Koteā Te Tui?

ʼE FEAFEAʼI anai hakotou fakamahino ia te tui? ʼE manatu e ʼihi, ko te tui ʼe ko te hoko tui pē ʼa he tahi ki he meʼa. Ko te tagata maʼuhiga Amelika ko H. L. Mencken, ʼe gāue maʼa te sulunale, neʼe ina ʼui ʼo ʼuhiga mo te tui, ʼe ko “te tui fakakaukau gataʼa ki he meʼa kā hoko, kae ʼe mole ʼiloʼi papau peʼe feala ke hoko.”

Kae ʼe ʼui ʼi te Tohi-Tapu ko te tui ʼe mole ko te hoko tui pē ki he meʼa peʼe ko te tui fakakaukau gataʼa. ʼE ʼui fēnei ʼi te Folafola ʼa te ʼAtua: “Ko te tui ʼe ko he ʼamanaki moʼoni ki he ʼu meʼa ʼe tou falala kiai, ko te fakamoʼoni lelei ʼo te ʼu moʼoni logopē lā ʼe mole tou sisio kiai.”—Hepeleo 11:1.

ʼUhi ko te ʼu manatu kehekehe ʼa te hahaʼi ʼo ʼuhiga mo te tui, tou vakaʼi ia te ʼu tali ki te ʼu fehuʼi ʼaenī ʼe hoa mai:

• ʼE kehekehe feafeaʼi ia te fakamahino ʼa te Tohi-Tapu pea mo te ʼu fakamahino ʼa te hahaʼi tokolahi ʼo ʼuhiga mo te tui?

• He koʼē ʼe maʼuhiga ke tou maʼu ia te faʼahiga tui ʼaē ʼe talanoa kiai ia te Tohi-Tapu?

• Koteā ʼaē ʼe tonu ke kotou fai ke mālohi age takotou tui?

Ko He Pepa Fakamoʼoni Pea Mo He Fakamoʼoni ʼe Mole Feala Ke Holoʼi

ʼI te temi ʼaē neʼe tohi ai te tohi ki te kau Hepeleo ʼi te Tohi-Tapu, ko te kupu Fakakeleka ʼaē neʼe fakaliliu ʼaki te kupu “ ʼamanaki moʼoni” neʼe māhani tona fakaʼaogaʼi. Neʼe tau fakaʼaogaʼi ia te kupu ʼaia ʼi te ʼu pepa ʼo te ʼu gāue fai fakatau pea neʼe ko he fakamoʼoni ʼo he koloa kā maʼu anai e he tahi. Koia, ʼe ʼui ʼi te tohi, neʼe feala ke fakaliliu ia Hepeleo 11:1 ʼo ʼui fēnei: “Ko te tui ʼe ko he pepa fakamoʼoni ʼo he ʼu meʼa ʼe tou falala kiai.”

Kapau neʼe kotou toʼo ʼi he ʼaho ia he masini ʼi he fale koloa ʼe ʼiloa ʼi tana gāue fakahagatonu pea mo kotou ʼatalitali ke momoli atu, ʼe kotou maʼu ia te faʼahiga tui ʼaia. Ko te pepa ʼaē ʼe tuʼu ai ia te meʼa ʼaē neʼe kotou toʼo, ʼe ko he tupuʼaga ʼaia ke kotou haga tui ki te fale koloa ʼaē neʼe kotou totogi ai te meʼa ʼaia. ʼE feala ke tou ʼui, ko te pepa ʼaia ʼe ko takotou pepa fakamoʼoni ʼe kotou maʼu anai ia te masini ʼaē neʼe kotou totogi. Kapau neʼe puli te pepa ʼaia pe neʼe kotou liʼaki, ʼe mole feala hakotou fakamoʼoni neʼe kua kotou totogi ia te masini. ʼO toe fēia pē, ko nātou ʼaē ʼe natou tui ki te fakahoko anai e te ʼAtua tana ʼu fakapapau, ʼe mahino papau ʼe natou maʼu moʼoni anai te ʼu meʼa ʼaē ʼe natou ʼamanaki kiai. ʼI te tahi age faʼahi, ko nātou ʼaē ʼe mole tui peʼe kua puli tanatou tui, ʼe mole feala hanatou fakamoʼoni ʼe natou maʼu anai ia te ʼu meʼa ʼaē ʼe fakapapau ʼe te ʼAtua.—Sake 1:5-8.

Ko te lua kupusiga palalau iā Hepeleo 11:1, ʼaē neʼe fakaliliu ko he “fakamoʼoni lelei,” ʼe fakaʼuhiga ki te foaki ʼo he ʼu fakamoʼoni ʼe ina fakafihiʼi ia he ʼu faʼahi ʼe gata pē ʼi te meʼa ʼaē ʼe hā mai ki tuʼa. Ohagē lā, ko te laʼā ʼe hagē ʼe ina takafoli ia te kele—ʼe hopo ake ʼi te potu ʼesitē, fakalaka ʼi te lagi, pea tō ʼi te potu ʼuesitē. Kae ko te ʼu fakamoʼoni mai te hahaʼi ʼaē ʼe natou ako ia te ʼatulaulau pea mo te ʼu hahaʼi lau nūmelo, ʼe fakahā ai ko te kele ʼe mole tuʼu ia ʼi te lotomālie ʼo te ʼatulaulau. ʼI takotou kua ʼiloʼi lelei ia te ʼu fakamoʼoni ʼaia pea mo tali ʼe ko te moʼoni ʼaia, ʼe kotou tui ai ʼe ko te kele ʼaē ʼe ina takafoli ia te laʼā—logolā ʼe mole ko te meʼa ʼaia ʼe sio kiai tokotou ʼu mata. ʼE mole kotou hoko tui pē ki te manatu ʼaia. Kae ʼe kotou lava sisio ai ki te ʼuhiga moʼoni ʼo te ʼu meʼa, kae mole gata pē ki te ʼu meʼa ʼaē ʼe hā atu kiā koutou.

He Koʼē ʼe Maʼuhiga Ia He Tui ʼe Mālohi?

ʼE ko te faʼahiga tui ʼaia ʼaē ʼe fakalotomālohiʼi ʼi te Tohi-Tapu—ko he tui mālohi ʼe fakatafito ki he fakamoʼoni lelei, tatau aipē pe tonu ke tou fetogi te ʼu meʼa ʼaē ʼe tou tui kiai. ʼE maʼuhiga ia te taʼi tui ʼaia. Neʼe tohi fēnei e te ʼapositolo ko Paulo: “Kā ʼe mole ʼi ai te tui ʼe molemo feala ke kita lelei kiā te ia, heʼe ko ʼaē ʼe fakaovi ki te ʼAtua ʼe tonu ke tui ko ia pea ʼe ko ia ʼaē ʼe ina fakapale ia nātou ʼaē ʼe natou kumi moʼoni ia ia.”—Hepeleo 11:6.

ʼE lahi te ʼu fakafifihi ʼe feala ke natou tāʼofi ai ke mālohi takotou tui. Kae kapau ʼe kotou mulimuli ki te ʼu tokoni e fā ʼaē ʼe talanoa ʼi te ʼu pāsina kā hoa mai, ʼe feala anai ke mālohi takotou tui.