“NEʼE ʼAVE IA KE ʼAUA NAʼA MAMAHI ʼI TANA MATE”

Neʼe mate feafeaʼi ia Enoke? Ko tona mate neʼe fakamisitelio pea fakaofoofo age ʼi tona maʼuli. ʼE ui fenei ʼi te fakamatala ʼo te tohi ʼo Senesi: “Ko Enoke neʼe haga haʼele mo te ʼAtua moʼoni. Pea neʼe puli ia koteʼuhi neʼe toʼo ia e te ʼAtua.” (Senesi 5:24, MN) Kotea te fakaʼuhiga ʼo te ui ʼae neʼe toʼo e te ʼAtua ia Enoke? Neʼe fakamahino fenei e te apositolo ko Paulo ki muli age: “ ʼAki tana tui, ko Enoke neʼe ʼave ia ke ʼaua naʼa mamahi ʼi tana mate, pea neʼe mole maʼu ia ia ʼi he potu he neʼe ʼave ia ia e te ʼAtua, koteʼuhi ʼi muʼa ʼo tona ʼave neʼe ina maʼu te fakamoʼoni mai te ʼAtua ʼe ina leleiʼia ia ia.” (Hepeleo 11:5) Kotea te fakaʼuhiga ʼo te ui ʼae e Paulo neʼe “ ʼave ia ke ʼaua naʼa mamahi ʼi tana mate”? ʼE ui ʼi ʼihi fakaliliu ʼo te Tohi-Tapu, neʼe ʼave e te ʼAtua ia Enoke ki te lagi. Kaʼe neʼe mole feala ke feia. Koteʼuhi, ʼe tou lau ʼi te Tohi-Tapu, neʼe ko Kilisito ʼae neʼe ʼuluaki fakatuʼuake ki te maʼuli ʼae ʼi te lagi.—Soane 3:13.

Neʼe “ ʼave” feafeaʼi ia Enoke ke mole “mamahi ʼi tana mate”? ʼE mahino ia, neʼe toʼo mamalie tona maʼuli ke ʼaua naʼa ina iloʼi te kafo ʼo te mate. Kaʼe ʼuluaki, neʼe maʼu muʼa e Enoke “te fakamoʼoni mai te ʼAtua ʼe ina leleiʼia ia ia.” ʼO feafeaʼi? ʼI muʼa ʼo tona mate, neʼe lagi mamata ki he meʼa neʼe fakaha age e te ʼAtua, neʼe sio ai ki he palatiso ʼi te kele. ʼAki te fakailoga fakaofoofo ʼaia ʼo te ʼofa ʼo Sehova, neʼe moe ai ia Enoke ʼi te mate. ʼI te faitohi ʼa te apositolo ko Paulo ʼo ʼuhiga mo Enoke pea mo ʼihi tagata mo fafine agatonu, neʼe ina ui fenei: “Neʼe mamate ia natou fuli ʼaia ʼi te tui.” (Hepeleo 11:13) Hili ia, neʼe lagi kumi e ʼona fili ia tona sino, kaʼe neʼe “mole maʼu ia ia ʼi he potu.” Koteʼuhi neʼe lagi toʼo tona sino e Sehova ke ʼaua naʼa natou vaivaigaʼi peʼe ke natou fakaʼaogaʼi ki te tauhi hala.b

ʼAki te fakamahino Fakatohi-tapu ʼaeni, tou faigaʼi pea tou fakakaukauʼi pe neʼe feala ke iku feafeaʼi te ʼu kiʼi temi fakaʼosi ʼo te maʼuli ʼo Enoke. Tou fakafuafua te aluʼaga ʼaia mo tou manatuʼi, neʼe ko he puleʼaki pe e tahi. Neʼe hola ia Enoke pea neʼe kua gaʼegaʼe. Neʼe tuli ia ia e ʼona fili, he neʼe natou iita ʼuhi ko te ʼu fakamau ʼae neʼe ina tala. Pea neʼe maʼu leva e Enoke hona nonoʼaga ke malolo ai ʼi he kiʼi temi siʼi, kaʼe neʼe ina iloʼi ʼe mole fualoa anai ia tana nono pea hokosia ai mo tona mate. Lolotoga tana kiʼi malolo ʼaia, neʼe faikole ki tona ʼAtua. Pea neʼe ina logoʼi ai he tokalelei ʼe loloto ia ia. Neʼe sio ki he meʼa fakaofoofo neʼe ha age kia ia, pea neʼe hage pe kua nofo ʼi ai, pea neʼe ʼave mamaʼo ai ia ia.

Tou fakakaukauʼi age muʼa ia te meʼa ʼae neʼe ha age kia Enoke, ʼe ʼasi ai he malama ʼe kehekehe ʼaupito mo te malama ʼo tona temi. Kia ia, neʼe hage pe tona matalelei ko te ʼoloto ʼo Eteni, kaʼe neʼe mole leʼo leva ia e ni selupino ke mole ulufi e ni tagata. Neʼe kaugā malie te hahaʼi tagata mo fafine ʼe maʼuʼuli ai. Pea neʼe lelei tonatou malolo fakasino mo tupulaga pea mo malolohi. Neʼe natou maʼuʼuli ʼi te tokalelei. Neʼe mole maʼu ʼi ai ia te fehiʼa mo te ʼu fakataga mai te lotu ʼae neʼe iloʼi lelei e Enoke. Kaʼe kia ia, neʼe ina logoʼi tona fakalotofimalieʼi mo tona ʼofainaʼi e Sehova. Neʼe tui papau ia, ʼe nofo anai ʼi te koga meʼa ʼaia pea ʼe liliu anai ko hona nofoʼaga. ʼI tana ʼaʼasili logoʼi ia te tokalelei, neʼe moeʼi e Enoke ʼona mata pea mate ai.

Logo la tana kua mate, kaʼe ʼe kei manatuʼi tuʼumaʼu pe e Sehova ʼAtua. Ohage pe ko tona fakapapauʼi e Sesu ki muli mai, ʼe hoko mai anai te ʼaho ʼae ʼe logoʼi ai e natou fuli ʼae e manatuʼi e te ʼAtua te leʼo ʼo Kilisito, pea ʼe natou feulufi mai anai ki tuʼa mai te faitoka. Pea ʼe natou avahi ake anai ʼonatou mata ʼi he malama foʼou ʼe taulekaleka mo tokalelei.—Soane 5:28, 29.