Fakafetaʼi ʼo ʼUhiga Mo Te ʼu Fakapapau ʼa Te ʼAtua ʼAki Te Maʼuliʼi ʼo Te Tui

“Neʼe ina [Sehova ʼAtua] foaki ʼaki he lotolelei te ʼu fakapapau maʼuhiga pea mo lahi ʼaupito.” — 2 Petelo 1:4.

1. Koteā ʼaē ʼe ina faka fealagia kia tatou ke tou maʼuliʼi te tui moʼoni?

ʼE LOTO ia Sehova ke tou haga tui ki tana ʼu fakapapau. Kae, “ko te tui ʼe mole ko he meʼa ʼe maʼu e te hahaʼi fuli”. (2 Tesalonika 3:2.) Ko te kalitate ʼaia ʼe ko he fua ʼo te laumālie maʼoniʼoni ʼo te ʼAtua, peʼe ko tona mālohi gāue (Kalate 5:22, 23). Koia, ko nātou pe ʼaē ʼe taki e te laumālie ʼo Sehova ʼe feala ke nātou maʼuliʼi te tui.

2. E feafeaʼi te faka ʼuhigaʼi e te ʼapositolo ko Paulo ia te “tui”?

² Kae koteā koa te tui? ʼE higoaʼi e te ʼapositolo ko Paulo te tui “ko te mahino lelei ki te ʼu moʼoni logope la ʼe mole tou sisio ki ai”. ʼAki te mālohi ʼo te mahino ki te ʼu moʼoni fakapulipuli ʼaia, ko te tui ʼe tatau mo te moʼoni. ʼE toe ʼui foki ko te tui “ ʼe ko he ʼamanaki moʼoni ki he ʼu meʼa ʼe tou falala ki ai”, koteʼuhi ko nātou ʼaē ʼe nātou maʼu te kalitate ʼaia ʼe nātou maʼu te fakamoʼoni ʼo te ʼu fakapapau fuli ʼa Sehova ʼAtua ʼe hoko moʼoni anai ia, pea kua hage pe ia kua fakahoko. — Hepeleo 11:1.

Ko te tui pea mo te ʼu fakapapau ʼa Sehova

3. Koteā te meʼa ʼe hoko anai ki te kau kilisitiano fakanofo mo kapau ʼe nātou maʼuliʼi te tui?

³ Ke leleiʼia tatou e Sehova, ʼe tonu ke tou haga tui ki tana ʼu fakapapau. Neʼe fakahā e te ʼapositolo ko Petelo ʼi tana lua tohi ʼaē mai te ʼAtua, neʼe lagi tohi ʼi te taʼu 64 ʼo totatou temi. Neʼe ina fakahā, kapau ko tona ʼu kaugā fagona kilisitiano fakanofo neʼe nātou maʼuliʼi te tui, ʼe nātou mamata anai ki te fakahoko ʼo “te ʼu fakapapau maʼuhiga pea mo ʼaupito ʼosi” ʼa te ʼAtua. Ko tona fua, ʼe nātou “kau ʼi te natula fakaʼatua” ʼi tonatou ʼuhiga kaugā hāko mo Sesu Kilisito ʼi te Puleʼaga ʼi Selo. ʼAki te tui pea mo te tokoni ʼa Sehova ʼAtua, kua nātou ʼāteaina mai te popūla ʼo te ʼu aga fakahehema ʼo te malamanei pea mo tana ʼu gāue (2 Petelo 1:2-4). Koutou fakakaukau age muʼa! Ko nātou ʼaē ʼe nātou maʼuliʼi te tui moʼoni, ʼe nātou maʼu te ʼāteaina ʼaia ia ʼaho nei ʼaē ʼe mole hona totogi.

4. Koteā te ʼu kalitate ʼe tonu ke tou hilifaki ki tatatou tui?

⁴ Ko te tui ki te ʼu fakapapau ʼa Sehova pea mo te loto fakafetaʼi ʼo ʼuhiga mo te ʼāteaina ʼaē ʼe foaki mai e te ʼAtua, ʼe tonu ke ina uga tatou ke tou liliu ko he ʼu kilisitiano faʼifaʼitaki. Neʼe ʼui e Petelo, ʼo fēnei: “ ʼAki mo takotou lagolago ʼaē ʼo fai he ʼu faiga mālohi, hilifaki ki takotou tui te vilitute, ki takotou vilitute te mālama, ki takotou mālama te loto lolomi, ki takotou loto lolomi te faʼa kātaki, ki takotou faʼa kātaki te aga faka lotu, pea ki takotou aga faka lotu te agalelei fakatautehina, ki takotou agalelei fakatautehina te ʼofa.” (2 Petelo 1:5-7). Koia ʼe foaki mai e Petelo te lisi ʼe lelei anai ke tou maʼu loto. Tou vakaʼi fakalelei age muʼa te ʼu kalitate ʼaia.

Ko te ʼu koga maʼuhiga ʼo te tui

5, 6. Koteā te vilitute, pea e feafeaʼi hatatou hilifaki ki tatatou tui?

⁵ Neʼe ʼui e Petelo ko te vilitute, ko te mālama, ko te loto lolomi, ko te aga faka lotu, ko te agalelei fakatautehina, pea mo te ʼofa ʼe tonu ke fefoakiʼaki pea mo hilifaki ki tatatou tui. ʼE tonu ke tou gāue kinakina moʼo maʼu te ʼu koga maʼuhiga ʼo te ʼu kalitate ʼaia ʼo tatatou tui. Ohage la, ko te vilitute ʼe mole ko he kalitate ʼe tou fakahā kehe mai te tui. Ko te lexicographe ko W. E. Vine ʼe ina fakahā ia 2 Petelo 1:5, “ko te vilitute ʼe foaki ohage ko he kalitate tāfito ʼo ʼuhiga mo te maʼuliʼi ʼo te tui”. Ko te ʼu kalitate takitahi ʼaē neʼe talanoa ki ai Petelo, ʼe tonu ko he tahi ʼaenā koga ʼo tatatou tui.

⁶ ʼUluaki, ʼe tonu ke tou hilifaki te vilitute ki tatatou tui. Ko te ʼuhiga ʼo te vilitute, ko te fai ʼo te meʼa ʼaē ʼe lelei kia mata ʼo te ʼAtua. ʼO ʼuhiga mo te kupu faka keleka ʼaē neʼe fakaliliu ʼaki “te vilitute”, ko ʼihi fakaliliu ʼo te Tohi-Tapu, ʼe nātou fakaʼaogaʼi te kupu ʼaē ko te “manavaʼofa”. (New International Version; The Jerusalem Bible; Today’s English Version.) Ko te vilitute ʼe ina uga tatou ke tou tekeʼi ia te fai ʼo te meʼa ʼaē ʼe kovi peʼe mo fakatupu mamahi ki ʼotatou kāiga (Pesalemo 97:10). ʼE ina toe ʼeke he gāue lototoʼa moʼo fai he meʼa lelei fakalaumālie, pea mo fakasino feiā aipe mo te ʼu meʼa ʼaē ʼe lelei ki te loto ʼa ʼihi.

7. He koʼe koa ʼe tonu ke tou hilifaki te mālama ki tatatou tui pea mo tatatou vilitute?

⁷ He koʼe koa ʼe uga tatou e Petelo ke tou hilifaki te mālama ki tatatou tui pea mo te vilitute? ʼI tatatou felāveʼi mo te ʼu faigataʼa foʼou ʼo ʼuhiga mo tatatou tui, ʼe ʼaoga kia tatou he mālama, mo kapau ʼe tonu ke tou mahino ki te meʼa ʼe lelei mai te meʼa ʼe kovi (Hepeleo 5:14). ʼAki te ako ʼo te Tohi-Tapu pea mo te fua ʼo te maʼuliʼi ʼo te Folafola ʼa te ʼAtua feiā aipe mo te fakaʼaogaʼi ʼo te poto ʼi te ʼaho fuli, ʼe tou hikihiki ai tatatou mālama. Ko tona fua, ʼe ina faka fealagia kia tatou ke tou taupau tatatou tui pea ke tou haga fai te meʼa ʼaē ʼe vilitute mokā tou tāu mo he faigataʼaʼia. — Tāʼaga Lea 2:6-8; Sake 1:5-8.

8. Koteā te loto lolomi, pea e feafeaʼi tona pikipikiga ki te faʼa kātaki?

⁸ Moʼo tokoni tatou ke tou tauʼi ʼotatou ʼu faigataʼaʼia ʼaki te tui, ʼe ʼaoga ke tou hilifaki ki tatatou mālama te loto lolomi. Ko te kupu faka keleka ʼo ʼuhiga mo te kupu ʼaē ko te “loto lolomi” ʼe ina fakahā tatatou faʼa taupau tatou. Ko te fua ʼaia ʼo te laumālie ʼo te ʼAtua ʼe ina tokoni tatou ke tou lolomi ʼatatou ʼu manatu, pea mo ʼatatou ʼu lea, pea mo ʼatatou ʼu aga. ʼAki tatatou maʼuliʼi mālohi te loto lolomi, ʼe tou fakapipiki ki ai te loto faʼa kātaki. Ko te kupu faka keleka ʼaē ki te “faʼa kātaki” ʼe faka ʼuhiga ko te lototoʼa mālohi, kae ʼe mole ko he mata mamahi ʼo he lotovaivai ʼo ʼuhiga mo te felāveʼi ʼaē mo he faigataʼaʼia ʼe mole lava ke hāo mai ai. Neʼe faʼa kātakiʼi e Sesu te pou fakamamahi ʼuhi ko te fiafia ʼaē neʼe kua tuku ʼi ʼona muʼa (Hepeleo 12:2). Ko te mālohi ʼaē ʼe foaki e te ʼAtua ʼo fakatahiʼi ʼaki mo te faʼa kātaki ʼe ina fakaloto mālohiʼi tatatou tui pea mo tokoni tatou ke tou fiafia ʼi te temi ʼo te fakataga, pea mo tekeʼi te fakahala, pea mo tekeʼi ia tatou naʼa tou fai he meʼa fakamalualoi ʼi te temi ʼo te fakataga. — Filipe 4:13.

9. a) Koteā te faka ʼuhiga ʼo te aga faka lotu? b) He koʼe ʼe tonu ke tou hilifaki tatatou agalelei fakatautehina ki tatatou aga faka lotu? c) E feafeaʼi hatatou hilifaki ʼo totatou ʼofa ki tatatou agalelei fakatautehina?

⁹ ʼO ʼuhiga mo tatatou faʼa kātaki, ʼe tonu ke tou fakapipiki kiai te aga faka lotu — ko te fakaʼapaʼapa, pea mo te atolasio, pea mo te kaugana kia Sehova. Ko tatatou tui ʼe tuputupu ʼi te temi ʼaē ʼe tou maʼuliʼi ai te aga faka lotu pea ʼe tou sio peʼe feafeaʼi te aga ʼa Sehova mo tana hahaʼi. Kae, moʼo fakahā te aga faka lotu, ʼe ʼaoga ke tou maʼu te agalelei fakatautehina. Pea, “ko ʼaē ʼe fehiʼa ki tona tēhina, ʼe ko he tagata gutuloi. Koia, ko ʼaē ʼe mole ʼofa ki tona tēhina, ʼaē kua sio ki ai, ʼe mole feala ke ʼofa ki te ʼAtua, ʼaē neʼe heʼeki sio ki ai.” (1 Soane 4:20). Ko totatou loto ʼe tonu ke ina uga tatou ke tou fakahā te agalelei moʼoni ki ʼihi kaugana ʼa Sehova pea ke tou kumi tonatou fīmālie ʼi te temi fuli pe (Sake 2:14-17). Kae koteā te tupuʼaga ʼaē ʼo te ʼui mai kia tatou ke tou hilifaki te ʼofa ki tatatou agalelei fakatautehina? ʼE mahino mai, ko Petelo neʼe ina fakahā ʼe tonu ke tou fakahā totatou ʼofa ki te tagata fuli, ʼo mole gata ʼaki ʼi ʼotatou ʼu tēhina. Ko te ʼofa ʼaia ʼe ʼiloga tāfito ʼaki te faka mafola ʼaē ʼo te logo lelei pea mo te tokoni fakalaumālie ʼaē ʼo te hahaʼi. — Mateo 24:14; 28:19, 20.

Ko te ʼu aga fakafeagai

10. a) E feafeaʼi anai tatatou aga mo kapau ʼe tou hilifaki ki tatatou tui ia te vilitute, te mālama, te faʼa kātaki, te aga faka lotu, te agalelei fakatautehina, pea mo te ʼofa ʼe hilifaki? b) Koteā te meʼa ʼe hoko mo kapau ko he tahi ʼe ʼui ʼe kilisitiano ʼe mole ina maʼu te ʼu kalitate ʼaia?

¹⁰ Kapau ʼe tou hilifaki te vilitute, te mālama, te loto lolomi, te faʼa kātaki, te aga faka lotu, te agalelei fakatautehina pea mo te ʼofa ki tatatou tui, ʼe tou manatu anai, pea mo palalau anai, pea mo gāue anai ʼi te ʼu ala ʼaē ʼe leleiʼia e te ʼAtua, kapau ko he tahi ʼe ʼui ko ia ko te kilisitiano kae ʼe mole ina fakahā te ʼu kalitate ʼaia, ʼe liliu ia ʼo kivi fakalaumālie. ʼE ina māpunuʼi tona ʼu mata ki te mālama mai te ʼAtua pea ʼe galo ia ia neʼe fakamaʼa ia mai tana ʼu agahala ʼāfea (2 Petelo 1:8-10; 2:20-22). ʼAua naʼa tou tō ʼi he lakaga ki te faʼahi ʼaia pea mo puli ai leva ia tatou te tui ʼaē ki te ʼu fakapapau ʼa te ʼAtua.

11. Koteā te meʼa ʼe feala ke tou ʼamanaki tonu ʼo ʼuhiga mo te kau kilisitiano fakanofo?

¹¹ Ko te kau kilisitiano fakanofo agatonu ʼe nātou tui ki te ʼu fakapapau ʼa Sehova pea ʼe nātou gāue totonu moʼo fai ke hoko moʼoni tana pāui pea mo tana fili ʼaē ʼo ʼuhiga mo nātou. Logope la te ʼu maka fakatupu tūkia ʼaē ʼi ʼonatou ʼu ala, ʼe feala pe ke tou falala ʼe nātou fakahā aipe te ʼu kalitate faka lotu. ʼO ʼuhiga mo te kau kilisitiano agatonu fakanofo ‘ ʼe tuku fakalahi te hūʼaga ki te puleʼaga heʼegata ʼo Sesu Kilisito’ ʼaki tonatou fakatuʼuake ki te maʼuli fakalaumālie ʼi selo. — 2 Petelo 1:11.

12. E feafeaʼi tatatou mahino ki te ʼu palalau ʼaē ia 2 Petelo 1:12-15?

¹² Neʼe ʼiloʼi e Petelo kua vave mate pe, pea neʼe fakatalitali ke ina maʼu te toe fakatuʼuake ʼo ʼuhiga mo te maʼuli ʼaē ki selo. Kae ʼi te lolotoga ʼo tona maʼuli katoa ʼi “te tapenakulo ʼaia” — ko tona sinoʼi tagata — neʼe ina haga aipe ʼo fakaloto mālohiʼi te tui ʼo tona ʼu kaugā fagona tui pea mo ʼeke nātou ke nātou manatuʼi te ʼu meʼa ʼaē ʼe ʼaoga kia nātou moʼo maʼu ʼo te ʼofa fakaʼatua. Hili leva tona mate, ko te ʼu tēhina pea mo te ʼu tuagaʼane fakalaumālie ʼo Petelo neʼe feala ke fakaloto mālohiʼi tanatou tui ʼaki tanatou manatuʼi tana ʼu palalau. — 2 Petelo 1:12-15.

Ko te tui ki te Folafola faka polofeta

13. Neʼe foaki feafeaʼi e te ʼAtua te fakamoʼoni ʼaē moʼo fakamālohiʼi te tui ki te moʼoni ʼaē ʼo te haʼu ʼa Kilisito?

¹³ Ko te ʼAtua totonu neʼe ina tuku te fakamoʼoni ʼaē neʼe ina fakamālohiʼi te tui ki te moʼoni ʼaē ʼo te haʼu ʼa Sesu “mo te mālohi pea mo te kolōlia lahi”. (Mateo 24:30; 2 Petelo 1:16-18.) ʼI te mole maʼu ʼo he fakamoʼoni, ko te kau pelepitelo pagani neʼe nātou fai te ʼu fakamatala hāla ʼo ʼuhiga mo ʼonatou ʼatua, kae ko Petelo, Sake, pea mo Soane neʼe nātou sio mata ki te kolōlia ʼo Kilisito ʼi tana fetogi faka milakulo (Mateo 17:1-5). Neʼe nātou sisio ki tona kolōlia pea neʼe nātou logo ki te leʼo totonu ʼo te ʼAtua ʼe fakamoʼoni ko Sesu ko tona ʼAlo ʼofaina. Ko te fakahā ʼaia pea mo te hā fakaofoofo ʼaia neʼe faka fealagia kia Kilisito ke ina maʼu te fakaʼapaʼapa pea mo te kolōlia. ʼUhi ko te fakahā fakaʼatua ʼaia, neʼe higoaʼi e Petelo te moʼuga ʼaia, lagi ko te tumutumu ʼo Helemone, “ko te moʼuga tapu”. — Vakaʼi ʼi te tohi ʼo Ekesote 3:4, 5.

14. ʼE tonu ke malave feafeaʼi ki tatatou tui ia te fetogi faka milakulo ʼa Sesu?

¹⁴ ʼE tonu koa ke malave feafeaʼi ki tatatou tui te fetogi faka milakulo ʼaē ʼa Sesu? Neʼe ʼui e Petelo, ʼo fēnei: “Koia ʼe tou maʼu te folafola faka polofeta kua ʼāsili moʼoni, ʼaē ʼe tonu ke koutou fakatokaga lelei kiai ohage ko he hila ʼe gigila ʼi te koga meʼa fakapōʼuli, ʼo aʼu ki te temi ʼe hā ai te ʼaho pea mo hopo te fetuʼu ʼaho ʼi ʼokotou ʼu loto.” (2 Petelo 1:19). ʼE ʼiloga ia, “ko te folafola faka polofeta” ʼe mole gata ʼaki pe te ʼu lea faka polofeta ʼo te ʼu tohi faka hepeleo ʼo ʼuhiga mo te Mesia kae ʼe toe kau pe foki kiai mo te talanoa ʼa Sesu ʼo ʼuhiga mo tana haʼu anai “mo te mālohi pea mo te kolōlia lahi”. Neʼe feafeaʼi te “ ʼāsili moʼoni” ʼo te folafola ʼaki te fetogi faka milakulo ʼaē ʼa Sesu? Ko te meʼa ʼaia ʼe ina fakamoʼoni te folafola faka polofeta ʼo ʼuhiga mo te haʼu faka kolōlia pea mo mālohi ʼa Kilisito ʼi te Puleʼaga.

15. Koteā ʼaē ʼe ʼaoga moʼo tokagaʼi lelei te lea faka polofeta?

¹⁵ Moʼo fakamālohiʼi tatatou tui, ʼe tonu ke tou tokaga lelei ki te folafola faka polofeta. Ko te ʼuhiga ʼo te ako ʼo te folafola ʼaia, ke talanoa kiai ʼi te ʼu fono faka kilisitiano, pea mo maʼuliʼi te ʼu tokoni (Sake 1:22-27). ʼE tonu ke tou tuku ke liliu “ko he hila ʼe gigila ʼi te koga meʼa fakapōʼuli”, ke ina fakamālamaʼi ʼotatou ʼu loto (Efesi 1:18). ʼO feala ai leva ke ina taki tatou ʼo aʼu ki te “fetuʼu ʼaho” peʼe “ko te fetuʼu gigila ʼo te uhu”, ko Sesu Kilisito, ʼe ina fakahā totonu pe ia ia ʼi te kolōlia (Fakahā 22:16). Ko te fakahā ʼaia ʼe faka ʼuhiga anai kia nātou ʼaē ʼe mole tui ko te fakaʼauha pea kia nātou ʼaē ʼe nātou maʼuliʼi te tui ko te ʼu tapuakina. — 2 Tesalonika 1:6-10.

16. He koʼe koa ʼe feala ke tou tui ko te ʼu fakapapau fuli faka polofeta ʼi te Folafola ʼa te ʼAtua ʼe fakahoko anai?

¹⁶ Ko te ʼu polofeta ʼa te ʼAtua neʼe mole gata ʼaki pe ko he ʼu tagata fakasiosio mamaʼo ʼo fai he ʼu fakakikite poto, koia ʼaē neʼe ʼui ai e Petelo ʼo fēnei: “ ʼE mole he lea faka polofeta ʼo te Tohi-Tapu neʼe haʼu mai he faʼahiga fakamatala fakatagata. ʼIo, ko te lea faka polofeta neʼe mole fai ʼaki te finegalo ʼo te tagata, kae ʼaki te laumālie maʼoniʼoni ʼaē neʼe lea ai ni tagata ʼaki te fakatotonu ʼa te ʼAtua.” (2 Petelo 1:20, 21). Ohage la, neʼe ʼui e Tavite, ʼo fēnei: “Ko te laumālie ʼo Sehova neʼe palalau ia ʼau, pea ko tana folafola neʼe ʼi toku ʼalelo.” (2 Samuele 23:1, 2). Pea neʼe tohi e Paulo, ʼo fēnei: “Ko te ʼu tohi fuli ʼo te Tohi-Tapu neʼe haʼu mai te ʼAtua.” (2 Timoteo 3:16). ʼUhi ʼaē ko te ʼu polofeta ʼa te ʼAtua neʼe tuku age kia nātou tona laumālie maʼoniʼoni, ʼe feala ke tou tui ki te ʼu fakapapau fuli ʼaē ʼi tana Folafola ʼe hoko moʼoni anai ia.

Neʼe nātou tui ki te ʼu fakapapau ʼa te ʼAtua

17. Neʼe koteā te fakapapau ʼaē neʼe fakatafito ki ai te tui ʼa Apele?

¹⁷ Ko te tui ʼaē ʼa te ‘toe kau fakamoʼoni lahi’ ʼo tana kau fakamoʼoni ʼi muʼa ʼo te temi faka kilisitiano neʼe fakatafito ki te ʼu fakapapau ʼa Sehova (Hepeleo 11:1–12:1). Ohage la, ko Apele neʼe tui ki te fakapapau ʼa te ʼAtua ʼo ʼuhiga mo te “hāko” ka ina fakavolu anai te ulu ʼo te “gata”. Neʼe ʼi ai mo te moʼoni ʼo te fakahoko ʼo te tautea ʼa te ʼAtua ki te ʼu mātuʼa ʼa Apele. ʼI tuʼa atu ʼo Eteni, ko Atama pea mo tona famili neʼe nātou kai ki te pane ʼo te kakava ʼo ʼonatou ʼu fofoga ʼuhi ko te kele malaʼia neʼe ina fakatupu te ʼu tala pea mo te ʼu ʼakau talatala. Lagi neʼe toe fakatokagaʼi e Apele te holi mamahi ʼaē ʼa Eva ki tona ʼohoana pea mo sio ki te pule ʼa Atama kia ia. ʼE mahino ia neʼe talanoa ia Eva ʼo ʼuhiga mo te ʼu mamahi ʼo tana faifanau. Pea ko te hūʼaga ʼo te ʼōloto ʼo Eteni neʼe taupau e te kau selupini pea mo te mataʼi hele kakaha ʼo te heletā (Senesi 3:14-19, 24). Ko te ʼu meʼa fuli ʼaia neʼe nātou faʼufaʼu te “mahino lelei” moʼo fakaloto mālohiʼi Apele ʼo ʼuhiga mo te hāofaki ʼe haʼu anai ʼaki te Hāko ʼo te fakapapau. ʼAki te tui, neʼe momoli e Apele te sakilifisio ʼo fakahā ʼaki tona maʼuhiga age ʼi ʼaē ʼa Kaino. — Hepeleo 11:1, 4.

18, 19. Koteā te ʼu faʼahi ʼaē neʼe haga tui aipe ia Apalahamo pea mo Sala?

¹⁸ Ko te kau pateliaka ko Apalahamo, pea mo Isaake, pea mo Sakopo neʼe nātou toe tui mo nātou ki te ʼu fakapapau ʼa Sehova. Neʼe haga tui ia Apalahamo ki te fakapapau ʼa te ʼAtua ʼo ʼuhiga mo te ʼu famili fuli ʼo te kele ʼe tapuakiʼi anai nātou ʼaki ia ia pea ʼe foaki anai ki tona hāko te fenua (Senesi 12:1-9; 15:18-21). Ko tona foha ko Isaake pea mo tona mokopuna ko Sakopo neʼe nātou “kau ki te fakapapau pe ʼaia”. ʼAki te tui ko Apalahamo “neʼe nofo ohage ko he tagata kehe ʼi te fenua ʼo te fakapapau” pea neʼe talitali ia “ki te kolo ʼaē ʼe ʼi ai tona ʼu fakatafito moʼoni”, ko te Puleʼaga ʼo te ʼAtua ʼi selo ʼaē ko he Puleʼaga ka ina fakatuʼuake anai ia ia ki te maʼuli ʼi te kele (Hepeleo 11:8-10). ʼE ia koutou koa he tui feiā?

¹⁹ Ko te ʼohoana ʼo Apalahamo, ko Sala, neʼe taʼu 90 pea neʼe kua finematuʼa fau ia ʼo ʼuhiga mo hana toe maʼu ʼo hana fānau, kae neʼe haga tui ia ki te fakapapau ʼa te ʼAtua pea neʼe tuku age kia ia te mālohi “ke ina fānauʼi te hāko” pea neʼe ina fānauʼi ia Isaake. Koia, ʼi te taʼu 100 ʼo Apalahamo neʼe “kua hage pe ia kua mate” ʼo ʼuhiga mo te maʼu fānau, neʼe “tupu mai ia te ia te ʼu fānau ohage ko te ʼu fetuʼu ʼo te lagi ʼuhi ko tonatou tokolahi”. — Hepeleo 11:11, 12; Senesi 17:15-17; 18:11; 21:1-7.

20. Logope la te mole sisio ʼa te ʼu pateliaka ki te fakahoko katoa ʼo te ʼu fakapapau ʼa te ʼAtua ʼo ʼuhiga mo nātou, koteā te meʼa ʼaē neʼe nātou fai?

²⁰ Ko te kau pateliaka agatonu neʼe nātou mamate ʼe mole heʼeki nātou sisio ki te fakahoko katoa ʼo te ʼu fakapapau ʼa te ʼAtua kia nātou. Kae, “neʼe nātou sio mamaʼo ki ai [ko te ʼu fakapapau] pea neʼe nātou tali pea neʼe nātou tala fakahāhā ko nātou ko te kau matāpule pea ko te kau hahaʼi maʼuli faka temi ʼi te fenua.” Ko te ʼu taʼiake neʼe nātou maʼuʼuli ʼi muʼa ʼaē ʼo te maʼu e te hōloga ʼo Apalahamo ia te Kele ʼo te fakapapau. Kae, ʼi tonatou maʼuli ko te ʼu pateliaka ʼaē neʼe manavasiʼi ki te ʼAtua neʼe nātou haga tui aipe ki te ʼu fakapapau ʼa Sehova. ʼUhi ʼi te mole puli ʼi he lakaga tanatou tui, ʼe kua vave pe anai tonatou fakatuʼuake ke nātou maʼuʼuli ʼi he koga meʼa kelekele ʼo te “kolo” ʼaē neʼe kua teuteuʼi e te ʼAtua maʼa nātou, ko te Puleʼaga ʼo te Mesia (Hepeleo 11:13-16). ʼO mulimuli ki tona fai ʼaia, ko te tui ʼe feala ke ina taupau tatatou agatonu ʼaē kia Sehova logope la mo kapau ʼe mole tou sio ʼi te temi nei ki te fakahoko katoa ʼo tana ʼu fakapapau taulekaleka fuli. Ko tatatou tui ʼe ina toe uga anai tatou ke tou fakalogo ki te ʼAtua, ohage pe ko tona fai e Apalahamo. Pea ohage pe ko tana tuku te tofiʼa fakalaumālie ki tona hōloga, ʼo toe feala aipe ke tou tokoni ʼatatou fānau ke nātou haga tui ki te ʼu fakapapau maʼuhiga ʼa Sehova. — Hepeleo 11:17-21.

Ko te tui ʼe maʼuhiga ki te kau kilisitiano

21. Ke tali tatou e te ʼAtua ia ʼaho nei, koteā te meʼa ʼe tonu ke tou fakaʼaogaʼi ʼo ʼuhiga mo te maʼuliʼi ʼo tatatou tui?

²¹ ʼIo, e lahi age te tui ʼi he maʼu ʼo he falala ki te fakahoko ʼo te ʼu fakapapau ʼa Sehova. ʼI te hisitolia katoa ʼo te tagata, neʼe maʼuhiga te maʼuliʼi ʼo te tui ʼaē ki te ʼAtua ʼi te ʼu faʼahi kehekehe mo kapau ʼe tou fia maʼu tona ʼofa. Neʼe fakahā e Paulo “ka ʼe mole ʼi ai te tui ʼe molemo feala ke kita lelei ki te [ʼAtua], heʼe ko ʼaē ʼe fakaōvi ki te ʼAtua ʼe tonu ke tui ko ia pea ʼe liliu ia ko te tagata sakilifisio faitotogi ʼo nātou ʼaē ʼe nātou kumi fakamalotoloto ia ia”. (Hepeleo 11:6.) Ke tali tatou e Sehova ia ʼaho nei, ʼe tonu ke haga tui kia Sesu Kilisito pea mo te sakilifisio faitotogi ʼaē neʼe foaki e te ʼAtua ʼaki ia ia (Loma 5:8; Kalate 2:15, 16). Ohage pe ko te ʼui totonu e Sesu: “Ko te ʼAtua ʼi tona ʼofa lahi ʼaē ki te malamanei [te tagata fuli pe] neʼe ina foaki ai tona ʼAlo ʼulu tokotahi, koteʼuhi ko ʼaē ʼe haga tui kia te ia ke ʼaua naʼa fakaʼauha, kae ke ina maʼu te maʼuli heʼegata. Ko ʼaē ʼe tui ki te ʼAlo ʼe ina maʼu te maʼuli heʼegata; ko ʼaē ʼe talagataʼa ki te ʼAlo ʼe mole sio anai ia ki te maʼuli, kae ko te hāūhāū ʼo te ʼAtua ʼe nofo kia te ia.” — Soane 3:16, 36.

22. Ko te fakapapau fea ʼaē ka fakahoko anai e te Puleʼaga ʼo te Mesia?

²² ʼE maʼuhiga te tuʼulaga ʼo Sesu ʼi te fakahoko ʼo te ʼu fakapapau ʼa te ʼAtua ʼo ʼuhiga mo te Puleʼaga ʼaē ʼe faikole kiai te kau kilisitiano (Isaia 9:6, 7; Taniela 7:13, 14; Mateo 6:9, 10). Ohage ko tona fakahā e Petelo, ko te fetogi faka milakulo ʼa Sesu neʼe ko he fakamoʼoni ia ʼo te lea faka polofeta ʼo ʼuhiga mo te haʼu mālohi pea mo faka kolōlia ʼo Sesu ʼi te Puleʼaga. Ko te Puleʼaga ʼo te Mesia ʼe ina foaki anai te fakahoko ʼo te tahi fakapapau ʼa te ʼAtua, koia ʼaē neʼe tohi fēnei ai e Petelo: “Kae, ohage ko tana fakapapau mai, ʼe tou talitali ki te ʼu lagi foʼou pea mo te kele foʼou ʼaia ʼe tonu ke nofo ai te faitotonu.” (2 Petelo 3:13). Neʼe hoko te fakakikite feiā ʼi te temi ʼaē neʼe toe liliu ai te kau Sutea ʼaunofo ʼo Papiloni ki tonatou fenua ʼi te taʼu 537 ʼi muʼa ʼo totatou temi ʼi te puleʼaga ʼaē neʼe ko Solopapele ko te kovana pea ko Sosue ko te pelepitelo lahi (Isaia 65:17). Kae neʼe talanoa Petelo ki te temi ʼaē ka haʼu ai “te ʼu lagi foʼou” — Ko te Puleʼaga ʼo te Mesia ʼi Selo — ʼo pule anai ki te “kele foʼou”, ko te sosiete fakatagata faitotonu ʼaē ka maʼuli anai ʼi te kele ʼaia. — Vakaʼi ʼi te tohi ʼo Pesalemo 96:1.

23. Koteā te ʼu fehuʼi ʼo ʼuhiga mo te vilitute ʼe tou vakaʼi anai?

²³ ʼI totatou ʼuhiga kaugana agatonu kia Sehova feiā aipe ki te kau tisipulo ʼo tona ʼAlo ʼofaina ko Sesu Kilisito, ʼe tou nonofo hoha ʼo ʼuhiga mo te mālama foʼou neʼe fakapapau e te ʼAtua. ʼE tou ʼiloʼi kua ōvi mai, pea ʼe tou tui ko te ʼu fakapapau maʼuhiga fuli ʼa Sehova ʼe hoko moʼoni anai. Ke tou haʼele ʼi he faʼahiga ʼaluʼaga ʼe tali e te ʼAtua, ʼe tonu ke tou fakamālohiʼi tatatou tui ʼo fakapipiki ki ai te vilitute, te mālama, te loto lolomi, te faʼa kātaki, te aga faka lotu, te agalelei fakatautehina, te ʼofaa. ʼO ʼuhiga mo te faʼahi ʼaia, ʼe feala ke tou fai te fehuʼi ʼaenī, e feafeaʼi koa hatatou fakahā ʼo te vilitute? Pea e feafeaʼi anai ki tatatou vilitute hana fua lelei kia tatou pea mo ʼihi, tāfito la ʼotatou ʼu kaugā fagona kilisitiano, ʼaē neʼe nātou tali te ʼu fakapapau ʼa te ʼAtua ʼaki tanatou maʼuliʼi te tui?

[Nota ʼi te lalo pasina]

Koteā takotou ʼu tali?

◻ E feafeaʼi koa he faka ʼuhiga ʼo te “tui”?

◻ ʼI te 2 Petelo 1:5-7, koteā te ʼu kalitate ʼaē ʼe hilifaki ki te tui?

◻ ʼE tonu ke malave feafeaʼi ki tatatou tui te fetogi faka milakulo ʼaē ʼa Sesu?

◻ Koteā te ʼu faʼifaʼitaki ʼo ʼuhiga mo te tui neʼe tuku mai e Apele, Apalahamo, Sala, pea mo ʼihi ʼo te ʼu temi muʼa?

[Paki ʼo te pasina 15]

ʼE koutou ʼiloʼi koa peʼe feafeaʼi te malave ʼo te fetogi faka milakulo ʼa Sesu ki te tui ʼa he tahi?