Koutou Pipiki Maʼu Ki Takotou Tui Logope La Te ʼu ʼAhiʼahi!

“Ke koutou faka ʼuhigaʼi te faʼahi ʼaia ohage ko he fiafia katoa, naʼi ʼoku tēhina, mokā ʼe koutou felāveʼi mo he ʼu faʼahiga ʼahiʼahi kehekehe.”​—Sake 1:2.

1. Koteā te ʼu meʼa ʼaē ʼe hoko ki te hahaʼi ʼa Sehova ʼaē ʼe nātou tauhi kia te ia ʼaki te tui pea mo he “loto fiafia”?

KO TE hahaʼi ʼa Sehova ʼe nātou fakamoʼoni kia te ia ʼaki te tui pea mo he “loto fiafia.” (Teutalonome 28:47; Isaia 43:10) ʼE nātou fai te faʼahi ʼaia logope la te ʼu ʼahiʼahi kehekehe ʼaē ʼe tau mo nātou. Logope la tonatou ʼu fihifihia, kae ʼe nātou maʼu he fakaloto fīmālie ʼi te ʼu palalau ʼaenī: “Ke koutou faka ʼuhigaʼi te faʼahi ʼaia ohage ko he fiafia katoa, naʼi ʼoku tēhina, mokā ʼe koutou felāveʼi mo he ʼu faʼahiga ʼahiʼahi kehekehe, ʼo koutou ʼiloʼi ko takotou tui ʼaē ʼe ʼahiʼahiʼi ʼe ina fakatupu te faʼa kātaki.”​—Sake 1:​2, 3.

2. Koteā te ʼu meʼa ʼaē ʼe tou ʼiloʼi ʼo ʼuhiga mo te tagata ʼaē neʼe ina fai te tohi ʼo Sake?

² Neʼe ko te tisipulo ko Sake, te tēhina ʼa Sesu, ʼaē neʼe ina tohi te ʼu palalau ʼaia ʼi te teitei taʼu 62 ʼo totatou temi. (Maleko 6:3) Ko Sake neʼe ko te tagata ʼāfea ʼi te kokelekasio ʼo Selusalemi. ʼI tona fakahagatonu, ko ia mo Sefasi (ko Petelo), pea mo Soane neʼe “lau ko te ʼu pou tāfito”​—neʼe nātou mālolohi, pea mo nātou lagolago mālohi ki te kokelekasio. (Kalate 2:9) ʼI te temi ʼaē neʼe fakahā ai ki “te kau ʼapositolo pea mo te kau tagata ʼāfea” ia te fihifihia ʼo ʼuhiga mo te silikosisioʼi ʼi te taʼu 49 ʼo totatou temi, neʼe fai e Sake te tokoni faka Tohi-Tapu poto, pea neʼe tali e te kolesi pule ʼo te ʼuluaki sēkulō.​—Gāue 15:​6-​29.

3. Koteā te ʼu fihifihia ʼaē neʼe tau mo te kau Kilisitiano ʼo te ʼuluaki sēkulō, pea ʼe lava feafeaʼi hatatou maʼu he ʼu fua lelei ʼaki te tohi ʼa Sake?

³ ʼI tona ʼuhiga tagata taupau ōvi fakalaumālie ʼaē neʼe ina fakahoko fakalelei tana gāue, neʼe ‘ ʼiloʼi lelei e Sake ia te agaaga ʼo te faga ōvi.’ (Tāʼaga Lea 27:23) Neʼe mahino lelei kia ia, neʼe tauʼi e te kau Kilisitiano te ʼu ʼahiʼahi faigataʼa. Neʼe ʼi ai te ʼu manatu ʼa ʼihi kau Kilisitiano neʼe tonu ke fakatonutonuʼi, koteʼuhi neʼe nātou faka maʼuhigaʼi te kau maʼu koloā. Ko ʼihi, neʼe mole faʼa maʼuhiga kia nātou tanatou tauhi kia Sehova. Ko ʼihi neʼe nātou fakatupu maveuveu he neʼe nātou fakaʼaogaʼi kovi tonatou gutu. Ko te faʼahiga manatu ʼa te mālama neʼe fakatupu kovi kia nātou, pea ko te tokolahi ia nātou neʼe mole kei nātou loto faʼa kātaki pea mo fia faikole. ʼI tona fakahagatonu, ko ʼihi Kilisitiano neʼe kua mahamahaki ʼi te faʼahi fakalaumālie. ʼE fakaloto mālohi kia tatou te talanoa ʼa Sake ki te ʼu faʼahi ʼaia ʼi tana tohi, pea ʼe kei ʼaoga ia ʼaho nei te ʼu tokoni ʼaē neʼe ina fai, ohage pe ko tona ʼaoga ʼi te ʼuluaki sēkulō. ʼE ʼaoga anai kia tatou te tohi ʼaia, mo kapau ʼe tou lau ʼo tou manatu, neʼe tohi kia tatou totonu.a

Ka Hoko Kia Tatou He ʼu ʼAhiʼahi

4. ʼE tonu ke tou faka ʼuhiga feafeaʼi te ʼu ʼahiʼahi?

⁴ Neʼe fakahā mai e Sake peʼe tonu ke tou faka ʼuhigaʼi feafeaʼi te ʼu ʼahiʼahi. (Sake 1:​1-4) Neʼe mole ina fakahā mai tona ʼuhiga fakatautehina mo te ʼAlo ʼo te ʼAtua, kae neʼe ina ʼui ʼe “ko he kaugana ʼa te ʼAtua mo te ʼAliki ko Sesu Kilisito.” Neʼe faitohi tāfito ia Sake ki “te ʼu telepi e hogofulu-ma-lua” ʼo te Iselaele fakalaumālie ʼaē neʼe “mavetevete,” ʼuhi ko te ʼu fakataga. (Gāue 8:1; 11:19; Kalate 6:​16; 1 Petelo 1:1) ʼE toe fakatagaʼi foki mo tatou ʼuhi ko totatou ʼuhiga Kilisitiano, pea ʼe tou “felāveʼi mo te ʼu faʼahiga ʼahiʼahi kehekehe.” Kae kapau ʼe tou manatuʼi, ko te ʼu ʼahiʼahi ʼaē ʼe tou kātakiʼi ʼe nātou fakamālohiʼi tatatou tui, pea ʼe tou faka ʼuhigaʼi anai te ʼu ʼahiʼahi ʼaia “ohage ko he fiafia katoa” mokā hoko mai anai kia tatou. Kapau ʼe tou nonofo agatonu ki te ʼAtua ʼi te ʼu ʼahiʼahi, pea ʼe tou maʼu ai anai te fiafia heʼegata.

5. Koteā ʼihi ʼahiʼahi ʼaē ʼe feala ke hoko kia tatou, pea koteā te meʼa ʼaē ʼe hoko mokā tou lava kātakiʼi te ʼu ʼahiʼahi ʼaia?

⁵ ʼI te ʼu ʼahiʼahi ʼaē ʼe hoko kia tatou, ʼe kau kiai te ʼu faigataʼaʼia ʼaē ʼe hoko ki te hahaʼi fuli. Ohage la, ʼe lagi tou mahamahaki. ʼI te temi nei, ʼe mole kei fakahoko e te ʼAtua he ʼu milakulo, kae ʼe ina tali tatatou ʼu kole, mokā tou kole age ki ai te poto pea mo te mālohi ʼaē ʼe ʼaoga moʼo kātakiʼi ʼo te mahaki. (Pesalemo 41:​1-3) ʼE tou toe mamahi foki mokā fakatagaʼi tatou ʼuhi ko te faitotonu. (2 Timoteo 3:​12; 1 Petelo 3:​14) Ka tou mālo ʼi te ʼu ʼahiʼahi ʼaia, pea ʼe feala hatatou ʼui kua “ ʼahiʼahiʼi” tatatou tui. Pea ka mālo tatatou tui ʼi te ʼu ʼahiʼahi ʼaia, ʼe “ina fakatupu te faʼa kātaki.” Ko tatatou tui ʼaē neʼe fakamālohiʼi ʼi te ʼu ʼahiʼahi, ʼe tokoni anai kia tatou ke tou kātakiʼi te tahi ʼu ʼahiʼahi ki muli age.

6. E feafeaʼi te “fakakatoa e te faʼa kātaki tana gāue,” pea koteā te meʼa ʼaē ʼe feala ke tou fai mokā ʼahiʼahiʼi tatou?

⁶ Kae neʼe ʼui fēnei e Sake, “ke fakakatoa e te faʼa kātaki tana gāue.” Kapau ʼe tou tuku ke hoko atu he ʼahiʼahi ʼo mole tou faiga ke tou foimo fakagata ʼaki he faʼahiga puleʼaki ʼe mole ʼalutahi mo te aga faka Kilisitiano, pea ʼe katoa anai te “gāue” ʼa te faʼa kātaki, ʼo ina fakaliliu tatou ko he ʼu Kilisitiano katoa, ʼe tui mālohi. ʼE mahino papau ia, kapau ʼe hā hotatou vaivaiʼaga ʼi te ʼahiʼahi ʼaia, pea ʼe tonu ke tou kumi tokoni kia Sehova moʼo tauʼi te vaivaiʼaga ʼaia. ʼE feafeaʼi anai mo kapau ʼe ʼahiʼahiʼi tatou ke tou fai he ʼu felāveʼi fakasino heʼeʼaoga? Tou fakahā te fihifihia ʼaia ʼi te faikole pea mo tou fai he ʼu gāue ʼe ʼalutahi mo tatatou faikole. Ohage la, ʼe lagi tonu anai ke tou fetogi matani gāue, peʼe tou fai he tahi ʼu fakatuʼutuʼu ke tou taupau tatatou agatonu ki te ʼAtua.​—Senesi 39:​7-9; 1 Kolonito 10:13.

Tou Kumi Te Poto

7. ʼE tokoni feafeaʼi anai tatou ke tou tauʼi te ʼu ʼahiʼahi?

⁷ Neʼe fakahā mai e Sake te meʼa ʼaē ʼe tonu ke tou fai mo kapau ʼe mole tou ʼiloʼi peʼe feafeaʼi hatatou tauʼi ʼo he ʼahiʼahi. (Sake 1:​5-8) ʼE mole fakaʼāga anai ia Sehova kia tatou heʼe mole feʼauga tatatou poto pea koteʼuhi ʼe tou faikole ʼaki he tui ke tou maʼu te poto ʼaia. ʼE tokoni mai anai kia tatou ke tou maʼu te faʼahiga manatu ʼaē ʼe lelei ʼo ʼuhiga mo totatou ʼahiʼahiʼi pea mo tou lava kātakiʼi. ʼE lagi fakatokagaʼi mai anai kia tatou e ʼihi tēhina mo tuagaʼane he ʼu vaega faka Tohi-Tapu, peʼe lagi tou maʼu anai ʼi tatatou ako takitokotahi ia te Tohi-Tapu. ʼE lagi fai anai e Sehova he meʼa, ke feala ai hatatou mahino ki te meʼa ʼaē ʼe tonu ke tou fai. ʼE lagi takitaki anai tatou e te laumālie ʼa te ʼAtua. (Luka 11:13) Ke feala hatatou maʼu te ʼu fua lelei ʼaia, ʼe mahino ia ʼe tonu ke tou pipiki maʼu ki te ʼAtua pea mo tana hahaʼi.​—Tāʼaga Lea 18:1.

8. He koʼe ʼe mole foaki anai e Sehova he meʼa kia ia ʼaē ʼe lotolotolua?

⁸ ʼE foaki mai e Sehova tona poto ke tou tauʼi te ʼu ʼahiʼahi, mo kapau ʼe tou “haga kole ʼaki te tui, ʼo mole [tou] lotolotolua ʼi he meʼa.” Ko ia ʼaē ʼe lotolotolua “ ʼe hage ia ko te hou ʼo te peau ʼo te moana ʼaē ʼe lagaʼi [fakafokifā] e te matagi.” Kapau ʼe tou lotolotolua ʼi te faʼahi fakalaumālie, pea ʼe mole feala ke tou ‘fakaʼamu ʼe tou maʼu anai he meʼa mai ia Sehova.’ Koia ʼaua naʼa tou “lotolotolua” pea mo “loto maveu” ʼi tatatou ʼu faikole pe ko te tahi age ʼu ʼaluʼaga. Kae tou tui kia Sehova, te Matapuna ʼo te poto.​—Tāʼaga Lea 3:​5, 6.

Ko Te Kau Maʼu Koloā Mo Te Kau Masiva ʼe Feala Ke Nātou Fakafiafia

9. He koʼe koa ʼe feala hatatou fakafiafia ʼi totatou ʼuhiga kau atolasio ʼa Sehova?

⁹ Kapau ʼe kau ʼi tatatou ʼu ʼahiʼahi totatou ʼuhiga masiva, tou manatuʼi ʼe feala ke fakafiafia te kau Kilisitiano maʼu koloā pea mo te kau Kilisitiano māsisiva. (Sake 1:​9-​11) ʼI muʼa ʼo tanatou liliu ko he kau tisipulo ʼa Sesu, ko te tokolahi ʼo te kau Kilisitiano fakanofo neʼe mole faʼa lahi tonatou ʼu koloā, pea neʼe meʼa noaʼi nātou e te hahaʼi ʼo te mālama. (1 Kolonito 1:​26) Kae neʼe feala ke nātou “fakafiafia” ʼuhi ko tonatou ʼuhiga hahaʼi maʼu tofiʼa ʼo te Puleʼaga. (Loma 8:​16, 17) ʼI te tahi faʼahi, ko te hahaʼi maʼu koloā ʼaē neʼe fakaʼapaʼapaʼi ʼi muʼa atu, neʼe “fakalainoaʼi” nātou ʼi tonatou ʼuhiga tisipulo ʼa Sesu koteʼuhi neʼe fehiʼa kia nātou te hahaʼi ʼo te mālama. (Soane 7:​47-​52; 12:42, 43) Kae ʼi totatou ʼuhiga kaugana ʼa Sehova, ʼe tou fakafiafia fuli koteʼuhi, ko te ʼu koloā pea mo te tuʼulaga fakamālama ʼe ko he ʼu meʼa noa mokā tou fakatatau ki te ʼu koloā fakalaumālie ʼaē ʼe tou maʼu. Pea ʼe tou loto fakafetaʼi ʼaupito koteʼuhi, ʼe mole maʼu ia tatou te fialahi pea mo te fia maʼu tuʼulaga!​—Tāʼaga Lea 10:22; Gāue 10:34, 35.

10. Koteā te manatu ʼaē ʼe tonu ke maʼu e te kau Kilisitiano ʼo ʼuhiga mo te ʼu koloā?

¹⁰ ʼE tokoni mai ia Sake kia tatou ke tou mahino, ko totatou maʼuli ʼe mole fakalogo ia ki te ʼu koloā pea mo te ʼu fakatuʼutuʼu fakamālama ʼaē ʼe tou fai. Ohage ko te fisiʼi teu ʼaē, logope tona matalelei, ʼe fefe pea mo mate ʼi te “vevela” ʼo te laʼā, ʼe toe feiā pe mo te ʼu koloā ʼa te tagata, ʼe mole feala ke ina fakaloaloaga tona maʼuli. (Pesalemo 49:​6-9; Mateo 6:​27) ʼE lagi mate anai ʼi tana lolotoga fai ia “tana ʼu gāue,” ohage la ko he fakatau koloā. Koia, ʼe maʼuhiga ʼaupito ke tou “tānaki koloā ki te ʼAtua” pea mo tou fai ia meʼa fuli moʼo fakamuʼamuʼa te ʼu meʼa ʼo te Puleʼaga.​—Luka 12:13-​21; Mateo 6:​33; 1 Timoteo 6:​17-​19.

Manuʼia Ia Nātou ʼAē ʼe Nātou Kātakiʼi Te ʼu ʼAhiʼahi

11. Koteā te ʼu fakapale ʼaē ka maʼu anai e nātou ʼaē ʼe nātou pipiki maʼu ki tanatou tui ʼi tanatou tauʼi ia te ʼu ʼahiʼahi?

¹¹ Tatau aipe peʼe tou maʼu koloā peʼe tou māsisiva, kae ʼe feala hatatou fakafiafia mo kapau ʼe tou kātakiʼi te ʼu ʼahiʼahi. (Sake 1:​12-​15) Kapau ʼi tatatou ʼosi kātakiʼi te ʼu ʼahiʼahi, ʼe kei mālohi tatatou tui, pea ʼe lau anai ʼe tou manuʼia, heʼe ko he meʼa fakafiafia te fakahoko ʼo te ʼu meʼa ʼaē ʼe lelei ia mata ʼo te ʼAtua. ʼI tanatou pipiki maʼu ki tanatou tui ʼo aʼu ki tonatou mate, ko te kau Kilisitiano fakanofo ʼe nātou maʼu anai “te kolona ʼo te maʼuli,” ʼaē ko te maʼuli tuputupua ʼi selo. (Fakahā 2:​10; 1 Kolonito 15:50) Kapau ʼe tou maʼu te ʼamanaki ki te maʼuli ʼi te kele pea mo tou taupau tatatou tui ki te ʼAtua, pea ʼe feala anai hatatou maʼuʼuli ʼo heʼegata ʼi he kele kua liliu ko he palatiso. (Luka 23:43; Loma 6:​23) ʼE ko he meʼa ʼofa ʼaia ʼa Sehova kia nātou fuli ʼaē ʼe nātou tui kia te ia!

12. Kapau ʼe tou tau mo he ʼu fihifihia, he koʼe ʼe mole tonu ke tou ʼui ʼe ʼahiʼahiʼi tatou e te ʼAtua?

¹² ʼE feala koa ke ʼahiʼahiʼi tatou e Sehova totonu? Kailoa, pea ʼe mole tonu ke tou ʼui fēnei: “ ʼE ʼahiʼahiʼi ʼau e te ʼAtua.” ʼE mole fia fakaneke tatou e Sehova ke tou agahala, kae ʼe tokoni moʼoni anai kia tatou pea mo ina foaki mai anai te mālohi ʼaē ʼe ʼaoga kia tatou ke tou kātakiʼi te ʼu ʼahiʼahi pea mo tou pipiki maʼu ki tatatou tui. (Filipe 4:​13) Ko te ʼAtua ʼe maʼoniʼoni, koia ʼe mole ina fakatuʼutuʼu he ʼu faʼahiga ʼaluʼaga ke tou tō ai ki te ʼu aga ʼaē ʼe kovi. Kapau ʼe tou tō ki he ʼaluʼaga ʼe mole lelei, ʼo tou agahala ai, pea ʼe mole tonu ke tou tukugakoviʼi ia Sehova, “koteʼuhi ʼe mole feala ke ʼahiʼahiʼi te ʼAtua e he ʼu meʼa ʼe kovi, pea ko ia totonu ʼe mole ina ʼahiʼahiʼi he tahi.” Logope la ʼe fakagafua e Sehova ke hoko kia tatou he ʼahiʼahi moʼo fakatonutonuʼi ʼo tatou, kae ʼe mole ina ʼahiʼahiʼi tatou ʼaki he fakatuʼutuʼu kovi. (Hepeleo 12:​7-​11) ʼE lagi fakaneke anai tatou e Satana ke tou fai he meʼa ʼe kovi, kae ʼe feala ke hāofaki tatou e Sehova mai te agakovi ʼaia.​—Mateo 6:​13.

13. Koteā te meʼa ʼaē ʼe feala ke hoko mo kapau ʼe mole tou tekeʼi he holi ʼe kovi?

¹³ ʼE tonu ke tou faikole tuʼumaʼu koteʼuhi ʼe feala ʼi ʼihi ʼaluʼaga, ke tupu ai hatatou holi kovi, ʼo fakaneke ai tatou ke tou agahala. ʼE ʼui fēnei e Sake: “Ko te tagata takitokotahi ʼe ʼahiʼahiʼi mokā ina tuku ke toho ia ia pea mo fakaoloolo ia ia e tona holi totonu.” ʼE mole feala hatatou tukugakoviʼi te ʼAtua ki te agahala ʼaē neʼe tou fai, mo kapau neʼe tou fafaga totatou loto ʼaki he ʼu holi kovi. Kapau ʼe mole tou tekeʼi te holi kovi, pea ʼe tuputupu te holi ʼaia ʼi te loto, pea ʼe ina “fakatupu [ai] te agahala.” Pea ka fakahoko te agahala, pea ʼe “fakatupu ai te mate.” ʼE hā lelei mai, ʼe tonu ke tou puipui totatou loto pea mo fakafeagai ki te ʼu holi ʼaē ki te agahala. (Tāʼaga Lea 4:​23) Neʼe fakatokagaʼi ia Kaino ke nofo tokaga ki te agahala, kae neʼe mole fakafeagai ia ki tona holi ʼaē neʼe kovi. (Senesi 4:​4-8) Koia, e feafeaʼi mo kapau ʼe tou kamata fai he ʼu meʼa ʼe mole ʼalutahi mo te ʼu pelesepeto faka Tohi-Tapu? ʼE mahino ia, ʼe tonu ke tou loto fakafetaʼi mo kapau ʼe faiga te kau tagata ʼāfea ke nātou tokoni kia tatou ke ʼaua naʼa tou agahala ki te ʼAtua.​—Kalate 6:1.

Ko Te ʼAtua​—Ko Te Matapuna ʼo Te ʼu Meʼa Lelei

14. ʼE lava feafeaʼi hatatou ʼui, ʼe “haohaoa” te ʼu meʼa ʼofa ʼa te ʼAtua?

¹⁴ ʼE tonu ke tou manatuʼi, ko Sehova ʼe ko te Matapuna ʼo te ʼu meʼa lelei, ka mole ko te Matapuna ʼo te ʼu ʼahiʼahi. (Sake 1:​16-​18) ʼE fakahigoaʼi e Sake tona ʼu kaugā fagona ʼi te tui ko tona ʼu “tēhina ʼofaina,” pea mo ina fakahā ko te ʼAtua ʼe ko Ia ʼaē ʼe ina Foaki “te ʼu meʼa ʼofa lelei fuli pea mo te mōlaga haohaoa fuli.” ʼE “haohaoa” peʼe katoa te ʼu meʼa ʼofa ʼa Sehova ʼi te faʼahi fakalaumālie pea mo te faʼahi fakasino, pea ʼe mole tou hala ʼi he meʼa. Ko te ʼu meʼa ʼofa ʼaia ʼe haʼu “mai ʼoluga,” mai te nofoʼaga ʼa te ʼAtua ʼi selo. (1 Hau 8:​39) Ko Sehova ʼe ko “te Tāmai ʼo te ʼu mālama ʼaē ʼi selo”​—ia te laʼā, mo te māhina, pea mo te ʼu fetuʼu. ʼE ina toe foaki mai foki te mālama pea mo te moʼoni fakalaumālie. (Pesalemo 43:3; Selemia 31:35; 2 Kolonito 4:6) Ko Sehova ʼe mole hage ko te laʼā ʼaē ʼe hoki mālama lelei ʼi te fetapā, kae ko te ʼAtua ʼe lelei ʼaupito tuʼumaʼu tana foaki mai te ʼu meʼa lelei. ʼE mahino papau ia, ʼe tokoni anai kia tatou ke tou tauʼi te ʼu ʼahiʼahi mo kapau ʼe tou fakaʼaogaʼi fuli te ʼu meʼa fakalaumālie ʼaē ʼe foaki mai e tana Folafola pea mo te “kaugana agatonu mo poto.”​—Mateo 24:45.

15. Koteā te tahi meʼa ʼofa ʼa Sehova ʼe lelei ʼaupito?

¹⁵ Koteā te tahi meʼa ʼi te ʼu meʼa ʼofa lelei ʼaupito ʼaē neʼe fai e Sehova? Neʼe ko te fakatupu ʼo he ʼu foha fakalaumālie ʼaki tona laumālie maʼoniʼoni, ʼo nātou mulimuli ki te logo lelei, peʼe “ko te folafola ʼo te moʼoni.” Ko nātou ʼaia ʼaē neʼe tutupu ʼi te faʼahi fakalaumālie, ʼe ko te ʼu “faʼahiga ʼuluaki fua” ʼaē neʼe filifili ʼi te lotolotoiga ʼo te malamanei, ke nātou liliu ʼi te lagi ko he “puleʼaga pea mo he kau pelepitelo.” (Fakahā 5:​10; Efesi 1:​13, 14) Neʼe lagi manatu ia Sake ki te ʼu ʼuluaki fua ʼo te olose ʼaē neʼe momoli ʼi te ʼaho 16 ʼo Nisani, te ʼaho ʼaia ʼaē neʼe fakatuʼuake ai ia Sesu, pea neʼe lagi manatu ki te momoli ʼo te ʼu pane fulumeto e lua ʼi te ʼaho ʼo te Penikosite, ʼi te temi ʼaē neʼe tufa ai te laumālie maʼoniʼoni. (Levitike 23:​4-​11, 15-​17) ʼI te faʼahi ʼaia neʼe ko Sesu te ʼu ʼuluaki fua pea ko nātou ʼaē ʼe nātou maʼu tofiʼa mo ia ʼe kau ki te “faʼahiga ʼuluaki fua.” E feafeaʼi mo kapau ʼe tou ʼamanaki ki te maʼuli ʼi te kele? Kapau ʼe tou manatuʼi tuʼumaʼu te ʼamanaki ʼaia, pea ʼe tokoni anai te faʼahi ʼaia kia tatou ke tou pipiki maʼu ki tatatou tui kia Ia ʼaē ʼe ina foaki “te ʼu meʼa ʼofa lelei fuli,” ia ia ʼaē ʼe ina faka fealagia kia tatou ke tou maʼuli ʼo heʼegata ʼi te takitaki ʼo tona Puleʼaga.

Koutou “Maʼuliʼi Te Folafola”

16. He koʼe ʼe tonu ke tou ‘vave ʼi te fagono kae tou tuai ʼi te palalau pea mo te ʼita’?

¹⁶ Tatau aipe peʼe ʼahiʼahiʼi tatatou tui peʼe kailoa ʼi te temi ʼaenī, kae ʼe tonu ke tou liliu ko he ʼu “hahaʼi ʼe nātou maʼuliʼi te folafola.” (Sake 1:​19-​25) ʼE tonu ke tou “vave ʼi te fagono” ki te folafola ʼa te ʼAtua, ʼo tou mulimuli lelei kiai. (Soane 8:​47) ʼI te tahi faʼahi, tou “tuai ʼi te palalau,” ʼo tou fakafuafua fakalelei te ʼu palalau ʼaē ʼe tou fai ki ʼihi. (Tāʼaga Lea 15:28; 16:23) Neʼe lagi fakaloto mālohiʼi tatou e Sake, ke ʼaua naʼa tou foimo tukugakoviʼi te ʼAtua, ʼo tou ʼui ʼe ko ia ʼaē ʼe ina fakatupu ia te ʼahiʼahiʼi ʼo tatou. ʼE toe tokoni mai foki kia tatou ke tou “tuai ʼi te ʼita; heʼe ko te ʼita ʼa te tagata, ʼe mole ina fakahoko te faitotonu ʼa te ʼAtua.” Kapau ʼe tou ʼita ʼuhi ko he ʼu palalau neʼe fai e he tahi, tou loto lolomi ke ʼaua naʼa tou tali ʼaki he ʼu palalau ʼe mole fakaʼapaʼapa. (Efesi 4:​26, 27) Ko te loto ʼita ʼe ina fakatupu he ʼu fihifihia kia tatou pea mo ʼihi, kae ʼe mole feala ke ina fakatupu te ʼu fua ʼo tatatou tui ki totatou ʼAtua faitotonu. Tahi ʼaē meʼa, kapau ʼe tou “mahu ʼi te fakasiosio lelei,” ʼe tou “tuai [anai] ʼi te ʼita,” pea ko totatou ʼu tēhina mo tuagaʼane ʼe nātou fia fakakaugā tahi anai mo tatou.​—Tāʼaga Lea 14:29.

17. Koteā te meʼa ʼaē ʼe tou fakahoko mokā tou toʼo te ʼu meʼa kovi mai totatou loto pea mo totatou ʼatamai?

¹⁷ ʼE maʼuhiga ʼaupito kia tatou ke tou līaki fuli “te aga heʼemaʼa”​—ia te ʼu meʼa fuli ʼaē fakalialia ia mata ʼo te ʼAtua pea mo ina fakatupu te ʼita. Tahi ʼaē meʼa, ʼe tonu ke tou “līaki te meʼa ʼaē kua mahu ʼaupito, te agakovi.” ʼE tonu kia tatou fuli ke tou molehi ʼi totatou maʼuli, te ʼu meʼa fuli ʼaē ʼe heʼemaʼa ʼi te faʼahi fakasino pe ko te faʼahi fakalaumālie. (2 Kolonito 7:1; 1 Petelo 1:​14-​16; 1 Soane 1:9) Ko te molehi ʼaia ʼo te ʼu meʼa kovi ʼo totatou loto pea mo totatou ʼatamai, kua tokoni kia tatou ke tou ‘tali ʼaki he agamālū ke to te folafola ʼo te moʼoni ia tatou.’ (Gāue 17:11, 12) Tatau aipe pe kua fualoa tatatou kua ʼi te moʼoni, kae ʼe tonu ke tou tuku ke to ia tatou he tahi ʼu moʼoni faka Tohi-Tapu. Koteā tona tupuʼaga? Koteʼuhi ʼaki te laumālie ʼo te ʼAtua, ko te folafola ʼaē neʼe to ʼe ina fakatupu te “ ʼuhigaʼi tagata foʼou” ʼaē ka ina faka fealagia ke tou maʼu te hāofaki.​—Efesi 4:​20-​24.

18. Koteā te kehekehe ʼo ia ʼaē ʼe fagono pe ki te folafola pea mo ia ʼaē ʼe ina maʼuliʼi te folafola?

¹⁸ ʼE lava feafeaʼi hatatou fakahā, ʼe tou mulimuli ki te takitaki ʼo te folafola ʼa te ʼAtua? ʼE tonu ke tou liliu “ko he ʼu hahaʼi [talagafua] ʼe nātou maʼuliʼi te folafola, ka mole ko he ʼu hahaʼi ʼe nātou fagono pe kiai.” (Luka 11:28) Ko nātou ʼaē ʼe nātou “maʼuliʼi te folafola” ʼe nātou maʼu te tui ʼaē ʼe ina fakatupu te ʼu fua lelei, ohage la ko te gāue kinakina ʼi te minisitelio faka Kilisitiano pea mo te fai ʼo he ʼu tali ʼi te ʼu fono ʼa te hahaʼi ʼa te ʼAtua. (Loma 10:14, 15; Hepeleo 10:24, 25) Ko ia ʼaē ʼe fagono pe ki te folafola, “ ʼe hage ia ko he tagata ʼe ina sioʼi tona fofoga ʼi he sioʼata.” ʼE ina sioʼi, pea ʼalu ʼo galo atu aipe kia ia te ʼu meʼa ʼaē e lagi tonu ke ina fai moʼo fetogi ia te agaaga ʼo tona fofoga. ʼI totatou ʼuhiga “hahaʼi ʼe nātou maʼuliʼi te folafola,” ʼe tou ako fakalelei pea mo fakalogo ki te “lao haohaoa” ʼa te ʼAtua, ʼaē ʼe fakahā ai te ʼu meʼa fuli ʼaē ʼe ina fakamaʼua mai kia tatou. Ko te ʼāteaina ʼaē ʼe tou maʼu ʼe kehekehe ʼaupito mo te nofo popūla ʼi te agahala pea mo te mate, koteʼuhi ko te ʼāteaina ʼaia ʼe ina taki tatou ki te maʼuli. Koia, tou ‘haga nofo ʼi te lao haohaoa,’ ʼo tou sivisivi tuʼumaʼu pea mo fakalogo kiai. Pea koutou fakakaukauʼi age muʼa te faʼahi ʼaenī, ʼi totatou ʼuhiga hahaʼi ‘ ʼaē ʼe nātou fai te gāue, ka mole ko he ʼu hahaʼi ʼe nātou fagono kae nātou loto galogalo,’ ʼe tou fiafia ʼuhi ko te ʼofa ʼa Sehova kia tatou.​—Pesalemo 19:​7-​11.

ʼE Tonu Ke Lahi Tuʼumaʼu Tatatou Tauhi

19, 20. (a) ʼO mulimuli ki te koga tohi ʼo Sake 1:​26, 27, koteā ʼaē ʼe fakamaʼua mai e te tauhi maʼa kia tatou? (b) Koteā te ʼu faʼifaʼitaki ʼo he ʼu faʼahiga tauhi heʼe mele?

¹⁹ Kapau neʼe fakapapau mai ʼe tou maʼu anai te ʼofa ʼa te ʼAtua, pea ʼe tonu ke tou manatuʼi, ko te tauhi moʼoni ʼe mole ko he meʼa ʼe tou fai feiā pe. (Sake 1:​26, 27) ʼE lagi tou manatu ʼe feʼauga tatatou tauhi kia Sehova, kae ʼe maʼuhiga tāfito te fakafuafua totonu e Sehova tatatou ʼu gāue takitokotahi. (1 Kolonito 4:4) Lagi ko totatou mele ʼe ko te ‘mole tātāʼofi ʼo totatou ʼalelo.’ ʼE tou faihala anai mo kapau ʼe tou manatu, ʼe leleiʼia e te ʼAtua tatatou tauhi mokā tou fai fatufatu, peʼe tou gutuloi, peʼe tou fakaʼaogaʼi kovi totatou ʼalelo ʼi te tahi ʼu faʼahiga ʼaluʼaga. (Levitike 19:16; Efesi 4:​25) ʼE mahino papau ia, ʼe mole tou loto ke “ ʼalunoa” tatatou “faʼahiga tauhi” pea mo mole tali e te ʼAtua.

²⁰ Logope ʼe mole talanoa ia Sake ki te ʼu agaaga fuli ʼo te tauhi maʼa, kae ʼe ina ʼui ʼe kau ai mo te ‘tokaga ki te ʼu fānau ʼaē ʼe hala mo tāmai pea mo faʼe, pea mo te kau fafine vitua ʼi tonatou ʼu mamahi.’ (Kalate 2:​10; 6:​10; 1 Soane 3:​18) ʼE faiga e te kokelekasio faka Kilisitiano ke tokaga ki te ʼu fafine vitua. (Gāue 6:​1-6; 1 Timoteo 5:​8-​10) Mai tona ʼuhiga ʼaē ko te ʼAtua ʼe ko Ia ʼaē ʼe ina taupau te ʼu fafine vitua pea mo te ʼu fānau ʼaē ʼe hala mo tāmai, tou gāue fakatahi mo Ia ʼo tou fai ia meʼa fuli moʼo tokoni kia nātou ʼi te faʼahi fakalaumālie pea mo te faʼahi fakasino. (Teutalonome 10:17, 18) Ko te tauhi maʼa ʼe faka ʼuhiga foki ke kita “nofo tokaga ʼo ʼāteaina ʼi te mele fuli pe ʼo te malamanei,” te sosiete fakatagata heʼe faitotonu ʼaē ʼe nofo ʼi te mālohi ʼa Satana. (Soane 17:16; 1 Soane 5:​19) Koia, tou ʼāteaina mai te ʼu aga heʼemaʼa ʼo te mālama heʼe tui, ke feala hatatou faka kolōliaʼi ia Sehova pea ke tou faiva ʼi te tauhi ʼaē kia te ia.​—2 Timoteo 2:​20-​22.

21. ʼI tatatou vakaʼi te tohi ʼo Sake, koteā te tahi ʼu fehuʼi ʼaē ʼe tonu ke tou vakaʼi?

²¹ Ko te ʼu tokoni ʼa Sake ʼaē neʼe tou vakaʼi ʼi te alatike ʼaenī, ʼe nātou tokoni anai kia tatou ke tou kātakiʼi te ʼu ʼahiʼahi pea mo tou pipiki maʼu ki tatatou tui. ʼE ko he ʼu fakaloto mālohi ke lahi age totatou loto fakafetaʼi kia Ia ʼaē ʼe ina fai te ʼu meʼa ʼofa lelei. Pea ko te ʼu palalau ʼa Sake ʼe ko he ʼu tokoni ke tou maʼuliʼi te tauhi maʼa. Koteā te tahi ʼu meʼa ʼaē ʼe ina fakatokagaʼi kia tatou? Koteā te tahi ʼu meʼa ʼaē ʼe feala ke tou fai moʼo fakamoʼoni ʼaki, ʼe tou tui moʼoni kia Sehova?

[Nota ʼi te lalo pasina]

ʼE Feafeaʼi Anai Hakotou Tali?

◻ Koteā ʼaē ka tokoni anai kia tatou ke tou kātakiʼi te ʼu ʼahiʼahi?

◻ Logope la te ʼu ʼahiʼahi ʼaē ʼe hoko kia nātou, he koʼe koa ʼe fakafiafia pe te kau Kilisitiano?

◻ ʼE lava feafeaʼi hatatou liliu ko he ʼu hahaʼi ʼe nātou maʼuliʼi te folafola?

◻ Koteā te ʼu meʼa ʼaē ʼe pipiki ki te tauhi maʼa?

[Paki ʼo te pasina 9]

Ka ʼahiʼahiʼi koutou, koutou tui ʼe feala ki te ʼAtua ke ina tali takotou ʼu kole

[Paki ʼo te pasina 10]

“ ʼE nātou maʼuliʼi te folafola” ʼo nātou kalagaʼi te Puleʼaga ʼo te ʼAtua ʼi te kele katoa