Koteā ʼAē ʼe Fakahā e Te Sioʼata?
KOUTOU fakasiosio ki he sioʼata. Koteā ʼaē ʼe koutou sio ki ai? ʼI ʼihi temi, ʼaki pe he kiʼi sio fakavilivili ki te sioʼata, ʼe ʼasi mai ʼi takotou fofoga he mele pea ʼe koutou fiafia ʼi te fakatonutonuʼi ʼo te faʼahi ʼaia ʼi muʼa ʼo hona fakatokagaʼi e niʼihi.
Ko te Tohi-Tapu ʼe hage ko he sioʼata. ʼE feala ke tokoni mai kia tatou ke tou maʼu he fakasiosio tonu ʼo ʼuhiga mo totatou ʼuhiga totonu, ʼo ina tāʼofi anai tatou mai he manatu ʼe lahi fau—peʼe siʼisiʼi fau—ki totatou maʼuhiga ʼaē ia mata ʼo Sehova. (Mateo 10:29-31; Loma 12:3) ʼO hilifaki kiai, ʼe feala ke fakahā mai e te Tohi-Tapu he ʼu mele ʼi tatatou ʼu palalau, ʼi tatatou ʼu gāue, peʼe ʼi tatatou ʼu aga ʼaē ʼe ʼaoga ke tou fakatonutonuʼi. Ka hoko te faʼahi ʼaia, ʼe koutou lotonoa koa ki te meʼa ʼaē ʼe fakahā atu e te sioʼata?
ʼE ʼui fēnei e te tagata faitohi ʼo te Tohi-Tapu ko Sake: “Kapau ʼe fagono he tahi ki te folafola kae mole ko he tahi ʼe ina maʼuliʼi, ʼe hage ia ko he tagata ʼe ina fakasiosio tona fofoga ʼi he sioʼata. Heʼe fakasiosio pe ia, pea ʼalu pea galo atu aipe tona faʼahiga tagata.”—Sake 1:23, 24.
ʼO kehekehe ia mo te faʼahiga tagata ʼe talanoa ki ai Sake ʼi henī, ʼaē ko he tahi “ ʼe sio loloto ki te lao haohaoa ʼaē ʼa te ʼāteaina, pea mo haga nofo ai.” (Sake 1:25) Ko te kupu faka Keleka ʼaē ʼe fakaliliu ʼaki te kupu “sio loloto” ʼe faka ʼuhiga ki te punou ia tafa peʼe ko te vakaʼi fakalelei ʼo he meʼa. ʼE ʼui e te tikisionalio (Theological Dictionary of the New Testament): “ ʼE mole faka ʼuhiga ia ki he kiʼi sio fakavilivili.” ʼE pipiki ki te kupu ʼaia he kumikumi fakalelei ʼo he meʼa neʼe fūfū. ʼE tohi fēnei e te tagata ʼe ina fakamahino te Tohi-Tapu ko Randolph Tasker: “ ʼE ʼi ai te meʼa tāfito ʼe holi ke sio kiai ia ia ʼaē ʼe lautohi, logope la ʼe feala ke mata faigataʼa kia ia hana sio kiai pea mo mahino ki tona faka ʼuhiga ʼi te moʼi temi pe ʼaia ʼe lautohi ai.”
Koia, ʼe koutou loto anai koa ke vakaʼi koutou e te sioʼata ʼaē ko te Folafola ʼa te ʼAtua pea mo koutou mulimuli ki te meʼa ʼaē ʼe loto ki ai? ʼE toe hoko atu e Sake, ʼo fēnei: “ ʼE fiafia anai te tagata ʼaia ʼi hona maʼuliʼi, koteʼuhi kua liliu ia, mole ko he tahi ʼe fagono pea galo atu aipe, kae ko he tahi ʼe ina fai te gāue.”—Sake 1:25.