Te Lelei ʼo Takotou Tui ʼe ʼAhiʼahiʼi ʼi Te Temi ʼAenī

“Koutou faka ʼuhigaʼi te faʼahi ʼaia ohage ko he fiafia katoa, ʼoku ʼu tēhina, mokā koutou felāveʼi mo he ʼu faʼahiga ʼahiʼahi kehekehe, ʼi takotou ʼiloʼi ʼaē ko te maʼuhiga ʼo takotou tui ʼaē kua ʼahiʼahiʼi ʼe ina fakatupu te faʼa kātaki.”​—Sake 1:​2, 3.

1. He koʼe ʼe tonu ke ʼamanaki e te kau Kilisitiano ʼe ʼahiʼahiʼi anai tonatou tui?

ʼE MOLE leleiʼia e te kau Kilisitiano moʼoni mokā fakamamahiʼi nātou, pea ʼe mole nātou fiafia ʼi te lotomamahi pea mo te fakalainoa. Kae ʼe nātou manatuʼi te ʼu palalau ʼaē ʼe tuʼu ʼi ʼoluga, ʼaē neʼe tohi e Sake, te tēhina ʼo Sesu. Neʼe fakahā lelei e Kilisito ki tana ʼu tisipulo ʼe hoko anai kia nātou te ʼu fakataga pea mo te tahi ʼu faigataʼaʼia, ʼuhi ko tanatou mulimuli ki te ʼu lekula ʼo te ʼAtua. (Mateo 10:34; 24:​9-13; Soane 16:33) Kae ʼe feala ke tou maʼu te fiafia ʼi te ʼu ʼahiʼahi ʼaia. ʼO feafeaʼi?

2. (a) Ko te ʼu ʼahiʼahi ʼo tatatou tui, ʼe lava feafeaʼi tanatou iku ki te fiafia? (b) ʼE lava katoa feafeaʼi te gāue ʼo te faʼa kātaki ia tatou?

² Ko te tupuʼaga tāfito ʼaē ʼe tou maʼu ai te fiafia mokā ʼahiʼahiʼi tatatou tui, he ko te ʼu ʼahiʼahi ʼaia ʼe feala ke nātou fakatupu he ʼu fua lelei. Ohage ko tona ʼui e Sake, ko te tauʼi ʼo te ʼu ʼahiʼahi pea mo te ʼu faigataʼaʼia ʼaki he lototoʼa, “ ʼe ina fakatupu te faʼa kātaki.” ʼE feala ke ʼaoga kia tatou te kalitate faka Kilisitiano maʼuhiga ʼaia. Neʼe tohi fēnei e Sake: “Ke katoa te gāue ʼa te faʼa kātaki ke feala ai hakotou katoa pea mo haohaoa ia meʼa fuli, ʼo mole koutou hala ʼi he meʼa.” (Sake 1:4) ʼE ʼi ai te “gāue” ʼe tonu ke fakahoko e te faʼa kātaki. Ko tana gāue tāfito ʼe ko te fai ʼaē ke tou katoa ia meʼa fuli, pea mo tokoni mai kia tatou ke tou liliu ko he kau Kilisitiano ʼe nātou fakafuafua lelei te ʼu meʼa ʼaē ʼe nātou fai pea mo nātou fakapotopoto. Koia, kapau ʼe tou tuku ke hoko te ʼu ʼahiʼahi, kae mole tou faiga ke tou fakaʼaogaʼi he ʼu meʼa ʼe mole ʼalutahi mo te Tohi-Tapu moʼo fakagata fakavilivili te ʼu ʼahiʼahi ʼaia, pea ʼe ʼahiʼahiʼi ai tatatou tui pea mo fakatonutonuʼi. Kapau neʼe mole tou maʼu te kātaki, peʼe ko te lotoʼofa, peʼe ko te manavaʼofa, peʼe ko te ʼofa ʼi te ʼu ʼaluʼaga ʼaia peʼe ʼi tatatou ʼu vāhaʼa mo te hahaʼi, pea ʼe feala ke tou katoa ʼaki te faʼa kātaki. Ei, ʼe fakaʼaluʼalu fēnei: Ko te ʼu ʼahiʼahi ʼe nātou fakatupu te faʼa kātaki; ʼe fakatuputupu e te faʼa kātaki te ʼu kalitate faka Kilisitiano; pea ko te ʼu meʼa ʼaia ʼe nātou fakatupu fiafia.​—1 Petelo 4:​14; 2 Petelo 1:​5-8.

3. He koʼe ʼe mole tonu ke tou mataku naʼa ʼahiʼahiʼi tatatou tui?

³ ʼO toe feiā mo te ʼapositolo ko Petelo, neʼe ina fakahā lelei pe koʼe ʼe mole tonu ke tou matataku peʼe tou holomuli mokā ʼahiʼahiʼi tatatou tui. Neʼe ina tohi fēnei: “ ʼE koutou fiafia lahi ʼi te meʼa ʼaia, logope la ʼi he kiʼi temi nounou ʼi te temi ʼaenī, kapau ʼe tonu ke hoko, ʼe koutou lotomamahi ʼuhi ko te ʼu ʼahiʼahi kehekehe, ke feala ki te maʼuhiga ʼo takotou tui ʼaē kua ʼahiʼahiʼi, ʼaē ʼe maʼuhiga age ʼi te aulo ʼaē ʼe feala ke ʼauha logope tona kua ʼahiʼahiʼi ʼi te afi, ke liliu anai ko he meʼa ke vikiʼi, mo faka kolōliaʼi pea mo faka maʼuhigaʼi ʼi te temi ʼo te fakahā ʼo Sesu Kilisito.” (1 Petelo 1:​6, 7) ʼE fakaloto mālohi ʼaupito te ʼu palalau ʼaia ʼi te temi nei, koteʼuhi ko te “mamahi lahi”​—te temi ʼo te fakavikiviki, mo te faka kolōlia, mo te faka maʼuhiga, pea mo te hāofaki​—ʼe kua ōvi mai pea ʼe kua lahi age tana fakaōvi mai ʼi te temi ʼaē neʼe tou liliu ko he ʼu hahaʼi tui.​—Mateo 24:21; Loma 13:11, 12.

4. Koteā te manatu ʼaē neʼe maʼu e te tēhina ʼo ʼuhiga mo te ʼu ʼahiʼahi ʼaē neʼe hoko kia ia pea mo te kau Kilisitiano fakanofo?

⁴ ʼI te ʼuluaki alatike, neʼe tou vakaʼi ai te ʼu ʼahiʼahi ʼaē neʼe hoko ki te toe ʼo te kau fakanofo talu mai te taʼu 1914. Neʼe ʼi ai koa he tupuʼaga ke nātou fiafia ai? Neʼe fakahā e A. H. Macmillan te manatu ʼaenī: “Neʼe ʼau sio ki te ʼatu ʼahiʼahi fakamataku neʼe hoko ki te kautahi, pea mo te ʼahiʼahi lahi ʼo te tui ʼo te hahaʼi ʼo te kautahi ʼaia. ʼAki te tokoni ʼo te laumālie ʼa te ʼAtua neʼe haohaoa aipe te kautahi pea mo haga tuputupu. Neʼe ʼau sio ai ki te maʼuhiga ʼaē ke tou atalitali ke fakamālama lelei e Sehova tatatou mahino ki te Tohi-Tapu, kae ke ʼaua naʼa tou ʼiʼita mokā ʼi ai he manatu foʼou. . . . Logope la ʼi ʼihi temi ʼe tonu ke tou fetogi tatatou ʼu manatu, kae ko te fakatuʼutuʼu ʼofa ʼo te ʼAtua ʼo ʼuhiga mo tatatou hāofaki pea mo te fakapapau ʼo te maʼuli heʼegata ʼaē neʼe ina fai mai kia tatou, ʼe mole fetogi ia. Koia, neʼe mole tonu ke vaivai tatatou tui ʼuhi ko te mole hoko ʼo te ʼu meʼa ʼaē neʼe tou ʼamanaki kiai peʼe ko te fetogi ʼo he manatu.”​—Te Tule Leʼo Fakafalani ʼo te ʼaho 15 ʼo Sepetepeli 1967, pasina 566.

5. (a) Koteā te ʼu fua lelei neʼe maʼu ʼaki te ʼu ʼahiʼahi ʼaē neʼe hoko ki te toe ʼo te kau fakanofo? (b) He koʼe ʼe tonu ke tou tokagaʼi te faʼahi ʼo te ʼahiʼahi ʼi te temi nei?

⁵ Ko te kau Kilisitiano fakanofo ʼaē neʼe nātou hāo ʼi te ʼahiʼahi ʼaē neʼe hoko ʼi te taʼu 1914 ʼo aʼu ki te taʼu 1919, neʼe faka ʼāteaina nātou mai te pule mālohi ʼo te mālama pea mo te ʼatu ʼu aga faka lotu ʼo Papiloni. Neʼe haʼele ki muʼa te toe ʼo te kau fakanofo ʼaia ko he ʼu hahaʼi kua fakamaʼa, ʼo nātou momoli ʼaki he loto lelei te ʼu sakilifisio fakavikiviki ki te ʼAtua, pea neʼe nātou ʼiloʼi papau ʼe ina tali nātou ohage ko tona hahaʼi. (Isaia 52:11; 2 Kolonito 6:​14-18) Neʼe kamata te fakamāu ʼi te ʼapi ʼo te ʼAtua, kae ʼe mole fakaʼosi anai te fakamāu ʼaia ʼi he temi kua fakakatofa. ʼE hoko atu te ʼahiʼahi pea mo te fakamaʼa ʼo te hahaʼi ʼa te ʼAtua. Ko nātou ʼaē ka hāo anai ʼi te “mamahi lahi” ʼaē kua ōvi mai, ʼi tanatou kau ʼi te “toe hahaʼi tokolahi,” ʼe toe ʼahiʼahiʼi foki mo tanatou tui. (Fakahā 7:​9, 14) ʼE hoko te ʼahiʼahi ʼaia ʼi te ʼu ʼaluʼaga ʼe tatau mo te ʼu meʼa ʼaē neʼe hoko ki te toe ʼo te kau fakanofo pea mo te tahi ʼu ʼaluʼaga.

ʼE ʼAhiʼahiʼi Feafeaʼi Koutou?

6. Koteā te tahi faʼahiga ʼahiʼahi fakamataku neʼe hoko ki te tokolahi?

⁶ Tokolahi ʼi te kau Kilisitiano neʼe nātou fakakaukauʼi te faigataʼaʼia ʼo te tauʼi ia te ʼu ʼahiʼahi ʼaē ka hoko mo kapau ʼe ʼohofiʼi fakahagatonu nātou. ʼE nātou manatuʼi ai te meʼa ʼaenī neʼe hoko: “Neʼe pāui [e te kau takitaki Sutea] te kau ʼapositolo, ʼo huipiʼi nātou, pea mo fakatotonu age kia nātou ke fakagata tanatou palalau ʼi te huafa ʼo Sesu, pea neʼe nātou tuku ke ʼolo. Ko nātou ʼaia, neʼe nātou mavae ʼi muʼa ʼo te Sanetualio, ʼo nātou fakafiafia he neʼe tau mo nātou tonatou fakalainoaʼi ʼuhi ko tona huafa.” (Gāue 5:​40, 41) Pea ko te hisitolia ʼo te hahaʼi ʼa te ʼAtua ʼi te temi ʼaenī, tāfito la lolotoga te ʼu tau faka malamanei, ʼe ina fakahā lelei mai ko te tokolahi ʼo te kau Fakamoʼoni ʼa Sehova neʼe tā nātou, pea neʼe toe kovi age tonatou gaohi e te ʼu hahaʼi ʼaē neʼe nātou fakatagaʼi nātou.

7. Neʼe feafeaʼi te tui ʼaē neʼe fakahā e ʼihi Kilisitiano ʼo totatou temi?

⁷ ʼO ʼuhiga mo te fakatagaʼi ʼo te kau Kilisitiano, neʼe mole fakakehekehe e te mālama te toe ʼo te kau fakanofo pea mo te hahaʼi tokolahi ʼo te “tahi ʼu ōvi.” (Soane 10:16) Lolotoga ni ʼu taʼu, ko te ʼu kūtuga ʼaia e lua neʼe hoko kiai te ʼu ʼahiʼahi fakamataku, neʼe pilisoniʼi nātou pea neʼe nātou mamate agatonu ʼuhi ko tonatou ʼofa ki te ʼAtua pea mo tanatou tui kia te ia. Neʼe ʼaoga ki te ʼu kūtuga ʼaia e lua te laumālie ʼa te ʼAtua, tatau aipe peʼe kehekehe tanatou ʼamanaki. (Vakaʼi Te Tule Leʼo ʼo te ʼaho 15 ʼo Sūnio 1996, pasina 31.) Lolotoga te ʼu taʼu 1930 pea mo te ʼu taʼu 1940, ʼi te Siamani Nasi, neʼe tokolahi te ʼu kaugana ʼa Sehova, ʼo kau ai mo te ʼu tamaliki, neʼe nātou fakahā he tui fakaofoofo, pea ko te tokolahi neʼe lahi ʼaupito tonatou ʼahiʼahiʼi. ʼI te ʼu taʼu pe ʼaenī, neʼe fakatagaʼi te hahaʼi ʼa Sehova ʼi te ʼu fenua ohage ko Burundi, Érythrée, Etiopea, Malawi, Mozambique, Rwanda, Singapour, pea mo Zaïre. Pea ʼe kei hoko atu te ʼu ʼahiʼahi ʼaia.

8. Koteā ʼaē neʼe ʼui e te tēhina Afelika, ʼaē ʼe hā ai ko te ʼahiʼahi ʼo tatatou tui ʼe mole gata ʼaki pe te ʼu fakatagata mālohi?

⁸ Kae ohage ko te meʼa ʼaē neʼe tou ʼui, ʼe toe ʼahiʼahiʼi foki tatatou tui ʼi he ʼu ʼaluʼaga ʼe mole hā lelei. Ko ʼihi ʼo te ʼu ʼahiʼahi ʼaia ʼe mole fai fakahagatonu pea ʼe faigataʼa hatatou ʼiloʼi. Koutou vakaʼi peʼe koteā anai te meʼa ʼaē ka koutou fai ʼi te ʼu ʼaluʼaga ʼaē ʼe hoa mai. Ko te tēhina ʼi Angola, ko ʼana fānau e toko hogofulu, neʼe kau ki te kokelekasio pea ʼi te tahi temi, neʼe mole kei maʼu he logo e te ʼu tēhina takitaki ʼo ʼuhiga mo te kokelekasio ʼaia. Ki muli age, neʼe hoki feala leva te ʼaʼahi ʼo te kokelekasio ʼaia. Neʼe fehuʼi age ki te tēhina ʼaia pe koteā ʼaē neʼe ina fai ke feala hana fafaga tana famili. Neʼe faigataʼa tana tali kiai, pea ko te meʼa pe e tahi ʼaē neʼe ina ʼui, neʼe faigataʼa te maʼuli. Neʼe feala koa ke kai tuʼa tahi tana famili ʼi he ʼaho? Neʼe ina tali fēnei: “Neʼe faigataʼa. Neʼe mātou ako te fakafeauga ki te ʼu meʼa ʼaē ʼe mātou maʼu.” Pea neʼe ina ʼui fēnei, ʼo hā ai tana tui lahi: “Kae ʼe mole koa la ko te meʼa ʼaia ʼaē ʼe tonu ke hoko kia tatou ʼi te ʼu ʼaho fakamuli ʼaenī?” ʼE fakaofoofo te tui ʼaia ʼi te malamanei, kae ʼe mole ko he meʼa ʼe tahitahiga tona maʼu ʼi te kau Kilisitiano agatonu, ʼaē ʼe nātou falala katoa ʼe hoko anai te ʼu fakapapau ʼo te Puleʼaga.

9. Koteā te meʼa ʼaē ʼe talanoa kiai ia 1 Kolonito 11:​3 ʼe feala ke ʼahiʼahiʼi ai tatou ʼi te temi nei?

⁹ ʼE toe ʼahiʼahiʼi foki mo te toe hahaʼi tokolahi ʼo ʼuhiga mo te ʼu fakatuʼutuʼu faka teokalatike. Ko te kokelekasio faka Kilisitiano ʼi te malamanei katoa ʼe mulimuli ki te ʼu pelesepeto ʼo te ʼAtua pea mo te ʼu lekula faka teokalatike. Ko tona faka ʼuhiga ʼuluaki ke tou tali ia Sesu ʼe ko tatatou Takitaki, ia ia ʼaē neʼe hinoʼi ke Pule ki te kokelekasio. (1 Kolonito 11:3) ʼE hā tatatou fakalogo kia te ia pea mo tona Tāmai, ʼi tatatou falala ki te ʼu fakatuʼutuʼu faka teokalatike pea mo te ʼu tonu ʼaē ʼe fai ʼo ʼuhiga mo tatatou fakahoko te finegalo ʼa Sehova ʼi te logo tahi. Tahi ʼaē meʼa, ʼi te ʼu kokelekasio takitokotahi, ʼe ʼi ai te ʼu tagata neʼe hinoʼi ke nātou takitaki tatou. Ko nātou ko te ʼu tagata agahala, pea ʼe feala ke tou fakatokagaʼi vave tanatou ʼu hala; kae ʼe fakaloto mālohi tatou ke tou fakaʼapaʼapa ki te ʼu tagata taupau ʼaia pea mo fakalogo kia nātou. (Hepeleo 13:​7, 17) ʼI ʼihi temi ʼe faigataʼa koa hakotou fai te faʼahi ʼaia? ʼE ko he ʼahiʼahi moʼoni koa kia koutou? Kapau koia ʼaia, ʼe ʼi ai koa he ʼu fua lelei ʼo te ʼahiʼahi ʼaia ki takotou tui?

10. Koteā te ʼahiʼahi ʼaē ʼe hoko kia tatou ʼo ʼuhiga mo te gāue fai faka mafola?

¹⁰ Tahi ʼaē meʼa, ʼe ʼahiʼahiʼi tatou ʼo ʼuhiga mo te pilivilesio pea mo te maʼua ʼaē ke tou kau tuʼumaʼu ki te fai faka mafola. Kia tatou ʼaē ʼe hoko ki ai te ʼahiʼahi ʼaia, ʼe tonu ke tou ʼiloʼi ko tatatou kau katoa ki te minisitelio ʼe mole gata ʼaki pe te fai ʼo he ʼu kiʼi hola veliveli ʼi te fai faka mafola. Koutou manatuʼi te ʼu palalau fakavikiviki ʼaē neʼe fai e Sesu ʼo ʼuhiga mo te fafine vitua masiva ʼaē neʼe ina foaki te gataʼaga ʼo te ʼu meʼa ʼaē neʼe ina maʼu. (Maleko 12:41-44) ʼE feala ke tou fai kia tatou te fehuʼi ʼaenī: ‘ ʼE ʼau feiā koa, ʼo ʼau foaki katoa te meʼa ʼaē ʼe ʼau lavaʼi ʼi taku minisitelio?’ Ko tatou fuli ko he kau Fakamoʼoni ʼa Sehova ʼi te temi fuli pe, ʼo tou fakaʼaogaʼi tuʼumaʼu te ʼu faigamālie fuli moʼo fakagigila tatatou mālama.​—Mateo 5:​16.

11. ʼE ʼahiʼahiʼi feafeaʼi tatou mokā hoko he ʼu fetogi ʼi tatatou mahino ki te Tohi-Tapu peʼe ko he ʼu tokoni ʼo ʼuhiga mo tatatou aga?

¹¹ Ko te tahi ʼahiʼahi ʼaē ʼe feala ke hoko, ʼe ko tatatou mole faʼa leleiʼia te tuputupu ʼo tatatou mahino ki te Tohi-Tapu pea mo te ʼu tokoni ʼaē ʼe foaki mai e te kalasi ʼo te tagata kaugana agatonu. (Mateo 24:45) ʼI ʼihi temi ʼe fakamaʼua ai ke tou fetogi tatatou aga, ohage ko te temi ʼaē neʼe hoki tou mahino lelei ai ko nātou ʼaē ʼe suluka neʼe tonu ke nātou tuku mo kapau neʼe nātou fia nofo ʼi te kokelekasio.a (2 Kolonito 7:⁠1) Peʼe ko te ʼahiʼahi ʼaia, ʼe lagi ko te fakamaʼua ʼaē ke tou fetogi he ʼu faʼahiga musika ʼe tou leleiʼia pe ko he ʼu faʼahiga fakafiafia.b ʼE tou lotolotolua koa ki te tokoni poto ʼaē ʼe foaki mai? Peʼe tou tuku anai koa ki te laumālie ʼa te ʼAtua ke ina fetogi tatatou fakakaukau pea mo tokoni mai kia tatou ke tou maʼu te ʼulugaaga faka Kilisitiano?​—Efesi 4:​20-24; 5:​3-5.

12. Koteā ʼaē ʼe ʼaoga moʼo fakamālohiʼi te tui ʼi te ʼosi papitema?

¹² Talu mai te ʼu taʼu ʼe lauʼi hogofulu, neʼe tuputupu te kaugamālie ʼo te toe hahaʼi tokolahi, pea ʼi tanatou ʼosi papitema ʼe toe hoko atu tanatou fakamālohiʼi tanatou ʼu felogoi mo Sehova. ʼE mole gata ʼaki pe tanatou kau ki te ʼu fakatahi faka Kilisitiano, pea mo ʼihi fono, peʼe nātou kau ʼi ʼihi temi ki te fai faka mafola. Koʼeni tona faʼifaʼitaki: ʼE feala ke mavae he tahi mai Papiloni Lahi, te kautahi faka malamanei ʼo te lotu hala, kae kua lītuʼa moʼoni koa kiai? ʼE kei pipiki koa ki te ʼu meʼa ʼaē ʼe hā ai te faʼahiga manatu ʼo Papiloni Lahi​—te faʼahiga manatu ʼaē ʼe ina meʼa noaʼi te ʼu lekula faitotonu ʼo te ʼAtua? ʼE maʼuhiga moʼoni koa kia ia te aga ʼaē ʼe tonu ke fai pea mo te nofo lelei ki tona ʼohoana? ʼE maʼuhiga age koa kia ia te ʼu koloā fakamālama, ʼi te ʼu koloā fakalaumālie? Ei, ʼe nofo maʼa koa mai te ʼu mele ʼo te malamanei?​—Sake 1:​27.

Te ʼu Fua Lelei ʼAē ʼe Tou Maʼu ʼi Te ʼAhiʼahi ʼo Tatatou Tui

13, 14. Koteā ʼaē neʼe fai e ʼihi kae kua fualoa tanatou kau ʼi te tauhi moʼoni?

¹³ Kapau kua tou mavae moʼoni mai Papiloni Lahi pea mo tou toe mavae foki mai te mālama ʼaenī, ʼaua naʼa tou toe sisio ki te ʼu meʼa ʼaē ʼi muli. ʼO mulimuli ki te pelesepeto ʼaē ʼe tou maʼu ia Luka 9⁠:​62, ko te sio ʼaē ki muli ʼe feala ke faka ʼuhiga kia tatou fuli, ke mole tou kau ia nātou ʼaē ka fakalogo anai ki te Puleʼaga ʼo te ʼAtua. Neʼe ʼui fēnei e Sesu: “Ko ʼaē kua fā tona nima ki te saliote pea toe sio ki te ʼu meʼa ʼaē ʼi muli, ʼe mole ʼaoga ia ki te puleʼaga ʼo te ʼAtua.”

¹⁴ Kae ko ʼihi ʼaē neʼe liliu ko he kau Kilisitiano ʼi te temi muʼa, kua nātou muliʼi te tuʼu ʼo te ʼu faʼahiga meʼa ʼaenī. Neʼe mole nātou tauʼi te faʼahiga manatu ʼo te mālama. (2 Petelo 2:​20-22) Kua nātou leleiʼia tāfito te ʼu fakafiafia ʼo te mālama, pea ʼe lahi te temi ʼaē ʼe nātou fakaʼaogaʼi ki te ʼu meʼa ʼaia, ʼo mole feala ai hanatou tuputupu ʼi te faʼahi fakalaumālie. Neʼe mole nātou taupau tanatou ʼatamai pea mo tonatou loto ke pipiki maʼu ki te Puleʼaga ʼo te ʼAtua pea mo tona faitotonu, ke fakamuʼamuʼa te ʼu meʼa ʼaia ʼi tonatou maʼuli, kae neʼe nātou maliu nātou ʼo fakamuʼamuʼa te ʼu koloā. Kapau ʼe mole nātou fakamoʼoni ki te kua vaivai ʼo tanatou tui pea mo tanatou mole kei faiva ʼi te faʼahi fakalaumālie, ʼo nātou fetogi tanatou aga pea nātou kumi te ʼu tokoni fakaʼatua, pea ʼe feala ke puli ai tanatou ʼu felogoi maʼuhiga mo Sehova pea mo tona kautahi.​—Fakahā 3:15-19.

15. Koteā ʼaē ʼe tonu ke tou fai ke tali tuʼumaʼu tatou e te ʼAtua?

¹⁵ Kapau ʼe tou loto ke tali tatou e Sehova pea mo tou hāo ʼi te mamahi lahi ʼaē kua fakaōvi mai, pea ʼe tonu ke tou nonofo maʼa, ʼo tou ‘fō totatou ʼu kofu ʼi te taʼataʼa ʼo te Akeno.’ (Fakahā 7:​9-14; 1 Kolonito 6:​11) Kapau ʼe mole tou maʼa pea mo faitotonu ia muʼa ʼo te ʼAtua, pea ʼe mole ina tali anai tatatou tauhi taputapu. ʼE mahino ia, ʼe tonu ke tou ʼiloʼi ko te maʼuhiga ʼo tatatou tui ʼaē kua ʼahiʼahiʼi, ʼe tokoni anai kia tatou ke tou loto faʼa kātaki pea ke mole līaki tatou e te ʼAtua.

16. Koteā te ʼu faʼahi ʼaē ʼe feala ke liliu ai te ʼu loi ko he ʼahiʼahi ʼo tatatou tui?

¹⁶ ʼI ʼihi temi, ʼe palalau kovi te ʼu talalogo pea mo te ʼu puleʼaga ʼo ʼuhiga mo te hahaʼi ʼo te ʼAtua, ʼo mole nātou fakahā te moʼoni ʼo ʼuhiga mo tatatou ʼu akonaki pea mo totatou faʼahiga maʼuli. Kae ʼe mole tou punamaʼuli ki te faʼahi ʼaia, koteʼuhi ʼe fakahā lelei mai e Sesu ko te ‘mālama ʼe fehiʼa anai kia tatou, koteʼuhi ʼe mole tou kau kiai.’ (Soane 17:14) ʼE tou tuku anai koa kia nātou ʼaē kua fakakiviʼi e Satana, ke nātou fakamatakuʼi tatou, pea ke tou lotovaivai ai pea mo tou ufiufi ʼi te logo lelei? ʼE tou tuku anai koa ki te ʼu loi ʼo ʼuhiga mo te moʼoni, ke nātou fakagata tatatou kau ki te ʼu fono pea mo te gāue fai faka mafola? Peʼe tou tuʼu mālolohi anai koa pea mo tou lototoʼa, ʼo tou fakatotonu ke hoko atu tatatou tala te moʼoni ʼo ʼuhiga mo Sehova pea mo tona Puleʼaga?

17. Koteā te meʼa ʼaē kua tou ʼiloʼi papau ʼe feala ke ina uga tatou ke hoko atu tatatou fakahā ʼo tatatou tui?

¹⁷ ʼO mulimuli ki te ʼu lea faka polofeta ʼo te Tohi-Tapu ʼaē kua hoko, ʼe tou maʼuʼuli nei ʼi te temi ʼo te fakaʼosi. Ko tatatou ʼu ʼamanaki ʼaē ʼe fakatafito ki te Tohi-Tapu ʼo ʼuhiga mo he mālama foʼou faitotonu, ʼe hoko moʼoni anai pea ʼe tou maʼuli fiafia ai anai. ʼO aʼu ki te hoko mai ʼo te ʼaho ʼaia, tou tui mālohi ki te Folafola ʼa te ʼAtua pea ke tou fakahā ʼe tou tui, ʼo mole tou tuku te faka mafola ʼo te logo lelei ʼo te Puleʼaga ʼi te malamanei katoa. Koutou fakakaukauʼi age muʼa te lauʼi afe kau tisipulo foʼou ʼaē ʼe papitema ʼi te vāhaʼa fuli. ʼE mole koa la ko he tupuʼaga ʼaia ke tou loto fakafetaʼi ai, ʼi te faʼa kātaki ʼa Sehova ʼo mole ina fakahoko tana fakamāu, ke feala ke lahi age te hahaʼi ʼaē ka nātou maʼu te maʼuli? ʼE mole tou fiafia koa la ʼi te fakagafua e te ʼAtua ke hoko atu te gāue fai faka mafola ʼo te Puleʼaga, ʼaē ʼe ina hāofaki te maʼuli ʼa te hahaʼi? Tahi ʼaē meʼa, ʼe mole tou fiafia koa la ki te tali e te lauʼi miliona hahaʼi te moʼoni pea mo nātou fakahā tanatou tui?

18. Koteā takotou fakatotonu ʼi takotou tauhi kia Sehova?

¹⁸ ʼE mole tou ʼiloʼi peʼe gata anai ʼafea te ʼu ʼahiʼahi ʼaē ʼe hoko ʼi te temi ʼaenī. Kae ʼe tou ʼiloʼi papau, ʼe ʼi ai te ʼaho kua fakakatofa e Sehova ke ina fakamāuʼi ai te ʼu lagi pea mo te kele agakovi ʼaenī. ʼI te temi ʼaenī, tou fakatotonu ke tou faʼifaʼitakiʼi te lelei ʼaupito ʼo te tui ʼaē neʼe ʼahiʼahiʼi, ʼo Ia ʼaē ʼe ina taki tatatou tui ki te haohaoa, ia Sesu. Pea tou mulimuli ki te faʼifaʼitaki ʼo te toe ʼo te kau fakanofo ʼaē kua matutuʼa, pea mo nātou ʼaē ʼe nātou tauhi fakatahi mo tatou ʼaki he lototoʼa.

19. Koteā ʼaē ʼe mahino papau ia ʼe mālo anai ʼi te mālama ʼaenī?

¹⁹ ʼE tonu ke tou fakatotonu ke tou tala tuʼumaʼu te logo lelei heʼegata ki te ʼu puleʼaga, mo te ʼu telepi, mo te ʼu lea, pea mo te hahaʼi, ʼo tou gāue tahi mo te ʼaselo ʼaē ʼe lele ʼi te lotomalie ʼo te lagi. ʼE tonu ke nātou logo ki te tala fēnei ʼa te ʼaselo: “Koutou manavasiʼi ki te ʼAtua pea mo koutou faka kolōlia kia te ia, heʼe kua hoko mai te hola ʼo tana fakamāu.” (Fakahā 14:​6, 7) ʼI te temi ʼaē ka fakahoko ai te fakamāu fakaʼatua ʼaia, koteā anai te ʼu fua ʼo ʼuhiga mo te lelei ʼo tatatou tui ʼaē neʼe ʼahiʼahiʼi? ʼE mole ko he mālo faka kolōlia anai koa​—tatatou hāo mai te tuʼu ʼo te ʼu faʼahiga meʼa ʼaenī ʼo tou hū ki te mālama foʼou faitotonu ʼa te ʼAtua? ʼI tatatou kātakiʼi te ʼu ʼahiʼahi ʼo tatatou tui, ʼe feala anai ke tou ʼui fēnei, ohage ko te ʼapositolo ko Soane: “Koʼeni te meʼa ʼaē neʼe mālo ʼi te mālama, ko tatatou tui.”​—1 Soane 5:⁠4.

[Nota ʼi te lalo pasina]

Kei Koutou Manatuʼi Koa?

◻ ʼE lava liliu feafeaʼi te ʼu ʼahiʼahi ko he ʼu meʼa ʼe tou fiafia ai?

◻ Koteā ʼihi ʼu ʼahiʼahi ʼo tatatou tui ʼe lagi faigataʼa tatatou ʼiloʼi?

◻ Koteā te ʼu fua lelei ʼaē ʼe feala ke tou maʼu, mo kapau ʼe tou lava kātakiʼi te ʼu ʼahiʼahi ʼo tatatou tui?

[Paki ʼo te pasina 17]

Neʼe pilisoniʼi ia A. H. Macmillan (ʼi muʼa ʼi te faʼahi hema), pea mo te ʼu tēhina takitaki ʼo te Sosiete Watch Tower, he neʼe tukugakoviʼi hala nātou

Neʼe kau ki te fakatahi ʼo Detroit, ʼi Michigan, ʼi te taʼu 1928

ʼI te fakaʼosi ʼo tona maʼuli, neʼe kei fakahā pe e te tēhina ko Macmillan tana tui

[Paki ʼo te pasina 18]

Ohage ko te famili ʼaenī, neʼe tokolahi te kau Kilisitiano ʼi Afelika neʼe nātou fakahā te lelei ʼo tanatou tui ʼaē neʼe ʼahiʼahiʼi