Tou Fakaʼaoga Fakalelei Totatou ʼĀteaina Faka Kilisitiano

“Koutou hage ko he ʼu tagata ʼāteaina, kae ke koutou taupau aipe tokotou ʼāteaina (...) ohage ko he ʼu kaugana ʼa te ʼAtua.” — 1 Petelo 2:16.

1. Ko te ʼāteaina feafeaʼi ʼaē neʼe pulihi e Atama, pea ko te ʼāteaina feafeaʼi koa ʼaē ʼe toe foaki anai e Sehova ki te tagata?

ʼI TE talagataʼa ʼaē ʼo tatatou ʼu ʼuluaki mātuʼa ʼi te ʼōloto ʼo Eteni, neʼe nā pulihi maʼa tanā fānau te tofia taulekaleka ʼaē ko te ʼāteaina: neʼe mole kei nā hāo ʼi te agahala pea mo te fakahala. Koia, ko tatou fuli neʼe tou tutupu popūla ki te fakahala pea mo te mate. Kae meʼa lelei foki, neʼe fakatuʼutuʼu e Sehova ke ina foaki ki te tagata agatonu he ʼāteaina fakatalakitupua. Ia ʼaho nei, ko te hahaʼi faitotonu ʼe nātou talitali loto hoha ki “te ʼāteaina manuʼia ʼo te ʼu fānau ʼa te ʼAtua”, ʼaē ʼe nātou “ ʼāteaina mai te popūla ʼo te fakahala ki te maʼu ʼo te ʼāteaina faka kolōlia ʼo te ʼu fānau ʼa te ʼAtua.” — Loma 8:19-21.

‘Neʼe fakanofo nātou ke nātou faka mafola’

2, 3. a) Ko ai koa “te ʼu fānau ʼa te ʼAtua”? b) Ko te tuʼulaga taulekaleka feafeaʼi koa ʼaē ʼe nātou maʼu, pea koteā koa te maʼua ʼaē ʼe pipiki ki ai?

² Ko ai koa “te ʼu fānau ʼa te ʼAtua” ʼaia? Ko te ʼu tēhina ʼo Sesu ʼaē neʼe fakanofo e te laumālie ke nātou pule mo ia ʼi te Puleʼaga ʼi selo. Neʼe nātou kamata ʼasi ʼi te ʼuluaki sekulo ʼo totatou temi. Neʼe nātou tali te moʼoni ʼaē neʼe akonakiʼi e Sesu, pea ʼi te Penikosite ʼo te taʼu 33 ʼo totatou temi, neʼe nātou kau ki te pilivilesio faka kolōlia ʼaē neʼe talanoa ki ai ia Petelo ʼi tana faitohi kia nātou, ʼo fēnei: “Ko koutou ‘ko he hākoga neʼe fili, ko he kau pelepitelo faka hau, ko he puleʼaga maʼoniʼoni, ko he hahaʼi neʼe amanaki ia ke liliu ko he meʼa makehe’.” — 1 Petelo 2:9a; Soane 8:32.

³ Ko he meʼa makehe ʼa te ʼAtua — ʼe ko he tapuakina taulekaleka ia! Pea ki te temi nei, ko te toe ʼo te ʼu foha ʼo te ʼAtua neʼe fakanofo e te laumālie, ʼe nātou toe maʼu te tuʼulaga pilivilesio ʼaia ʼi tafa ʼo te ʼAtua. Kae ʼe ko he pilivilesio maʼoluga fēnei, ʼe pipiki ki tona ʼu maʼua. Neʼe talanoa ia Petelo ki te pilivilesio e tahi ʼi te ʼu pilivilesio ʼaia, ʼi tana ʼui ʼaenī: “ ‘Ke koutou kalagaʼi te ʼu vilitute’ ʼo ia ʼaē neʼe ina pāuʼi koutou mai te fakapōʼuli ki tona mālama taulekaleka.” — 1 Petelo 2:9b.

4. Neʼe fai feafeaʼi koa e te kau kilisitiano fakanofo te maʼua ʼaē ʼe pipiki ki te ʼāteaina faka kilisitiano?

⁴ Ko te kau kilisitiano fakanofo neʼe nātou fai koa tonatou maʼua ʼaē ko te faka mafola ʼo te ʼu vilitute ʼo te ʼAtua? Ei. ʼI te lea fakakikite ʼaē ʼo ʼuhiga mo te kau kilisitiano fakanofo ʼo te taʼu 1919, neʼe ʼui e Isaia fēnei: “Ko te laumālie ʼo te Tuʼi ʼAliki ko Sehova ʼe ia te ʼau, he neʼe ina fakanofo ʼau ke ʼau fakahā ki te kau agavaivai he logo lelei. Neʼe ina fekauʼi ʼau ke ʼau faitoʼo ia nātou ʼe lotomamahi, mo faka mafola kia nātou ʼe pilisoni he ʼāteaina, pea ki te kau kivi ke nātou toe sisio; mo faka mafola te taʼu loto manavaʼofa ʼo Sehova pea mo te ʼaho lagavaka ʼo totatou ʼAtua.” (Isaia 61:1, 2). Ia ʼaho nei, ko te toe ʼo te kau kilisitiano fakanofo, ʼe nātou muliʼi te faʼifaʼitaki ʼa Sesu, ʼe faka ʼuhiga tāfito e te Tohi-Tapu te ʼu palalau ʼaenī kia nātou, heʼe nātou faka mafola mālohi te logo lelei ʼo te ʼāteaina. — Mateo 4:23-25; Luka 4:14-21.

5, 6. a) Koteā koa te fua lelei ʼo te faka mafola fakafiafia ʼo te kau kilisitiano fakanofo? b) Koteā te ʼu pilivilesio pea mo te ʼu maʼua ʼe fai e te hahaʼi tokolahi?

⁵ Ko tanatou faka mafola fakafiafia ʼaia neʼe fua lelei, heʼe ko te hahaʼi tokolahi ʼo te tahi ʼu ōvi neʼe hā ʼi te malamanei ʼi te ʼu ʼaho fakaʼosi ʼaenī. ʼE nātou ʼomai mai te ʼu fenua kehekehe ʼo tauhi fakatahi pea mo te kau kilisitiano fakanofo kia Sehova, pea neʼe haga aipe ia te moʼoni ʼo hāofaki ia nātou (Sakalia 8:23; Soane 10:16). Ohage ko Apalahamo, neʼe tala ko nātou ko te kau agatonu ʼaki tanatou tui pea mo tanatou vahaʼa lelei ʼaē mo Sehova ʼAtua. Pea ohage ko Laape, ʼi tonatou tala ʼaē ko nātou ko te kau agatonu, ʼe nātou maʼuʼuli anai ʼi Halamaketone (Sake 2:23-25; Fakahā 16:14, 16). Kae ko he ʼu pilivilesio maʼoluga fēnei ʼe tau mo te maʼua ʼaē ko te tala ki niʼihi te kolōlia ʼo te ʼAtua. Ko te tupuʼaga ʼaia ʼo te sio ʼaē e Soane ʼe nātou fakavikiviki haʼele ia Sehova: ʼe nātou “kalaga leʼo lahi, ʼo fēnei: ‘Ko te maʼuli, ʼe mātou maʼu mai tomatou ʼAtua ʼaē ʼe nofo ʼi te hekaʼaga hau, pea mo te Akeno.’ ” — Fakahā 7:9, 10, 14.

⁶ ʼI te taʼu ʼaenī kua hili atu, ko te hahaʼi tokolahi ʼaē kua toko fā miliona tupu ʼi te temi nei, feiā mo te kiʼi faga ōvi ʼo te kau kilisitiano fakanofo, neʼe nātou fai te ʼu hola fakalaka e tahi miliale moʼo faka mafola te ʼu vilitute ʼo Sehova. Neʼe ko he fakaʼaoga lelei pe ʼaia ʼo tonatou ʼāteaina fakalaumālie.

“Fakaʼapaʼapa ki te hau”

7, 8. Koteā koa te maʼua ki te ʼu puleʼaga ʼo te malamanei ʼe pipiki ki te ʼāteaina faka kilisitiano, pea koteā te aga ʼe tonu ke kita tokaga ki ai ʼo ʼuhiga mo te faʼahi ʼaia?

⁷ Ko totatou ʼāteaina faka kilisitiano ʼe pipiki ki ʼihi ʼu maʼua. Neʼe talanoa ia Petelo ki te ʼu maʼua ʼaia, ʼo fēnei: “Fakaʼapaʼapa ki te ʼu faʼahiga tagata kehekehe, ʼoʼofa ki te famili katoa ʼo te ʼu tēhina, manavasiʼi ki te ʼAtua, koutou fakaʼapaʼapa ki te hau.” (1 Petelo 2:17). Koteā koa te ʼuhiga ʼo te lea ʼaē “fakaʼapaʼapa ki te hau”?

⁸ “Ko te hau” ʼe fakatā ki te kau pule ʼo te malamanei. Ia ʼaho nei, ko te aga heʼe fakaʼapaʼapa ki te fai pule kua ʼiloga ʼi te malamanei, pea ʼe feala pe foki ke pikisia vave ai te kau kilisitiano. ʼE feala pe foki ke ʼui e te kilisitiano moʼo ā te fakaʼapaʼapa ki “te hau” ʼuhi ko “te mālama katoa ʼe takoto ʼi te pule ʼa te agakovi”. (1 Soane 5:19.) Koia, ʼe manatu anai ia ʼe feala pe tana talagataʼa ki te ʼu lao ʼaē ʼe mole ina fia muliʼi pea mo tana mole totogi te paʼaga tukuhau, mo kapau ʼe mole fakatūʼa ia. Kae ko te aga ʼaia ʼe mole felōgoʼi tahi ia pea mo te fakatotonu ʼaē ʼa Sesu ke “foaki te ʼu meʼa ʼa Sesale kia Sesale”. Ko tona ʼuhiga ʼaia, ‘ ʼe fakaʼaoga totatou ʼāteaina ohage ko he pulou ki he meʼa kovi’. — Mateo 22:21; 1 Petelo 2:16.

9. Koutou fakahā te ʼu tupuʼaga lelei e lua ʼo ʼuhiga mo te fakalogo ki te ʼu puleʼaga ʼo te malamanei?

⁹ ʼE fakamaʼua te kau kilisitiano ke nātou fakaʼapaʼapa ki te fai pule pea mo fakalogo ki ai — logope mokā ko te fakalogo ʼaia ʼe faka tuʼakoi (Gāue 5:29). Koteā tona tupuʼaga? ʼI te 1 Petelo 2:14, ʼe tuku mai e Petelo te ʼu tupuʼaga e tolu ʼi tana ʼui ʼaē ko te ʼu puleʼaga “neʼe fekauʼi mai [e te ʼAtua] moʼo tautea te kau agakovi, kae moʼo fakavikiviki ia nātou ʼaē ʼe agalelei.” Ko te manavahe ʼaē ki te tautea ʼe ko he tahi ʼaenā tupuʼaga maʼuhiga ke fakalogo ki te fai pule. ʼE ko he meʼa fakaufiufi he fakatūʼa pe ʼe ko he pilisoniʼi ʼo he Fakamoʼoni ʼa Sehova ʼuhi ko hana aga mālohi, hana kaihaʼa pe ʼe ko he tahi age pe aga ʼe kovi! Koutou fakakaukau age muʼa te fakahā fakafiafia e niʼihi he ʼu meʼa fēnei. Pea tahi foki, ʼi tatatou fakalogo ki te ʼu lao, ʼe vikivikiʼi anai tatou e te kau tagata fai lao. ʼO feala ai ke tou maʼu he ʼāteaina lahi moʼo fakahoko ta kita gāue faka mafola ʼaē ʼo te logo lelei. Pea, ‘ ʼaki te fai ʼo te aga ʼe lelei, ʼe tou māpunuʼi te launoa ʼa te hahaʼi manatu hala.’ (1 Petelo 2:14, 15) Ko te lua tupuʼaga ʼaia ʼo te maʼuhiga ʼaē ʼo te fakalogo ki te fai pule. — Loma 13:3.

10. Koteā te tupuʼaga tāfito ʼaē ʼo te maʼua ke tou fakalogo ki te ʼu puleʼaga ʼo te malamanei?

¹⁰ Kae, ʼe ʼi ai te tahi age tupuʼaga mālohi. Ko te ʼu puleʼaga ʼe tuʼu he neʼe fakagafua e Sehova. Ohage ko te ʼui ʼa Petelo, ko te kau takitaki politike neʼe “fekauʼi mai” e Sehova, pea “ko te finegalo ʼo te ʼAtua” ʼaē ke fakalogo te kau kilisitiano kia nātou ʼaia (1 Petelo 2:15a). Feiā aipe, ki te ʼapositolo ko Paulo neʼe ina ʼui fēnei: “Ko te ʼu puleʼaga ʼaē ʼe tuʼu ʼuhi he neʼe tuku e te ʼAtua.” Koia, ʼaki totatou leʼo ʼo loto ʼaē neʼe akoʼi e te Tohi-Tapu, ʼe ina uga ia tatou ke tou fakalogo ki te ʼu puleʼaga ʼaia. Kapau ʼe mole tou fia fakalogo kia nātou ʼaia, ʼe tou “fakafeagai ki te fakatuʼutuʼu ʼa te ʼAtua”. (Loma 13:1, 2, 5.) Ko ai koa ia tatou ʼe fia fakafeagai faʼifaʼitaliha anai ki te fakatuʼutuʼu ʼa te ʼAtua? ʼE ko he fakaʼaoga kovi anai ia ʼo te ʼāteaina faka kilisitiano ʼi te temi ʼaia!

‘ ʼOʼofa ki te ʼu tēhina’

11, 12. a) Pea koteā totatou maʼua ki totatou ʼu kau fagona ʼi te tui ʼe tupu mai totatou ʼāteaina faka kilisitiano? b) Ko ai tāfito koa ʼaē ʼe tonu ke tou ʼoʼofa ki ai, pea koteā tona tupuʼaga?

¹¹ Neʼe toe ʼui e Petelo ko te kilisitiano, ʼe tonu anai ke “ ʼoʼofa ki te famili katoa ʼo te ʼu tēhina”. (1 Petelo 2:17.) Ko te tahi ʼaenā maʼua ʼe pipiki ki te ʼāteaina faka kilisitiano. Tokolahi ia tatou ʼe pipiki ki te kokelekasio, ʼio, ʼe tou kau fuli ki te famili, pe ʼe ko he kautahi faka malamanei ʼo te ʼu tēhina. ʼI ha kita fakahā kia nātou totatou ʼofa, ʼe tou fakaʼaoga fakalelei aipe totatou ʼāteaina. — Soane 15:12, 13.

¹² Neʼe fakakeheʼi e te ʼapositolo ko Paulo te faʼahiga kilisitiano ʼaē ʼe tonu ke tou ʼoʼofa tāfito ki ai. Neʼe ina ʼui fēnei: “Koutou talagafua kia nātou ʼaē ʼi ʼo kotou fuga ʼulu pea mo koutou fakalogo, heʼe nātou leʼoleʼo tuʼumaʼu ʼo kotou ʼu nefesi, ohage ko he ʼu tagata ʼe fakamaʼuaʼi anai; koteʼuhi ke nātou fai fakafiafia kae ʼaua naʼa nātou fai fakaloto mamahi, heʼe toe maui kovi anai pe kia koutou.” (Hepeleo 13:17). Ko te ʼu tagata ʼāfea ʼaē ʼe takitaki ʼi te kokelekasio. ʼE moʼoni, ko te ʼu tagata ʼaia ʼe mole nātou haohaoa ʼi te agahala. Kae, neʼe fakanofo ia nātou ʼaki te takitaki ʼaē ʼa te Kolesi pule. ʼE nātou foaki te faʼifaʼitaki pea mo te loto tokaga; pea tahi foki, neʼe fili ia nātou moʼo taupau ʼo totatou ʼu nefesi. ʼE ko he gāue maʼuhiga ia (Hepeleo 13:7)! Meʼa manuʼia foki, ʼe lahi pe te ʼu kokelekasio ʼe nātou gāue fakatahi, pea ʼe fiafia te kau tagata ʼāfea ʼi tanatou gāue fakatahi mo te ʼu kokelekasio ʼaia. ʼE faigataʼa ʼaupito te gāue mokā ʼe mole fia gāue fakatahi ni hahaʼi. Kae ko te tagata ʼāfea ʼe ina fai anai tana gāue ohage ko te ʼui ʼaē ʼa Paulo, ʼe ina “fai fakaloto mamahi”. Kae, ʼe mole tou loto anai foki ke loto mamahi te ʼu tagata ʼāfea ʼuhi ko tatou! ʼE tou loto ke nātou fiafia ʼi tanatou gāue ke feala hanatou fakaloto mālohiʼi aipe ia tatou.

13. Koteā te ʼu faʼahiga meʼa ʼe feala ke tou gāue fakatahi ai mo te kau tagata ʼāfea?

¹³ Koteā koa te ʼu faʼahiga meʼa ʼaē ʼe feala ai ke tou gāue fakatahi mo te ʼu tagata ʼāfea? ʼUluaki, ʼi hatatou lagolago ki te taupau pea mo te fakamaʼa ʼo te Fale ʼo te Puleʼaga. Pea mo ha kita gāue fakatahi mo nātou ki te ʼaʼahi ʼo te kau mahahaki pea mo tokoni ki te kau māʼimoa. Pea tahi foki, ke tou haga nonofo maʼu ʼi te faʼahi fakalaumālie, ke ʼaua naʼa tou hage ko he kavega. Ko te faʼahi ia ʼaē ʼe maʼuhiga, ʼe tonu ke tou gāue fakatahi pea mo nātou, ko te taupau ʼo te kokelekasio ʼi te ʼu tuʼutāmaki ʼo te ʼu aga heʼe ʼaoga pea mo fakalaumālie, ʼi ta kita aga pea mo tala te ʼu agahala mamafa ʼaē ʼe tou ʼiloʼi neʼe hoko.

14. ʼE feafeaʼi koa hatatou lagolago ki te ʼu faʼahiga tautea neʼe fai e te kau tagata ʼāfea?

¹⁴ Ko te meʼa ʼaē ʼe tautau hoko ki te taupau ʼo te maʼa ʼo te kokelekasio, ko te ʼu tagata ʼāfea ʼe nātou fakamavae te tagata ʼaē ʼe mole fakahemala ki tana agahala (1 Kolonito 5:1-5). Ko te tautea ʼaia ʼe ina taupau te kokelekasio. Ko he tahi pe ʼaenā tokoni ki te tagata agahala ke ina mahino ki tana hala. Koteā anai e hoko mokā ko ia ʼaē neʼe fakamavae ko totatou kaumeʼa leleʼi pe ʼe ko totatou kāiga? Kapau la ko tatatou tāmai, ko tatatou faʼe, ko totatou foha pe ʼe ko totatou ʼofafine. ʼE tou tali anai koa te tautea ʼaē neʼe fai e te kau tagata ʼāfea? ʼE moʼoni, ʼe ko he meʼa ʼe mata faigataʼa. Kae, ʼe mole tou fakaʼaoga lelei anai totatou ʼāteaina mo kapau ʼe mole tou tali ia te tautea ʼaē neʼe fai e te kau tagata ʼāfea pea mo hoko atu pe tatatou maʼuli fakatautehina ʼi te faʼahi fakalaumālie mo he tahi ʼe ina fakahalaʼi te kokelekasio (2 Soane 10, 11)! Ko te ʼu kaugana fuli pe ʼa Sehova ʼe tau mo te ʼu fakavikiviki ʼi tanatou gāue fakatahi ki te faʼahi ʼaia. Koia, ko te kautahi ʼa Sehova ʼe imakulata aipe ʼi te mālama ʼuli ʼaenī. — Sake 1:27.

15. Kapau neʼe fai e he tahi he agahala mamafa, koteā ʼe tonu ke ina fai fakavilivili?

¹⁵ Koteā anai ʼe hoko mo kapau ko tatou ʼaē neʼe fai ia te agahala mamafa? Ko te hau ko Tavite neʼe lea fēnei ʼo ʼuhiga mo nātou ʼaē ʼe ʼofa ki ai Sehova: “Ko ai anai ʼe feala ke hake ki te moʼuga ʼo Sehova, pea mo feala ke tuʼu anai ʼi tona nofoʼaga maʼoniʼoni? Ko ʼaē ʼe maʼa tona ʼu nima pea mo tona loto, ʼaē neʼe mole meʼa noaʼi Toku nefesi, pea neʼe mole ina fai he fakamoʼoni loʼi.” (Pesalemo 24:3, 4). Kapau ko he meʼa pe neʼe tou fai, ʼo tupu ai te mole kei “maʼa ʼo totatou ʼu nima pea mo totatou loto”, ʼe tonu ke tou fai he puleʼaki fakavilivili. Heʼe ko totatou maʼuli heʼe gata ʼe tuʼutāmaki ia.

16, 17. He koʼe koa ko ia ʼaē neʼe agahala ʼe mole tonu ke ina fakatokatoka tokotahi?

¹⁶ Ko ʼihi ʼe nātou fia fufū tanatou ʼu agahala mamafa, lagi ʼo nātou ʼui fēnei: ‘Neʼe kua ʼau kofesio pe kia Sehova pea neʼe kua ʼau fakahemala. He koʼe koa ʼe tonu ke ʼau toe palalau ki te kau tagata ʼāfea?’ Lagi ko te tagata ʼaia neʼe agahala ʼe ina tuʼania pea mo mataku ki te meʼa ʼaē ʼe fai anai e te kau tagata ʼāfea. ʼE tonu ke ina manatuʼi, logope ko Sehova tokotahi ʼaē ʼe ina fakamaʼa tatatou ʼu agahala, kae neʼe ina fakanofo te kau tagata ʼāfea ke nātou taupau te kokelekasio ke maʼa (Pesalemo 51:2). Ko nātou ko te kau faifaitoʼo, moʼo “fakatotonu te kau fakanofo”. (Efesi 4:12.) Ko te mole ʼalu ki te kau tagata ʼāfea mokā ʼe tou mahahaki fakalaumālie, ʼe fakatatau pe ki tata mole ʼalu ki he tōketā mokā ʼe tou mahahaki.

¹⁷ Ko ʼihi ʼe nātou fia fakatokatoka pe, ʼe nātou te faʼahi ʼaia, ʼo mahino lelei kia nātou ʼe hili ki ai māhina pea mo taʼu ʼe kei vevele aipe tonatou leʼo ʼo loto ki te meʼa ʼaia. Pea tahi foki, ko nātou ʼaia ʼaē neʼe nātou fufū hanatou agahala mamafa, ʼe nātou toe to tuʼa lua pe ʼe tuʼa tolu pe ki meʼa ʼaia. ʼI tona kua aʼu mai leva ki te kau tagata ʼāfea, lagi kua liuliuga te hoko ʼo te agahala ʼaia. Koia, ʼe lelei age te muliʼi ʼo te tokoni ʼa Sake! Neʼe fēnei tana ʼui: “Ka ʼe ʼi ai he tahi ʼe mahaki ia koutou? Ke ina pāuʼi ki ʼona tafa te ʼu tagata ʼāfea ʼo te kokelekasio, pea ke nātou faikole mo ia, ʼo tākaiʼaki te lolo ʼaki te huafa ʼo Sehova.” (Sake 5:14). ʼE ʼi ai te temi moʼo faitoʼo: tou haga ʼolo ki te ʼu tagata ʼāfea. Kapau ʼe tou talitali fualoa, ʼe feala anai ke tou fakafefeka ʼi tatatou agahala. — Tagata Tānaki 3:3; Isaia 32:1, 2.

Agaaga pea mālōlō

18, 19. He koʼe koa neʼe fakavikiviki te patele ʼo ʼuhiga mo te kau Fakamoʼoni ʼa Sehova?

¹⁸ Kua hili ki ai taʼu e nima, ʼi te kaupepa palokia, neʼe vikiʼi e te patele katolika Italia ia te kau Fakamoʼoni ʼa Sehovaa. Neʼe ina ʼui fēnei: “ ʼE ʼau ʼofa ki te kau Fakamoʼoni ʼa Sehova; ʼe ʼau tala fakalelei (...) ko nātou ʼaē ʼe ʼau ʼiloʼi, ʼe nātou agapoto, palalau agamālū (...) pea ʼaki ʼanatou palalau ʼe nātou fakalotoʼi. ʼE tou mahino koa ʼafea ko te moʼoni ʼe tonu ke fakahā fakalelei ke feala hona tali? Ko nātou ʼaē ʼe nātou tala te moʼoni, ʼe mole tonu ke nātou lotolotolua, pea mo nātou ʼaele kovi, pea mo maveuveu tonatou ʼu fuluʼi ʼulu pea mo kovi tanatou faiteuteu.”

¹⁹ ʼE ʼiloga mai ʼi te ʼu palalau ʼaia, neʼe lave ki te patele ia te faʼahiga teuteu ʼa te kau Fakamoʼoni pea mo tanatou faʼahiga felōgoʼi mo te hahaʼi. ʼE ʼiloga lelei ai, ko nātou ʼaē neʼe felāveʼi mo ia neʼe nātou mulimuli ki te ʼu tokoni ʼaē ʼa te “tagata agatonu pea mo poto” lolotoga ʼo te ʼu taʼu (Mateo 24:45). ʼE tala e te Tohi-Tapu ʼe tonu ke teu te ʼu fafine ki he ʼu kofu ‘ ʼe lelei pea mo fakaʼapaʼapa’. (1 Timoteo 2:9.) ʼI totatou temi faigataʼa ʼaenī, ko te tokoni ʼaia ʼe toe ʼaoga ki te tagata. ʼE mole tonu koa la ke felāveʼi te kau fakafofoga ʼo te Puleʼaga ʼo te ʼAtua mo te hahaʼi ʼi he teu ʼe fakapoipoi?

20. He koʼe koa ʼe tonu ke tokaga tuʼumaʼu te kilisitiano ki tana faʼahiga teuteu?

²⁰ ʼE lagi ʼio anai ʼihi ʼo ʼuhiga mo te faʼahiga teuteu ʼaē ki te ʼu fono pea mo te gāue fagonogono, kae ʼe mole nātou muliʼi anai te ʼu fakatuʼutuʼu faka tohi-tapu ʼi ʼihi age ʼaluʼaga ʼo tonatou maʼuli. Kae, ʼe ʼi ai koa he lakaga ʼe tuku muʼa ta kita fakafofoga te Puleʼaga ʼo te ʼAtua? ʼIo, ko te ʼu ʼaluʼaga ʼe kehekehe. Kapau ʼe tou tokoni ki te laga faʼu Fale ʼo te Puleʼaga, ʼe kehe anai tatatou ʼu faiteuteu ʼaia ʼi tatatou ʼu faiteuteu ʼaē ki te ʼu fono ʼo te Fale ʼo te Puleʼaga. ʼI te ʼu temi mālōlō, ʼe faka ʼalu anai pe ta kita faiteuteu mo te faʼahi ʼaia. ʼI te temi fuli pe ʼaē ʼe sioʼi ai tatou ʼe niʼihi, ko tatatou faiteuteu ʼe tonu pe ke lelei pea mo fakaʼapaʼapa.

21, 22. ʼE feafeaʼi koa totatou taupau mai te ʼu fakafiafia ʼe mole lelei, pea ʼe feafeaʼi koa hatatou fakasiosio ʼo ʼuhiga mo te ʼu tokoni ki te faʼahi ʼaia?

²¹ Ko te temi mālōlō, ko te tahi ʼaenā meʼa, ʼe tonu ke tou fakakaukau lahi ki ai. Ko te tagata, kae tāfito te kau tūpulaga — ʼe ʼaoga kia nātou te ʼu temi mālōlō. ʼE mole ko he agahala pe ʼe ko he fakapuli ʼo totatou temi ʼi hatatou fakatuʼutuʼu ki he ʼu fakafiafia faka famili. Ko Sesu pe la neʼe ina fakaafe tana kau tisipulo “ke nātou mālōlō”. (Maleko 6:31.) Kae ke tou tokaga pe naʼa avahi e te ʼu temi mālōlō ʼaia he fakahala fakalaumālie. ʼE tou maʼuʼuli ʼi te mālama ʼe nātou fakaʼaoga te ʼu fakafiafia moʼo faka maʼuhigaʼi te ʼu felāveʼi fakasino heʼe ʼaoga, te aga mālohi, te aga fakalialia, pea mo te ʼu meʼa fakatemonio (2 Timoteo 3:3; Fakahā 22:15). Ko te tagata agatonu pea mo poto ʼe nofo tokaga ki te ʼu tuʼutāmaki ʼaia pea mo ina fakatokaga tuʼumaʼu pe ia tatou ki te ʼu tuʼutāmaki ʼaia. ʼE tou manatu koa ko te ʼu fakamanatu ʼaia ʼe faka gaohaʼa ki totatou ʼāteaina? Pe ʼe tou loto fakafetaʼi koa ki te kautahi ʼa Sehova ʼi tana tokaga lelei kia tatou pea mo taupau tuʼumaʼu tatou mai te ʼu tuʼutāmaki ʼaia? — Pesalemo 19:7; 119:95.

²² ʼAua naʼa galo ia tatou, logope ko totatou ʼāteaina ʼe haʼu mai ia Sehova, ʼe fakamaʼuaʼi anai tatou ki te faʼahiga fakaʼaoga ʼaē ka tou fai anai ki te ʼāteaina ʼaia. Kapau ʼe tou meʼa noaʼi te ʼu tokoni ʼaē ʼe lelei pea mo tou fai he ʼu tonu ʼe mole lelei, ʼe mole tou tukuga koviʼi anai he tahi. Neʼe ʼui e te ʼapositolo ko Paulo fēnei: “ ʼE tahi fakamaʼuaʼi anai pe ia tatou takitokotahi ki te ʼAtua.” — Loma 14:12; Hepeleo 4:13.

Tou talitali ki te ʼāteaina ʼo te fānau ʼo te ʼAtua

23. a) Ko te ʼu tapuakina feafeaʼi koa ʼe pipiki ki te ʼāteaina ʼe tou maʼu ʼi te temi nei? b) Ko te ʼu tapuakina feafeaʼi koa ʼaē ʼe tou talitali ki ai ʼaki he loto hoha?

²³ ʼIo, ko tatou ko te hahaʼi manuʼia. ʼE mole tou maʼunofo ʼi te lotu hala pea mo te ʼu meʼa fakatemonio. ʼAki te sakilifisio faifakalelei, ʼe feala hatatou fakaōvi kia Sehova ʼaki he leʼo ʼo loto ʼe maʼa, heʼe ʼi tona ʼuhiga fakalaumālie ʼe mole tou popūla ki te agahala pea mo te mate. Pea kua vave aʼu mai pe ia “te ʼāteaina manuʼia ʼo te ʼu fānau ʼa te ʼAtua”. ʼI Halamaketone, ko te ʼu tēhina ʼo Sesu ʼi tonatou kolōlia ʼaē ʼi selo, ʼe fakahā anai ki te hahaʼi ʼi tonatou tuʼulaga ʼaē ko te faka ʼauha ʼo te kau fili ʼo Sehova (Loma 8:19; 2 Tesalonika 1:6-8; Fakahā 2:26, 27). Ki muli age, ko te ʼu foha ʼaia ʼo te ʼAtua, ʼe fakahā anai ia nātou ko nātou ʼaia ka tafe ʼaki mai ai te ʼafioʼaga ʼo te ʼAtua te ʼu tapuakina ki te tagata (Fakahā 22:1-5). Pea, ko te fakahā ʼaia ʼo te ʼāteaina manuʼia ʼo te ʼu foha ʼo te ʼAtua ʼe foaki anai te tapuakina ki te ʼu tagata agatonu: ʼe nātou maʼu anai te ʼāteaina faka kolōlia ʼo te ʼu fānau ʼo te ʼAtua. ʼE tou loto fakavilivili koa ke tou aʼu ki te temi ʼaia? Kapau ko ia, tou fakaʼaoga fakalelei totatou ʼāteaina faka kilisitiano. Tou gāue kia Sehova ohage ko he ʼu kaugana ʼi te temi nei, pea ʼe tou maʼu anai te ʼāteaina taulekaleka ʼaia ʼo heʼe gata!

[Nota ʼi te lalo pasina]

Toe fakamanatu

◻ ʼE feafeaʼi koa te faka kolōlia e te kau kilisitiano fakanofo pea mo te tahi ʼu ōvi ia Sehova?

◻ He koʼe koa ʼe tonu ke fakaʼapaʼapa te kau kilisitiano ki te ʼu puleʼaga ʼo te malamanei?

◻ ʼE feafeaʼi koa he faʼahiga gāue fakatahi ʼa te kau kilisitiano pea mo te ʼu tagata ʼāfea?

◻ ʼO ʼuhiga mo te teuteu, he koʼe koa ko te kau Fakamoʼoni ʼa Sehova ʼe nātou kehekehe mo te hahaʼi ʼo te malamanei?

◻ ʼI te faʼahi ʼo te ʼu fakafiafia, koteā ʼaē ʼe tonu ke tou mamaʼo mai ai?

[Paki ʼo te pasina 17]

Ko te kau tagata ʼāfea ʼe tau mo nātou totatou ʼofa pea mo tatatou gāue fakatahi mo nātou.

[Paki ʼo te pasina 18]

ʼE tonu anai ke teuteu lelei ia te kilisitiano, teu fakaʼapaʼapa, pea mo ʼalu tahi mo te ʼu ʼaluʼaga.