Tou Agatonu Kiā Kilisito Pea Mo Tana Tagata Kaugana Agatonu

“[Ko] tona pule . . . ʼe ina fakanofo anai ke pule ki ʼona koloa fuli.”—Mateo 24:45-47, MN.

1, 2. (a) Ko ai ʼaē ʼe fakahā ʼi te Tohi-Tapu, ʼe ko totatou Takitaki? (b) Koteā ʼaē ʼe fakahā ai ko Kilisito ʼe ina takitaki ia te kōkelekāsio faka Kilisitiano?

“AUA naa fakahigoa koutou ko he u takitaki, koteuhi ko toutou takitaki e tahi ko Kilisito.” (Mateo 23:10) ʼAki te ʼu palalau ʼaenī, neʼe fakahā lelei e Sesu ki tana ʼu tisipulo ʼe mole he tagata ʼi te kele ʼe liliu anai ko honatou takitaki. ʼE ko tonatou Takitaki pē e tahi ʼe nofo ʼi ʼi te lagi—ko Sesu Kilisito totonu. Pea ʼe maʼu e Sesu ia te tuʼulaga ʼaia he ko te ʼAtua ʼaē neʼe ina fakanofo kiai. Ko Sehova neʼe ina “fakatuuʼake Kilisito mai te mate, pea . . . nee ina foaki kia te ia . . . te ulu o te meafuape ki te Ekelesia, aia ko tona sino.”—Efeso 1:20-23.

² Kapau ko Kilisito ʼe ko te “ulu o te meafuape” ʼo ʼuhiga mo te kōkelekāsio, ʼe ina fai tana pule kiā meʼa fuli ʼi te loto kōkelekāsio. ʼE mole he meʼa ʼe ū kiā te ia ʼi te loto kōkelekāsio. ʼE ina tokagaʼi lelei te ʼaluʼaga fakalaumālie ʼo te ʼu kōkelekāsio fuli. ʼE hā lelei te faʼahi ʼaia ʼi te fakahā ʼaē neʼe foaki age ki te ʼapositolo ko Soane ʼi te fakaʼosi ʼo te ʼuluaki sēkulō ʼo totatou temi. Ki te ʼu kōkelekāsio e fitu, neʼe tuʼa nima te fakahā e Sesu tana ʼiloʼi tanatou ʼu gāue, mo tonatou ʼu puani mālohi, pea mo tonatou ʼu vaivaiʼaga, pea neʼe ina tokoniʼi mo fakaloto mālohiʼi ia nātou. (Apokalipesi 2:2, 9, 13, 19; 3:1, 8, 15) ʼE tou tui papau neʼe mahino pē ia Kilisito ki te ʼaluʼaga fakalaumālie ʼo te tahi ʼu kōkelekāsio ʼi Asia Veliveli, ʼi Italia, ʼi Keleka, ʼi Palesitina, ʼi Papiloni, ʼi Silia, pea mo ʼihi atu potu. (Gaue 1:8) ʼE feafeaʼi ʼi te temi nei?

Ko He Tagata Kaugana Agatonu

3. He koʼē ʼe matatonu ia te fakatatau ʼo Kilisito ki he ʼulu kae fakatatau tana kōkelekāsio ki he sino?

³ ʼI tona ʼosi fakatuʼuake pea ʼi te kiʼi temi siʼi pē ʼi muʼa ʼo tana hake ki tana Tamai ʼaē ʼe ʼi selō, neʼe ʼui fēnei e Sesu ki tana ʼu tisipulo: “Ko te pule katoa i Selo mo te kelekele kua foaki mai kia te au.” Neʼe ina toe ʼui: “Koeni, e au fakatahi mo koutou i te aho fuape o kaku ki te gataʼaga o te temi.” (Mateo 28:18-20) ʼE nofo anai mo nātou ko tonatou Pule. ʼI tana ʼu tohi ki te kau Kilisitiano ʼo Efeso pea mo Kolose, neʼe fakatatau e te ʼapositolo ko Paulo ia te kōkelekāsio faka Kilisitiano ki he “sino,” pea ko Kilisito ʼe ko te ʼUlu. (Efeso 1:22, 23; Kolose 1:18) ʼE ʼui ʼi te tohi The Cambridge Bible for Schools and Colleges, ko te fakatā ʼaia “ ʼe mole gata pē tona faka ʼuhiga ki he fakatahi maʼuhiga mo te Pule, kae ʼe toe faka ʼuhiga foki ko te finegalo ʼo te Pule ʼe fakahoko e te ʼu koga ʼaē ʼo te sino. ʼE natou liliu ko Tana ʼu meʼa gāue.” Ko ai te kūtuga ʼaē neʼe fakanofo e Kilisito ko hana meʼa gāue talu mai tona fakanofo hau ʼi te Puleʼaga ʼi te taʼu 1914?—Taniela 7:13, 14.

4. Ohagē ko tona fakakikite ʼi te lea faka polofetā ʼa Malakia, koteā ʼaē neʼe maʼu e Sehova mo Sesu Kilisito ʼi tanā ʼomai ʼo ʼaʼahi te fale lotu fakalaumālie?

⁴ Ko te lea faka polofetā ʼa Malakia neʼe ina fakakikite ko Sehova, “te ʼAliki moʼoni,” ʼe hoa mo “te tagata ʼave logo ʼo te fuakava,” ia Kilisito Sesu tona ʼAlo ʼaē neʼe mole heʼeki faʼa fualoa tona fakanofo hau, ʼe nā ʼomai anai ʼo fakamāu pea mo vakaʼi Tona “fale lotu,” peʼe ko Tona ʼapi tauhi fakalaumālie. ʼE ʼiloga ia ‘ko te temi ʼaē kua fakakatofa’ ke kamata ai ‘te fakamāu ʼo te ʼapi ʼo te ʼAtua’ neʼe hoko ʼi te taʼu 1918.a (Malakia 3:1; 1 Petelo 4:17) Neʼe sivi fakalelei ia nātou ʼaē neʼe natou ʼui ʼe natou fakafofoga ia te ʼAtua pea mo tana tauhi moʼoni ʼaē ʼi te kele. Pea neʼe liʼaki te ʼu lotu ʼo te Keletiate, ʼaē lolotoga te ʼu sēkulō neʼe natou akoʼi te ʼu akonaki ʼe natou fakalainoaʼi te ʼAtua pea mo natou tuʼu maʼua tāfito ʼo ʼuhiga mo te ʼu mātea ʼi te ʼUluaki Tau Faka Mālamanei. Neʼe ʼahiʼahiʼi ia te toe ʼo te kau Kilisitiano fakanofo agatonu, ʼo fakamaʼa nātou ʼi te afi, pea neʼe tali ia nātou, ʼo natou liliu maʼa Sehova “ko he hahaʼi ʼe natou momoli he mōlaga ʼi te faitotonu.”—Malakia 3:3.

5. ʼO mulimuli ki te lea faka polofetā ʼa Sesu ʼo ʼuhiga mo tana “ ʼi henī,” ko ai ʼaē neʼe ina fakamoʼoni ko ia te “tagata kaugana” agatonu?

⁵ Ohagē ko tona ʼui ʼi te lea faka polofetā ʼa Malakia, ʼi te fakaʼiloga mo ʼona koga kehekehe ʼaē neʼe foaki e Sesu ki tana ʼu tisipulo ke feala ai hanatou ʼiloʼi te temi ʼo tana “ ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī,” neʼe kau ai mo te fakatuʼutuʼu ke ʼiloʼi ai te kūtuga ʼo te “tagata kaugana.” Neʼe ʼui fēnei e Sesu: “Ko ai moʼoni te tagata kaugana agatonu mo poto ʼaē kua fakanofo e tona pule ki tana hahaʼi faifekau, ke ina foaki kiā nātou tanatou meʼa kai ʼi tona temi totonu? ʼE fiafia te tagata kaugana ʼaia, mo kapau ʼi te tau mai ʼo tona pule, ʼe ina maʼu mai ia ia ʼe ina fai fēia! ʼE au tala moʼoni atu kiā koutou: ʼE ina fakanofo anai ke pule ki ʼona koloa fuli.” (Mateo 24:3, 45-47, MN ) “ ʼI te tau mai” ʼa Kilisito ʼi te taʼu 1918 ʼo ʼaʼahi te “tagata kaugana,” neʼe ina maʼu te toe ʼo te kau tisipulo fakanofo agatonu talu mai te taʼu 1879 neʼe natou fakaʼaogaʼi te nusipepa ʼaenī ko Te Tule Leʼo pea mo ʼihi tohi faka Tohi-Tapu moʼo foaki te “meʼa kai [fakalaumālie] ʼi tona temi totonu.” Neʼe ina tali ia nātou fuli ko hana kūtuga gāue, peʼe ko hana “tagata kaugana,” pea ʼi te taʼu 1919 neʼe ina tuku age tona ʼu koloa fuli ʼi te kele ke natou tokaga kiai.

Ke Tokaga Ki Te ʼu Koloa ʼa Kilisito ʼi Te Kele

6, 7. (a) Koteā te tahi ʼu kupu neʼe fakaʼaogaʼi e Sesu ʼi tana talanoa ʼo ʼuhiga mo tana “tagata kaugana” agatonu? (b) Koteā ʼaē ʼe tonu ke tou toe mahino kiai ʼaki te kupu ʼaē neʼe fakaʼaogaʼi e Sesu, ia “te tagata tauhi ʼapi”?

⁶ ʼI te ʼu kiʼi māhina ʼi muʼa ʼo te fai e Sesu te lea faka polofetā ʼo ʼuhiga mo tana ʼi henī, mo te maʼuli ʼa te “tagata kaugana” ʼe ina fakafofoga anai ia ia ʼi te kele, neʼe talanoa ʼo ʼuhiga mo te “tagata kaugana” ʼaia, ʼo ina fakaʼaogaʼi te ʼu kupuʼi palalau kehekehe moʼo fakahā te ʼu gāue ʼaē kā fai anai e te tagata kaugana. Neʼe ʼui fēnei e Sesu: “Ko ai moʼoni koa te tagata tauhi ʼapi agatonu, ia ia ʼaē ʼe poto, ʼaē kā fakanofo anai e tona pule ki tana ʼu kaugana fuli pea mo haga foaki age kiā nātou hanatou ʼinasi meʼa kai ʼi tona temi totonu? ʼE moʼoni, ʼe au tala atu kiā koutou, ʼe Ina fakanofo anai . . . ke pule ki [ʼona koloa fuli].”—Luka 12:42, 44, MN.

⁷ ʼI te ʼu vaega ʼaenī ʼe fakahigoaʼi te tagata kaugana ko he tagata tauhi ʼapi, ko he kupu ʼe fakaliliu mai te faka Keleka pea ko tona faka ʼuhiga “ko te pule ʼo he loto fale peʼe ʼo he kele.” Ko te kūtuga ʼaē ʼe natou faʼufaʼu te tagata tauhi ʼapi, ʼe mole faka ʼuhiga pē ki he kūtuga popoto ʼe natou fakamahino he ʼu puani maʼuhiga mai te Tohi-Tapu. ʼO mole gata pē ʼi tana foaki ia te meʼa kai fakalaumālie “ ʼi tona temi totonu,” kae ʼe fakanofo anai “te tagata tauhi ʼapi agatonu” ke pule ki te ʼu kaugana fuli ʼa Kilisito pea mo tokaga ki te ʼu gāue ʼa Kilisito ʼi te kele, “ ʼona koloa fuli.” Koteā te ʼu koloa fuli ʼaia ʼa Kilisito?

8, 9. Koteā ‘te ʼu koloa’ ʼaē neʼe fakanofo te tagata kaugana ke tokaga kiai?

⁸ ʼI te ʼu maʼua ʼa te tagata kaugana, ʼe tonu ke tokaga ki te ʼu fale ʼaē ʼe fakaʼaogaʼi e te ʼu tisipulo ʼa Kilisito moʼo fai tanatou ʼu gāue faka Kilisitiano, ohagē lā ko te ʼu pilo lalahi pea mo te ʼu filiale ʼa te kau Fakamoʼoni ʼa Sehova, ʼo fēia mo tonatou ʼu fale fono—ia te ʼu Fale ʼo Te Puleʼaga pea mo te ʼu Fale Fakatahi—ʼi te mālamanei kātoa. Tahi ʼaē meʼa maʼuhiga, ʼe toe tokaga te tagata kaugana ki te fai ʼo he ʼu polokalama fakalaumālie fakaloto mālohi ʼi te vāhaʼa fuli moʼo ako te Tohi-Tapu pea mo fakatuʼutuʼu ʼi ʼihi māhina te ʼu fakatahi lalahi. ʼI te ʼu fakatahi ʼaia, ʼe fakahā ai te faʼahiga hoko ʼo te ʼu lea faka polofetā faka Tohi-Tapu, pea mo foaki he ʼu tokoni lelei ki te faʼahiga maʼuliʼi ʼo te ʼu pelesepeto faka Tohi-Tapu ʼi te ʼaho fuli.

⁹ ʼI te ʼu maʼua ʼa te tagata tauhi ʼapi, ʼe tonu ke toe tokaga ki te gāue ʼaē ʼe maʼuhiga tāfito ʼaē ko te faka mafola ʼo “te logolelei aeni o te puleaga” pea mo te ‘fai ʼo he ʼu tisipulo ʼi te hahaʼi ʼo te ʼu fenua fuli pē.’ Ko tona faka ʼuhiga ke akoʼi ki te hahaʼi ke natou fai ia meʼa fuli neʼe fakatotonu age e Kilisito te Pule ʼo te kōkelekāsio ke natou fai ʼi te temi fakaʼosi ʼaenī. (Mateo 24:14; 28:19, 20; Apokalipesi 12:17) ʼAki te gāue fai faka mafola pea mo te faiako neʼe tupu ai “te toe hahaʼi tokolahi” ʼo te ʼu kaumeʼa agatonu ʼo te toe ʼa te kau fakanofo. ʼE mahino ia ko te “ ʼu meʼa ʼaē ʼe manakoʼia [ʼaia] ʼo te ʼu puleʼaga fuli” ʼe kau ʼi te ʼu “koloa” maʼuhiga ʼa Kilisito ʼaē ʼe tokaga kiai te tagata kaugana agatonu.—Apokalipesi 7:9, MN; Asea 2:7.

Ko Te Kolesi Pule ʼe Ina Fakafofoga Ia Te Kalasi ʼo Te Tagata Kaugana

10. Ko ai te kūtuga ʼaē neʼe fakanofo ʼi te ʼuluaki sēkulō moʼo fai he ʼu tonu, pea neʼe koteā tona fua ki te ʼu kōkelekāsio?

¹⁰ ʼI te ʼu maʼua maʼuhiga ʼaē ʼe fai e te tagata kaugana agatonu, ʼe lahi mo te ʼu tuʼuga tonu ke ina fai. ʼI te kōkelekāsio ʼo te ʼuluaki sēkulō, ko te ʼu ʼapositolo pea mo te ʼu tagata ʼāfea ʼo Selusalemi neʼe natou fakafofoga ia te tagata kaugana, ʼo natou fai te ʼu tonu maʼa te kōkelekāsio kātoa. (Gaue 15:1, 2) Ko te ʼu tonu ʼaē neʼe fai e te kolesi pule ʼaia ʼo te ʼuluaki sēkulō, neʼe foaki ki te ʼu kōkelekāsio ʼaki te ʼu tohi pea mo te ʼu taupau feʼoloʼaki. Neʼe fiafia te kau Kilisitiano ʼo te ʼuluaki sēkulō ʼi tanatou maʼu ia te takitaki lelei ʼaia, pea ʼaki tanatou gāue fakatahi mo te kolesi pule neʼe tupu ai iā nātou te tokalelei pea mo te logo tahi.—Gaue 15:22-31; 16:4, 5; Filipe 2:2.

11. Ko ai iā ʼaho nei ʼe fakaʼaogaʼi e Kilisito moʼo takitaki tana kōkelekāsio, pea ʼe tonu anai ke feafeaʼi tatatou aga ʼo ʼuhiga mo te kūtuga ʼo te kau Kilisitiano fakanofo ʼaia?

¹¹ Ohagē ko te kau Kilisitiano ʼo te ʼuluaki sēkulō, iā ʼaho nei ʼi te kele ʼe faʼufaʼu ia te Kolesi Pule ʼo te ʼu tisipulo ʼa Kilisito e te kiʼi kūtuga ʼo te ʼu tagata taupau neʼe fakanofo e te laumālie. ʼAki tona “nima matau” mālohi, ko Kilisito te Pule ʼo te kōkelekāsio ʼe ina takitaki te ʼu tagata agatonu ʼaia ʼi tanatou tokaga ki te faka mafola ʼo te Puleʼaga. (Apokalipesi 1:16, 20) ʼI te fakamatala ʼo tona maʼuli, ko Albert Schroeder, ko he tehina kua fualoa tana kau ki te Kolesi Pule neʼe mole heʼeki faʼa fualoa tana mate, neʼe ina tohi fēnei: “ ʼI te ʼu Feliafā fuli ʼe fakatahi ai te Kolesi Pule, ʼo kamata tanatou fono ʼaki te faikole moʼo kole te takitaki ʼa te laumālie ʼa Sehova. Moʼo vakaʼi te ʼu fehuʼi kehekehe pea mo te ʼu tonu ke fai, ʼe ko he toe gāue ʼe fai kiai ke ʼalutahi mo te Folafola ʼa te ʼAtua te Tohi-Tapu.”b ʼE feala hatatou falala ki te kau Kilisitiano fakanofo agatonu ʼaia. ʼO ʼuhiga tāfito mo te Kolesi Pule, ʼe tonu ke tou mulimuli ki te fakatotonu ʼaenī ʼa te ʼapositolo ko Paulo: “Kotou talagafua kiā nātou ʼaē ʼe natou takitaki ia koutou, pea mo kotou fakalogo, heʼe natou leʼoleʼo tuʼumaʼu ki ʼokotou nefesi.”—Hepeleo 13:17, MN.

Tou Fakahā Ia Te Fakaʼapaʼapa ʼAē ʼe Tuha Mo Te Tagata Kaugana Agatonu

12, 13. Koteā te ʼu tupuʼaga faka Tohi-Tapu ʼaē ke tou fakahā ai te fakaʼapaʼapa ki te kalasi ʼo te tagata kaugana?

¹² ʼE ʼi ai te tupuʼaga tāfito ʼaē ʼe tonu ai ke tou fakahā ia te fakaʼapaʼapa ʼaē ʼe tuha ki te kalasi ʼo te tagata kaugana agatonu, heʼe kapau ʼe tou fai ia te faʼahi ʼaia, ʼe ko te Pule ko Sesu Kilisito ʼaē ʼe tou fakaʼapaʼapa ki ai. Neʼe faitohi ia Paulo ʼo ʼuhiga mo te kau fakanofo: “Ko he tahi neʼe pāuiʼi kae ko he tagata ʼāteaina, ʼe ko he kaugana ia ʼa Kilisito. Neʼe fakatau koutou ʼaki he totogi.” (1 Kolonito 7:22, 23, MN; Efeso 6:6) Koia, kā tou fakalogo fakalelei ki te takitaki ʼa te tagata kaugana agatonu pea mo tana Kolesi Pule, ʼe tou fakalogo kiā Kilisito, te Pule ʼo te tagata kaugana. ʼE tou “fakamooni . . . ko Sesu Kilisito e Aliki ki te kololia o te Atua te Tamai” mo kapau ʼe tou fakahā ia te fakaʼapaʼapa ʼaē ʼe tuha mo te meʼa gāue ʼe fakaʼaogaʼi e Kilisito moʼo tokaga ki tona ʼu koloa ʼi te kele.—Filipe 2:11.

¹³ Ko te tahi tupuʼaga faka Tohi-Tapu ke tou fakaʼapaʼapa ki te tagata kaugana agatonu heʼe ko te kau Kilisitiano fakanofo ʼaē ʼe kei māʼuʼuli ʼi te kele ʼe fakatatau ki he “fale lotu” ʼe nofo ai Sehova “i te laumalie.” ʼE natou “maonioni.” (1 Kolonito 3:16, 17, MN; Efeso 2:19-22) ʼE ko te kūtuga ʼaia ʼaē ʼe fakatatau ki he fale lotu taputapu ʼaē neʼe foaki kiai e Sesu tona ʼu koloa ʼi te kele, pea ʼe fakalogo ʼāteaina pē ki te kūtuga ʼaia ʼihi ʼu tonu pea mo maʼua ʼi te loto kōkelekāsio. Koia ʼaē, ko nātou fuli ʼi te kōkelekāsio ʼe natou faka ʼuhiga ʼe ko he maʼua taputapu ia tanatou muliʼi pea mo fakalogo ki te takitaki ʼaē ʼe haʼu mai te tagata kaugana agatonu pea mo tana Kolesi Pule. ʼIo, ʼe ko he pilivilēsio lahi ki te “tahi ʼu ovi” hanatou lagolago ki te kalasi ʼo te tagata kaugana ʼi tana tokaga ki te ʼu gāue ʼa te Pule.—Soane 10:16, MN.

Tou Lagolago Agatonu Ki Te Kalasi ʼo Te Tagata Kaugana

14. Ohagē ko tona fakakikite e Isaia, ʼe faka ʼuhiga feafeaʼi te haʼele ʼa te tahi ʼu ovi ʼi muli ʼo te kalasi ʼo te tagata kaugana fakanofo pea mo gāue ohagē ko he “kau gāue ʼe mole totogi”?

¹⁴ Ko te fakalogo ʼa te tahi ʼu ovi ki te kau fakanofo ʼo te Iselaele fakalaumālie neʼe kua fakakikite ʼi te lea faka polofetā ʼaenī ʼa Isaia: “Koʼenī te folafola ʼa Sehova: ‘Ko te kau gāue ʼe mole totogi ʼo Esipito, ko te kau fakatau ʼo Etiopea pea mo te kau Sapea, te ʼu tagata lalahi, ʼe natou fakalaka anai iō koe, pea ʼe natou liliu anai ko hau hahaʼi. ʼE natou haʼele anai ʼi muli iā koe; ʼe natou fakalaka anai mo he ʼu seini, pea ʼi ʼou muʼa ʼe tulolo ai anai. ʼE natou faikole atu anai, ʼo natou ʼui fēnei: “ ʼEī, ʼe fakatahi te ʼAtua mo koe, ʼe mole he tahi age ʼi tuʼa atu; ʼe mole he tahi age ʼAtua.” ’ ” (Isaia 45:14) Iā ʼaho nei ko te tahi ʼu ovi ʼe natou haʼele ʼi muli ʼo te kalasi ʼo te tagata kaugana fakanofo pea mo tana Kolesi Pule, ʼe natou fakalogo ki tanā takitaki. Ohagē ko he “kau gāue ʼe mole totogi,” ko te tahi ʼu ovi ʼe natou foaki mo he loto kātoa tonatou mālohi pea mo tonatou ʼu koloa moʼo lagolago ki te gāue fai faka mafola faka mālamanei ʼaē neʼe foaki age e Kilisito ki tana ʼu tisipulo fakanofo ʼaē ʼi te kele.—Gaue 1:8; Apokalipesi 12:17.

15. Neʼe fakakikite feafeaʼi iā Isaia 61:5, 6 te felōgoi ʼaē kā hoko anai ʼi te tahi ʼu ovi pea mo te Iselaele fakalaumālie?

¹⁵ ʼE fiafia pea mo loto fakafetaʼi te tahi ʼu ovi i ʼi tanatou kaugana kiā Sehova ʼi te takitaki ʼa te kalasi ʼo te tagata kaugana pea mo tana Kolesi Pule. ʼE natou fakamoʼoni ko te kau fakanofo ko te hahaʼi ʼo “te Iselaele a te Atua.” (Kalate 6:16) Ko te “kau matāpule” pea mo te ‘hahaʼi ʼo tuʼa’ ʼe natou fakatahi mo te Iselaele fakalaumālie, ʼe natou gāue fiafia ko he “hahaʼi gāue kele” pea mo he “hahaʼi tō fuʼu vite” ʼi te takitaki ʼo te kau fakanofo, ko te “kau pelepitelō ʼa Sehova” pea mo te ‘kau minisi ʼo te ʼAtua.’ (Isaia 61:5, 6) ʼE natou kau mālohi ʼi te faka mafola ʼo te logo lelei ʼaenī ʼo te Puleʼaga pea mo te fai ʼo ni ʼu tisipulo ʼo te ʼu hahaʼi ʼo te ʼu puleʼaga kehekehe. ʼE natou tokoni fakamālotoloto ki te kalasi ʼo te tagata kaugana ʼi te tokaga ki te kau ovi pea mo te fafaga ʼo te hahaʼi ʼaē ʼe foʼofoʼou mai.

16. Koteā ʼaē ʼe ina uga te tahi ʼu ovi ke natou lagolago agatonu ki te tagata kaugana agatonu mo poto?

¹⁶ ʼE fakamoʼoni e te tahi ʼu ovi ia te fua lelei ʼo te gāue kinakina ʼa te tagata kaugana agatonu kiā nātou ʼi tana foaki age te meʼa kai fakalaumālie ʼi tona temi totonu. ʼAki he agavaivai, ʼe mahino kiā nātou kanapau lā neʼe mole ʼi ai te tagata kaugana agatonu mo poto, ʼe siʼisiʼi anai tanatou mahino peʼe mole pē natou mahino ki te ʼu moʼoni maʼuhiga ʼo te Tohi-Tapu, ohagē lā ko te tuʼi ʼaliki ʼa Sehova, mo te tapuhā ʼo tona huafa, mo te Puleʼaga, mo te ʼu lagi foʼou pea mo te kele foʼou, mo te nefesi, mo te ʼaluʼaga ʼo te kau mate, pea mo te ʼulugaaga moʼoni ʼo Sehova mo tona ʼAlo, pea mo te laumālie māʼoniʼoni. ʼE mole loto fakafetaʼi pē pea mo agatonu ia te tahi ʼu ovi, kae ʼaki te ʼofa ʼe natou toe lagolago ki te “ ʼu tehina” fakanofo ʼo Kilisito ʼi te kele ʼi te temi fakaʼosi ʼaenī.—Mateo 25:40, MN.

17. Koteā ʼaē neʼe fakatuʼutuʼu e te Kolesi Pule ke ina fai, pea koteā ʼaē kā tou vakaʼi anai ʼi te ʼalatike kā hoa mai?

¹⁷ ʼI te hifohifo māmālie pē ʼo te kaugamālie ʼo te kau fakanofo, ʼe mole feala hanatou kau ki te ʼu kōkelekāsio fuli moʼo tokaga ki te ʼu koloa ʼa Kilisito. Koia ʼaē ʼe fakanofo ai e te Kolesi Pule ia te ʼu tagata ʼi te tahi ʼu ovi moʼo tokaga ki te ʼu gāue ʼaē ʼa te kau Fakamoʼoni ʼa Sehova ʼi te ʼu filiale, mo te ʼu tisitilike, mo te ʼu silikō, mo te ʼu kōkelekāsio. Ko tatatou aga ʼaē ʼe tou fakahā ki te ʼu tagata tauhi ovi lagolago ʼaia, ʼe ʼi ai koa hona fua ki tatatou agatonu ʼaē kiā Kilisito pea mo tana tagata kaugana agatonu? ʼE tou vakaʼi anai te tali ʼo te fehuʼi ʼaia ʼi te ʼalatike ʼaē kā hoa mai.

[Kiʼi nota]

Moʼo Fakamanatu

• Ko ai totatou Takitaki, pea ʼe feafeaʼi hatatou ʼiloʼi ʼe mahino lelei ki te ʼu meʼa ʼaē ʼe hoko ʼi te ʼu kōkelekāsio?

• ʼI te ʼahiʼahiʼi ʼo te “fale lotu,” ko ai ʼaē neʼe maʼu atu ʼe gāue ohagē ko he tagata kaugana agatonu, pea koteā te ʼu koloa ʼaē neʼe tuku age ke taupau e nātou?

• Koteā te ʼu tupuʼaga faka Tohi-Tapu ʼaē ke tou lagolago agatonu ki te tagata kaugana agatonu?

[Paki ʼo te pasina 23]

Ko te “ ʼu koloa” ʼaē ʼe tokaga kiai te “tagata tauhi ʼapi” ʼe ko te ʼu koloa faka mālama, mo te ʼu polokalama fakalaumālie, pea mo te gāue fai faka mafola

[Paki ʼo te pasina 25]

ʼAki te fai faka mafola mālohi ʼa te tahi ʼu ovi ʼe natou lagolago ai ki te kalasi ʼo te tagata kaugana agatonu