Te Faʼahiga Takitaki ʼo Tatou e Sehova
“Takitaki ʼau ʼi te ala ʼo te faitotonu.”—Pesalemo 27:11.
1, 2. (a) ʼE takitaki feafeaʼi e Sehova tana hahaʼi ia ʼaho nei? (b) Koteā ʼaē ʼe tonu ke tou fai ke ʼaoga lahi kia tatou te ʼu fono?
KO SEHOVA te Matapuna ʼo te mālama pea mo te moʼoni, ohage ko te meʼa ʼaē neʼe tou ako ʼi te ʼuluaki alatike. ʼE fakamālamaʼi e tana Folafola tatatou haʼele ʼi te ala ʼo te faitotonu. ʼE takitaki tatou e Sehova, ʼo ina akoʼi tatou ʼi tona ʼu ala. (Pesalemo 119:105) Ohage ko te tagata fai pesalemo ʼo te temi muʼa, ʼe tou tali ʼaki he loto fakafetaʼi te takitaki ʼa te ʼAtua, pea mo tou faikole fēnei: “Akoʼi ʼau, Ê Sehova, ʼi tou ala, pea takitaki ʼau ʼi te ala ʼo te faitotonu.”—Pesalemo 27:11.
2 Ia ʼaho nei, ko te fakatuʼutuʼu ʼaē ʼe fakaʼaogaʼi e Sehova moʼo akoʼi tatou ʼe ko te ʼu fono faka Kilisitiano. ʼE ʼaoga lahi koa kia tatou te fakatuʼutuʼu ʼofa ʼaia, ʼo tou (1) kau tuʼumaʼu ki te ʼu fono, (2) mo fakalogo fakalelei te polokalama, pea (3) mo tou fai he ʼu tali? Tahi ʼaē meʼa, ʼe tou tali koa ʼaki he loto fakafetaʼi mokā tuku mai he ʼu tokoni ke feala hatatou nonofo “ ʼi te ala ʼo te faitotonu”?
ʼE Koutou ʼOlo Tuʼumaʼu Koa ʼo Fono?
3. Neʼe maʼu feafeaʼi e he tuagaʼane ʼe kau ki te minisitelio temi katoa, te agamāhani lelei ʼaē ko te ʼalu tuʼumaʼu ki te ʼu fono?
3 Ko ʼihi kaugā fagona kua nātou kau tuʼumaʼu ki te ʼu fono talu mai tanatou kei liliki. ʼE manatuʼi fēnei e te Fakamoʼoni ʼa Sehova ʼe kau ki te minisitelio temi katoa: “Ko ʼau mo toku ʼu taʼokete, ʼi tamatou lahilahi ake ʼi te ʼu taʼu 1930, neʼe mole mātou fehuʼi ki tamatou ʼu mātuʼa peʼe mātou ʼolo ʼo fono. Neʼe mātou ʼiloʼi neʼe tonu ke mātou ʼolo ʼo fono gata pe mokā neʼe mātou mahahaki. Neʼe mole tō tomatou famili ʼi he fono.” Ohage ko te fafine polofeta ko Ana, ko te tuagaʼane ʼaia “neʼe mole puli ia ʼi he ʼaho” ʼi te potu ʼaē neʼe fai ai te tauhi kia Sehova.—Luka 2:36, 37, MN.
4-6. (a) He koʼe ʼe tō fono ʼihi kaugā fai faka mafola ʼo te Puleʼaga? (b) He koʼe ʼe maʼuhiga ke tou ʼolo ki te ʼu fono?
4 ʼE koutou kau koa ia nātou ʼaē ʼe ʼolo tuʼumaʼu ki te ʼu fono, peʼe kua koutou tōtō hoholo ʼi te faʼahi ʼaia? Ko ʼihi Kilisitiano ʼaē neʼe nātou manatu ʼe lelei tonatou maʼuli fakalaumālie, neʼe nātou fia ʼiloʼi papau peʼe moʼoni tanatou manatu ʼaia. Lolotoga ni ʼu vāhaʼa, neʼe nātou tohi te ʼu fono fuli ʼaē neʼe nātou kau kiai. ʼI te fakaʼosi ʼo te ʼu vāhaʼa ʼaia, neʼe nātou toe vakaʼi te ʼu meʼa ʼaia neʼe nātou tohi, pea neʼe nātou punamaʼuli he neʼe lahi tanatou tō ʼi te ʼu fono.
5 ʼE feala ke ʼui fēnei e he tahi: ‘ ʼE mole ko he meʼa fakapunamaʼuli ia. Kua lahi ʼaupito te ʼu faigataʼaʼia ʼe hoko ki te hahaʼi ia ʼaho nei, ʼo faigataʼa ai kia nātou hanatou kau tuʼumaʼu ki te ʼu fono.’ ʼE moʼoni ʼe tou maʼuʼuli ʼi te ʼu temi faigataʼa. Tahi ʼaē meʼa, ʼe fakaʼāsili anai te ʼu faigataʼaʼia. (2 Timoteo 3:13) Kae ʼuhi ko te ʼaluʼaga ʼaia, ʼe mole tonu koa la ke toe lahi age tatatou kau tuʼumaʼu ki te ʼu fono? Kapau ʼe mole tou kai te meʼa kai fakalaumālie ke tou mālolohi ai, pea ʼe mahino ia ʼe mole tou lava tauʼi anai te ʼu faigataʼaʼia ʼaē ʼe fakatupu e te tuʼu ʼaenī. Koia, kapau ʼe mole tou fakatahitahi tuʼumaʼu, pea ʼe feala ke tou līaki ai “te ala ʼo te kau faitotonu” ʼo talu ai! (Tāʼaga Lea 4:18) ʼE moʼoni, ka tou liliu ki fale ʼi tatatou ʼosi gāue kinakina ʼi te ʼaho katoa, ʼi ʼihi temi ʼe mole lagi tou fia ʼolo ʼo fono. Kae ka tou ʼolo ʼo fono logola tatatou gaʼegaʼe, pea ʼe fua lelei kia kita, pea mo fakaloto mālohi ki totatou ʼu tēhina mo tuagaʼane ʼi te Fale ʼo te Puleʼaga.
6 ʼE fakahā ia Hepeleo 10:25 te tahi tupuʼaga maʼuhiga ʼaē ʼe tonu ai ke tou kau tuʼumaʼu ki te ʼu fono. ʼE fakaloto mālohi ai e te ʼapositolo ko Paulo te kau Kilisitiano, ke nātou fakatahitahi ‘tāfito, heʼe nātou mamata ki te fakaōvi mai ʼo te ʼaho.’ Ei, ʼe mole tonu ke galo kia tatou kua ōvi mai “te aho o te Atua.” (2 Petelo 3:12) Kapau ʼe tou manatu ʼe kei mamaʼo atu te fakaʼosi ʼo te tuʼu ʼaenī, pea ʼe lagi tou kamata manatu pe anai kia tatou kae tou tuku te ʼu gāue fakalaumālie, ohage ko te kau ki te ʼu fono. Pea ohage ko te fakatokaga ʼaē neʼe fai e Sesu, ʼe feala ke ‘hoko fakapunamaʼuli mai kia tatou te ʼaho ʼaia.’—Luka 21:34, MN.
Koutou Fagono Fakalelei
7. He koʼe koa ʼe maʼuhiga ki te ʼu tamaliki ke nātou fakalogo fakalelei ʼi te ʼu fono?
7 ʼE mole feʼauga pe hatatou kau ki te ʼu fono. ʼE tonu ke tou fagono fakalelei, ke tou tokakaga ki te ʼu meʼa ʼaē ʼe ʼui mai ʼi te ʼu fono. (Tāʼaga Lea 7:24) ʼE toe faka ʼuhiga foki te faʼahi ʼaia ki tatatou fānau. Ka ʼalu he tamasiʼi ʼo ako, pea ʼe tonu ke tokaga ki te meʼa ʼaē ʼe ʼui e te tagata faiako, tatau aipe peʼe mole ina leleiʼia te faʼahi ʼaē ʼe palalau kiai, peʼe mole mahino kiai. ʼE ʼiloʼi e te tagata faiako, kapau ʼe faiga e te tamasiʼi ke tokaga ki te ʼu meʼa ʼaē ʼe ina ʼui, pea ʼe ʼaoga anai kia ia. Koia, ʼe mole ko he manatu fakapotopoto koa la, ʼo ʼuhiga mo te tamasiʼi ʼaē kua feala ke ʼalu ʼo ako, ke tokaga ki te ako ʼaē ʼe fai mai ʼi te ʼu fono, kae mole tou tuku ke tulemoe ʼi te kamata pe ʼo te fono? ʼE moʼoni, ʼi te ʼu moʼoni maʼuhiga ʼaē ʼe tou maʼu ʼi te Tohi-Tapu, “e i ai he u mea e faigataa te mahino ki ai.” (2 Petelo 3:16) Kae ʼe mole tonu ke tou meʼa noaʼi te ʼu meʼa ʼaē ʼe feala ke ako e he tamasiʼi. ʼE ʼiloʼi e te ʼAtua te faʼahi ʼaia. ʼI te ʼu temi faka Tohi-Tapu, neʼe ina fakatotonu ki tana kau kaugana tūpulaga ke nātou ‘fagono pea mo ako pea mo manavasiʼi kia Sehova pea mo tokakaga ʼo maʼuliʼi te ʼu folafola fuli ʼo te lao ʼaia,’ pea ʼe mahino ia ko ʼihi lao neʼe mahino gataʼa ki te ʼu tamaliki. (Teutalonome 31:12; vakaʼi ia Levitike 18:1-30) Ia ʼaho nei, ʼe tonu koa ke kehe age te ʼu meʼa ʼaē ʼe fakamaʼua e Sehova ki te ʼu tamaliki?
8. Koteā te ʼu fakatuʼutuʼu ʼaē ʼe fai e te ʼu mātuʼa moʼo tokoni ki tanatou fānau ke nātou fakalogo fakalelei ʼi te ʼu fono?
8 ʼE mahino ki te ʼu mātuʼa Kilisitiano, ko te ʼu meʼa ʼaē ʼe logo kiai tanatou fānau ʼi te ʼu fono, ʼe toe tali foki ki te ʼu meʼa ʼaē ʼe ʼaoga kia nātou ʼi te faʼahi fakalaumālie. Koia, ʼe fakatuʼutuʼu e ʼihi mātuʼa ke ʼai he kiʼi mālōlō ʼo tanatou fānau ʼi muʼa ʼo tanatou ʼolo ʼo fono, ke feala hanatou ʼolo ki te Fale ʼo te Puleʼaga, ʼe nātou mālolohi pea mo fia ako. Ko ʼihi mātuʼa ʼe nātou faka tuʼakoi peʼe mole nātou tali ke sio televisio tanatou fānau ʼi te ʼu afiafi fono. (Efeso 5:15, 16) Pea ʼe fakasiʼisiʼi e te ʼu mātuʼa ʼaia te ʼu fakafiafia, ʼo nātou fakaloto mālohi tanatou fānau ke nātou fagono pea mo ako, ʼo mulimuli ki tonatou taʼu pea mo tonatou ʼu fealagia.—Tāʼaga Lea 8:32.
9. Koteā ʼaē ʼe feala ke tokoni mai kia tatou ke tou poto ʼi te fagono?
9 Neʼe palalau Sesu ki te ʼu hahaʼi lalahi ʼi tana ʼui ʼaē: “Koutou vakai, pe e feafeai tautou fagono.” (Luka 8:18) Ia ʼaho nei, ʼe faigafua age takita ʼui te faʼahi ʼaia ʼi hakita fai. ʼE moʼoni, ʼe faigataʼa takita fagono fakalelei, kae ʼe feala ke tou ako ke tou poto ʼi te fagono. Ka koutou fagono ki he akonaki faka Tohi-Tapu peʼe ko he koga ʼo te fono, pea koutou faiga ke koutou fakakeheʼi te ʼu manatu tāfito. Koutou fakakaukauʼi fakatomuʼa te meʼa ʼaē ka ʼui e te tēhina. Koutou kumi te ʼu manatu ʼaē ʼe feala ke koutou fakaʼaogaʼi ʼi te minisitelio, peʼe ko te ʼu manatu ʼaē ka koutou maʼuliʼi. Koutou toe fakakaukauʼi te ʼu puani ʼaē neʼe fakahā atu. Koutou tohi he ʼu nota nounou.
10, 11. Neʼe tokoni feafeaʼi ʼihi mātuʼa ki tanatou fānau ke lelei age tanatou fagono, pea ko te ʼu tokoni fea ʼaē neʼe ʼaoga kia koutou?
10 ʼE lelei age te kamata fakamāhani ʼi te fagono ʼi te kei liliki. ʼI muʼa ʼo tanatou popoto lautohi pea mo faitohi, ʼe fakaloto mālohi e te ʼu mātuʼa tanatou fānau ʼaē ʼe mole heʼeki ako, ke nātou tohi he ʼu “nota” lolotoga te ʼu fono. ʼE nātou tohi te fakaʼiloga ʼi he moʼi pepa mokā fakaʼaogaʼi te ʼu kupu ʼaē ʼe nātou ʼiloʼi lelei, ohage ko “Sehova,” “Sesu,” peʼe ko te kupu “Puleʼaga.” ʼAki te faʼahiga fai ʼaia, ʼe lava ako ai e te fānau te tokaga fakalelei ki te ʼu meʼa ʼaē ʼe ʼui mai muʼa.
11 Māʼia mo nātou ʼaē ʼe lalahi age, ʼe tonu ʼi ʼihi temi ke fakaloto mālohi nātou ke nātou fagono fakalelei. Neʼe fakatokagaʼi e te tāmai ʼe mole fagono tona foha ʼaē ʼe taʼu 11 lolotoga te fakatahi, pea neʼe ina ʼavage kia ia te Tohi-Tapu pea mo ina kole age ke ina kumi te ʼu vaega ʼaē ʼe fakahā mai e te ʼu tēhina faiakonaki. Neʼe tohi e te tāmai tana ʼu nota, pea mo fakasiosio ki tona foha peʼe ina toʼo te Tohi-Tapu. Ki muli age, neʼe fiafia age te tama ʼaia ʼi tana mulimuli ki te polokalama ʼo te fakatahi.
Ke Logo Te Hahaʼi Ki Tokotou Leʼo
12, 13. He koʼe ʼe maʼuhiga ke tou hiva te ʼu katiko mo te kokelekasio?
12 Neʼe hiva fēnei e te Hau ko Tavite: “ ʼE ʼau takafoli anai tou ʼaletale, Ê Sehova, moʼo kalagaʼi mālohi taku ʼu fakavikiviki.” (Pesalemo 26:6, 7) Ko te ʼu fono ʼa te kau Fakamoʼoni ʼa Sehova ʼe ko he fealagia lelei ʼaia kia tatou ke tou kalagaʼi tatatou tui. Ko te meʼa ʼaē ʼe feala ai ke tou fai te faʼahi ʼaia, ʼe ko te hiva fakatahi mo nātou fuli ʼi te kokelekasio. Ko te faʼahi maʼuhiga ʼaia ʼo tatatou tauhi, kae ʼe faigafua hakita meʼa noaʼi te faʼahi ʼaia.
13 Ko ʼihi tamaliki ʼe mole heʼeki popoto ʼi te lautohi, ʼe nātou maʼu fakaʼatamai te ʼu kupu ʼo te ʼu katiko ʼaē ka hivaʼi anai ʼi te ʼu fono ʼi te vāhaʼa fuli. ʼE nātou fiafia lahi mokā nātou hiva mo te hahaʼi lalahi. Kae ka lahilahi ake te ʼu tamaliki, pea ʼe mole lagi kei nātou fia hivaʼi te ʼu katiko. ʼE toe ufiufi mo ʼihi hahaʼi lalahi ʼi te hiva ʼi te ʼu fono. Kae ko te hiva ʼe kau ki tatatou tauhi, ohage pe ko te fai faka mafola. (Efeso 5:19) ʼE tou fai ia meʼa fuli ʼaē ʼe tou lavaʼi moʼo fakavikiviki ia Sehova ʼi te fai faka mafola. ʼE mole toe feala koa la ke tou faka kolōlia kia te ia ʼo tou hikihiki ake ʼotatou leʼo ʼi te ʼu hiva fakavikiviki fakamalotoloto—tatau aipe peʼe tou leʼo mālie peʼe kailoa?—Hepeleo 13:15.
14. He koʼe ʼe tonu ke tou teuteu fakalelei pea mo teuteu fakatomuʼa ia te ʼu alatike ʼaē ʼe ako ʼi te ʼu fono ʼo te kokelekasio?
14 ʼE tou toe fakavikiviki ki te ʼAtua mokā tou fai ni ʼu tali fakaloto mālohi, lolotoga te ʼu koga ʼo te ʼu fono ʼaē ʼe tou lava fai ai te faʼahi ʼaia. Koia ʼe tonu ai ke tou teuteuʼi te ʼu fono ʼaia. ʼE tonu ke tou fakaʼaogaʼi he temi lahi moʼo fakakaukauʼi te ʼu faʼahi loloto ʼo te Folafola ʼa te ʼAtua. Neʼe mahino te faʼahi ʼaia ki te ʼapositolo ko Paulo, ʼaē neʼe ina leleiʼia ʼaupito te ako ʼo te Tohi-Tapu. Neʼe ina tohi fēnei: “Oiaue! ko te loloto o te koloa mo te poto pea mo te malama o te Atua!” (Loma 11:33) ʼU pule famili, ʼe maʼuhiga ʼaupito ke koutou tokoni ki tokotou famili katoa ke nātou ako te poto ʼo te ʼAtua, ʼaē ʼe fakahā ʼi te Tohi-Tapu. Koutou fakaʼaogaʼi he temi lolotoga te ako Tohi-Tapu faka famili, ke koutou fakamahino te ʼu puani faigataʼa pea mo tokoni ki takotou famili ke nātou teuteuʼi te ʼu fono.
15. Koteā te ʼu tokoni ʼaē ʼe ʼaoga anai ki he tahi ke ina fai hana tali ʼi te ʼu fono?
15 Kapau ʼe koutou fia tali ʼi te ʼu fono fuli, he koʼe koa ʼe mole koutou teuteuʼi fakatomuʼa hakotou tali? ʼE mole ʼaoga ke fai he tali loaloaga. ʼE lelei age hakotou lau fakamalotoloto he vaega faka Tohi-Tapu, peʼe koutou tali ʼaki takotou faʼahiga palalau ʼaki tokotou loto katoa. ʼE kole e ʼihi kaugā fagona ki te tēhina ʼaē ʼe ina takitaki te ako, ke nātou ʼuluaki tali ki he palakalafe kua nātou filifili, ke nātou maʼu te fealagia ʼaē ke nātou fakahā tanatou tui.
Ko ʼAē ʼe Mole Poto ʼe Liliu Ia ʼo Poto
16, 17. Koteā te tokoni ʼaē neʼe fai e te tagata ʼāfea ki te tēhina faifekau faka minisitelio, pea he koʼe neʼe fua lelei?
16 ʼI te ʼu fono ʼa te kau Fakamoʼoni ʼa Sehova, ʼe tautau fakamanatuʼi mai ke tou lau te Folafola ʼa te ʼAtua ʼi te ʼaho fuli. ʼE ko he meʼa fakaloto mālohi te fai ʼo te faʼahi ʼaia. ʼE toe tokoni mai kia tatou ke tou fai he ʼu tonu fakapotopoto, ke tou fakatonutonuʼi tatatou ʼu aga ʼaē ʼe kovi, mo tauʼi te ʼu fakahala, pea ke tou toe lelei ʼi te faʼahi fakalaumālie mo kapau kua tou kamata hēʼia.—Pesalemo 19:7.
17 Ko te kau tagata ʼāfea fakapotopoto ʼi te ʼu kokelekasio, ʼe nātou fia foaki mai he ʼu tokoni faka Tohi-Tapu ʼe ʼalutahi mo te ʼu meʼa ʼaē ʼe ʼaoga kia tatou. Ko te meʼa pe ʼaē ʼe tonu ke tou fai, ke tou “ ʼohu” ai, ko tona faka ʼuhiga ke tou kumi te ʼu tokoni ʼo te kau tagata ʼāfea ʼaē ʼe fakatafito ki te Tohi-Tapu. (Tāʼaga Lea 20:5) ʼI te tahi ʼaho, ko te tēhina tūpulaga faifekau faka minisitelio loto fiafia, neʼe ina kole ki te tagata ʼāfea pe koteā te ʼu meʼa ʼe feala ke ina fai ke lahi age tana ʼaoga ki te kokelekasio. Ko te tagata ʼāfea, ʼaē ʼe ina ʼiloʼi lelei te tēhina tūpulaga ʼaia, neʼe ina avahi tana Tohi-Tapu ia 1 Timoteo 3:3 (MN), ʼaē ʼe ʼui ai ko te ʼu tēhina ʼaē neʼe fili ʼe tonu ke nātou “aga fakapotopoto.” ʼAki he agalelei, neʼe talanoa ki te ʼu faʼahi ʼaē neʼe lava aga fakapotopoto ai te tūpulaga ʼaia mokā felogoi mo te hahaʼi. Neʼe ʼita koa te tēhina tūpulaga ʼi te tokoni fakahagatonu ʼaia neʼe fai age ki ai? Kailoa ia. Neʼe ina ʼui fēnei: “Neʼe fakaʼaogaʼi e te tagata ʼāfea te Tohi-Tapu, koia neʼe mahino ai kia ʼau neʼe haʼu te tokoni ʼaia mai ia Sehova.” ʼAki he loto fakafetaʼi, neʼe maʼuliʼi e te tēhina faifekau faka minisitelio te tokoni ʼaia pea neʼe tuputupu lelei ʼi te faʼahi fakalaumālie.
18. (a) Koteā ʼaē neʼe tokoni ki te finemui Kilisitiano ke ina tauʼi te fakahala ʼi te faleako? (b) Koteā te ʼu vaega faka Tohi-Tapu ʼaē ʼe koutou manatu kiai mokā hoko kia koutou he fakahala?
18 Pea ʼe tokoni te Folafola ʼa te ʼAtua ki te kau tūpulaga ke nātou “[feholaki] mai te u fiafiaʼaga fakatupulaga.” (2 Timoteo 2:22) Ko te finemui Fakamoʼoni ʼa Sehova, neʼe hoki maʼu tana pepa, neʼe ina lava tauʼi te ʼu fakaneke lolotoga te ʼu taʼu ʼaē neʼe ako ai, he neʼe metitasio pea mo ina maʼuliʼi ʼihi vaega ʼo te Tohi-Tapu. Neʼe ina tautau manatuʼi te tokoni ʼaē ʼe tuʼu ia Tāʼaga Lea 13:20: “Ko ʼaē ʼe haʼele mo te kau poto ʼe liliu anai ia ʼo poto.” ʼO mulimuli kiai, neʼe tokaga ʼo fakakaugā pe mo nātou ʼaē neʼe fakaʼapaʼapa lahi ki te ʼu pelesepeto ʼo te Tohi-Tapu. Neʼe ina fakakaukauʼi fēnei: “ ʼE mole ʼau lelei age ʼau ʼi he tahi kehe. Kapau ʼe ʼau fakatahitahi lelei mo te hahaʼi ʼaē ʼe mole ʼi te moʼoni, pea ʼe ʼau fia lelei anai ki taku ʼu kaumeʼa pea ʼe iku anai ki he meʼa kovi.” Neʼe toe ʼaoga kia ia te tokoni ʼa Paulo ʼaē ʼe tuʼu ia 2 Timoteo 1:8 (MN). Neʼe ina tohi fēnei: “ ʼAua naʼa ke ufiufi ʼi te fagonogono ʼo ʼuhiga mo totatou ʼAliki, . . . kae ke ke toʼo tau vahe ʼaē ko te kātakiʼi te mamahi ʼuhi ko te logo lelei.” ʼO mulimuli ki te tokoni ʼaia, neʼe lototoʼa ʼo vaevae ki tana ʼu kaugā ako, ʼi te ʼu faigamālie fuli pe, tana tui ʼaē ʼe fakatafito ki te Tohi-Tapu. Ka ina fai hana kiʼi palapalalau ʼi muʼa ʼo te kalasi, pea neʼe ina fili ke palalau ki he faʼahi neʼe feala ke fakamoʼoni ai ki te Puleʼaga ʼo te ʼAtua.
19. He koʼe neʼe mole lava tauʼi e te tūpulaga te ʼu fakaneke ʼo te mālama ʼaenī, kae koteā ʼaē neʼe ina fai ke mālohi ai ʼi te faʼahi fakalaumālie?
19 Kapau ʼe ʼi ai he temi ʼe tou hēʼia ai mai “te ala ʼo te kau faitotonu,” pea ʼe feala ke tokoni mai te Folafola ʼa te ʼAtua ke tou fakatonutonuʼi tatatou haʼele. (Tāʼaga Lea 4:18) Neʼe hoko te faʼahi ʼaia ki te tūpulaga ʼe nofo ʼi Afelika. Neʼe ʼaʼahi ia ia e te Fakamoʼoni ʼa Sehova, pea neʼe ina tali ke fai hana ako Tohi-Tapu. Neʼe ina leleiʼia te ʼu meʼa ʼaē neʼe ina ako kae mole tuai, pea neʼe mulimuli ki te ʼu fakakaugā kovi ʼi te faleako. ʼAki te temi, neʼe ina fai te ʼu aga heʼeʼaoga. ʼE ina ʼui fēnei: “Neʼe hoha toku leʼo ʼo loto, pea neʼe ʼau fakagata ai taku ʼalu ʼo fono.” Ki muli age, neʼe toe liliu ʼo fono. Neʼe ʼui fēnei e te tūpulaga ʼaia: “Neʼe mahino kia ʼau neʼe hoko mai te ʼu meʼa fuli ʼaia he neʼe ʼau vaivai ʼi te faʼahi fakalaumālie. Neʼe mole ʼau fai haku ako takitokotahi. Ko te tupuʼaga la ʼaia ʼo taku mole lava tauʼi te fakahala. Pea neʼe ʼau kamata lau Te Tule Leʼo pea mo te Réveillez-vous ! ʼAki te temi, neʼe ʼau liliu ʼo mālohi ʼi te faʼahi fakalaumālie pea neʼe ʼau fakamaʼa toku maʼuli. Neʼe ko he fakamoʼoni lelei ʼaia kia nātou ʼaē neʼe nātou fakatokagaʼi te ʼu fetogi ʼaē neʼe ʼau fai. Kua ʼau papitema pea ʼi te temi nei, kua ʼau fiafia.” Koteā ʼaē neʼe fai e te tūpulaga ʼaia ke lotomālohi ai moʼo tauʼi te ʼu vaivaiʼaga ʼo tona kakano? Neʼe ina toe maʼu te mālohi fakalaumālie, he neʼe ina fai tuʼumaʼu tana ako takitokotahi ʼo te Tohi-Tapu.
20. ʼE lava tauʼi feafeaʼi e he tūpulaga te ʼu ʼohofi ʼa Satana?
20 Kau tūpulaga Kilisitiano, ʼe tauʼi koutou ʼi te temi nei! Kapau ʼe koutou fia tauʼi te ʼu ʼohofi ʼaia ʼa Satana, pea ʼe tonu ke koutou kai tuʼumaʼu te meʼa kai fakalaumālie. Neʼe ʼiloʼi te faʼahi ʼaia e te tagata fai pesalemo, ʼaē ʼe mahino ia neʼe kei tūpulaga. Neʼe fakamālo kia Sehova ʼi tana foaki mai tana Folafola, ke feala ai ki ‘he tūpulaga ke ina fakamaʼa tona ala.’—Pesalemo 119:9.
ʼE Tou Mulimuli Anai Ki Te Potu Fuape ʼAē ʼe Taki Kiai Tatou e Te ʼAtua
21, 22. He koʼe ʼe mole tonu ke tou manatu ʼe faigataʼa fau te ala ʼo te moʼoni?
21 Neʼe taki e Sehova te puleʼaga ʼo Iselaele mai Esipito ʼo aʼu ki te Kele ʼo te Fakapapau. ʼI te sio fakatagata, ko te ala ʼaē ka ina fili neʼe mole tonu ia ke faigataʼa. Neʼe mole fili e Sehova te ala ʼaē neʼe mata faigafua age, ʼaē ʼe fakalaka fakahagatonu ʼi te ʼu tafaʼaki ʼo te Tai ʼo Metitelanea, kae neʼe ina taki tana hahaʼi ʼi te ala faigataʼa ʼo te toafa. Kae ʼi tona fakahagatonu, neʼe ko te manavaʼofa ʼaia ʼo te ʼAtua. Logola neʼe nounou, kae kapau neʼe toʼo e te kau Iselaele te ala ʼaē ʼi te tai pea neʼe tonu ke nātou fakalaka ʼi te fenua ʼo te kau Filisitini agakovi. ʼI tana fili te tahi ala, neʼe tāʼofi ai e Sehova te ʼuluaki fetauʼaki ʼaē neʼe feala ke hoko ʼi te kau Filisitini pea mo tana hahaʼi.
22 ʼO toe feiā pe, ko te ala ʼaē ʼe taki ai tatou e Sehova ia ʼaho nei, ʼe lagi faigataʼa ʼi ʼihi temi. ʼI te vāhaʼa fuli ʼe lahi te ʼu gāue faka Kilisitiano ʼe tonu ke tou fai, ohage ko te ʼu fono, mo te ako takitokotahi, pea mo te fai faka mafola. ʼE lagi mata faigafua age te mulimuli ki te tahi ʼu ala. Kae kapau ʼe tou mulimuli ki te takitaki ʼa te ʼAtua, pea ʼe tou aʼu anai ki te ikuʼaga ʼaē neʼe tou gāue kinakina kiai. Koia, tou haga tali te ako maʼuhiga ʼaē ʼe fai mai e Sehova pea mo tou nonofo ʼi “te ala ʼo te kau faitotonu” ʼo talu ai!—Pesalemo 27:11.
ʼE Feala Koa Hakotou Fakamahino?
• He koʼe ʼe maʼuhiga ke tou kau tuʼumaʼu ki te ʼu fono?
• Koteā ʼaē ʼe feala ke fai e te ʼu mātuʼa moʼo tokoni ki tanatou fānau ke nātou fakalogo fakalelei ʼi te ʼu fono?
• Koteā ʼaē ʼe tonu ke tou fai ke tou fagono fakalelei?
• Koteā ʼaē ʼe feala ke tokoni mai kia tatou ke tou tali ʼi te ʼu fono?
[Paki ʼo te pasina 16, 17]
Ko tatatou kau ki te ʼu fono faka Kilisitiano ʼe tokoni mai kia tatou ke tou manatuʼi tuʼumaʼu te ʼaho ʼo Sehova
[Paki ʼo te pasina 18]
ʼI te ʼu fono, ʼe lahi te ʼu ʼaluʼaga ʼe feala ai ke tou fakavikiviki kia Sehova