Ko Sehova Ko Totatou Nofoʼaga

1, 2. Kotea te manatu ʼe maʼu e te ʼu kaugana ʼa te ʼAtua ʼo ʼuhiga mo te malama ʼaeni? Kotea te nofoʼaga ʼe natou maʼu?

ʼE KOTOU maʼuli fimalie koa ʼi te malama agakovi ʼaeni? Kapau ʼe mole koia, ʼe kotou hage ko ʼihi kaugana ʼa Sehova ʼo te temi muʼa. Talu mai fualoa, ko natou fuli ʼae neʼe ʼoʼofa kia Sehova neʼe natou hage ko ni matapule ʼi te malama ʼaeni. Ohage la, neʼe manatu feia te ʼu kaugana agatonu ʼa te ʼAtua ʼae neʼe feʼoloʼaki ʼi te fenua ʼo Kanaane. ʼE ui fenei ʼi te Tohi-Tapu: “Nee natou fakaha e natou matapule mo faifagona i te kele.”—Hep. 11:13.

² Ko te kau tisipulo fakanofo ʼa Kilisito ʼe natou kau anai ki te puleʼaga ʼe tuʼu ʼi selo. Koia ʼe natou hage ko “ni matapule mo ni tagata fagona” ʼi te malama ʼaeni. (Filp. 3:20; 1 Pet. 2:11) ʼO toe feia pe, ko te tahi ʼu ovi ʼa Kilisito “e mole natou kau i te malamanei” ohage pe ko Sesu. (Soa. 10:16; 17:16) Kaʼe logo la te faʼahi ʼaia, ʼe ʼi ai pe te nofoʼaga ʼo te hahaʼi ʼa te ʼAtua. ʼE mole ko he nofoʼaga ʼe tou sio mata ki ai, kaʼe ko te nofoʼaga ʼaia ʼe tahi ʼe feala ke tou maʼu ai ia te fimalie pea mo te ʼofa. Kotea ia te nofoʼaga ʼaia? Neʼe tohi fenei e Moisese: “Ê Sehova, neʼe ke liliu maʼa matou ko he nofoʼaga moʼoni ʼi te ʼu taʼiake ki te ʼu taʼiake.” (Pes. 90:1, MN) ʼE liliu ia Sehova ko he “nofoʼaga moʼoni” ki ʼana kaugana agatonu. Neʼe hoko moʼoni feafeaʼi ia te faʼahi ʼaia ʼi te temi muʼa? Kaʼe ʼe hoko feafeaʼi maʼa tana hahaʼi ʼi te temi nei? Pea ʼe liliu feafeaʼi anai ia ia ko totatou nofoʼaga pea mo totatou puipuiʼaga pe ʼe tahi ʼi te ka haʼu?

NEʼE LILIU IA SEHOVA KO HE “NOFOʼAGA MOʼONI” KI ʼANA KAUGANA ʼI TE TEMI MUʼA

3. Kotea ʼae neʼe fakatatau ki ai ia Sehova ʼi te vaega ʼo Pesalemo 90:1, MN, pea kotea tona tupuʼaga?

³ ʼI ʼihi temi ʼe fakatatau ʼi te Tohi-Tapu ia Sehova ki he meʼa ʼe tou lava sio ki ai ke faigafua ai tatatou mahino ki tona agaaga. Ohage la, ʼe fakatatau ʼi te vaega ʼo Pesalemo 90:1, MN, ia Sehova ki he “nofoʼaga.” Ka tou fakakaukau ki he nofoʼaga, ʼe tou manatu ki he koga meʼa ʼe tou maʼu ai ia te ʼofa, mo te tokalelei pea mo te puipui. He ko ʼe neʼe fakatatau ia Sehova ki he nofoʼaga? ʼE ui ʼi te Tohi-Tapu ko Sehova ʼe ʼofa. (1 Soa. 4:8) Pea ʼe toe ui ai ko Sehova ko te ʼAtua ʼo te tokalelei pea ʼe ina puipui ʼana kaugana. (Pes. 4:8) Tou vakaʼi pe neʼe liliu feafeaʼi ia Sehova ko he nofoʼaga ki ʼana kaugana agatonu ko Apalahamo, mo Isaake pea mo Sakopo.

4, 5. Neʼe tapuakiʼi pea mo puipui feafeaʼi e te ʼAtua ia Apalahamo?

⁴ Neʼe lagi feʼekeʼaki ia Apalahamo pe ko ʼe neʼe ui fenei age e Sehova: “Alu ia koe i tou fenua, mo tou puleaga, mo te fale o tau tamai, ki te fenua ae e au fakaha atu anai kia koe.” Kaʼe neʼe lagi fakalotomalohi kia ia tana logo ki te palalau ʼaeni neʼe fai age e Sehova: “E au fakatupu anai ia koe ia he puleaga lahi, pea e au tapuaki anai kia koe; e au fakaliliu anai tou higoa o lahi.” Pea neʼe toe ui fenei e Sehova: “E au tapuaki anai kia natou ae e tapuaki anai kia koe, pea e au fakamalaia anai natou ae e laukovi anai kia koe.”—Sen. 12:1-3.

⁵ Neʼe fakapapau e Sehova ʼe ina tapuakiʼi pea mo puipui anai ia Apalahamo pea mo tona hakoga, pea neʼe fakahoko moʼoni e Sehova ia te faʼahi ʼaia. (Sen. 26:1-6) Ohage la, neʼe mole ina tuku ia te hau ʼo Esipito ko Falaone pea mo Apimeleke te Hau ʼo Kela ke nā matehi ia Apalahamo pea mo maʼu ia tona ʼohoana ko Sala. Neʼe toe feia pe tana puipui ia Isaake pea mo Lepeka. (Sen. 12:14-20; 20:1-14; 26:6-11) ʼE ui ʼi te Tohi-Tapu neʼe mole fakagafua e Sehova “ke gaohi kovii natou e he tahi, pea nee ina tauteai ni hau o tupu ko natou: Aua naa koutou fafa ki aku filifiliia, aua naa koutou fai he mea kovi ki aku polofeta!”—Pes. 105:14, 15.

6. Kotea ʼae neʼe fakatotonu age e Isaake kia Sakopo? Kotea ʼae neʼe lagi hoha ki ai ia Sakopo?

⁶ Neʼe toe tokaga lelei ia Sehova ki te mokopuna ʼo Apalahamo ia Sakopo. ʼI te temi ʼae neʼe tonu ai ke ʼohoana ia Sakopo, neʼe ui fenei e tana tamai ko Isaake: “Aua naa ke ohoana mo he taahine o te kau taahine o Kanaane. Tuu la koe ki oluga, o alu ki Patane-Alame, ki te fale o Petuele, ko te tamai o tau fae, pea ke filifili i ai hou ohoana i te u ofafine o Lapane.” (Sen. 28:1, 2) Neʼe mulimuli lelei ia Sakopo ki te meʼa ʼae neʼe fakatotonu age e tana tamai. Neʼe mavae mai tona famili ʼi Kanaane pea neʼe lagi faifolau tokotahi ia kilometa ʼe lau ʼi teau ki Salani (Sen. 28:10) Neʼe lagi feʼekeʼaki fenei: “ ʼE au nofo fualoa anai koa ʼi te koga meʼa ʼaia? ʼE fiafia anai koa taku faʼetagata ʼi taku alu age? ʼE au maʼu anai koa he fafine ʼe ʼofa kia Sehova?” Neʼe ʼi ai te aluʼaga neʼe hoko ʼi Lusi, te kolo ʼe vaha mo Pelesepa ia kilometa ʼe teau, neʼe tupu ai te mole kei hoha ʼa Sakopo. Kotea te aluʼaga ʼaia?

7. Neʼe fakalotomalohiʼi feafeaʼi e te ʼAtua ia Sakopo?

⁷ Neʼe ha ia Sehova ʼi he moemisi kia Sakopo ʼi Lusi, ʼo ina ui fenei age: “E au nofo mo koe, e au taupau anai ia koe i te u kogamea fuli ae e ke alu anai ki ai, pea e au toe aumai anai ia koe ki te fenua aeni; koteuhi e mole au siaki noa anai ia koe, kae e au fakahoko anai te u mea fuli ae nee au fakapapau atu kia koe.” (Sen. 28:15) Neʼe lagi lotomalohi ia Sakopo ʼi tana logo ki te ʼu palalau manavaʼofa ʼaia. Neʼe lagi fakaʼamu ia Sakopo ke sio ki te hoko moʼoni ʼo te fakapapau ʼae neʼe fai age e Sehova. Kapau neʼe kotou mavae ʼi tokotou ʼapi ʼo olo ʼo faifakamafola ʼi he tahi age fenua, neʼe lagi kotou tuʼania ohage pe ko Sakopo. Kaʼe ʼe mahino ia, neʼe kotou tokagaʼi ia te tokoni ʼae neʼe foaki atu e Sehova ʼi te ʼu aluʼaga kehekehe.

8, 9. Neʼe liliu feafeaʼi ia Sehova ko he “nofoʼaga moʼoni” maʼa Sakopo? Kotea te ako ʼe tou taʼofi mai te ʼu faʼifaʼitaki ʼo Apalahamo, mo Isaake pea mo Sakopo ʼo ʼuhiga mo Sehova?

⁸ ʼI te tau atu ʼa Sakopo ki Salani, neʼe tali leleiʼi e tana faʼetagata ko Lapane pea ki muli age neʼe ina foaki age ki ai ia Lea pea mo Lasele ke ina ʼohoanaʼi. ʼAki te alu ʼo te temi, neʼe kamata gaohi koviʼi e Lapane ia Sakopo ʼo fetogi tuʼa hogofulu tona totogi. (Sen. 31:41, 42) Kaʼe neʼe katakiʼi pe e Sakopo ia te faʼahi ʼaia he neʼe falala ʼe tokaga ia Sehova kia ia. Neʼe tapuakiʼi leva e Sehova ia Sakopo. ʼI te temi ʼae neʼe fekauʼi ai e te ʼAtua ia Sakopo ke toe liliu ki Kanaane “nee lahi tana faga ovi, mo ana faga tao, mo ana fafine faifekau, mo ana tagata faifekau, mo ana faga kamelo, pea mo ana faga asino.” (Sen. 30:43) Neʼe loto fakafetaʼi ia Sakopo kia Sehova ʼo faikole fenei: “E mole au gali mo te u kalasia fuli, [“peʼe ko te loto manavaʼofa,” MN] ae nee ke tuku mai kia au, mo tou agatonu katoa kia au ko tau tagata faifekau; koteuhi nee au fakalaka i te Solotane aeni mo toku tokotoko, pea koeni kua au nofo mo ni nofoaga e lua i te aho nei.”—Sen. 32:10.

⁹ ʼE ha ʼi te ʼu faʼifaʼitaki ʼaia ia te moʼoni ʼo te ʼu palalau ʼaeni ʼa Moisese: “Ê Sehova, neʼe ke liliu maʼa matou ko he nofoʼaga moʼoni ʼi te ʼu taʼiake ki te ʼu taʼiake.” (Pes. 90:1, MN) ʼE mole fetogi ia Sehova. ʼE haga ʼofa, mo puipui pea mo tokaga ki ʼana kaugana agatonu. (Sakp. 1:17) Tou vakaʼi peʼe ina fakahoko feafeaʼi ia te faʼahi ʼaia.

KO SEHOVA ʼE KO TOTATOU “NOFOʼAGA MOʼONI” IA ʼAHO NEI

10. He ko ʼe ʼe feala ke tou tui papau ʼe haga liliu anai ia Sehova ko he “nofoʼaga moʼoni” ki ʼana kaugana?

¹⁰ Kotou fakakaukauʼi age muʼa te aluʼaga ʼaeni: ʼE kotou olo ki te telepinale ʼo fakamoʼoni ki he aluʼaga kovi neʼe fai e he tagata gutuloi mo agakovi pea mo faifakapo. Ko he tagata ʼe ʼatamai mo malohi pea ʼe kaugamalie ia natou ʼe ina puleʼi ʼi te malamanei katoa. Kotea ʼae ka kotou logoʼi anai moka kotou mavae atu mai te telepinale ʼi te afiafi ? ʼE kotou loto hoha anai koa? ʼE mahino ia. Koia ʼe ʼaoga anai ke puipui koutou. ʼE toe feia pe ki te ʼu kaugana ʼa Sehova ʼuhi ko tanatou fakamoʼoni ki te agakovi ʼa Satana, te fili ʼo Sehova. (Lau ia Apokalipisi 12:17.) Neʼe faigaʼi e Satana ke ina taʼofi ia te gaue ʼa te hahaʼi ʼa te ʼAtua. Neʼe ina lavaʼi koa te faʼahi ʼaia? Kailoa ia. ʼE toe hoko atu aipe te tuputupu ʼo tatatou gaue faifakamafola ʼi te kele katoa. He ko ʼe ʼe feala ke hoko ia te faʼahi ʼaia? Ko tona tupuʼaga pe ʼe tahi: Neʼe liliu ia Sehova ko hotatou “nofoʼaga moʼoni.” ʼE lahi age tana puipui mo tana tapuakiʼi tana hahaʼi ʼi te ʼu ʼaho fakamuli ʼaeni. (Lau ia Esaia 54:14, 17.) Kaʼe ʼe feala pe kia Sehova ke liliu ko hotatou “nofoʼaga moʼoni” mo kapau ʼe mole tou tuku ke fakahalaʼi tatou e Satana.

11. Kotea te tahi ako ʼe tou maʼu mai ia Apalahamo, mo Isaake pea mo Sakopo?

¹¹ ʼE ʼi ai te tahi ako ʼe tou maʼu mai te faʼifaʼitaki ʼo Apalahamo, mo Isaake pea mo Sakopo. Logo la tanatou maʼuʼuli ʼi te fenua ʼo Kanaane kaʼe neʼe mole natou fakatahi mo te hahaʼi ʼo te fenua pea neʼe natou fehihiʼa ki ʼanatou aga ʼae ʼe kovi. (Sen. 27:46) Neʼe mole ʼaoga ke fai age he tuʼuga lao ke natou mahino ki te meʼa ʼae ʼe lelei pea mo ʼae ʼe kovi. Neʼe kua natou iloʼi ia te meʼa ʼae ʼe leleiʼia e Sehova pea mo ʼae ʼe fehiʼa ki ai. Koia neʼe natou faiga malohi ai ke ʼaua naʼa natou kau ki te malamanei. ʼE ko he faʼifaʼitaki lelei ʼaia maʼa tatou. ʼE kotou faiga malohi koa ke kotou faʼifaʼitakiʼi te ʼu kaugana agatonu ʼaia ʼa Sehova? ʼE kotou fakaha koa takotou mole fia kau ki te malamanei ʼaki takotou filifili fakalelei ʼokotou kaumeʼa pea mo te ʼu fakafiafia? Meʼa fakaʼofaʼofa foki, ko ʼihi ʼi te kokelekasio Fakakilisitiano ʼe natou leleiʼia ʼihi aluʼaga ʼo te malama ʼa Satana. Kapau ʼe kotou maʼu ia te taʼi manatu ʼaia, kotou kumi tokoni kia Sehova ʼi te faikole. Kotou manatuʼi, ʼe puleʼi e Satana ia te malama ʼaeni pea ʼe manatu pe kia ia pea ʼe mole ʼofa kia koutou.—2 Ko. 4:4; Efe. 2:1, 2.

12. (1) ʼE tokoni feafeaʼi ia Sehova ki ʼana kaugana? (2) Kotea ʼe kotou logoʼi ʼo ʼuhiga mo te tokoni ʼae ʼe foaki mai e Sehova?

¹² Kapau ʼe mole tou loto ke fakahalaʼi tatou e Satana, ʼe tonu ke tou fakaʼaogaʼi ia te ʼu tokoni fuli ʼe foaki e Sehova ki ʼana kaugana. Ohage la, ʼe tokoni mai ia te ʼAtua ʼaki te ʼu fono Fakakilisitiano, mo te ako fakafamili pea mo te kau tagata ʼafeā ʼae ʼe natou fakalotomalohiʼi tatou pea mo tokoni mai ke tou katakiʼi ia te ʼu fihifihia ʼo te maʼuli. (Efe. 4:8-12) Neʼe tohi fenei e te tehina neʼe kau ki te Kolesi Pule ko George Gangas, ʼo ʼuhiga mo tana fakatahi mo te hahaʼi ʼa te ʼAtua: “Ka au nofo mo natou, ʼe mole au hoha ki he meʼa, heʼe natou hage ko hoku famili.” ʼE kotou manatu feia koa?

13. Kotea te ako maʼuhiga ʼe tou maʼu mai ia Hepeleo 11:13?

¹³ Koʼeni te tahi ako maʼuhiga ʼe tou maʼu mai ia Apalahamo, mo Isaake pea mo Sakopo: ʼE mole tonu ke tou matataku ʼuhi ko te mole tatau ʼo ʼatatou aga pea mo ʼae ʼa te hahaʼi. Ohage ko tona tuʼu ʼi te palakalafe 1, ko te ʼu tagata agatonu ʼaia “nee natou fakaha e natou matapule mo faifagona i te kele.” (Hep. 11:13) ʼE kotou fakaha koa ʼe mole kotou tatau mo te hahaʼi ʼo te malama? ʼI ʼihi temi ʼe lagi mata faigataʼa kia koutou. Kaʼe ʼe feala ke kotou fai ia te faʼahi ʼaia ʼaki te tokoni ʼa te ʼAtua pea mo ʼokotou tehina mo tuagaʼane. Kotou manatuʼi, ʼe mole kotou tokotahi. Ko natou fuli ʼae ʼe natou fia tauhi kia Sehova ʼe tonu ke natou tauʼi ia Satana pea mo tana malama. (Efe. 6:12) Pea ʼe feala ke tou malo ʼi te tau ʼaia mo kapau ʼe tou falala kia Sehova pea mo tuku ke liliu ia ia ko hotatou nofoʼaga.

14. Kotea ia te “kolo” ʼae neʼe atalitali ki ai ia Apalahamo?

¹⁴ ʼE tonu anai ke tou faʼifaʼitakiʼi ia Apalahamo pea mo manatuʼi tuʼumaʼu ia te fakapale. (2 Ko. 4:18) Neʼe tohi e te apositolo ko Paulo ko Apalahamo “nee talitali ia ki te kolo ae e ina mau ni fakatafito malohi, te kolo ae nee laga pea nee fau e te Atua totonu.” (Hep. 11:10) Ko te “kolo” ʼaia ʼe ko te Puleʼaga ʼo te ʼAtua. Neʼe atalitali ia Apalahamo ke hoko mai te “kolo” ʼaia. Kaʼe ʼe mole tou fakaatalitali tatou. Kua ʼafio nei te Puleʼaga ʼi te lagi. Pea ʼe fakaha lelei mai ʼi te ʼu lea fakapolofeta Fakatohi-tapu kua vave puleʼi nei e te Puleʼaga ia te kele katoa. ʼE kotou fakaha koa ʼi tokotou faʼahiga maʼuli ʼe kotou tui papau ki te Puleʼaga ʼaia? ʼE kotou fakamuʼamuʼa koa ia te Puleʼaga ʼi tokotou maʼuli ʼo kotou fakamamaʼo mai te malama ʼaeni?—Lau ia 2 Petelo 3:11, 12.

ʼE HAGA LILIU ANAI IA SEHOVA KO HOTATOU “NOFOʼAGA MOʼONI”

15. Kotea ka hoko anai kia natou ʼae ʼe falala ki te malama ʼaeni?

¹⁵ ʼE hoko atu anai ia te ʼaʼasili kovi ʼo te ʼu fihifihia ʼo te malamanei ʼo kaku ki te fakaʼosi. (Mat. 24:7, 8) Pea ʼe faigataʼa ʼaupito anai te maʼuli moka kamata te mamahi lahi. ʼE mafola anai te maumau mo te maveuveu ʼi te kele katoa pea ʼe matataku anai te hahaʼi. (Hap. 3:16, 17) Ko te tupuʼaga la ʼaia ʼo te ui ʼi te Tohi-Tapu ʼe natou fenonoʼi anai “i loto o te u ana, i lalo o te u maka o te u mouga.” (Apk. 6:15-17) ʼE mole feala anai ke puipui natou e he ʼana, peʼe ko he ʼu koloa, peʼe ko he kautahi fakapolitike.

16. ʼE maʼuhiga koa ia te kokelekasio kia tatou? Kotea tona tupuʼaga?

¹⁶ ʼE puipui anai e Sehova ia totatou maʼuli lolotoga te mamahi lahi. Ohage ko te polofeta ko Hapakuke, ʼe tou fiafia anai ʼi te ʼAtua ʼo te haofaki. (Hap. 3:18) ʼE puipui feafeaʼi anai e Sehova ia tatou lolotoga te temi faigataʼa ʼaia? ʼE tou iloʼi anai ʼi tona temi totonu. Kaʼe ʼe tou iloʼi papau ʼe haga fakatuʼutuʼu anai e Sehova ia tana hahaʼi pea mo foaki age he ʼu fakatotonu kia natou, ohage ko tona fai ki te kau Iselaele ʼi tanatou mavae mai Esipito. (Lau ia Ekesote 13:18; Apk. 7:9.) ʼE foaki feafeaʼi mai anai e Sehova ʼana fakatotonu kia tatou? ʼE lagi fakaʼaogaʼi anai e Sehova ia te ʼu kokelekasio. ʼE talanoa ia Esaia 26:20 ki te ʼu “kogafale” moʼo puipui ia te hahaʼi ʼa te ʼAtua. ʼE lagi fakaʼuhiga ki te ʼu kokelekasio ʼi te kele katoa. (Lau ia Esaia 26:20.) ʼE kotou fakamaʼuhigaʼi koa ia te ʼu fono ʼo te kokelekasio? ʼE kotou mulimuli tuʼumaʼu koa ki te ʼu fakatotonu ʼe fai atu e Sehova ʼi te ʼu kokelekasio?—Hep. 13:17.

17. ʼE liliu feafeaʼi ia Sehova ko he “nofoʼaga moʼoni” ki ʼana kaugana agatonu ʼae kua mamate?

¹⁷ ʼE toe liliu anai ia Sehova ko he “nofoʼaga moʼoni” maʼa te kau agatonu ʼae ʼe mamate anai ʼi muʼa ʼo te hoko ʼo te mamahi lahi. ʼO feafeaʼi? ʼAki tana toe fakatuʼu ake natou. Neʼe ui e Sehova kia Moisese ko ia ko te ʼAtua ʼo Apalahamo, mo Isaake pea mo Sakopo logo la te kua fualoa ʼo tanatou kua mamate. (Eke. 3:6) Neʼe toe fakaʼaogaʼi e Sesu ia te ʼu palalau ʼaia pea mo hoko atu fenei: “Ko te Atua e mole ko te Atua o te kau mate, kae ko te Atua o te kau mauli; koteuhi kia ia ko te u tagata fuli e mauli.” (Luka 20:38) ʼI te iloʼi papau ʼae e Sehova ʼe ina toe fakatuʼu ake anai ʼana kaugana agatonu, ʼe hage maʼa ia kua natou maʼuʼuli.—Ekl. 7:1.

18. ʼE liliu feafeaʼi anai ia Sehova ko he “nofoʼaga moʼoni” maʼa tana hahaʼi ʼi te malama foʼou?

¹⁸ ʼI te malama foʼou, ʼe liliu anai ia Sehova ko he “nofoʼaga moʼoni” maʼa tana hahaʼi ʼi he aluʼaga makehe. ʼE ui fenei ia Apokalipisi 21:3: “Koeni te tapenakulo o te Atua mo te u tagata! E nofo anai ia mo natou.” ʼE fakaʼaogaʼi anai e Sehova ia Sesu Kilisito moʼo puleʼi te kele katoa lolotoga taʼu ʼe afe. ʼI te ʼosi ʼo te ʼu taʼu ʼe afe ʼaia, kua fakahoko katoa e Sesu ia te finegalo ʼo tana Tamai ʼi te kele, pea ʼe ina liufaki anai ia te Puleʼaga kia Sehova. (1 Ko. 15:28) ʼOsi ʼaia pea pule anai ia Sehova totonu ki te malamanei haohaoa. ʼE ko he ka haʼu taulekaleka ʼe tou ʼamanaki maʼu anai. Tou faʼifaʼitakiʼi ia te ʼu kaugana agatonu ʼo te temi muʼa ʼaki tatatou tuku ʼae ke liliu ia Sehova ko hotatou “nofoʼaga moʼoni” ʼi te temi nei.