ʼE Fakamālohiʼi Tatou e Te ʼAmanaki, Kae Uga Tatou e Te ʼOfa
“E mau ia mea aeni e tolu: te tui, mo te falala, pea mo te ofa; kae ko te ofa ae e tauʼoluga pau.”—1 Kolonito 13:13.
1. Koteā te fakatokaga ʼaē ʼe fai mai e Paulo kia tatou?
NEʼE fakatokagaʼi mai e te ʼapositolo ko Paulo, ʼe feala ke moū tatatou tui ohage ko he vaka. E ina ʼui ke tou “tau maù te tui mo he loto e lelei, aia nee siaki e ihi, pea nee malemo ai tanatou tui.” (1 Timoteo 1:19) ʼI te ʼuluaki sēkulō ʼo totatou temi, neʼe faʼu papa te ʼu vaka. Ko te lelei ʼo te ʼu vaka ʼaia neʼe fakalogo ki te mālohi ʼo te papa ʼaē neʼe fakaʼaogaʼi, pea mo te faiva ʼo te tufuga faʼu vaka.
2. He koʼe ʼe tonu ke lelei te faʼu ʼo te vaka ʼo tatatou tui, pea koteā ʼaē ʼe maʼua ai ke tou fai?
2 Ko tatatou tui ʼaē ʼe feala ke fakatatau ki he vaka, ʼe tonu ke haohaoa ʼi te ʼu tai tokakovi ʼo te malamanei. (Isaia 57:20; Apokalipesi 17:15) Koia ʼe tonu ke laga fakalelei tatatou tui, pea ko te faʼahi ʼaia ʼe fakalogo kia tatou. ʼI te temi ʼaē neʼe faigataʼaʼia ai te kau Kilisitiano ʼi te ʼu “tai” tokakovi ʼo te mālama Sutea pea mo Loma, neʼe tohi fēnei e Suta: “Kae kia koutou, u ofaina, koutou lagai ake koutou i tautou tui matuaki taputapu; koutou faikole i te Laumalie-Maonioni. Koutou taupau koutou i te ofa o te Atua; i tautou amanaki ki te manavaofa o totatou Aliki ko Sesu Kilisito o uhiga mo te mauli heegata.” (Suta 20, 21) Mai tona ʼuhiga ʼaē neʼe toe talanoa foki Suta ki te ‘tui ae nee tuku ki te kaigalotu,’ koia ko tana ʼu palalau ʼo ʼuhiga mo te “tui matuaki taputapu” ʼe tonu ke faka ʼuhiga ki te ʼu akonaki ʼa te Lotu Faka Kilisitiano, ʼo kau kiai mo te logo lelei ʼo te hāofaki. (Suta 3) Ko Kilisito te fakatafito ʼo te tui ʼaia. Kapau ʼe tou fia tapiki maʼu ki te tui faka Kilisitiano moʼoni, pea ʼe tonu ke mālohi tatatou tui.
Tou Hāo ʼi Te Afā ʼAē Ko Te “Mataku Ki Te ʼu Magaʼi Lotu”
3. He koʼe ʼe fakaʼaogaʼi e ʼihi te “mataku ki te ʼu magaʼi lotu”?
3 ʼI te ʼu taʼu ʼaenī kua hili atu, neʼe ʼi ai te ʼu fakamatala fakamataku ʼo ʼuhiga mo te hahaʼi ʼaē neʼe fakamate, pea mo te ʼu fai fakapō ʼaē neʼe kau ai te ʼu kiʼi magaʼi lotu. Koia neʼe tokolahi te hahaʼi, ʼo kau ai mo te kau takitaki fakamalotoloto ʼo te ʼu puleʼaga, neʼe nātou faiga ke nātou puipui te hahaʼi, pea tāfito te kau tūpulaga, mai te ʼu magaʼi lotu agakovi ʼaia. ʼE mahino ia, ko “te atua o te malama-nei” ʼaē neʼe ina takitaki te ʼu fai fakapō ʼaia, neʼe ina fakatupu te mataku ʼa te hahaʼi ki te ʼu magaʼi lotu, pea ʼe ina fakaʼaogaʼi te faʼahi ʼaia moʼo fakafeagai ki te hahaʼi ʼa Sehova. (2 Kolonito 4:4; Apokalipesi 12:12) Ko ʼihi neʼe nātou fakaʼaogaʼi te ʼaluʼaga ʼaia moʼo fakafeagai ki tatatou gāue. ʼI ʼihi fenua, neʼe fai te ʼu fakatuʼutuʼu moʼo puipui te hahaʼi mai te ʼu “magaʼi lotu agakovi,” kae neʼe nātou fakapipiki hala kiai te higoa ʼa te kau Fakamoʼoni ʼa Sehova, kae ʼe ko he ʼu loi ʼaia ʼaē neʼe fai ʼo ʼuhiga mo tatou. Koia, kua liliu ʼo faigataʼa ʼi ʼihi fenua ʼo Eulopa te faka mafola ʼi te ʼu ʼapi, pea ko te hahaʼi ʼaē neʼe nātou ako te Tohi-Tapu mo tatou neʼe nātou tuku tanatou ako. Tahi ʼaē, ko te faʼahi ʼaia neʼe fakatupu lotovaivai ki ʼihi ʼo totatou ʼu tēhina.
4. He koʼe ʼe mole tonu ke tou lotovaivai ʼi te ʼu fakafeagai?
4 Ko te ʼu fakafeagai ʼaia ʼe mole tonu ke ina fakaloto vaivaiʼi tatou, kae ʼe ko he fakamoʼoni ʼaia kia tatou, ʼe tou maʼuliʼi te Lotu Faka Kilisitiano moʼoni. (Mateo 5:11, 12) Neʼe lau ʼo ʼuhiga mo te kau ʼuluaki Kilisitiano, ko nātou ko te magaʼi lotu fakatupu maveuveu pea neʼe “felavei i te potu fuape mo te fakafehagai.” (Gaue 24:5; 28:22) Kae neʼe fakamālohiʼi e te ʼapositolo ko Petelo tona ʼu kāiga lotu ʼo ina tohi fēnei: “U ofaina, aua naa koutou punamauli i tautou nofo i te kakaha o te ahiahi, aua naa koutou eke i te hoko atu o te u mea aia. Kae koutou fakafiafia i tautou kau ki te u mamahi o Kilisito, koteuhi ke koutou fiafia mo fakafiafia moka hokosia mai te fakaha o tona kololia.” (1 Petelo 4:12, 13) ʼO toe feiā pe, ko te tēhina ʼo te kolesi pule ʼo te ʼuluaki sēkulō neʼe ina tohi fēnei: “Koutou lau ko te fiafia fuape, oku tehina, moka koutou to kia faahiga ahiahi kehekehe, koteuhi ko te ahiahi o tautou tui e fua mai ai te kataki. Pea ke mau e te kataki te katoa o tana gaue, koteuhi ke koutou haohaoa mo lelei pau pea ke aua naa koutou masiva i he mea.” (Sakopo 1:2-4) Ohage ko te ʼu matagi mālohi ʼaē ʼe nātou ʼahiʼahiʼi te lelei ʼo he vaka, ʼo toe feiā aipe, ko te afā ʼo te ʼu fakafeagai ʼe ina fakahā anai te ʼu vaivaiʼaga ʼo te vaka ʼo tatatou tui.
Ko Te ʼAhiʼahi ʼe Ina Fakatupu Te Faʼa Kātaki
5. E feafeaʼi tatatou ʼiloʼi papau ʼe tuʼu maʼu anai tatatou tui ʼi te ʼahiʼahi?
5 ʼE hoki feala anai ke ʼiloʼi e te kau Kilisitiano tonatou faʼa kātaki pea mo te lelei ʼo tanatou tui, mo kapau ʼe nātou tauʼi muʼa he ʼu fakataga. ʼE maʼu anai e tatatou faʼa kātaki “te katoa o tana gaue” ʼi te ʼu fakataga, mo kapau ʼe tou “haohaoa mo lelei pau pea ke aua naa [tou] masiva i he mea,” ʼo kau ai mo he tui mālohi. Neʼe tohi fēnei e Paulo: “I te meafuape, e matou faiga ke falanaki mai kia matou ko te u faifekau a te Atua aki te kataki i te u mamahi, i te u faigataa, i te u manavasiʼi, i te u kauimaea.”—2 Kolonito 6:4.
6. He koʼe ʼe tonu ke tou “fiameamea i otatou mamahi,” pea ko te faʼahi ʼaia ʼe ina fakamālohiʼi feafeaʼi tatatou ʼamanaki?
6 Ko te ʼu matagi mālohi ʼo te ʼu ʼahiʼahi ʼaē ʼe tau ʼi ʼihi temi mo tatou, ʼe ko he ʼu faigamālie ʼaia ke tou fakahā te faʼu lelei pea mo te mālohi ʼo te vaka ʼo tatatou tui. Neʼe tohi fēnei e Paulo ki te kau Kilisitiano ʼo Loma: “Tou fiameamea i otatou mamahi, he tou iloi e fakatupu mai e te mamahi te kataki, pea mai te kataki te agatonu kua fakamooni, pea mai te agatonu kua fakamooni te falala; pea e mole faihala te falala.” (Loma 5:3-5) Kapau ʼe tou nofo agatonu ʼi te ʼu ʼahiʼahi, pea ʼe leleiʼia anai tatou e Sehova. ʼAki te temi, ko te faʼahi ʼaia ʼe ina fakamālohiʼi anai tatatou tui.
Te Tupuʼaga ʼo Te Malemo ʼa Te Tui ʼa ʼIhi
7. (a) Ohage ko tona fakahā mai e Paulo, he koʼe neʼe malemo ʼihi ʼi te faʼahi fakalaumālie? (b) Neʼe feafeaʼi te hēʼia ʼa ʼihi mai te tui ia ʼaho nei?
7 ʼI te temi ʼaē neʼe fakatokagaʼi ai e Paulo te kau Kilisitiano ke ʼaua naʼa “malemo” tanatou tui, neʼe ina manatuʼi ia nātou ʼaē neʼe nātou “siaki” tonatou leʼo ʼo loto pea mole kei nātou tui. (1 Timoteo 1:19) Ia nātou ʼaia, neʼe kau ai ia Imeneo pea mo Alikisio ʼaē neʼe higa ki te ʼapositasia, he neʼe nā hēʼia mai te moʼoni pea mo nā fai he ʼu laukovi. (1 Timoteo 1:20, 2 Timoteo 2:17, 18) Ia ʼaho nei, ko te kau ʼaposita ʼaē ʼe nātou hēʼia mai te moʼoni, ʼe nātou fai he ʼu laukovi moʼo fakafeagai ki te “kaugana agatonu mo fakapotopoto,” pea ʼi hona ʼaluʼaga fakatā, ʼe nātou uʼusi te nima ʼaē neʼe ina fafaga nātou ʼi te faʼahi fakalaumālie. Ko ʼihi ʼe nātou hage ko te “kaugana agakovi,” ʼo nātou ʼui ʼi tonatou loto, “E tuai mai toku Aliki.” (Mateo 24:44-49; 2 Timoteo 4:14, 15) ʼE mole nātou faka tui ki te kua ōvi mai ʼo te fakaʼosi ʼo te tuʼu ʼo te ʼu faʼahiga meʼa kovi ʼaenī, pea ʼe nātou laukoviʼi te faiga ʼa te tagata kaugana agatonu mo fakapotopoto ke nofo ʼalaʼala te hahaʼi ʼa Sehova. (Isaia 1:3) Ko te kau ʼaposita ʼaia ʼe nātou lava “fakahiga ai te tui a ihi,” ʼo fakamalemo nātou ʼi te faʼahi fakalaumālie.—2 Timoteo 2:18.
8. He koʼe ko ʼihi neʼe moū te vaka ʼo tanatou tui?
8 Ko ʼihi Kilisitiano kua papitema, neʼe moū te vaka ʼo tanatou tui he neʼe mole nātou fakalogo ki tonatou leʼo ʼo loto, pea neʼe nātou kau ʼi te manako fakavale ʼa te mālama ʼaenī ki te ʼu fakafiafia pea mo te ʼu aga fakahehema. (2 Petelo 2:20-22) Ko ʼihi ʼe nātou fakamoū te vaka ʼo tanatou tui koteʼuhi kia nātou, ʼe mole heʼeki fakaōvi moʼoni mai te mālama foʼou. ʼI te mole feala ʼaē ke nātou fakafuafua te temi totonu ʼaē ka fakahoko ai te ʼu lea faka polofeta, koia ʼe nātou fakatuai ʼi tonatou ʼatamai te hoko mai ʼo te “aho o [Sehova],” pea ʼe nātou situʼa ki te tauhi moʼoni. (2 Petelo 3:10-13; 1 Petelo 1:9) Mole tuai, pea nātou toe liliu pe ki te ʼu vai fakapōʼuli pea mo tokakovi ʼo te mālama ʼaenī. (Isaia 17:12, 13; 57:20) Ko ʼihi ʼaē ʼe mole kei nātou fakatahi mo te kokelekasio faka Kilisitiano, ʼe kei nātou tui ʼe moʼoni te lotu ʼaia, kae ʼe mole nātou maʼu te kātaki fualoa ʼaē ʼe ʼaoga ke nātou talitali ki te mālama foʼou ʼaē neʼe fakapapauʼi mai e te ʼAtua. Kia nātou, ʼe tuai te hoko mai ʼo te Palatiso.
9. Koteā ʼaē ʼe fai e ʼihi Kilisitiano, pea ko te ʼu meʼa ʼaia ʼe ina uga tatou ke tou vakaʼi teā?
9 ʼI ʼihi fenua ʼo te malamanei, ʼe ʼi ai te kau Kilisitiano kua papitema, ʼe hage kua nātou peluki te ʼu lā ʼo te vaka ʼo tanatou tui. ʼE kei maʼanu pe te vaka ʼo tanatou tui, kae ʼe mole kei nātou faiga ke nātou haʼele ki muʼa ʼi te tui, pea kua nātou gāue fakatotoho. ʼI te matalelei ʼo te ʼamanaki ʼaē “kua ōvi mai te Palatiso,” neʼe lotolelei ʼihi ke nātou faiga mālohi ke nātou aʼu kiai—neʼe fakamalotoloto tanatou fai faka mafola, mo tanatou kau tuʼumaʼu ki te ʼu fono, pea mo te ʼu fakatahi lalahi. ʼI te temi nei, kua nātou manatu ʼe tuai te hoko ʼo tanatou ʼamanaki, pea ʼe mole kei nātou faiga kiai. ʼE hā lelei te faʼahi ʼaia ʼi tanatou mole kei faka mafola, mo tanatou tōtō ʼi te ʼu fono, pea mo tanatou fakatuʼutuʼu ʼaē ke nātou tō ʼi ʼihi koga ʼo te ʼu fakatahi. Ko ʼihi ʼe nātou fakaʼaogaʼi he temi lahi ki te ʼu fakafiafia, pea ʼe nātou faiga ki te ʼu koloā. Ko te ʼu faʼahi ʼaia ʼe tonu ke tokoni kia tatou ke tou fakakaukauʼi pe koteā te meʼa ʼaē ʼe ina uga tatou ʼi te kua foaki ʼo totatou maʼuli kia Sehova. Ko tatatou gāue fakamalotoloto kia te ia ʼe tonu koa ke fakalogo ki te ʼamanaki ʼaē “kua ōvi mai te Palatiso”?
ʼE Fakatatau Te ʼAmanaki Ki Te Taula ʼo He Vaka
10, 11. Koteā ʼaē neʼe fakatatau kiai e Paulo tatatou ʼamanaki, pea he koʼe ʼe lelei te fakatātā ʼaia?
10 ʼE fakatokagaʼi mai e Paulo, neʼe fakapapau e Sehova ʼe ina foaki anai he ʼu tapuakina ʼaki ia Apalahamo. ʼOsi ʼaia, pea fakamahino fēnei e te ʼapositolo: “[Ko] te Atua . . . nee ina fai ai he fuakava. Ke aki ia mooni e lua [ko tana folafola pea mo tana fakapapau] e tuumau, e mole feala ki te Atua ke lohi, ke mau ai e tatou nee tou mau nonoʼaga ia te ia, he fakafimalieʼaga malohi ki te puke o te falala kua fakatakoto i otatou mua. Ko te falala aia e hage e tou mau ai he taula o te laumalie, e malohi pea e tau mau.” (Hepeleo 6:17-19; Senesi 22:16-18) Ko te ʼamanaki ʼaē ʼe tuku kia muʼa ʼo te kau Kilisitiano fakanofo ʼe ko te maʼuli tuputupua ʼi selo. Ia ʼaho nei, ko te teitei katoa ʼo te hahaʼi kaugana ʼa Sehova ʼe nātou ʼamanaki ke nātou maʼuʼuli heʼegata ʼi he kele kua liliu ko he palatiso. (Luka 23:43) Kapau ʼe mole kita maʼu te ʼamanaki ʼaia, pea ʼe mole feala ke kita tui.
11 Ko te taula ʼo te vaka ʼe ko he toe meʼa maʼuhiga moʼona puipui, pea ʼe ʼaoga moʼo tāʼofi te vaka ke ʼaua naʼa tafea. ʼE mole he tagata folau vaka ʼe mavae anai ʼi te ʼuafu ka mole he taula ʼo tana vaka. Mai tona ʼuhiga ʼaē neʼe tuʼa lahi te moū ʼo te ʼu vaka ʼaē neʼe folau ai Paulo, koia neʼe ina ʼiloʼi ʼi te agamāhani, ko te maʼuli ʼa te hahaʼi folau vaka neʼe fakalogo ki te taula ʼo te vaka. (Gaue 27:29, 39, 40; 2 Kolonito 11:25) ʼI te ʼuluaki sēkulō, neʼe mole ʼi ai he masini ʼo te ʼu vaka, ʼo mole feala ai ki te kapiteni hana taki te vaka ki te potu ʼaē neʼe loto kiai. Ko te haʼele ʼa te ʼu vaka neʼe fakalogo tāfito ki te matagi, gata pe ki te ʼu vaka ʼaē neʼe fakahaʼele ʼaki te ʼu foe lalahi. Kapau neʼe sio te kapiteni ʼe ʼī anai tana vaka ki he ʼu foʼi maka, pea neʼe ina foimo tuku te taula ke hāo te vaka ʼi te afā, he neʼe falala ʼe tapiki mālohi anai te taula ki te ʼone. Koia neʼe fakatatau ai e Paulo te ʼamanaki ʼa te Kilisitiano ki “he taula o te laumalie, e malohi pea e tau mau.” (Hepeleo 6:19) Ka hoko mai kia tatou te ʼu afā ʼo te ʼu fakafeagai pe ko te tahi ʼu fihifihia, pea ko tatatou ʼamanaki ʼe hage ko he taula ʼe tokoni mai ke tou pipiki maʼu, ke ʼaua naʼa tafea te vaka ʼo tatatou tui ʼo ʼī ki te ʼafua fakatātā ʼo te loto mahalohalo peʼe ki te ʼu foʼi maka fakatātā ʼo te ʼapositasia.—Hepeleo 2:1; Suta 8-13.
12. Koteā ʼaē ʼe feala ke tou fai ke ʼaua naʼa tou mavae mai ia Sehova?
12 Neʼe fai e Paulo te fakatokaga ʼaenī ki te kau Kilisitiano Hepeleo: “Koutou vakai, u tehina, naa mau e he tahi ia koutou, he loto e kovi pea e mole tui, e mavae ia mai te Atua mauli.” (Hepeleo 3:12) ʼI te ʼu tohi faka Keleka, ko te kupu “mavae” ko tona faka ʼuhiga totonu ʼaenī, “ ʼe kita tō kehe,” ko tona faka ʼuhiga, ʼe kita ʼapositasia. Kae ʼe feala hatatou tekeʼi te tuʼutāmaki ʼaia. Ko te tui pea mo te ʼamanaki ʼe tokoni anai kia tatou ke tou pipiki maʼu kia Sehova, tatau aipe peʼe hoko mai te ʼu afā ʼo te ʼahiʼahi. (Teutalonome 4:4; 30:19, 20) Ko tatatou tui ʼe mole hage anai ko he vaka ʼe faka viligia e te ʼu matagi ʼo te ʼu akonaki ʼaposita. (Efeso 4:13, 14) Pea ʼi tatatou fakaʼaogaʼi tatatou ʼamanaki ohage ko he taula, ʼe tou lava hāo anai ʼi te ʼu afā ʼo te maʼuli ʼi totatou ʼuhiga kaugana ʼo Sehova.
ʼE Uga Tatou e Te ʼOfa Pea Mo Te Laumālie Maʼoniʼoni
13, 14. (a) He koʼe ʼe mole feʼauga te taula ʼaē ko tatatou ʼamanaki? (b) Koteā te mālohi ʼaē ʼe tonu ke ina uga tatou ʼi tatatou tauhi kia Sehova, pea koteā tona tupuʼaga?
13 Ko te Kilisitiano ʼe mole haʼele anai ki muʼa ki te mālama foʼou, mo kapau ʼe tauhi kia Sehova ʼuhi pe heʼe fia maʼuli ʼo heʼegata ʼi te palatiso. ʼE maʼuhiga kia ia te ʼamanaki ʼaia ke tokalelei tona maʼuli, kae ʼe tonu ke ina hilifaki kiai pea mo tana tui, te mālohi ʼaē ko te ʼofa. Neʼe faka maʼuhigaʼi e Paulo te faʼahi ʼaia ʼi tana tohi fēnei: “E mau ia mea aeni e tolu: te tui, mo te falala, pea mo te ofa; kae ko te ofa ae e tauʼoluga pau.”—1 Kolonito 13:13.
14 Ko te mālohi ʼaē ʼe tonu ke ina uga tatou ʼi tatatou tauhi, ʼe ko te ʼofa fakamalotoloto ʼaē kia Sehova, ʼuhi ko tona ʼofa lahi ʼaē kia tatou. Neʼe tohi fēnei e te ʼapositolo ko Soane: “Ko ae e mole ofa, nee mole ina iloi te Atua, koteuhi ko te Atua e ko Ofa. Nee fakaha fenei te ofa o te Atua kia tatou: nee ina fekaui mai tona Alo ulutokotahi ki te malama-nei, ke tou mauli aki iaʼia. E tou ofa, koteuhi nee uluaki ofa ia kia tatou.” (1 Soane 4:8, 9, 19) ʼI tatatou loto fakafetaʼi kia Sehova, ʼe mole tonu ke tou faiga muʼa ke hāofaki tatou, kae ʼe tou faiga ʼuluaki ke tou kalagaʼi te tāpuhā ʼo tona huafa pea mo te faka lākatonuʼi ʼo tona pule faʼifaʼitaliha.
15. Koteā te pikipikiga ʼo tatatou ʼofa kia Sehova pea mo tona ʼuhiga pule?
15 ʼE loto e Sehova ke tou tauhi kia te ia heʼe tou ʼofa kia te Ia, ka mole ʼuhi pe ko te Palatiso. ʼE ʼui fēnei e te tohi sivi Tohi-Tapu Étude perspicace des Écrituresa: “ ʼE faka kolōliaʼi Sehova koteʼuhi ko tona ʼuhiga pule pea mo te lagolago ʼa tana hahaʼi kia te ia, ʼe fakatafito ʼuluaki ki te ʼofa. ʼE ina loto ke atolasio pe kia te ia te hahaʼi ʼaē ʼe nātou ʼofa ki tana takitaki, ʼuhi ko tona ʼu kalitate taulekaleka pea mo tona faitotonu, pea ʼe nātou ʼofa tāfito ki tana faipule ʼi te tahi ʼu faipule. (1 Ko 2:9) Ko te hahaʼi ʼaia ʼe nātou fakatotonu ke nātou tauhi ki te pule ʼaia kae mole nātou faiga ke nātou faʼifaʼitaliha, koteʼuhi ʼe nātou ʼiloʼi ia Ia pea mo tona ʼofa, tona faitotonu, pea mo tona poto, ʼaē ʼe māʼoluga age ia nātou. (Pes 84:10, 11)”—Tohi 1, pasina 108.
16. He koʼe ko te ʼofa kia Sesu ʼe ko he mālohi ʼe ina puleʼi totatou maʼuli?
16 ʼI totatou ʼuhiga Kilisitiano, ʼe tou toe ʼofa foki kia Sesu ʼuhi ko tana ʼofa kia tatou. Neʼe fakakaukauʼi fēnei e Paulo: “E pulei matou e te ofa o Kilisito, i te manatu aeni, nee puluhia te tokotahi o uhiga mo te tagata fuape, he nee kua mate te tagata fuli. Nee puluhia ia o uhiga mo te tagata fuape koteuhi ke aua naa mauli te hahai mauli kia natou’pe, kae kia ia ae nee puluhia pea nee tuuake o uhiga mo natou.” (2 Kolonito 5:14, 15) Ko Kilisito te tafitoʼaga ʼaē ʼe laga kiai totatou maʼuli fakalaumālie, mo tatatou tui, pea mo tatatou ʼamanaki. Ko tatatou ʼofa ʼaē kia Kilisito ʼe ina fakamālohiʼi tatatou ʼamanaki, pea mo lagolago ki tatatou tui, tāfito ʼi te ʼu temi ʼaē ʼe ʼahiʼahiʼi kovi ai tatou.—1 Kolonito 3:11; Kolose 1:23; 2:6, 7.
17. Koteā te mālohi ʼaē ʼe foaki mai e Sehova kia tatou, pea ʼe hā feafeaʼi tona maʼuhiga ia Gaue 1:8 pea mo Efeso 3:16?
17 Ko tatatou ʼofa ʼaē ki te ʼAtua pea mo tona ʼAlo, ʼe ko te mālohi tāfito ʼaia ʼe ina taki totatou maʼuli faka Kilisitiano, kae ʼe foaki mai e Sehova te tahi meʼa ʼe ina uga tatou, mo fakamālohiʼi tatou ke tou haʼele ki muʼa ʼi tana tauhi. ʼE ko tona mālohi gāue, ia te laumālie maʼoniʼoni. Ko te ʼu kupu faka Hepeleo pea mo faka Keleka ʼaē ʼe fakaliliu ʼaki te kupu “laumālie,” ʼe faka ʼuhiga ʼuluaki ki te mālohi ʼo te ʼaele, ohage ko te matagi. Ko te ʼu vaka ʼaē neʼe folau ai ia Paulo neʼe fakalogo ki te mālohi fakapulipuli ʼaē ko te matagi, ke nātou aʼu ki te potu ʼaē neʼe fakatuʼutuʼu ke nātou ʼolo kiai. ʼO toe feiā aipe, ʼe ʼaoga kia tatou te ʼofa pea mo te mālohi fakapulipuli ʼa te ʼAtua, ke haʼele ki muʼa te vaka ʼo tatatou tui ʼi te tauhi ʼaē kia Sehova.—Gaue 1:8; Efeso 3:16.
Tou Haga Faiga Ke Tou Aʼu Ki Te Mālama Foʼou!
18. Koteā ʼaē ka ina faka fealagia kia tatou ke tou kātakiʼi te ʼu ʼahiʼahi ʼo tatatou tui?
18 Lagi ʼe ʼahiʼahiʼi kovi anai tatatou ʼofa pea mo tatatou tui ʼi muʼa ʼo tatatou aʼu ki te mālama foʼou. Kae neʼe foaki mai e Sehova he taula “e malohi pea e tau mau”—ʼe ko tatatou ʼamanaki taulekaleka. (Hepeleo 6:19; Loma 15:4, 13) Ka tau mo tatou te ʼu fakafeagai pea mo te ʼu ʼahiʼahi, pea ʼe feala ke tou faʼa kātaki mo kapau ʼe mālohi tatatou ʼamanaki. Ka gona he tahi afā pea hoa kiai te tahi ʼahiʼahi, koia tou lotomālohi ke tou fakamālohiʼi tatatou ʼamanaki pea mo tatatou te tui.
19. ʼE tou lava taupau feafeaʼi te vaka ʼo tatatou tui ke haohaoa ʼo aʼu ki te mālama foʼou ʼa te ʼAtua?
19 ʼI muʼa ʼo tana talanoa ki te “taula o te laumalie,” neʼe ʼui fēnei e Paulo: “E matou fakaʼamuʼage ke feia tatou fakatatau mo te loto hoha [“te loto fakavilivili,” MN, nota ʼi te lalo pasina] e koutou tahi fakaha, o uhiga mo te taofi o te katoa o te falala o kaku ki te gataʼaga, naa koutou liliu o maiko, kae, koutou faifaitaki kia natou e natou mau te u fakapapau i te tui pea mo te kataki.” (Hepeleo 6:11, 12) ʼI te uga ʼo tatou e te ʼofa kia Sehova pea mo tona ʼAlo, pea ʼi te fakamālohiʼi ʼo tatou e tona laumālie maʼoniʼoni, tou taupau haohaoa te vaka ʼo tatatou tui ʼo aʼu ki te temi ʼaē ka tou nofo ai ʼi te mālama foʼou ʼaē neʼe fakapapauʼi mai e te ʼAtua.
[Nota ʼi te lalo pasina]
a Neʼe tā e te Watchtower Bible and Tract Society of New York, Inc.
Moʼo Fakamanatu
◻ Koteā te fakatokaga ʼaē neʼe fai e Paulo ʼo ʼuhiga mo tatatou tui?
◻ Neʼe hoko feafeaʼi te malemo ʼa ʼihi ʼi te faʼahi fakalaumālie, pea ʼe fakasiʼisiʼi feafeaʼi e ʼihi tanatou gāue?
◻ Koteā te ʼu kalitate fakaʼatua ʼaē ʼe tonu ke tou hilifaki ki tatatou tui?
◻ Koteā ʼaē ka tokoni anai kia tatou ke tou aʼu ki te mālama foʼou ʼaē neʼe fakapapauʼi mai e te ʼAtua?
[Paki ʼo te pasina 16]
Ko te vaka ʼo tatatou tui ʼe tonu ke faʼu lelei, ke feala hana tauʼi te ʼu afā ʼo te maʼuli
[Paki ʼo te pasina 17]
ʼE feala pe ke moū tatatou tui
[Paki ʼo te pasina 18]
Ko te ʼamanaki ʼe ko he taula ki te maʼuli ʼa te kau Kilisitiano