ʼE Tonu Ke Tou Falala Kia Sehova
“Ko Sehova totonu ʼe liliu anai ko tou falalaʼaga.”—Tāʼaga Lea 3:26.
1. Logope la ʼe tokolahi te hahaʼi ʼaē ʼe nātou ʼui ʼe nātou falala ki te ʼAtua, kae koteā tanatou faʼahiga aga ʼe hā ai ʼe mole nātou falala tuʼumaʼu kia te ia?
ʼI TE falā Amelika ʼe tohi ai te kupuʼi palalau ʼaenī “ ʼE Mātou Falala Ki Te ʼAtua.” Kae ko nātou fuli ʼaē ʼe nātou fakaʼaogaʼi te falā ʼo te fenua ʼaia peʼe ko ʼihi ʼatu fenua, ʼe nātou falala moʼoni koa ki te ʼAtua? Peʼe lahi age koa tanatou falala ki te paʼaga? Ko te falala ki te paʼaga ʼo te fenua ʼaia peʼe ʼi te tahi fenua, ʼe mole feala ke felogoi tahi mo te falala ʼaē ki te ʼAtua māfimāfi pea mo ʼofa, ʼaē ʼe mole ina fakaʼaogaʼi kovi ʼi he temi tona mālohi pea ʼe mole mānumānu. ʼI tona fakahagatonu, ʼe ina fakahā lelei ʼe ina tauteaʼi te loto mānumānu.—Efesi 5:5.
2. Koteā te manatu ʼa te kau Kilisitiano moʼoni ʼo ʼuhiga mo te mālohi ʼo te ʼu koloā?
2 ʼE falala te kau Kilisitiano moʼoni ki te ʼAtua, kae ʼe mole nātou falala ki te ʼu koloā pea mo tona “mālohi fakahala.” (Mateo 13:22) ʼE nātou ʼiloʼi ko te paʼaga ʼe mole ina foaki he fiafia ʼe tologa peʼe ina hāofaki tonatou maʼuli. ʼE mole feiā ʼo ʼuhiga mo te mālohi ʼo te ʼAtua Māfimāfi. (Sofonia 1:18) Koia ʼe fakapotopoto te tokoni ʼaenī: “Ke ʼāteaina takotou faʼahiga maʼuli mai te manako ki te paʼaga, kae koutou fakafeauga ki te ʼu meʼa ʼaē ʼe koutou maʼu ʼi te temi ʼaenī. He neʼe ina ʼui fēnei: ‘Kailoa ʼe mole ʼau tukunoa anai koe, kailoa ʼe mole ʼau līaki anai koe’ ”!—Hepeleo 13:5.
3. ʼI te ʼu vaega ʼuluaki pea mo muli ʼaē ʼo Teutalonome 31:6, ʼe tou mahino feafeaʼi ki te fakaʼaogaʼi ʼo te vaega ʼaia e Paulo?
3 ʼI tana tohi te ʼu palalau ʼaē ʼe tuʼu ʼi ʼoluga ki te kau Kilisitiano Hepeleo, neʼe fakaʼaogaʼi e te ʼapositolo ko Paulo te ʼu palalau ʼaenī neʼe fai e Moisese ki te kau Iselaelite ʼi muʼa ʼo tona mate: “Koutou lototoʼa pea mo mālolohi. ʼAua naʼa koutou mataku peʼe koutou tetetete ʼi ʼonatou muʼa, he ko Sehova tou ʼAtua ʼaē ʼe haʼele ʼi ʼou muʼa. ʼE mole ina tukunoa anai koe pea ʼe mole ina līaki katoa anai koe.” (Teutalonome 31:6) Neʼe fakaloto mālohiʼi nātou e Moisese ʼi te ʼu vaega ʼuluaki pea mo muli ke nātou falala kia Sehova, ʼo mole gata ʼaki pe tanatou falala ki te fealagia ʼaē ke ina foaki age kia nātou te ʼu meʼa fakasino. ʼO feafeaʼi?
4. Neʼe fakahā feafeaʼi e te ʼAtua ʼe feala ke falala te kau Iselaelite kia te ia?
4 Lolotoga te ʼu taʼu e 40 ʼaē neʼe feʼoloʼaki ai te kau Iselaelite ʼi te toafa, neʼe agatonu te ʼAtua ʼo ina foaki kia nātou te ʼu meʼa ʼaē neʼe ʼaoga ki tonatou maʼuli. (Teutalonome 2:7; 29:5) Tahi ʼaē meʼa, neʼe ina takitaki nātou. Ohage la neʼe ina takitaki nātou ʼi te ʼaho ʼaki te nunuʼa pea ʼi te pōʼuli ʼaki te afi, pea neʼe ina taki ai te kau Iselaelite ki “he fenua ʼe tafe ai te huʼa pipi pea mo te meli.” (Ekesote 3:8; 40:36-38) ʼI te temi ʼaē neʼe tonu ke nātou hū moʼoni ai ki te Kele ʼo te Fakapapau, neʼe filifili e Sehova ia Sosue ke ina fetogi ia Moisese. Neʼe feala ke fakafeagai te hahaʼi ʼo te fenua ʼaia kia nātou. Kae neʼe takitaki e Sehova tana hahaʼi lolotoga ni ʼu taʼu, koia neʼe mole tonu ai ke nātou matataku. Neʼe ʼiloʼi lelei e te kau Iselaelite ko Sehova ʼe ko te ʼAtua ʼaē neʼe feala ke nātou falala ki ai!
5. ʼE tatau feafeaʼi te ʼaluʼaga ʼo te kau Kilisitiano ʼo te temi ʼaenī pea mo te ʼaluʼaga ʼo te kau Iselaelite ʼi muʼa ʼo tanatou hū ki te Kele ʼo te Fakapapau?
5 ʼI te temi nei, ʼe haʼele te kau Kilisitiano ʼi te toafa ʼo te mālama agakovi ʼaenī, ʼo nātou haʼele ki te mālama foʼou ʼa te ʼAtua. Ko ʼihi ia nātou kua fakalaka ia taʼu e 40 tanatou haʼele ʼaia. ʼI te temi nei kua nātou ʼi te hūʼaga ʼo te mālama foʼou ʼaē neʼe fakapapauʼi mai e te ʼAtua. Kae ʼe ʼi ai mo te ʼu fili ʼi te ala ʼaia, ʼe nātou faiga ke nātou tāʼofi te hahaʼi fuli ke ʼaua naʼa nātou hū ki te koga meʼa ʼaē ka liliu anai ohage ko he Kele ʼo te Fakapapau, kae ʼe matalelei age anai ʼi te kele ʼāfea ʼaia neʼe tafe ai te huʼa pipi pea mo te meli. Koia, ʼe lelei ki te kau Kilisitiano ʼo te temi ʼaenī te toe fakamanatuʼi e Paulo te ʼu palalau ʼaenī ʼa Moisese: “ ʼE mole ʼau tukunoa anai koe pea ʼe mole ʼau līaki anai koe”! ʼE fakapale moʼoni anai ia nātou fuli ʼaē ʼe nonofo mālohi pea mo lototoʼa, mo fonu ʼi te tui, pea mo nātou falala kia Sehova.
Neʼe Fakatafito Tana Falala Ki Tana ʼIloʼi Te ʼAtua Pea Mo Tana Fakakaumeʼa Mo Ia
6, 7. (a) Neʼe ʼahiʼahiʼi feafeaʼi te falala ʼa Apalahamo kia Sehova? (b) Koteā ʼaē neʼe lagi manatu kiai ia Apalahamo ʼi tana lolotoga ʼalu ki te potu ʼaē neʼe tonu ke ina sakilifisioʼi ai ia Isaake?
6 ʼI te tahi lakaga, neʼe fakatotonu kia Apalahamo, te kui ʼo te kau Iselaelite ke ina sakilifisioʼi faka holokoseta tona foha ko Isaake. (Senesi 22:2) He koʼe neʼe mālohi te falala ʼo te tāmai ʼofa ʼaia kia Sehova, ʼo mulimuli atu aipe ki te meʼa ʼaē neʼe fakatotonu age kia ia? ʼE tali fēnei e Hepeleo 11:17-19: “ ʼAki te tui, ko Apalahamo, ʼi te temi ʼaē neʼe ʼahiʼahiʼi ai, ʼe feala pe ke ʼui neʼe ina momoli ia Isaake, pea ko te tagata ʼaē neʼe ina tali fakafiafia te ʼu fakapapau, neʼe faiga ke ina momoli tona foha ʼulu tokotahi, logope la neʼe ʼui fēnei age ki ai: ‘Ko te meʼa ʼaē ka higoa anai ko “tou hāko” ʼe hifo mai anai mai ia Isaake.’ Kae neʼe ina fakafuafua ʼe feala ki te ʼAtua ke ina fakatuʼuake ia ia mai te kau mate; pea neʼe ina toe maʼu foki mai te faʼahi ʼaia he faʼifaʼitaki.”
7 Koutou manatuʼi, neʼe haʼele ʼaho tolu ia Apalahamo pea mo Isaake moʼo kaku ki te potu ʼaē neʼe tonu ke fai ai te sakilifisio. (Senesi 22:4) Neʼe maʼu e Apalahamo he temi feʼauga moʼo fakakaukauʼi te meʼa ʼaē neʼe kole age ke ina fai. ʼE feala koa ke koutou fakakaukauʼi te ʼu meʼa ʼaē neʼe manatu kiai, te ʼu meʼa ʼaē neʼe ina logoʼi ʼi tona loto? Neʼe fiafia lahi ʼi te tupu ʼa Isaake he neʼe mole kei ʼamanaki ʼe ina maʼu anai hona foha. Neʼe feala ke fakahoko e te ʼAtua te faʼahi ʼaia mo kapau ko Apalahamo pea mo tona ʼohoana ʼaē neʼe paʼa pea mo finematuʼa, ʼe nā pipiki kia te ia. Neʼe lagi na ʼamanaki sio ki te ka haʼu ʼo Isaake pea mo tona hōloga. Neʼe kua puli koa tanā ʼamanaki, ʼuhi ko te meʼa ʼaē neʼe kole age e te ʼAtua ke nā fai?
8. Ko te falala ʼa Apalahamo ki te ʼAtua, neʼe gata ʼaki pe koa tana tui ʼaē ʼe feala ke Ina fakatuʼuake ia Isaake?
8 Tahi ʼaē meʼa, neʼe maʼu e Apalahamo te falala ʼaē ʼe maʼu e he ʼu hahaʼi ʼe nātou kaumeʼa lelei. ʼI tona ʼuhiga “kaumeʼa ʼa Sehova,” “neʼe tui ia Apalahamo kia Sehova, pea neʼe lau ai ʼe ko te faitotonu.” (Sake 2:23) Ko te falala ʼa Apalahamo kia Sehova neʼe mole gata ʼaki pe tana tui ʼaē ʼe feala ke fakatuʼuake e te ʼAtua ia Isaake. Neʼe toe ʼiloʼi papau e Apalahamo ʼe lelei te meʼa ʼaē neʼe kole age e Sehova ke ina fai, logope la neʼe mole mālama katoa ki te ʼu meʼa ʼaē neʼe pipiki ki te faʼahi ʼaia. Neʼe mole feʼekeʼaki peʼe faitotonu koa ia Sehova ʼi tana kole age kia ia te meʼa ʼaia. Tahi ʼaē meʼa, neʼe toe ʼāsili mālohi te falala ʼa Apalahamo ʼi tona tāʼofi e te ʼaselo ʼa Sehova ke mole ina matehi faka sakilifisio ia Isaake.—Senesi 22:9-14.
9, 10. (a) ʼI muʼa atu, ko te temi fea ʼaē neʼe fakahā ai e Apalahamo tana falala kia Sehova? (b) Koteā te meʼa maʼuhiga ʼaē ʼe tou tāʼofi ʼaki te faʼifaʼitaki ʼa Apalahamo?
9 Neʼe fakahā e Apalahamo tana falala ʼaia ki te faitotonu ʼa Sehova ʼi te ʼu taʼu e 25 ki muʼa atu. ʼI te fakahā age kia ia ʼe maumauʼi anai ia Sotoma mo Komola, neʼe tuʼania ai ʼo ʼuhiga mo te maʼuli ʼo te hahaʼi agatonu ʼaē neʼe nonofo ai, ʼaē neʼe kau ai tona ʼilāmutu ko Lote. Neʼe kole fēnei e Apalahamo ki te ʼAtua: “ ʼE mole ko he meʼa ʼe tau mo koe ke ke fai te meʼa ʼaenī, ke ke matehi fakatahi te tagata faitotonu pea mo te agakovi, ke tatau te meʼa ʼaē ʼe hoko ki te tagata faitotonu pea mo te meʼa ʼaē ʼe hoko ki te agakovi! ʼE ko he meʼa ʼe mole tāu mo koe. Ko te Tuʼi Fakamāu ʼo te kele katoa ʼe mole ina fai anai koa te meʼa ʼaē ʼe totonu?”—Senesi 18:25.
10 Neʼe tui papau e te pateliaka ko Apalahamo ʼe mole heʼe faitotonu anai ia Sehova ʼi he temi. Ki muli age, neʼe hiva fēnei te tagata fai pesalemo: “Ko Sehova ʼe faitotonu ʼi tana ʼu ala fuli, pea ʼe agatonu ʼi tana ʼu gāue fuli.” (Pesalemo 145:17) ʼE lelei ke tou fai kia tatou te ʼu fehuʼi ʼaenī: ‘ ʼE ʼau tali koa te meʼa ʼaē ʼe tuku e Sehova ke hoko kia ʼau, ʼo mole ʼau lotolotolua ki tana faitotonu? ʼE ʼau tui papau koa ko te ʼu meʼa ʼaē ʼe ina fakagafua ke hoko ʼe ʼaoga anai kia ʼau pea mo ʼihi?’ Kapau ʼe tou ʼio kiai, pea kua ʼaoga ʼaupito kia tatou te faʼifaʼitaki ʼa Apalahamo.
Tou Falala Ki Te ʼu Tagata ʼAē ʼe Fili e Sehova
11, 12. (a) Ko te faʼahi fea ʼaē ʼe tonu ke falala kiai te kau kaugana ʼa te ʼAtua? (b) ʼI ʼihi temi, koteā ʼaē ʼe feala ke liliu ko he fihifihia kia tatou?
11 Ko nātou ʼaē ʼe nātou falala kia Sehova, ʼe nātou toe falala foki ki te ʼu tagata ʼaē ʼe fili e Sehova moʼo fakahoko tana ʼu fakatuʼutuʼu. Ko te kau Iselaelite, neʼe tonu ke nātou falala kia Moisese pea ki muli age neʼe tonu ke nātou falala kia Sosue. Ko te kau Kilisitiano ʼo te temi muʼa, neʼe tonu ke nātou falala ki te kau ʼapositolo pea mo te ʼu tagata ʼāfea ʼo te kokelekasio ʼaē neʼe tuʼu ʼi Selusalemi. Ko tatou ʼi te temi ʼaenī, ʼe tonu ke tou falala ki “te tagata kaugana agatonu mo poto” ʼaē neʼe fakanofo ke ina foaki mai kia tatou tatatou “meʼa kai [fakalaumālie] ʼi tona temi totonu,” pea mo tou falala ki te ʼu tēhina ʼo te Kolesi Pule.—Mateo 24:45.
12 Ei, ko tatatou falala kia nātou ʼaē ʼe nātou takitaki te kokelekasio faka Kilisitiano ʼe fua lelei anai kia tatou. ʼE ʼui fēnei mai kia tatou: “Koutou fakalogo kia nātou ʼaē ʼe nātou takitaki koutou, mo koutou talagafua, heʼe nātou leʼoleʼo tuʼumaʼu ʼokotou ʼu nefesi, ohage ko he ʼu tagata ʼe nātou huʼi maʼua anai; koteʼuhi ke nātou fai fakafiafia te faʼahi ʼaia kae ke ʼaua naʼa nātou fai ʼaki he lāuga, heʼe fakatupu kovi anai kia koutou.”—Hepeleo 13:17.
ʼAua Naʼa Tou Mahalohalo ʼo ʼUhiga Mo Te ʼu Tagata ʼAē ʼe Fili e Sehova
13. He koʼe ʼe tonu ke tou falala kia nātou ʼaē neʼe hinoʼi ke nātou takitaki te kokelekasio?
13 ʼE tokoni mai te Tohi-Tapu kia tatou ke tou manatu fakapotopoto ʼo ʼuhiga mo tatatou falala kia nātou ʼaē ʼe nātou takitaki te hahaʼi ʼa Sehova. ʼE feala ke tou fai kia tatou te ʼu fehuʼi ʼaenī: ‘Neʼe fai koa e Moisese hana ʼu hala? Neʼe maʼuliʼi tuʼumaʼu koa e te kau ʼapositolo te aga faka Kilisitiano, ʼaē neʼe loto e Sesu ke nātou mulimuli kiai?’ ʼE tou ʼiloʼi lelei te ʼu tali ki te ʼu fehuʼi ʼaia. Neʼe fia fakaʼaogaʼi e Sehova he ʼu tagata agatonu pea mo gāue fakamalotoloto moʼo takitaki tana hahaʼi, logope la tonatou ʼuhiga agahala. ʼO toe feiā aipe, logope la ʼe heʼe haohaoa te kau tagata ʼāfea kae ʼe tonu ke tou ʼiloʼi ko nātou ʼaia neʼe “[hinoʼi e] te laumālie maʼoniʼoni ko he ʼu tagata taupau, moʼo fafaga te kokelekasio ʼa te ʼAtua.” ʼE tonu ke tou lagolago pea mo fakaʼapaʼapa kia nātou.—Gāue 20:28.
14. Koteā ʼaē ʼe tou fakatokagaʼi ʼo ʼuhiga mo te filifili e Sehova ia Moisese ko he tagata takitaki, kae mole ko Alone peʼe ko Miliame?
14 Neʼe matuʼa age ia Alone ia Moisese ia taʼu e tolu, kae neʼe lahi age tonā taʼokete ko Miliame ia nāua. (Ekesote 2:3, 4; 7:7) Pea mai tona ʼuhiga ʼaē neʼe poto palalau ia Alone ia Moisese, koia neʼe hinoʼi ai ia ia ke ina fakahoko te ʼu palalau ʼo tona tēhina. (Ekesote 6:29–7:2) Kae, moʼo takitaki ia Iselaele, neʼe mole filifili e Sehova ia Miliame, ʼaē neʼe lahi age, pe ko Alone ʼaē neʼe lahi age tana poto palalau ia Moisese. Kae neʼe ina filifili ia Moisese ʼi tana ʼosi vakaʼi te ʼu meʼa ʼaē neʼe hoko pea mo te ʼu meʼa ʼaē neʼe ʼaoga ʼi te temi ʼaia. ʼI te tahi temi, ʼi tanā mole mahino ki te fili ʼaia ʼa Sehova, neʼe meo fēnei ia Alone pea mo Miliame: “ ʼE palalau pe koa ia Sehova ʼaki ia Moisese? ʼE mole toe palalau koa la ʼaki ia māua?” Neʼe tauteaʼi ia Miliame, ʼaē neʼe lagi ina uga tāfito te heʼe fakaʼapaʼapa ʼaia ki te tagata ʼaē neʼe filifili e Sehova, kae neʼe tonu kia ia pea mo Alone ke nā fakamoʼoni ʼe ko “te tagata ʼaē ʼe agavaivai tokotahi ʼi te ʼu tagata fuli ʼo te fuga kele.”—Faka au 12:1-3, 9-15.
15, 16. Neʼe fakamoʼoni feafeaʼi e Kalepe tana falala kia Sehova?
15 ʼI te temi ʼaē neʼe fekauʼi ai te ʼu malomu e toko 12 ke nātou ʼolo ʼo vakavakaʼi te Kele ʼo te Fakapapau, neʼe mole lelei te fakamatala ʼaē neʼe fai e te ʼu malomu e toko 10. Neʼe nātou fai he ʼu fakamatala neʼe tupu ʼaki ai te mataku ʼa te kau Iselaelite, he neʼe nātou fakamatala ko te kau Kanaane ʼe ko “he ʼu tagata lalahi ʼaupito.” Pea neʼe “muhumuhu [ai te kau Iselaelite] kia Moisese pea mo Alone.” Kae neʼe mole ko te ʼu malomu fuli ʼaē neʼe mole falala kia Moisese pea mo Sehova. ʼE tou lau fēnei: “Pea neʼe faiga e Kalepe ke gona te hahaʼi kia Moisese pea neʼe haʼu ʼo ina ʼui fēnei: ‘Tou foimo hake pea ʼe mahino papau ia ʼe tou maʼu anai te fenua, heʼe feala moʼoni ke tou puleʼi.’ ” (Faka au 13:2, 25–33; 14:2) Neʼe lototoʼa ia Kalepe ohage pe ko tona kaugā malomu, ko Sosue. Neʼe nā fakahā tanā falala kia Sehova he neʼe nā ʼui fēnei: “Kapau ʼe fiafia ia Sehova ia tatou, pea ʼe mahino ia ʼe ina fakahū anai tatou ki te fenua ʼaia pea ʼe ina foaki mai anai, ko he fenua ʼe tafe ai te huʼa pipi pea mo te meli. Kae . . . ʼaua naʼa koutou matataku ki te hahaʼi ʼo te fenua . . . ʼE kau ia Sehova mo tatou. ʼAua naʼa koutou matataku ia nātou.” (Faka au 14:6-9) Neʼe fakapale tanā falala ʼaia kia Sehova. ʼI te hahaʼi lalahi ʼaē neʼe maʼuʼuli ʼi te temi ʼaia, neʼe gata pe kia Kalepe, mo Sosue, pea mo ʼihi kau Levite neʼe nātou maʼu te pilivilesio ʼaē ke nātou hū ki te Kele ʼo te Fakapapau.
16 Hili kiai ni ʼu taʼu, neʼe ʼui fēnei e Kalepe: “Kae ko ʼau, neʼe ʼau mulimuli katoa kia Sehova toku ʼAtua. . . . Pea ʼi te temi nei, koʼeni neʼe taupau ʼau e Sehova ke ʼau maʼuli, ohage ko tana fakapapau, ʼi te ʼu taʼu ʼaenī e fāgofulu-ma-nima talu mai te fakapapau ʼaia ʼa Sehova kia Moisese, ʼi te kei feʼoloʼaki ʼa Iselaele ʼi te toafa; pea ʼi te temi nei kua ʼau taʼu valugofulu-ma-nima. Kae ʼe kei ʼau mālohi pe ʼi te temi ʼaenī ohage ko toku mālohi ʼi te ʼaho ʼaē neʼe fekauʼi ʼau e Moisese. Ko te mālohi ʼaē neʼe ʼau maʼu ʼi te temi ʼaia, ʼe ko te mālohi pe ʼaia ʼaē ʼe ʼau maʼu ʼi te temi ʼaenī.” (Sosue 14:6-11) Koutou fakatokagaʼi te manatu lelei ʼa Kalepe, mo tana agatonu, pea mo tana kei mālohi. Kae neʼe mole filifili e Sehova ia Kalepe ke ina fetogi ia Moisese. Neʼe tuku age te pilivilesio ʼaia kia Sosue. ʼE feala ke tou tui papau neʼe ʼi ai te ʼu tupuʼaga ʼo te filifili e Sehova ia Sosue, pea neʼe lelei ʼaupito te fili ʼaia neʼe ina fai.
17. Koteā ʼaē neʼe hage ai neʼe mole tāu mo Petelo ke ina maʼu he ʼu pilivilesio?
17 Ko te ʼapositolo ko Petelo neʼe fakafisi tuʼa tolu ki tona ʼAliki. Tahi ʼaē meʼa, neʼe ina fia fakatokatoka e ia totonu te meʼa ʼaē neʼe hoko, ʼo ina tuʼusi te taliga ʼo te tagata kaugana ʼo te pelepitelo lahi. (Mateo 26:47-55, 69-75; Soane 18:10, 11) ʼE feala ke ʼui e ʼihi ko Petelo neʼe ko he tagata fula, ʼe mole fakapotopoto, pea ʼe mole tau mo feʼauga ke ina maʼu he ʼu pilivilesio makehe. Kae ko ai koa ʼaē neʼe foaki ki ai te ʼu kalavi ʼo te Puleʼaga, te pilivilesio ʼaē ke ina avahi te ala ki te lagi ki te ʼu kūtuga e tolu? Neʼe ko Petelo.—Gāue 2:1-41; 8:14-17; 10:1-48.
18. Ohage ko tona fakahā e Suta, koteā te manatu hala ʼaē ʼe tonu ke tou tekeʼi?
18 ʼE fakahā mai e te ʼu faʼifaʼitaki ʼaia, ʼe tonu ke tou tokakaga ʼo ʼuhiga mo tatatou fakamāuʼi te ʼu meʼa ʼaē ʼe hā mai ki tuʼa. Kapau ʼe tou falala kia Sehova, pea ʼe mole tou mahalohalo anai ʼo ʼuhiga mo te ʼu tagata ʼaē ʼe ina filifili. Logope la ʼe faʼufaʼu tana kokelekasio fakakelekele e te ʼu hahaʼi heʼe haohaoa, ʼe nātou ʼiloʼi ʼe feala ke nātou faihala, kae ʼe ina fakaʼaogaʼi lahi ia nātou. Ko Suta, te tēhina ʼo Sesu, neʼe ina fai te fakatokaga ki te kau Kilisitiano ʼo ʼuhiga mo te ʼu hahaʼi ʼaē “ ʼe nātou meʼa noaʼi te pule ʼaliki pea mo laukovi ki te kau kolōlia.” (Suta 8-10) ʼE mole tonu ke tou hoko kia nātou ʼaia.
19. He koʼe ʼe mole tonu ke tou mahalohalo ʼo ʼuhiga mo te ʼu tagata ʼaē ʼe filifili e Sehova?
19 ʼE hā mai ʼe filifili e Sehova ki he ʼu faʼahiga gāue, he ʼu tagata ʼe nātou maʼu he ʼu kalitate makehe moʼo takitaki tana hahaʼi ʼi te ala ʼaē ʼe ina loto ke nātou haʼele ai, ʼi te temi makehe ʼaenī. Tou faiga ke mole tou mahalohalo ʼo ʼuhiga mo te ʼu tagata ʼaē ʼe filifili e te ʼAtua, kae ʼaki he agavaivai, ke tou tahi nofo ʼi tona tuʼulaga. Kapau ʼe tou fai feiā, pea ʼe tou fakahā ai ʼe tou falala kia Sehova.—Efesi 4:11-16; Filipe 2:3.
Tou Falala Ki Te Faitotonu ʼa Sehova
20, 21. Koteā te meʼa ʼaē ʼe feala ke tou tāʼofi ʼi te felogoi ʼa te ʼAtua pea mo Moisese?
20 Kapau ʼi ʼihi temi ʼe ko he agamāhani hatatou falala fau kia tatou totonu kae siʼisiʼi tatatou falala kia Sehova, tou manatuʼi te faʼifaʼitaki ʼa Moisese. ʼI tona taʼu 40, neʼe ina fakatuʼutuʼu ke ina faka ʼāteaina te kau Iselaelite mai tanatou nofo popūla ʼi Esipito. ʼE mahino ia neʼe fakamalotoloto tana ʼu faiga, kae neʼe mole iku ki te faka ʼāteaina ʼo Iselaele ʼi te temi pe ʼaia, pea neʼe mole fua lelei kia ia, kae neʼe tonu ke hola. Hili taʼu e 40 ʼaē neʼe gāue kinakina ai ʼi te fenua matāpule, pea neʼe feala ai leva ke filifili ia ia moʼo fakahoko te meʼa ʼaē neʼe ina fia fai ki muʼa atu. ʼI te temi ʼaia neʼe kua feala ke falala ʼe lagolago anai ia Sehova kia ia, he neʼe hoko te ʼu meʼa ʼo mulimuli ki te finegalo ʼo Sehova.—Ekesote 2:11–3:10.
21 ʼE tonu ke tou fai e tatou takitokotahi te fehuʼi ʼaenī: ‘ ʼI ʼihi temi, ʼe ʼau fia fakalaka ake koa ia Sehova pea mo te kau tagata ʼāfea ʼaē neʼe hinoʼi ʼi te kokelekasio, ʼo ʼau faiga ke fai fakavilivili te ʼu meʼa peʼe ʼau fai pe ʼau te ʼu meʼa ʼaē ʼe ʼau loto kiai? ʼE ʼau tali lelei koa te temi ʼaē ʼe akoʼi ai ʼau ʼo mole ʼau manatu ʼe mole fia tuku mai haku ʼu pilivilesio?’ Koia, ʼe ʼaoga moʼoni koa te faʼifaʼitaki ʼa Moisese kia tatou?
22. Logope la neʼe puli tana pilivilesio lahi, koteā te manatu ʼaē neʼe maʼu e Moisese ʼo ʼuhiga mo Sehova?
22 ʼE ʼi ai te tahi meʼa ʼe feala ke tou tāʼofi ʼi te faʼifaʼitaki ʼa Moisese. Ia Faka au 20:7-13 ʼe fakahā mai te hala ʼaē neʼe ina fai, pea neʼe fakatūʼa ai. Neʼe mole kei ina maʼu te pilivilesio ʼaē ke ina taki te kau Iselaelite ki te Kele ʼo te Fakapapau. Neʼe ina ʼui koa ko te tonu ʼa Sehova ʼe heʼe faitotonu? Neʼe ʼalu koa ki he koga meʼa ʼo nofo tokotahi ai, ʼo lotomamahi he neʼe mole gaohi fakalelei ia ia e Sehova? ʼE feala ke tou tali kiai, ʼaki te meʼa ʼaē neʼe ʼui totonu e Moisese ki Iselaele ʼi muʼa ʼo tana mate. ʼO ʼuhiga mo Sehova, neʼe ʼui fēnei e Moisese: “ ʼE haohaoa tana gāue, heʼe ko tana ʼu ala fuli ʼe faitotonu. ʼAtua ʼo te faitotonu, ʼaē ʼe mole maʼu ai te heʼe faitotonu; ʼe faitotonu pea mo agatonu.” (Teutalonome 32:4) ʼE mahino papau ia neʼe kei falala pe ia Moisese kia Sehova ʼo aʼu ki te fakaʼosi. E feafeaʼi kia tatou? ʼE tou faiga koa takitokotahi ke tou fakamālohiʼi tatatou falala kia Sehova pea mo tona faitotonu? ʼE lava feafeaʼi hatatou fai te faʼahi ʼaia? ʼE tou vakaʼi anai ʼi te alatike ʼaē ka hoa mai.
ʼE Koutou Tali Feafeaʼi Anai?
◻ He koʼe neʼe tonu ke falala te kau Iselaelite kia Sehova?
◻ ʼO ʼuhiga mo te falala, koteā ʼaē ʼe tou tāʼofi ʼi te faʼifaʼitaki ʼa Apalahamo?
◻ He koʼe ʼe mole tonu ke tou mahalohalo ʼo ʼuhiga mo te ʼu tagata ʼaē ʼe filifili e Sehova?
[Paki ʼo te pasina 13]
ʼE kau ki tatatou falala kia Sehova tatatou fakaʼapaʼapa kia nātou ʼaē ʼe nātou takitaki ʼi te kokelekasio