“Kotou Fakafeagai Ki Te Tēvolo” Ohagē Ko Tona Fai e Sesu
“Kotou fakafeagai ki te Tēvolo, pea ʼe hola mamaʼo anai iā koutou.”—SAKE 4:7.
1. Koteā ʼaē neʼe ʼiloʼi e Sesu ʼo ʼuhiga mo te fakafeagai ʼaē kā tau anai mo ia ʼi tana maʼuli ʼi te kele, pea koteā anai tona ikuʼaga?
NEʼE ʼiloʼi e Sesu Kilisito ʼe fakafeagai anai ia te Tēvolo kiā te ia. Neʼe hā lelei ia te faʼahi ʼaia ʼi te ʼu palalau ʼa te ʼAtua ki te gata, ʼaē ʼi tona fakahagatonu neʼe ina fai ia ki te laumālie agakovi mo agatuʼu ʼaē neʼe ina fakaʼaogaʼi ia te gata. Neʼe ʼui fēnei e te ʼAtua: “ ʼE au tuku anai he fehiʼa iā te koe pea mo te fafine [te kautahi ʼa Sehova ʼaē ʼe ʼi selō], ʼi tou hako pea mo tona hako. Pea ʼe ina [ia Sesu Kilisito] maumauʼi anai koe ʼi tou ʼulu pea ʼe ke maumauʼi anai ia ia ʼi tona muli vaʼe.” (Sen. 3:14, 15; Fakh. 12:9) Ko te maumauʼi ʼo Sesu ʼi tona muli vaʼe, ko tona fakaʼuhiga ʼe lavea fakatemi anai heʼe matehi anai ʼi tana lolotoga maʼuli ʼi te kele pea fakatuʼuake anai ia e Sehova ki te kolōlia ʼi selō. Kae ko te maumauʼi ʼo te gata ʼi tona ʼulu, ko tona fakaʼuhiga ʼe tāʼi anai te Tēvolo pea ʼe mole toe maʼuli anai.—Lau ia Gāue 2:31, 32; Hepeleo 2:14.
2. He koʼē neʼe falala ia Sehova ko Sesu ʼe ina lava tauʼi anai ia te Tēvolo?
2 Neʼe falala ia Sehova ʼe lava fakahoko anai e Sesu tana gāue pea mo fakafeagai ki te Tēvolo lolotoga tana maʼuli ʼi te kele. He koʼē neʼe feala ke tui papau ia Sehova ki te faʼahi ʼaia? Heʼe ko ia ʼaē neʼe ina fakatupu ia Sesu ʼi selō fualoa ki muʼa atu, neʼe sio ki tana ʼu gāue, pea neʼe ina ʼiloʼi ko te “tufuga faiva” ʼaia pea mo “te ʼuluaki-tupu [ʼaia] ʼo te ʼu meʼa fuli ʼaē neʼe fakatupu” neʼe fakalogo pea mo agatonu. (Taag. 8:22-31; Kol. 1:15) Koia ʼi te temi ʼaē neʼe fekauʼi ifo Sesu ki te kele pea mo tuku ke ʼahiʼahiʼi ia ia e te Tēvolo ʼo aʼu ki tona matehi, neʼe falala pē ia te ʼAtua ko Tona ʼAlo ʼulu tokotahi ʼe mālo anai.—Soa. 3:16.
ʼE Taupau e Sehova Tana ʼu Kaugana
3. ʼE feafeaʼi ia te Tēvolo ki te ʼu kaugana ʼa Sehova?
3 Neʼe ʼui e Sesu ʼo ʼuhiga mo te Tēvolo ʼe ko “te pule ʼo te mālama ʼaenī” pea neʼe ina fakatokaga ki Tana kau tisipulo ʼe fakatagaʼi anai nātou ohagē pē ko ia. (Soa. 12:31; 15:20) Ko te mālamanei, ʼaē ʼe takoto ʼi te mālohi ʼo Satana te Tēvolo, ʼe fehiʼa ki te kau Kilisitiano heʼe natou tauhi kiā Sehova pea ko he kau fai fakamafola ʼo te faitotonu. (Mat. 24:9; 1 Soa. 5:19) ʼE fakatagaʼi tāfito e te Tēvolo ia te toe ʼo te kau fakanofo ʼaē kā kaugā hau anai mo Kilisito ʼi tona Puleʼaga ʼi selō. ʼE toe fakatagaʼi e Satana ia te kau Fakamoʼoni ʼa Sehova e tokolahi ʼaē ko tanatou ʼamanaki, ko te maʼuli ʼo heʼegata ʼi te palatiso ʼi te kele. ʼI te Folafola ʼa te ʼAtua, ʼe fai mai kiā tātou ia te fakatokaga ʼaenī: “Ko tokotou fili, ia te Tēvolo, ʼe feʼaluʼaki ohagē ko he laione ʼe gugulu, ʼo ina kumi ke ina kai he tahi.”—1 Pet. 5:8.
4. Koteā te fakamoʼoni ʼe lava fakafeagai te hahaʼi ʼa te ʼAtua ki te Tēvolo ʼi te temi nei?
4 Mai tona ʼaluʼaga ʼaē, ʼe tou kau ki te kautahi ʼaē ʼe lagolago kiai ia Sehova ʼAtua, ʼe tou lava fakafeagai ai ki te Tēvolo. Kotou tokagaʼi ia te ʼu faʼahi ʼaenī: Iā taʼu e 100 ki muʼa atu, ko ʼihi kau pule agakovi ʼaupitō ʼo te tuʼu ʼaenī neʼe natou faiga ke natou molehi ia te kau Fakamoʼoni ʼa Sehova. Kae neʼe haga tuputupu aipē ia te kaugamālie ʼa te kau Fakamoʼoni pea ʼi te temi nei kua natou teitei toko 7 000 000 iā kōkelekāsio e 100 000 tupu ʼi te kele. Ko te kau pule agakovi ʼaupitō ʼaē neʼe natou fakatagaʼi ia te hahaʼi ʼa Sehova, kua mamate ia!
5. Neʼe hoko feafeaʼi ia te ʼu palalau ʼaē iā Isaia 54:17 ki te ʼu kaugana ʼa Sehova?
5 ʼI tana ʼui ʼaē ʼo ʼuhiga mo te kōkelekāsio ʼo Iselaele ʼo te temi muʼa ko tona “ ʼohoana,” neʼe fakapapau fēnei e te ʼAtua: “ ʼE mole mālo anai te ʼu mahafu tau fuli ʼaē kā faʼu anai moʼo fakafeagai kiā te koe, pea ko te ʼu lea fuli ʼaē ʼe fakafeagai anai kiā te koe ʼi he fakamāu, ʼe ke fakalakahalaʼi anai. Koʼenā te tofiʼa ʼa te kau kaugana ʼa Sehova, pea ko tanatou faitotonu ʼe haʼu mai iā te au.” (Isa. 54:11, 17) Ko te fakapapau ʼaenī neʼe hoko ki te hahaʼi ʼa Sehova ʼi te kele kātoa lolotoga “te ʼu ʼaho fakamuli” ʼaenī. (2 Tim. 3:1-5, 13) ʼE tou haga fakafeagai ki te Tēvolo, pea ko he mahafu pē ʼe ina fakaʼaogaʼi anai moʼo fakaʼauha te hahaʼi ʼa te ʼAtua, ʼe fua noa anai, koteʼuhi ko Sehova ʼe kau mo nātou.—Pes. 118:6, 7.
6. Koteā ʼaē ʼe ʼui mai e te lea fakapolofetā ʼa Taniela ʼo ʼuhiga mo te kā haʼu ʼa te pule ʼa te Tēvolo?
6 ʼI te kua ovi fakavilivili mai ia te fakaʼosi ʼo te tuʼu agakovi kātoa ʼaenī, ko te ʼu faʼahi fuli ʼo te pule ʼa Satana ʼe pulihi kātoa anai. ʼI tana tohi ʼaki te takitaki ʼa te ʼAtua, neʼe fakakikite fēnei e te polofetā ko Taniela: “ ʼI te ʼu ʼaho ʼo te ʼu hau ʼaia [ʼaē ʼe tuʼu ʼi totatou temi] ko te ʼAtua ʼo te lagi ʼe ina fakatuʼu anai he puleʼaga [ʼi selō] ʼe mole pulihi anai ʼi he temi. Pea ko te puleʼaga ʼaia ʼe mole tuku anai ki he tahi hahaʼi. ʼE ina laliki anai pea mo fakagata anai te ʼu puleʼaga fuli ʼaia [ʼaē ʼe tuʼu ʼi totatou temi], pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.” (Tan. 2:44) Kā hoko anai ia te faʼahi ʼaia, ʼe pulihi anai ia te pule ʼa Satana pea mo te kau takitaki agahala. Ko te ʼu faʼahi kehekehe fuli ʼo te tuʼu ʼa te Tēvolo ʼe fakaʼauha anai ʼo talu ai, pea ʼe pule anai ia te Puleʼaga ʼa te ʼAtua ki te kele kātoa, pea mole he tahi kā fakafeagai kiai.—Lau ia 2 Petelo 3:7, 13.
7. ʼE tou ʼiloʼi feafeaʼi ko te ʼu kaugana ʼa Sehova takitokotahi ʼe feala ke natou mālo ʼi tanatou fakafeagai ʼaē ki te Tēvolo?
7 ʼE mahino papau ia, ʼe puipui anai ia te kautahi ʼa Sehova pea mo tuputupu anai ʼi te faʼahi fakalaumālie. (Lau ia Pesalemo 125:1, 2.) ʼE feafeaʼi kiā tātou? ʼE ʼui mai ʼi te Tohi-Tapu, ʼe feala ke tou mālo ʼi tatatou fakafeagai ʼaē ki te Tēvolo, ohagē pē ko Sesu. ʼE moʼoni, ʼi te lea fakapolofetā ʼaē neʼe foaki e Kilisito ki te ʼapositolo ko Soane, ʼe fakahā ai logolā ia te fakafeagai ʼa Satana, kae ko “te toe hahaʼi tokolahi” ʼaē ʼe ʼamanaki māʼuʼuli ʼi te kele, ʼe natou hao anai ʼi te fakaʼosi ʼo te tuʼu ʼaenī. Ohagē ko tona ʼui ʼi te Tohi-Tapu, ʼe natou kalaga fēnei: “Ko te fakamaʼuli, ʼe tou maʼu mai totatou ʼAtua, ʼaē ʼe ʼafio ʼi te hekaʼaga fakahau, pea mo te ʼAkeno [ia Sesu Kilisito].” (Fakh. 7:9-14) ʼE ʼui ʼo ʼuhiga mo te kau fakanofo ʼe natou mālo iā Satana, pea ko tonatou ʼu kaumeʼa, te “tahi ʼu ovi,” ʼe natou toe mālo foki ʼi tanatou fakafeagai ʼaē kiā ia. (Soa. 10:16; Fakh. 12:10, 11) Kae ʼe tonu ke tou faiga ʼaupitō pea mo faikole fakamālotoloto ke ‘haofaki tātou mai te agakovi.’—Mat. 6:13.
Te Faʼifaʼitaki Haohaoa ʼo ʼUhiga Mo Te Fakafeagai ʼAē Ki Te Tēvolo
8. Koteā ia te ʼuluaki fakahala ʼaē neʼe fakaʼaogaʼi e te Tēvolo moʼo ʼahiʼahiʼi ia Sesu ʼi te toafa, pea neʼe koteā te tali ʼa Kilisito kiai?
8 Neʼe faigaʼi e te Tēvolo ke ina maumauʼi ia te agatonu ʼa Sesu. ʼI te toafa, neʼe fakaʼaogaʼi e Satana ia te ʼu fakahala ʼi tana faiga ʼaē ke talagataʼa ia Sesu kiā Sehova. Kae neʼe tuku e Sesu ia he faʼifaʼitaki haohaoa ʼo ʼuhiga mo te fakafeagai ʼaē kiā Satana. ʼI tana ʼaukai iā ʼaho e 40 pea mo pō e 40, neʼe kua lahi ʼaupitō ia te fia kai ʼaē ʼa Sesu. Neʼe ʼui fēnei age e Satana: “Kapau ko te ʼalo koe ʼo te ʼAtua, fekau ki te ʼu maka ʼaenī ke liliu ko he ʼu pane.” Kae neʼe mole fia fakaʼaogaʼi e Sesu ia te mālohi ʼaē neʼe foaki age e tona ʼAtua moʼo fai ia he meʼa maʼa ia totonu pē. Kae neʼe ʼui fēnei age e Sesu: “ ʼE tohi fēnei: ‘Ko te tagata ʼe mole tonu ke maʼuli ʼaki pē te pane, kae ʼaki te folafola fuli pē ʼe haʼu mai te gutu ʼo Sehova.’ ”—Mat. 4:1-4; Teu. 8:3.
9. He koʼē ʼe tonu ke tou tauʼi ia te ʼu faiga ʼa te Tēvolo ke ina fakaʼaogaʼi kovi te ʼu holi fakasino ʼaē ʼe tou maʼu?
9 Iā ʼaho nei, ʼe faiga ia te Tēvolo ke ina fakaʼaogaʼi kovi ia te ʼu holi fakasino ʼaē ʼe maʼu e te ʼu kaugana ʼa Sehova. Koia tou fakatotonu ke tou tauʼi ia te ʼu fakahala ʼo ʼuhiga mo te ʼu felāveʼi fakasino heʼeʼaoga, ʼaē ko he ʼu agamāhani ʼe fai ʼi te mālama heʼeʼaoga ʼaenī. ʼE fakahā lelei fēnei mai ʼi te Folafola ʼa te ʼAtua: “ ʼE mole kotou ʼiloʼi koa lā ko te kau heʼe agatonu ʼe mole natou maʼu anai te puleʼaga ʼo te ʼAtua? ʼAua naʼa kotou faihala. ʼE mole he tagata fai folonikāsio, he tagata tauhi tamapua, he tagata fai feʼauʼaki, he ʼu tagata ʼe taupau ke fai kiā nātou he ʼu holi ʼe mole tonu ke fai, he ʼu tagata ʼe momoe mo he tahi ʼu tagata, . . . ʼe natou maʼu anai te puleʼaga ʼo te ʼAtua.” (1 Ko. 6:9, 10) Koia, ʼe hā lelei mai ko te hahaʼi ʼaē ʼe māʼuʼuli ʼi te agahala pea ʼe mole natou fia fetogi ia tonatou maʼuli, ʼe mole tali anai ke natou māʼuʼuli ʼi te mālama foʼou ʼa te ʼAtua.
10. ʼO mulimuli kiā Mateo 4:5, 6, koteā te tahi fakahala neʼe fakaʼaogaʼi e Satana ʼi tana faiga ʼaē ke ina maumauʼi ia te agatonu ʼa Sesu?
10 ʼO ʼuhiga mo te tahi fakahala neʼe fai kiā Sesu ʼi te toafa, ʼe ʼui fēnei ʼi te Tohi-Tapu: “Neʼe ʼave ia ia e te Tēvolo ki te kolo tapu, pea ina tuku ia ia ki te fuga fale lotu pea neʼe ʼui māʼana kiā te ia: ‘Kapau ko te ʼalo koe ʼo te ʼAtua, fakatō ia koe ki lalo; heʼe tohi fēnei: “ ʼE ina fai anai ki tana kau ʼāselo he ʼu fakatotonu ʼo ʼuhiga mo koe, pea ʼe natou hapai anai koe ʼi ʼonatou nima, ke ʼaua naʼa tūkia tou vaʼe ki he maka.” ’ ” (Mat. 4:5, 6) Kotou fakakaukauʼi age muʼa, kanapau lā neʼe fai e Sesu ia te faʼahi ʼaia, ʼe feala anai ke maʼu he fakamoʼoni fakaofoofo ko Sesu ʼe ko te Mēsia. Kae ʼi tona fakahagatonu, ʼe mole tali anai e te ʼAtua pea mo lagolago kiai heʼe ko he aga fiatuʼu ia. ʼI te lakaga ʼaia, neʼe toe taupau aipē e Sesu ia tana agatonu ʼaē kiā Sehova pea neʼe ina tali kiai ʼaki he vaega fakatohi-tapu. Neʼe ina ʼui fēnei: “ ʼE tohi fēnei foki: ‘ ʼAua naʼa ke ʼahiʼahiʼi ia Sehova tou ʼAtua.’ ”—Mat. 4:7; Teu. 6:16.
11. ʼE lava fakahalaʼi feafeaʼi tātou e Satana, pea koteā ʼaē ʼe feala ke iku kiai?
11 ʼE lagi fakahalaʼi anai tātou e Satana ke tou kumi ʼi he ʼu ʼaluʼaga kehekehe ke fakakolōliaʼi tātou. ʼE lagi ina toe uga anai tātou ke tou faʼifaʼitakiʼi te ʼu lamote ʼo te mālamanei ʼo ʼuhiga mo te ʼu faʼahiga fai teuteu pea mo te faʼu peʼe ko te helu ʼo te lauʼulu, peʼe ke tou kau ki he ʼu fakafiafia ʼe mole lelei. Kae kapau ʼe mole tou mulimuli ki te tokoni ʼa te Tohi-Tapu kae tou faʼifaʼitakiʼi ia te mālamanei, ʼe feala koa ke tou fakaʼamu ke puipui tātou e te kau ʼāselo mai te ʼu fua kovi ʼo te taʼi aga ʼaia? Logolā neʼe fakahemala ia te Hau ko Tavite mai tana ʼu agahala mo Pati-sepa, kae neʼe mole hao ia mai te ʼu fua kovi ʼo tana ʼu aga. (2 Sam. 12:9-12) ʼAua naʼa tou ʼahiʼahiʼi ia Sehova, ʼo tou fai ia he ʼu meʼa ʼe kovi, ʼo lagi tou fakakaumeʼa mo te mālama.—Lau ia Sake 4:4; 1 Soane 2:15-17.
12. Koteā te fakahala ʼaē neʼe talanoa kiai ia te koga tohi ʼo Mateo 4:8, 9, pea neʼe koteā te tali ʼa te ʼAlo ʼo te ʼAtua kiai?
12 Ko te tahi fakahala neʼe fakaʼaogaʼi e te Tēvolo ʼi te toafa, ko tana foaki ʼaē kiā Sesu ia he pule fakapolitike. Neʼe fakahā age e Satana kiā Sesu ia te ʼu puleʼaga fuli ʼo te mālama pea mo tonatou kolōlia pea neʼe ina ʼui fēnei age: “ ʼE au foaki atu anai kiā te koe te ʼu meʼa fuli ʼaenī mo kapau ʼe ke punou pea mo fai ʼi ʼoku muʼa he ʼatolasio.” (Mat. 4:8, 9) Neʼe ko hana faiga fakakākā ʼaia ke ina maʼu ia ia te tauhi ʼaē ʼe tonu ke fai kiā Sehova pea mo fakanekeneke ia Sesu ke heʼe agatonu ki te ʼAtua! ʼI tana holi ʼaē ke ʼatolasioʼi ia ia e te hahaʼi, ko te ʼāselo ʼaia ʼaē neʼe agatonu ʼi te kamata, neʼe agahala ʼuhi ko tana mānumānu pea mo liliu ai ko Satana te Tēvolo. (Sake 1:14, 15) Kae ʼi te tahi age faʼahi, neʼe fakatotonu e Sesu ke nofo agatonu ki tana Tamai ʼaē ʼe ʼi selō pea ina tali fēnei age: “ ʼAlu, Satana, heʼe tohi fēnei: ‘Ko Sehova, tou ʼAtua, ʼaē ʼe maʼua ke ke ʼatolasio ki ai, pea ʼe ko ia tokotahi pē ʼaē ʼe maʼua ke ke tauhi ki ai ʼaki he tauhi tapu.’ ” Neʼe toe fakafeagai aipē Sesu ki te Tēvolo, ʼo hā lelei te faʼahi ʼaia ʼi tana ʼu palalau. Neʼe mole fia kau ia te ʼAlo ʼo te ʼAtua ki te mālama ʼa Satana pea neʼe mole fia tauhi ia ki te agakovi!—Mat. 4:10; Teu. 6:13; 10:20.
“Kotou Fakafeagai Ki Te Tēvolo, Pea ʼe Hola Mamaʼo Anai Iā Koutou”
13, 14. (a) ʼI tana fakahā age kiā Sesu ia te ʼu puleʼaga fuli ʼo te mālamanei, koteā ʼaē neʼe foaki age e te Tēvolo? (b) ʼE faiga feafeaʼi e Satana ke ina kākāʼi tātou?
13 ʼI tana fakahā age kiā Sesu ia te ʼu puleʼaga fuli ʼo te kele, neʼe foaki age e te Tēvolo ia te pule neʼe mole heʼeki maʼu e he tagata. Neʼe fakaʼamu e Satana ke fia maʼu e Sesu ia te ʼu meʼa ʼaē neʼe sio kiai pea mo manatu ai ʼe feala ke liliu ko te takitaki fakapolitike mālohi tokotahi ʼo te kele. Iā ʼaho nei, ʼe mole foaki mai e te Tēvolo he ʼu puleʼaga, kae ʼe faiga ia ke ina ʼulihi totatou loto ʼaki ni ʼu meʼa ʼe tou sio kiai, mo logo kiai pea mo tatatou ʼu manatu.
14 ʼE puleʼi e te Tēvolo ia te mālamanei. ʼE ina puleʼi ia te ʼu meʼa fuli ʼaē ʼe tou sio mo fakalogo kiai, pea mo lau. Koia ʼe mole tou punamaʼuli ai, ko te ʼu meʼa ʼaē ʼe tou sio mo fakalogo kiai, pea mo lau ʼi te mālamanei, ʼe maʼu tāfito ai te aga heʼeʼaoga pea mo te agamālohi. Ko te ʼu fakahāhā ʼaia ʼi te mālama ʼe natou faiga ke tuputupu iā tātou ia te holi ʼaē ki he ʼu tuʼuga koloa ʼe mole ʼaoga kiā tātou. ʼAki te ʼu faʼahi ʼaia, ʼe fakahalaʼi tuʼumaʼu pē tātou e te Tēvolo ʼaki hana fakalalata mai ia te ʼu koloa, te ʼu meʼa ʼe leleiʼia e totatou ʼu mata, totatou ʼu taliga pea mo tatatou ʼu manatu. Kae kā tou fakafisi ke tou sio, mo fakalogo pea mo lau he ʼu meʼa ʼe mole ʼalutahi mo te ʼu pelesepeto ʼa te Tohi-Tapu, ʼe fakaʼuhiga pē ʼe tou ʼui fēnei: “ ʼAlu, Satana!” ʼE tou faʼifaʼitakiʼi ai ia Sesu ʼi tatatou fakafisi mālohi ki te mālama ʼuli ʼaenī ʼa Satana. ʼE toe hā tatatou mole kau ki te mālama ʼa Satana ʼaki tatatou fakahā fakahagatonu ʼaē ʼi te fale gāue, ʼi te faleako, mo totatou ʼu vāhaʼa fale pea mo totatou ʼu kāiga, ko tātou ko te kau Fakamoʼoni ʼa Sehova pea mo te ʼu tisipulo ʼa Kilisito.—Lau ia Maleko 8:38.
15. He koʼē ʼi tatatou fakafeagai kiā Satana ʼe tonu ke tou nonofo tōkakaga tuʼumaʼu?
15 ʼI te fua noa ʼa te ʼu fakahala tuʼa tolu ʼaia ʼa te Tēvolo ia Sesu ke ina maumauʼi Tana agatonu ʼaē ki te ʼAtua, neʼe “tukunoaʼi ai e te Tēvolo.” (Mat. 4:11) Kae neʼe mole gata aipē e Satana ia tana fakahalaʼi ʼaē ia Sesu, heʼe ʼui fēnei mai: “Pea ko te Tēvolo, ʼi tana kua fakahoko fuli tana fakahala [ʼi te toafa], neʼe mavae mai iā te ia ʼo aʼu ki he tahi temi faigamālie.” (Luka 4:13) Kā neʼe tou lava fakafeagai ki te Tēvolo, ʼe tonu ke tou fakamālo kiā Sehova. Kae ʼe tonu foki ke tou kole tuʼumaʼu ke tokoni mai te ʼAtua, heʼe ko te Tēvolo ʼe toe liliu mai anai moʼo fakahalaʼi tātou ʼi he tahi temi ʼe ina leleiʼia age—pea lagi ʼi he temi ʼe mole tou ʼamanaki ke fakahalaʼi ai tātou. Koia, ʼe tonu ke tou nonofo tōkakaga tuʼumaʼu, ʼo tou kātaki ʼo fakahoko te tauhi taputapu kiā Sehova tatau aipē peʼe koteā totatou ʼu ʼahiʼahiʼi.
16. Koteā te mālohi ʼaē ʼe foaki mai e Sehova, pea he koʼē ʼe tonu ke tou kole ia te mālohi ʼaia?
16 Moʼo tokoni mai ki tatatou ʼu faiga ʼaē ke tou fakafeagai ki te Tēvolo, ʼe tonu ke tou kole ia te mālohi ʼaē ʼe lahi tokotahi ʼi te ʼatulaulau, ia te laumālie māʼoniʼoni ʼo te ʼAtua, pea ʼe foaki mai anai. ʼE feala ai anai ke tou fai he ʼu meʼa ʼe mole tou lava fai ʼaki pē totatou mālohi. Neʼe fakapapau e Sesu ki tana kau tisipulo, ʼe feala ke natou maʼu ia te laumālie ʼo te ʼAtua, ʼi tana ʼui fēnei: “Kapau ko koutou, logopē takotou [agahala pea mo] agakovi, ʼe kotou popoto ʼi te foaki ki ʼakotou ʼu fānau he ʼu meʼa ʼofa ʼe lelei, e feafeaʼi leva lā te lahi ake ia ʼo te foaki e te Tamai ʼaē ʼi selō te laumālie māʼoniʼoni kiā nātou ʼaē ʼe natou kole kiā te ia!” (Luka 11:13) Tou haga kole kiā Sehova ia tona laumālie māʼoniʼoni. ʼI tatatou kua maʼu ia te toe mālohi ʼaia moʼo tokoni mai ki tatatou fakatotonu ʼaē ke tou fakafeagai ki te Tēvolo, ʼe feala pē anai ke tou mālo. ʼO mole gata pē ʼi tatatou ʼu faikole tuʼumaʼu pea mo fakamālotoloto, ʼe ʼaoga ke tou kofuʼi mo te teu tau fakalaumālie mai te ʼAtua, ke feala ai hatatou ‘tutuʼu mālohi ʼo fakafeagai ki te ʼu kākā, peʼe ko te ʼu gāue kākā ʼa te Tēvolo.’—Efe. 6:11-18, kiʼi nota.
17. Koteā te fiafia ʼaē neʼe tokoni kiā Sesu ke fakafeagai ki te Tēvolo?
17 ʼE ʼi ai te tahi faʼahi neʼe tokoni ai kiā Sesu ke fakafeagai ki te Tēvolo, pea ʼe feala ke toe tokoni mai kiā tātou. ʼE ʼui fēnei ʼi te Tohi-Tapu: “ ʼUhi ko te fiafia ʼaē neʼe fakapapau age kiā te ia [kiā Sesu], neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” (Hep. 12:2) ʼE tou lava maʼu ia te fiafia ʼaia mokā tou lagolago ki te pule ʼa Sehova, mo fakaʼapaʼapa ki tona huafa, pea mo tou manatuʼi tuʼumaʼu ia te fakapale ʼaē ʼo te maʼuli heʼegata. ʼE lahi anai tatatou fiafia mokā ʼe fakaʼauha anai ʼo talu ai ia Satana pea mo tana ʼu gāue fuli pea kā ‘maʼu e te kau agavaivai ia te kele pea mo fakafiafia ʼi te mahu ʼo te tokalelei’! (Pes. 37:11) Koia tou haga fakafeagai ki te Tēvolo ohagē ko tona fai e Sesu.—Lau ia Sake 4:7, 8.
ʼE Kotou Tali Feafeaʼi Anai?
• Koteā te fakamoʼoni ʼaē ko Sehova ʼe ina taupau tana hahaʼi?
• Koteā te faʼifaʼitaki ʼaē neʼe tuku e Sesu ʼo ʼuhiga mo te fakafeagai ʼaē kiā Satana?
• Ko te ʼu faʼahi fea ʼaē ʼe feala ai ke kotou fakafeagai ki te Tēvolo?
[Paki ʼo te pasina 26]
Kapau ʼe tou kaumeʼa mo te mālama pea ʼe tou liliu ai ko he fili ʼo te ʼAtua
[Paki ʼo te pasina 29]
Neʼe fakafisi Sesu ki te ʼu puleʼaga fuli pē ʼo te mālamanei ʼaē neʼe foaki age e Satana