē ʼe tou ako. Tou faikole kia Sehova ke ina fakatuputupu ia tatou te tui. (Luka 17:5) Kapau ʼe tou fai fakamalotoloto, pea ʼe feala ke tokoni te faʼahi ʼaia kia nātou ʼaē ʼe ako Tohi-Tapu ke nātou manako mo nātou ki te moʼoni. ʼE mahino ia, ko tatatou tokaga ki tatatou faiakonaki ʼe kau kiai te fakaʼaogaʼi ʼo he ʼu tokoni ke feala hatatou faiva ʼi te faʼahi ʼaia. ʼE tou vakaʼi anai te faʼahi ʼaia ʼi te alatike ʼaē ka hoa mai.
[Nota ʼi te lalo pasina]
a Vakaʼi te tohi Étude perspicace des Écritures, te tohi 1, ʼi te pasina 770, ʼaē neʼe tā e te Watchtower Bible and Tract Society of New York, Inc.
ʼE Kei Koutou Manatuʼi Koa?
◻ He koʼe ʼe ʼaoga ke ʼi ai he kau faiako faka Kilisitiano faiva ʼi te temi nei?
◻ Koteā te ʼu agamāhani lelei ʼaē ʼe feala ke tou maʼu ʼi te ako ʼo te Tohi-Tapu?
◻ He koʼe ʼe maʼuhiga ke tou ʼofa pea mo tou fakaʼapaʼapa kia nātou ʼaē ʼe tou akoʼi?
◻ ʼE tou lava foaki feafeaʼi te ʼu meʼa ʼaē ʼe ʼaoga kia nātou ʼaē ʼe tou fai tanatoua ko Tohi-Tapu?
◻ He koʼe ʼe maʼuhiga ke tou fai fakamalotoloto mo lotomālohi mokā tou akoʼi te hahaʼi?
[Paki ʼo te pasina 10]
Ko he ʼu faiako faiva, ʼe nātou ako te Folafola ʼa te ʼAtua
[Paki ʼo te pasina 13]
Koutou feʼiloʼi leleiʼaki mo nātou ʼaē ʼe nātou ako te Tohi-Tapu