KAPITE 36
Aga Fakahagatonu Ia Meʼa Fuli
ʼE tou loto ke aga fakahagatonu ʼotatou kaumeʼa. Pea ʼe toe feia pe mo Sehova. Kae ʼe mole faigafua te aga fakahagatonu ʼi he malama ʼe mole fakaha e te hahaʼi te aga ʼaia. Kotea te ʼu lelei ʼe tou maʼu moka tou aga fakahagatonu ia meʼa fuli?
1. He koʼe ʼe ke fia aga fakahagatonu?
Ka ke aga fakahagatonu, ʼe ke fakaha ai ʼe ke ʼofa ia Sehova mo fakaʼapaʼapa kia te ia. ʼAua naʼa galo kia koe ʼe iloʼi e Sehova ʼau manatu mo te ʼu meʼa ʼe ke fai. (Hepeleo 4:13) ʼE sio ia Sehova moka ke filifili ke ke aga fakahagatonu pea ʼe fiafia. ʼE ui fenei ʼi tana Folafola: “ʼE fehiʼa ia Sehova ki te tagata ʼae ʼe kaka, kae ʼe kaumeʼa ia mo te hahaʼi faitotonu.”—Taʼaga Lea 3:32.
2. ʼE feafeaʼi hau aga fakahagatonu ʼi te ʼaho fuli?
ʼE loto e Sehova ke tou ‘fepalalauʼaki ʼi te moʼoni.’ (Sakalia 8:16, 17) Kotea tona fakaʼuhiga? Ka ke palalau mo tou famili, mo ʼou kaugā gaue, mo ʼou tehina mo tuagaʼane peʼe ko te kau taki, ʼe mole tonu ke ke loiʼi peʼe kakaʼi natou. Ko he tahi ʼe aga fakahagatonu, ʼe mole kaihaʼa ia pea ʼe mole ina kakaʼi ʼihi. (Lau ia Taʼaga Lea 24:28 mo Efeso 4:28.) Pea ʼe ina totogi ia meʼa fuli ʼe kole mai e te puleʼaga. (Loma 13:5-7) Koia, ʼe tou “aga fakahagatonu ia meʼa fuli.”—Hepeleo 13:18.
3. Kotea te ʼu lelei ʼe ke maʼu mai ai?
Kapau ʼe iloʼi koe ko he tahi ʼe aga fakahagatonu, pea ʼe falala atu anai ʼihi kia koe. ʼE ke tokoni ai ki te maʼuli fiafia mo fimalie ʼi te kokelekasio, ohage ko he famili ʼe feʼofaʼofani. ʼE ke maʼu ai he leʼo ʼo loto ʼe lelei. Pea ʼe toe “vikiʼi ai te akonaki ʼa te ʼAtua, totatou Fakamaʼuli” pea mo fia tauhi anai ʼihi kia Sehova.—Tito 2:10.
TA FAKALOLOTO
Ta vakaʼi pe ʼe malave feafeaʼi kia Sehova mo tatou moka tou aga fakahagatonu pea ʼe feafeaʼi hatatou fakaha te faʼahi ʼaia ia aluʼaga kehekehe.
4. ʼE fiafia ia Sehova
Lau ia Pesalemo 44:21 mo Malakia 3:16, pea fai te ʼu fehuʼi ʼaeni:
He koʼe ʼe mole lelei ia te fufu ʼo te moʼoni?
ʼI tau manatu, kotea ʼe logoʼi e Sehova moka ke tala te moʼoni, maʼia pe ʼe faigataʼa?
Ka tala e he fanau te moʼoni, ʼe fiafia ʼana matuʼā. Ka tou tala te moʼoni ʼe tou fakafiafiaʼi ia Sehova
5. Tou aga fakahagatonu ʼi te temi fuli
Tokolahi ʼe natou manatu ʼe mole feala ke kita aga fakahagatonu tuʼumaʼu. Kae ta vakaʼi pe koʼe ʼe tonu ke tou fai tuʼumaʼu te aga ʼaia. Vakaʼi te ʼATA VITEO.
Lau ia Hepeleo 13:18, pea faipalalau pe ʼe feafeaʼi hakita aga fakahagatonu . . .
mo tokita famili.
ʼi te fale gaue peʼe fale ako.
ʼi he tahi atu ʼu aluʼaga.
6. ʼE fua lelei kia tatou
ʼE lagi tou manatu ʼe tupu la tatatou tau mo ni fihifihia he ʼe tou aga fakahagatonu. Kae ʼe tou iloʼi ʼe ko te meʼa lelei ʼaia ʼe tonu ke tou fai. Lau ia Pesalemo 34:12-16, pea fai te fehuʼi ʼaeni:
He koʼe ʼe lelei ke ke aga fakahagatonu?
Ka aga fakahagatonu he taumatuʼa pea ʼe malohi ai ʼanā felogoi
Ka aga fakahagatonu he tagata gaue pea ʼe falala ki ai tona patolo
ʼE iloʼi e natou ʼae ʼe gaue ʼi te puleʼaga he tahi ʼe aga fakahagatonu
ʼE UI E ʼIHI: “ ʼE mole kovi ia moka ko he kiʼi loi veliveli pe.”
ʼI tau manatu, he koʼe ʼe fehiʼa ia Sehova ki te ʼu loi fuli?
MANATU TAFITO
ʼE loto e Sehova ke aga fakahagatonu ʼona kaumeʼa ʼi ʼanatou palalau mo ʼanatou gaue.
Fehuʼi Fakamanatu
Ko te ʼu aluʼaga fea ʼe tonu ai ke tou aga fakahagatonu?
He koʼe ʼe mole lelei ia te fufu ʼo te moʼoni?
He koʼe ʼe ke fia aga fakahagatonu ʼi te ʼaho fuli?
TE TAHI ʼU MANATU
ʼE lava akoʼi feafeaʼi e te ʼu matuʼā ʼanatou fanau ke natou aga fakahagatonu?
He koʼe ʼe lelei ke ke fakahoko ʼau fakapapau?
He ʼu tupuʼaga lelei ke tou totogi ai te ʼu tukuhau maʼia pe ʼe natou fakaʼaogaʼi kovi.
“Faut-il payer ses impôts ?” (Ko Te Tule Leʼo [Fakafalani] ʼaho 1 ʼo Sepetepeli 2011)
Kotea neʼe ina uga he tagata agakaka ke ina fai ni fetogi pea mo gaue fakahagatonu?