Te Tokoni Ki Te ʼu Fafine Vitua ʼAē ʼe Faigataʼaʼia
ʼI TE ʼU hisitolia ʼaē ʼe ʼiloa lelei ʼo ʼuhiga mo te ʼu fafine vitua, ʼe ko te hisitolia faka Tohi-Tapu ʼo Lute pea mo te faʼe ʼo tona ʼohoana, ko Naomi. Ko nāua toko lua neʼe ko te ʼu fafine vitua. Ko Naomi neʼe mate tona ʼohoana ʼo feiā mo tana ʼu tama e lua, ʼaē ko te tahi ia nāua neʼe ko te ʼohoana ʼo Lute. Neʼe fakaʼofaʼofa tonā ʼaluʼaga, he neʼe nā maʼuʼuli ʼi te sosiete gāue kele pea neʼe fai tāfito te gāue ʼaia e nātou tagata.—Lute 1:1-5, 20, 21.
Kae neʼe maʼu e Naomi tona kaumeʼa lotomahino pea mo fakaloto fīmālie ko tana taʼahine ko Lute, ʼaē neʼe fia nofo mo ia. ʼAki te temi, neʼe fakahā e Lute “neʼe lelei age ia ia kia [Naomi] ia foha e fitu”—ʼuhi ko tona ʼofa lahi kia Naomi, pea mo tona ʼofa lahi ki te ʼAtua. (Lute 4:15) ʼI te fakatotonu age e Naomi kia Lute ke liliu ki tona famili Moapite pea mo tona ʼu kaumeʼa, neʼe fai e Lute he ʼu palalau fakatupu malave loto ʼo ʼuhiga mo tana agatonu, heʼe ina ʼui fēnei: “Ko te faʼahi ʼaē ka ke ʼalu kiai ʼe ʼau ʼalu anai kiai, pea ko te faʼahi ʼaē ka ke moe ai ʼe ʼau moe ai anai. Ko tau hahaʼi ʼe liliu anai ko taku hahaʼi, pea ko tou ʼAtua ʼe liliu anai ko toku ʼAtua. Pea ko te faʼahi ʼaē ka ke mate ai ʼe ʼau mate ai anai, pea ʼe tanu anai ʼau ʼi te faʼahi ʼaia. Ke fai feiā e Sehova kia te ʼau pea mo toe hilifaki kiai, mo kapau ʼe ʼi ai he tahi meʼa gata pe ki te mate ʼe ina fakamavae ia ʼau mai ia te koe.”—Lute 1:16, 17.
Neʼe tokagaʼi e Sehova ʼAtua ia te aga ʼa Lute. Neʼe ina tapuakinaʼi te taufaʼe ko Naomi pea mo Lute, pea neʼe ʼohoana ia Lute mo te tagata Iselaele ko Poase. Ko tanā tamasiʼi ʼaē neʼe pusiaki e Naomi ohage pe ko hana tamasiʼi totonu, neʼe liliu ko te kui ʼa Sesu Kilisito. Ko te hisitolia ʼaenī ʼe ina fakahā lelei ʼe ʼofa ia Sehova ki te ʼu fafine vitua ʼaē ʼe nātou fakaōvi pea mo falala age kia te ia. Pea tahi ʼaē meʼa, ʼe fakahā mai e te Tohi-Tapu ʼe ina faka maʼuhigaʼi te ʼu hahaʼi ʼaē ʼe nātou agaʼofa ʼo taupau fakalelei te ʼu fafine vitua ʼi tonatou ʼu faigataʼaʼia. Koia ʼe lava feafeaʼi ia ʼaho nei hatatou tokoni ki te ʼu fafine vitua ʼaē ʼe nonofo mo tatou?—Lute 4:13, 16-22; Pesalemo 68:5.
Ko He Tokoni ʼAoga Kae ʼAua Naʼa Fai Fakamālohi
Kapau ʼe kita foaki he tokoni ki he fafine vitua, pea ʼe lelei ke kita fakahā lelei age kae ʼaua naʼa kita fai fakamālohi. ʼAua naʼa fai te ʼu taʼi palalau ʼaenī, “Fakahā mai te meʼa ʼaē ʼe ke loto kiai.” ʼE hage pe ʼe koutou ʼui fēnei age ki he tahi ʼe mokosia pea mo pakupaku: “Fakamafana mo taupau mauli” kae mole koutou ʼavage hana meʼa. (Sakopo 2:16) Tokolahi te hahaʼi tatau aipe peʼe nātou faigataʼaʼia, kae ʼe mole nātou kole anai ki he tahi ke tokoni age, pea ʼe nātou ʼutaki pe anai ʼi tonatou loto. ʼE ʼaoga kia tatou he fakasiosio tonu moʼo tokoni kia nātou ʼaia, ke kita ʼiloʼi te ʼu meʼa ʼaē ʼe ʼaoga kia nātou. Pea tahi ʼaē meʼa, kapau ʼe lahi fau te ʼu puleʼaki ʼaē ʼe kita fai maʼa ia—tāfito la mokā ʼe kita puleʼi te maʼuli ʼo te fafine vitua—pea ʼe lagi lotomamahi anai pea mo tupu ai he ʼu fihifihia. Koia ʼe fakahā lelei mai e te Tohi-Tapu ia te ʼaoga ʼaē ke kita fakafuafua lelei totatou ʼu vāhaʼa mo ʼihi. Logola ʼe fakaloto mālohiʼi tatou ke tou tokaga ki te ʼu meʼa ʼa te hahaʼi, kae ʼe toe fakamanatuʼi mai ke ʼaua naʼa tou fia ʼiloʼi meʼa fuli fau.—Filipe 2:4; 1 Petelo 4:15.
Neʼe maʼu e Lute te taʼi aga fakapotopoto ʼaia ʼo ʼuhiga mo Naomi. Neʼe pipiki maʼu ia Lute kia Naomi, kae neʼe mole mālohi fau ia tana tokaga ʼaē kia ia. Neʼe ina fai te ʼu puleʼaki fakapotopoto moʼo maʼu he meʼa kai maʼa ia pea mo Naomi, pea neʼe toe fakalogo pe foki ki te ʼu fakatotonu ʼa Naomi.—Lute 2:2, 22, 23; 3:1-6.
ʼIo, ʼe kehekehe te ʼu meʼa ʼaē ʼe ʼaoga ki te hahaʼi. Ko Sandra ʼaē neʼe tou ʼuluaki talanoa ki ai, ʼe ina ʼui fēnei: “Neʼe ʼau maʼu te ʼu meʼa ʼaē neʼe ʼaoga kia ʼau ʼi toku temi mamahi—neʼe ʼōmai kia ʼau te ʼu kaumeʼa ʼofaina.” Ko Elaine ʼaē neʼe tou ʼuluaki talanoa ki ai, neʼe ʼaoga kia ia ʼi te tahi moʼi temi ke nofo tokotahi. Koia ko he tokoni ʼofa ʼe fai ʼaki he fakasiosio tonu pea mo he lotomahino ʼe fakafuafua lelei, pea ʼe tou fakaʼapaʼapa ki te maʼuli faʼifaʼitaliha ʼo he tahi pea mo tou fia tokoni mo kapau ʼe ʼaoga te faʼahi ʼaia.
Te Tokoni ʼa Te Famili
Kapau ʼe fealagia, ʼe feala ki he famili ʼofa ke ina fakaloto mālohiʼi te fafine vitua ke ina kātakiʼi tona ʼu fihifihia mokā mate tona ʼohoana. Logola ʼe lagi ko ʼihi pe ʼi te famili totonu ʼaē ʼe nātou lava fai he tokoni lahi, kae ʼe feala kia tatou fuli ke tou kau ki te tokoni ʼaia. “Kapau e ko he [“fafine vitua,” MN ] e i ai ni ana fanau, pe ko hona u mokopuna, ko natou uluaki aia e natou ako onatou lotofale ki te mauli fakalotu mo liuaki onatou maua ki anatou matua, koteuhi e lelei te mea aia ia mua o te Atua.”—1 Timoteo 5:4.
ʼE lahi te ʼu ʼaluʼaga, ko te tokoni ʼi te faʼahi faka paʼaga ʼe lagi mole hona ʼaoga. Ko ʼihi fafine vitua ʼe nātou lava taupau ia nātou totonu ʼi te faʼahi ʼaia, pea ko ʼihi ʼe lagi nātou nonofo ʼi he ʼu fenua ʼe nātou tokoni ai kia nātou ʼi te faʼahi faka paʼaga. Kae ki te ʼu fafine vitua ʼaē ʼe ʼaoga ki ai he tokoni, ʼe tonu ki tonatou ʼu famili ke tokoni kia nātou. Kapau ʼe mole he ʼu kāiga ʼo he fafine vitua moʼo tokoni kia ia peʼe mole nātou lava tokoni ki ai, ʼe fakaloto mālohiʼi e te Tohi-Tapu ki tona ʼu kaugā fagona Kilisitiano ke nātou tokoni ki ai: “Ko te lotu maʼa mo heʼe mele ia mua o te Atua te Tamai e ko ia aeni: ko te ahiahi kia natou paea mo natou [“fafine vitua,” MN ] i onatou mamahi.”—Sakopo 1:27.
Ko nātou ʼaē ʼe nātou maʼuliʼi te ʼu fakatotonu ʼa te Tohi-Tapu, ʼe nātou ‘fakaʼapaʼapaʼapa moʼoni ki te ʼu fafine vitua.’ (1 Timoteo 5:3) Ko te faka maʼuhigaʼi ʼo he tahi, ko tona faka ʼuhiga ʼe kita fakaʼapaʼapa ki ai. Ko te hahaʼi ʼaē ʼe tou fakaʼapaʼapa ki ai, ʼe nātou logoʼi ʼe faka maʼuhigaʼi nātou, pea mo fakapelepeleʼi. ʼE mole hage kia nātou ko te tokoni ʼaē neʼe foaki age ʼe ko he meʼa ʼe fai fakakinau. Logola ko Lute neʼe ko te fafine vitua ʼi he moʼi temi, kae neʼe fakaʼapaʼapa moʼoni kia Naomi ʼo ina taupau fakalelei ia ia pea mo ʼofa ki ai, ʼo tokaga ki tona maʼuli fakasino pea mo te ʼu meʼa ʼo tona loto. ʼIo, ko te aga ʼa Lute, neʼe ina maʼu ai he matagafua lelei, koia neʼe ʼui ai e te tagata ʼaē neʼe ina ʼohoanaʼi: “ ʼE ʼiloʼi e te hahaʼi fuli ʼi te matapā ʼo taku hahaʼi ko koe ko te fafine lelei.” (Lute 3:11, nota ʼi te lalo pasina) ʼE mahino ia, neʼe ko he meʼa fakafiafia kia Lute hana tokoni kia Naomi, ʼuhi ko tana ʼofa ki te ʼAtua, mo tana lotomahino, pea mo tona ʼofa lahi ki te ʼu faiga ʼa Lute ʼo ʼuhiga mo ia. ʼE ko he faʼifaʼitaki lelei ʼaē ʼe tuku e Naomi ki te ʼu fafine vitua ia ʼaho nei!
Koutou Fakaōvi Ki Te ʼAtua
ʼIo, ʼe mole lava ki te famili pea mo te ʼu kaumeʼa ke nātou fetogi te kua puli ʼo te ʼohoana ʼo te fafine vitua ʼaē kua mate. Ko te tupuʼaga la ʼaia ʼo te maʼuhiga ki te fafine vitua ke fakaōvi tāfito ki “te Tamai o te manavaofa fuape mo te Atua o te u fakafimalie; iaʼia e ina fakafimalieʼi tatou i otatou mamahi fuape.” (2 Kolonito 1:3, 4) Koutou fakatokagaʼi te faʼifaʼitaki ʼa Ana, ko te fafine vitua tauhi lotu moʼoni neʼe taʼu 84 ʼi te temi ʼaē neʼe tupu ai ia Sesu.
Neʼe maʼuli tahi ia Ana mo tona ʼohoana ia taʼu pe e fitu pea mate, pea neʼe kumi e Ana tona fakafimālie kia Sehova. “Nee mole fakamamao ia mai te faletapu, nee nofo ai o tauhi ki te Atua i te sesunio mo te faikole po mo aho.” (Luka 2:36, 37) Neʼe tokagaʼi koa e Sehova ia te tauhi ʼa Ana? Ei! Neʼe ina fakahā age tona ʼofa kia ia ʼi hona ʼaluʼaga makehe, he neʼe ina faka fealagia ke sio ki te kiʼi tamasiʼi ʼaē ka liliu ko te Hāofakiʼaga ʼo te malamanei. ʼE ko he meʼa neʼe fiafia ai pea mo loto fīmālie ai ia Ana! Neʼe hoko moʼoni kia ia te Pesalemo 37:4: “Ke liliu ia Sehova ko tou fiafiaʼaga, pea ʼe ina foaki atu anai te ʼu meʼa ʼaē ʼe loto kiai tou loto.”
Te ʼu Gāue ʼAē ʼe Fai e Te ʼAtua ʼAki Te ʼu Kaugā Fagona Kilisitiano
ʼE ʼui fēnei ʼe Elaine: “Lolotoga he temi loaloaga ʼi te ʼosi mate ʼo Tavite, neʼe logo kovi toku sino, ohage ko he hele ʼe ina huki toku ʼu fatafata. ʼI taku manatu neʼe lagi mamahi toku fatu. ʼI te tahi ʼaho ʼi te lahi fau ʼo toku mamahi neʼe ʼau fia ʼalu ki he tōketā. Kae ʼaki te fakasiosio tonu ʼo toku tēhina fakalaumālie pea mo kaumeʼa, neʼe ina ʼui mai lagi neʼe ʼau feiā ʼuhi ko toku mamahi ʼi te mate ʼo toku hoa, pea neʼe ina tokoniʼi ʼau ke ʼau faikole kia Sehova ke tokoni mai pea mo fakaloto fīmālie ʼau. Neʼe ʼau foimo fakaʼaogaʼi aipe tana tokoni, ʼo ʼau kole fakalogologo mo toku loto katoa kia Sehova ke tokoni mai ki toku mamahi. Pea neʼe tokoni mai!” Neʼe maʼu e Elaine te loto fīmālie, pea mole tuai kiai neʼe puli ai mo tona mamahi fakasino.
ʼE lava foaki tāfito e te kau tagata ʼāfea ʼo te kokelekasio, he tokoni ʼofa ki te ʼu fafine vitua ʼaē ʼe lotomamahi. Kapau ʼe nātou foaki he tokoni pea mo he fakaloto fīmālie ʼi te faʼahi fakalaumālie, ʼo fai fakapotopoto pea ʼaki he fakasiosio tonu, pea ʼe lava tokoni te kau tagata ʼāfea ki te ʼu fafine vitua ʼaia ke nātou nonofo ōvi kia Sehova logola tonatou ʼu ʼahiʼahi. ʼE toe lava fai e te kau tagata ʼāfea he ʼu fakatuʼutuʼu moʼo foaki he tokoni ʼi te faʼahi fakasino mokā ʼe ʼaoga. Ko te ʼu taʼi lotomahino pea mo fakasiosio tonu ʼaia ʼa te kau tagata ʼāfea, ʼe nātou liliu moʼoni ai “ko he nonoʼaga mokā matagi.”—Isaia 32:2; Gaue 6:1-3.
Ko Te Fakaloto Fīmālie Heʼegata Mai Te Hau Foʼou ʼo Te Kele
Ko ia ʼaē neʼe sio fakafiafia ki ai te finematuʼa ko Ana, kua hili nei kiai taʼu e lua afe, kua liliu ko te Hau Faka Mesianike ʼo te Puleʼaga ʼo te ʼAtua ʼi selo. ʼE kua vave hoko mai te temi ʼaē ka pulihi ai e te puleʼaga ʼaia te ʼu meʼa ʼaē ʼe fakatupu ai te mamahi, ʼo kau ai mo te mate. Ki te faʼahi ʼaia, ʼe ʼui fēnei ia Apokalipesi 21:3, 4: “Koeni te nofoaga o te Atua fakatahi mo te hahai . . . E ina holoholo anai ia loimata fuape i onatou fofoga, pea e mole toe mau anai te mate. E mole toe mau anai he putu, pe ko he lauga, pe ko he mamahi, koteuhi kua puli te malama-nei afea.” Neʼe koutou fakatokagaʼi ʼi te vaega ʼaenī ʼe palalau ki te kupu “hahai”? Ei, ʼe ʼāteaina anai te hahaʼi mai te mate, ʼaē ʼe tupu ai te putu pea mo te lāuga.
Kae ʼe ʼi ai te tahi ʼu logo lelei! ʼE toe fakapapau mai e te Tohi-Tapu ʼe toe fakatuʼuake anai te kau mate. “ ʼE hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe nātou logo anai ki [te] leʼo [ʼo Sesu] pea ʼe nātou hū mai anai ki tuʼa.” (Soane 5:28, 29, MN ) Ohage ko Lasalo ʼaē neʼe fakatuʼuake e Sesu mai te mate, ʼe nātou hū mai anai ki tuʼa ko he ʼu sino kakano, kae mole ko he ʼu laumālie. (Soane 11:43, 44) Ki muli age “ko nātou ʼaē neʼe nātou fai te ʼu meʼa ʼe lelei” ʼe nātou maʼu anai te maʼuli haohaoa, pea ʼe nātou sisio tonu anai ki te aga faka tāmai ʼa Sehova, koteʼuhi ʼe ina ‘avahi tona nima pea mo fakafimālieʼi te loto ʼo te meʼa fuli pe.’—Pesalemo 145:16.
Ko nātou ʼaē kua mate he tahi neʼe nātou ʼofa mamahi ai pea mo tui ki te ʼamanaki moʼoni ʼaia, ʼe ko he meʼa fakatupu loto fīmālie kia nātou. (1 Tesalonika 4:13) Koia kapau ko koutou ko he fafine vitua, koutou falala ko te “faikole tuumau” ʼe ina fakafimālie mo tokoni atu kia koutou ʼi te ʼaho fuli ke koutou ʼutaki tokotou ʼu kavega kehekehe. (1 Tesalonika 5:17; 1 Petelo 5:7) Pea koutou lau ʼi te ʼaho fuli te Folafola ʼa te ʼAtua, ke fakafimālieʼi koutou e te ʼu manatu ʼa te ʼAtua. Kapau ʼe koutou fai te ʼu meʼa ʼaia, pea ʼe koutou sio anai peʼe feafeaʼi te tokoni ʼa Sehova kia koutou ke koutou maʼu te tokalelei logola te ʼu ʼahiʼahi pea mo te ʼu faigataʼaʼia ʼaē ʼe tau mo koutou.
[Paki ʼo te pasina 5]
Moʼo tokoni ki he vitua, ʼe tonu ke fakafuafua lelei takita fakaʼapaʼapa ki tona loto faʼifaʼitaliha pea mo te tokoni ʼaē ke foaki kia ia mokā ʼaoga
[Paki ʼo te pasina 7]
Ko te finematuʼa vitua ko Ana neʼe tapuakinaʼi e te ʼAtua